ვოლოდიმირ ზელენსკი: რუსეთის გენოციდური პოლიტიკის დასაძლევად, ერთიანი „იურიდიული ფრონტის“ არსებობა აუცილებელია

უკრაინის პრეზიდენტმა ვოლოდიმირ ზელენსკიმ 9 დეკემბრის გამოსვლაში, ხაზი გაუსვა რუსეთის მიერ უკანონოდ დეპორტირებული და დაკავებული ყველა უკრაინელის სამშობლოში დაბრუნების აუცილებლობას. ამის შესახებ მან ადამიანის უფლებათა საყოველთაო დეკლარაციის 74 წლის იუბილესადმი მიძღვნილ საერთაშორისო კონფერენციაზე განაცხადა. კერძოდ, ზელენსკიმ აღნიშნა, რომ უკრაინამ უკვე დააბრუნა 1331 უკრაინელი სამხედრო მოსამსახურე რუსული ტყვეობიდან. „ძალიან ვამაყობ ამ შედეგით ჩვენი ქვეყნისთვის. ყველა უნდა დავაბრუნოთ. ეს ჩვენი მოვალეობაა. თუმცა ვერ ვხედავთ ისეთი ორგანიზაციების მონდომებას და კონკრეტულ ქმედებებს, როგორიცაა წითელი ჯვრის საერთაშორისო კომიტეტი, ჩვენ უნდა ვეძიოთ და ვიპოვოთ ახალი ფორმატები, ახალი ადამიანები ახალ რეალობაში, ურთიერთქმედების ახალი ფორმატები, თანამშრომლობის ახალი ხაზები", - განაცხადა ზელენსკიმ. გარდა ამისა, მან ხაზგასმით აღნიშნა, რომ უკრაინაში სამართლიანობის აღდგენა მოითხოვს ყველას მაქსიმალურ თანამშრომლობას. „უნდა არსებობდეს ერთიანი იურიდიული ფრონტი, რომელიც გადალახავს რუსეთის გენოციდურ პოლიტიკას, ამიტომ მოგმართავთ და ყოველდღე მოვუწოდებ ყველა ხელისუფლების წარმომადგენლებს და საზოგადოების, სამოქალაქო საზოგადოების ყველა წარმომადგენელს, ვინც ზრუნავს ადამიანებზე, სხვადასხვა საერთაშორისო ორგანიზაციის, საერთაშორისო უფლებადამცველი ორგანიზაციების, სააგენტოების წარმომადგენლებს, რომ კოორდინირებულად ვიმუშაოთ ყველა დონეზე, რათა ვიზრუნოთ ომის შედეგად დარღვეული ადამიანის უფლებების აღდგენისა და აგრესორისთვის სამართლიანი პასუხისმგებლობის დაკისრების მიზნით“, - აღნიშნა ზელენსკიმ. შეგახსენებთ, 11 ნოემბერს, უკრაინის შეიარაღებული ძალების ქვედანაყოფები ქალაქ ხერსონში შევიდნენ. უკრაინის პრეზიდენტმა ვოლოდიმირ ზელენსკიმ უკრაინელი სამხედროების მიერ ქალაქზე კონტროლის დაბრუნებას, ისტორიული უწოდა. რუსეთი უკრაინის კრიტიკულ იფრასტრუქტურას ბომბავს. დასავლეთი კიევს საჰაერო თავდაცვის სისტემებს და სხვა საჭირო დახმარებას აწვდის. ამასთან, ევროპის უმსხვილესი ქალაქები უკრაინას, ელექტროენერგიის გენერატორებსა და ტრანსფორმატორებს გადასცემენ. ევროპარლამენტის პრეზიდენტმა რობერტა მეცოლამ და ფლორენციის მერმა დარიო ნარდელამ „იმედის გენერატორების“ ინიციატივა წამოიწყეს. მისი მიზანია, ელექტროენერგიით უზრუნველყოს ქვეყნის ძირითადი ობიექტები, მათ შორის საავადმყოფოები, სკოლები, წყლის სადგურები, მოვლის ცენტრები, თავშესაფრები და საკომუნიკაციო სისტემები. ცნობისთვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.  რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა. ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა. „რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა. 23 ივლისს, Human Rights Watch-მა რუსეთის მიერ ოკუპირებულ სამხრეთ უკრაინის ტერიტორიაზე ადამიანების გატაცებისა და წამების შესახებ ანგარიში გამოაქვეყნა. Human Rights Watch-ის მიერ სექტემბრის დასაწყისში გამოქვეყნებული ანგარიშის მიხედვით, უკრაინელები იძულებით გადაჰყავთ რუსეთში ან რუსეთის მიერ უკრაინის ოკუპირებულ ტერიტორიებზე. გაეროს ექსპერტთა ჯგუფმა, 23 სექტემბერს წარმოადგინა პირველადი შედეგები გამოძიების, რომელიც კიევში, ჩერნიგოვში, ხარკოვსა და სუმის ოლქებში ჩატარდა. 14 სექტემბრის მონაცემებით, უკრაინის ხელისუფლებამ განაცხადა, რომ უკრაინის შეიარაღებულმა ძალებმა კონტრშეტევის დროს, დაახლოებით 6000 კვ. კმ. დაიბრუნეს. რუსეთის კონტროლის ქვეშ მყოფი სამხრეთ რეგიონის გასათავისუფლებლად მთავარი კონტრშეტევის მოლოდინი ივლისის დასაწყისიდან გაჩნდა, როდესაც თავდაცვის მინისტრი, ოლექსი რეზნიკოვი ამბობდა, რომ პრეზიდენტმა ვოლოდიმირ ზელენსკიმ ოკუპირებული სამხრეთის გათავისუფლების ბრძანება გასცა. უკრაინა აცხადებს, რომ დეოკუპაციის მიზნით, კონტრშეტევებს განაგრძობს. AP: გაეროს ექსპერტებმა, უკრაინაში რუსეთის სამხედრო დანაშაულების შესახებ მტკიცებულებები მოიპოვეს ლიეტუვამ, ლატვიამ, ესტონეთმა, პოლონეთმა და ჩეხეთმა რუსეთის ხელისუფლება ტერორისტულ რეჟიმად გამოაცხადეს. ამასთან, ევროპის საბჭოს საპარლამენტო ასამბლეამ ერთხმად მიიღო რეზოლუცია, რომლითაც რუსეთი ტერორისტულ რეჟიმად აღიარა. 23 ნოემბერს, ევროპარლამენტმა რუსეთი ტერორიზმის სპონსორ სახელმწიფოდ გამოაცხადა. 24 ნოემბერს, ნიდერლანდების პარლამენტმა, რუსეთი ტერორიზმის სპონსორ სახელმწიფოდ აღიარა.  დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.