ეკონომიკა
ევროკავშირის ელჩი საქართველოსთვის გამოყოფილი 1.5 მილიარდი ლარის შესახებ
ევროკავშირის ელჩის კარლ ჰარცელის განცხადებით საქართველოსთის გამოყოფილი 100 მილიონი ევრო, ეს არის მხოლოდ ნაწილი COVID-19-ის კრიზისის დაძლევაზე მიმართული იმ 1.5 მილიარდი ლარის ოდენობის უპრეცენდენტო დახმარებისა, რომლის მობილიზება ევროკავშირმა საქართველოსთვის 2020 წლის მარტიდან მოახდინა. COVID-19-ის წინააღმდეგ ბრძოლაში საქართველოს მთავრობის დასახმარებლად, ნოემბრის ბოლოს ევროკავშირმა საქართველოს მაკროფინანსური დახმარების სახით 100 მილიონი ევრო (დაახლოებით 400 მილიონი ლარი) გამოუყო. აღნიშნულ საკითხთან დაკავშირებით ევროკავშირის ელჩის ინტერვიუს საქართველოში ევროკავშირის წარმომადგენლობა აქვეყნებს. ინტერვიუს უცვლელად გთვაზობთ. _ ასი მილიონი ევროს მოცულობის მაკროფინანსურ დახმარებას, რომელიც ევროკავშირმა საქართველოსთვის ახლახან უზრუნველყო, გთხოვთ განგვიმარტოთ თუ რას მოხმარდება ეს თანხა და რა ადგილი უჭირავს მას პანდემიის პერიოდში ევროკავშირის მიერ საქართველოსთვის გაწეულ მთლიან დახმარებაში? _ მადლობა შეკითხვისთვის. ევროკავშირმა და ევროპის გუნდმა (Team Europe) COVID-19 პანდემიასთან ბრძოლაში საქართველოს დასახმარებლად შეძლო დაახლოებით 1.5 მილიარდი ლარის მობილიზება. ამ თანხის თითქმის 2/3 გრანტის, ანუ საჩუქრის სახითაა წარმოდგენილი, დანარჩენი კი - მაქსიმალურად შეღავათიანი სესხის სახით. სიამაყით შემიძლია ვთქვა, რომ ეს არის ევროკავშირის მიერ მსოფლიოს ნებისმიერი უცხო ქვეყნისთვის ერთ სულ მოსახლეზე გაწეული დახმარების ერთ-ერთი ყველაზე მაღალი მაჩვენებელი, რაც მიმდინარე კრიზისის დროს ევროკავშირის მტკიცე სოლიდარობას გამოხატავს საქართველოს მიმართ . რას მოხმარდება ეს თანხა? ჩვენი დახმარება ძირითადად ოთხ სფეროზე განაწილდება. თანხის ნახევარზე მეტი მოხმარდება საქართველოს მთავრობის მიერ COVID-19-ის კრიზისის დასაძლევად მიმართული ძალისხმევის გაძლიერებას, მათ შორის ანტიკრიზისული ეკონომიკური გეგმის განხორციელებასა და მთავრობის სათანადოდ ფუნქციონირების ფინანსურ უზრუნველყოფას. ამ მიზნით, 100 მილიონი ევროს მოცულობის სესხის დიდი ნაწილი ჩვენ უკვე ჩავურიცხეთ საქართველოს.მეორე, ევროკავშირის მხარდაჭერა პირდაპირ მიმართულია საქართველოს ჯანდაცვის სისტემის გაძლიერებაზე. ხდება სამედიცინო აღჭურვილობის უზრუნველყოფა, როგორიცაა სასუნთქი აპარატები, სამედიცინო პირბადეები და სამედიცინო პერსონალის გადამზადება. მესამე, განსაკუთრებულ ყურადღებას ვუთმობთ მოწყვლად ჯგუფებს: შეზღუდული შესაძლებლობის მქონე პირები, იძულებით გადაადგილებული პირები, ოჯახში ძალადობის მსხვერპლები, რომლებიც ამ კრიზისის პერიოდში განსაკუთრებულად დაზარალდნენ. ამ სფეროში ჩვენ ვაძლიერებთ სამოქალაქო საზოგადოების ორგანიზაციებს, რომლებიც ადამიანების თითოეულ ამ ჯგუფს პირდაპირ მხარდაჭერას უწევენ.გარდა ამისა, ჩვენი განსაკუთრებული ძალისხმევა მიმართულია ეკონომიკური მდგრადობისა და ეკონომიკის აღდგენის მხარდაჭერაზე, რაც დიდი ხნის განმავლობაში ერთ-ერთ მთავარ გამოწვევად დარჩება. გამოვყავით თითქმის 250 მილიონი ლარი ბიზნესებისთვის სესხებზე წვდომის ხელშესაწყობად, აგრეთვე გრანტები ისეთი სფეროებისათვის, როგორიცაა სოფლის მეურნეობა, სოფლის ეკონომიკური განვითარება, ტურიზმი და პროფესიული განათლება მთელი საქართველოს მასშტაბით. ეს მიზნები ჩვენთვის დავისახეთ და სწორედ მათ განხორციელებაზე ვმუშაობთ ახლა. _ თქვენ ახსენეთ, რომ დახმარებას ევროკავშირი და ევროპის გუნდი უზრუნველყოფენ. რა არის ევროპის გუნდი? _ გუნდს წარმოადგენს ევროკავშირი, ანუ ჩვენი 27 წევრი სახელმწიფო და ჩვენი საფინანსო ინსტიტუტები, კერძოდ კი ევროპის საინვესტიციო ბანკი და ევროპის რეკონსტრუქციისა და განვითარების ბანკი. ჩვენ საკუთარ თავს ევროპის გუნდს ვუწოდებთ, რადგან ამ განსაკუთრებული გამოწვევის დროს, რომელიც პანდემიამ შექმნა, მოგვიწია კიდევ უფრო მჭიდროდ გვემუშავა ერთმანეთთან სრული კოორდინირების უზრუნველსაყოფად და ძალისხმევის შედეგების გასაძლიერებლად. ერთად ვმუშაობთ, როგორც ევროპაში, ასევე მის ფარგლებს გარეთ და მსოფლიო ძალისხმევის ფარგლებში შევძელით 36 მილიარდ ევროზე მეტის მობილიზება მიმდინარე პანდემიის პირობებში მსოფლიოს დასახმარებლად. _ თქვენ ახსენეთ, რომ ევროკავშირის მიერ უზრუნველყოფილი დახმარების ნახევარზე მეტი განკუთვნილია საქართველოს მთავრობის მიერ COVID-19-ის კრიზისის დაძლევაზე მიმართული ძალისხმევის მხარდასაჭერად. როგორ უზრუნველყოფს ევროკავშირი იმას, რომ ეს თანხა სათანადოდ იყოს გამოყენებული? _ ძალიან მნიშვნელოვანია მთავრობებთან მუშაობა. ეს ეხება როგორც საქართველოს, ასევე მსოფლიოს ნებისმიერ ქვეყანას, ვინაიდან მხოლოდ მთავრობებს, მათი სამინისტროების, თანამშრომლებისა და ქვეყნის მასშტაბით არსებული უწყებების საშუალებით, აქვთ ამ მასშტაბის კრიზისის დაძლევისთვის საჭირო შესაძლებლობები. ჩვენ პანდემიის პირველი დღეებიდანვე დავიწყეთ მუშაობა საქართველოს მთავრობასთან და დავსახეთ პანდემიასთან ბრძოლის ერთობლივი პრიორიტეტები, მათ შორის ანტიკრიზისული ეკონომიკური გეგმის მიზნების განსაზღვრის კუთხითაც. ჩვენ მივიღებთ გარკვეულ ზომებს იმისათვის, რომ ამ პროგრამის განხორციელებისა და პროგრამისთვის გამოყოფილი სახსრების ხარჯვის სათანადო მონიტორინგი უზრუნველვყოთ. ჩვენ ვმუშაობთ საერთაშორისო სავალუტო ფონდთან, არასამთავრობო ორგანიზაციებთან და საქართველოს სახელმწიფო აუდიტის სამსახურთან ერთად სათანადო მონიტორინგის განსახორციელებლად. ცალკეულ შემთხვევებში ჩვენ მკაფიოდ განვსაზღვრავთ თუ რას უნდა მოხმარდეს ჩვენი ფული. მაგალითად, ,,მდგრადობის გაზრდის შესახებ ხელშეკრულებაში“ განსაზღვრული გვაქვს კონკრეტული მიზნები, მაგალითად, სულ მცირე 70 000 ოჯახისთვის დამატებითი მიზნობრივი სოციალური დახმარების უზრუნველყოფა, სულ მცირე 30 000 კომპანიის მიერ პანდემიის პირობებში თანამშრომლების შენარჩუნების ხელშეწყობა და საავადმყოფოებისთვის სულ მცირე 150 რეანიმაციული საწოლის გადაცემა. ეს არის ძალიან კონკრეტული მიზნები და ამ ყველაფრის გათვალისწინებით, დარწმუნებული ვარ, რომ უკვე გვაქვს კონტროლის ყველა საჭირო ინსტრუმენტი, რომლებსაც მომავალშიც გამოვიყენებთ. _ ევროკავშირი საქართველოს, მათ შორის მის ჯანდაცვის სექტორს, პირდაპირ დახმარებასაც უწევს. შეგიძლიათ გვითხრათ ორიოდე სიტყვა ამის შესახებ? _ უშუალოდ პანდემიასთან ბრძოლაში ჩვენ ვთანამშრომლობთ ჯანდაცვის მსოფლიო ორგანიზაციასთან. ერთად, ჩვენ უკვე გადავეცით საქართველოს სამედიცინო აღჭურვილობის დაახლოებით 2 მილიონი ერთეული, მათ შორის ინდივიდუალური დაცვის საშუალებები, სამედიცინო პირბადეები, სპეციალური ტანსაცმელი და სხვა. აგრეთვე, ისეთი სამედიცინო მოწყობილობები, როგორიცაა სასუნთქი აპარატები. ჩვენ იმედი გვაქვს, რომ წლის ბოლომდე საქართველო დახმარების კიდევ ერთ დიდ პარტიას მიიღებს, რასაც მე მოუთმენლად ველი. ჩვენ ვცდილობთ დავეხმაროთ უშუალოდ პანდემიასთან ბრძოლის წინა ხაზზე მყოფ ადამიანებს. ჩვენი დახმარება ნაწილდება საქართველოს 9 ლაბორატორიაზე, საგანგებო სიტუაციების კოორდინაციისა და გადაუდებელი დახმარების ცენტრი, აგრეთვე 4 000-ზე მეტ სასწრაფო სამედიცინო დახმარების ბრიგადის მძღოლსა და ექიმზე, რაც მათ მოვალეობის შესრულებაში ეხმარება. გარდა ამისა, ვატარებთ ტრენინგებს უსაფრთხო მუშაობის წესებზე, სტრესთან გამკლავების საშუალებებსა და სხვა მსგავს საკითხებზე, რაც ძალიან მნიშვნელოვანია, რადგან ყველამ ვიცით თუ რა დატვირთვით, ხშირად საკუთარი სიცოცხლის რისკის ფასადაც კი უწევთ მუშაობა ამ ადამიანებს და ყველა მათგანი ჩვენგან დიდ მხარდაჭერას იმსახურებს.კითხვა _ სად არის შესაძლებელი ინფორმაციის მიღება იმ მხარდაჭერის შესახებ, რომელსაც ევროკავშირი საქართველოს პანდემიის დროს უწევს? _ ჩვენ ვცდილობთ მაქსიმალურად გავავრცელოთ ეს ინფორმაცია. პირველ რიგში გირჩევთ ეწვიოთ ევროკავშირის წარმომადგენლობის ვებ-გვერდსა და სოციალური მედიის გვერდს. ჩვენი Facebook გვერდი ძალიან აქტიურია, ასევე, ვავრცელებთ ინფორმაციას Twitter-ის ანგარიშების საშუალებითაც.
ფრანგულმა მარეგულირებელმა Google 100, Amazon-ი კი 35 მლნ ევროთი დააჯარიმა
ფრანგულმა მარეგულირებელმა ტექნოლოგიური გიგანტისა და ამერიკული უმსხვილესი ინტერნეტ მაღაზიის დაჯარიმების შესახებ განაცხადა. France24-ის ცნობით, ჯარიმა გამოიწვია მომხმარებლის კომპიუტერზე სარეკლამო ფაილების (cookies) განთავსებამ წინასწარი თანხმობისა და ადეკვატური ინფორმაციის მიწოდების გარეშე. „cookie“ მომხმარებლის კომპიუტერულ ბრაუზერში შენახული მონაცემების მცირე ნაწილია, რომელიც ვებსაიტებს საშუალებას აძლევს, ამოიცნონ მომხმარებლები და დაიმახსოვრონ მათი წინა აქტივობები. მარეგულირებლის განცხადებით, კომპანიებმა ასევე არ განათავსეს ინფორმაცია იმის შესახებ, თუ როგორ უნდა ეთქვათ ფრანგ მომხმარებლეს უარი ასეთი ფაილის გამოყეებაზე. Google-მა საპასუხო განცხადება გაავრცელა და აღნიშნა, რომ საფრანგეთის მიერ დადგენილი წესები და მარეგულირებლის მითითებელი გაირკვეველია და მუდმივად იცვლება. თავის მხრივ, Amazon-მა განაცხადა, რომ არ ეთანხმება CNIL - ის გადაწყვეტილებას. „ჩვენ ვაკმაყოფილებთ მომხმარებლებისა და მარეგულირებლის მოლოდინებს და სრულად ვიცავთ ყველა მოქმედ კანონს ყველა ქვეყანაში, სადაც ვმუშაობთ”, - ნათქვამია განცხადებაში.
რეფინანსირების განაკვეთი უცვლელად, 8%-ზე რჩება
ეროვნულმა ბანკმა მონეტარული პოლიტიკის განაკვეთი უცვლელად 8%-ზე დატოვა. ამის შესახებ ეროვნული ბანკის პრეზიდენტმა კობა გვენეტაძემ ონლაინ პრესკონფერენციისას განაცხადა. ეროვნული ბანკის გადაწყვეტილება: საქართველოს ეროვნული ბანკის მონეტარული პოლიტიკის კომიტეტმა 2020 წლის 9 დეკემბრის სხდომაზე რეფინანსირების განაკვეთის უცვლელად დატოვების გადაწყვეტილება მიიღო. მონეტარული პოლიტიკის განაკვეთი 8.0 პროცენტს შეადგენს. ბოლო თვეებში წლიური ინფლაცია 3.8 პროცენტის დონეზეა. არსებული პროგნოზით, სხვა თანაბარ პირობებში, ინფლაციის მაჩვენებელი 2021 წლის პირველ ნახევარში მიზნობრივ დონესთან ახლოს იმოძრავებს. ინფლაციის დინამიკას, ძირითადად, სუსტი ერთობლივი მოთხოვნა განსაზღვრავს და მოსალოდნელია, რომ აღნიშნული გავლენა მომავალ წელსაც შენარჩუნდება. თუმცა, საგულისხმოა 2020-2021 წლებში პანდემიასთან გამკლავების მიზნით გაზრდილი სოციალური და ეკონომიკის მხარდამჭერი ფისკალური ხარჯების როლი ერთობლივი მოთხოვნის წახალისებაში. მონეტარული პოლიტიკის კომიტეტმა ასევე გაითვალისწინა მიწოდების მხარეს არსებული ფაქტორები, როგორიცაა, მაგალითად, პანდემიის ფონზე დამატებითი შეზღუდვებით გამოწვეული წარმოების ხარჯების ზრდა. კომიტეტმა გადაწყვეტილების მიღებისას ასევე მხედველობაში მიიღო ის გაურკვევლობა, რომელიც გახანგრძლივებულ პანდემიასთან და გლობალურად მოქმედ შეზღუდვებთან არის დაკავშირებული. ამასთან, ეკონომიკის ჯერ კიდევ მაღალი დოლარიზაციის გამო მონეტარული პოლიტიკის შერბილების შესაძლებლობა ლიმიტირებულია. არსებული შეფასებით, გამკაცრებული მონეტარული პოლიტიკის შენარჩუნება შესაძლოა უფრო ხანგრძლივად გახდეს საჭირო, რაც ინფლაციის მოლოდინებსა და ეკონომიკური აქტივობის დინამიკაზე იქნება დამოკიდებული. ეკონომიკური მოვლენების განვითარებიდან გამომდინარე, კომიტეტი მომავალში არც საპროცენტო განაკვეთის ზრდის საჭიროებას გამორიცხავს. წინასწარი ინდიკატორებით, ერთობლივი მოთხოვნა სუსტია. არსებული შეფასებით, ეკონომიკური აქტივობა ოქტომბერში წლიურად 3.9 პროცენტით შემცირდა, ათი თვის საშუალო კი -5.1 პროცენტია. 2020 წელს კლების შემდეგ, 2021 წლიდან ეკონომიკური აქტივობის ეტაპობრივი აღდგენაა მოსალოდნელი. არსებული პროგნოზებით, სხვა თანაბარ პირობებში, 2021 წელს ეკონომიკური ზრდის მთავარი ფაქტორი ადგილობრივი მოთხოვნა იქნება. საპირისპიროდ, საგარეო მოთხოვნა მნიშვნელოვნად შემცირებული რჩება და 2021 წელსაც მცირე ზრდაა პროგნოზირებული. საერთაშორისო მოგზაურებიდან მიღებული შემოსავალი მინიმალურია და, წინასწარი მონაცემებით, ოქტომბერში წლიურად 94 პროცენტით შემცირდა. სუსტი ადგილობრივი მოთხოვნის ფონზე, საქონლის იმპორტი ოქტომბერში წლიურად 24 პროცენტით შემცირდა. წინა თვეში მცირე ზრდის შემდეგ, ოქტომბერში ექსპორტმა წლიურად კვლავ იკლო. ამის საპირწონედ, გრძელდება ფულადი გზავნილების მაღალი ზრდა. Covid-19-თან დაკავშირებული ღონისძიებების ფარგლებში, ევროპის ცენტრალური ბანკი და საქართველოს ეროვნული ბანკი ლიკვიდობის მხარდაჭერის მიზნით, 100 მლნ ევროს ფარგლებში, ევროს რეპო ხაზის ამოქმედების შესახებ შეთანხმდნენ. აღნიშნული ხაზი ცენტრალური ბანკებისათვის ევროსისტემის რეპოს მექანიზმის (Eurosystem repo facility for central banks (EUREP)) ფარგლებში ამოქმედდა. ინსტრუმენტის მიზანია, საჭიროების შემთხვევაში, საქართველოს ფინანსური სისტემისათვის ევროს ლიკვიდობის მიწოდება. მექანიზმი ძალაში იქნება 2021 წლის 30 ივნისამდე და მის საოპერაციო მხარდაჭერას გერმანიის ბუნდესბანკი უზრუნველყოფს. საქართველოს ეროვნული ბანკი მიმდინარე ეკონომიკურ პროცესებსა და საფინანსო ბაზრებს მომავალშიც დააკვირდება და, ფასების სტაბილურობის უზრუნველსაყოფად, მის ხელთ არსებულ ყველა ინსტრუმენტს გამოიყენებს. მონეტარული პოლიტიკის კომიტეტის შემდეგი სხდომა 2021 წლის 3 თებერვალს ჩატარდება.
თურქეთიდან ჩინეთის მიმართულებით მოძრავმა საექსპორტო მატარებელმა საქართველოს საზღვარი უკვე გადაკვეთა
ჩინეთის მიმართულებით ბაქო-თბილისი-ყარსის რკინიგზის მონაკვეთით ტვირთის ტრანსპორტირება პირველად განხორციელდა. მატარებელი სტამბოლიდან 4 დეკემბერს დაიძრა და შუა სატრანსპორტო დერეფნის გავლით, სიანის პროვინციაში ჩავა. ის 8 693 კმ-ს 12 დღეში დაფარავს. ეს არის უპრეცედენტო შემთხვევა, რადგან აქამდე შუა სატრანსპორტო დერეფნის მეშვეობით, ტვირთები ჩინეთიდან ევროპის მიმართულებით მიემართებოდა. ბაქო-თბილისი-ყარსი ახალი სარკინიგზო მარშრუტია, რომელიც საქართველოზე გავლით, ევროპასა და აზიას ერთმანეთთან აკავშირებს. ის სატესტო რეჟიმში 2017 წლიდან მოქმედებს. 2020 წლის იანვარ-ოქტომბრის პერიოდში შუა დერეფანზე ჩინეთიდან და ჩინეთის მიმართულებით საქართველოს გავლით გადაზიდულმა კონტეინერების რაოდენობამ შეადგინა 2343 TEU, რაც 2019 წლის ანალოგიურ პერიოდთან შედარებით 35.1%-ით მეტია (1734 TEU). მათ შორის 2020 წლის იანვარ-ოქტომბრის პერიოდში BTK-თი გადაიზიდა 1260 TEU, რაც 2019 წლის ანალოგიურ პერიოდთან შედარებით 371.9%-ით მეტია (267 TEU) საქართველოზე გამავალი დერეფანი გამოირჩევა არამხოლოდ გეოგრაფიული მდებარეობით გამოწვეული უპირატესობით, არამედ განვითარებული ინფრასტრუქტურითა და ინსტიტუციური სისტემით.
თურქეთიდან დაიძრა პირველი სატვირთო მატარებელი, რომელიც ბაქო-თბილისი-ყარსის რკინიგზით ჩინეთში ჩავა
თურქეთიდან დაიძრა პირველი სატვირთო მატარებელი, რომელიც ბაქო-თბილისი-ყარსის რკინიგზით ჩინეთში ჩავა. თურქული სააგენტო „ანადოლუ“ წერს, რომ მატარებელი, რომელიც მცირე ხნით შეჩერდა კოჯაელის პროვინციაში, თურქეთის ტერიტორიას 8 დეკემბერს დატოვებს, შემდეგ ახალქალაქში გაჩერდება და საქართველოდან აზერბაიჯანის და ყაზახეთის გავლით, ჩინეთში ჩავა. სააგენტოს ინფორმაციით, სატვირთო მატარებელმა 8693 კილომეტრი 12 დღეში უნდა გაიაროს. ბაქო-თბილისი-ყარსის რკინიგზა, რომლის მშენებლობა 2008 წელს დაიწყო, ოფიციალურად 2017 წლის ოქტომბერში გაიხსნა.
Hyundai-მ აშშ-დან 129 000 ავტომობილი უკან გაიწვია
Hyundai აშშ-დან 129,000 ავტომობილს უკან დაიბრუნებს. კომპანიის განცხადებით, რამდენიმე მოდელს ძრავის ხარვეზები აღმოაჩნდა, რაც მანქანაში ცეცხლის გაჩენის შანსს ზრდიდა. იუწყება Reuters-ი. ავტომწარმოებლის განცხადებით, ძრავის შიდა ნაწილის ხარვეზის გამო დეტალის ნაადრევად გაცვეთის საშიშროება იყო, რაც ძრავს დააზიანებდა. კომპანიამ რამდენიმე მოდელი გაიწვია-2015-2016 Veloster, 2012 Santa Fe, 2011-2013 Sonata Hybrid, და 2016 Sonata Hybrid-ი. გასულ კვირას, Hyundai- სა და Kia Motors-ის აშშ-ის ქვედანაყოფებმა რეკორდულ 210 მილიონი დოლარის სამოქალაქო ჯარიმაზე დათანხმდნენ. აშშ-ის უსაფრთხოების მარეგულირებლების თქმით, ეს ჯარიმა მათ დაეკისრათ, რადგან კომპანიებმა ვერ შეძლეს, ძრავის პრობლემის გამო, 1.6 მილიონი ავტომობილის დროულად უკან დაბრუნება. Hyundai-ს თქმით, ყველა დაბრუნებული მოდელი ძრავისთვის გაუმჯობესებულ პროგრამულ უზრუნველყოფას მიიღებს.
ბაქო-თბილისი-ყარსის სარკინიგზო მაგისტრალის გავლით, პირველი თურქული სატვირთო მატარებელი ჩინეთში ჩავა
პირველი მატარებელი, საექსპორტო საქონლით თუქეთიდან ჩინეთისკენ, პარასკევს ბაქო-თბილისი-ყარსის სარკინიგზო მაგისტრალის გავლით გაემგზავრება, აცხადებს თურქეთის საგარეო საქმეთა მინისტრი. თურქულ გაზეთ „ჰარიეთის“ ინფორმაციით, სტამბოლიდან მატარებლის 42-ვაგონიანი შემადგენლობა ცოტა ხნის წინ გამოვიდა. მან 7 ქვეყანა უნდა გაიაროს და 8 700 კილომეტრი დაფაროს, სარკინიგზო მონაკვეთი ტვირთის ტრანსპორტირებას, 18 დღის ნაცვლად, 12 დღეში უზრუნველყოფს. Anadolu Post-ის თანახმად, 10 ვაგონი წარმატებით ოპერირებდა ჩინეთი-თურქეთი-ევროპის მარშუტზე, ხოლო ნოემბერში მარშრუტს პრაღაც დაემატა. „თურქეთი აღმოსავლეთსა და დასავლეთს შორის კავშირის კიდევ უფრო გაღრმავების და რეგიონში ცენტრალური პოზიციის განმტკიცების მიზნით განაგრძობს აუცილებელი ნაბიჯების გადადგმას“, - ნათქვამია განცხადებაში.
ანტიპანდემიური ღონისძიებების საერთო ღირებულება, 1 400 000 000 ლარს აჭარბებს - თურნავა
ანტიპანდემიური ღონისძიებების საერთო ღირებულება, 1 400 000 000 ლარს აჭარბებს - ამის შესახებ ეკონომიკის მინისტრმა ნათია თურნავამ, მთავრობის სხდომის დასრულების შემდეგ, 2021 წლის ბიუჯეტის შეფასებისას განაცხადა. "მომავალი წელი იქნება ვაქცინაციის წელი საქართველოსა და მსოფლიოსთვის, მაგრამ პანდემიასთან ბრძოლის გეგმიდან გამომდინარე ჩვენ მოგვიწევს გარკვეული ვალდებულებების მომსახურება და პროგრამების დაფინანსება. ქვეყანა დიდი გამოწვევის წინაშე დგას. ბიუჯეტში ძალიან ბევრი პრიორიტეტი გადალაგდა და აქცენტი კეთდება მოსახლეობის სოციალურ დახმარებაზე, ჯანდაცვის სისტემის გაძლიერებასა და ბიზნესის დახმარებაზე. შევარბილოთ ის ნეგატიური ზეგავლენა, რაც პანდემიას ჩვენზე ჰქონდა და კიდევ ექნება. განსაზღვრულია, რომ ანტიპანდემიური ღონისძიებების საერთო ღირებულება, რაც 2020-2021-ში ჯამურად განხორციელდება, მილიარდ ოთხას მილიონ ლარს აჭარბებს. მნიშვნელოვანი პაკეტია მოსახლეობის მხარდაჭერის მიმართულებით 1200- ლარიანი დახმარებების გაგრძელება, ვინც დროებით შემოსავლის გარეშე რჩება, 300-ლარიანი დახმარება თვითდასაქმებულებისთვის. ეს არის კომუნიალური გადასახადების სუბსიდირება. მიუხედავად პანდემიისა, ჩვენ ჩვენი ყველა სოციალური ვალდებულება შევასრულეთ, ხელფასების გაზრდა ჯარისკაცებისთვის, მასწავლებლებისთვის თუ პენსიის გაზრდა. შემცირებულია ისეთი პროგრამები, რომელთა განხორციელება აღარაა აქტუალური. მათ შორის ტურიზმთან დაკავშირებული პროგრამები. თუმცა, ინფრასტრუქტურულ პროექტებში კაპიტალური ხარჯები რჩება", - განაცხადა ნათია თურნავამ.
რომელი პროდუქტი რამდენით გაძვირდა - საქსტატი
ერთი წლის განმავლობაში ზეთი 23%-ით, თევზეული 9%-ით, რძის ნაწარმი 8%-ით, ხოლო პურპროდუქტები 7%-ით გაძვირდა, - აღნიშნულ ინფორმაციას “საქსტატი” აქვეყნებს. როგორც საქართველოს სტატისტიკის ეროვნული სამსახურის მიერ გამოქვეყნებულ ინფლაციის მაჩვენებლებშია აღნიშნული, 2020 წლის ნოემბერში წინა თვესთან შედარებით ინფლაციის დონემ საქართველოში 0.9 პროცენტი, ხოლო წლიური ინფლაციის დონემ 3.8 პროცენტი შეადგინა. უფრო დეტალურად, წლიური ინფლაციის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე: სურსათის და უალკოჰოლო სასმელების ჯგუფში ფასები ერთი წლის განმავლობაში გაიზარდა 6 პროცენტით, რაც წლიურ ინფლაციაზე 1.92 პროცენტული პუნქტით აისახა. კერძოდ, ფასები მომატებულია შემდეგ ქვეჯგუფებზე: ზეთი და ცხიმი (23.2 პროცენტი), ყავა, ჩაი და კაკაო (12.2 პროცენტი), თევზეული (9.1 პროცენტი), რძე, ყველი და კვერცხი (8 პროცენტი), პური და პურპროდუქტები (7.1 პროცენტი), შაქარი, ჯემი და სხვა ტკბილეული (7.0 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (4.7 პროცენტი), ხორცი და ხორცის პროდუქტები (3.7 პროცენტი). ამასთან, ფასები შემცირებულია ხილსა და ყურძენზე (-5.3 პროცენტი). ჯანმრთელობის დაცვის ჯგუფში ფასები მომატებულია 8.8 პროცენტით, რაც 0.71 პროცენტული პუნქტით აისახა ინდექსის წლიურ ცვლილებაზე. ფასები გაიზარდა სამედიცინო პროდუქციის, აპარატურისა და მოწყობილობის (12.4 პროცენტი) და ამბულატორიული სამედიცინო მომსახურების (12.0 პროცენტი) ქვეჯგუფებზე. ჯგუფში - ავეჯი, საოჯახო ნივთები, სახლის მოვლა, დაფიქსირდა ფასების 10.2 პროცენტიანი მატება, რაც წლიური ინფლაციის მთლიან მაჩვენებელზე 0.6 პროცენტული პუნქტით აისახა. ფასები გაიზარდა ქვეჯგუფებზე: მინის ჭურჭელი, მაგიდის და საოჯახო ჭურჭელი (12.7 პროცენტი), ყოველდღიური საყოფაცხოვრებო საჭიროების საქონელი და მომსახურება (10.4 პროცენტი), გამათბობელი და საჭმლის მოსამზადებელი მოწყობილობა, მაცივრები, საყინულეები, სარეცხი მანქანები და სხვა საყოფაცხოვრებო საგნები, დაყენებისა და რემონტის ჩათვლით (10.1 პროცენტი), საოჯახო საფეიქრო ნაწარმი (7.4 პროცენტი), ავეჯი, საოჯახო ნივთები, ხალიჩები და სხვა იატაკის საფარი (6.2 პროცენტი). ტრანსპორტის ჯგუფში ფასები შემცირდა 5.2 პროცენტით. შესაბამისად, წლიურ ინდექსში ჯგუფის წვლილმა -0.64 პროცენტული პუნქტი შეადგინა. ფასების კლება დაფიქსირდა პირადი სატრანსპორტო საშუალებების ექსპლუატაციაზე (-6.7 პროცენტი).
იაპონიაში Family Mart-ის ერთ-ერთ უდიდეს ქსელში შქმერულის ლანჩ-ბოქსები გაიყიდება
დღეიდან იაპონიის ერთ-ერთი უდიდესი ქსელის, Family Mart-ის 16 ათასამდე მაღაზიაში ქართული კერძის - "შქმერულის" მზა ულუფები, ე.წ. ლანჩ-ბოქსები გაიყიდება, - ინფორმაციას ამის შესახებ იაპონიაში საქართველოს საელჩო ავრცელებს. "აღსანიშნავია, რომ შეფუთვაზე დატანილია ქართული დროშა და წარწერა, რომელიც მყიდველს ამცნობს ამ კერძის ქართული წარმოშობის შესახებ", - ნათქვამია გავრცელებულ ინფორმაციაში. შეგახსენებთ, რომ "შქმერულის" სწრაფი მომზადების პაკეტები იგივე მაღაზიათა ქსელში ოქტომბრიდან იყიდება.
2021 წელს საჯარო სექტორის ხელფასები 60 მლნ-ით 1.6 მილიარდამდე იზრდება
2021 წლის განმავლობაში საჯარო სექტორში დასაქმებული ადამიანები მთლიანი სახელფასო ანაზღაურების სახით 1.61 მილიარდ ლარს მიიღებენ, რაც 2020 წელთან შედარებით 60 მილიონი ლარით მეტია. შესაბამისად, ქვეყანაში შექმნილი ეკონომიკური კრიზისის მიუხედავად, ბიუჯეტი ხარჯების შეკვეცის პოლიტიკას არ ითვალისწინებს. მთლიანობაში 2021 წლის ბიუჯეტის პროექტით მთავრობის ასიგნებები 18.4 მილიარდი ლარით განისაზღვრება, რაც ბიუჯეტის რეკორდული მოცულობაა. მთავრობის ხარჯბი 2020 წელთან შედარბით ჯამში 2.46 მილიარი ლარით იზრდება. გაზრდილი ხარჯების დაფინანსების მთავარი წყარო მომდევნო წელსაც ახალი ვალის აღება იქნება, რაც 5.27 მილიარდი ლარით არის განსაზღვრული. ახალი ვალებიდან 1.45 მილიარდი ლარი საინვესტიციო ინფრასტრუქტურულ პროექტებზე მიიმართება, ბიუჯეტის მხარდამჭერი კრედიტები 2.17 მილიარდი ლარი იქნება, ხოლო 1.65 მილიარი ლარით მთავრობა $500-მილიონიანი ევრობონდების რეფინანსირებას გეგმავს. 2021 წლის ბიუჯეტი 4.3%-იან ეკონომიკურ ზრდაზე არის დაგეგმილი, ეს ეკონომიკური ზრდის პირველად პროგნოზთან შედარებით 0.7 პროცენტული პუნქტით ნაკლებია, შესაბამისად, ზრდის შემცირების გამო, საგადასახადო შემოსავლბის გეგმაც პირველად პროექტთან შედარებით შემცირებულია. საგადასახადო შემოსავლების პროგნოზი გადასახადების სახეების მიხედვით შემდეგია: • საშემოსავლო გადასახადის საპროგნოზო მაჩვენებელი განისაზღვრა 3.6 მილიარდი ლარით; • მოგების გადასახადის საპროგნოზო მაჩვენებელი განისაზღვრა 951.0 მლნ ლარით; • დღგ-ის საპროგნოზო მაჩვენებელი განისაზღვრა 5.4 მილიარდი ლარით, მათ შორის სახელმწიფო ბიუჯეტის წილი შეადგენს 4 347.3 მლნ ლარს, ხოლო მუნიციპალიტეტების წილი 1 მილიარდი; • აქციზის საპროგნოზო მაჩვენებელი განისაზღვრა 1.58 მილიარდი ლარის ოდენობით; • იმპორტის გადასახადის საპროგნოზო მაჩვენებელი განისაზღვრა 77.0 მლნ ლარით. მომდევნო წელს ყველაზე მეტი თანხით კვლავ ჯანდაცვის სამინისტრო დაფინანსება არის დაგეგმილი - უწყების ბიუჯეტი 48 მილიონი ლარით იზრდება და ის 5.56 მილიარდ ლარს შეადგენს. ბიუჯეტის ზრდას განაპირობებს როგორც პენსიის ინდექსაციის ახალი კანონი, რომლითაც პირველი იანვრიდან ასაკობრივი პენსია გაიზრდება, ასევე, ქვეყანაში დაწესებული "ლოქდაუნის" გამო, ბიუჯეტი სოციალურად დაუცველთათვის 6 თვით 100-ლარიან დახმარებებსაც დააფინანსებს.
ბიტკოინი ისტორიულ ნიშნულზეა
მსოფლიოს უდიდესმა ციფრულმა ვალუტამ ისტორიულ მაქსიმუმს მიაღწია. როგორც Bloomberg-ი წერს, ბიტკოინის ღირებულება 19,857 დოლარი გახდა. ორშაბათს ბიტკოინმა 8.7 %-თ მოიმატა, რის შედეგადაც, მსოფლიოს უდიდესი ციფრული აქტივის ღირებულებამ 19,857 დოლარი შეადგინა. კრიპტოსამყაროს ყველაზე ცნობილი ვალუტისთვის ამგვარი მატება ახალი არაა, მაგალითისთვის 2017 წელს მისი ღირებულება 19,511 დოლარი იყო, თუმცა ვალუტამ წლის ბოლოს ღირებულების 70% დაკარგა. ბიტკოინი, მატების მიუხედავად, ძალზე არამდგრადი რჩება. Bloomberg-ის მიერ შედგენილი მონაცემების თანახმად, ამ დროისთვის ციფრული ვალუტის საშუალო დღიური ფასი 2,7%-თ იცვლება.
საქართველოს მთავრობის ვალი 2020 წლის 31 ოქტომბრის მდგომარეობით, 27 704 100 000 ლარს შეადგენს
საქართველოს მთავრობის ვალი 2020 წლის 31 ოქტომბრის მდგომარეობით, 27 704 100 000 ლარს შეადგენს, - გარდა ეროვნული ბანკის მიერ აღებული ვალდებულებებისა - 27 688.3 მლნ ლარი და საბიუჯეტო ორგანიზაციების სესხის სახით არსებულ ნაშთს -15.8 მლნ ლარი. ამასთან, მთავრობის საგარეო ვალის ნაშთი, 21 781.1 მლნ ლარი, მთლიანი მთავრობის ვალის 79%-ია. 2021 წლის ბიუჯეტის პროექტის თანდართულ მასალებში ნათქვამია, რომ აღნიშნული საკრედიტო რესურსის დიდი ნაწილი მიღებულია მრავალმხრივი და ორმხრივი დონორებისგან, პარტნიორებისგან ქვეყნისათვის პრიორიტეტული ინფრასტრუქტურული პროექტების დასაფინანსებლად. მთავრობის ინფორმაციით, საგარეო ვალის პორტფელი შეღავათიანია და ძირითადად შედგება გრძელვადიანი სესხებისგან - პორტფელის საშუალო შეწონილი საკონტრაქტო ვადიანობა შეადგენს 21.0 წელს, საშუალო შეწონილი ვადიანობა დაფარვამდე შეადგენს დაახლოებით 8.7 წელს, ხოლო მთავრობის საგარეო ვალის საშუალო შეწონილი საპროცენტო განაკვეთი შეადგენს 1.42%-ს. 2021 წლის სახელმწიფო ბიუჯეტის პროექტი ითვალისწინებს საერთაშორისო საფინანსო ინსტიტუტებისა და უცხო ქვეყნების მთავრობების მიერ საქართველოსთვის გამოყოფილი გრძელვადიანი საინვესტიციო კრედიტების ათვისებას 1 450 915.0 ათასი ლარის ოდენობით. ასევე, ბიუჯეტის მხარდამჭერი რესურსის სახით 2 171 000.0 ათასი ლარის მობილიზებას: ა) საქართველოში ენერგეტიკის სექტორის რეფორმის პროგრამის (IV) ფარგლებში საფრანგეთის განვითარების სააგენტოდან (AFD) მისაღები სახსრები – 172 000.0 ათასი ლარის ოდენობით; ბ) საქართველოში ენერგეტიკის სექტორის რეფორმის პროგრამის (პოლიტიკაზე დაფუძნებული სესხი-PBL IV) ფარგლებში გერმანიის რეკონსტრუქციის საკრედიტო ბანკიდან (KfW) მისაღები სახსრები – 229 000.0 ათასი ლარის ოდენობით; გ) სექტორული განვითარების პროგრამა, თანამედროვე უნარები უკეთესი სამუშაო ადგილებისთვის ფარგლებში აზიის განვითარების ბანკიდან (ADB) მისაღები სახსრები - 162 000.0 ათასი ლარის ოდენობით; დ) წყალმომრაგებისა და წყალარინების სექტორის მდგრადი განვითარების პროგრამის ფარგლებში აზიის განვითარების ბანკიდან (ADB) მისაღები სახსრები - 271 000.00 ათასი ლარის ოდენობით; ე) მაკროფინანსური დახმარების (MFA) IV პროგრამის ფარგლებში ევროკავშირიდან (EU) მისაღები სახსრები – 286 000.0 ათასი ლარის ოდენობით; ვ) ფისკალური მდგრადობის და სოციალური დაცვის პროგრამის ფარგლებში აზიის განვითარების ბანკიდან (ADB) მისაღები სახსრები - 663 000.00 ათასი ლარის ოდენობით; ზ) COVID-19 პანდემიის კონტექსტში სოციალური უსაფრთხოების პროგრამის ფარგლებში გერმანიის რეკონსტრუქციის საკრედიტო ბანკიდან (KfW) მისაღები სახსრები – 57 000.0 ათასი ლარის ოდენობით; თ) სსე-ს კორპორატიზაციისა და ენერგობაზრის რეფორმების პროგრამის ფარგლებში აზიის განვითარების ბანკიდან (ADB) მისაღები სახსრები - 331 000.00 ათასი ლარის ოდენობით.
საქსტატი: მთლიანმა შიდა პროდუქტმა ოქტომბერში 3,9 პროცენტით იკლო
საქსტატის წინასწარი შეფასებით, 2020 წლის ოქტომბერში, წინა წლის შესაბამის პერიოდთან შედარებით, რეალური მთლიანი შიდა პროდუქტის (მშპ) კლებამ 3.9 პროცენტი შეადგინა. 2020 წლის ოქტომბერში, წინა წლის შესაბამის პერიოდთან შედარებით კლება დაფიქსირდა თითქმის ყველა სექტორში, საფინანსო და სადაზღვევო საქმიანობების გარდა. 2020 წლის პირველი ათი თვის განმავლობაში საქართველოში მშპ-ს 5.1% -ით შემცირდა, ხოლო შესაბამისი მაჩვენებელი იანვარ-სექტემბერში -5.0% -ს შეადგენდა, ხოლო იანვარ-აგვისტოში -5,6% იყო.
საიდან წარმოიშვა „შავი პარასკევის“ იდეა
„შავი პარასკევი 2020“ მალე დასრულდება, თუმცა ეს არ ნიშნავს რომ ყველა შეთავაზება ამოიწურა. ოფიციალურად, ყველა ღონისძიება მთავრდება ორშაბათს, 30 ნოემბერს, ბოლო დღეს კი კიბერორშაბათს უწოდებენ “, - წერს Independent-ი. ეს იქნება თქვენი უკანასკნელი შანსი, იპოვოთ და შეიძინოთ ათასობით ნივთი, 80 პროცენტიანი ფასდაკლებით. „შავი პარასკევი“ თავდაპირველად (1952 წლიდან) ერთდღიანი ღონისძიება იყო, რომელიც ამერიკაში, მადლიერების დღის აღნიშვნიდან მეორე დღეს იმართებოდა, მაგრამ სწრაფად გაფართოვდა და იქცა ერთკვირიანი ფასდაკლებების ღონისძიებად, რომელშიც უკვე ძვირადღირებული ბრენდებიც მონაწილეობენ. წლევანდელი ღონისძიება ყველაზე გრძელი იყო, რადგან Amazon-მა ის ოქტომბრის ბოლოდან დაიწყო. ამის შემდეგ მომხმარებლისადმი ყოველდღე ახალი შეთავაზება აქვს. „ჩვენ უკვე ვნახეთ შესანიშნავი შემოთავაზებები ისეთ პროდუქტებზე, როგორიცაა Apple-ის AirPod-ები, Samsung Galaxy-ს ტაბლეტები, Kitchenaid-ის კვების პროცესორები, Fenty Beauty-ს ნაკრები, Nespresso-ს ყავის აპარატები, Grenson- ის ჩექმები, LG-ის ტელევიზორები და Lego მოწყობილობები“, - წერს Independent-ი.
კორონავირუსის პანდემიამ გენდერულ თანასწორობას მნიშვნელობანი ზარალი მიაყენა - UN Women
გაეროს ქალთა ორგანიზაცია (UN Women) აცხადებს, რომ კორონავირუსის პანდემიამ გენდერულ თანასწორობას მნიშვნელობანი ზარალი მიაყენა და შესაძლოა, 25 წლის განმავლობაში მიღწეული პროგრესი უკან დააბრუნოს. გაეროს ქალთა ორგანიზაციის აღმასრულებელი დირექტორის მოადგილე ანიტა ბატია აცხადებს, რომ პანდემიამდე მსოფლიოში ქალების მიერ არაანაზღაურებადი სამუშაო 16 მილიარდ საათს შეადგენდა, რაც ვირუსის გავრელების შემდეგ მნიშვნელოვნად გაიზარდა. მისი თქმით, დღესდღეობით ქალების მიერ შესრულებული არაანაზღაურებადი სამუშაო მამაკაცებისას სულ მცირე 3-ჯერ აღემატება. გაეროს ქალთა ორგანიზაციის ინფორმაციით, მიმდინარე წელს მსოფლიოს მასშტაბით სამსახურის გარეშე გაცილებით უფრო მეტი ქალი დარჩა, ვიდრე მამაკაცი. კვლევაში ასევე აღნიშნულია, რომ ღარიბ ქვეყნებში 2020 წელს იმ გოგონათა რიცხვი, რომლებსაც განათლების მიღებაზე ხელი არ მიუწვდებათ, რამდენიმე მილიონით გაიზარდა, რაც ადრეულ ქორწინებათა რიცხვს მნიშვნელოვნად გაზრდის.
მუშავდება საკომპენსაციო პაკეტი, რომელიც მოქალაქეებსა და კონკრეტულ დარგებს შეეხება - თურნავა
ეკონომიკის მინისტრის, ნათია თურნავას ინფორმაციით, მუშავდება საკომპენსაციო პაკეტი, რომელიც როგორც მოქალაქეებს, ასევე იმ დარგებს შეეხება, რომელთა წერტილოვანი შეზღუდვაც შეიძლება საჭირო გახდეს. თურნავას თქმით, მთავრობის სურვილია, ეპიდემიოლოგოური ვითარების გართულებიდან გამომდინარე, წერტილოვანი შეზღუდვები დაბალანესებული იყოს. “ამავდროიულად გვინდა ერთობლივად გადავტეხოთ ის ნეგატიური ტენდენცია, რაც ინფიცირებულთა რაოდენობის ზრდის თვალსაზრისით გვაქვს. პარალელურად ვეძებთ გზებს, ბიზნესი ძალიან არ დავაზარალოთ და მათი გაჯანსაღების ტენდენცია შევინარჩუნოთ. პარალელურ რეჟიმში, ვმუშაობთ საკომპენსაციო პაკეტზე, რომელიც ერთი მხრივ, მოქალაქეებისკენ იქნება მიმართული და მეორეს მხრივ, იმ დარგებისკენ, რომელთა პრობლემებსაც ვხედავთ, ვხვდებით მათ ყოველდღიურად და წერტილოვანი შეზღუდვა მოგვიწევს“, - განაცხადა ნათია თურნავამ.
Bloomberg - რომელმა ქვეყნებმა შეძლეს ვირუსის ყველაზე უკეთ მართვა
მსოფლიოს რომელმა ქვეყანამ შეძლო COVID-19-ის მიერ გამოწვეული კრიზისის საუკეთესოდ მართვა? - ამ კითხვაზე პასუხის დასადგენად, Bloomberg-მა მოამზადა ინდექსი, რომელიც როგორც ეპიდემიური ვითარების მართვის, ასევე სოციალური და ეკონომიკური მიმართულებებით ქვეყნების შედეგებს აერთიანებს. ინდექსის მიხედვით, ყველა პარამეტრის გათვალისწინებით, 2020 წლის უმთავრეს გამოწვევას საუკეთესოდ ახალი ზელანდია გაუმკლავდა. საზღვრების ადრეული ჩაკეტვის, მკაცრი ლოქდაუნისა და კონტაქტების მოძიების სამუშაოების შედეგად, ახალ ზელანდიაში COVID-19-ის მხოლოდ 2,031 შემთხვევა გამოვლინდა. 0-დან 100-ბალიან სკალაზე ახალ ზელანდიას ამ პარამეტრების გათვალისწინებით, 85.4 ქულა აქვს მინიჭებული. სიაში მეორე ადგილზეა იაპონია, რომელმაც ახალ ზელანდიასთან შედარებით უფრო ნაკლები შეზღუდვებით შეძლო ვირუსის მართვა, რაც მოსახლეობის მხრიდან სოციალური დისტანცირების მკაცრი ნორმების დაცვასთან იყო დაკავშირებული. მესამე ადგილზე კი ტაივანია, რომელშიც ვირუსით ინფიცირების მხოლოდ 618 შემთხვევა არის გამოვლენილი. ინდექსის პირველ ათეულში ევროკავშირის ქვეყნებიდან ყველაზე წინ ფინეთია, რომელმაც მთელი EU-ს მასშტაბით ეპიდემიის გავრცელება ყველაზე უკეთ მართა. ფინეთში ინფიცირების მხოლოდ 22,289 შემთხვევა გამოვლინდა. თუმცა, ამ ქვეყანაშიც უკანასკნელი ორი კვირის განმავლობაში ვირუსის გავრცელების მზარდი ტრენდი ფიქსირდება. სხვა პარამეტრებთან ერთად, რეიტინგი სახელმწიფოების მხრიდან პანდემიის პერიოდში მოსახლეობის სოციალური დაცვისთვის გადადგმულ ნაბიჯებსაც აფასებს. თუმცა, მთავარ კრიტერიუმს სწორედ ვირუსის შეკავების პოლიტიკის წარმატებულობა წარმოადგენს. რეიტინგში საქართველო არ შედის, რადგან ის მხოლოდ იმ ქვეყნებს შეეხება, რომელთა ეკონომიკის ზომაც $200 მილიარდს აღემატება. ასეთი კი სულ 53 ქვეყანაა. Bloomberg-ის ინდექსი: 1 ახალი ზელანდია 85.4 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2 2 იაპონია - 85 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 29 3 ტაივანი - 82.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 4 სამხრეთ კორეა - 82.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 10 5 ფინეთი - 82 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 129 6 ნორვეგია - 81.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 281 7 ავსტრალია - 81.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1 8 ჩინეთი - 80.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 9 დანია - 77 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 550 10 ვიეტნამი - 74.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 11 სინგაპური - 74.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 4 12 ჰონგ კონგი - 73.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 5 13 კანადა - 73.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 316 14 გერმანია - 71.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 604 15 ტაილანდი - 70.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 16 შვედეთი - 68.7 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 967 17 არაბთა გაერთიანებული საამიროები - 67.5 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 371 18 შეერთებული შტატები - 66.5 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,129 19 ინდონეზია - 66.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 42 20 ირლანდია - 65.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 308 21 ისრაელი - 65 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 232 22 რუსეთი - 65 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 412 23 ნიდერლანდები - 64.4 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,247 24 ბანგლადეში - 64.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 31 25 ეგვიპტე - 63.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 7 26 შვეიცარია - 62.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2,160 27 პაკისტანი - 61.7 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 23 28 გაერთიანებული სამეფო - 61.5 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,004 29 მალაიზია - 61.4 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 93 30 თურქეთი - 60.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 106 31 საბერძნეთი - 59.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 600 32 საუდის არაბეთი - 59.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 32 33 პორტუგალია - 59.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,455 34 ინდოეთი - 58.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 93 35 სამხრეთ აფრიკა - 57.8 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 93 36 ავსტრია - 56.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,918 37 ბრაზილია - 56.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 338 38 ჩილე - 55.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 218 39 ერაყი - 54.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 222 40 იტალია - 54.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,528 41 ესპანეთი - 54.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,092 42 ნიგერია - 53.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2 43 რუმინეთი - 53.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,131 44 პოლონეთი - 52.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,673 45 საფრანგეთი - 51.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,695 46 ფილიპინები - 48.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 48 47 ირანი - 48.7 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 354 48 კოლუმბია - 48.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 490 49 ჩეხეთის რესპუბლიკა - 46.8 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2,371 50 ბელგია - 45.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2,339 51 პერუ - 41.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 207 52 არგენტინა - 41.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 666 53 მექსიკა - 37.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 113
2021 წელს სესხებზე საპროცენტო განაკვეთების შემცირების შანსი არსებობს - ძნელაძე
საქართველოს საბანკო ასოციაციის პრეზიდენტი ალექსანდრე ძნელაძე “საქმიან დილასთან” ინტერვიუში აცხადებს, რომ იპოთეკური სესხების სუბსიდირების პროექტი მიმდინარე წელს საკმაოდ წარმატებული იყო. მისივე განმარტებით, პროექტის გაგრძელებაზე მსჯელობა ამჟამად არ მიმდინარეობს. “5 700 სესხია სუბსიდირებული, რაც 550 მლნ ლარის თანხას შეადგენს. 5 700 სესხიდან 1 500 სესხამდე საკრედიტო საგარანტიო სქემაშია ჩართული, რაც, ჯამში, 150 მლნ ლარია. წლის ბოლომდე აღნიშნული პროექტი გრძელდება და არ არის მოლოდინები, რომ ეს პროექტი მომავალ წელსაც გაგრძელდება. აქ რისკიც არსებობს, პროექტიდან ერთბაშად გამოსვლა იქნება კარგი გამოსავალი, თუ ნელ-ნელა გამოსვლა. მუდმივად სუბსიდია ვერ იქნება, თუ აღნიშნულ პროექტზე საუბარი შედგება, მსჯელობა უფრო მეტად პროექტიდან გამოსვლის მექანიზმზე იქნება და არა - მის გაგრძელებაზე. სუბსიდირების პროექტმა სესხების გაცემის რაოდენობით მოლოდინებს მკვეთრად გადააჭარბა, აქტივობა ახლაც მაღალია და ამ კუთხით წლის ბოლომდე მნიშვნელოვან ზრდას ველოდებით. ასევე, პროექტმა ხელი ლარიზაციის პროექტსაც შეუწყო", - აღნიშნა საბანკო ასოციაციის პრეზიდენტმა. ალექსანდრე ძნელაძემ ბანკების ფინანსური შედეგების ანალიზიც გააკეთა და აღნიშნა, რომ სამომხმარებლო სესხების ნაწილში გადახდები აღდგა. “ბანკები უკვე მოგებაზე გავიდნენ, თუმცა ეს არ იქნება ის მოგება, რაც 2018-2019 წლებში იყო და მიმდინარე წელს 0-თან ახლოს დავასრულებთ. კონკრეტული პრობლემური სექტორების და მოწყვლადი ჯგუფების გარდა გადახდები აღდგენილია. რაც შეეხება საპროცენტო განაკვეთებს, მას მზარდი ხასიათი აქვს, მაგრამ ვხედავ, რომ არსებულმა მდგომარეობამ იმის შანსი მოგვცა, რომ მომავალ წელს საპროცენტო განაკვეთები კიდევ უფრო შემცირდეს", - აღნიშნა ძნელაძემ.
დგას კითხვა, ამ პირობებში, რამდენად სრულფასოვნად შეძლებენ ზამთრის კურორტები მუშაობას - თურნავა
"თუ რა დოზით შეეხება წერტილოვანი შეზღუდვები ზამთრის კურორტებს, ამაზე ვმსჯელობთ და თქვენთვისაც გახდება ცნობილი, - ამის შესახებ ეკონომიკისა და მდგრადი განვითარების მინისტრმა ნათია თურნავამ მთავრობის სხდომის დასრულების შემდეგ განაცხადა. როგორც თურნავამ განმარტა, არსებულ პირობებში რამდენადაა შესაძლებელი სრულფასოვნად იმუშაონ ზამთრის კურორტებმა, ეს კითხვა დგას. „ჩვენ ვმუშაობთ ამ საკითხზე. თქვენ იცით, რომ მასშტაბურ „ლოკდაუნს“ არ ვაპირებთ ქვეყანაში, ეს არის ჩვენი პოზიცია. უნდა მოვახერხოთ ადაპტაცია, ანუ ვმართოთ თუნდაც ეპიდემიის ასეთი გაზრდილი გამოვლინებები. ამავდროულად ნაკლებად დავაზარალოთ ეკონომიკა და ბიზნესი, პირიქით, შევინარჩუნოთ და მხარი დავუჭიროთ გაჯანსაღების ტენდენციას, მაგრამ წერტილოვანი შეზღუდვები იქნება. თუ რა დოზით შეეხება ეს ზამთრის კურორტებს, ამაზე ვმსჯელობთ და თქვენთვის ცნობილი გახდება. ყოველ შემთხვევაში, ჩვენთვის პრიორიტეტი არის, რა თქმა უნდა, ჯანმრთელობა და უსაფრთხოება. არ მინდა მოვლენებს გავუსწრო. რა თქმა უნდა, იმედი მაქვს, რომ ყველაფერი ნორმალურად იფუნქციონირებს, მაგრამ პირველ რიგში, უნდა გავაანალიზოთ ეპიდემიოლოგების რჩევები. თუ რა დოზით, რა დონით და რა გეოგრაფიით იქნება ეს წერტილოვანი შეზღუდვები აქედან გამომდინარე ვიმსჯელებთ ზამთრის კურორტებზე. ზამთრის კურორტი ისევე, როგორც საზაფხულო კურორტი, დიდი მობილობის გენერატორია და ამ თვალსაზრისით ეპიდემიოლოგიურად გარკვეული კითხვები არსებობს. ამ პირობებში, რამდენად შევძლებთ სრულფასოვნად ვამუშაოთ ზამთრის კურორტები, რა თქმა უნდა, ეს კითხვა დგას. ვმუშაობთ და გადაწყვეტილებას მოგახსენებთ“, - განაცხადა ნათია თურნავამ.
