ახალი ამბები
პოლონეთის პრეზიდენტი კორონავირუსით დაინფიცირდა
პოლონეთის პრეზიდენტ ანჟეი დუდას კორონავირუსი დაუდასტურდა. ინფორმაცია სოციალურ ქსელ „ტვიტერში“ პრეზიდენტისპრესმდივანმა ბლაჟეი სპიხალსკიმ გაავრცელა. მისი თქმით, პრეზიდენტი თავს კარგად გრძნობს. „გუშინ პრეზიდენტს კორონავირუსზე ტესტი ჩაუტარდა და შედეგი დადებითი აღმოჩნდა. პრეზიდენტი თავს კარგად გრძნობს. ჩვენ მუდმივ კონტაქტზე ვართ შესაბამის სამედიცინო სამსახურებთან“, - აცხადებს სპიხალსკი. მან ასევე განმარტა, რომ თავადაც აპირებს კარანტინში გადასვლას.
"ვიმედოვნებ, ვიხილავ დროს, როცა სამხრეთ კავკასიის სამი ქვეყანა ითანამშრომლებს"
აზერბაიჯანის პრეზიდენტმა, ილჰამ ალიევმა საქართველოსა და აზერბაიჯანის ურთიერთობები სამხრეთ კავკასიის რეგიონში თანამშრომლობის წარმატებულ მაგალითად დაასახელა. ამის შესახებ ალიევმა განაცხადა იაპონურ გამოცემა Nikkei-სთან ინტერვიუში, რომელიც აზერბაიჯანის პრეზიდენტის ოფიციალურ ვებგვერდზეც გამოქვეყნდა. „რა თქმა უნდა, მშვიდობა რეგიონში ვითარებას სრულად შეცვლის; ვიმედოვნებ, რომ ვიხილავ დროს, როდესაც სამხრეთ კავკასიის სამი ქვეყანა ითანამშრომლებს. მაგალითად, ახლა აზერბაიჯანსა და საქართველოს შორის თანამშრომლობის დონე ძალიან მაღალია. ჩვენ სტრატეგიული პარტნიორები ვართ და საქართველოს ამჟამინდელ მთავრობასთან ჩვენ შესანიშნავი ურთიერთობები გვაქვს. ჩვენ მხარს ვუჭერთ ერთმანეთს, ვართ კარგი მეგობრები და კარგი მეზობლები. შეხედეთ, რამდენ პროექტს ვახორციელებთ ერთად. ნავთობის, გაზის, ენერგორესურსების ტრანსპორტირება, რკინიგზის კავშირი, ბაქო-თბილისი-ყარსი, ბაქო-თბილისი-ჯეიჰანი, ბაქო-თბილისი-ერზრუმი, „ტანაპი“ და უამრავი სხვა. ვფიქრობ, აზერბაიჯანი პირველი ან მეორე უმსხვილესი ინვესტორია საქართველოში, თურქეთთან ერთად; პირველი ან მეორე გადასახადების უმსხვილესი გადამხდელი“, – განაცხადა აზერბაიჯანის პრეზიდენტმა. ილჰამ ალიევის თქმით, 90-იანი წლების შუაში დასავლეთისგან იყო შეთავაზებები, რომ გაზსადენი სომხეთის გავლით აშენებულიყო, რადგან ეს უმოკლესი მარშრუტი იქნებოდა. „სხვათა შორის, 90-იანი წლების შუაში, როდესაც განიხილებოდა მილსადენის მშენებლობის საკითხი, დასავლეთისგან იყო გარკვეული შემოთავაზებები, რომ ეს მილსადენები სომხეთის გავლით გასულიყო. თუმცა ამისთვის სომხეთს უნდა გაეთავისუფლებინა ეს ტერიტორიები და მაშინ გაზსადენები შესაძლოა, გასულიყო აზერბაიჯანიდან სომხეთში, შემდეგ ნახიჩევანში და თურქეთში. ეს იყო უმოკლესი მარშრუტი. თუ შეხედავთ რუკას, ნახავთ, როგორ გადის გაზსადენი, რათა სომხეთს გვერდი აუაროს. თუმცა სომხებს ეგონათ, რომ ჩვენ ვერ შევძლებდით მილსადენის მშენებლობის პროექტის განხორციელებას. ამიტომ მათ უარი თქვეს და ვფიქრობ, ახლა ისინი სერიოზულად ნანობენ. ისინი ოკუპაციის გამო ჩიხში აღმოჩნდნენ“, – განაცხადა ალიევმა.
აშშ-ში კორონავირუსის 84 218 - ქვეყნისთვის ყველაზე მაღალი დღიური მაჩვენებელი დადასტურდა
აშშ-ში, ბოლო 24 საათში, კორონავირუსის 84 218 ახალი შემთხვევა დადასტურდა, რაც ყველაზე მაღალი დღიური მაჩვენებელია ქვეყნისთვის პანდემიის დაწყების დროიდან, - ამის შესახებ ინფორმაციას Reuters-ი ავრცელებს. სააგენტოს ცნობით, ქვეყანაში დღემდე ყველაზე მაღალი მაჩვენებელი 16 ივლისს იყო დაფიქსირებული, როდესაც ინფიცირების 77 299 ახალი შემთხვევა გამოვლინდა. აშშ-ში პანდემიის დაწყების დროიდან კორონავირუსით, საერთო ჯამში, 8.5 მილიონზე მეტი ადამიანი დაინფიცირდა, აქედან 224 000-მდე შემთხვევა ფატალურად დასრულდა.
ჯანმო კორონავირუსთან დაკავშირებით, მდგომარეობის გართულებას აანონსებს
უახლოეს თვეებში კორონავირუსის გავრცელებასთან დაკავშირებით ვითარება ძალიან რთული იქნება, - ამის შესახებ ჯანმრთელობის მსოფლიო ორგანიზაციის ხელმძღვანელმა თედროს ადჰანომ გებრეიესუსმა დღევანდელ ბრიფინგზე განაცხადა. „ჩვენ ვდგავართ კოვიდ-19-ის პანდემიის კრიტიკულად მნიშვნელოვან გზაჯვარედინზე, განსაკუთრებით ჩრდილოეთ ნახევარსფეროში. შემდეგი რამდენიმე თვე ძალიან რთული იქნება. ზოგიერთი ქვეყანა ძალიან სახიფათო ტრაექტორიაზეა“, - განაცხადა ჯანმო-ს ხელმძღვანელმა. მისი თქმით, ბევრი სახელმწიფო შეეჯახა დაავადების მკვეთრ ზრდას, რაც უახლოეს მომავალში ჯანდაცვის სისტემის რესურსების მალე ამოწურვას გამოიწვევს. ის მოუწოდებს მსოფლიო ლიდერებს, მიიღონ სასწრაფო ზომები და აღკვეთონ სიკვდილიანობის ზრდა და სკოლების დაკეტვა.
ისრაელი და სუდანი ურთიერთობის ნორმალიზებაზე შეთანხმდნენ
23 ოქტომბერს ისრაელი და სუდანი აშშ-ს დახმარებით შეთანხმდნენ ურთიერთობების ნორმალიზებისთვის ნაბიჯების გადადგმაზე. ამ კვირაში ტრამპის მიერ მიღებულმა გადაწყვეტილებამ, სუდანი ტერორიზმის სახელმწიფო სპონსორის სიიდან ამოეღო, შეთანხმებისთვის ნიადაგი შეამზადა. შეთანხმების განცხადებაში ნათქვამია, რომ ისრაელი და სუდანი გეგმავენ ეკონომიკური და სავაჭრო ურთიერთობების დამყარებას, თავდაპირველად სოფლის მეურნეობაზე ფოკუსირებით. აშშ-ს პრეზიდენტმა, დონალდ ტრამპმა, განაცხადა, რომ კიდევ, სულ მცირე, ხუთ სხვა ქვეყანას უნდა ისრაელთან ურთიერთობების ნორმალიზება. "გგონია, მძინარე ჯო ამ შეთანხმებას მიაღწევდა?" - ჰკითხა ტრამპმა ისრაელის პრემიერმინისტრ ნეთანიაჰუს. ნეთანიაჰუმ მიუგო, რომ მშვიდობის მიღწევისთვის დახმარებას აშშ-ში ყველასგან აფასებს. 19 ოქტომბერს ისრაელმა და ბაჰრეინმა დიპლომატიური კავშირები ფორმალურად დაამყარეს. ბაჰრეინი არაბთა გაერთიანებული საამიროების, ეგვიპტისა და იორდანიის შემდეგ მეოთხე არაბული ქვეყანა გახდა, რომელმაც ისრაელის სახელმწიფო ცნო.
31 ოქტომბრის არჩევნებისთვის საარჩევნო ბიულეტენების ბეჭდვის პროცესი დაიწყო
31 ოქტომბრის არჩევნებისთვის საარჩევნო ბიულეტენების ბეჭდვის პროცესი დაიწყო. როგორც ცესკო-ში გამართულ ბრიფინგზე განაცხადეს, ბიულეტენების ბეჭდვის პროცესი რამდენიმე დღე გაგრძელდება და მას ცესკო-ს წევრებთან ერთად, 15 ადგილობრივი სადამკვირვებლო ორგანიზაციის 16 დამკვირვებელი დააკვირდება. „დღეს საარჩევნო ბიულეტენების ბეჭდვის პროცესი დაიწყო. ბიულეტენები იბეჭდება 31 ოქტომბრის საქართველოს პარლამენტის, საკრებულოების შუალედური, მერების, რიგგარეშე და აჭარის უმაღლესი საბჭოს არჩევნებისთვის. ბიულეტენების ბეჭდვის პროცესი რამდენიმე დღე გაგრძელდება და მას ცესკო-ს წევრებთან ერთად, 15 ადგილობრივი სადამკვირვებლო ორგანიზაციის 16 დამკვირვებელი დააკვირდება“,-განაცხადეს ცესკო-ში. მათი ინფორმაციით, ამომრჩევლებს კენჭისყრის დღეს საქართველოს პარლამენტის არჩევნებში მონაწილეობისთვის გადაეცემათ ორი ბიულეტენი, როგორც მაჟორიტარული, ისე პროპორციული საარჩევნო სისტემით. „ონის მუნიციპალიტეტის მხოლოდ ერთ საარჩევნო უბანზე, ვინაიდან, საქართველოს პარლამენტის არჩევნებთან ერთად, ასევე ტარდება საკრებულოს შუალედური და მერის რიგგარეშე არჩევნები, ამომრჩევლები მიიღებენ 4 ბიულეტენს. რაც შეეხება აჭარას, იქიდან გამომდინარე, რომ 31 ოქტომბერს იმართება აჭარის უმაღლესი საბჭოს არჩევნებიც, ამომრჩევლები იქ მიიღებენ 4 ბიულეტენს, 2-ს საქართველოს პარლამენტის არჩევნებისთვის, 2-ს აჭარის უმაღლესი საბჭოს არჩევნებისთვის“,-განმარტავენ ცესკოში. მათივე ინფორმაციით, ბიულეტენები დაიბეჭდება ეთნიკური უმცირესობების ენებზეც. „ქართულ-აზერბაიჯანულ ენებზე ბიულეტენები მიეწოდება 213 საარჩევნო უბანს, ხოლო ქართულ-სომხურ ენაზე 135 საარჩევნო უბანს“,-განაცხადეს ცესკო-ში.
“საქართველო ნატო-ს წევრი ეხლავე უნდა გახდეს” - ბენ ჰოჯესი
საქართველო უკვე მზადაა ჩრდილოატლანტიკური ალიანსის წევრობისთვის და ნატო-ს წევრი ახლავე უნდა გახდეს, - განაცხადა დღეს ევროპაში აშშ-ის სახმელეთო ჯარების ყოფილმა სარდალმა, გენერალ-ლეიტენანტმა ბენ ჰოჯესმა კიევის ფორუმზე “უსაფრთხოება 2020” სიტყვით გამოსვლისას. "მჯერა, რომ საქართველო ახლავე უნდა გახდეს ნატო-ს წევრი. უკრაინას ამისთვის ცოტა მეტი დრო დასჭირდება: მან გზა უნდა განაგრძოს და გააძლიეროს თავისი ინტეგრაცია ალიანსში”, – განაცხადა ჰოჯესმა.
პოლონეთში აბორტთან დაკავშირებული კანონმდებლობის ცვლილებების გამო აქციები გაიმართა
პოლონეთში კორონავირუსთან დაკავშირებული შეზღუდვების მიუხედავად ასობით ადამიანი კონსტიტუციაში აბორტთან დაკავშირებულ კანონში ცვლილებების გამო საპროტესტო აქციებზე გამოვიდა. პოლონეთის სასამართლომ ფიზიკური ნაკლის მქონე ნაყოფის აბორტი არაკონსტიტუციურად ცნო. მასობრივი აქცია გაიმართა ვარშავაში. აქციაში მონაწილეობა დაახლოებით 500-მა ადამიანმა მიიღო. დემონსტრანტები საკონსტიტუციო სასამართლოს შენობასთან შეიკრიბნენ და იაროსლავ კაჩინსკის სახლისკენ დაიძრნენ. იაროსლავ კაჩინსკი ლიდერია პოლონეთის მმართველი პარტიის კანონი და სამართლიანობა. კაჩინსკის სახლთან დაიწყო დაპირისპირება პროტესტის მონაწილეებსა და პოლიციიის კორდონს შორის. პოლიციის ინფორმაციით დემონსტრანტებმა პოლიციას ქვები დაუშინეს, საპასუხოდ პოლიციამ ცრემლსადენი გაზი გამოიყენა. დაპატიმრებულია 15 ადამიანი. დემონსტრანტების და პოლიციის დაპირისპირება კაჩინსკის სახლთან: უფრო პატარა აქციები გაიმართა კრაკოვში, ლოდზეში და ცეშინში. 23 სექტემბრის საღამოსთვის დაგეგმილია აქციების ახალი ტალღა. პროტესტის ორგანიზატორები დემონსტრანტებს მოუწოდებენ გაიკეთოთ ნიღბები და შეგროვდნენ 10-კაციან ჯგუფებად, რათა არ დაარღვიონ კორონავირუსთან დაკავშირებით გაცემული შეზღუდვები. 22 სექტემბერს პოლონეთის საკონსტიტუციო სასამართლომ დაადგინა, რომ ფიზიკური ნაკლის ან ჯანმრთელობის სხვა პრობლემის მქონე ნაყოფის შემთხვევაში აბორტი არაკონსტიტუციურია. ამ გადაწყვეტილებით, მსგავსი მიზეზით აბორტი აიკრძალება და ლეგალური იქნება მხოლოდ გაუპატიურების, ინცესტის ან დედის სიცოცხლისათვის საფრთხის არსებობის შემთხვევაში. BBC News აღნიშნავს, რომ საკანონმდებლო ცვლილებებით პოლონეთში ფაქტობრივად შეუძლებელი ხდება აბორტის ლეგალურად გაკეთება. სტატისტიკურად ქვეყანაში ჩატარებული აბორტების 98% ნაყოფის ჯანმრთელობის მდგომარეობასთან იყო დაკავშირებული. ბოლო წლებში პოლონეთში სულ ათასამდე აბორტი გაკეთდა, თუმცა უფლებადამცველების ინფორმაციით ყოველწლიურად დაახლობით 80-120 ათასი ქალი აბორტის გასაკეთებლად საზღვარგარეთ მიდის. ასეთივე კანონპროექტი საკანონმდებლო ორგანოში რამდენიმე წლის წინაც დარეგისტრირდა, რასაც მასობრივი პროტესტი მოჰყვა. პროტესტის შემდეგ ავტორებმა კანონპროექტი გაიწვიეს. პოლონეთში ექიმების დიდ ნაწილს ხელი მოწერილი აქვს ე.წ სინდისის კლაუზულაზე, რის გამოც, აბორტის გაკეთება კანონით დაშვებულ შემთხვევებშიც კი, თითქმის შეუძლებელია.
უკრაინამ საქართველო „წითელი“ ზონის ქვეყნების სიაში შეიყვანა
უკრაინამ საქართველო „წითელი“ ზონის ქვეყნების სიაში შეიყვანა. ეპიდვითარეის გათვალისწინებით „წითელი ზონის“ ქვეყნებს შორის საქართველოსთან ერთად, პოლონეთი და ხორვატიაც მოხვდნენ. უკრაინის მოქალაქე, რომელიც „წითელი ზონის“ ქვეყნიდან სამშობლოში დაბრუნდება, ვალდებულია, თვითიზოლაცია გაიაროს. უკრაინის ტურიზმის განვითარების სახელმწიფო სააგენტოს ცნობით, უკრაინაში შესვლისას ყველა უცხოელს უნდა ჰქონდეს დაზღვევის პოლისი, რომელიც კოორნავირუსის მკურნალობას ფარავს. კარანტინს არ ექვემდებარებიან „წითელი ზონის“ ქვეყნებიდან ჩასული პირები იმ შემთხვევაში, თუ მათ აქვთ საზღვრის კვეთამდე ბოლო 48 საათის განმავლობაში ჩატარებული კორონავირუსის ტესტის უარყოფითი პასუხი. გასული დღე–ღამის განმავლობაში იკრაინასა და საქართველოში, კორონავირუსით ინფიცირების რეკორდული დღიური მაჩვენებელი დაფიქსირდა. ბოლო 24 საათში უკრაინაში დაავადების 7 517 ახალი შემთხვევა გამოვლინდა, საქართველოში – 1 759. უკანასკნელი ოფიციალური მონაცემებით, საერთო ჯამში, საქართველოში ახალი კორონავირუსის 24 562 შემთხვევაა გამოვლენილი, მათ შორის 9 751 პაციენტი გამოჯანმრთელდა, 183 გარდაიცვალა. ცნობისთვის: მსოფლიოში ახალი კორონავირუსით დაღუპულთა რაოდენობამ 1 143 000-ს გადააჭარბა. ინფიცირებულთა რაოდენობამ 42 068 000–ზე მეტი ადამიანი, 31 217 000–მდე დაავადებული კი გამოჯანმრთელდა. ამ დროისთვის COVID-19–ის საწინააღმდეგო არც ვაქცინა და არც კონკრეტული პრეპარატი არ არსებობს, თუმცა ვირუსისგან განკურნება სიმპტომური მკურნალობით არის შესაძლებელი. სპეციალისტები მოქალაქეებს სამი ძირითადი წესის დაცვისკენ მოუწოდებენ. ესენია: პირბადის ტარება; სოციალური დისტანციის დაცვა და ხელების ხშირი დაბანა.
თურქეთი რუსეთისგან ნაყიდ S-400 ტიპის ანტისარაკეტო სისტემებს ცდის
თურქეთის პრეზიდენტმა, რეჯეფ თაიფ ერდოღანმა, დაადასტურა, რომ თურქეთი რუსეთისგან ნაყიდ S-400 ტიპის ანტისარაკეტო სისტემებს უკვე ცდის და აშშ-ს პოზიცია არ აინტერესებს. "[გამოცდებს] ჩავატარეთ და ვატარებთ. აშშ-ს პოზიცია აბსოლუტურად არ გვაშფოთებს. თუ ჩვენ არ გამოვცდით ამ შესაძლებლობებს, რაც ჩვენს ხელთაა, მაშინ რა უნდა ვქნათ..? როგორც ჩანს [აშშ-ში] ბატონები განსაკუთრებით შეწუხებულნი არიან იმით, რომ ეს იარაღი რუსეთიდანაა. ჩვენ უდრეკები ვართ, ჩვენ გზას ვაგრძელებთ, როგორც ყოველთვის". - თქვა ერდოღანმა. აშშ-ში რესპუბლიკელი და დემოკრატი სენატორები ტრამპის ადმინისტრაციას მოუწოდებენ, რომ თურქეთს სანქციები დაუწესოს რუსული S-400 ტიპის სარაკეტო სისტემების შესყიდვის გამო. მათ მოწოდებას წინ უძღოდა ოქტომბრის დასაწყისში გავრცელებული ინფორმაცია, რომ თურქეთი, შესაძლოა, S-400-ების გამოცდას გეგმავს. რესპუბლიკელმა სენატორმა, ჯეიმს ლენდფორკმა და დემოკრატმა, კრის ვან ჰოლენმა აშშ-ს სახელმწიფო მდივანს, მაიკ პომპეოს მისწერეს და ჰკითხეს გავრცელებული ინფორმაციის შესახებ. მათი მოსაზრებით, S-400-ების შესყიდვის გამო, ვაშინგტონის მიერ აშკარა ქმედებების ნაკლებობამ თურქეთის მთავრობას მეტი გამბედაობა მისცა. 2019 წელს რუსული S-400 ტიპის ანტისარაკეტო სისტემის განთავსების გამო აშშ-მ თურქეთი ამერიკული F-35 ტიპის საბრძოლო თვითმფრინავების პროგრამიდან მოხსნა. ვაშინგტონში მიაჩნიათ, რომ S-400 სისტემისა და F-35 თვითმფრინავების ერთად განლაგება რუსეთს საშუალებას მისცემს, ინფორმაცია მოიპოვოს თვითმფრინავების სისტემაზე და საფრთხეს შეუქმნის მას. დეკემბერში აშშ-ს სენატის საგარეო ურთიერთობის კომიტეტმა 18 ხმით 4-ის წინააღმდეგ მხარი დაუჭირა თურქეთისათვის სირიაში სამხედრო ოპერაციის დახმარების და რუსული S-400 ტიპის სარაკეტო სისტემების შეძენის გამო სანქციების დაწესების კანონპროექტს. რუსეთისა და თურქეთის შეთანხმება არღვევს აშშ-ს 2017 წელს მიღებულ სანქციების კანონს (CAATSA/პასუხი ამერიკის მოწინააღმდეგეებს სანქციების აქტის მეშვეობით), რომლითაც ქვეყნებს, რომლებიც რუსეთთან სამხედრო სფეროში ბიზნესს აწარმოებენ, სანქციები ეკისრებათ. სირიაში აშშ-ს სპეციალურმა წარმომადგენელმა ჯეიმს ჯეფრიმ 5 მარტს სტამბოლში ვიზიტისას განაცხადა, რომ თურქეთის მიერ რუსული S-400 თავდაცვითი სისტემების შეძენა სერიოზულ შეშფოთებას იწვევს. 30 ივლისს ამერიკის შეერთებული შტატების სახელმწიფო მდივანმა, მაიკ პომპეომ განაცხადა, რომ აშშ აგრძელებს იმის შეფასებას, თუ როგორ უპასუხებს თურქეთის მიერ რუსული S-400 ტიპის ანტისარაკეტო სისტემის შესყიდვას. აგვისტოში რუსეთის სახელმწიფო კონგლომერატის, როსტეკის უფროსმა, სერგეი ჩემეზოვმა, განაცხადა, რომ რუსეთი თურქეთში S-400 ტიპის ანტისარაკეტო სისტემის დამატებითი პარტიის გაგზავნის კონტრაქტს, სავარაუდოდ, 2021 წელს ხელს მოაწერს.
ლუკაშენკომ კარტოფილის მოსავალი სპეცრაზმს გადასცა
ალექსანდრ ლუკაშენკომ კარტოფილის მოსავალი აიღო და ნახევარი ბელარუსის პოლიციის სპეციალური დანიშნულების რაზმს გადასცა. ინფორმაცია ამის შესახებ ლუკაშენკოს პრესსამსახურთან დაკავშირებულმა Telegram-არხმა Пул первого-მ გაავრცელა. სავარაუდოდ ლუკაშენკომ კარტოფილის მოსავალი მინსკის რეზიდენციის ახლოს არსებული ნაკვეთიდან აიღო. ამ ნაკვეთზე ლუკაშენკოს არამხოლოდ კარტოფილი, არამედ საზამთროც მოჰყავს. მოსავალს როგორც წესი აგვისტოს ბოლოს და სექტემბრის დასაწყისში იღებენ და მოსავლის აღებაში ლუკაშენკო და მისი უმცროსი შვილი ნიკოლაი მონაწილეობენ. გასულ წლებში ლუკაშენკოს მიერ აღებულ მოსავალი სხვადასხვა სოციალურ დაწესებულებებში იგზავნებოდა. 2016 წელს ალექსანდრ ლუკაშენკო თავისი მოყვანილი სტაფილოთი ამერიკელ მსახიობს, სტივენ სიგალს გაუმასპინძლდა.
ზურაბ ჯაფარიძე საჯარო აქტივობებს ზღუდავს
გირჩის ლიდერი დიდუბე-ჩუღურეთის ოლქში მაჟორიტარი დეპუტატობის კანდიდატი ზურაბ ჯაფარიძე საჯარო აქტივობებს ზღუდავს. აღნიშნულის მიზეზი, მისი შვილის კოვიდინფიცირებაა. "კოსტას, უმცროს შვილს, მოუვიდა დადებითი პასუხი კოვიდ-ტესტზე. მაღალი სიცხე ჰქონდა 3 დღე, (სხვა არანაირი სიმპტომი არ ჰქონია) და საავადმყოფოში გადავიყვანეთ. ამჟამად ბევრად უკეთესადაა. სხვა ოჯახის წევრები კარგად ვართ, მათ შორის ნატა დაიტესტა და უარყოფითი პასუხი მოვიდა სამწუხაროდ ჩემი საჯარო აქტივობები უნდა შევზღუდო. კამპანიას მხოლოდ ონლაინ რეჟიმში გავაგრძელებ. 31-ში უნდა მოვიგოთ." - წერს ჯაფარიძე. 22 ოქტომბრის მონაცემებით, ქვეყანაში, ჯამში, COVID-19-ით ინფიცირების 22 803 შემთხვევაა დადასტურებული, მათგან 9 401 პაციენტი გამოჯანმრთელდა, 178 კი გარდაიცვალა.
Reuters – “ევროკავშირმა საქართველო უსაფრთხო ქვეყნების სიიდან ამოიღო”
“ევროკავშირმა უსაფრთხო ქვეყნების სიიდან საქართველოს ამოღების გადაწყვეტილება მიიღო”, – იუწყება Reuters. მისივე ცნობით, ევროკავშირის 27 ქვეყნის წარმომადგენლების შეხვედრაზე საქართველო, კანადა და ტუნისი იმ ქვეყნების სიიდან ამოიღეს, რომელთაც კორონავირუსთან დაკავშირებული შეზღუდვების გარეშე შეეძლოთ შენგენის ზონაში შესვლა, გადაწყვეტილების მიზეზი კი ინფიცირების შემთხვევების გაზრდილი რაოდენობაა. “გადაწყვეტილება მიმდინარე კვირის ბოლოს მოვა სისრულეში, სანამ რომელიმე წევრი ქვეყნის წარმომადგენელი მას არ გაასაჩივრებს”, – იუწყება Reuters. სია მხოლოდ სარეკომენდაციო ხასიათისაა. ევროკავშირის წევრი რამდენიმე ქვეყანა, რეკომენდაციის მიუხედავად, უცხოელ ტურისტებზე შეზღუდვებს არ აწესებს. დღეს საქართველოში კორონავირუსით ინფიცირების 1 351 შემთხვევა გამოვლინდა, ვირუსის შედეგად კი 14 ინფიცირებული გარდაიცვალა. ბოლო ოფიციალური მონაცემებით, საქართველოში კორონავირუსის 21 208 შემთხვევაა დადასტურებული, მათგან 9 003 ადამიანი გამოჯანმრთელდა, 172 გარდაიცვალა.
ზუგდიდის სპეცოპერაციის შედეგან, ყველა მძევალი თავისუფალია, თავდამსხმელი კი გაიქცა
ზუგდიდის სპეცოპერაციის შედეგად, საქართველოს ბანკის ზუგდიდის ფილიალში აყვანილი ყველა მძევალი თავოსუფალია, თავად თავდამსხმელი კი გაურკვეველი მიმართულებით გაიქცა. შს სამინისტრო აღნიშნულთან დაკავშირებით, განცხადებას ავრცელებს, თუმცა მასში არ არის ხაზგასმული, რა მიმართულებით გაიქცა თავდამსხმელი და წაიღო თუ არა მან ნახევარი მილიონი დოლარი. ბოროტმოქმედმა, მძევლები და მანქანა, ჩხოროწყუს რაიონის სოფელ კირცხში დატოვა. გათავისუფლებულ მძევლებს ფიზიკური დაზიანებები არ აღენიშნებათ. “შინაგან საქმეთა სამინისტროს მიერ, სამეგრელოს რეგიონში ჩატარებული სპეციალური საპოლიციო ღონისძიების შედეგად, ყველა მძევალი გათავისუფლებულია და მათ სიცოცხლესა, ასევე ჯანმრთელობას საფრთხე არ ემუქრება. მოგეხსენებათ, ქალაქ ზუგდიდში, ზვიად გამსახურდიას გამზირზე მდებარე ერთ-ერთი ბანკის ფილიალზე განხორციელდა შეიარაღებული თავდასხმა, რომლის დროსაც დამნაშავემ 43 მოქალაქე აიყვანა მძევლად. პოლიციის ძალისხმევით, რთული და ხანგრძლივი მოლაპარაკებების შედეგად, დღის განმავლობაში მათი უდიდესი ნაწილი ეტაპობრივად გათავისუფლდა, რომლებსაც სამეგრელო-ზემო სვანეთის პოლიციის დეპარტამენტის დირექტორი ავთანდილ გალდავა ჩაენაცვლა. მოგვიანებით, ავთანდილ გალდავამ და სამმა მძევალმა, თავდამსხმელთან ერთად დატოვა ბანკის შენობა. შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის დირექტორის – ავთანდილ გალდავას უშუალო ძალისხმევით შეიარაღებული დამნაშავისგან ყველა მძევალი გათავისუფლდა, ამჟამად მათ სიცოცხლეს და ჯანმრთელობას საფრთხე არ ემუქრება სამართალდამცველები ინტენსიურ რეჟიმში აგრძელებენ ოპერატიულ-საგამოძიებო და სამძებრო ღონისძიებებს დამნაშავის დაკავების მიზნით. შინაგან საქმეთა სამინისტრო ფაქტთან დაკავშირებით საზოგადოებისთვის დამატებით ინფორმაციას ეტაპობრივად გაავრცელებს”, – ნათქვამია შს სამინისტროს განცხადებაში. შეგახსენებთ, რომ სპეცოპერაცია 22 ოქტომბერს, დაახლოებით 14:30სთ-ზე დაიწყო, მაშინ როცა შეიარაღებული თავდამსხმელი ბანკში შეიჭრა და მძევლები აიყვანა. ხალხის ნაწილმა, სახანძრო კიბით მოასწრო გაქცევა, ნაწილი კი ბოლოტმოქმედთან ერთად ბანკში, საღამომდე იმყოფებოდა. მოლაპარაკებების შედეგად, თავდამსხმელი მძევლებს ეტაპობრივად ათავისუფლებდა და მოთხოვნეს, ერთ-ერთი დაკავებულის საშუალებით, პირდაპირ ეთერში აჟღერებდა.
ბრიტანეთის ლორდთა პალატამ ბრექსითზე მთავრობის ახალ კანონპროექტს მხარი არ დაუჭირა
დიდი ბრიტანეთის პარლამენტის ლორდთა პალატამ ბრექსითზე მთავრობის ახალ კანონპროექტს მხარი არ დაუჭირა. 395 ხმით 169-ის წინააღმდეგ მათ ჩააგდეს შიდა ბაზრის კანონი, რომელიც, ოპონენტების აზრით, ძირს გამოუთხრის გაერთიანებული სამეფოს რეპუტაციას. მანამდე, ამ კანონს თემთა პალატამ 340 ხმით 263 წინააღმდეგ მხარი დაუჭირა. იმ შემთხვევაში, თუ დიდი ბრიტანეთი ევროკავშირთან სავაჭრო შეთანხმებას ვერ მიაღწევს, ამ კანონპროექტმა უნდა უზრუნველყოს ინგლისს, შოტლანდიას, უელსსა და ჩრდილოეთ ირლანდიას შორის ვაჭრობის უწყვეტად გაგრძელება და ამისათვის არეგულირებს საერთო პოლიტიკას. მთავრობა კანონპროექტს "სასიცოცხლოდ მნიშვნელოვან ლეგალური უსაფრთხოების ბადეს" უწოდებს. შემდეგ ეტაპზე ლორდთა პალატის წევრებმა კანონპროექტში ცვლილებები უნდა შეიტანონ და განსახილველად კვლავ თემთა პალატას დაუბრუნონ. კანონპროექტს აკრიტიკებენ ევროკავშირში, სადაც ბრექსითზე მოლაპარაკებები კვლავ გრძელდება, თუმცა, ჯერჯერობით, უშედეგოდ. ორივე მხარე ერთმანეთს დათმობისაკენ მოუწოდებს. საქმე იმაშია, რომ ეს კანონი, მიღების შემთხვევაში, დაარღვევს ბრექსითზე ევროკავშირთან უკვე მიღწეულ შეთანხმებას, რომლის მიხედვითაც, ჩრდილოეთ ირლანდიასა და ირლანდიის საზღვარზე მყარი საზღვრის თავიდან ასარიდებლად ჩრდილოეთ ირლანდიაზე განსხვავებული, ევროკავშირთან მიახლოებული საბაჟო პირობები გავრცელდებოდა, რომელიც ახლოსაა ევროკავშირის ერთიან ბაზართან. ეს პირობა დიდი ბრიტანეთის ევროკავშირიდან გასვლის შეთანხმებაშია ჩადებული, რომელიც საერთაშორისო კანონს წარმოადგენს და შესაბამისად, პარლამენტის მიერ მიღებული კანონპროექტი, საბოლოო დამტკიცებისა და შეთანხმების გარეშე ევროკავშირიდან გასვლის შემთხვევაში, ძალაში შესვლის შემდეგ მას დაარღვევს. კრიტიკოსების პასუხად დიდი ბრიტანეთის პრემიერმინისტრი ბორის ჯონსონი ამბობს, რომ კანონპროექტის მიზანი მხოლოდ გაერთიანებული სამეფოს მთლიანობის დაცვა და განხეთქილების თავიდან აცილებაა. კანონის მიღებამ, შესაძლოა, ბრექსითის მოლაპარაკებები კიდევ უფრო შეაფერხოს. ევროპული საბჭოს პრეზიდენტმა, შარლ მიშელმა თქვა, რომ საერთაშორისო კანონების დარღვევა მიუღებელია და სამომავლო ურთიერთობაში ნდობის დაკარგვას გამოიწვევს. თავის მხრივ, ბორის ჯონსონი იმუქრება, რომ თუ სავაჭრო შეთანხმებას 15 ოქტომბრამდე ვერ მიაღწევენ, დიდი ბრიტანეთი მოლაპარაკებებიდან გავა და ევროკავშირს შეთანხმების გარეშე დატოვებს. შეგახსენებთ, რომ დიდმა ბრიტანეთმა ევროკავშირი მიმდინარე წლის 31 იანვარს დატოვა. ამის შემდეგ ამოქმედდა გარდამავალი პერიოდი, რომელიც 11 თვითაა განსაზღვრული და ამ პერიოდში ბრიტანეთის მთავრობამ ევროკავშირის წევრებთან სავაჭრო, უსაფრთხოების და სხვა საკითხებზე შეთანხმებებს უნდა მიაღწიოს და ახალი ურთიერთობები ჩამოაყალიბოს. იმ შემთხვევაში, თუ მოლაპარაკებები წარუმატებლად დასრულდა, დიდი ბრიტანეთი ევროკავშირის ქვეყნებთან მსოფლიო სავაჭრო ორგანიზაციის მიერ დაწესებული პირობებით ითანამშრომლებს.
22:00 საათის შემდეგ მუშაობის შეზღუდვის დარღვევის გამო 12 რესტორანი დაჯარიმდა
შრომის პირობების ინსპექტირების დეპარტამენტის უფროსის, ბექა ფერაძის განცხადებით, 22:00 საათის შემდეგ მუშაობის შეზღუდვის დარღვევის გამო 12 რესტორანი დაჯარიმდა. როგორც ბექა ფერაძემ მთავრობის ადმინისტრაციაში გამართულ ბრიფინგზე აღნიშნა, 3 შემთხვევაში ადგილი ჰქონდა დარღვევის განმეორებას, რის გამოც სისხლის სამართლებრივი გამოძიება დაიწყო. „შრომის ინსპექციამ 22:00 საათიდან რესტორნების მუშაობის შეზღუდვის აღსრულების მონიტორინგი განახორციელა. გამოვლინდა სამართალდარღვევის 12 ფაქტი და ობიექტები 10 ათასი ლარით დაჯარიმდნენ. ვინაიდან შესაბამისი დადგენილების მიხედვით, დარღვევის ხელმეორედ ჩადენა სისხლის სამართლებრივ პასუხისმგებლობას იწვევს, განმეორებით დაფიქსირდა, რომ 3 ობიექტი დაჯარიმების მიუხედავად აგრძელებდა გარკვეულ აქტივობებს, ამიტომ შსს-სთან ერთად რეაგირება მოვახდინეთ და სისხლის სამართლებრივი გამოძიება დაიწყო“,-აღნიშნა ფერაძემ. მისივე ინფორმაციით, აქტიურად ხდება მონიტორინგი ბაზრებსა და ბაზრობებზე. კერძოდ, შემოწმდა თბილისში არსებული 10 ბაზარი და საცალო და 185 საბითუმო და საცალო ვაჭრობის ობიექტი და მათ მიმართ გაიცა გაფრთხილება.
საქართველოში კორონავირუსის 1351 ახალი შემთხვევა დაფიქსირდა
საქართველოში, ბოლო 24 საათში, კორონავირუსის 1351 ახალი შემთხვევა დაფიქსირდა. ამის შესახებ ინფორმაციას მთავრობის მიერ შექმნილი ვებ გვერდი stopcov.ge ავრცელებს. კარანტინის რეჟიმში იმყოფება 6 582 მოქალაქე, სტაციონარში მეთვალყურეობას გადის 2 895 ადამიანი, კოვიდსასტუმროში მყოფი პირების რაოდენობა კი 1 420-ს შეადგენს.უცხოეთიდან სამკურნალოდ გადმოყვანილია საქართველოს 41 მოქალაქე. ამასთან, საქართველოში ბოლო 24 საათში კორონავირუსით 14 პაციენტი გარდაიცვალა, გამოჯანმრთელდა 337 პაციენტი. სულ საქართველოში კორონავირუსის 21208 შემთხვევაა დადასტურებული.
გალში სკოლები დაიხურა - რა პრობლემის წინაშე დგანან მოსწავლეები
გალში, სკოლები 24 ნოემბრამდე დაიხურა. როგორც "ევროპათაიმს" ერთ-ერთი სკოლის მასწავლებელმა განუცხადა, აღნიშნულის მიზეზი, კორონავირუსის შემთხვევების მატებაა. "სკოლები 15 ოქტომბრიდან დაიკეტა. ჯერჯერობით არანაირი დისტანციურ სწავლებაზე არ არის საუბარი, თუმცა რომც იყოს, აქ ამის რესურსი არ არის. არც შესაბამისი ტექნიკითაა მოსწავლეები აღჭურვილი და ვერც ადგილობრივი ინტერნეტი ვერ გაქაჩავს მსგავს ჩართვებს. 24-მდეა დაკეტილი, თუმცა თუ ვირუსის გავრცელება გაგრძელდა, ალბათ კიდევ გადაიდება. მოსწავლეებს ეს სემესტრი ფაქტობრივად ეკარგებათ", - განუცხადა "ევროპათაიმს" სკოლის მასწავლებელმა. დე ფაქტო მთავრობა, სწავლების დისტანციურ მეთოდზე, ჯერ არაფერს ამბობს, თუმცა მშობლები, „ევროპათაიმთან“ მის სირთულეებზე საუბრობენ. „კორონავირუსთან დაკავშირებული პრობლემების გამო სკოლები დაიკეტა. მე ორი მცირეწლოვანი შვილი მყავს. ისინი სკოლის მოსწავლეები არიან და ახლა იძულებითი არდადეგები აქვთ. დისტანციური სწავლება, როგორც ეს დანარჩენ საქართველოშია, აქ ბევრ პრობლემასთანაა დაკავშირებული. პირველი - აქ მხოლოდ რამდენიმე ბავშვს აქვს კომპიუტერი, მეორე - ძალიან ცუდად ხდება ელექტრომომარაგება, განსაკუთრებით ზამთარში, რაც ონლაინსწავლებისთვის ერთ-ერთი აუცილებელი პირობაა. მესამე - ძალიან ცუდი ინტერნეტია, რაც იმას ნიშნავს, რომ ბავშვები ფაქტობრივად ვერ მოისმენენ გაკვეთილს უწყვეტად, გაუჭირდებათ შინაარსის გამოტანა, და მეოთხე, რაც ვფიქრობ, არანაკლებ მნიშნელოვანი პრობლემაა, ბავშვების ტექნიკასთან მიჯაჭულობა. დღეს, როცა მსოფლიო ამ გამოწვევის წინაშე დგას და ბავშვები ისედაც ტექნიკადამოკიდებულები არიან, ონლაინსწავლება, ამას კიდევ უფრო უწყობს ხელს. ასევე მნიშვნელოვანია ბავშვების თანატოლებთან ურთიერთბის საკითხი, მათ ჭირდებათ კლასელებთან და მეგობრებთან ელემენტარული ურთიერთობა. იმედი გვაქვს, მსოფლიო მალე გაუმკლავდება ამ პრობლემას და ჩვენც მალე დავუბრუნდებით ჩვეულ რეჟიმს. ჩვენ აქ ისედაც რთულ პირობებში გვიწევს სწავლა სკოლაშიც კი“, - განუცხადა „ევროპათაიმს“ ერთ-ერთმა მშობელმა. სწავლის შეწყვეტა, განსაკუთრებით რთულ მდგომარეობაში აგდებს დამამთავრებელი კლასის მოსწავლეებს, რომლებსაც წინ ერთიანი ეროვნული გამოცდები ელოდებათ. „ერვოპათაიმს“ ერთ-ერთი მათგანი უყვება, რომ ახლა მხოლოდ მასწავლებლების გულისხმიერების იმედზე არიან, რადგან ისინი დაპირდნენ დახმარებას. „წინა წლის პრაქტიკიდან გამომდინარე, შიში გვაქვს რომ სწავლა შესაძლოა, ამ წელს ვერც განახლდეს. დისტანციურად სწავლა ვერ მოხერხდება ალბათ მასიურად, თუმცა მასწავლებლები გვპირდებიან, რომ დაგვეხმარებიან შესაძლებლობის ფარგლებში. ჩვენ დამამთავრებელი კლასი ვართ და წინ დიდი გამოცდა გველოდება, შესაბამისად, წლის ჩავარდნა ჩვენთვის განსაკუთრების დიდი პრობლემაა“, - აცხადებს ერთ-ერთი სკოლის მოსწავლე. ცნობისთვის, გალის რაიონის, ომამდელ საზღვრებში, ამ ეტაპზე 30 სკოლაა. სწავლა მიმდინარე წლის 1 სექტემბერს განახლდა. საწყის ეტაპზე, ვირუსის დაფიქსირების გამო, სოფელ საბერიოს სკოლა დაიკეტა. სპეციალურად "ევროპათაიმისთვის"
აშშ-ის უზენაესი სასამართლოს წევრი, რუთ ბეიდერ გინზბურგი გარდაიცვალა
აშინგტონში 18 სექტემბერს 87 წლის ასაკში გარდაიცვალა აშშ-ის უზენაესი სასამართლოს წევრი რუთ ბეიდერ გინზბურგი. სენატში რესპუბლიკელთა უმრავლესობის თავმჯდომარემ, სენატორმა მიტჩ მაკკონელმა განაცხადა, რომ სენატი განიხილავს უზენაესი სასამართლოს წევრობის კანდიდატურას, რომლის წარდგენას აპირებს პრეზიდენტი დონალდ ტრამპი საპრეზიდენტო არჩევნებამდე. რუთ ბეიდერ გინზბურგი, რომლის მამა აშშ-ში გადასახლდა რევოლუციამდელი რუსეთიდან, ქვეყნის უზენაესი სასამართლოს მეორე ქალი წევრი იყო. მისი კანდიდატურა 1993 წელს დაასახელა აშშ-ის მაშინდელმა პრეზიდენტმა, ბილ კლინტონმა. რუთ ბეიდერ გინზბურგი მოგვიანებით უზენაესი სასამართლოს ლიბერალური ფრთის სიმბოლოდ იქცა. მისი მონაწილეობით მიიღეს გადაწყვეტილებები, როცა დამტკიცდა ქალთა უფლება აბორტზე, ერთნაირსქესიან პირთა ქორწინების უფლების კონსტიტუციურობა, რასობრივ უმცირესობათა უფლებები. ის იყო იმ მოსამართლეთა შორის, ვინც მხარი დაუჭირა სამედიცინო დაზღვევის სისტემის რეფორმის კანონიერებას. მისი სიკვდილი კუჭქვეშა ჯირკვლის კიბოთი ნაწილობრივ მოულოდნელი იყო, რადგან ვრცელდებოდა ცნობები მკურნალობის კურსის წარმატებულობის შესახებ. უზენაესი სასამართლოს წევრი მოსამართლის გარდაცვალებას მოჰყვება პოლიტიკური მღელვარება წინასაარჩევნო პერიოდში, რადგან რესპუბლიკურ პარტიას მიეცა შესაძლებლობა, უზენაეს სასამართლოში მოიპოვოს საიმედო კონსერვატიული უმრავლესობა. დონალდ ტრამპმა უკვე დანიშნა უზენაეს სასამართლოში ორი კონსერვატორი მოსამართლე თავისი პრეზიდენტობის პერიოდში. მოსამართლის დანიშვნა უნდა დაამტკიცოს სენატმა, რომელიც, იქიდან გამომდინარე, რომ იქ უმრავლესობა რესპუბლიკელებს აქვთ, კონსერვატორი კანდიდატის რაც შეიძლება სწრაფად გაყვანას შეეცდება. სენატში დემოკრატიული პარტიის ლიდერმა, ჩაკ შუმერმა განაცხადა, რომ უზენაეს სასამართლოში თავისუფალ ადგილზე არავინ უნდა დაინიშნოს, სანამ ახალი პრეზიდენტი არ იქნება არჩეული. სასამართლოს ბოლო შემადგენლობაში ხუთი მოსამართლე რესპუბლიკელი პრეზიდენტის დანიშნული იყო, ოთხი კი დემოკრატისა. სასამართლოს ცხრა წევრს შორის მეექვსე კონსერვატორი იურისტის გამოჩენა მკვეთრად შეცვლის ძალთა ბალანსს ქვეყნის ხელისუფლების ერთობ მნიშვნელოვან, სასამართლო შტოში, რომელიც ხშირად აფასებს კონგრესისა და მთავრობის გადაწყვეტილებების კონსტიტუციურობას. მიტჩ მაკკონელის მზადყოფნას, განიხილონ მოსამართლის კანდიდატურა, რომელსაც პრეზიდენტი ტრამპი წარადგენს, არჩევნებამდე თვე-ნახევრით ადრე, მძაფრი კრიტიკა მოჰყვა დემოკრატიული პარტიის წარმომადგენლებისგან, რომლებმაც გაიხსენეს, რომ მაკკონელმა 2016 წელს უარი თქვა განეხილათ სენატში უზენაესი სასამართლოს წევრობის კანდიდატურა, რომელიც ბარაკ ობამამ წარადგინა არჩევნებამდე ნახევარ წელზე მეტი ხნით ადრე. მაკკონელმა მაშინ განაცხადა, რომ ეს უფლება უნდა ჰქონდეს პრეზიდენტს, რომელიც არჩევნებში გაიმარჯვებს. აშშ-ის პრეზიდენტი უზენაესი სასამართლოს წევრებს ნიშნავს სამუდამოდ. წევრობა სრულდება მხოლოდ მოსამართლის საკუთარი ნებით გადადგომით, ან გარდაცვალებით.
ოკუპანტები ატოცსა და ზემო ნიქოზთანაც გამოჩნდნენ
ქარელის მუნიციპალიტეტის სოფლების ატოცისა და ზემო ნიქოზის მიმდებარე ტერიტორიაზე საოკუპაციო ძალების მხრიდან კვლავ დაფიქსირდა უკანონო ე.წ. ბორდერიზაციის ფაქტი, – ამის შესახებ საქართვლოს სახელმწიფო უსაფრთხოების სამსახური იუწყება. გააქტიუტებულია „ცხელი ხაზი“ გააქტიურდა. „ქარელის მუნიციპალიტეტის სოფელ ატოცის და გორის მუნიციპალიტეტის სოფელ ზემო ნიქოზის მიმდებარე ტერიტორიაზე, საოკუპაციო ძალების მხრიდან კვლავ დაფიქსირდა უკანონო ე.წ. ბორდერიზაციის ფაქტი. აღნიშნული უკანონო აქტივობა წარმოადგენს საოკუპაციო ძალების მორიგ სახიფათო და უკიდურესად დესტრუქციულ ქმედებას, რომელიც ზიანს აყენებს უსაფრთხოების გარემოს და ხელყოფს ადამიანის ფუნდამენტურ უფლებებს, რაც კიდევ უფრო გაართულებს საოკუპაციო ხაზის ორივე მხარეს მცხოვრები ადგილობრივი მოსახლეობის ყოველდღიურ ცხოვრებას. საოკუპაციო ძალების მორიგ უკანონო ქმედებასთან დაკავშირებით, სახელმწიფო უსაფრთხოების სამსახურის მიერ გააქტიურდა „ცხელი ხაზი“. ინფორმირებულია ევროკავშირის სადამკვირვებლო მისია და ჟენევის საერთაშორისო მოლაპარაკებების თანათავმჯდომარეები. უსაფრთხოების გარემოს დაზიანების კუთხით, საოკუპაციო ძალების მიერ გადადგმული დესტრუქციული ნაბიჯები, კიდევ ერთხელ მწვავედ იქნება დასმული, როგორც ინციდენტების პრევენციისა და მათზე რეაგირების მექანიზმის (IPRM), ასევე, ჟენევის საერთაშორისო დისკუსიების მორიგ რაუნდებზე“, – ნათქვამია სუს-ის მიერ გავრცელებულ განცხადებაში. ცნობისთვის: ოკუპანტებმა ორიოდ დღის წინ გორის მუნიციპალიტეტის სოფელ ხურვალეთში უკანონო ე.წ. ბორდერიზაციის პროცესი განაახლეს. ადგილობრივები შიშობენ, რომ საოკუპაციო ხაზს მიღმა სასოფლო–სამეურნეო მიწები და საცხოვრებელი სახლებიც აღმოჩნდება.
