პოლიტიკა
საქართველომ, სახმელეთო და საჰაერო მარშრუტებით სამხედრო ტვირთების გატარებაზე ნებართვების გაცემა შეაჩერა
საქართველომ საკუთარ ტერიტორიაზე სახმელეთო და საჰაერო მარშრუტებით სამხედრო ტვირთების გატარებაზე ნებართვების გაცემა შეაჩერა. ამის შესახებ საქართველოს შინაგან საქმეთა მინისტრმა ვახტანგ გომელაურმა განაცხადა. "აზერბაიჯანსა და სომხეთს შორის მიმდინარე სამხედრო მოქმედებების გამო საქართველოს მთავრობამ ესკალაციის დაწყებისთანავე დროებით შეაჩერა ნებართვების გაცემა საკუთარ ტერიტორიაზე სახმელეთო და საჰაერო მარშრუტებით სამხედრო ტვირთების გატარებაზე ორივე ქვეყნის მიმართულებით", – განაცხადა გომელაურმა. მოგვიანებით, აღნიშნულთან დაკავშირებით განცხადება გაავრცელა ეროვნული უსაფრთხოების საბჭომ: „აზერბაიჯანისა და სომხეთის რესპუბლიკებს შორის მორიგ სამხედრო დაპირისპირებასთან და შექმნილ ვითარებასთან დაკავშირებით საქართველოს ეროვნული უსაფრთხოების საბჭოს სხდომა გაიმართა. სხდომაზე განხილულ იქნა აღნიშნული კონფლიქტით გამოწვეული მძიმე ვითარება, რომელსაც შედეგად, სამწუხაროდ, უკვე მოყვა მსხვერპლი, ვითარების ესკალაცია კი მკვეთრად უარყოფითად იმოქმედებს რეგიონის უსაფრთხოებაზე. ჩვენ კვლავ მოვუწოდებთ ეუთოს მინსკის ჯგუფის თანათავმჯდომარეებს და საერთაშორისო აქტორებს მიიღონ ყველა ზომა ძალადობის შეწყვეტისა და დიალოგის განახლებისათვის. საქართველოს კეთილმეზობლური ურთიერთობები აკავშირებს როგორც აზერბაიჯანთან, ასევე, სომხეთთან. ჩვენი ამოცანაა შევინარჩუნოთ და კიდევ უფრო განვამტკიცოთ ეს ურთიერთობები. საქართველოში ყოველთვის ვამაყობდით ქართველებთან ერთად სხვადასხვა ეროვნების, მათ შორის აზერბაიჯანლებისა და სომხების მშვიდობიანი თანაცხოვრებით, რაც ჩვენი საერთო მონაპოვარია და მას დიდი გაფრთხილება, ერთობლივი ზრუნვა სჭირდება. ჩვენ არ უნდა დავუშვათ, რომ აზერბაიჯანსა და სომხეთს შორის შექმნილ კრიზისულ ვითარებაში, ცალკეულმა დესტრუქციულმა ელემენტებმა, საქართველოს გარეთ თუ შიგნით, ჩრდილი მიაყენონ ჩვენს მეგობრობასა და ისტორიულ გამოცდილებას. ყოველივე ამის გათვალისწინებით, ქართული მხარე კიდევ ერთხელ ადასტურებს თავის მზაობას ნებისმიერი ფორმით შეუწყოს ხელი ვითარების განმუხტვას, მათ შორის, საჭიროების შემთხვევაში, დიალოგის გამართვის მიზნით კონფლიქტის მხარეების წარმომადგენელთა შეხვედრას უმასპინძლოს თბილისში. ქართული მხარე მრავალი წლის განმავლობაში ზედმიწევნით ასრულებდა და ასრულებს საკუთარ საერთაშორისო ვალდებულებებს, მათ შორის მეზობელი ქვეყნების - აზერბაიჯანისა და სომხეთის მიმართ. კერძოდ, საქართველოს სატრანზიტო ფუნქცია მნიშვნელოვანი ფაქტორია ორივე ქვეყნის ეკონომიკის ფუნქციონირებისა და განვითარებისათვის. რაც ბუნებრივია, საქართველოს ინტერესებშიც არის. დღესაც, საქართველოს გავლით, ტრანზიტის რეჟიმში სამოქალაქო დანიშნულების სატვირთო გადაზიდვები შეუფერხებლად და უსაფრთხოდ ხორციელდება ნებისმიერი, მათ შორის აზერბაიჯანისა და სომხეთის მიმართულებით. გადაზიდვების ინტენსივობა მაღალია და აღნიშნული მაჩვენებელი არ შეცვლილა სამხედრო კონფლიქტის განახლების შემდეგ. აღსანიშნავია, რომ კონფლიქტის გამწვავების მომენტიდან საქართველოს მიერ სამოქალაქო საჰაერო სატვირთო გადაზიდვების მიზნებისათვის რაიმე სახის შეზღუდვები არ დაწესებულა და არც დაწესდება. ამასთან, აზერბაიჯანსა და სომხეთს შორის მიმდინარე სამხედრო მოქმედებების გამო, საქართველოს მთავრობამ, ესკალაციის დაწყებისთანავე, დროებით შეაჩერა ნებართვების გაცემა საკუთარ ტერიტორიაზე, სახმელეთო და საჰაერო მარშრუტებით სამხედრო ტვირთების გატარებაზე ორივე ქვეყნის მიმართულებით. ამის თაობაზე მხარეები ინფორმირებულნი იყვნენ. ნებისმიერ სხვა საერთაშორისო სატრანზიტო გადაზიდვებთან დაკავშირებით, ქართული მხარე სრულად ასრულებს საერთაშორისო ვალდებულებებს. ჩვენი საერთო ინტერესია - სწრაფად შეწყდეს სამხედრო დაპირისპირება და რეგიონში აღდგეს მშვიდობა“. ცნობისთვის: ყარაბაღში შეტაკებები 27 სექტემბერის შემდეგ გრძელდება. მხარეები მსხვერპლის შესახებ იუწყებიან. ბაქო და ერევანსი ერთმანეთს დასახლებული პუნქტებისთვის ცეცხლის გახსნაში ადანაშაულებენ. 2 ოქტომბერს ერევანმა განაცხადა, რომ მთიანი ყარაბაღის კონფლიქტზე მოლაპარაკებებისთვის მზადაა. ბაქოს სომხეთის საგარეო საქმეთა სამინისტროს განცხადებაზე კომენტარი ჯერ–ჯერობით არ გაუკეთებია. 30 ოქტომბერს კი აზერბაიჯანის პრეზიდენტმა ილჰამ ალიევმა მოლაპარაკებათა უშედეგობაზე ისაუბრა და ცალკეული ქვეყნების მოწოდებებს დიალოგისკენ აზრს მოკლებული უწოდა. 27 სექტემბერს, დილით აზერბაიჯანის სარდლობამ გააკეთა განცხადება მთიან ყარაბაღში, შეხების ხაზის მთელს პერიმეტრზე შეტევის წამოწყების თაობაზე, – როგორც ბაქო ირწმუნება, სომხეთის მხრიდან შეიარაღებული ინციდენტების საპასუხოდ. აზერბაიჯანის პრეზიდენტმა ქვეყნის მთელს ტერიტორიაზე საგანგებო მდგომარეობა გამოაცხადა. რიგ ქალაქებში, მათ შორის ბაქოში კომენდანტის საათია შემოღებული. საომარი მოქმედებაა გამოცხადებული სომხეთში, ასევე მთიან ყარაბაღში.საქართველოს პრემიერ-მინისტრმა გიორგი გახარიამ აზერბაიჯანისა და სომხეთის წარმომადგენლებს შესთავაზა, თბილისში გამართონ შეხვედრა, რომელიც კონფლიქტის მხარეებს შორის მოლაპარაკებების პროცესის ჩამოყალიბებაზე იქნება მიმართული.თვითგამოცხადებული მთიანი ყარაბაღის ტერიტორიულოი კუთვნილების შესახებ დავა საბჭოთა დროიდან იღებს სათავეს. ბაქო უმთავრესად სომხებით დასახლებულ ამ რეგიონს 1990-იანების დასაწყისიდან აღარ აკონტროლებს. მაშინ შეიარაღებული კონფლიქტისას სულ მცირე, 30 ათასი ადამიანი დაიღუპა, ასობით ათასი კი დევნილად იქცა. კონფლიქტის ამჟამინდელ აფეთქებას 1994 წელს დადებული ზავის შემდეგ ყველაზე სერიოზულად მიიჩნევენ.
ტელეკომპანია „იმედის“ თანამშრომელს კორონავირუსი დაუდასტურდა
ტელეკომპანია „იმედის“ თანამშრომელს, გადაცემა „იმედის დილის“ წამყვანს ზურაბ ბალანჩივაძეს კორონავირუსი დაუდასტურდა. აღნიშნულ ინფორმაციას თავად ტელეკომპანია ავრცელებს. მათივე ცნობით, იდენტიფიცირებულია მისი ყველა კონტაქტი და ამჟამად ისინი თვითიზოლაციაში იმყოფებიან. ტელეკომპანიის შენობაში უკვე ჩატარდა სადეზინფექციო სამუშაოები და არხი მუშაობას ჩვეულ რეჟიმში, ჯანდაცვის სამინისტროს რეკომენდაციების სრული დაცვით განაგრძობს.
"აზერბაიჯანი არ მიიღებს იმ ქვეყნის შუამავლობას, რომელიც ნეიტრალიტეტს ვერ შეინარჩუნებს"
აზერბაიჯანის პრეზიდენტი ილჰამ ალიევი აცხადებს, რომ ეუთოს მინსკის ჯგუფის თანათავმჯდომარე ქვეყნებმა, რუსეთმა, საფრანგეთმა და აშშ-მ, მთიანი ყარაბაღის კონფლიქტთან დაკავშირებით ერთად მუშაობა უნდა განაგრძონ, თუკი ისინი ნეიტრალიტეტს შეინარჩუნებენ. „ვფიქრობთ, რომ სამმა ქვეყანამ უნდა გააგრძელოს ერთად მუშაობა თუ ყველა მათგანი ნეიტრალიტეტს შეინარჩუნებს. ეს მნიშვნელოვანია. ჩვენ შეშფოთებულები ვართ, რომ ბოლო დღეებში ვხედავთ ზოგიერთ განცხადებას, რომელიც კონტრპროდუქტიულია და ნეიტრალიტეტის პოზიციის ერთგვარი ცვლილების დემონსტრირებას წარმოადგენს,“- განაცხადა ილჰამ ალიევმა გამოცემა Al Jazeera-სთან ინტერვიუში. მისივე თქმით, აზერბაიჯანი არ მიიღებს იმ ქვეყნის შუამავლობას, რომელიც ნეიტრალიტეტს ვერ შეინარჩუნებს. „ყველა ქვეყანას შეუძლია ჰქონდეს საკუთარი პოზიცია, ეს ნორმალურია. მაგრამ თუ თქვენ ასეთი მგრძნობიარე საკითხის შუამავალი ხართ, ნეიტრალური უნდა იყოთ. წინააღმდეგ შემთხვევაში, შუამავლობა ჩვენთვის მისაღები არ იქნება,“- აღნიშნა აზერბაიჯანის პრეზიდენტმა. შეგახსენებთ, რომ აზერბაიჯანსა და სომხეთს შორის, სამხედრო დაპირისპირება, მთიან ყარაბაღში, 27 სექტემბერს განახლდა. მიუხედავად, არაერთი მოწოდებისა, მხარეები მოლაპარაკების მაგიდასთან დაბრუნებაზე, ჯერჯერობით უარს აცხადებენ.
"უკეთესობისკენ მივდივარ, დიდი მადლობა ყველას, მიყვარხართ"
აშშ-ის პრეზიდენტი დონალდ ტრამპი აცხადებს, რომ მისი მდგომარეობა უმჯობესდება და საზოგადოების მიმართ მადლიერებას გამოხატავს. „ვფიქრობ, უკეთესობისკენ მივდივარ, დიდი მადლობა ყველას, მიყვარხართ!!!”- წერს დონალდ ტრამპი სოციალურ ქსელ „ტვიტერში“. თეთრი სახლის ექიმმა შონ კონლიმ განაცხადა, რომ კორონავირუსით დაინფიცირებულ პრეზიდენტს, „რემდესივირით“ მკურნალობენ. „მოხარული ვარ გაცნობოთ, რომ პრეზიდენტი თავს კარგად გრძნობს. მას არ სჭირდება დამატებითი ჟანგბადი, მაგრამ სპეციალისტებთან კონსულტაციის შემდეგ გადავწყვიტეთ, მისი მკურნალობა „რემდესივირით“ დაგვეწყო. მან პირველი დოზა უკვე მიიღო და კომფორტულად ისვენებს“, - აღნიშნა კონლიმ. შეგახსენებთ, აშშ-ის პრეზიდენტი დონალდ ტრამპი, რომელსაც კორონავირუსი დაუდასტურდა, რამდენიმე საათის წინ პრევენციის მიზნით, „უოლტერ რიდის“ სამხედრო ჰოსპიტალში გადაიყვანეს.
აზერბაიჯანის საელჩო საქართველოში მცხოვრებ თანამემამულეებს მიმართავს, ქვეყანაში მიღებული ნორმებით იმოქმედონ
საქართველოში აზერბაიჯანის საელჩო აცხადებს, რომ მთიანი ყარაბაღისთვის შეიარაღებულ კონფლიქტში საქართველოში მცხოვრები თანამემამულეების მოხალისეობრივ მხარდაჭერას არ საჭიროებს. „საქართველოში მცხოვრები ჩვენი თანამემამულეების მხრიდან საელჩოში შემოდის უამრავი მიმართვა სხვადასხვა სახის დახმარებისა და შემოწირულების შემოთავაზების, მოხალისედ ჩაწერის სურვილის თაობაზე. აზერბაიჯანის სახელმწიფოს და შეიარაღებულ ძალებს აქვთ ყველა საჭირო შესაძლებლობა მათ წინაშე მდგომი მოვალეობისთვის თავის გასართმევად. ამ თვალსაზრისით, ქვეყნის გარედან მოხალისეთა ჩართვის საჭიროება არ არსებობს“, – ნათქვამია აზერბაიჯანის საელჩოს მიერ 2 ოქტომბერს გავრცელებულ მიმართვაში. ამასთან, საელჩო ფინანსური დახმარების მსურველ პირებს თანხის ჩარიცხვას აზერბაიჯანის რესპუბლიკის შეიარაღებული ძალების დახმარების ფონდში სთავაზობს: „არსებულ ვითარებაში მოგიწოდებთ, რომ გაგებით მოეკიდოთ მდგომარეობას, გამოიჩინოთ სიფხიზლე, არ წამოეგოთ შესაძლო პროვოკაციებს და იმოქმედოთ საქართველოში მიღებული ნორმებისა და კანონების ფარგლებში. თქვენი მორალური მხარდაჭერა, როგორც ყოველთვის, ამ დღეებშიც აზერბაიჯანის გვერდით დგომა აშკარაა“. საელჩო აღნიშნავს, რომ აზერბაიჯანის მეზობელი და სტრატეგიული პარტნიორი საქართველოც „მხარს უჭერს აზერბაიჯანის ტერიტორიულ მთლიანობას საერთაშორისო დონეზე აღიარებული საზღვრების ფარგლებში“. საელჩო მიმართავს საქართველოში მცხოვრებ აზერბაიჯანულ თემს „გაგებით“ მოეკიდონ შექმნილ ვითარებას, გამოიჩინონ სიფხიზლე, არ წამოეგონ „შესაძლო პროვოკაციებს“ და იმოქმედონ საქართველოში მიღებული ნორმებისა და კანონების ფარგლებში. მთიანი ყარაბაღისთვის ფართომასშტაბიანი ბრძოლები 27 სექტემბერს განახლდა. დაღუპულები არიან როგორც მშვიდობიანი მოქალაქეები, ისე სამხედრო პირები. კონფლიქტის გამწვავებაზე მხარეები პასუხისმგებლობას ერთმანეთს აკისრებენ.
ალექსანდრ ანქვაბი - ეპიდემიასთან გასამკლავებლად, შესაძლოა, ძალები არ გვეყოს
ოკუპირებული აფხაზეთის დე-ფაქტო „პრემიერ-მინისტრის“ ალექსანდრ ანქვაბის თქმით, აფხაზეთის ე.წ. ეროვნული ჯანდაცვის სისტემა მზად არ არის კორონავირუსის ეპიდემიას დამოუკიდებლად გაუმკლავდეს, თუკი მისი ზრდის ტემპი მოიმატებს. მან ხაზი გაუსვა, რომ „ქვეყანა ვირუსოლოგების, ინფექციონისტების, რეანიმატოლოგებისა და სხვა პროფილის ექიმების მწვავე დეფიციტს განიცდის“. „რუსეთის ჯანდაცვის სამინისტროს მიერ აღმოჩენილი დახმარების გათვალისწინებითაც კი, დაავადების რიცხვის სერიოზული ზრდის შემთხვევაში, შესაძლოა, ძალები არ გვეყოს,“- აღნიშნა ანქვაბმა. ცნობისათვის, დე-ფაქტო ხელისუფლების ინფორმაციით, აფხაზეთში კორონავირუსის 1 525 შემთხვევაა დადასტურებული, აქედან დაღუპულია 12 ადამიანი.
რუსეთში, ჟურნალისტმა ირინა სლავინამ, პროტესტის ნიშნად თავი დაიწვა
რუსმა ჟურნალისტმა, ირინა სლავინამ, ქალაქ ნიჟნი ნოვგოროდის პოლიციის განყოფილების წინ თავი დაიწვა. შემთხვევა 2 ოქტომბერს მოხდა. აღნიშნულს წინ ჩხრეკა მის ბინაში უძღოდა, რომლის დროსაც, სლავინას ფეისბუქ პოსტის თანახმად, პოლიცია მისი ოპოზიციასთან კავშირის მტკიცებულებებს ეძებდა. თვითმკვლელობამდე რამდენიმე საათით ადრე ჟურნალისტმა ფეისბუქზე დაწერა: “გთხოვთ, ჩემს სიკვდილში რუსეთის ფედერაცია დაადანაშაულოთ”. სლავინა ადგილობრივი გამოცემის, “Koza Press”-ის რედაქტორი იყო, რომელიც თავს წარადგენდა დამოუკიდებელ, ცენზურისაგან თავისუფალ გაზეთად. დაღუპვამდე 1 დღით ადრე, სლავინა წერდა, რომ პოლიციამ მისი ბინა გაჩხრიკა, რა დროსაც ეძებდნენ ოპოზიციური მოძრაობის, “ღია რუსეთის” ბროშურებსა და ანგარიშებს. აღნიშნული ორგანიზაცია პუტინის კრიტიკოსის, მიხეილ ხოდორკოვსკის მიერ ფინანსდება. სლავინა აღნიშნავდა, რომ წაიღეს ტექნიკა, მათ შორის, მისი ქალიშვილის ლეპტოპი და ქმრის მობილური. რუსეთის ოპოზიციის წარმომადგენლები ამბობენ, რომ სლავინა ზეწოლის ქვეშ იყო ხელისუფალთა მხრიდან. ნიჟნი ნოვგოროდის პოლიციის განცხადებით, ის იძიებს განყოფილების წინ ქალის მიერ თავის დაწვის ფაქტს. უწყებას არ დაუკონკრეტებია მისი ვინაობა.
"ღვთის ნებით, ეს ბრძოლა ყარაბაღის ოკუპაციისგან გათავისუფლებამდე გაგრძელდება"
"მოძმე აზერბაიჯანმა დიდი ოპერაცია დაიწყო თავისი ტერიტორიების დასაცავად და ოკუპირებული ტერიტორიების გასათავისუფლებლად", - ამის შესახებ თურქეთის პრეზიდენტმა რეჯეფ თაიფ ერდოღანმა განაცხადა. მან აზერბაიჯანის მიმართ მხარდაჭერა კიდევ ერთხელ გამოხატა და აღნიშნა, რომ ბრძოლა მანამ გაგრძელდება, ვიდრე მთიანი ყარაბაღი ოკუპაციისგან არ გათავისუფლდება. „ჩვენი ყველა შესაძლებლობით, მთელი ჩვენი გულით მოძმე აზერბაიჯანის გვერდით ვდგავართ და ვიდგებით. ღვთის ნებით, ეს ბრძოლა ყარაბაღის ოკუპაციისგან გათავისუფლებამდე გაგრძელდება,“- აღნიშნა თურქეთის პრეზიდენტმა. ცნობისთვის, აზერბაიჯანსა და სომხეთს შორის, მთიანი ყარაბაღისთვის საომარი მოქმედებები, 27 სექტემბერს დაიწყო და დღემდე ადამიანური დანაკარგის ფონზე მიმდინარეობს.
"რუსეთს აწყობს ყარაბაღის დაპირისპირება, რათა ორივე მხარე დასუსტდეს და მთლიანად კავკასიაში საკუთარი პოზიციები გააძლიეროს"
27 სექტემბერს, აზერბაიჯანსა და სომხეთს შორის მთიან ყარაბაღში დაპირისპირება ისევ განახლდა. საბრძოლო შეტაკებები ორმხრივი მსხვერპლის ფონზე მიმდინარეობს. რა პროცესები მიმდინარეობს, მოსალოდნელია თუ არა გამწვავება და როგორია საქართველოს, რუსეთისა და თურქეთის როლი, „ევროპათაიმი“, რონდელის ფონდის მკვლევარს, ზურა ბატიაშვილს ესაუბრა. - ბატონო ზურაბ, როგორ შეაფასებთ მთიან ყარაბაღში განხლებულ შეტაკებებს და რითი განსხვავდება წინა და ამჟამინდელ მდგომარეობა ერთმანეთისგან? - უპირველეს ყოვლისა, ეს არის ყველაზე ძლიერი შეტანკებები, რაც კი ბოლო 27 წლის მანძილზე ყოფილა. ამაზე მსხვერპლი და დაჭრილთა რაოდენობაც მიუთითებს. განსხვავება ტექნიკური თვალსაზრისით არის ის, რომ ინტენსიურად გამოიყენება ბრძოლის თანამედროვე საშუალებები, როგორიცაა, დრონები და მფრინავი აპარატებით, რომლის საშუალებითაც არა მხოლოდ დაზვერვა ხდება, არამედ თავად ამ აპარატებსაც მიაქვს შეტევა. თანამედროვე ტექნოლოგიები ამის საშუალებას იძლევა. სამხედრო პოლიტიკური თვალსაზრისით, კი დიდი განსხვავება არ ჩანს, რადგან თუ დავაკვირდებით პირველი და მეორე დღის აზერბაიჯანული მხარის შეტევებს, მესამე და მეოთხე დღეს დავინახეთ, რომ უფრო გაჩერებულია და მხარეები საარტელერიო და დრონების საშუალებით ამუშავებენ ერთმანეთს. რუსეთი ერთგარი შუამავლის როლს ირგებს და თითქოს არ ერევა, ეს ჩანს, მაგრამ განსხვავებით წინა შეტაკებებისგან, ვხედავთ თურქეთის აქტიურ ჩართულობას. - აზერბაიჯანის პრეზიდენტმა აღნიშნა, რომ იმ ტერიტორიიდან, სადაც საკუთარი დროშა უკვე აღმართეს, გასვლას არ აპირებენ, რამდენად შესაძლებელია მდგომარეობა უფრო გამწვავდეს? - გამწვავება ყოველთვის შესაძლებელია. ორივე მხარეს აქვს რეზერვი. ჯერ არ გამოუყენებიათ შორი მანძილის ფრთოსანი რაკეტები და იმედია აქამდე არც მივა საქმე. ასეთი ალბათობაც შესაძლებელია არსებობდეს, თუმცა ჯერ ორივე მხარე თავს იკავებს. ორივემ იცის რომ გამოყენების შემთხვევაში, იგივე იარაღს მეორე მხარეც გამოიყენებს. - რამდენად საფრთხის შემცველია არსებული მდგომარეობა საქართველოსთვის, როგორი უნდა იყოს ჩვენი პოზიცია? - საქართველოსთვის რამდენიმე სახის საფრთხე არსებობს, ერთი ეს არის პოლიტიკური, რადგან ყოველთვის ვერ შეძლებ ასეთ სიტუაციაში ნეიტრალიტეტის ბოლომდე შენარჩუნებას, გაჭირდება ძალიან ყოველშემთხვევაში. ამავე დროს ჩვენ ვხედავთ ორივე მხარის მცდელობებს, თავის მხარეს გადაიყვანონ და მოკავშირედ გაიხადონ. მეორეს მხრივ ვხედავთ, რომ არსებობს სამხედრო საფრთხე, რომ რუსეთმა სომხეთის დახმარების საბაბით, მოითხოვოს სახმელეთო კორიდორის გაჭრა საქართველოს ტერიტორიაზე, რამაც გამოუსწორებელი შედეგები შეიძლება მოიტანოს ჩვენი ქვეყნისთის. ამავე დროს ჩვენ ვხედვათ, რომ არსებობს ეკონომიკური საფრთხეები. კონკრეტულად ორივე ქვეყანა ჩვენი სავაჭრო პარტნიორია. თუ კონფლიქტი დროში გაიწელა და ეკონომიკური პრობლემები შეექმნათ, აისახება საქართველოზეც, ისევე როგორც საზღვრების გახსნის შემდეგ ეს ქვეყნები ვერ შეძლებენ ტურისტების გამოგზავნას. მათ თუ პრობლემები შეექმნებათ, შემცირდება ინვესტიციები, რისი რესურსიც მათ არ ექნებათ. ასევე აქვს ჰუმანიტარული განზომილება, თუ ტოლვილთა ნაკადები გაჩნდა, ამ მიმართულებითაც მოგვიწევს მუშაობა. - როგორ შეაფასებთ პრემიერ მინისტრის მხრიდან მხარეებისთვის მოლაპარაკების ადგილად თბილისის შეთავაზებას? - შეთავაზება სწორია, უბრალოდ ეს არის უფრო კეთილი სურვილები, ვიდრე რეალობა. არ მგონია მხარეები ამას დათანხმდნენ. საქართველოს არც ამის გამოცდილება აქვს და არც რესურსი. არ ვამბობ რომ ეს კარგია, მაგრამ ფაქტია. ამის რესურსი აქვს რუსეთს, რუსეთი არის ერთადერთი ადგილი, სადაც ამ ორ ქვეყანას შეუძლია დაჯდეს და ილაპარაკოს. როდესღაც მხარეები დათანხმდებიან მოლაპარაკებას, უბრალოდ, ჯერჯერობით აცხადებენ, რომ არ არიან მზად. ჯერ უნდა მოხდეს შეთანხმება ცეცხლის შეწყვეტაზე და დანარჩენი შემდგომში იქნება. - რამდენად მოსალოდნელია, რუსეთმა ტრადიციულად მოირგოს მაშველის როლი, როგორც ეს 2008 წელს მოხდა და ამ შემთხვევაშიც ჩაერთოს? - რუსეთისგან ყველაფერია მოსალოდნელი. ის რომ ახლა შედარებით არ ერევა არ ნიშნავს, რომ მართლა ნეიტრალურის პოზიცია აქვს. რეალურად აწყობს ეს დაპირისპირება, რათა ორივე მხარე დასუსტდეს და მერე მოირგოს შემრიგებლის როლი, რითაც საკუთარ პოზიციებს გააძლიერებს როგორც ამ ქვეყნებში, ისე მთლიანად კავკასიაში. - როგორია თურქეთის როლი და მოსალოდნელია თუ არა, რუსეთ-თურქეთის ინტერესები გადაიკვეთოს? - ტრადიციულად თურქეთი ყოველთვის აზერბაიჯანს უჭერდა მხარს, დღესაც და მომავალშიც ასე გააკეთებს. ერთი ერია და კულტურულ-ისტორიული კავშირები გააჩნიათ. ვხედავთ, რომ თურქეთი უფრო აქტიურია საგარეო პოლიტიკაში, მას აქვს ამბიცია რომ არის რეგიონული ლიდერი და შესაბამისად, იქცევა. ამ ლიდერობის სურვილში დაპირისპირებულია რუსეთთთან, რაც ვნახეთ ლიბიაში, სირიაში, ახლა ხდება ყარაბაღში. ეს მომავალშიც გაგრძლებდება და მითია ის, რომ რუსე- თურქეთი სტრატეგიული მოკავშირეები არიან. რეალურად ისინი ზოგჯერ ხდებიან ტაქტიკური მოკავშირეები და არა სტრატეგიული, რადგან გრძელვადიანად მათ სრულად განსხვავებული ინტერესები და პოლიტიკა აქვთ. ამ საუკუნეში გაშლილი დროშებით ომი ნაკლებად მოსალოდნელია. ისინი ადგილზე საკუთარი მოკავშირეების საშუალებით ებრძვიან ერთმანეთს. პირდაპირ ძნელად წარმოსადგენია და ეს კატასტროფა იქნებოდა. პირდაპირი ომის სიმძიმე ორივე მხარეს ესმის და ამიტომ მიმდინარეობს მოკავშირეების საშუალებით. - რეგიონში სიტუაციის გართულების შემთხვევაში, ალბათ საქართველოსაც მოუწევს ლტოლვილთა ნაკადის მიღება. როგორია რისკები და საფრთხეები, მითუმეტეს იმ ფონზე, როცა მსოფლიო პანდემიას ებრძვის... - ეს არ არის ხელწამოსაკრავი თემა, ყველას გვაწუხებს, იმიტომ რომ გარდა პანდემიისა, საქართველოს ეკონომიკური საშალებები არ აქვს ათიათასობით ლტოლვილის მისაღებად. სპეციალურად "ევროპათაიმისთვის"
სალომე ზურაბიშვილი დონალდ ტრამპს - იმედი გვაქვს, მალე გამოჯანმრთელდებით
საქართველოს პრეზიდენტმა, სალომე ზურაბიშვილმა აშშ-ის პრეზიდენტ დონალდ ტრამპს სწრაფი გამოჯანმრთელება უსურვა. „კარგად ყოფნას გისურვებთ. ეს ნამდვილად რთული დროა, მაგრამ სოლიდარობით გადავლახავთ. იმედი გვაქვს, რომ თქვენც და პირველი ლედიც მალე გამოჯანმრთელდებით“, – წერს საქართველოს პრეზიდენტი სოციალურ ქსელ „ტვიტერში“. შეგახსენებთ, დონალდ ტრამპსა და მის მეუღლეს, მელანია ტრამპს, კორონავირუსი დაუდასტურდათ.
ევროპის საბჭოს მინისტრთა კომიტეტმა ე.წ. დეპორტირებულების საქმის აღუსრულებლობის გამო რუსეთი გააკრიტიკა
ევროპის საბჭოს მინისტრთა კომიტეტმა ე.წ. დეპორტირებულების საქმეზე სასამართლოს მიერ განსაზღვრული ვალდებულების აღუსრულებლობის გამო რუსეთი კვლავ მკაცრად გააკრიტიკა და კომპენსაციის გადახდის ფორმის დასასახელებლად ბოლო ვადა მისცა, - ამის შესახებ ინფორმაციას იუსტიციის სამინისტრო ავრცელებს. უწყების ცნობით, თუ რუსეთი 2020 წლის 12 ნოემბრამდე არ დათანხმდება პირდაპირ საქართველოსთვის ან ევროპის საბჭოს შუამავლობით თანხის გადახდაზე, მაშინ 2020 წლის დეკემბრის სხდომაზე მიღებულ იქნება შუალედური რეზოლუცია, რაც ვალდებულების შეუსრულებლობის შესახებ პროცედურების დასაწყებად პირველი პროცედურული ნაბიჯია. „სტრასბურგის სასამართლოს დიდი პალატის 2019 წლის 31 იანვრის გადაწყვეტილების მიხედვით, რუსეთი ვალდებულია, საქართველოს სახელმწიფოს, როგორც მოსარჩელე მხარეს, ჩაურიცხოს 10 მილიონი ევროს ოდენობის მორალური კომპენსაცია იმ დაზარალებულთათვის გადასაცემად, რომლებიც 2006 წლის შემოდგომაზე რუსეთის ფედერაციიდან მასობრივი დეპორტაციისა და ადამიანის უფლებების უხეში დარღვევების მსხვერპლნი გახდნენ. მინისტრთა კომიტეტის გადაწყვეტილებაში აღნიშნულია, რომ კომპენსაციის გადახდის ვადა 2019 წლის 30 აპრილს ამოიწურა და რუსეთი დღემდე არ ასრულებს ამ ვალდებულებას, რის გამოც მინისტრთა კომიტეტი ღრმა შეშფოთებას გამოთქვამს, ამასთან, რუსეთს მოუწევს ყოველ გადაცილებულ დღეზე პირგასამტეხლოს გადახდა. ე.წ. დეპორტირებულების საქმეზე კომიტეტმა გადაწყვეტილებები 2019 წლის 23-25 სექტემბერს, 3-5 დეკემბერსა და 2020 წლის 3-5 მარტსა და 1-3 სექტემბერს მიიღო, რითაც გაიზიარა საქართველოს მთავრობის მიერ წარდგენილი არგუმენტები და რუსეთს მოუწოდა კომპენსაციის სახით 10 მილიონი ევროს საქართველოსთვის დაუყოვნებლივ გადახდისკენ. ევროპული სასამართლოს გადაწყვეტილების მიხედვით, აღნიშნული თანხა უნდა განაწილდეს 2006 წლის შემოდგომაზე რუსეთის ფედერაციიდან მასობრივი დეპორტაციისა და ადამიანის უფლებების უხეში დარღვევების მსხვერპლ, სულ მცირე, 1500 პირზე. ევროპის საბჭოს მინისტრთა კომიტეტის ფარგლებში, საქართველოს იუსტიციისა და საგარეო საქმეთა სამინისტროები მიმართავენ ყველა ზომას, რათა რუსეთის ფედერაციამ შეასრულოს სტრასბურგის სასამართლოს მიერ დაკისრებული ვალდებულებები, რის შესახებაც საზოგადოება მუდმივად ინფორმირებული იქნება“, - ნათქვამია ინფორმაციაში.
დონალდ ტრამპსა და მის მეუღლეს კორონავირუსი დაუდასტურდათ
აშშ-ის პრეზიდენტ დონალდ ტრამპსა და პირველ ლედის, მელანია ტრამპს კორონავირუსი დაუდასტურდათ, - ამის შესახებ აშშ-ის პრეზიდენტი სოციალურ ქსელ „ტვიტერში“ წერს. „ვიწყებთ კაარანტინსა და გამოჯანმრთელების პროცესს,“- წერს ტრამპი. შეგახსენებთ, მანამდე ცნობილი გახდა, რომ დონალდ ტრამპის მრჩეველს, ჰოუფ ჰიქსს კორონავირუსი დაუდასტურდა, რის გამოც ქვეყნის პრეზიდენტი და პირველი ლედი კარანტინში გადავიდნენ.
რუსეთი და საფრანგეთი მთიან ყარაბაღში ცეცხლის შეწყვეტისკენ მოწოდებით გამოდიან
რუსეთის პრეზიდენტმა, ვლადიმირ პუტინმა და მისმა ფრანგმა კოლეგამ, ემანუელ მაკრონმა, აზერბაიჯანსა და სომხეთს, ცეცხლის შეწყვეტისკენ მოუწოდეს. კრემლის ინფორმაციით, პირველ ოქტომბერს, ორმა პრეზიდენტმა სატელეფონო საუბარი გამართა და იმსჯელა მთიანი ყარაბაღისთვის ბოლო წლებში ყველაზე მძაფრი ბრძოლების შეჩერების მიზნით დიპლომატიური ზომების მიღების თაობაზე. კრემლის ინფორმაციის თანახმად, „ვლადიმირ პუტინმა და ემანუელ მაკრონმა დაპირისპირებულ მხარეებს მოუწოდეს, დაუყოვნებლივ და მთლიანად შეწყვიტონ ცეცხლი, განმუხტონ ვითარება და გამოიჩინონ მაქსიმალური თავშეკავება". ორი პრეზიდენტი აცხადებს, რომ ისინი მზად არიან გააკეთონ განცხადება საბრძოლო მოქმედებების შეწყვეტის და ეუთოს ე.წ. მინსკის ჯგუფის სახელით მოლაპარაკების განახლების შესახებ. მინსკის ჯგუფის თანათავმჯდომარეები არიან რუსეთი, საფრანგეთი და აშშ. აზერბაიჯანის და სომხური ძალები აპირებენ გააგრძელოს საბრძოლო მოქმედებები, რაც ფართომასშტაბიან და შესაძლოა, თვით რეგიონულ კონფლიქტში გადაიზარდოს. აზერბაიჯანის საერთაშორისოდ აღიარებული ტერიტორიის ნაწილის, მთიანი ყარაბაღისთვის, რომელსაც 1990-იანი წლებიდან სომხური ძალები აკონტროლებენ, ბრძოლაში ჩაბმული არიან შეიარაღებული დრონები, ტანკები, შვეულმფრენები და არტილერია. ბრძოლები მიმდინარეობს ორ მხარეს შორის გამყოფი ზოლის თითქმის ყველა მონაკვეთზე.
სომხური მედიის ინფორმაციით, მთიან ყარაბაღში „ფრანს-პრესის“ თანამშრომლებს თავს დაესხნენ
ავტომობილი, რომლითაც „ფრანს-პრესის“ თანამშრომლები მთიან ყარაბაღში გადაადგილდებოდნენ, აზერბაიჯანის შეიარაღებული ძალების სამიზნე გახდა, - ამის შესახებ ინფორმაციას სომხური მედია არაღიარებული მთიანი ყარაბაღის ხელისუფლებაზე დაყრდნობით ავრცელებს. მათივე ინფორმაციით, აღნიშნულ ინციდენტამდე, აზერბაიჯანელი სამხედროების მიერ ქალაქ მარტუნის დაბომბვის შედეგად გამოცემა Le Monde-ს ორი ჟურნალისტი, ARMENIA TV-ის ოპერატორი და 24News-ის ჟურნალისტი დაშავდნენ.
"ვინც სომხეთს უჭერს მხარს, პასუხს აგებენ კაცობრიობის წინაშე"
თურქეთის პრეზიდენტი რეჯეფ თაიფ ერდოღანი აცხადებს, რომ ყველა, ვინც სომხეთს უჭერს მხარს, პასუხს აგებს კაცობრიობის წინაშე. “ყველაფრის გადადება და თურქეთისთვის ცილისწამების მცდელობა სომხეთის მთავრობას ვერ გადაარჩენს. ვაფრთხილებ მათ, ვინც მხარს უჭერს ამ ბანდიტურ სახელმწიფოს, რომ ისინი პასუხს აგებენ კაცობრიობის სინდისის წინაშე. დაე, ალაჰი იყოს ჩვენი აზერბაიჯანელი ძმების მფარველი!" - აღნიშნა ერდოღანმა. მისი თქმით, ეუთოს მინსკის ჯგუფის თანათავმჯდომარეები - შეერთებული შტატები, რუსეთი და საფრანგეთი თითქმის 30 წელია გულგრილად განიხილავენ მთიანი ყარაბაღის კონფლიქტს. „მიუღებელია ის, რომ იმის ფონზე, რაც ხდება, მათ ცეცხლის შეწყვეტა სურთ. თუკი ვინმეს ეს სურს, მაშინ ოკუპანტებმა უნდა დატოვონ ეს მიწები. ჩვენს აზერბაიჯანელ ძმებს სურთ დაბრუნდნენ თავიანთ მიწებზე. მე ეს განვიხილე პუტინთან და მაკრონთანაც. ისინი ყოველთვის ისხდნენ და საუბრობდნენ, მაგრამ უშედეგოდ. ახლა შედეგის დროა,“- განაცხადა ერდოღანმა. მისივე თქმით, რეგიონში მყარი მშვიდობის დამყარების ერთადერთი გზა ოკუპირებული აზერბაიჯანული ტერიტორიიდან სომხეთის გასვლაა.
სერგეი ლავროვი აზერბაიჯანელ და სომეხ კოლეგებს მოსკოვში შეხვედრას სთავაზობს
რუსეთის საგარეო საქმეთა მინისტრმა სერგეი ლავროვმა აზერბაიჯანის საგარეო საქმეთა მინისტრ ჯეიჰან ბაირამოვსა და სომხეთის საგარეო საქმეთა მინისტრ ზოგრაბ მნაცაკანიანთან სატელეფონო საუბრები გამართა, - ამის შესახებ ინფორმაციას რუსული მედია ავრცელებს. მათივე ინფორმაციით, სერგეი ლავროვმა დაადასტურა მზადყოფნა, მოსკოვი მთიანი ყარაბაღის კონფლიქტის გადაჭრის პლატფორმად იქცეს. ”სერგეი ლავროვმა ხაზი გაუსვა, რომ რუსეთი გააგრძელებს შუამავლის როლის შესრულების მცდელობას, როგორც ინდივიდუალურად, ასევე ეუთოს მინსკის ჯგუფის სხვა თანათავმჯდომარეებთან ერთად, რისი მიზანიც მთიანი ყარაბაღის კონფლიქტის პოლიტიკურად და დიპლომატიურად მოგვარების პირობების შექმნაა. მან ასევე დაადასტურა მზადყოფნა, მოსკოვი შესაბამისი კონტაქტების ორგანიზების პლატფორმად იქცეს, მათ შორის აზერბაიჯანის, სომხეთისა და რუსეთის საგარეო საქმეთა მინისტრების ახალი შეხვედრისთვის", - აცხადებენ რუსეთის საგარეო უწყებაში. მათივე ინფორმაციით, რუსმა დიპლომატმა ასევე ხაზი გაუსვა მოლაპარაკებების მაგიდასთან რაც შეიძლება სწრაფად დაბრუნების აუცილებლობას.
ბელარუსი: ცნობილ კალათბურთელ ალენა ლეუჩანკას 15 დღით პატიმრობა მიუსაჯეს
კალათბურთელ ალენა ლეუჩანკას, რომელიც ერთ-ერთი ყველაზე ცნობილი ბელარუსელი სპორტსმენია, ქვეყნის ავტორიტარი ლიდერის, ალიაქსანდრ ლუკაშენკას წინააღმდეგ მიმდინარე საპროტესტო გამოსვლებში მონაწილეობისთვის 15 დღით პატიმრობა მიუსაჯეს. 30 სექტემბერს მინსკის ლენინის რაიონის მოსამართლემ, მარინა ზაპასნიკმა ლეუჩანკას პატიმრობა მიუსაჯა საზოგადოებრივი თავშეყრის წესების დარღვევისთვის. მანამდე ლეუჩენკა, რომელიც მოძრაობა „ათლეტების თავისუფალი ასოციაციის“ წევრია, 30 სექტემბერს დააკავეს მინსკის აეროპორტში, როცა ის უცხოეთში სამკურნალოდ გამგზავრებას აპირებდა. ლეუჩენკა იყო ბელარუსის ეროვნული ნაკრების წევრი, თამაშობდა რუსეთის სუპერლიგასა და აშშ-ის WNBA-ში. აგვისტოში 350-მდე ბელარუსელმა ათლეტმა და სპორტის სფეროს სხვა წარმომადგენელმა ღია წერილით მიმართა ლუკაშენკას. მათ 9 აგვისტოს საპრეზიდენტო არჩევნების შედეგების გაუქმება და „პოლიტიკური პატიმრებისა“ და საპროტესტო გამოსვლების დროს დაპატიმრებულთა განთავისუფლება მოითხოვეს. ლუკაშენკამ, რომელიც უარს ამბობს ოპოზიციასთან მოლაპარაკებებზე, 23 სექტემბერს ჩუმად დადო საპრეზიდენტო ფიცი. დასავლეთის ქვეყნები უარს ამბობენ ლუკაშენკას ბელარუსის ლეგიტიმურ პრეზიდენტად ცნობაზე და ძალაუფლების მშვიდობიანი გზით გადაცემის მოწოდებით გამოდიან.
"ამ ეტაპზე რუსეთთან ურთიერთობაში „მოსმენის რეჟიმში“ ვიქნებოდი" - ტომას ჰენდრიკ ილვესი
ესტონეთის ყოფილი პრეზიდენტი, ამჟამად კი „არჩევნებში კეთილსინდისიერი მონაწილეობისთვის ტრანსატლანტიკური კომისიის“ (TCEI) წევრი, ტომას ჰენდრიკ ილვესი ამ ეტაპზე არ ურჩევს საქართველოს რუსეთთან დიალოგის წამოწყებას. რუსეთთან პირდაპირი დიალოგის პერსპექტივაზე რადიო თავისუფლების შეკითხვას მან ასე უპასუხა: „ვიცი, არაპოპულარული იქნება, მაგრამ ვიტყვი, რომ მოცემულ მომენტში, რუსეთის ქცევის გათვალისწინებით, „მოსმენის რეჟიმში“ ვიქნებოდი. ხედავთ, რომ ბოლო 2-3 წლის განმავლობაში ისინი განსაკუთრებით აგრესიულები არიან. ტრამპის ადმინისტრაციის მოსვლიდან მოყოლებული, ისინი თვლიან, რომ შეუძლიათ გააკეთონ თითქმის ყველაფერი, რაც სურთ და აკეთებენ კიდეც თითქმის ყველაფერს, რაც სურთ, მათ შორის აშშ-შიც და ყველაზე ვულგარულ სტილში. ასე რომ, ვიტყოდი: მოუსმინეთ, რასაც [რუსები] ამბობენ და ნუ წახვალთ რაიმე დათმობაზე ამ ეტაპზე. თუკი მომავალში გვეყოლება განსხვავებული ადმინისტრაცია აშშ-ში, მნიშვნელოვნად გაიზრდება საქართველოს მიმართ მხარდაჭერა და იმის გაგება - რას წარმოადგენს რუსეთი. თუკი არ გვეყოლება ახალი პრეზიდენტი აშშ-ში... ეს არავინ იცის... მაგრამ, ახლა არ არის დრო მოლაპარაკებებისა და დიალოგის დასაწყებად. დაიცადეთ მომავალ წლამდე და ნახეთ როგორ განვითარდება მოვლენები, როცა პუტინისთვის აღარ იქნება ასეთი ხელსაყრელი ვითარება“. ესტონეთის ყოფილი პრეზიდენტი ნატოში ინტეგრაციის გზაზე საქართველოს რამდენიმე რჩევას სთავაზობს: „ნატოში ინტეგრაციისთვის უმნიშვნელოვანესი საკითხი, რა თქმა უნდა, არის კურსის შენარჩუნება. ყველაზე მნიშვნელოვანი ნაწილი, რა თქმა უნდა, არის აგრეთვე ლიბერალურ დემოკრატიად დარჩენა, რაც უპირველესად გულისხმობს: თავისუფალი და სამართლიანი არჩევნების ჩატარებას; კანონის უზენაესობას - არანაირი საგანგებო გარიგება არავისთვის; ადამიანის უფლებების პატივისცემას - ეს ნიშნავს ყველას უფლებების პატივისცემას და არა ცალკეული ჯგუფისა. ეს არის მინიმალური პირობები. უფრო სპეციფიკურად შეიძლება მსჯელობა რეფორმებზე, რომლებიც განახორციელეთ - რამდენად ეფექტიანია ისინი. წლებია საქართველო ახორციელებს შესანიშნავ მცდელობებს კორუფციის შესამცირებლად. ყოველთვის ვამაყობ საქართველოს პოზიციით, როცა „საერთაშორისო გამჭვირვალების“ რეიტინგს ვუყურებ. უნდა გააგრძელოთ ამის კეთება. გარდა ამისა, შეინარჩუნეთ ღია და თავისუფალი ეკონომიკა. იმუშავეთ ყველა იმ საკითხზე, რომელზეც გელაპარაკებათ ევროკავშირის წარმომადგენელი თბილისში“.
საქართველოს მოქალაქეები ისრაელში დროებით ლეგალურად დასაქმებას შეძლებენ
დღეს, იერუსალიმში ისრაელის საგარეო საქმეთა მინისტრმა გაბი აშკენაზიმ და საქართველოს ელჩმა ისრაელში ლაშა ჟვანიამ ხელი მოაწერეს ორმხრივ შეთანხმებას ისრაელში საქართველოს მოქალაქეების დამხმარე პერსონალად დროებითი დასაქმების შესახებ. ამის შესახებ „ინტერპრესნიუსს“ ისრაელის საელჩოდან აცნობეს. მათივე ინფორმაციით, 1 ოქტომბერს, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი, ეკატერინე ტიკარაძე და ისრაელის ელჩი საქართველოში, რან გიდორი, ხელს მოაწერენ აღნიშნული შეთანხმების იმპლემენტაციის პროტოკოლს თბილისში. „ორივე დოკუმენტი შექმნილია საქართველოდან ასობით დამხმარე მუშაკის შერჩევისა და დროებითი დასაქმების ხელშესაწყობად ისრაელის ხანგრძლივი მოვლის დაწესებულებებში, სადაც ქრონიკული ან კომპლექსური დაავადებებისა და/ან შეზღუდული (ფიზიკურად ან კოგნიტურად) შესაძლებლობების მქონე პირებს უვლიან. დიპლომატების, საჯარო მოხელეების, იურისტებისა და ექსპერტების გუნდი ორივე ქვეყნის სამთავრობო უწყებებიდან დაუღალავად მუშაობდნენ ბოლო თვეების განმავლობაში, რათა შერჩევის, ტრენინგისა და დასაქმების სისტემა ყოფილიყო სამართლიანი, ეფექტური და ქმედითი. მთლიანი პროცესის განხორციელება, მონიტორინგი და ზედამხედველობა იწარმოებს შესაბამისი სამთავრობო უწყებების მიერ, ორივე მხარის იურისდიქციასთან სრული შესაბამისობის უზრუნველსაყოფად. საქართველო არის პირველი ქვეყანა, რომელსაც ისრაელის ხელისუფლებამ მიმართა უცხოელი დამხმარე პერსონალის ხანგრძლივი მოვლის დაწესებულებებში დასაქმების მიზნით. ეს ფაქტი ასახავს როგორც ღრმა მეგობრულ კავშირს ორ ერს, ასევე შესანიშნავ საქმიან ურთიერთობას ჩვენი ქვეყნების მთავრობებსა და საელჩოებს შორის. ისრაელის საელჩოს სურს განსაკუთრებით აღნიშნოს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილის, თამილა ბარკალაიასა და ასევე შერიგებისა და სამოქალაქო თანასწორობის საკითხებში სახელმწიფო მინისტრის, თეა ახვლედიანის (წინა თანამდებობაზე ყოფნის პერიოდში) შეტანილი პირადი წვლილი“, - ნათქვამია ინფორმაციაში.
აზერბაიჯანის 420 სკოლაში სწავლა შეწყდა
სომხეთის მიერ განხორციელებულ თავდასხმასთან დაკავშირებით, აზერბაიჯანის 14 რეგიონის 420-მა სკოლამ მუშაობა შეზღუდა, - ამის შესახებ აზერბაიჯანული მედია ქვეყნის განათლების მინისტრ ემინ ამრულაევზე დაყრდნობით იუწყება. „მტრის აგრესიისა და დასახლებულ პუნქტებზე განხორციელებული თავდასხმების შედეგად, სკოლის 9 შენობა და ტერიტორია დაზიანდა. სამწუხაროდ, ჩვენი ორი მოსწავლე მტრის თავდასხმას ემსხვერპლა, ერთი პედაგოგი კი დაჭრილია,“- განაცხადა მინისტრმა. შეგახსენებთ, რომ სომეხ და აზერბაიჯანელ ჯარისკაცებს შორის შეტაკებები 27 სექტემბრის შემდეგ არ წყდება. კონფლიქტს ათეულობით ადამიანი ემსხვერპლა.
