თეგი: ევროპის პოლიტიკურ გაერთიანებათა სამიტი
40-მდე ქვეყანამ, მათ შორის საქართველომ, ევროპული უსაფრთხოების ძირითადი პრინციპების შესახებ დეკლარაციას მოაწერეს ხელი
40-მდე ქვეყანამ, მათ შორის საქართველომ, ევროპული უსაფრთხოების ძირითადი პრინციპების შესახებ დეკლარაციას მოაწერეს ხელი. ხელმომწერი სახელმწიფოების ხაზს უსვამენ, რომ უკრაინის უსაფრთხოება ევროატლანტიკური უსაფრთხოების განუყოფელი ნაწილია და რომ ევროპის სტრატეგიული სტაბილურობის სამომავლო განვითარება უკრაინაში ომის დასრულებაზე იქნება დამოკიდებული. ხელმომწერი სახელმწიფოები კიდევ ერთხელ ადასტურებენ უკრაინის დამოუკიდებლობის, სუვერენიტეტისა და ტერიტორიული მთლიანობის მტკიცე მხარდაჭერას მის საერთაშორისოდ აღიარებულ საზღვრებში. ისინი ვალდებულებას იღებენ, რომ იკისრონ უმთავრესი პასუხისმგებლობა ევროპის უსაფრთხოებაზე და ერთად იმუშაონ ისეთ საერთო საფრთხეებთან გასამკლავებლად, როგორიცაა აგრესიული ომები, ნარკოტიკებით ვაჭრობა, ჩარევები და ინფორმაციული მანიპულაციები. „ხელმომწერები ხაზს უსვამენ უკრაინისთვის მყარი და სანდო უსაფრთხოების გარანტიების უზრუნველყოფის აუცილებლობას და იმ სახელმწიფოების სახელით, რომლებსაც ეს ეხება, კიდევ ერთხელ ადასტურებენ ასეთი გარანტიების გაცემის განზრახვას, რათა მომავალში ევროპაში აგრესიის განმეორება აღიკვეთოს, ”- აღნიშნულია დეკლარაციაში. ხელმომწერი სახელმწიფოები ხაზს უსვამენ, რომ რუსეთის ჰიბრიდული კამპანიები და უკრაინის მხარდაჭერის შესუსტების მცდელობები მხოლოდ გააძლიერებს მათ ერთგულებას უკრაინისადმი და მათ მტკიცე გადაწყვეტილებას. „ხელმომწერი სახელმწიფოები აღნიშნავენ, რომ უკრაინაში მშვიდობის მიღწევის გზა თავად უკრაინასთან ერთად უნდა განისაზღვროს, ხოლო ევროპის უსაფრთხოებასთან დაკავშირებული ნებისმიერი საკითხი - ევროპელების მონაწილეობით,” - აღნიშნულია დოკუმენტში. დეკლარაციას ხელს აწერენ: ალბანეთი, ანდორა, ავსტრია, ბელგია, ბულგარეთი, ხორვატია, კვიპროსი, ჩეხეთი, დანია, ესტონეთი, ფინეთი, საფრანგეთი, საქართველო, გერმანია, საბერძნეთი, უნგრეთი, ისლანდია, ირლანდია, იტალია, ლატვია, ლიხტენშტეინის, ლიეტუვა, ლუქსემბურგი, მალტა, მოლდოვა, მონაკო, მონტენეგრო, ნიდერლანდები, ჩრდილოეთ მაკედონია, ნორვეგიაა, პოლონეთი, პორტუგალია, რუმინეთი, სან-მარინო, სლოვაკეთი, სლოვენია, ესპანეთი, შვედეთი, უკრაინა, გაერთიანებული სამეფო. სომხეთი და აზერბაიჯანი მათ შორის არ არიან. აზერბაიჯანის აგარეო საქმეთა სამინისტროს ინფორმაციით, რიგი ქვეყნები შეუერთდნენ „ევროპული უსაფრთხოების ძირითადი პრინციპების შესახებ დეკლარაციას“, „მიგრაციის შესახებ დეკლარაციასა“ და „ნარკოტიკების წინააღმდეგ მიმართული ევროპული კოალიციის დეკლარაციას“, თუმცა ბაქო დეკლარაციებს არ შეუერთდა. „ცნობილია, რომ „ევროპის პოლიტიკური საზოგადოება“ შეიქმნა, როგორც არაფორმალური დიალოგის პლატფორმა, რომელიც მიზნად ისახავს ქვეყნებს შორის ურთიერთნდობისა და თანამშრომლობის ხელშეწყობას. „ევროპის პოლიტიკურ საზოგადოებაში“ ჩვენი ქვეყნის მონაწილეობის მიზანია საერთო ინტერესის საკითხებზე მოსაზრებების გაცვლა, საერთო გამოწვევებისადმი მიდგომების განხილვა და მონაწილე ქვეყნებთან თანამშრომლობის შესაძლებლობების გაფართოება. ამ კონტექსტში, აზერბაიჯანულმა მხარემ ხელი არ მოაწერა ზემოხსენებულ დოკუმენტებს, რომლებიც დამატებით სამართლებრივ და პოლიტიკურ ვალდებულებებს აწესებს,“ – აღნიშნულია განცხადებაში. განცხადება ერევნის მიერ არ გავრცელებულა.
ბულგარეთმა დათქმებით დაუჭირა მხარი ევროპული უსაფრთხოების საკვანძო პრინციპების შესახებ ფრანგულ ინიციატივას
ბულგარეთმა მხარი დაუჭირა უკრაინის შესახებ დეკლარაციას, თუმცა დოკუმენტის პრეამბულასთან დაკავშირებით შენიშვნა გამოთქვა. ბულგარეთის პრემიერ-მინისტრმა რუმენ რადევმა განაცხადა, რომ ქვეყანამ დეკლარაციას მხარი დაუჭირა, თუმცა პრეამბულის ფორმულირებასთან დაკავშირებით დათქმა ჰქონდა. ბულგარეთი მიიჩნევდა, რომ დოკუმენტში უნდა ასახულიყო უკრაინაში სამშვიდობო მოლაპარაკებების მიმდინარე პროცესი, მათ შორის აბუ-დაბიში გამართული მოლაპარაკებები. საუბარია ევროპული პოლიტიკური თანამეგობრობის 12 ნოემბრის სამიტზე წარმოდგენილ ევროპული უსაფრთხოების პრინციპების დეკლარაციაზე. რადევმა დეკლარაციის პრეამბულასთან დაკავშირებით წერილობითი შენიშვნები გამოთქვა და მოითხოვა, რომ პოლიტიკური გზავნილები უკრაინაში მიმდინარე სამშვიდობო მოლაპარაკებების ეტაპს მორგებოდა. შესაბამისი განცხადება მას შემდეგ გავრცელდა, რაც მედიაში ინფორმაცია გავრცელდა, რომ ევროკავშირის წევრ სახელმწიფოებს შორის ბულგარეთი ერთადერთი ქვეყანა იყო, რომელმაც დეკლარაციას ხელი არ მოაწერა. განცხადებაში აღნიშნულია, რომ ბულგარეთი მხარს უჭერს უკრაინაში სამართლიანი და ხანგრძლივი მშვიდობის მიღწევას მოლაპარაკებების გზით; ამ მიმართულებით მნიშვნელოვან ნაბიჯს წარმოადგენს აბუ-დაბიში, შეერთებული შტატების შუამავლობით გამართული მოლაპარაკებების ახალი რაუნდი. დოკუმენტის პრეამბულაში საუბარია „უკრაინის წინააღმდეგ რუსეთის არაპროვოცირებულ, სრულმასშტაბიან აგრესიასა და ევროპის სტაბილურობისთვის მზარდ საფრთხეებზე.“ დეკლარაციის თავდაპირველ ვერსიაში, რომელიც საფრანგეთმა მოამზადა, ეწერა, რომ აბუ-დაბიში აშშ-ის შუამავლობით დაწყებული მოლაპარაკებები მნიშვნელოვანი ნაბიჯია მშვიდობისკენ და ევროპამ ამ პროცესს მხარი უნდა დაუჭიროს. საბოლოო ტექსტიდან ეს ჩანაწერი ამოიღეს. ბულგარეთი მოითხოვდა მის დაბრუნებას, რადგან მიიჩნევდა, რომ ევროპულ დოკუმენტებში მიმდინარე მოლაპარაკებები უნდა ასახულიყო და არ უნდა შეზღუდულიყო დიპლომატიური დიალოგის შესაძლებლობა. 40-მდე ქვეყანამ, მათ შორის საქართველომ, ევროპული უსაფრთხოების ძირითადი პრინციპების შესახებ დეკლარაციას მოაწერეს ხელი
