ახალი ამბები
NCDC: მოწევა ახალი კორონავირუსით ინფიცირების რისკს ზრდის
დაავადებათა კონტროლის ეროვნული ცენტრის ცნობით, მოწევა ახალი კორონავირუსით ინფიცირების რისკს ზრდის. NCDC-ში ამბობენ, რომ მოწევისას პირთან ხელის მიტანამ, შესაძლოა, ორგანიზმში ვირუსის მოხვედრას შეუწყოს ხელი. საქართველოში დღეს, 27 ოქტომბერს კორონავირუსით ინფიცირების 1 824 ახალი შემთხვევა დადასტურდა. გარდაიცვალა კიდევ 23 და გამოჯანმრთელდა 1 262 ადამიანი. ქვეყანაში სულ კორონავირუსის 32 127 შემთხვევაა გამოვლენილი, მათგან 12 632 პაციენტი გამოჯანმრთელდა, 238 კი გარდაიცვალა. ქვეყანაში ინფიცირების 19 257 აქტიური შემთხვევაა. აქედან 2/3-ზე მეტი ბინაზე ან Covid-სასტუმროებში მკურნალობს. ბოლო პერიოდში ქვეყანაში ახალი კორონავირუსის შემთხვევების რაოდენობა მკვეთრად გაიზარდა. უწყებათაშორისი საკოორდინაციო საბჭოს გადაწყვეტილებით, აკრძალულია 200 ადამიანზე მეტის შეკრება, როგორც დახურულ, ისე ღია სივრცეებში. აკრძალულია ქორწილებისა და ქელეხების გადახდაც. აჭარაში, თბილისში, მცხეთასა და იმერეთში რესტორნები და გასართობი დაწესებულებები მხოლოდ 22:00-მდე მუშაობენ. ასევე, მთავრობამ "მკაცრი რეკომენდაცია" გასცა საქართველოს სამ დიდ ქალაქში, თბილისში, ბათუმსა და ქუთაისში, გარე სივრცეებში პირბადის ტარებაზე.
იტალიაში კორონავირუსთან დაკავშირებული შეზღუდვების საწინააღმდეგო აქციას შეტაკებები მოჰყვა
იტალიაში კორონავირუსის მეორე ტალღის გამო დაწესებული ახალი შეზღუდვების საწინააღმდეგო აქციები ტარდება - ამის შესახებ BBC წერს. პოლიციასა და დემონსტრანტებს შორის შეტაკებები რამდენიმე მსხვილ ქალაქში მოხდა, მათ შორის ტურინში, სადაც პოლიციის ოფიცრებს აალებადი ნივთიერებები ესროლეს. მილანში კი აქციის მონაწილეთა წინააღმდეგ ცრემლმდენი გაზი გამოიყენეს. როგორც ბრიტანული მედია იუწყება, აქციის მონაწილეთა მხრიდან ძალადობის ფაქტები ასევე დაფიქსირდა ნაპოლში. დემონსტრაციები იტალიაში მას შემდეგ დაიწყო, რაც მთავრობამ რესტორნების, ბარებისა და კინოთეატრების დახურვის გადაწყვეტილება მიიღო. გადაწყვეტილება ადგილობრივი დროით 18:00 საათიდან შედის ძალაში. სხვა რეგიონებში, მათ შორის ლომბარდიაში კი, ღამის განმავლობაში კომენდანტის საათი მოქმედებს. საპროტესტო აციები ჩატარდა იტალიის ბევრ ქალაქში, მათ შორის რომში, გენუაში, პალერმოსა და ტრიესტეში. იტალიაში პანდემიის დაწყების დღიდან დღემდ აღრიცხულია კორონავირუსის 525, 782 შემთხვევა, გარდაიცვალა 37,338 კოვიდინფიცირებული. გასული 24 საათის განმავლობაში 21,273 ახალი შემთხვევა გამოვლინდა, გარდაიცვალა - 128. პანდემიის შესახებ ჯანდაცვის მსოფლიო ორგანიზაციამ 2020 წლის 11 მარტს გამოცხადდა. მანამდე, ჩინეთმა, 21 იანვარს დაადასტურა, რომ კორონავირუსი გადამდებია. ჩინეთში ეპიდემია 2019 წლის დეკემბერში დაიწყო.
სომხეთის პრემიერ-მინისტრის ცოლი ყარაბაღში, საომრად წასვლას გეგმავს
სომხეთის პრემიერ-მინისტრის ცოლი, პროფესიით ჟურნალისტი ანა აკოფიანი, სამხედრო წვრთნების გავლის შემდეგ, ყარბაღში, საომრად წასვლას გეგმავს. “ხვალიდან 13 ქალი, მათ შორის მე, სამხედრო სწავლებებს ვიწყებთ. რამდენიმე დღეში კი ჩვენი საზღვრების დასაცავად წავალთ. ჩვენს სამშობლოს და ჩვენს ღირსებას მტერს ვერ დავუთმობთ”, – წერს ანა აკოფიანი ფეისბუკის პირად გვერდზე. 27 სექტემბერს დაწყებული სამხედრო მოქმედებებამდე, დაახლოებით, ერთი თვით ადრე, ოფიციალური ინფორმაციით, ანა აკოფიანმა მის მიერ ინიცირებული კამპანიის “ქალები მშვიდობისთვის” [Women for Peace] ფარგლებში ასევე სამხედრო სწავლებები გაიარა. იგივე წვრთნებში, ყარაბაღში მცხოვრებმა სხვადასხვა ასაკისა და პროფესიის 15-მა ქალმა მიიღო მონაწილეობა. როგორც ანა აკოფიანი აცხადებს, კურსის მიზანი საბრძოლო ცხოვრების გაცნობა და საბრძოლო უნარების შეძენა იყო. “დარწმუნებული ვარ, არწახზე სამხედრო თავდასხმის შემთხვევაში არა მხოლოდ ჩვენი არმია, მთელი საზოგადოება დადგება მის დასაცავად – სამხედრო და სამოქალაქო პირები, კაცები და ქალები. მე, ისევე როგორც ბევრი ქალი, დარწმუნებული ვარ, მზად ვარ, ხელში იარაღი ავიღო სამშობლოს და შვილების დასაცავად. მაგრამ ეს არ არის ომის გამო, იმისთვისაა, რომ დავამტკიცოთ, რომ მშვიდობას ალტერნატივა არ აქვს”, – აცხადებს ფაშინიანის ცოლი. სომხეთსა და აზერბაიჯანს შორის მთიან ყარაბაღში 27 სექტემბერს დაწყებული საბრძოლო მოქმედებები დღემდე სხვადასხვა ინტენსივობით გრძელდება. მხარეებმა ერთი თვის განმავლობაში დადებული სამივე ჰუმანიტარული საზავო შეთანხმება დაარღვიეს.
„საქართველოში პოლიტიკა სუსტი გულის მქონე ადამიანებისთვის არაა"
აშშ-ის წარმომადგენელთა პალატის დემოკრატიის პარტნიორობის პროგრამის დემოკრატი თანათავმჯდომარე, კონგრესმენი დევიდ პრაისი იმედს გამოთქვამს, რომ საქართველოში საპარლამენტო არჩევნები თავისუფალი და სამართლიანი იქნება. „ამერიკის ხმასთან“ ექსკლუზიურ კომენტარში, ის ასევე იმედოვნებს, რომ შედეგები ლეგიტიმურად იქნება მიჩნეული. „ეს რთული გზა იყო. საქართველოს გაუჭირდა ამ საკონსტიტუციო ცვლილებებზე შეთანხმება. ვფიქრობ, ის ბალანსი, რომელიც ახლა გაქვთ, ეგრეთწოდებულ, პროპორციულ და მაჟორიტარულ ადგილებს შორის, სავარაუდოდ, სამუდამოდ ასე არ დარჩება. ეს გარდამავალი შეთანხმებაა, მაგრამ ის წარმოადგენს რთული ბრძოლების შედეგად მიღწეულ კომპრომისულ შედეგს. როგორც ჩანს, ის ყველა მხარემ ლეგიტიმურად მიიღო“, - განაცხადა კონგრესმენმა. კონგრესმენ პრაისს მიაჩნია, რომ პარტიები ერთმანეთს დაუპირისპირდებიან და სავარაუდოდ, „ძალიან კონკურენტულ არჩევნებს ჩაატარებენ,“ რომლის შემდეგაც შესაძლოა პარლამენტში ძალები ახლო პროპორციით გადანაწილდეს. კონგრესმენი პრაისი წარმომადგენელთა პალატის დემოკრატიის პარტნიორობის პროგრამის თანათავმჯდომარის ამპლუაში საქართველოსთან 15 წელია თანამშრომლობს. ამ დროის განმავლობაში, საქართველოში არაერთი არჩევნები გაიმართა და დემოკრატიული თვალსაზრისით, არაერთი ცვლილება მოხდა. კონგრესმენი ცვლილებებს იცნობს, თუმცა დასძენს, რომ ყველაზე მეტად ერთ უცვლელ ფაქტორს აფასებს. „თქვენ იცით, რომ საქართველოში პოლიტიკა სუსტი გულის მქონე ადამიანებისთვის არაა. ეს საკმაოდ უხეში საქმეა. ერთი უცვლელი ფაქტორი, ამ ყველაფერში კი ჩვენს ქვეყნებს შორის არსებული მეგობრობა და წარმომადგენელთა პალატის დემოკრატიის პარტნიორობის პროგრამასთან თანამშრომლობის სურვილია. ჩვენ ქართულ პოლიტიკაში არცერთი ძალის მხარეს არ ვართ. მაგრამ ვამბობთ, რომ გვაქვს საერთო ინტერესები ინსტიტუტების გამართულ ფუნქციონირებაში, რათა ისინი სრულად წარმოადგენდნენ საზოგადოების ინტერესების სრულ სპექტრს. პარტიული კუთვნილების მიუხედავად, ქართველები ამ პროცესის მონდომებული მონაწილეები იყვნენ. ჩვენ ვიმედოვნებთ და მოველით, რომ ეს ამ არჩევნების შემდეგაც გაგრძელდება,“ –თქვა კონგრესმენმა პრაისმა „ამერიკის ხმისთვის“ მიცემულ კომენტარში.
ერდოღანმა მოსახლეობას ფრანგული პროდუქციის ბოიკოტისკენ მოუწოდა
თურქეთის პრეზიდენტმა რეჯეფ თაიფ ერდოღანმა თანამემამულეებს ფრანგული პროდუქციის ბოიკოტისკენ ორშაბათს, სატელევიზიო გამოსვლის დროს მოუწოდა. "მოვუწოდებ ყველა მოქალაქეს, რომ არასდროს დაუჭირონ მხარი ფრანგულ ბრენდებს და არ იყიდონ ფრანგული პროდუქცია". – თქვა ერდოღანმა. თურქეთის პრეზიდენტს მსგავსი მოწოდებები წარსულშიც გაუკეთებია. 2018 წელს მან საზოგადოებას მოუწოდა, არ ეყიდათ აშშ-ში წარმოებული ელექტრონული მოწყობილობები. 2018-ში ერდოღანის მოწოდებებს შედეგი არ ჰქონია. ფრანგულ პროდუქციას ბოიკოტი გამოუცხადეს სხვადასხვა მაღაზიებმა ქუვეითში, საუდის არაბეთში, იორდანიასა და კატარში. ფრანგული მხარის განცხადებით, ჯერჯერობით, უცნობია ბოიკოტის გავლენა საფრანგეთის ვაჭრობაზე, თუმცა, სავარაუდოდ, ყველაზე მეტად ბოიკოტის შედეგებს სასოფლო-სამეურნეო სექტორი იგრძნობს. თურქეთისა და სხვა მუსლიმური ქვეყნების პოზიცია დაკავშირებულია საფრანგეთის პრეზიდენტის ემანუელ მაკრონის განცხადებებთან. საფრანგეთის პრეზიდენტს სურს, დაიცვას სეკულარული ღირებულებები რადიკალური ისლამისგან. ეს საკითხი გამწვავდა მას შემდეგ, რაც ფრანგ მასწავლებელს, სამუელ პატის, მუჰამედის კარიკატურების გაკვეთილზე ჩვენებისთვის თავი მოჰკვეთეს. "ის სწორედ იმიტომ მოკლეს, რომ რესპუბლიკას განასახიერებდა. ის მოკლეს, რადგან ისლამისტებს ჩვენი მომავალი უნდათ. მათ იციან, მისი მსგავსი ჩუმი გმირებით, ისინი ამას ვერ მიიღებენ". – თქვა მაკრონმა სამუელ პატის მკვლელობასთან დაკავშირებით. ერდოღანმა მაკრონი ანტიისლამურ განწყობაში დაადანაშაულა და აღნიშნა, რომ მუსლიმები საფრანგეთში ისეთივე ზეწოლის ქვეშ არიან, როგორც ებრაელები ევროპაში მეორე მსოფლიო ომის წინ. ერდოღანმა ევროპელ ლიდერებს მოუწოდა, შეეჩერებინათ საფრანგეთის პრეზიდენტის "სიძულვილის კამპანია". რამდენიმე დღის წინ ერდოღანმა მაკრონის ისლამთან დაკავშირებული პოზიციის გამო თქვა, რომ მენტალური ჯანმრთელობის შემოწმება სჭირდებოდა. ერდოღანის კომენტარის შემდეგ საფრანგეთმა თურქეთიდან ელჩი კონსულტაციებისთვის გაიხმო. "ისლამზე თავდასხმისთვის" მაკრონი გააკრიტიკა პაკისტანის პრეზიდენტმაც. ბანგლადეშში, ერაყში, ლიბიასა და სირიაში კი საპროტესტო აქციები გაიმართა.
712 – თბილისი, 545 – აჭარა, 305 – იმერეთი – რეგიონების სტატისტიკა
უწყებათაშორისი საკოორდინაციო საბჭოსთან არსებული საოპერაციო შტაბის უფროსის მოადგილის, ბერდია სიჭინავას განცხადებით, ბოლო 24 საათში საქართველოში კორონავირუსის დადასტურებული 1 824 შემთხვევიდან, თბილისში გამოვლენილია 712 ახალი შემთხვევა. რაც შეეხება სხვა რეგიონებს, როგორც სიჭინავამ მთავრობის ადმინისტრაციაში გამართულ ბრიფინგზე განაცხადა, აჭარაში ბოლო 24 საათში გამოვლენილია - 545 შემთხვევა, იმერეთში - 305, ქვემო ქართლში - 48, შიდა ქართლში - 56, გურიაში - 24, სამეგრელო და ზემო-სვანეთში - 63, კახეთში - 23, მცხეთა-მთიანეთში -22, სამცხე-ჯავახეთში - 22, რაჭა-ლეჩხუმსა და ქვემო სვანეთში - 4. მისივე ინფორმაციით, ამ ეტაპზე ხელოვნური სუნთქვის აპარატზე იმყოფება 105 ადამიანი. „3 847 ადამიანი მკურნალობს საავადმყოფოში, მათ შორის, თბილისის საავადმყოფოებში - 1 958, აჭარაში - 654; მძიმე პაციენტია 482, მათ შორის, თბილისში - 238, აჭარაში - 76. აქედან, ხელოვნური სუნთქვის აპარატზე - 105 პირი - მათ შორის, თბილისში - 61, აჭარაში - 23. 2 238 პირი არის კოვიდ-სასტუმროში, მათ შორის, 1 186 - აჭარაში, ხოლო 786 - თბილისში; 13 146 მკურნალობს ბინაზე. საკარანტინო სივრცეში გვყავს 3 757 ადამიანი, მათ შორის, თბილისში - 752, აჭარაში-1 926. სულ 6-26 ოქტომბრის პერიოდში, საზღვრიდან (საკარანტინო სივრცეში)გადაყვანილია - 8 918 პირი. დღეის მდგომარეობით, თვითიზოლაციაში იმყოფება 28 067 პირი, საიდანაც თბილისშია 3 224 პირი, აჭარაში - 11 017, იმერეთში - 4 195“, - აღნიშნა ბერდია სიჭინავამ.
საქართველოს ახალი მილიარდერი ჰყავს
საქართველოს ახალი მილიარდერი ჰყავს - ამის შესახებ ამერიკული გამოცემა “ფორბსი” წერს. როგორც გამოცემა იუწყება, ყაზახური ფინთექ-პლატფორმა Kaspi-ს 2 დამაარსებელი ლონდონის საფონდო ბირჟაზე განთავსების შემდეგ მილიარდერები გახდნენ, მათგან ერთი კი სწორედ ქართველი მიხეილ ლომთაძეა. მიხეილ ლომთაძე 1975 წლის 17 ოქტომბერს, საქართველოში, დაიბადა. თბილისშივე აიღო ბაკალავრის ხარისხი, შემდეგ კი სწავლა აშშ-ში, ჰარვარდის ბიზნესსკოლაში განაგრძო. ამერიკიდან დაბრუნების შემდეგ, ლომთაძემ პირველი საქმიანობა საქართველოში დაიწყო. 2002 წელს მან კომპანია “ჯი-სი-ჯი აუდიტი” დააფუძნა, რომელსაც თავადვე მართავდა და მალევე მსოფლიოში ავტორიტეტულ აუდიტორიულ კომპანია “ერსტ ენდ იანგის” შეუერთა. მას შემდეგ ლომთაძე საქმიანობას რუსეთში აგრძელებს. სწორედ რუსეთ უკავშირდება მისი წარმატებული კარიერის სტარტი, რომელიც ყაზახეთში გრძელდება. ლომთაძე ჯერ კიდევ 2008 წელს იქცა ყაზახეთის ყველაზე წარმატებულ და მდიდარ ახალგაზრდა ფინანსისტად. საფინანსო სექტორში ის კონკურენტუნარიან კადრად ისეთმა მიმართულებებმა აქცია, როგორიცაა ვენჩურული ფონდები და რისკების მართვა, მაკროეკონომიკა და ფინანსური ბაზრის კარგად ცოდნა. 2009 წლისთვის მიხეილ ლომთაძე უკვე ყაზახეთში, “კასპი ბანკის” მმართველი ხდება. პრესისთვის მიცემული ინტერვიუში ამბობს, რომ მისი ხელმძღვანელობის დროს “კასპი ბანკის” წარმატებულობაზე The Financial Times-ის მიერ მინიჭებული სტატუსიც მოწმობს. გავლენიანმა გამოცემამ “კასპი ბანკი” 2009 წლის საუკეთესო ყაზახურ ბანკად დაასახელა, რამაც ბანკის პრესტიჟი საბანკო-საფინანსო ინდუსტრიაში მნიშვნელოვნად გაზარდა. ცნობისთვის, კომპანია Kaspi ყაზახეთში ოპერირებს. ქვეყანაში, რომლის მოსახლეობა 18 მილიონს შეადგენს, ქართველი ბიზნესმენის მიერ დაფუძნებულ კომპანიას 7 მილიონი მომხმარებელი ჰყავს, რაც სესხების ბაზრის უდიდეს წილს, 32%-ს შეადგენს. კომპანიის მთავარი საქმიანობა ელექტრონული ფინანსური პროდუქტებისთვის (სესხები, გადასახადები) შესაბამისი პლატფორმის უზრუნველყოფას წარმოადგენს. პანდემიის გამო, Kaspi-ს პროდუქტების მოხმარებამ პიკს მიაღწია. 2019 წელს, Kaspi-ს წმინდა მოგებამ $515 მილიონია. კომპანია პანდემიის გამო კიდევ უფრო გაიზარდა, შემოსავალმა მხოლოდ 2020 წლის პირველ ნახევარში, $286 მილიონი შეადგინა. Kaspi-მ პანდემიისგან გამოწვეული პრობლემები მოსახლეობას ტექნოლოგიების დახმარებით მოუგვარა, შედეგად ის კონკურენტთაგან განსხვავებით გაიზარდა. ივნისში, ყაზახური ონლაინ გამოცემა Kazpravda.kz წერდა, რომ Kaspi-ს მთავარმა აღმასრულებელმა ხელმძღვანელმა ლომთაძემ ყაზახეთის პრეზიდენტისგან პანდემიის დროს „უანგარო მუშაობისათვის", „ხალხის მადლიერების“ მედალი მიიღო. წყარო
აშშ-ს სენატმა ემი კონი ბარეტი უზენაესი სასამართლოს მოსამართლედ დაამტკიცა
აშშ-ს სენატმა უზენაეს სასამართლოში რუთ ბეიდერ გინსბურგის შემცვლელად დონალდ ტრამპის მიერ წარდგენილ კანდიდატს ემი კონი ბარეტს მხარი 52 ხმით 48-ის წინააღმდეგ დაუჭირა. მის წინააღმდეგ ხმა მისცა ყველა დემოკრატმა სენატორმა და ერთმა რესპუბლიკელმა სენატორმა მეინის შტატიდან სიუზან კოლინზმა. კენჭისყრის შემდეგ ბარეტმა თეთრ სახლში გამართულ ცერემონიაზე ფიცი დადო. "მოსამართლე აცხადებს, რომ დამოუკიდებელი იქნება არა მხოლოდ კონგრესის და პრეზიდენტისაგან, არამედ საკუთარი პირადი რწმენისაგან, რაც შეიძლება მას სხვა მხრივ ამოძრავებდეს. მოსამართლის ფიცი ამ მოვალეობას საკუთარ თავში მოიცავს: ყოველთვის უნდა გვამოძრავებდეს კანონის უზენაესობა". - თქვა მან ფიცის დადების შემდეგ. "ის ჩვენი ქვეყნის უზენაესი სასამართლოს გამორჩეული მოსამართლე იქნება". - თქვა დონალდ ტრამპმა ცერემონიაზე. მისი დანიშვნით უზენაეს სასამართლოში 9 მოსამართლიდან 6 კონსერვატორი იქნება. ის უზენაესი სასამართლოს უკვე მესამე მოსამართლეა, რომელიც დონალდ ტრამპმა შეარჩია. დემოკრატი კანონმდებლების პროტესტი გამოიწვია იმან, რომ ბარეტის დანიშვნა არჩევნებამდე 1 კვირით ადრე მოხდა. 2016 წლის არჩევნებამდე პრეზიდენტ ბარაკ ობამას სენატმა უზენაესი სასამართლოს ვაკანტური ადგილის შევსებაზე უარი უთხრა. დემოკრატიული პარტიის ზოგიერთმა წარმომადგენელმა თქვა, რომ უზენაეს სასამართლოში ადგილების დამატებას განიხილავდნენ. ამ საკითხზე პირდაპირი პასუხის გაცემას თავს არიდებენ დემოკრატული პარტიის პრეზიდენტობის კანდიდატი ჯო ბაიდენი და ვიცეპრეზიდენტობის კანდიდატი კამალა ჰარისი.
საქართველოში კორონავირუსის 1824 ახალი შემთხვევა დაფიქსირდა
საქართველოში კორონავირუსის 1824 ახალი შემთხვევა გამოვლინდა და ინფიცირების შემთხვევათა რაოდენობა 32127- ს შეადგენს. ამის შესახებ ინფორმაცია მთავრობის მიერ სპეციალურად შექმნილ ვებ-გვერდზე, stopcov.ge-ზეა განთავსებული. გამოჯანმრთელდა კიდევ 1262 პაციენტი და საერთო რაოდენობა 12632-ს შეადგენს. კარანტინის რეჟიმში იმყოფება 3757 მოქალაქე, ხოლო სტაციონარში მეთვალყურეობას 3847ადამიანი გადის. ამასთან, კოვიდსასტუმროში მყოფი პირების რაოდენობა 2249- ს შეადგენს. ქვეყანაში კორონავირუსით კიდევ 23 პაციენტი გარდაიცვალა და გარდაცვლილთა საერთო რიცხვი 238-ს შეადგენს.
სოსო ჯაჭვლიანი ქართულ ოცნებას ტოვებს
მკლავჭიდის ფედერაციის პრეზიდენტი სოსო ჯაჭვლიანი აცხადებს, რომ „ქართულ ოცნებას“ ტოვებს. ჯაჭვლიანიც თქმით, ის ვერ იქნება ზონდერ ბრიგადის წევრი. მან ფედერაციაში არსებულ პრობლემებზე ისაუბრა და განაცხადა, რომ ფედერაციაში ჩამოყალიბდა „ზონდერ ბრიგადა, რომელიც სპორტსმენებს ატერორებს“. მისივე თქმით, ამის თობაზე ბიძინა ივანიშვილსაც ესაუბრა. „კახა კალაძემ ხომ თქვა, არ ვიცი, სოსო ჯაჭვლიანი ჩვენი გუნდის წევრი არის თუ არაო, ეს მის ნამუსზე იყოს. დღეიდან, ამ წუთიდან "ქართული ოცნების წევრი მე არ ვარ. იმ ზონდერ ბრიგადის წევრი ვერასდროს ვიქნები, ღმერთმა მშვიდობაში მოგახმაროთ და ეს რეჟიმი უნდა წავიდეს. ეს რეჟიმია აბა რა არის? ბიძინა ივანიშვილმა მითხრა, რომ ფედერაციის საქმეებში ჩვენ ვერ ჩავერევითო. ჩარევა კი არა, გააჩერეთ ეს ხალხი, რომ სიმართლე დავამტკიცო. ყველა გავაფრთხილე, კალაძე არ მხვდება. ეს რეჟიმი უნდა შეიცვალოს, იმიტომ რომ რეჟიმია. ეტყობა, უნდათ, რომ ეს ზონდერ ბრიგადა, რომელიც შემომივარდა გამოიყენონ, ხალხის დასაშინებლად. ისინი მთელ ჩვენს სპორტსმენებს ატერორებენ. გადაწყვეტილი აქვთ, რომ მოაწყონ სამინისტროსთან მიტინგი, რომ სოსო ჯაჭვლიანი წავიდეს ფედერაციიდან. ვაცხადებ, რომ არანაირი დანაშაული არ მაქვს, ყველაფერი სახეზეა“,- განაცხადა ჯაჭვლიანმა ტელეკომპანია „მთავარის“ ეთერში. ცნობისთვის, 17 ოქტომბერს მკლავჭიდის ფედერაციის გამგეობის სხდომა ფიზიკური და სიტყვიერი დაპირისპირების გამო ჩაიშალა. ფედერაციის პრეზიდენტს სოსო ჯაჭვლიანს ნაკრების მწვრთნელები და მკლავჭიდელების ნაწილი დაუპირისპირდა. სხდომა "ბომონდ გარდენში" იყო დანიშნული, სადაც მისულ რამდენიმე ათეულ სპორტსმენს ადგილზე დაცვა დახვდა და სხდომაზე არ უშვებდა. მკლავჭიდელებმა სხდომაზე შესვლა მაინც შეძლეს, სადაც ფედერაციის პრეზიდენტთან ფიზიკური და სიტყვიერი დაპირისპირება მოხდა. ისინი სოსო ჯაჭვლიანს მოუწოდებდნენ, რომ თანამდებობა დაეტოვებინა. მკლავჭიდელებმა სოსო ჯაჭვლიანს წყალი შეასხეს, ასევე ისროლეს კვერცხები. სპორტსმენები სოსო ჯაჭვლიანს ერთპიროვნული გადაწყვეტილებების მიღებაში ადანაშაულებდნენ.
ბელარუსში საყოველთაო გაფიცვა დაიწყო
26 ოქტომბერს ბელარუსში საყოველთაო გაფიცვა დაიწყო. საყოველთაო გაფიცვის დაწყება ბელარუსის ოპოზიციონერმა ლიდერმა სვეტლანა ტიხანოვსკაიამ მას შემდეგ გამოაცხადა, რაც ხელისუფლებამ "სახალხო ულტიმატუმი" არ შეასრულა. გაფიცვას შეუერთდნენ სამთავრობო დაწესებულებების თანამშრომლები, მათ შორის Гродно Азот-ის, მინსკის ტრაქტორების ქარხნის, მინსკის ელექტროტექნიკური ქარხნისა და ნავთობის კომპანიის Белоруснефти-ის თანამშრომლები. გაფიცულებმა დაწესებულებების ტერიტორიაზე მსვლელობები მოაწყვეს, ზოგიერთი თანამშრომელი უბრალოდ არ მივიდა სამსახურში. სახელმწიფო დაწესებულებებთან შენიშნეს სპეციალური დანიშნულების რაზმის მანქანები. ბევრ კომპანიაში ოფიციალურად ამბობენ, რომ მუშაობას აგრძელებენ. გაფიცვას შეუერთდა სხვადასხვა კერძო კომპანიის თანამშრომელიც. ბევრმა კომპანიამ 26 ოქტომბერი დასვენების დღეს გამოაცხადა, ზოგიერთი კომპანია ტექნიკური მიზეზების გამო, მაგალითად, ინვენტარიზაციის გამო დაიხურა. მათ შორის არიან სამედიცინო ცენტრები, მაღაზიები, ბარები და კაფეები, ენების სკოლები, სავარჯიშო დარბაზები, ტურისტული კომპანიები, სილამაზის სალონები და სხვადასხვა სერვის-ცენტრები. გაფიცვაში მონაწილეობას იღებენ კავშირგაბმულობის კომპანიის MTC-ის თანამშრომლებიც, რომლებმაც საპროტესტო აქცია გამართეს. დაუდასტურებელი ინფორმაციით, მათ სამსახურიდან გათავისუფლებით დაემუქრნენ. ბელარუსის უნივერსიტეტების სტუდენტებმა რამდენიმე საპროტესტო აქცია მოაწყვეს. ზოგიერთ უნივერსიტეტში მჯდომარე პროტესტის აქცია გაიმართა. დილით, ქალაქ გროდნოში Гродно Азот-თან გაფიცული თანამშრომლების მიერ გამართული აქციის დროს 32-მდე ადამიანი დააკავეს. დაკავებების გამო ქარხნის თანამშრომლების ნაწილმა სამსახურში გამოცხადებაზე უარი თქვა. სვეტლანა ტიხანოვსკაიამ კერძო ბიზნესს, რელიგიურ ორგანიზაციებს, კულტურულ, სპორტულ ორგანიზაციებსა და IT-კომპანიებს მოუწოდა მონაწილეობა მიეღოთ გაფიცვაში. "სახელმწიფო დაწესებულებების გაფიცვა ეს ეკონომიკური წნეხის ბერკეტია. ხოლო კერძო კომპანიების გაფიცვა - თითოეულისთვის თითოეულის სოლიდარობის გამოხატვაა, რაც არანაკლებ მნიშვნელოვანია. ადამიანებმა, რომლებმაც გაბედეს გაფიცვა, უნდა დაინახონ, რომ თავის გადაწყვეტილებაში ისინი მარტო არ არიან". – თქვა ტიხანოვსკაიამ. ბელარუსის ოპოზიციის ლიდერმა სვეტლანა ტიხანოვსკაიამ სამშაბათს, 13 ოქტომბერს, ალექსანდრ ლუკაშენკოს ულტიმატუმი წაუყენა. ულტიმატუმის თანახმად, თუ 25 ოქტომბრამდე ალექსანდრ ლუკაშენკო არ გადადგება, არ შეწყდება დემონსტრანტებზე ძალადობა და არ გაათავისუფლებენ ყველა პოლიტპატიმარს, 26 ოქტომბრიდან ქვეყანაში მასობრივი გაფიცვა დაიწყება. ტიხანოვსკაიას თქმით, ეს სახალხო ულტიმატუმია. საპროტესტო აქციები ბელარუსში ორი თვეა, გრძელდება. დემონსტრაციები 9 აგვისტოს ჩატარებული საპრეზიდენტო არჩევნების შემდეგ დაიწყო, მოსახლეობა არჩევნების შედეგებს აპროტესტებს. არჩევნების შედეგების თანახმად ალექსანდრ ლუკაშენკო ბელარუსის პრეზიდენტი მეექვსე ვადით გახდა. მან ხმების 80%-ზე მეტი მოაგროვა. ბელარუსის ცეესკოს მონაცემების თანახმად სვეტლანა ტიხანოვსკაიამ ხმების 10% დააგროვა. ოპოზიცია არჩევნების შედეგებს არ ცნობს და ხელახალი არჩევნების ჩატარებას მოითხოვს. აქციების დაწყების შემდეგ ქვეყანაში 12 000-ზე მეტი ადამიანი დააკავეს.
პაკისტანის პრემიერმინისტრმა Facebook-ს ისლამოფობური კონტენტის აკრძალვა სთხოვა
პაკისტანის პრემიერმინისტრმა იმრან ხანმა Facebook-ის დამფუძნებელს, მარკ ცუკერბერგს წერილი მისწერა და ისლამოფობური კონტენტის აკრძალვა სთხოვა. წერილში ხანი ამბობს, რომ "მზარდი ისლამოფობია" სიძულვილს, ექსტრემიზმსა და ძალადობას უწყობს ხელს. Facebook-ზე სიძულვილის ენის შემცველი პოსტების წაშლის პოლიტიკა უკვე არსებობს. საიტი სიძულვილის ენას განმარტავს ძალადობრივი ენით ან დამაზიანებელი სტერეოტიპებით პირდაპირ შეტევად ადამიანებზე რასის, ეთნიკური და ეროვნული წარმომავლობისა და აღმსარებლობის გამო. Twitter-ზე გამოქვეყნებულ წერილში იმრან ხანმა მაგალითად მოიყვანა Facebook-ის გადაწყვეტილება ეკრძალა კონტენტი, რომელიც უარყოფს ჰოლოკოსტს და მის შესახებ დეზინფორმაციას ავრცელებს. ხანმა სოცმედია საიტს მოუწოდა, მსგავსი პოლიტიკა გაეტარებინა ანტი-ისლამური კომენტარების მიმართაც. იმრან ხანმა აღნიშნა, რომ არ შეიძლება სიძულვილის გზავნილები ზოგიერთის წინააღმდეგ მიუღებელი იყოს, ხოლო ზოგიერთის წინააღმდეგ - მისაღები. სულ რაღაც ერთი დღის წინ, პაკისტანის პრემიერმინისტრმა საფრანგეთის პრეზიდენტს ემანუელ მაკრონს ისლამზე თავდასხმაში დასდო ბრალი. ხანის კომენტარი დაკავშირებულია ფრანგი მასწავლებლის მკვლელობის შემდეგ მაკრონის სიტყვებთან. "ის სწორედ იმიტომ მოკლეს, რომ რესპუბლიკას განასახიერებდა. ის მოკლეს, რადგან ისლამისტებს ჩვენი მომავალი უნდათ. მათ იციან, მისი მსგავსი ჩუმი გმირებით, ისინი ამას ვერ მიიღებენ." - თქვა მაკრონმა. 47 წლის ისტორიის მასწავლებელს, სამუელ პატის, გამოხატვის თავისუფლების გაკვეთილზე მოსწავლეებისთვის მუჰამედის კარიკატურის ჩვენების გამო, წარმოშობით ჩეჩენმა, 18 წლის აბდულა ანზოროვმა, 16 ოქტომბერს თავი მოჰკვეთა. ირმან ხანმა მაკრონს Twitter-ზე გამოეხმაურა. "სამწუხაროა, რომ მაკრონმა ისლამზე და არა ძალადობის ჩამდენ ტერორისტებზე თავდასხმით გადაწყვიტა ისლამოფობიის წაქეზება" - წერს ხანი. მუჰამედის გამოსახვა ისლამში ტაბუა. თუმცა სეკულარიზმი ფრანგული ეროვნული იდენტობის ერთერთი ძირეული ფასეულობაა. სახელმწიფო პოზიციის თანახმად გამოხატვის თავისუფლება რომელიმე ჯგუფის გრძნობების დასაცავად არ უნდა შეიზღუდოს. ეს არ არის პირველი შემთხვევა, როდესაც პაკისტანმა Facebook-ს საიტზე განთავსებული კონტენთან დაკავშირებით მიმართა. 2017 წელს იმ დროისთვის ქვეყნის პრემიერმინისტრმა ნავაზ შარიფმა Facebook-ს "მკრეხელური კონტენტის" გამოძიება სთხოვა. გაურკვეველია, კონკრეტულად რა შინაარსის პოსტებს გულისხმობდა შარიფი. კრიტიკოსთა აზრით ქვეყანაში არსებული მკრეხელობის ამკრძალავი კანონები, რომლებიც გარკვეულ შემთხვევებში სიკვდილით დასჯის საფუძველს იძლევა, ხშირად უმცირესობების ჩაგვრისთვის გამოიყენება.
საქართველო აზერბაიჯანისა და სომხეთისთვის საკუთარ შეთავაზებას დღის წესრიგში ტოვებს
ჩვენი პოზიცია არის მიმართული რეგიონში სტაბილური მშვიდობის დასამყარებლად. პირველი დღიდან ჩვენი მოწოდება იყო, მომხდარიყო სიტუაციის დეესკალაცია, საქართველომ შესთავაზა მხარეებს თბილისი, როგორც ადგილი მოლაპარაკებისთვის, – ამ განცხადებით ეხმიანება საქართველოს საგარეო საქმეთა მინისტრი დავით ზალკალიანი ამერიკელი გენერლის ფილიპ ბრიდლავის სტატიას. ზალკალიანის თქმით, საქართველოს აზერბაიჯანთან და სომხეთთან კეთილმეზობლური ურთიერთობა სურს. „ეს შეთავაზება მუდმივად არის დღის წესრიგში. ნებისმიერ დროს, როდესაც ჩვენს მეზობლებს ამის სურვილი იქნებათ, მზად ვართ, ვუმასპინძლოთ. კარგად მოგეხსენებათ, რომ ის მყიფე მშვიდობა, რომელიც პერიოდულად მიიღწევა ცეცხლის შეწყვეტის შესახებ შეთანხმებით აუცილებადია იყოს განგრძობადი. ამას ჭირდება რეგიონში სტაბილურობა. ჩვენ უსაფრთხოების საბჭოს ფარგლებში შევიკრიბეთ და კიდევ ერთხელ გამოვაცხადეთ, რომ გვსურს ორივე ქვეყანასთან, აზერბაიჯანთან ჩვენს სტრატეგიულ პარტნიორთან და სომხეთთან, კეთილმეზობლური ურთიერთობა. აქედან გამომდინარე და იმ ფაქტის გათვალისწინებით, რომ ორივე ეროვნების მოქალაქეები საუკუნეებია თანაცხოვრობენ საქართველოში, მნიშვნელოვანია მთლიანად რეგიონი გამოვიდეს ამ სიტუაციიდან. არ არსებობს მსოფლიოში იმაზე უფრო ძლიერი, როგორც ეკონომიკური ისე რესურსული თვალსაზრისით და გეოპოლიტიკური მნიშვნელობით, როგორც სამხრეთ კავკასია. თუ სამხრეთ კავკასიაში გრძელვადიანი მშვიდობა დამყარდა, ამით მოიგებს ყველა. როგორც რეგიონი, ასევე რეგიონს მიღმა ყველა ძირითადი ძალა“, – განაცხადა დავით ზალკალიანმა. ცნობისთვის: მთიან ყარაბარში აქტიური საბრძოლო მოქმედებები 27 სექტემბრიდან განახლდა. მხარეები რამდენჯერმე შეთანხმდნენ ცეცხლის შეწყვეტაზე, მათ შორის მოსკოვსა და აშშ–ში, თუმცა ერთმანეთის შეთანხმების დარღვევაში მალევე დაადანაშაულეს.
თურქეთის საელჩო განმარტავს, რომ მუშაობა არ შეუჩერებია
საქართველოში თურქეთის საელჩო განმარტავს, რომ თბილისში მუშაობა არ შეუჩერებია, - ამის შესახებ საელჩოს მიერ გავრცელებულ განცხადებაშია ნათქვამი. კერძოდ, როგორც საელჩოს ახალ განცხადებაშია ნათქვამი, 24 ოქტომბრის ინფორმაციაში აღნიშნული იყო, რომ საქართველოში Covid 19-ის შემთხვევების მატების გამო, პრევენციის მიზნით, საკონსულო განყოფილება აჩერებდა მუშაობას შემდგომი განცხადების გაკეთებამდე. "ზოგიერთ მედიაში ინფორმაცია ისე იყო წარმოჩენილი, თითქოს საელჩო საერთოდ აჩერებდა მუშაობას. ჩვენი საელჩო აგრძელებს მუშაობას. განცხადება ეხება მხოლოდ არა სასწრაფო საკითხებს", - ნათქვამია განცხადებაში.
თვითიზოლაციაში მყოფ პირებს გადასატანი საარჩევნო ყუთის მოთხოვნის ვადა გაუხანგრძლივდათ
ცენტრალური საარჩევნო კომისიის მიერ, 45-ე დადგენილებაში ცვლილება შევიდა. ცვლილებების თანახმად, თვითიზოლაციაში მყოფ ამომრჩევლებს დამატებით ერთი დღე ეძლევათ, რათა დარეკონ ცესკო-ს სატელეფონო საინფორმაციო ცენტრში და გადასატანი საარჩევნო ყუთის მომსახურება მოითხოვონ. კერძოდ, ცვლილებების თანახმად, თვითიზოლაციაში მყოფ პირებს გადასატანი საარჩევნო ყუთის მოთხოვნა 27 ოქტომბრის დილის 10:00 საათიდან შუადღის 14:00 საათამდე შეეძლებათ. ცნობისთვის: 26 ოქტომბრის მდგომარეობით, თვითიზოლაციაში 27 736 პირი იმყოფება.
რა ტენდენციები შეინიშნება სოციალურ მედიაში წინასაარჩევნოდ – ანგარიში
ორგანიზაცია "სამართლიანი არჩევნები და დემოკრატიის საერთაშორისო საზოგადოება" სოციალური მედიის II შუალედური მონიტორინგის ანგარიშს აქვეყნებს, რომელშიც ძირითადი დენტენციებია გამოკვეთილი. კერძოდ, ანგარიში, რომელიც 1 სექტემბრიდან 10 ოქტომბრის ჩათვლით პერიოდს მოიცავს, აღნიშნულია, რომ შეინიშნება პოლარიზების წამახალისებელი, მედიის და ოპოზიციის მადისკრედიტებელი გვერდების, ჯგუფებისა და ცრუ მედიების "ფეისბუქ"–გვერდების აქტიურობა. ISFED-მა 900-ზე მეტი ფეისბუქ გვერდი და 11 469 პოსტი გააანალიზა. ანგარიშის თანახმად, საანგარიშო პერიოდში აქტიურობს: ღირებულებით საკითხებზე საზოგადოების პოლარიზების წამახალისებელი 69 გვერდი;ოპოზიციის ღიად მადისკრედიტირებელი 36 გვერდი;მმართველი პარტიისა და ხელისუფლების ღიად მადისკრედიტირებელი 30 გვერდი;ხელისუფლების სასარგებლოდ მოქმედი ცრუ მედიის 9 გვერდი;ოპოზიციური პარტიების მხარდამჭერი 18 გვერდი;ხელისუფლების მხარდამჭერი 17 გვერდი.დაკვირვების ქვეშ იყო „პატრიოტთა ალიანსის“ სასარგებლოდ მოქმედი არაანონიმური 10 გვერდიც. ასევე, სამართლიანი არჩევნები აკვირდებოდა პოლიტიკური პარტიების 354 და მაჟორიტარი დეპუტატობის კანდიდატების 195 Facebook-გვერდს. მონიტორინგი მოიცავდა ადგილობრივი თვითმმართველობების 170 ოფიციალურ გვერდსაც. ორგანიზაციაში აცხადებენ, რომ პოლარიზების წამახალისებელი გვერდები წინასაარჩევნო კამპანიაში აქტიურად არიან ჩართულები პრორუსულად განწყობილი აქტორების სასარგებლოდ. 69 გვერდი, ღირებულებითი თემებით მანიპულირების მეშვეობით, საარჩევნო სუბიექტების: "პატრიოტთა ალიანსის", "ქართული მარშის", "ქართული იდეის", პრიმაკოვის ფონდის დირექტორის – დიდუბე-ჩუღურეთის მაჟორიტარობის კანდიდატის დიმიტრი ლორთქიფანიძისა და გლდანის მაჟორიტარობის კანდიდატის ზვიად ტომარაძის სასარგებლო აგიტაციას ეწევა. ისინი ასევე ანტილიბერალურ, ანტიდასავლურ, ქსენოფობიურ და ჰომოფობიურ განწყობებს ავრცელებენ. ვრცელდება პრორუსული ნარატივიც. ასევე, ISFED-ის განცხადებით, საანგარიშო პერიოდში "ფეისბუქზე" ორგანიზებული ანონიმური დისკრედიტაციის მიზნით 66 გვერდი მოქმედებდა. მათგან 36 ოპოზიციის (გარდა "პატრიოტთა ალიანსისა"), კრიტიკული მედიების, სამოქალაქო აქტივისტებისა და არასამთავრობო ორგანიზაციების წინააღმდეგ იყო მიმართული. 30 გვერდი, ძირითადად, "ქართული ოცნების" დისკრედიტაციას ემსახურებოდა, თუმცა, რიგ შემთხვევაში მათი პოსტები ზოგიერთი ოპოზიციური პარტიის წინააღმდეგაც მოქმედებდა, გარდა "ძალა ერთობაშია"–ში შემავალი პარტიებისა. "სამართლიანი არჩევნები" აღნიშნავს, რომ ხელისუფლების წინააღმდეგ მოქმედი დისკრედიტაციული გვერდები უფრო მეტი "პოსტს" ავრცელებენ, მაგრამ ოპოზიციის წინააღმდეგ მიმართული პოსტების ჯამური ინტერაქცია უფრო მაღალია: 1 სექტემბრიდან 10 ოქტომბრის ჩათვლით, ოპოზიციის წინააღმდეგ მოქმედ, ანონიმურ დისკრედიტაციულ და ცრუ მედიის გვერდებზე ჯამში 1,725 პოსტი გამოქვეყნდა. ხოლო, „ქართული ოცნების“ საწინააღმდეგოდ 2,120 პოსტი. „სამართლიანმა არჩევნებმა“ ოპოზიციის საწინააღმდეგოდ მიმართული 65 დასპონსორებული პოსტი აღმოაჩინა, „ქართული ოცნების“ წინააღმდეგ კი 8 დასპონსორებული პოსტი. რაც შეეხება მედიებს, "ფეისბუქზე" თავდასხმის ობიექტები არიან "მთავარი არხი", "ტვ პირველი" და "ფორმულა". ანგარიშის მიხედვით, „მთავარი არხის“ დისკრედიტაცია, ძირითადად დავით–გარეჯის საქმესთან დაკავშირებით საკითხების გაშუქებას მიემართებოდა და გაისმოდა ბრალდებები საკითხის შერჩევითად და პარტიულ კონტექსტში გაშუქების შესახებ. ტელეკომპანია "იმედი" დისკრედიტაციის სამიზნე იყო გავრცელებული აუდიოჩანაწერების გამო, რომელშიც ნიკა ლალიაშვილის და ტელეკომპანია "მაესტროს" ყოფილი თანამშრომლების ლაპარაკია გადმოცემული. ანგარიშის მიხედვით, საანგარიშო პერიოდში Facebook-ზე 9 ცრუ მედია გვერდი მოქმედებდა, რომლებიც პროსახელისუფლებო და ოპოზიციის საწინააღმდეგო პოსტებს აქვეყნებდა. ცრუ მედიის 9 გვერდზე სულ 403 პოსტი გამოქვეყნდა, რომელთაგან ISFED-მა 7 დასპონსორებული პოსტი აღმოაჩინა. ანგარიშის თანახმად, "ფეისბუქზე" კვლავ ორგანიზებულად მოქმედებს როგორც ხელისუფლებისა და მმართველი პარტიის, ისე ოპოზიციური პარტიების მხარდამჭერი გვერდები. ოპოზიციის მხარდასაჭერად 18 Facebook გვერდი მოქმედებდა, რომლებმაც ჯამში 137 708 გამომწერი ჰყავთ. ხელისუფლების მხარდასაჭერად 17 გვერდი მოქმედებს, 430 851 გამომწერით. ISFED აღნიშნავს, რომ "ქართული ოცნების" მხარდამჭერი გვერდების პოსტების რაოდენობა და ინტერაქცია მნიშვნელოვნად აჭარბებს ოპოზიციის მხარდამჭერი გვერდებისას, ხოლო ინტერაქციების რაოდენობის სხვაობა სავარაუდოდ დაკავშირებულია პოსტების დასპონსორებასთან, რისი მეშვეობითაც კონკრეტულ პოსტს ბევრად მეტი მომხმარებელი ნახულობს. ანგარიშის მიხედვით, წინასაარჩევნო პერიოდში „ფეისბუქზე“ და „ინსტაგრამზე“ პარტიების და კანდიდატების მიერ გამოქვეყნებული პოლიტიკური რეკლამისთვის პოლიტიკურმა აქტორებმა 120 ათას აშშ დოლარზე მეტი დახარჯეს. 177 ოფიციალურ გვერდზე 4 925 რეკლამა გამოაქვეყნდა, ძირითადად დეკლარირებული სახით. ამასთან, ISFED-ის მონიტორებმა 147 აქტიური არადეკლარირებული პოლიტიკური რეკლამა აღმოაჩინეს, რომელიც პლატფორმის წესების მიხედვით გასაჩივრდა. იმის მიუხედავად, რომ პრაქტიკულად ყველა ეს რეკლამა პოლიტიკური კანდიდატის ან საკითხის შესახებ შინაარსის გამომხატველი იყო და დარღვევით გამოქვეყნდა, მხოლოდ 23-ის მოქმედება შეჩერდა. საანგარიშო პერიოდში გამოვლინდა 184 ჯგუფი, რომლებიც სხვადასხვა პოლიტიკური პარტიების მხარდაჭერის მიზნით მოქმედებს. ყველაზე მაღალი ინტერაქციის მქონე მხარდამჭერ ჯგუფებად გამოვლინდნენ ენმ-ის და "ქართული ოცნების" სასარგებლოდ მოქმედი ჯგუფები. წინასაარჩევნო მოწოდებები და პოლიტიკური დისკუსია „ფეისბუქ“ ჯგუფებშიც მიმდინარეობს. საანგარიშო პერიოდში გამოვლინდა 184 ჯგუფი, რომლებიც სხვადასხვა პოლიტიკურ პარტიების მხარდაჭერის მიზნით მოქმედებს. ყველაზე მაღალი ინტერაქციის მქონე მხარდამჭერ ჯგუფებად გამოვლინდნენ "ერთიანი ნაციონალურ მოძრაობის" და "ქართული ოცნების" სასარგებლოდ მოქმედი ჯგუფები. პარტიებთან ოფიციალურად აფილირებული ჯგუფების გარდა, "ფეისბუქზე" მოქმედებენ მადისკრედიტირებელი ჯგუფები. ისინი ძირითად "ქართული ოცნების" და "ერთიანი ნაციონალური მოძრაობის" წინააღმდეგ მოქმედებდნენ. ექვსი საჯარო ჯგუფი ეწევა ყველა პარტიის დისკრედიტაციას, გარდა "პატრიოტთა ალიანსისა". ISFED-ის სოციალური მედიის მონიტორინგი, ძირითადად, მოიცავს სამ მთავარ მიმართულებას: პოლიტიკური პარტიების, მათი ლიდერების, კანდიდატების, ასევე, სხვადასხვა საჯარო ინსტიტუტების თუ მუნიციპალიტეტის ორგანოების სოციალური მედიის ოფიციალური გვერდების მონიტორინგს, ცალკეული საჯარო მოხელეების სოციალურ მედიაში საარჩევნო პერიოდში აქტივობის მონიტორინგს;პოლიტიკური მიზნით მოქმედი ანონიმური გვერდების/ჯგუფების/აქტორების მონიტორინგს, მათ შორის - პოლიტიკური დისკრედიტაციის კამპანიების, ანონიმური და ცრუ მხარდაჭერის, ცრუ მედიის მონიტორინგს;ღირებულებით საკითხებზე საზოგადოების პოლარიზების წამახალისებელი და დეზინფორმაციული გზავნილების გამავრცელებელი გვერდების/ჯგუფების მონიტორინგს.
ცესკო თვითიზოლაციაში მყოფებს აქტიურობისკენ მოუწოდებს
ცენტრალური საარჩევნო კომისია (ცსკ) კიდევ ერთხელ მიმართავს თვითიზოლაციაში მყოფ ამომრჩევლებს იაქტიურონ, დარეკონ ცესკოს სატელეფონო-საინფორმაციო ცენტრში და მოითხოვონ გადასატანი საარჩევნო ყუთით მომსახურება. "იმისათვის, რომ თვითიზოლაციაში მყოფმა პირებმა შეძლონ არჩევნებში მონაწილეობის მიღება და საკუთარი კონსტიტუციური უფლების რეალიზება, ცესკოში უკვე მესამე დღეა გამართულად და სრული დატვირთვით მუშაობს სატელეფონო-საინფორმაციო ცენტრი და 25 ოპერატორი დილის 10:00 სთ-დან 22:00 სთ-მდე აფიქსირებენ მოქალაქეების მოთხოვნებს. შესაბამისი უწყების მიერ გადმოცემული მონაცემების მიხედვით, 25 ოქტომბრის მდგომარეობით დაახლოებით 9000-მდე პირია რეგისტრირებული ბაზაში, რომლებიც არიან საარჩევნო ასაკის მქონე და კენჭისყრის დღისთვის იქნებიან თვითიზოლაციაში. ამასთან, აღნიშნული მონაცემები 26 ოქტომბრის მდგომარეობით დამატებით განახლდება. აღსანიშნავია, რომ მოცემული დროისთვის გადასატანი საარჩევნო ყუთის მოთხოვნით ცესკოს სატელეფონო-საინფორმაციო ცენტრს მომართა 1500-ზე მეტმა ამომრჩეველმა და ამ წუთებშიც გრძელდება ზარების მიღება. შეგახსენებთ, რომ ცესკოს სატელეფონო-საინფორმაციო ცენტრისთვის მომართვისა და ოფიციალური მოთხოვნის დაფიქსირების შემთხვევაში, გადასატანი საარჩევნო ყუთით სარგებლობას შეძლებენ თვითიზოლაციაში მყოფი ის ამომრჩევლები, რომელთა მონაცემებიც ოფიციალურად ფიქსირდება შესაბამისი უწყების მონაცემთა ბაზაში. შეგახსენებთ, რომ თვითიზოლაციაში მყოფი ამომრჩევლების მაქსიმალურად ინფორმირების მიზნით, საარჩევნო ადმინისტრაცია აწარმოებს აქტიურ საინფორმაციო კამპანიას. ამ დრომდე, ცესკომ შესაბამისი უწყების მონაცემთა ბაზაში რეგისტრირებულ 7000-მდე ამომრჩეველს გაუგზავნა სატელეფონო შეტყობინებები. აღსანიშნავია, რომ სატელეფონო შეტყობინება ეგზავნება ყველა პირს, რომელთაც მითითებული აქვთ საკონტაქტო ინფორმაცია. მნიშვნელოვანია, რომ სპეციალური უბნებისა და მისამართების მიხედვით გადანაწილდებიან თვითიზოლაციაში მყოფი პირები, რომელთა მოთხოვნა შეესაბამება გადასატანი ყუთით მომსახურების კრიტერიუმებს. შემდგომში ცესკოს განკარგულებით მტკიცდება ამომრჩეველთა სპეციალური სიები და აღნიშნული ამომრჩევლებისთვის რაოდენობის შესაბამისად დაიბეჭდება ბიულეტენები, რომლებიც კენჭისყრის დღემდე მიეწოდება საქართველოს მასშტაბით ყველა სპეციალურ უბანს. საარჩევნო ადმინისტრაცია შეახსენებს თვითიზოლაციაში მყოფ პირებს, რომ გადასატანი საარჩევნო ყუთის მოთხოვნის ვადა დღეს, 22:00 საათზე იწურება. შესაბამისად, კიდევ ერთხელ მივმართავთ მათ, დარეკონ ცესკოს სატელეფონო-საინფორმაციო ცენტრში ტელეფონის ნომერზე 2-51-00-51 (0) და დროულად მოითხოვონ გადასატანი საარჩევნო ყუთით მომსახურება", აღნიშნულია ცსკ–ის მიერ გავრცელებულ ინფორმაცია.
მიტროპოლიტი სტეფანე COVID-19–ით დაინფიცირდა
ცაგერისა და ლენტეხის ეპარქიის მიტროპოლიტ სტეფანეს კორონავირუსი დაუდგინდა. საპატრიარქოს საზოგადოებასთან ურთიერთობის ხელმძღვანელის ანდრია ჯაღმაიძეს თქმით, მიტროპოლიტ სტეფანესთან კორონავირუსი უსიმპტომოდ მიმდინარეობს. მიტროპოლიტი სტეფანე ერთერთია იმ მღვდელმთავრებს შორის, რომელიც გაზაფხულზე ახალი კორონავირუსის ეპიდემიის ფონზე ღვთისმსახურების შეწყვეტასა და ზიარების წესის ცვლილებას ეწინააღმდეგებოდა. გასული დღე–ღამის განმავლობაში საქართველოში კორონავირუსის 1 872 ახალი შემთხვევა გამოვლინდა, გარდაიცვალა 14 პაციენტი, ხოლო გამოჯანმრთელდა კიდევ 603 ადამიანი. ამრიგად, პანდემიის დაწყებიდან დღემდე ქვეყანაში ახალი ტიპის ვირუსის 30 303 შემთხვევაა რეგისტრირებული, მათგან 215 პაციენტი გარდაიცვალა, ხოლო 11 370 პირი გამოჯანმრთელდა. გარდა ამისა, კარანტინის რეჟიმში რჩება 3769 პირი, სტაციონარში მეთვალყურეობის ქვეშ – 3 832, კოვიდ–სასტუმროებში – 2 249, თვითიზოლაციაში – 27 736.
"საქართველო მზად არის, ხელი შეუწყოს მთიანი ყარაბაღის კონფლიქტის მოგვარებას"
ამერიკული გამოცემა NPR აქვეყნებს აშშ–ის შეიარაღებული ძალების ევროპული სარდლობის ყოფილი მეთაურის, გენერალი ფილიპ ბრიდლავის სტატიას სახელწოდებით "აშშ-ს მთიანი ყარაბაღის კონფლიქტის იგნორირების ფუფუნება არ აქვს“. "საპრეზიდენტო არჩევნების მოლოდინში ბევრი ამერიკელისთვის შეუმჩნევლად დარჩა ის ფაქტი, რომ სამხრეთ კავკასიაში მთიანი ყარაბაღის სადაო რეგიონთან დაკავშირებით კონფლიქტმა ხელახლა იფეთქა. სექტემბრის ბოლოდან მოყოლებული სომხეთი და აზერბაიჯანი ჩართულნი არიან უპრეცედენტოდ გამანადგურებელ ბრძოლებში, რომელთა მსგავსიც მათ წლების განმავლობაში არ უნახავთ. ამ კონფლიქტს, რომელშიც გამოყენებულია ჯავშანტრანსპორტიორები, ქვეითი დანაყოფები, არტილერია და იარაღით აღჭურვილი დრონები, უკვე ასობით ადამიანის სიცოცხლე შეეწირა“,- წერს ბრიდლავი. როგორც გენერალი აღნიშნავს, "ბევრი ამერიკელი ვერ ხვდება, რომ რეგიონზე სერიოზული უარყოფითი გავლენის გარდა, აქ სასწორზე აშშ-ის ინტერესებიც დევს, მათ შორის ენერგორესურსების და სამხრეთ კავკასიაში სტაბილურობის კუთხით". მისი თქმით, "კატასტროფის თავიდან ასაცილებლად, ამერიკის შეერთებულმა შტატებმა უფრო აქტიურ დიპლომატიას უნდა მიმართოს". ფილიფ ბრიდლავი მიიჩნევს, რომ "საქართველოს პროგრესი დასავლური ღირებულებებისკენ მიმავალ გზაზე და ქვეყნის მტკიცე მხარდაჭერა ნატო–ს მიმართ ავღანეთში ადასტურებს ამერიკის ძალისხმევის მიზანშეწონილობას და დღეს საქართველო მზად არის, ხელი შეუწყოს მთიანი ყარაბაღის კონფლიქტის მოგვარებას და იყოს ამ პროცესის ნაწილი": "სამხრეთ კავკასიაში განლაგებულია არსებითი მნიშვნელობის ენერგეტიკული და სატრანსპორტო ინფრასტრუქტურა. სადენებს, რომლებითაც საქართველოსა და თურქეთის გავლით ევროპისკენ მიედინება კასპიის ბუნებრივი აირი და ნავთობი, უდიდესი მნიშვნელობა აქვს რუსეთზე ევროპის ენერგოდამოკიდებულების შემცირების თვალსაზრისით. ბაქო-თბილისი-ყარსის რკინიგზა მნიშვნელოვან როლს ასრულებს ავღანეთში ნატოს ტვირთების გადაზიდვაში. შესაბამისად, ამ კრიტიკული ინფრასტრუქტურის დაკარგვა ან დაზიანება მნიშვნელოვან დარტყმას მიაყენებს აშშ-ის ინტერესებს. განახლებული კონფლიქტი ზიანს მიაყენებს არა მხოლოდ მასში ჩართულ მხარეებს, რომლებსაც სამხედრო წვლილი აქვთ შეტანილი ავღანეთში ამერიკის ძალისხმევაში, არამედ საქართველოსაც - აშშ-ის ახლო მოკავშირეს, რომლის წარმატებაც მნიშვნელოვანწილადაა დამოკიდებული რეგიონის სტაბილურობაზე. შესაძლებელია, რომ განვითარდეს კიდევ ერთი, უფრო შემაშფოთებელი სცენარი. თუკი კონფლიქტი კიდევ უფრო გამძაფრდა, დიდი ალბათობით, მოსალოდნელია რუსეთის სამხედრო ჩარევა, რასაც გავლენა ექნება ფართო რეგიონზე. რუსეთს საგრძნობი სამხედრო ძალები ჰყავს განლაგებული სომხეთში და მას ერევანთან გაფორმებული აქვს სამხედრო შეთანხმება. ჯერჯერობით რუსეთი თავს იკავებს კონფლიქტში უშუალოდ ჩართვისგან. ნაცვლად ამისა, მან ორჯერ მოუწოდა ცეცხლის შეწყვეტისკენ, თუმცა ორივეჯერ ეს წამოწყება თითქმის იმთავითვე ჩაიშალა. თურქეთი, რომელიც მხარს უჭერს ეთნიკურად მონათესავე აზერბაიჯანელებს, სამხედრო დახმარებას უწევს ბაქოს და ფრონტის ხაზზე აგზავნის სირიელ დაქირავებულ მებრძოლებს. დაბოლოს, ირანი, რომელიც ესაზღვრება როგორც სომხეთს, ისე აზერბაიჯანს. ირანის ჩრდილოეთ პროვინციებში ცხოვრობს მილიონობით ეთნიკური აზერბაიჯანელი. შესაბამისად, ირანიც იოლად შეიძლება ჩაერთოს ამ კონფლიქტში. ამგვარად, რეგიონის სამი მთავარი ძალის ნელ-ნელა ჩათრევა ამ კონფლიქტში ჩვენთვის მიუღებელი უნდა იყოს. რეგიონში უფრო ფართომასშტაბიანი კონფლიქტის რისკი უბრალოდ ძალიან მაღალია“. ამერიკის შეერთებული შტატების შეიარაღებული ძალების ევროპული სარდლობის ყოფილი მეთაური აცხადებს, რომ "დასავლეთის რეაგირება აყოვნებს და მისი ჩართულობა ლეთარგიას უფრო ჰგავს": "მიუხედავად იმისა რომ რუსეთმა, საფრანგეთმა და ამერიკის შეერთებულმა შტატებმა (ეუთოს მიერ 1992 მთიან ყარაბაღთან დაკავშირებული დავის გადასაწყვეტად შექმნილი მინსკის ჯგუფის წევრი ქვეყნები) გამოაქვეყნეს ერთობლივი განცხადება, რომელშიც გაჟღერებულია მოწოდება ცეცხლის შეწყვეტისკენ, ამერიკის შეერთებული შტატები, დიპლომატიური თვალსაზრისით, მოწყვეტილია რეგიონს, რაც ასუსტებს მის პოზიციას და ზღუდავს მის უნარს, მიაღწიოს რეალურ პროგრესს მიმდინარე კონფლიქტთან მიმართებაში". ,,სამხრეთ კავკასია ყოფილი საბჭოთა კავშირის ტერიტორიაზე ერთ-ერთი ყველაზე ფეთქებადი რეგიონია და, დიდი ალბათობით, ასეთად დარჩება უახლოეს მომავალშიც. 3 კონფლიქტი: მთიან ყარაბაღში, აფხაზეთსა და სამხრეთ ოსეთში აქამდე „მიძინებული“ იყო, თუმცა ბოლო დროს გაჩაღებულმა შეტაკებებმა დაგვანახა, რომ დაძაბულობა ნებისმიერ მომენტში შეიძლება გადაიზარდოს აფეთქებაში. შემდგომი ესკალაციის პრევენცია უნდა იყოს სამხრეთ კავკასიაში აშშ-ის პოლიტიკის პრიორიტეტი. ჩვენ უმაღლეს შეფასებას ვაძლევთ სახელმწიფო მდივნის, მაიკ პომპეოს მცდელობას, ვაშინგტონში კონსულტაციებისთვის თავი მოუყაროს კონფლიქტში მონაწილე მხარეების საგარეო საქმეთა მინისტრებს. ეს დასაწყისია, მაგრამ მეტი უნდა გაკეთდეს“,- წერს გენერალი. ფილიპ ბრიდლავის თქმით, "თითქმის 25 წლის განმავლობაში ამერიკის შეერთებული შტატები ძალ-ღონეს არ იშურებს სამხრეთ კავკასიაში სტაბილურობის შესანარჩუნებლად და ამერიკამ მხარი დაუჭირა საქართველოს, სომხეთის და აზერბაიჯანის დამოუკიდებლობას და მათ სწრაფვას ევროატლანტიკურ ინსტიტუტებში ინტეგრაციასთან დაკავშირებით". გენერალი აღნიშნავს, რომ დასავლელმა ლიდერებმა სერიოზულად უნდა განიხილონ ეს შეთავაზება და დააფასონ რეგიონში სანდო ქვეყნის ძალისხმევა კონფლიქტის გადაჭრასთან დაკავშირებით: ,,რეგიონში აშშ-ის ჩართულობას მნიშვნელოვნად განსაზღვრავს მრავალრიცხოვანი სომხური დიასპორა ამერიკაში, რეგიონული ენერგეტიკული პროექტები, ასევე რეგიონის მზარდი პოლიტიკური კავშირები საქართველოსთან. ხსენებულმა ძალისხმევამ უკვე მოიტანა ხელშესახები შედეგები. საქართველოს პროგრესი დასავლური ღირებულებებისკენ მიმავალ გზაზე და ქვეყნის მტკიცე მხარდაჭერა ნატო–ს მიმართ ავღანეთში ადასტურებს ჩვენი ძალისხმევის მიზანშეწონილობას. დღეს საქართველო მზად არის, ხელი შეუწყოს მთიანი ყარაბაღის კონფლიქტის მოგვარებას და იყოს ამ პროცესის ნაწილი. დასავლელმა ლიდერებმა სერიოზულად უნდა განიხილონ ეს შეთავაზება და დააფასონ რეგიონში სანდო ქვეყნის ძალისხმევა კონფლიქტის გადაჭრასთან დაკავშირებით. აშშ-ის აქტიურ დიპლომატიას არსებითი მნიშვნელობა აქვს მინსკის პროცესის მეშვეობით კონფლიქტის დეესკალაციის და ამ პროცესში ყველა ჩართულ მხარესთან მუშაობის თვალსაზრისით. დიდი ალბათობით, ასევე გადამწყვეტი მნიშვნელობა აქვს მტკიცე მხარდაჭერას ისეთი სანდო მოკავშირისა და პარტნიორის ადგილობრივი ინიციატივების და ლიდერობის მიმართ, როგორიც საქართველოა“.
„საბოლოოდ საქართველო იძულებული გახდება, ჩინეთსა და დასავლეთს შორის არჩევანი გააკეთოს“
ჩინეთმა იმედი გაუცრუა ქართველ ლიდერებს, რომლებიც იმედოვნებდნენ, რომ მათ სუპერ ძალებს შორის ბალანსის დაცვა შეეძლოთ. ჩინეთ-საქართველოს ურთიერთობებში იმედგაცრუება იზრდება. „ერთი სარტყელი – ერთი გზის ინიციატივისა“ და ჩინეთის გეგმების რეალიზაციისთვის საქართველოს გეოგრაფიული მნიშვნელობის გათვალისწინებით ქართულ ელიტას მომავლის დიდი იმედი ჰქონდა. სადღეისოდ კი ენთუზიაზმით განწყობილი ცოტა ადამიანი დარჩა. ურთიერთობა იმედისმომცემად გამოიყურებოდა. კერძოდ, 2017 წელს ჩინეთმა და საქართველომ ხელი მოაწერეს "თავისუფალი ვაჭრობის შესახებ" შეთანხმებას, ამ ნაბიჯით საქართველოს ლიდერები იმედოვნებენ, რომ ხელშეკრულება ხელს შეუწყობდა ექსპორტს და საქართველოს ეკონომიკის განვითარებას. გარდა ამისა, საქართველოს მთავრობას ჰქონდა მოლოდინი, რომ ჩინეთის ინვესტიციები გაიზრდებოდა საქართველოს ინფრასტრუქტურაში, კერძოდ, შავი ზღვის პორტებში, ფოთში, ბათუმში, ანაკლიაში, ასევე აღმოსავლეთ-დასავლეთის სარკინიგზო და საგზაო კავშირებში. ამ მიზნით თბილისში რამდენიმე მასშტაბური საინვესტიციო ფორუმი ჩატარდა. ჩინეთთან უფრო მჭიდრო კავშირების დამყარება ასევე განიხილებოდა, როგორც საქართველოს სასიცოცხლოდ მნიშვნელოვანი კომპონენტი, რუსეთის რეგიონული გავლენის დაბალანსების ხელშემწყობი და ოკუპირებულ აფხაზეთსა და ცხინვალის ოკუპირებულ რეგიონში რუსეთის სამხედრო ნაბიჯების წინააღმდეგ ჩადებული ინვესტიცია. აღსანიშნავია, რომ იმედები ვაჭრობის გაუმჯობესების თაობაზე არ გამართლდა. მიუხედავად იმისა, რომ მთლიანი მოცულობის სტაბილური ზრდა შეინიშნებოდა, სტატისტიკის თანახმად, საქართველო ძირითადად ნედლეულის ექსპორტს ახორციელებს ჩინეთში, როგორიცაა სპილენძი და სხვადასხვა სახეობის ქიმიკატები. უფრო მაღალი ღირებულების სასაქონლო ვაჭრობა არ განხორციელებულა. პარალელურად გაიზარდა შეშფოთება კორუფციული საქმიანობის გამო, განსაკუთრებით იმასთან დაკავშირებით, თუ როგორ შეძლეს ჩინურმა კომპანიებმა ხელშეკრულებების მოპოვება. აღნიშნულის ერთ–ერთი საილუსტრაციო შემთხვევა ეხება Powerchina– ს შვილობილ კომპანია Sinohydro– ს, რომელმაც ხულო – ზარზმის გზის 42 კილომეტრიანი მონაკვეთის რეკონსტრუქციისთვის გამოცხადებულ ტენდერში გაიმარჯვა. ტენდერის ღირებულება 26,3 მილიონი ევროს შეადგენდა. Sinohydro– ს როგორც საქართველოში, ასევე მის ფარგლებს გარეთ ცნობილია კორუფციით, გარემოსთვის ზიანის მიყენებით და მაინც, ეს კომპანია იგებს ახალ ტენდერებს. გარდა ამისა, თბილისში პოლიტიკოსებისთვის აშკარა გახდა, რომ ჩინეთი რუსეთთან მისთვის უფრო მნიშვნელოვანი ურთიერთობების დაზიანებას არ შეეცდება. მაგალითად, ჩინეთი საერთოდ ვერ ეხმარება საქართველოს ქვეყნისთვის უმნიშვნელოვანეს დიპლომატიურ საკითხებში. მან არაერთხელ მისცა ხმა გაეროს რეზოლუციის „აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ" წინააღმდეგ. პეკინს არც ერთხელ არ დაუგმია დე-ფაქტო საპრეზიდენტო ან საპარლამენტო არჩევნები, რომლებიც საქართველოს ოკუპირებულ ტერიტორიებზე ჩატარდა. ამასთან, ჩინეთი რუსეთის მიერ საქართველოს წინააღმდეგ განხორციელებულ კიბერშეტევებზე დუმილს ინარჩუნებს. იგი ცხინვალის ოკუპირებულ რეგიონში რუსულ "ბორდერიზაციის" პოლიტიკაზეც დუმილს ინარჩუნებს. უფრო მეტიც, ჩინეთის თავდაცვის სამინისტრომ ღიად განაცხადა, რომ "აფხაზეთისა და სამხრეთ ოსეთის სამხედროებთან ერთად" მონაწილეობას მიიღებდა რუსეთის ხელმძღვანელობით დაგეგმილ სამხედრო წვრთნებში "კავკაზ -2020". გარდა ამისა, ჩინეთი დაეხმარა კრემლს ქვეყანაში დეზინფორმაციის დათესვაში. მაგალითად, 2 სექტემბერს ჩინეთის სახელმწიფო მედიასაშუალებამ China Daily ეჭვქვეშ დააყენა თბილისის ლუგარის ლაბორატორიის საქმიანობა, რომელიც აშშ–ის მიერ არის დაფინანსებული და განაცხადა, ეს ლაბორატორია საქართველოსთვის სავარაუდოდ, ბიოლოგიურ რისკს წარმოადგენდა და რომ საქართველოს მოქალაქეებს იქ სავარაუდოდ, საცდელ სუბიექტებად იყენებდნენ. ყველაფერი ზემოთხსენებული წინააღმდეგობაში მოდის დასავლელი პარტნიორების საქართველოს მიმართგანწყობებთან, რომლებიც მუდმივად მხარს უჭერენ საქართველოს საგარეო პოლიტიკის პრიორიტეტებს ისევე, როგორც მის ტერიტორიულ მთლიანობას. ჩინეთთან მზარდი იმედგაცრუების ფონზე საქართველოს ლიდერები განაგრძობენ ჩინეთსა და დასავლეთთან კავშირების შენარჩუნებას. მაგრამ რაც უფრო მკაცრდება ამერიკის პოზიცია ჩინეთთან მიმართებაში, ამ ბალანსის დაცვა უფრო და უფრო რთული იქნება. მიმდინარე წლის დასაწყისში საქართველოს მთავრობისადმი გაგზავნილი მთელი რიგი საჯარო წერილების თანახმად, აშშ-ის კონგრესმენებმა და სენატორებმა აშკარად აღნიშნეს, რომ საქართველომ თავიდან უნდა აიცილოს ჩინეთთან ღრმა კავშირები და მჭიდროდ გაეცნოს დასავლეთის სტანდარტებს და სავაჭრო პრაქტიკას. დაბალანსების ქმედება უბრალოდ არამდგრადია. საქართველოს ნატო–სა და ევროკავშირში გაწევრიანების მისწრაფებები, მისი გეოპოლიტიკური ორიენტაციის ქვაკუთხედი, შეუსაბამო და გამაღიზიანებელია ჩინეთისთვის, განსაკუთრებით მას შემდეგ, რაც ალიანსი აძლიერებს ძალისხმევას, რათა შეაჩეროს ჩინეთის მზარდი სამხედრო ამბიციები ინდოეთ-წყნარი ოკეანის რეგიონში. საბოლოოდ საქართველო იძულებული გახდება მხარეებს შორის არჩევანი გააკეთოს. დასავლეთსა და ჩინეთს შორის დაძაბულობის ფონზე, ველით, რომ საქართველო უფრო მტკიცედ დაუჭერს მხარს დასავლეთს, არა მხოლოდ პოლიტიკურად, არამედ უფრო მეტად ეკონომიკურად, დასავლური 5G ტექნოლოგიების, ასევე სავაჭრო და ინვესტიციის სტანდარტების გათვალისწინებით. ემილ ავდალიანი სტატიას „ევროპული პოლიტიკის ანალიზის ცენტრი“ აქვეყნებს
