პოლიტიკა
ვლადიმერ პუტინი სომხეთისა და აზერბაიჯანის საგარეო მინისტრებს კონსულტაციებისთვის დღეს მოსკოვში იწვევს
რუსეთის პრეზიდენტი ვლადიმერ პუტინი სომხეთისა და აზერბაიჯანის საგარეო საქმეთა მინისტრებს მთიანი ყარაბაღის კონფლიქტთან დაკავშირებით კონსულტაციებისთვის დღეს მოსკოვში იწვევს, - ამის შესახებ ინფორმაციას რუსული მედია ავრცელებს. „აზერბაიჯანის პრეზიდენტ ილჰამ ალიევსა და სომხეთის პრემიერ-მინისტრ ნიკოლ ფაშინიანთან მთელი რიგი სატელეფონო საუბრების შემდეგ, რუსეთის ფედერაციის პრეზიდენტი მხარეებს მოუწოდებს, შეაჩერონ მიმდინარე საბრძოლო მოქმედებები მთიანი ყარაბაღის კონფლიქტის ზონაში ჰუმანიტარული მიზეზების გამო, გვამებისა და პატიმრების გაცვლის მიზნით“, - ნათქვამია კრემლის პრესსამსახურის მიერ გავრცელებულ განცხადებაში. „ამ საკითხებზე კონსულტაციების გასამართად, რუსეთის საგარეო საქმეთა მინისტრის შუამავლობით, აზერბაიჯანისა და სომხეთის საგარეო საქმეთა მინისტრები მოწვეულნი არიან მოსკოვში 9 ოქტომბერს“, - აღნიშნულია განცხადებაში.
სვეტლანა ტიხანოვსკაია რუსეთის შსს-ს ძებნილთა ბაზაში შეიყვანეს
ბელარუსის პრეზიდენტობის ყოფილი კანდიდატი, სვეტლანა ტიხანოვსკაია რუსეთის შინაგან საქმეთა სამინისტროს ძებნილთა ბაზაში შეიყვანეს, - ამის შესახებ "რია ნოვოსტი" იუწყება. ამასთან, რუსეთის შსს-ში განმარტავენ, რომ ტიხანოვსკაიას ბაზაში შეყვანა დსთ-ს ქვეყნებში დანაშაულთან ბრძოლის ფარგლებში ხდება და მის წინააღმდეგ კონკრეტული სისხლის სამართლის საქმეები არ აღუძრავთ. შეგახსენებთ, რომ სვეტლანა ტიხანოვსკაია ბელარუსი ოპოზიციონერია, რომელიც საპრეზიდენტო არჩევნებში მონაწილეობდა. არაოფიციალური მონაცემებით მან ქვეყნის მოქმედი პრეზიდენტი, ალექსანდრ ლუკაშენკო დაამარცხა, თუმცა ცესკოს შედეგებით ტიხანოვსკაიამ ხმათა 10% მოიპოვა. ამის შემდეგ მან ქვეყანა დატოვა და ლიეტუვაში გაემგზავრა.
ამერიკის ჯარები ავღანეთიდან წლის ბოლომდე გავლენ
აშშ-ის პრეზიდენტმა დონალდ ტრამპის განცხადებით, აშშ-ის ჯარებმა ავღანეთი წლის ბოლომდე უნდა დატოვონ. ამის შესახებ ტრამპმა "ტვიტერში" მას შემდეგ განაცხადა, რაც პრეზიდენტის მრჩეველმა სახელმწიფო უშიშროების საკითებში განაცხადა, რომ 2021 წლის დასაწყისისთვის ავღანეთში აშშ-ის ჯარების რაოდენობა ხუთიდან ორნახევარ ათასამდე შემცირდება. ამერიკელი სამხედროების გასვლა ავღანეთიდან გათვალისწინებულია შეთანხმებით აშშ-ს, ავღანეთის მთავრობასა და რადიკალურ მოძრაობა თალიბანს შორის. შეთანხმება თებერვალში შედგა. ის ითვალისწინებს ამერიკელი სამხედროების მთლიანად გაყვანას ავღანეთიდან 2021 წლის მაისამდე, რის სანაცვლოდაც თალიბებმა პირობა დადეს, რომ იბრძოლებენ ისლამისტებთან და მოლაპარაკებებს გამართავენ ავღანეთის მთავრობასთან.
ზალკალიანი დანიის ელჩზე: უნდა დაერეკა და ეკითხა, რა მდგომარეობაა
საქართველოს საგარეო საქმეთა მინისტრის, დავით ზალკალიანის თქმით, მისთვის სიურპრიზი იყო დანიის სამეფოსა და ისლანდიის რესპუბლიკაში საქართველოს ელჩის გიგი გიგიაძის კომენტარი საქართველო-აზერბაიჯანის საზღვრის დელიმიტაცია-დემარკაციის კომისიასთან დაკავშირებით. საგარეო საქმეთა მინისტრმა მთავრობის სხდომის შემდეგ გამართულ ბრიფინგზე განაცხადა, რომ გიგი გიგიაძეს სამინისტროსთან აღნიშნულ საკითხზე კომუნიკაცია არ ჰქონია. მინისტრი ამბობს, რომ განცხადების გაკეთებამდე უმჯობესი იყო ელჩს საკითხი სამინისტროსთან გაერკვია: „მეც გამიკვირდა, რადგანაც იცით თქვენ, რომ ჩვეულებრივი კოლეგიალურობიდან გამომდინარე, ელჩის პოზიციიდან გამომდინარე, ელჩი როდესაც რაიმე სახის განცხადებას აკეთებს, მითუმეტეს ასეთ უაღრესად მგრძნობიარე თემაზე, მას უნდა დაერეკა, ეკითხა ჩვენთვის რა მდგომარეობაა, რასთან გვაქვს საკითხი? ასეთი ზარი არ შემოსულა, ჩემთვისაც სიურპრიზი იყო. მან ეს განცხადება თუ არ ვცდები „ფეისბუქ“ პოსტის სახით გამოაქვეყნა ეს და მისი ერთგვარი ემოციური დამოკიდებულება იყო კოლეგის მიმართ. მე არ მქონია სამწუხაროდ მასთან კომუნიკაცია. რა თქმა უნდა ჩვენ გვექნება მასთან კომუნიკაცია და აუცილებლად მიეწოდება ყველა ინფორმაცია. რა თქმა უნდა, იგივე გამოძიების პროცესში რაც კი საზოგადოებისთვის ცნობილია, ყველა ეს ინფორმაცია მისთვისაც ხელმისაწვდომი იქნება. “,- განაცხადა დავით ზალკალიანმა. საქართველო-აზერბაიჯანის საზღვრის საქმეზე ივერი მელაშვილისა და ნატალია ილიჩოვას დაკავებას 7 ოქტომბერს „ფეისბუკზე" გამოეხმაურა საქართველოს ელჩი დანიაში და ისლანდიის რესპუბლიკაში გიგი გიგიაძე. ის 2014-2016 წლებში საგარეო საქმეთა მინისტრის მოადგილე იყო. „სრულ მხარდაჭერას ვუცხადებ ივერი მელაშვილს, რომელსაც პირადად ვიცნობ 1997 წლიდან და მიმაჩნია, რომ ის არის საკუთარი ქვეყნის, საქართველოს გამორჩეული პატრიოტი, ჩვენი სახელმწიფო საზღვრის დელიმიტაცია-დემარკაციის პროცესის პროფესიონალი და შეუცვლელი ექსპერტი. წარდგენილი ბრალდება იმდენად აბსურდული და საღ აზრს მოკლებულია, რომ ამაზე კომენტარის გაკეთებაც მიჭირს. იმედს ვიტოვებ, რომ ეს დაწყებული გამოძიება ყველა არსებულ კითხვას ამომწურავ პასუხს გასცემს და სრულიად უდანაშაულო, თავის ქვეყანაზე შეყვარებული ადამიანი მალევე გათავისუფლდება", - წერდა დიპლომატი. ივერი მელაშვილისა და ნატალია ილიჩოვას წინააღმდეგ საქმე აღძრულია სისხლის სამართლის კოდექსის 308-ე მუხლის პირველი ნაწილით გათვალისწინებული დანაშაულის ნიშნებით. 308-ე მუხლი საქართველოს ტერიტორიული ხელშეუხებლობის დარღვევას ეხება, მისი პირველი ნაწილი კი - საქართველოს საწინააღმდეგო მოქმედებას, მიმართულს უცხო ქვეყნისათვის საქართველოს მთელი ტერიტორიის ან მისი ნაწილის გადაცემისაკენ, ან საქართველოს ტერიტორიიდან მისი ნაწილის გამოყოფისაკენ და ისჯება თავისუფლების აღკვეთით ათიდან თხუთმეტ წლამდე. გამოძიების თანახმად, საქართველო-აზერბაიჯანის საზღვრის დელიმიტაცია-დემარკაციის სახელმწიფო კომისიის ყოფილი წევრების, ივერი მელაშვილის და ნატალია ილიჩევას დანაშაულებრივი ქმედების შედეგად, საქართველოს ისტორიულად კუთვნილი ტერიტორიების, დაახლოებით 3500 ჰექტარი ფართობის დაკარგვის საფრთხე შეიქმნა. გენერალური პროკურატურის განცხადებით, ბრალდებულები საზღვრების დელიმიტაციის პროცესში ხელმძღვანელობდნენ არა 1938 წლის, არამედ 1970-80-იან წლებში გამოცემულ რუკებზე დატანილი საზღვრის ხაზებით, რაც არსებითად ეწინააღმდეგება საქართველოს ისტორიულ საზღვარს, მათ შორის დავით გარეჯთან მიმართებაში.
სომხეთში კორონავირუსით გარდაცვლილთა რიცხვმა ათასს გადააჭარბა
სომხეთში კორონავირუსით გარდაცვლილთა რიცხვმა ათასს გადააჭარბა. სომხური რადიო თავისუფლების თანახმად, ქვეყანაში დღეს კორონავირუსით ინფიცირების 718 ახალი შემთხვევა გამოვლინდა, 9 პაციენტი კი გარდაიცვალა. ჯამში სომხეთში ინფიცირების 54 473 შემთხვევაა დადასტურებული, მათგან 45 312 ადამიანი გამოჯანმრთელდა, 1 004 კი გარდაიცვალა. გარდა ამისა, გარდაცვლილია კიდევ 302 ინფიცირებული, რომლებსაც კორონავირუსი ჰქონდათ, თუმცა გარდაცვალება "სხვა მიზეზმა" გამოიწვია. ასეთ პაციენტებს სომხეთი ცალკე აღრიცხავს.
" საერთაშორისო საზოგადოებამ მთიანი ყარაბაღის დამოუკიდებლობა უნდა აღიაროს"
ჩვენი პოზიცია უცველელია, ყარაბაღის საკითხი ძალადობის გზით არ უნდა გადაიჭრას, - ამის შესახებ სომხეთის პრემიერ-მინისტრმა ნიკოლ ფაშინიანმა „ევრონიუსთან“ ინტერვიუში განაცხადა. „ჩვენი პოზიცია უცვლელია, ყარაბაღის საკითხი ძალადობის გზით არ უნდა გადაიჭრას, ძალადობის გზით არანაირი გამოსავლის პოვნა არაა შესაძლებელი. თუმცა აზერბაიჯანის პოლიტიკა არის ყარაბაღის საკითხის ძალადობრივად გადაწყვეტა. სომხეთი კომპრომისისთვის ყოველთვის მზად იყო. აზერბაიჯანი არის მხარე, რომელსაც არანაირი კომპრომისი არ სურს. მათთვის გამოსავალი არის, რომ ყარაბაღელი სომხები გადასახლდნენ, ისინი ყარაბაღის მიღებას ეთნიკური წმენდის გზით აპირებენ,“ - აღნიშნა ფაშინიანმა. მისივე მტკიცებით, სომხების წინააღმდეგ გენოციდის განხორციელებაში საერთაშორისო ტერორისტები არიან ჩართულები. „დღეს გენოციდის განხორციელებაში საერთაშორისო ტერორისტები არიან ჩართულები. ისინი რეგიონში თურქეთმა ჩამოიყვანა. ისინი აზერბაიჯანის მხარეს იბრძვიან. ასე რომ, მსურს ხაზი გავუსვა : თუ გვსურს, ჰუმანიტარული კატასტროფა შევაჩეროთ, თუ გვსურს ეს კონფლიქტი კიდევ უფრო არ გაფართოვდეს, საერთაშორისო საზოგადოებამ მთიანი ყარაბაღის დამოუკიდებლობა უნდა აღიაროს,“- განაცხადა სომხეთის პრემიერმა.
მთავრობა რეანიმატოლოგთა ცალკე ჯგუფს ქმნის, რომელსაც თენგიზ ცერცვაძე უხელმძღვანელებს
საქართველოს პრემიერმინისტრი გიორგი გახარია ჯანდაცვის მინისტრ ეკატერინე ტიკარაძესთან ერთად, კლინიკების წარმომადგენლებს შეხვდა. პრემიერის თქმით, შეიქმნება რეანიმატოლოგთა ცალკე ჯგუფი, რომელიც საქართველოს მასშტაბით მძიმე და კრიტიკული პაციენტების მართვას უხელმძღვანელებს. რეანიმატოლოგთა ჯგუფს თენგიზ ცერცვაძე უხელმძღვანელებს. „დღეს ჯანდაცვის სისტემა არის იმ მდგომარეობაში, რომ ინფიცირებულების რაოდენობის ზრდის ეს ტალღა ვმართოთ. ჩვენი მთავარი მიზანია, სტრუქტურა დავალაგოთ ისე, რომ სტაციონარში მივიდეს მხოლოდ და მხოლოდ ის ადამიანი, ვისაც სტაციონარი სჭირდება. როგორც კი ადამიანი ხვდება საავადმყოფოში, მისი მდგომარეობა მძიმეა ან კრიტიკული, მისი მართვა უკვე საერთო საქმეა, ეს ყველამ ერთად უნდა გავაკეთოთ. ამიტომ ვთვლით, რომ რეანიმატოლოგების ცალკე ჯგუფის გაკეთება იქნება სწორი. რა თქმა უნდა, კლინიკური ჯგუფის ის ცოდნა, რომელიც დაგროვილია, ყველამ უნდა გამოვიყენოთ", - განაცხადა გიორგი გახარიამ. მისი თქმით, კორონავირუსის პირველი ტალღის წარმატებას ჰყავდა თავისი გმირები და სახეები. "ახლა ქვეყანა შედის მეორე ტალღაში, სადაც სხვა რიგის პრობლემები დგას და უნდა გაჩნდნენ ახალი გმირები, რომლებიც ამ ღირსეულ კოჰორტას უნდა შეემატონ", - აღნიშნა პრემიერმა. ამ დროისთვის ქვეყანაში ვირუსის 10225 შემთხვევაა დადასტურებული. აქედან 5553 პაციენტი განიკურნა, ხოლო 66 გარდაიცვალა.
რუსეთმა ბელარუსის ოპოზიციის ლიდერი სვეტლანა ტიხანოვსკაია ძებნილთა სიაში შეიყვანა
რუსეთმა ბელარუსის ოპოზიციის ლიდერი სვეტლანა ტიხანოვსკაია სისხლის სამართლის დანაშაულისთვის სახელმწიფოთაშორის ძებნილთა სიაში შეიყვანა. ამის შესახებ ინფორმაცია რუსეთის პოლიციის მონაცემთა ბაზაში იძებნება, თუმცა მითითებული არ არის რა მუხლის საფუძველზე. რუსული მედიის მიხედვით, ტიხანოვსკაიას ძებნითა სიაში დამატება ავტომატურად მოხდა მას შემდეგ, რაც ის მსგავს სიაში ბელარუსმა შეიყვანა. ბელარუსში მის წინააღმდეგ საქმე ძალაუფლების ხელში ჩაგდების მცდელობის ბრალდებით არის აღძრული. ამავე ბრალდებით უკვე დააკავეს ბელარუსის საკოორდინაციო საბჭოს თითქმის ყველა წევრი. სვეტლანა ტიხანოვსკაიამ არჩევნების შემდეგ ქვეყანა დატოვა და თავს ლიტვას აფარებს, თუმცა უკანასკენლ დღეებში ის გერმანიაში იმყოფებოდა და კანცლერ ანგელა მერკელს შეხვდა. გერმანიაში იმყოფება საკოორდინაციო საბჭოს წევრი, ნობელიატი მწერალი სვეტლანა ალექსიევიჩიც. ასევე ავტომატურად ამოქმედდა რუსეთში ევროკავშირისათვის დაწესებული ის სანქციები, რაც ბელარუსმა შემოიღო მას შემდეგ, რაც ევროკავშირის ქვეყნებმა ქვეყანაში ჩატარებული არჩევნების ლეგიტიმურობა არ აღიარეს და ლუკაშენკოს მთავრობას სანქციები დაუწესეს. 9 აგვისტოს საპრეზიდენტო არჩევნების შემდეგ ბელარუსში დაწყებულ საპროტესტო აქციებზე 12 000-ზე მეტი დემონსტრანტი დააკავეს. არჩევნების შედეგების თანახმად ალექსანდრ ლუკაშენკომ ხმების 80%-ზე მეტი მოაგროვა. ოპოზიცია და მოსახლეობა არჩევნების შედეგებს არ ცნობს და მათ გაყალბებულად მიიჩნევს. ევროკავშირი, კანადა, გერმანია, სლოვაკეთი, ლიტვა, ლატვია და ესტონეთი ალექსანდრ ლუკაშენკოს ლეგიტიმურ პრეზიდენტად არ ცნობენ.
"ცეცხლის შეწყვეტა ცალმხრივად არ მიიღწევა, ეს ორმხრივი გადაწვეტილება უნდა იყოს"
ცეცხლის შეწყვეტა ცალმხრივად არ მიიღწევა, ეს ორმხრივი გადაწვეტილება უნდა იყოს, - ამის შესახებ აზერბაიჯანის პრეზიდენტმა ილჰამ ალიევმა „ევრონიუსთან“ ინტერვიუში განაცხადა. პრეზიდენტ ალიევის თქმით, მათ ქვეყანას თავს სომხეთი დაესხა და აზერბაიჯანმა წარმატებული საპასუხო შეტევა განახორციელა. „ჩვენი კონტრშეტევა წარმატებული იყო. ოკუპირებული ტერიტორიების ნაწილი გავათავისუფლეთ, ჩვენი მთავარი მიზანია აზერბაიჯანის ტერიტორიული მთლიანობის აღდგენა. სომხეთმა ოკუპირებული ტერიტორიებიდან ჯარის გაყვანის გრაფიკი უნდა მოგვაწოდოს, ეს გრაფიკი მინსკის ჯგუფის თანათავმჯდომარეების მიერ უნდა იყოს დამტკიცებული და სწორედ ამის შემდეგ უნდა დაიწყოს ცეცხლის შეწყვეტის მიღწევის მცდელობა,“- აღნიშნა ილჰამ ალიევმა. მისივე თქმით, აზერბაიჯანი ცეცხლის შეწყვეტის მომხრეა, მაგრამ მას ოკუპაციის დასრულება სურს. „გვსურს, შევჩერდეთ, მაგრამ გვსურს, ოკუპაცია შეწყდეს. ჩვენ სომხეთის მიწაზე არ ვართ, ჩვენ ჩვენს მიწაზე ვიმყოფებით,“- აღნიშნა ალიევმა.
საერთაშორისო შუამავლებმა თურქეთი უნდა დაარწმუნონ, რომ თამაშიდან გავიდეს - არმენ სარქისიანი
სომხეთის პრეზიდენტი არმენ სარქისიანი მიიჩნევს, რომ ყარაბაღში ცეცხლის შეწყვეტა შესაძლებელი იქნება მხოლოდ მას შემდეგ, რაც „თამაშიდან გავა თურქეთი“. „ამჟამად ყარაბაღში რეალური ომია, რომლისთვისაც აზერბაიჯანი და თურქეთი დიდი ხანია ემზადებოდნენ. ცეცხლის შეწყვეტა შესაძლებელი იქნება მხოლოდ იმ შემთხვევაში, როდესაც მესამე მოთამაშე გავა თამაშიდან“, - განაცხადა პრეზიდენტმა რუს ჟურნალისტებთან შეხვედრისას. მისი თქმით, კონფლიქტში ანკარას ჩართულობის გამო, ეს ქვეყანა ვერ იქნება შუამავალი ყარაბაღის პრობლემის დარეგულირების საკითხში. სარქისიანის თქმით, თურქეთის ყოფნა აზერბაიჯანში აკნინებს ამ ქვეყნის სუვერენიტეტს. თუმცა, მისი თქმით, ეს თავად აზერბაიჯანელების საქმეა. „ეს ყველაფერი ნეგატიურად მოქმედებს რეგიონზე, მთლიანად ცვლის სურათს კავკასიაში, ვითარება გადაჰყავს სხვა გეოპოლიტიკურ დონეზე, სადაც მთავარი ღერძი ხდება თურქეთი“ ,- განაცხადა სომხეთის პრეზიდენტმა და დასძინა, რომ საერთაშორისო შუამავლებმა თურქეთი უნდა დაარწმუნონ, რომ რეგიონის კონფლიქტიდან გავიდეს.
სომხეთის საგარეო საქმეთა მინისტრი მოსკოვს ეწვევა
სომხეთის საგარეო საქმეთა მინისტრი ზოჰრაბ მნაცაკანიანი რუსეთს ოფიციალური ვიზიტით ეწვევა, - ამის შესახებ სომხეთის საგარეო უწყების პრესმდივანი ანნა ნაღდალიანი სოციალურ ქსელ „ფეისბუქში“ წერს. „მიმდინარეობს მუშაობა სომხეთის საგარეო საქმეთა მინისტრ ზოჰრაბ მნაცაკანიანის რუსეთში ოფიციალური ვიზიტის მოსამზადებლად. ვიზიტი 12 ოქტომბერს შედგება,“- წერს ნაღდალიანი. შეგახსენებთ, აზერბაიჯანისა და სომხეთის შეიარაღებულ ძალებს შორის საბრძოლო მოქმედებები 27 სექტემბრის შემდეგ არ წყდება. დაღუპული და დაშავებულია ასობით ადამინი, მათ შორის მშვიდობიანი მოქალაქეები.
ტრამპის თქმით, კორონავირუსის წამალი ამერიკელებისთვის უფასო გახდება
ვფიქრობ, ღვთის წყალობა იყო, რომ დავინფიცირდი, – ამის შესახებ აშშ-ის პრეზიდენტმა, დონალდ ტრამპმა ვიდეომიმართვაში განაცხადა. მისივე თქმით, თავს შესანიშნავად გრძნობს და ეს ექსპერიმენტული წამლის Regeneron-ის დამსახურებაა, რომელიც ამერიკელებისთვის უფასო გახდება. „მათ Regeneron-ით მკურნალობა დამიწყეს. დაუჯერებელი იყო, მაშინვე კარგად ვიგრძენი თავი. 24 საათში კი თავს იმდენად კარგად ვგრძნობდი, საავადმყოფოდან მინდოდა გამოსვლა. მინდა, რომ თქვენც მიიღოთ ის. თქვენთვის ის უფასო იქნება, არაფრის გადახდა მოგიწევთ“, – განაცხადა დონალდ ტრამპმა. პრეზიდენტმა კორონავირუსის პანდემიის გავრცელებაში ჩინეთი კიდევ ერთხელ დაადანაშაულა და განაცხადა, რომ ეს ქმედება ჩინეთს ძვირი დაუჯდება. „ეს ჩინეთის ბრალია და ჩინეთს ის, რაც ჩვენს ქვეყანასა და მთელს მსოფლიოს გაუკეთა, ძვირი დაუჯდება“, – განაცხადა დონალდ ტრამპმა. შეგახსენებთ, კორონავირუსით დაინფიცირებულმა პრეზიდენტმა „უოლტერ რიდის“ სამხედრო ჰოსპიტალი ორი დღის წინ დატოვა და თეთრ სახლში დაბრუნდა.
"მიუღებელია რუსეთის გადაწყვეტილება, რამაც ჟენევის საერთაშორისო მოლაპარაკებების ჩაშლა გამოიწვია"
შერიგებისა და სამოქალაქო თანასწორობის საკითხებში სახელმწიფო მინისტრის თეა ახვლედიანის განცხადებით, მიუღებელია რუსეთის ფედერაციის მხრიდან მიღებული გადაწყვეტილება, ჟენევის საერთაშორისო მოლაპარაკებების ჩაშლასთან დაკავშირებით. მინისტრის თქმით, მსგავსი მიდგომა საფრთხის ქვეშ აყენებს სამშვიდობო პროცესს. “საქართველოს ოკუპირებულ რეგიონებში დღეს გვაქვს გამწვავებული უსაფრთხოების, ადამიანის უფლებრივი და ჰუმანიტარული მდგომარეობა, რომლის ფონზე განსაკუთრებით მიუღებელია რუსეთის ფედერაციის მიერ მიღებული გადაწყვეტილება, რამაც გამოიწვია ჟენევის საერთაშორისო მოლაპარაკებების ჩაშლა. მსგავსი მიდგომა საფრთხის ქვეშ აყენებს სამშვიდობო პროცესს, ისევე როგორც ჩვენს იმ ძალისხმევას, რომელიც მიმართულია კონფლიქტით დაზარალებული მოსახლეობის, პანდემიით უფრო დამძიმებული გამოწვევების მოგვარებისკენ. ჩვენ იმედს ვიტოვებთ, რომ ჟენევის ფორმატში რუსეთ- საქართველოს მოლაპარაკებები უახლოეს პერიოდში განახლდება”, - განაცხადა ახვლედიანმა, რომლის კომენტარსაც პრესსამსახური ავრცელებს. ცნობისთვის, საქართველოს საგარეო საქმეთა სამინისტრო 6-7 ოქტომბერს დაგეგმილი ჟენევის საერთაშორისო მოლაპარაკებების 51-ე რაუნდის ჩაშლასთან დაკავშირებით განცხადებას ავრცელებს. უწყება შეშფოთებას გამოხატავს რუსეთის ფედერაციის წარმომადგენელთა მიერ ჟენევის საერთაშორისო მოლაპარაკებების 51-ე რაუნდის ჩაშლის გამო. „საგარეო საქმეთა სამინისტრო მოუწოდებს რუსეთის ფედერაციას, დაუბრუნდეს მოლაპარაკებების მაგიდას, შეასრულოს ნაკისრი საერთაშორისო ვალდებულებები, მათ შორის, 2008 წლის 12 აგვისტოს ევროკავშირის შუამავლობით დადებული ცეცხლის შეწყვეტის შეთანხმება”,- ნათქვამია განცხადებაში.
დანიაში საქართველოს ელჩი: სრულ მხარდაჭერას ვუცხადებ ივერი მელაშვილს
"სრულ მხარდაჭერას ვუცხადებ ივერი მელაშვილს". – წერს დანიის სამეფოში საქართველოს საგანგებო და სრულუფლებიანი ელჩი, გიგი გიგიაძე Facebook გვერდზე. გიგიაძის თქმით, საქართველო-აზერბაიჯანის დემარკაციის კომისიის ექსპერტთა საბჭოს უფროსის, ივერი მელაშვილისთვის წარდგენილი ბრალდება "აბსურდული და საღ აზრს მოკლებულია". "სრულ მხარდაჭერას ვუცხადებ ივერი მელაშვილს, რომელსაც პირადად ვიცნობ 1997 წლიდან და მიმაჩნია, რომ ის არის საკუთარი ქვეყნის, საქართველოს გამორჩეული პატრიოტი, ჩვენი სახელმწიფო საზღვრის დელიმიტაცია-დემარკაციის პროცესის პროფესიონალი და შეუცვლელი ექსპერტი. [...] იმედს ვიტოვებ, რომ ეს დაწყებული გამოძიება ყველა არსებულ კითხვას ამომწურავ პასუხს გასცემს და სრულიად უდანაშაულო, თავის ქვეყანაზე შეყვარებული ადამიანი მალევე გათავისუფლდება". – წერს გიგი გიგიაძე. დღეს, 7 ოქტომბერს, საქართველო-აზერბაიჯანის დემარკაციის კომისიის ექსპერტთა საბჭოს უფროსი, ივერი მელაშვილი და საბჭოს წევრი, ნატალია ილიჩოვა დააკავეს. პროკურატურის ინფორმაციით, მათ ბრალად უცხო ქვეყნისათვის საქართველოს ტერიტორიის ნაწილის გადაცემისაკენ მიმართული მოქმედება ედებათ. პროკურატურა პატიმრობას მოითხოვს. ბრალის დამტკიცების შემთხვევაში ილიჩოვასა და მელაშვილს 10-დან 15 წლამდე პატიმრობა ემუქრებათ. პროკურატურის მტკიცებით, ბრალდებულებმა რუკის ალბომებში სახელმწიფო საზღვრის გავლებისას განზრახ გამოიყენეს ისეთი კარტოგრაფიული მასალა, რომელიც ისტორიულად და სამართლებრივად არ ემყარებოდა და არ ასახავდა საქართველოს სახელმწიფოს რეალურ პოზიციას მის კუთვნილ ტერიტორიებთან დაკავშირებით.
"საქართველოს ბრალდება რუსეთის მისამართით ჟენევის მოლაპარაკებათა პროცესის ჩაშლის თაობაზე, უსაფუძვლო და პოლიტიზებულია"
საქართველოს ბრალდება რუსეთის მისამართით მოლაპარაკებათა პროცესის ჩაშლის თაობაზე, უსაფუძვლო და პოლიტიზებულია. „ტასს“-ის ინფორმაციით, ამის შესახებ საუბარია რუსეთის საგარეო უწყების ოფიციალური წარმომადგენლის მარია ზახაროვას მიერ გავრცელებულ კომენტარში. „გაოცებულები ვართ საქართველოს საგარეო საქმეთა სამინისტროს 6 ოქტომბრის განცხადებით, თითქოსდა რუსეთის წარმომადგენლების მიერ ჩაიშალა კავკასიაში უსაფრთხოებისა და სტაბილურობის შესახებ ჟენევის საერთაშორისო დისკუსიების 51-ე რაუნდი, რომელიც გადაიდო. მიგვაჩნია, რომ ბრალდება ჩვენი მისამართით არის დაუსაბუთებელი და პოლიტიზებული“ , - განაცხადა ზახაროვამ. მისივე თქმით, გადაწყვეტილება 6-7 ოქტომბერს მოლაპარაკებათა მორიგი რაუნდის ჩატარებაზე თავშეკავების შესახებ მიღებულია, მაგრამ არა მხოლოდ რუსეთის, არამედ აფხაზეთისა და სამხრეთ ოსური დელეგაციების მიერ იმ სერიოზული შეზღუდვების და ლოგისტიკური პრობლემების გათვალისწინებით, რაც გამოწვეულია პანდემიისგან. შეგახსენებთ, რომ საქართველოს საგარეო საქმეთა სამინისტრომ 6-7 ოქტომბერს დაგეგმილ ჟენევის საერთაშორისო მოლაპარაკებების 51-ე რაუნდის ჩაშლასთან დაკავშირებით განცხადება გაავრცელა. საქართველოს საგარეო საქმეთა სამინისტრო შეშფოთებას გამოხატავს რუსეთის ფედერაციის წარმომადგენელთა მიერ ჟენევის საერთაშორისო მოლაპარაკებების 51-ე რაუნდის ჩაშლის გამო.
"ჟენევის მოლაპარაკებების ჩაშლა ჩვენთვის სრულიად მიუღებელია, განსაკუთრებით, პანდემიის პირობებში"
საქართველოს პრემიერ-მინისტრის, გიორგი გახარიას განცხადებით, ნებისმიერი ნაბიჯი, რომელიც ჟენევის ფორმატს ეჭვქვეშ დააყენებს, საქართველოსთვის სრულიად მიუღებელია. „ჟენევა ჩვენთვის არის უკიდურესად მნიშვნელოვანი ფორმატი, რადგან ის არის ერთადერთი ქმედითი ფორმატი. ყველაფერი, ყველა ნაბიჯი, რომელიც ჟენევის ქმედითობას დააყენებს კითხვის ნიშნის ქვეშ ჩვენთვის კატეგორიულად მიუღებელია, განსაკუთრებით, გლობალური პანდემიის პირობებში, მაშინ როდესაც საოკუპაციო ხაზზე გადასვლის შესაძლებლობა ჩაკეტილია და ადამიანებს სამედიცინო დახმარების მიღების ელემენტარული შესაძლებლობა არ აქვთ, მიუხედავად იმისა, რომ ჩვენ ვცდილობთ დავეხმაროთ ჩვენს მოქალაქეებს საოკუპაციო ხაზის მიღმა, მაგრამ სამწუხაროდ, ხშირ შემთხვევაში ამის საშუალება არ გვეძლევა. ამიტომ, ჟენევის მოლაპარაკებების, განსაკუთრებით ასეთ დროს ჩაშლა სრულიად მიუღებელია“, – განაცხადა პრემიერმა. ეუთოს საპარლამენტო ასამბლეის პრეზიდენტი, „ევროპული საქართველოს“ ერთ-ერთი ლიდერი, გიგი წერეთელიც გამოეხმაურა ჟენევის მოლაპარაკებების 51-ე რაუნდის ჩაშლას. მის კომენტარს პარტიის პრესსამსახური ავრცელებს. გიგი წერეთლის განცხადებით, რუსეთი ცდილობს, რომ მუშაობა არ იყოს კონსტრუქციული. „რუსეთი ჯიუტად აგრძელებს თავის სტრატეგიას, რომ არ შედგეს მოლაპარაკება და არ აღიაროს ამ კონფლიქტში თავისი როლი, არ მოაწეროს ხელი ძალის გამოუყენებლობას, არ შეუწყოს ხელი დევნილების დაბრუნებას და ეს მცდელობები სახეზეა. კიდევ ერთი ჩაშლილი მოლაპარაკება იმის გამო, რომ რუსეთი არ გამოცხადდა საერთოდ და ყველა მიზეზს პოულობს იმისათვის, რომ რაიმე კონსტრუქციული ნაბიჯი არ იყოს გადადგმული“, – განაცხადა წერეთელმა. „სტრატეგია აღმაშენებლის“ ერთ-ერთმა ლიდერმა გიორგი ვაშაძემ მოლაპარაკებების 51-ე რაუნდის ჩაშლა „ქართული ოცნების“ საგარეო პოლიტიკას დაუკავშირა. „ყველაზე ცუდი ის არის, რომ „ქართული ოცნების” პირობებში, მთლიანად მოშლილია ჩვენს საგარეო ასპარეზზე აქტიური მუშაობა და რუსეთი ბედავს ისეთ ნაბიჯების გადადგმას, რომ საერთოდ ჩაშალოს და მოლაპარაკებებიც კი არ შედგეს. მთავარი კითხვა უნდა დავსვათ – რამ მიგვიყვანა აქამდე? აქამდე მიგვიყვანა სწორედ „დამსხვრეული ოცნებების პარტიის” არასწორმა ქმედებებმა საერთაშორისო ასპარეზზე“, – განაცხადა მან. ჟენევის საერთაშორისო მოლაპარაკებების თანათავმჯდომარეების გადაწყვეტილებით, კორონავირუსის (COVID-19) პანდემიის მიუხედავად, 51-ე რაუნდის ჩატარება დაგეგმილი და შეთანხმებული იყო მიმდინარე წლის 6-7 ოქტომბერს. ჟენევის მოლაპარაკებების 51-ე რაუნდის ვერჩატარების მიზეზად, თანათავმჯდომარეების მიერ გავრცელებულ განცხადებაში დასახელებულია ის, რომ დისკუსიაზე დასწრება ყველა მონაწილემ ვერ შეძლო. მოლაპარაკებების ახალი რაუნდის ჩასატარებლად 2020 წლის დეკემბერი განისაზღვრა. საქართველოს საგარეო საქმეთა სამინისტრო შეშფოთებას გამოხატავს რუსეთის ფედერაციის წარმომადგენელთა მიერ ჟენევის საერთაშორისო მოლაპარაკებების 51-ე რაუნდის ჩაშლის გამო. „მსგავსი ნაბიჯები ძირს უთხრის სამშვიდობო პროცესს და ზიანს აყენებს საქართველოს ხელისუფლებისა და საერთაშორისო თანამეგობრობის ძალისხმევას კონფლიქტის შედეგად დაზარალებული მოსახლეობის პრობლემების გადაჭრის კუთხით. საგარეო საქმეთა სამინისტრო მოუწოდებს რუსეთის ფედერაციას, დაუბრუნდეს მოლაპარაკებების მაგიდას, შეასრულოს ნაკისრი საერთაშორისო ვალდებულებები, მათ შორის, 2008 წლის 12 აგვისტოს ევროკავშირის შუამავლობით დადებული ცეცხლის შეწყვეტის შეთანხმება“, – აცხადებს საგარეო.
აზერბაიჯანი - 27 სექტემბრიდან დღემდე კონფლიქტს 28 სამოქალაქო პირი ემსხვერპლა, დაჭრილია 144 ადამიანი
აზერბაიჯანის გენერალური პროკურატურის ინფორმაციით, 27 სექტემბრიდან, მას შემდეგ, რაც მთიან ყარაბაღში კონფლიქტის ესკალაცია განხორციელდა, დღემდე, გარდაცვლილთა რაოდენობა 28-მდე გაიზარდა, დაჭრილია 144 ადამიანი. „სომხური მხრიდან დასახლებული პუნქტების დაბომბვის შედეგად, 27 სექტემბრიდან დღემდე დაღუპულია 28, ხოლო 144 სამოქალაქო პირი დაჭრილია“ - ნათქვამია უწყების მიერ გავრცელებულ პრესრელიზში. მათივე ინფორმაციით, დაზარალდა 66 სამოქალაქო ობიექტი და 427 საცხოვრებელი სახლი. აზერბაიჯანსა და სომხეთს შორის მთიანი ყარაბაღის რეგიონში საომარი ვითარება 27 სექტემბრიდან განახლდა, რაშიც მხარეები ერთმანეთს ადანაშაულებენ.
კორონავირუსით ინფიცირებული პეტრო პოროშენკოს ჯანმრთელობის მდგომარეობა გაუარესდა
უკრაინის ყოფილი პრეზიდენტის პეტრო პოროშენკოს ჯანმრთელობის მდგომარეობა დამძიმდა. პოროშენკო 3 ოქტომბრიდან კორონავირუსით გამოწვეული ორმხრივი პნევმონიის გამო საავადმყოფოში იმყოფება. ამის შესახებ ინფორმაციას მისი მეუღლე მარინა პოროშენკო ავრცელებს. „მისი მდგომარეობა გაუარესებულია. მას ორმხრივი ფილტვების ანთება აქვს და კომპლექსურად მკურნალობს. სამწუხაროდ, გაუუარესდა სისხლის მდგომარეობა, რომელიც ძალიან შედედდა და ექიმებსაც კი არ შეუძლიათ მისთვის სისხლის აღება ანალიზის ჩასატარებლად, რათა გააკონტროლონ მისი ჯანმრთელობის მდგომარეობის მიმდინარეობა“, - განაცხადა მარინა პოროშენკომ. მათი ქალიშვილის მდგომარეობა, რომელიც ასევე კორონავირუსით არის დაინფიცირებული, შედარებით უკეთესია. პეტრო პოროშენკოს კორონავირუსი 29 სექტემბერს დაუდგინდა. მისი ჰოსპიტალიზაცია 3 ოქტომბერს განხორციელდა.
ირაკლი ბებუას მხარდასაჭერად სამოქალაქო აქტივისტებმა აქცია გამართეს
დღეს, 7 ოქტომბერს სამოქალაქო აქტივისტებმა ოკუპირებული აფხაზეთის დე ფაქტო რესპუბლიკის მიერ უკანონოდ დაკავებული ირაკლი ბებუას მხარდასაჭერად საქართველოს კანცელარიის შენობასთან მშვიდობიანი აქცია-პერფორმანსი გამართეს. აქციის მონაწილეები მოუწოდებენ საქართველოს ხელისუფლებას, განსაკუთრებით კი საგარეო საქმეთა სამინისტროს, რომ შეასრულონ პოლიტიკური და სამართლებრივი ვალდებულება, დაიცვან საქართველოს მოქალაქეები და უზრუნველყონ მათი უსაფრთხოება. „ქართული მხრიდან, სუსის ერთჯერადი განცხადების მიხედვით, მიმდინარეობს მოლაპარაკებები საერთაშორისო ორგანიზაციებთან. მსგავსი მძიმე საქმის შემთხვევაში ერთჯერადი განცხადებები საკმარისი არაა – ჩვენ გვახსოვს ამ რეჟიმს შეწირული ადამიანების სახელები“, – ამბობენ აქტივისტები. ოკუპირებული აფხაზეთის გალის მუნიციპალიტეტში საქართველოს მოქალაქე ირაკლი ბებუა დააკავეს. ინტერნეტში გავრცელებულ ვიდეოში ჩანს, რომ მას აფხაზეთის დროშის დაწვას ედავებიან. ირაკლი ბებუა ვიდეოში ამბობს, რომ დროშა შეგნებულად დაწვა, თუმცა თავად არც აფხაზური დროშის საწინააღმდეგო აქვს რამე და არც აფხაზების, მისი თქმით, მას არ მოსწონს 27 სექტემბერს სოხუმის დაცემის დღის აფხაზეთში ზეიმით აღნიშვნა და „ქართველებისა და აფხაზების ძმურად ყოფნა სურს“. მოქალაქის დაკავების შესახებ სახელმწიფო უსაფრთხოების სამსახური აცხადებს, რომ ირაკლი ბებუა 30 სექტემბერს დააკავეს, აფხაზეთიდან მიღებული ცნობით, ის გალშია და მის სიცოცხლეს საფრთხე არ ემუქრება. სუს-ის განცხადებით, მათ უკანონო დაკავების ფაქტზე ინფორმაცია აცნობის ჟენევის დისკუსიების თანათავმჯდომარეებისა და საერთაშორისო პარტნიორებს, გააქტიურებულია ცხელი ხაზი და მიმდინარეობს აქტიური მუშაობა ირაკლი ბებუას გასათავისუფლებლად. „საქართველოს ოკუპირებულ ტერიტორიებზე განხორციელებულ ადამიანების უკანონო დაკავების ფაქტებზე, მათი ჯანმრთელობის მდგომარეობაზე სრული პასუხისმგებლობა ეკისრება რუსეთის ფედერაციას. საოკუპაციო რეჟიმის მიერ მართული აღნიშნული პროცესი მნიშვნელოვნად აუარესებს საოკუპაციო ხაზს გასწვრივ, ასევე ოკუპირებულ ტერიტორიებზე არსებულ უსაფრთხოების გარემოს და ართულებს ადგილობრივი მოსახლეობის ყოველდღიურობას. აღნიშნულიდან გამომდინარე მნიშვნელოვანია უკანონოდ დაკავებული პირის უპირობო გათავისუფლება“, – აცხადებს სახელმწიფო უსაფრთხოების სამსახური.
ჯო ბაიდენი - თუ ტრამპი ისევ კოვიდით იქნება ინფიცირებული, ჩვენი დებატები არ გაიმართება
აშშ-ის პრეზიდენტობის „დემოკრატი“ კანდიდატი ჯო ბაიდენი აცხადებს, რომ 15 ოქტომბრისთვის მაიამიში დაგეგმილი დებატები არ გაიმართება, თუკი აშშ-ის პრეზიდენტი დონალდ ტრამპი ისევ კორონავირუსით იქნება ინფიცირებული. „თუ მას კიდევ კოვიდი ექნება, დებატებს არ გავმართავთ. მოუთმენლად ველი დებატებს, თუმცა, იმედი მაქვს, ყველა პროტოკოლი დაცული იქნება,“-განაცხადა ბაიდენმა. ბაიდენის განცხადებაზე კომენტირებისას დონალდ ტრამპის პრესსპიკერმა განაცხადა, რომ პრეზიდენტი გამოჯანმრთელებული იქნება და დებატებში მონაწილეობას მიიღებს.
