ბაქო-თბილისი-ერზრუმის მილსადენით გაზის ტრანსპორტირება 10%-ით გაიზარდა

ბაქო-თბილისი-ერზრუმის მილსადენით გაზის ტრანსპორტირება 10&-ით გაიზარდა. ამის შესახებ აზერბაიჯანული მედია სახელმწიფო სტატისტიკის დეპარტამენტის ინფორმაციაზე დაყრდნობით წერს. მიმდინარე წელს გაზის ტრანსპორტირების 47,8% სამხრეთ კავკასიის მილსადენის ბაქო-თბილისი-ერზრუმის გავლით განხორციელდა. შაჰ-დენიზის გაზის კონდენსატის საბადოზე წარმოებული გაზი სწორედ ამ მილსადენით გადის ექსპორტზე. „საანგარიშო პერიოდში ამ მილსადენით 5 511,4 მლნ კუბური მეტრი გაზი გადაიზიდა, რაც წლიური შედარებისას აღმოჩნდა, რომ 9,7%-იანი ზრდაა“, - ნათქვამია ინფორმაციაში. ხელშეკრულება შაჰ-დენიზის საბადოდან პროდუქციის წილის განაწილების შესახებ, ხელი მოეწერა და რატიფიცირებულია 1996 წელს. პროექტში მონაწილეობენ BP (ოპერატორი - 28,8%), AzSD (10%), SGC Upstream (6,7%), Petronas (15,5%), Lukoil (10%), NICO (10%) და TPAO (19%). ბაქო-თბილისი-ერზრუმის მილსადენი, რომელიც სამხრეთ კავკასიურის სახელითაც არის ცნობილი, „შაჰდენიზის” საბადოდან აზერბაიჯანული გაზის ექსპორტირების მიზნით აშენდა. მილსადენი სათავეს ბაქოს ტერმინალთან ახლოს იღებს და საქართველოს ტერიტორიის გავლით თურქეთის ქალაქ ერზრუმში მთავრდება, სადაც გაზის განმანაწილებელი კვანძი მდებარეობს. ხსენებული მილსადენი 2006 წლის ბოლოდან ამოქმედდა და მისი გავლით ’„შაჰდენიზის“ საბადოდან ბუნებრივი აირის ტრანსპორტირება აზერბაიჯანში, საქართველოსა და თურქეთში ხდება.