ახალი ამბები
ბექა ფერაძე: სავაჭრო ცენტრების, მოლებისა და ბაზრობების გახსნა მხოლოდ იქ დასაქმებული ადამიანების ტესტირების შემთხვევაში იგეგმება
"საქართველოში სავაჭრო ცენტრების, მოლებისა და ბაზრობების გახსნა პირველი თებერვლიდან მხოლოდ იქ დასაქმებული ადამიანების ტესტირების შემთხვევაში იგეგმება", - ამის შესახებ შრომის ინსპექციის ხელმძღვანელმა, ბექა ფერაძემ საკოორდინაციო საბჭოს სხდომის დასრულების შემდეგ განაცხადა. ბექა ფერაძის განცხადებით, პირველ ეტაპზე ხარჯებს სრულად სახელმწიფო დააფინანსებს, შემდეგ ეტაპზე კი განიხილება ბიზნესის თანამონაწილეობის საკითხიც. "დასაქმებულების კონკრეტული პროცენტული წილი იქნება განსაზღვრული, რომელიც გაიტესტება 1 თებერვლამდე. თვითონ სავაჭრო დაწესებულების ადმინისტრაცია შეარჩევს რისკის შემცველ ჯგუფებს და ეტაპობრივად მოხდება ყველა დასაქმებულის მოცვა. ყველაზე მნიშვნელოვანია, რომ კონტროლის მექანიზმი ექნება შრომის ინსპექციას. ტესტირება ჩატარდება ყოველ 14 დღეში ერთხელ", - აღნიშნა ფერაძემ.
EMC და რელიგიური გაერთიანებები მთავრობას მოუწოდებენ გაუქმდეს რელიგიის სააგენტო
„ადამიანის უფლებების სწავლებისა და მონიტორინგის ცენტრი“ (EMC) რამდენიმე ხელმომწერ ორგანიზაციასთან ერთად სოფელ ბუკნარში მიმდინარე მოვლენებთან დაკავშირებით მთავარობას მიმართავს და მოუწოდებს, გააუქმოს რელიგიის საკითხთა სახელმწიფო სააგენტო. ამის შესახებ EMC-იმ პრესკონფერენცია გამართა. როგორც ცნობილია, მიმართვას ხელს აწერს: ევანგელურ - ბაბტისტური ეკლესია; ქართველ მუსლიმთა კავშირი; სრულიად საქართველოს მუსლიმთა უმაღლესი სასულიერო სამმართველო; ევანგელისტური ეკლესია; პლატფორმა სალამი; სოლიდარობის პლატფორმა. როგორც მიმართვაშია აღნიშნული, მნიშვნელოვანია, რომ ბუკნარში გამოვლენილი რელიგიური შევიწროების შემთხვევაზე სახელმწიფოს შედარებით აქტიური რეაგირება ჰქონდა. ამასთან, ხელმომწერი ორგანიზაციების განცხადებით, არსებითია, რომ სახელმწიფო უწყებებმა შეისწავლონ სოფელ ბუკნარში მომხდარი ფაქტის მსგავსი რელიგიური დევნის, შევიწროების, კონფლიქტებისა და გაუცხოების პრაქტიკის სისტემური მიზეზები და მას რეფორმებით უპასუხონ. „რელიგიის თავისუფლების და თანასწორობის სასარგებლო განცხადებები გაკეთდა მაღალი სახელმწიფო თანამდებობის პირების მხრიდან. ადგილზე მედიაციის პროცესი ხარვეზებით, თუმცა მაინც დროულად დაიწყო და გამოჩნდა პოლიციის სამართლებრივი რეაგირებაც. თუმცა, დომინანტური რელიგიური თემის შიგნით გამოვლენილი პრობლემური ხედვებისა და სენტიმენტების, ასევე ჩვენს გარემოში გაბატონებული ეთნო-რელიგიური ნაციონალიზმის იდეოლოგიის გათვალისწინებით, ფუნდამენტურად მნიშვნელოვანია სახელმწიფომ სოფელი ბუკნარის თემში და ასევე, რელიგიური/ეთნიკური კონფლიქტის გამოცდილების ან ამგვარი რისკის მქონე თემებში გრძელვადიანი ტრანსფორმაციული პოლიტიკა გაატაროს. არსებითია იმის აღნიშვნაც, რომ კიდევ ერთხელ გამოჩნდა სსიპ რელიგიის საკითხთა სახელმწიფო სააგენტოს მკვეთრად არაეფექტიანი როლი და წლების განმავლობაში მისივე ორგანიზებული პოლიტიკის მძიმე შედეგები. მიუხედავად იმისა, რომ ამ უწყების კომპეტენციაში რელიგიური დაპირისპირების გადაჭრის ხელშეწყობა შედის, სოფელ ბუკნარში გამოვლენილი კონფლიქტების გადაჭრაში უწყება აქტორი არ ყოფილა და მათი მონაწილეობა მედიაციის პროცესში ხილვადი არ იყო, რაც ამ უწყების მიმართ არსებული მკვეთრი კრიტიკითა და უნდობლობით უნდა აიხსნას. მეტიც, მედიაში უწყების ხელმძღვანელის მიერ გაკეთებული განცხადებები კიდევ ერთხელ აჩვენებს, რომ ის რეალურ გამოწვევებსა და რელიგიური თემების საჭიროებებს ღიად უგულებელყოფს. წლების განმავლობაში რელიგიური ორგანიზაციები, ადამიანის უფლებებზე მომუშავე აქტორები, მათ შორის, სახალხო დამცველი, ვუთითებთ რელიგიის თავისუფლების სფეროში დაგროვებული არაერთი სისტემური გამოწვევის შესახებ, რომელიც კანონმდებლობის, ადმინისტრაციული პოლიტიკისა და ინსტიტუციური მოწყობის დონეზე, ასევე მიკრო სოციალურ/სათემო დონეზე არსებობს. 2014 წელს რელიგიის საკითხთა სახელმწიფო სააგენტოს დაფუძნების შემდეგ არც ერთი ეს მნიშვნელოვანი საკითხი არ გადაჭრილა. / ამის საწინააღდეგოდ, ჩვენ მუდმივად ვხედავდით სააგენტოს მკვეთრად რეგრესულ და ადამიანის უფლებების საწინააღმდეგო ინიციატივებს. ჩვენი დაკვირვებით, ცვლილიებების პროცესს არსებითად აფერხებს მთავრობის მიერ რელიგიის თავისუფლების სფეროს დანახვის პრობლემური პერსპექტივა და მისი ინსტიტუციური მოწყობა, სადაც რელიგიის საკითხთა სახელმწიფო სააგენტო ამ სფეროში მთავრობის ექსკლუზიურ აქტორად განიხილება. ჩვენთვის წარმოუდგენელია ამ უწყებისა და მისი პოლიტიკის არსებობის პირობებში რელიგიის თავისუფლების სფეროში პოლიტიკის პოზიტიური ცვლილება და ამისთვის აუცილებელი დემოკრატიული კომუნიკაცია სახელმწიფო უწყებებთან. აღსანიშნავია, რომ ამ უწყების მიმართ მკვეთრი კრიტიკა აქვთ დაფიქსირებული საერთაშორისო ორგანიზაციებს (FCNM, ECRI) და ავტორიტეტულ ექსპერტულ წრეებს. ზემოაღნიშნულის გათვალისწინებით, ხელმომწერი ორგანიზაციები მოვუწოდებთ საქართველოს მთავრობასა და პარლამენტს, სოფელ ბუკნარში გამოვლენილი კიდევ ერთი კრიზისის ფონზე მაინც, გამოხატონ მაღალი ინტერესი რელიგიის თავისუფლების მიმართულებით სახელმწიფო პოლიტიკისა და მისი მძიმე უფლებრივი და სოციალური შედეგების მიმართ და 1. შეცვალოს რელიგიურ ორგანიზაციებთან და თემებთან მუშაობის არსებული პერსპექტივა და ის თანასწორობის, რელიგიური ნეიტრალიტეტისა და რელიგიის თავისუფლების სტანდარტების განუხრელ დაცვას დააფუძნოს. ამ კუთხით არსებითია შეწყდეს ცალკეული რელიგიური ორგანიზაციების კონტროლისა და მათ ავტონომიაში ჩარევის პრაქტიკა, რომელსაც უნდობლობისა და არაფორმალური ორგანიზების ნეგატიური პრაქტიკები მოჰყვება; 2. შეიმუშავოს რელიგიის თავისუფლებასთან დაკავშირებული პოლიტიკის რეფორმის თანმიმდევრული გეგმა, რომელიც ადგილობრივი და საერთაშორისო აქტორების რეკომენდაციებს, ასევე სახალხო დამცველთან არსებულ რელიგიათა საბჭოსთან და ადამიანის უფლებათა აქტორებთან ორგანიზებულ დემოკრატიულ კონსულტაციებს დაეფუძნება; 3. გააუქმოს რელიგიის საკითხთა სახელმწიფო და რელიგიურ და საზოგადოებრივ ორგანიზაციებს შორის კომუნიკაციისა და პოლიტიკის კოორდინაციის ახალ მოდელებზე იმუშავოს, რომელიც შექმნილი ნეგატიური გამოცდილებების კრიტიკულ ანალიზსა და შესაბამის აქტორებთან დემოკრატიულ კონსულტაციებს დაეფუძნება“,- აღნიშნულია მიმართვაში.
FBI იძიებს, მოიპარეს თუ არა ლეპტოპი ნენსი პელოსის კაბინეტიდან რუსეთში გაყიდვის მიზნით
აშშ-ის ფედერალური საგამოძიებო ბიურო კაპიტოლიუმიდან მოპარული ნენსი პელოსის ლეპტოპის საქმეს იძიებს. ინფორმაციას Politico ავრცელებს. კაპიტოლიუმის შტურმის დროს დაიკარგა წარმომადგენელთა პალატის სპიკერის, ნენსი პელოსის პერსონალური ლეპტოპი, რომლის მოპარვასაც რაილი ჯუნს ედავებიან. გავრცელებული ინფორმაციით, ლეპტოპის მიყიდვას ეჭვმიტანილი რუსეთისთვის აპირებს. ექვს იანვარს გავრცელებულ კადრებში ჩანს რაილი ჯუნი, რომელიც სპიკერის კაბინეტთან იმყოფებოდა. სამართალდამცველების მიერ გაკეთებულ განცხადებაში, ნათქვამია, რომ ბრალდებული მიმალვაშია. რაილი ჯუნის დედის თქმით, მან ბარგი ჩაალაგა და ოჯახი გააფრთხილა, რომ ის რამდენიმე კვირით წავიდოდა. ჯერჯერობით უცნობია, შეძლო თუ არა საგამოძიებო ბიურომ ეჭვმიტანილის მოძებნა. რაილი ჯუნს უკანონო შეღწევა შენობაში და ხულიგნობა ედება ბრალად. აშშ-ის კაპიტოლიუმზე შტურმი ექვს იანვარს მოხდა, რამდენიმე ადამიანი, მათ შორის კი ერთი პოლიციელი დაიღუპა, მომიტინგეებთან შეტაკებისას.
კასპში, ორი ადამიანის მძევლად აყვანის ფაქტზე დაკავებულ გიორგი მენაბდიშვილს პროკურატურამ ბრალდება წარუდგინა
პროკურატურამ კასპში მომხდარი ორი პირის მძევლად ხელში ჩაგდების ფაქტზე გ.მ.-ს ბრალდება წარუდგინა და მისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს მიმართა. ინფორმაციას საქართველოს პროკურატურა ავრცელებს. "საქართველოს პროკურატურამ, სიცოცხლისა და ჯანმრთელობისთვის საშიში ძალადობის გამოყენების მუქარით ორი პირის მძევლად ხელში ჩაგდების ფაქტზე, გ.მ-ს ბრალდება წარუდგინა და გორის რაიონულ სასამართლოს ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით მიმართა. შინაგან საქმეთა სამინისტროს მიერ ჩატარებული გამოძიებით დადგინდა, რომ 2021 წლის 16 იანვარს, ცეცხლსასროლი იარაღით შეიარაღებულმა გ.მ.-მ სიცოცხლის მოსპობის მუქარით, ხელისუფლების ორგანოებისგან სხვადასხვა მოთხოვნების შესრულების უზრუნველსაყოფად, კასპის მუნიციპალიტეტში მძევლად ხელში ჩაიგდო თ.ლ. და ს.ფ., უკანონოდ აღუკვეთა თავისუფლება და მძევლების სიცოცხლის მოსპობის მუქარით მოითხოვდა კონკრეტული ქმედებების შესრულებას.სამართალდამცველებმა გ.მ. 16 იანვარს დააკავეს. მას ბრალდება საქართველოს სისხლის სამართლის კოდექსის 144-ე მუხლის მე-2 ნაწილის ,,გ’’ და ,,ი’’ ქვეპუნქტებით (მძევლად ხელში ჩაგდება, ჩადენილი ორი პირის მიმართ, სიცოცხლისათვის და ჯანმრთელობისათვის საშიში ძალადობის გამოყენების მუქარით) წარედგინა, რაც სასჯელის სახედ და ზომად 9-დან 14-წლამდე თავისუფლების აღკვეთას ითვალისწინებს.საქმეზე ჩატარდა არაერთი საგამოძიებო და საპროცესო მოქმედება. ასევე, ბრალდებულის ქცევიდან გამომდინარე, კერძოდ, იმის დასადგენად, შეეძლო თუ არა გ.მ.-ს დანაშაულის ჩადენის მომენტში სრულად გაეცნობიერებინა თავისი ქმედებები, დაინიშნა ფსიქიატრიული ექსპერტიზა, რომელიც დანაშაულის ჩადენის დროს მის ფსიქიკურ მდგომარეობას შეისწავლის.სისხლის სამართლის საქმეზე გამოძიება გრძელდება." - ნათქვამია განცხადებაში.
საკოორდინაციო საბჭო: ვირუსით ინფიცირების შემთხვევების სტაბილიზაცია შეინიშნება, 8,3 %-ია
პანდემიის მიზეზით მოქმედი შეზღუდვების შედეგად, ვირუსით ინფიცირების შემთხვევების სტაბილიზაცია შეინიშნება და დადებითობის მაჩვენებელი ბოლო ერთ კვირაში 8,3%-ია. ამის შესახებ ინფორმაციას უწყებათაშორისი საკოორდინაციო საბჭო ავრცელებს. როგორც საკორდინაციო საბჭოს სხდომაზე დაავადებათა კონტროლის ეროვნული ცენტრის ხელმძღვანელმა ამირან გამყრელიძემ აღნიშნა, აღნიშნული მაჩვენებელი მოდუნების საფუძველი არ უნდა გახდეს და კვლავაც უმნიშვნელოვანეს პრევენციულ ღონისძიებებად რჩება სოციალური დისტანციის დაცვა და პირბადეების ტარება. როგორც სხდომაზე ამირან გამყრელიძემ აღნიშნა, დღეს საქართველოში პირბადის ტარების მაჩვენებელი 75%-ია და ჯანმრთელობის გაზომვათა ინსტიტუტის პროგნოზით, თუ ის 95%-ს მიაღწევს, მაისში ინფიცირების ყოველდღიური შემთხვევები 10-77-ის ფარგლებში იქნება. საბჭომ ასევე იმსჯელა გლობალურად ინფექციის გავრცელების კუთხით არსებულ ვითარებაზე. აღინიშნა, რომ მსოფლიოში, მათ შორის ევროპაში სიტუაცია კვლავ მძიმე რჩება და არაერთმა ქვეყანამ შეზღუდვების გახანგრძლივების თუ გამკაცრების გადაწყვეტილება მიიღო.
საქართველოს ათ ქალაქში და აჭარის რეგიონში სასწავლო პროცესი დღეიდან ისევ დისტანციურ რეჟიმში განახლდა
2020-21 სასწავლო წლის მეორე სემესტრი დღეს განახლდა. სწავლა დისტანციურ რეჟიმში განახლდა დიდ ქალაქებში: თბილისში, ქუთაისში, რუსთავში, თელავში, ზუგდიდში, ზესტაფონში, გორში, ფოთში, მარნეულსა და გარდაბანში, ასევე აჭარის რეგიონში. დანარჩენ სკოლებში სწავლის პროცესი საკლასო ოთახებში წარიმართება. სკოლები, სადაც მეორე სემესტრი საკლასო ოთახებში განახლდება, სამინისტრომ, კორონავირუსის პრევენციის მიზნით, სრულად უზრუნველყო პირბადეებით, დისტანციური, უკონტაქტო თერმომეტრებით, დეზობარიერითა და ზედაპირების სადეზინფექციო სითხეებით. როგორც ცნობილია, დისტანციური სწავლების ხელშეწყობის მიზნით, საჯარო და კერძო სკოლების მოსწავლეები და მასწავლებლები მობილური ინტერნეტის შეღავათიანი ტარიფით ისარგებლებენ. ინტერნეტპროვაიდერები მათ 20 GB მობილურ ინტერნეტპაკეტს 10 ლარად შესთავაზებენ, რაც სტანდარტულ ღირებულებასთან შედარებით 2,5-ჯერ ნაკლებია. პროგრამით სარგებლობისთვის რეგისტრაცია მიმდინარეობს პლატფორმაზე http://mobile.emis.ge
ამირან გამყრელიძე: თუ პირბადის ტარების მაჩვენებელი 95%-ს მიაღწევს, მაისში ინფიცირების ყოველდღიური შემთხვევები 10-77-ის ფარგლებში შემცირდება
„პირბადის ტარების მაჩვენებელი 75%-ზეა ასული და თუ 95%-ზე ავალთ, მაისისთვის სიკვდილიანობის მაჩვენებელი ერთეული შემთხვევა იქნება და ინფიცირების მაჩვენებელი 10-77-ის ფარგლებში შემცირდება", - ამის შესახებ დაავადებათა კონტროლის ცენტრის ხელმძღვანელმა, ამირან გამყრელიძემ საკოორდინაციო საბჭოს სხდომის შემდეგ გამართულ ბრიფინგზე განაცხადა. „ბოლო დღეების განმავლობაში, კორონავირუსით გარდაცვალების მაჩვენებელი 29-ს ჩამოსცდა. ეს პოზიტიური ტენდენციის ერთ-ერთი ინდიკატორია. ჯანმრთელობის გაზომვათა ინსტიტუტი რუგულარულად ახლებს ქვეყნების მონაცემებს. ბოლო განახლება 15 იანვარს იყო, სადაც მათ აღნიშნეს ჩვენი დადებითი ტენდენცია. სასიამოვნოა, რომ ჩვენთან, პირბადის ტარების მაჩვენებელი 75%-ზეა ასული და თუ 95%-ზე ავალთ, გვეუბნებიან, რომ მაისისთვის სიკვდილიანობის მაჩვენებელი ერთეული შემთხვევა იქნება და ინფიცირების მაჩვენებელი 10-77-ის ფარგლებში შემცირდება. ძალიან დიდი მნიშვნელობა აქვს რეგულაციების დაცვას, განსაკუთრებით - პირბადის ტარების მაჩვენებელს. თუ ნოემბერ-დეკემბერში ერთ ინფიცირებულს ვავლენდით და 2-3-ს ვერა, ახლა, ყოველ ერთ გამოვლენილზე დაახლოებით, 1-1,5 არ ვლინდება“, - განაცხადა ამირან გამყრელიძემ.
მაიკ პენსი: ჩვენი ადმინისტრაცია პირველია, რომლის დროსაც ამერიკა ახალ ომში არ ჩართულა
აშშ-ის მოქმედი ვიცე-პრეზიდენტი, მაიკ პენსი Twitter-ზე გამოქვეყნებულ პუბლიკაციაში წერს, დონალდ ტრამპის ადმინისტრაციის დროს მიღწეულ მნიშვნელოვან შედეგზე. ვიცე-პრეზიდენტის თქმით, აშშ-იმ მშვიდობას საკუთარი სიძლიერით მიაღწია. "პირველად აშშ-ის ისტორიაში, ახალი ადმინსტრაციის მეთაურობით, ამერიკა ახალ ომში არ ჩართულა. ჩვენ მშვიდობას მივაღწიეთ, ქვეყნის სიძლიერის წყალობით",- მაიკ პენსი, მნიშვნელოვანი მიღწევის შესახებ Twitter-ზე გამოქვეყნებულ პუბლიკაციაში წერს. აშშ-ის ახალი პრეზიდენტის ინაუგურაციამდე რამდენიმე დღეა დარჩენილი, მოქმედი ვიცე-პრეზიდენტის თქმით ის ჯო ბაიდენის ინაუგურაციას დაესწრება.
მედია: ტრამპი უფლებამოსილების ამოწურვამდე ერთი დღით ადრე 100-მდე ადამიანის შეწყალებას აპირებს
აშშ-ის მოქმედი პრეზიდენტი დონალდ ტრამპი უფლებამოსილების ამოწურვამდე ერთი დღით ადრე 100-მდე ადამიანის შეწყალებას აპირებს. აღნიშნულ ინფრომაციას CNN-ი ავრცელებს. როგორც ჟურნალისტები იუწყებიან, აშშ-ის პრეზიდენტის გადაწყვეტილების შესახებ მათ სამმა ანონიმურმა წყარომ აცნობათ. გავრცელებული ინფორმაციით, შეწყალებულთა შორის შესაძლოა იყვნენ ეკონომიკურ დანაშაულებებში ბრადლებულები, რეპერები და სხვები. ცნობისთვის, იანვრის დასაწყისში „ნიუ იორკ თაიმსი“ იუწყებოდა, რომ ტრამპი საკუთარი თავის შეწყალებასაც განიხილავდა, მაგრამ CNN-ის ცნობით, ეს საკითხი დღის წესრიგში აღარ დგას.
თამარ გაბუნია: ჩვენ COVAX პლატფორმაში ვაქცინა შეკვეთილი გაქვს მოსახლეობის 20%-სთვის. ეს არის მილიონ ნახევარი დოზა
"ჩვენ COVAX პლატფორმაში ვაქცინა შეკვეთილი გაქვს მოსახლეობის 20%-სთვის. ეს არის მილიონ ნახევარი დოზა" - განაცხადა ჯანდაცვის მინისტრის მოადგილემ, თამარ გაბუნიამ საკოორდინაციო საბჭოს დასრულების შემდეგ გამართულ ბრიფინგზე. როგორც გაბუნიამ აღნიშნა, ვაქცინის მოწოდება ეტაპობრივად მოხდება. "ჩვენ COVAX პლატფორმაში ვაქცინა შეკვეთილი გაქვს მოსახლეობის 20%-სთვის. ეს არის მილიონ ნახევარი დოზა. თუმცა მილიონ ნახევარი დოზის ერთბაშად მოწოდება არ მოხდება. მოხდება ეტაპობრივად და ქვეყანა რომ აითვისებს პირველ ნაწილს, მაგალითად 50 000 დოზას, შემდეგ მოვა დანარჩენი დოზები. წყვეტა იმაში, რომ ჩვენ მოთხოვნა გვაქვს და ვაქცინა - არ არის, არ იქნება. რაც შეეხება პირველ საწყის შემოტანას, "ფაიზერის" ვაქცინასთან მიმართებაში, აქ არის უფრო შეზღუდულ ჯგუფზე საუბარი. ვარაუდობთ 20 000 დოზას. ეს განკუტხვნილია10 000 სამიზნე ჯგუფისთვის, რომლებსაც ჯანდაცვის წარმომადგენლები შეადგენენ. ესეც არის ერთ-ერთი მოთხოვნა, რომელსაც ადგენს COVAX-ი, თუ ვინ უნდა მიიღოს პირველი ვაქცინა." - განაცხადა გაბუნიამ.
ნინო გაჩეჩილაძე: თუ დარჩენილი ცხოვრების პირბადით გატარება არ გვინდა, აუცილებლად უნდა გავიკეთოთ ვაქცინა
„თუ არ გვინდა, პირბადით გავატაროთ დარჩენილი ცხოვრება, აუცილებლად მოგვიწევს არჩევანის გაკეთება და ეს აუცილებლად უნდა იყოს ვაქცინა", - ამის შესახებ იმუნოლოგმა და მიკრობიოლოგმა, ნინო გაჩეჩილაძემ „ევრონიუს საქართველოს“ ეთერში განაცხადა. „ვაქცინის გამოცდისთვის, მცირე დრო იყო, მაგრამ ეს პანდემიაც ძალიან მოულოდნელად დაგვეცა თავს. თუ არ გვინდა, პირბადით გავატაროთ დარჩენილი ცხოვრება, აუცილებლად მოგვიწევს არჩევანის გაკეთება და ეს აუცილებლად უნდა იყოს ვაქცინა. სხვა არჩევანი, სხვა ინსტრუმენტი არ არის. კოლოსალური მასშტაბის კვლევები გამოიწვია ამ პანდემიამ - იყო სამეცნიერო გაჯიბრებაც, სამეცნიერო შპიონაჟიც, მუდმივად ქვეყნდებოდა სხვადასხვა სტატია. ამ შეჯიბრში, საბოლოო ჯამში, გაიმარჯვა ვაქცინამ. წამლამდე, ჩვენ გვაქვს ვაქცინა. ესაა საშუალება, რომლითაც პანდემიის შეჩერება შეგვიძლია. წარმოუდგენელია იმაზე საუბარი, რომ კორონავირუსის ვაქცინას ადამიანის გენეტიკური კოდის შეცვლა შეუძლია. ეს იგივეა, რომ ადამიანს სადმე ცხრათავიანი დევის შეხვედრის ეშინოდეს. ბიოლოგია მუშაობს პრინციპით დნმ - რნმ - ცილა. პირიქით ეს ვერ იმუშავებს. გენეტიკური კოდის ცვლილებაზე, ჩიპირებაზე ლაპარაკი წარმოუდგენელია. ნუკლეინის მჟავების ბაზაზე, ათწლეულების განმავლობაში მზადდებოდა ვაქცინების შექმნის ტექნოლოგია“, - განაცხადა ნინო გაჩეჩილაძემ.
თამარ გაბუნია: საქართველოს შეუძლია მიიღოს ნებისმიერი ტემპერატურული მოთხოვნის ვაქცინა
"საქართველოს შეუძლია მიიღოს ნებისმიერი ტემპერატურული მოთხოვნის ვაქცინა" - განაცხადა ჯანდაცვის მინისტრის მოადგილემ თამარ გაბუნიამ საკოორდინაციო საბჭოს დასრულების შემდეგ გამართულ ბრიფინგზე. "დღეისთვის ბაზარზე აღიარებული სტატუსით, ამ შემთვევაში ჩვენთვის მნიშვნელოვანია მსოფლიო ჯანდაცვის ორგანიზაციის აღიარება, ასევე მკაცრი მარეგულირებელი ორგანოების აღიარება, რამდენიმე აღიარებული ვაქცინაა, ესენია "ფაიზერის", "ასტრაზენეკას" და "მოდერნას" ვაქცინა. ვაქცინაციის გეგმაში ამაზე ვსაუბრობთ, მაგრამ როგორც კი ახალი ვაქცინა გამოჩნდება ბაზარზე, მსგავსი აღიარებით, რა თქმა უნდა, გეგმა იმასაც გაითვალისწინებს. გეგმაში მკაფიოდ არის დაკონკრეტებული, რომ სამივე ტემპერატურული რეჟიმისთვის ქვეყანა არის მზად. ეს არის -80 გრადუსიანი, -20 გრადუსიანი მოდერნასთვის და 2 და 8 გრადუსი, ეს არის რუტინული იმუნიზაციის ჯაჭვი, რაც ჩვენ მოგვცემს საშუალებას, ყველგან გავაკეთოთ ამ ტიპის ვაქცინაცია. ამ მხრივ მზაობა არის ძალიან მაღალი, არც სჭირდება დამატებითი ინვესტიცია" - განაცხადა თამარ გაბუნიამ. ჯანდაცვის მინისტრის თქმით, ამ მზაობის დამადასტურებელი წერილ Pfizer-ის პრეპარატთან დაკავშირებით COVAX-პლატფორმაში უკვე გაიგზავნა. „ეს კონკრეტული წერილი COVAX-ის პლატფორმაში შეეხება Pfizer-ის ვაქცინით იმუნიზაციის დაწყებას პირველ კვარტალში. თუმცა ასევე არ გამოვრიცხავთ იმას, რომ შესაძლოა მსგავსი შემოთავაზება COVAX-ის პლატფორმიდან პირველ კვარტალშივე AstraZeneca-თი ვაქცინაციის დაწყებასთან მიმართებაში მივიღოთ. მთავარია ის, რომ ქვეყანას აქვს როგორც მარეგულირებელი, ასევე ტექნიკური მზაობა ვაქცინაციის დასაწყებად უკვე მომდევნო 2 თვის განმავლობაში, რაც იქნება პირველი კვარტლის პერიოდში“, - განაცხადა მინისტრის მოადგილემ.
დიდი ბრიტანეთი, მინიმუმ 15 თებერვლამდე, ყველა სამგზავრო დერეფანს კეტავს
დიდი ბრიტანეთი, მინიმუმ 15 თებერვლამდე, ყველა სამგზავრო დერეფანს კეტავს. ამის შესახებ ინფორმაციას BBC ავრცელებს. მოგზაურებს, რომლებიც ჩავლენ დიდ ბრიტანეთში, გემით, მატარებლით თუ თვითმფრინავით, ასევე უნდა აჩვენონ Covid-19 უარყოფითი ტესტის მტკიცებულება, რომ ქვეყანაში შესვლის უფლება მიიღონ. როგორც ცნობილია, კორონავირუსზე ტესტი უნდა გაკეთდეს მოგზაურობამდე 72 საათით ადრე და ყველას, ვინც მის გარეშე ჩავა ბრიტანეთში, მას 500 ფუნტ სტერლინგით დააჯარიმებენ. ამავდროულად, ყველა მგზავრს 10 დღიანი კარანტინის გავლა მოუწევს. როგორც მთავრობამ განაცხადა, სამგზავრო დერეფნის დახურვა ძალაშია მინიმუმ 15 თებერვლამდე.
ეკატერინე ტიკარაძე: საქართველოს ნამდვილად არ სჭირდება ამდენი კლინიკა
„საქართველოს ნამდვილად არ სჭირდება ამდენი კლინიკა", - ამის შესახებ ჯანდაცვის მინისტრმა, ეკატერინე ტიკარაძემ ტელეკომპანია "იმედის" ეთერში განაცხადა. ტიკარაძეს თქმით, მის უწყებაში ამ მხრივ სტრატეგიის შემუშავებაზე მუშაობენ. მისი თქმით, მსოფლიოში მიღებულია, რომ საწოლფონდის საჭიროება გაიზომოს იმის მიხედვით, რამდენი საწოლი მოდის 100 ათას მოსახლეზე, საქართველოში კი იმდენი კლინიკაა, შესაძლოა გავზომოთ რამდენი კლინიკა მოდის 100 ათას მოქალაქეზე. მინისტრის განცხადებით, საქართველოში უფრო ჭარბია საწოლფონდი, ვიდრე ბრიტანეთსა თუ გერმანიაში „როდესაც მსოფლიოში ყველგან მიღებული არის, რომ საწოლფონდის ერთეულებით დაითვალოს საჭიროება 100 000 მოსახლეზე, ჩვენ ამ კლინიკების რაოდენობით შეგვიძლია უკვე კლინიკები დავთვალოთ 100 000 მოსახლეზე. აქედან გამომდინარე, ამ კლინიკებში შეუძლებელია მიღწეული იყოს პაციენტის მომსახურების ჯაჭვი, როდესაც პაციენტი მიღების მომენტიდან გაწერის მომენტამდე მიიღებს უსაფრთხო სერვისს. სწორედ აქედან გამომდინარე ახლა ჯანდაცვის სამინისტროში მიმდინარეობს სტრატეგიის შემუშავება, სადაც პირველი მახასიათებელი არის პაციენტისთვის უსაფრთხო და ხარისხიანი სერვისის მიწოდება და ასევე გეოგრაფიული ხელმისაწვდომობა“, - განაცხადა ტიკარაძემ. მინისტრი ჭარბი რაოდენობის კლინიკების გახსნას ბიზნეს ინტერესებით ხსნის და აღნიშნავს, რომ საქართველოში კლინიკის გახსნა კარგ ბიზნესად ითვლება, რადგან ის სახელმწიფო ბიუჯეტიდან ფინანსდება.
შვეიცარიაში კორონავირუსის ახალი შტამი გამოვლინდა
შვეიცარიაში კორონავირუსის ახალი შტამი გამოვლინდა. აღნიშნულ ინფორმაციას Reuters-ი ავრცელებს. ახალი შტამის გამოვლენის გამო, სათხულამურო კურორტ სან-მორიცის ორ სასტუმროში კარანტინი გამოცხადდა და სათხილამურო სკოლები დაიხურა. „ორ სასტუმროში ვირუსის ახალი შტამის ათამდე შემთხვევა გამოვლინდა. მოსახლეობისა და სტუმრების ჯანმრთელობის დასაცავად, ჯანდაცვის დეპარტამენტის გადაწყვეტილებით, ორ სასტუმროში კარანტინი გამოცხადდა“ - აღნიშნულია გავრცელებულ განცხადებაში. ჯერჯერობით, უცნობია, ვირუსის რომელი ახალი სახეობა გამოვლინდა სასტუმროებში.
მაიკ პომპეო: შეერთებული შტატები მკაცრად გმობს რუსეთის გადაწყვეტილებას ალექსეი ნავალნის დაკავებასთან დაკავშირებით
შეერთებული შტატები მკაცრად გმობს რუსეთის გადაწყვეტილებას ალექსეი ნავალნის დაკავებასთან დაკავშირებით, - ამის შესახებ აშშ-ის სახელმწიფო მდივნის მაიკ პომპეოს განცხადებაშია აღნიშნული. ინფორმაციას Ndtv-ი ავრცელებს. პომპეოს თქმით, ალექსეი ნავალნის დაკავება რუსეთის ხელისუფლების მიმართ კრიტიკულად განწყობილი ოპოზიციური ფიგურების გაჩუმების მცდელობას წარმოადგენს. “თავდაჯერებულ პოლიტიკურ ლიდერებს არ ეშინიათ კონკურენტული ხმის, არ ახორციელებენ ძალადობას და არც უსამართლოდ აკავებენ პოლიტიკურ ოპონენტებს. რუსი ხალხი, ისევე როგორც ყველა, იმსახურებს მთავრობას, რომელიც მხარს უჭერს იდეების ასპარეზს, გამჭვირვალე და ანგარიშვალდებულ მმართველობას, დამოუკიდებელ სასამართლო სისტემას და სიტყვისა და შეკრების ადამიანის ძირითადი უფლებების გამოყენებას სამაგიეროს მიზღვევას შიშის გარეშე,“- აცხადებს აშშ-ის სახელმწიფო მდივანი. მაიკ პომპეოს განცხადებით, შეერთებული შტატები კრემლის კრიტიკოსის დაუყოვნებლივ და უპირობო გათავისუფლებას მოითხოვს. „ჩვენ მოვუწოდებთ რუსეთის მთავრობას, უზრუნველყოს თანაბარი პირობები ყველა პოლიტიკური პარტიისა და კანდიდატისთვის, რომელიც ცდილობს კონკურენციის გაწევას საარჩევნო პროცესში. ალექსეი ნავალნი პრობლემა არ არის. ჩვენ ვითხოვთ მის დაუყოვნებლივ და უპირობოდ გათავისუფლებას“, – ნათქვამია მაიკ პომპეოს განცხადებაში. შეგახსენებთ, რომ გუშინ, ბერლინიდან მოსკოვში ჩასვლის შემდეგ, ალექსეი ნავალნი აეროპორტში დააკავეს.
ბოლო 24 საათში, პოლიციამ დაწესებული შეზღუდვების ფარგლებში მოქმედი რეგულაციების დარღვევის 1107 ფაქტი გამოავლინა
ბოლო 24 საათში, პოლიციამ დაწესებული შეზღუდვების ფარგლებში მოქმედი რეგულაციების დარღვევის 1107 ფაქტი გამოავლინა. ამის შესახებ ინფორმაციას შინაგან საქმეთა სამინისტრო ავრცელებს. სამართალდამცველების მიერ განხორციელებული მონიტორინგის შედეგად ბოლო 24 საათის განმავლობაში მთელი ქვეყნის მასშტაბით, დაწესებული შეზღუდვების ფარგლებში მოქმედი რეგულაციების დარღვევის 1107 ფაქტი გამოვლინდა. პოლიციამ ადმინისტრაციულ სამართალდარღვევათა კოდექსის 42(10)-ე მუხლის შესაბამისად 121 ფიზიკური პირი დააჯარიმა. დაჯარიმებულთა შორის არიან მოქალაქეები, რომლებმაც 21 საათიდან დილის 5 საათამდე დაწესებული გადაადგილების შეზღუდვის წესი დაარღვიეს. გარდა ამისა, 24 საათის განმავლობაში პირბადის ტარების წესის დარღვევის ფაქტზე, ადმინისტრაციულ სამართალდარღვევათა კოდექსის 42(11)-ე მუხლის შესაბამისად 986 ფიზიკური პირი დაჯარიმდა. ცნობისთვის, პირბადის ტარების წესის დარღვევა იწვევს ადმინისტრაციულ პასუხისმგებლობას და ასკ-ის 42(11) -ე მუხლის შესაბამისად ჯარიმას 20 ლარის ოდენობით. იზოლაციისა და კარანტინის წესის დარღვევა იწვევს ადმინისტრაციულ პასუხისმგებლობას და ასკ–ის 42(10)-ე მუხლის შესაბამისად ფიზიკური პირის დაჯარიმებას 2 000 ლარით, ხოლო იურიდიული პირის – 10 000 ლარის ოდენობით. განმეორებითი ჯარიმა კი სისხლისსამართლებრივ პასუხისმგებლობას ითვალისწინებს.
კორონავირუსის 110 ახალი შემთხვევიდან თბილისში გამოვლინდა 72 შემთხვევა
დღეს ქვეყანაში გამოვლენილი ინფიცირების 110 ახალი შემთხვევიდან: თბილისში გამოვლენილია 72 შემთხვევა, აჭარა - 13, იმერეთი - 5, ქვემო ქართლი - 4, შიდა ქართლი - 0, გურია - 5, სამეგრელო და ზემო სვანეთი - 4, კახეთი - 5, მცხეთა-მთიანეთი - 0, სამცხე-ჯავახეთი - 2, რაჭა-ლეჩხუმი და ქვემო სვანეთი - 0. შეგახსენებთ, რომ ბოლო 24 საათში, საქართველოში კორონავირუსი კიდევ 110 ადამიანს დაუდასტურდა, 1 643 გამოჯანმრთელდა.
234 კოვიდინფიცირებული ხელოვნური სუნთქვის აპარატზეა
ამ ეტაპზე ინფიცირების მიმდინარე აქტიური შემთხვევა არის 10 295, საიდანაც: 3 670 ადამიანი მკურნალობს საავადმყოფოში, მათ შორის, თბილისის საავადმყოფოებში - 1 784, აჭარაში - 281, იმერეთში - 704. ამ ეტაპზე მძიმე პაციენტია 795 პირი, მათ შორის, თბილისში - 379, აჭარაში - 61, იმერეთში - 192. ხელოვნური სუნთქვის აპარატზე იმყოფება 234 პირი, მათგან თბილისში - 158, აჭარაში - 5, იმერეთში - 29. 634 ადამიანი მოთავსებულია კლინიკურ-სასტუმროებში, მათ შორის 258 - თბილისში, 296 - აჭარაში, 37 - იმერეთში. 5 991 პირი ვირუსის მკურნალობის კურსს გადის საცხოვრებელ ბინაზე. საკარანტინე სივრცეებში მოთავსებულია 460 ადამიანი, მათ შორის, თბილისში - 235, აჭარაში - 76, ხოლო იმერეთში - 9. სულ 6 ოქტომბრიდან - 17 იანვრის პერიოდში, სახელმწიფო საზღვრიდან საკარანტინე სივრცეებში გადაყვანილია - 21 360 პირი. ამ ეტაპისთვის თვითიზოლაციაში იმყოფება 22 714 ადამიანი, მათ შორის თბილისში - 12 842 პირი, აჭარაში - 1 871, იმერეთში - 2 488. შეგახსენებთ, რომ ბოლო 24 საათში, საქართველოში კორონავირუსი კიდევ 110 ადამიანს დაუდასტურდა, 1 643 გამოჯანმრთელდა.
საქართველოში კორონავირუსი კიდევ 110 ადამიანს დაუდასტურდა, 1 643 გამოჯანმრთელდა
ბოლო 24 საათში ქვეყნის მასშტაბით ჩატარდა 4 964 კვლევა ტესტით, მათ შორის 2 930 კვლევა ანტიგენის ტესტით და 2 034 PCR ტესტით. ჩატარებული ტესტირების შედეგად, ბოლო 24 საათში გამოვლინდა ვირუსით ინფიცირების 110 ახალი დადასტურებული შემთხვევა, ხოლო ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 247 915-ს. ბოლო 24 საათში ვირუსისგან გამოჯანმრთელდა 1 643 პირი, ხოლო ჯამში გამოჯანმრთელებულთა რაოდენობა გაიზარდა 234 636-მდე.
