თეგი: კირ სტარმერი
ზელენსკი ლონდონში კირ სტარმერს შეხვდა
უკრაინის პრეზიდენტი ვოლოდიმირ ზელენსკი ლონდონში ჩავიდა. ვოლოდიმირ ზელენსკის დაუნინგ სტრიტზე დიდი ბრიტანეთის პრემიერ-მინისტრი კირ სტარმერი დახვდა. მან მოლაპარაკებების შემდეგ, დაუნინგ სტრიტი უკვე დატოვა. 13 აგვისტოს, ევროპელმა ლიდერებმა და ვოლოდიმირ ზელენსკიმ აშშ-ის პრეზიდენტთან, დონალდ ტრამპთან სატელეფონო საუბარი გამართეს. სატელეფონო საუბრის შემდეგ კირ სტარმერმა განაცხადა, რომ „ნებისმიერი შეთანხმების ფარგლებში თავისი ტერიტორიული მთლიანობის დასაცავად უკრაინას მყარი და საიმედო უსაფრთხოების გარანტიები უნდა ჰქონდეს.“
სამშვიდობო შეთანხმების შემთხვევაში, უკრაინაში დიდი ბრიტანეთი და საფრანგეთი ჯარებს გაგზავნიან - დეკლარაცია
დიდი ბრიტანეთის პრემიერ-მინისტრმა კირ სტარმერმა განაცხადა, რომ დიდმა ბრიტანეთმა და საფრანგეთმა ხელი მოაწერეს დეკლარაციას უკრაინაში ჯარების განლაგების შესახებ, თუ რუსეთთან სამშვიდობო შეთანხმება დაიდება. ბრიტანეთის პრემიერის თქმით, დიდი ბრიტანეთი და საფრანგეთი უკრაინის მასშტაბით "სამხედრო ჰაბებს" შექმნიან და დაცულ ადგილებს ააშენებენ იარაღისა და სამხედრო აღჭურვილობისთვის. „მსურველთა კოალიციის" მიზანი არის ხანგრძლივი მშვიდობის მიახლოებაში დახმარება და აშშ-თან მუშაობა გრძელვადიანად უკრაინის უსაფრთხოების გარანტირებისთვის. ეს მუშაობა ახლა უფრო წინ არის წაწეული, ვიდრე ოდესმე. დღევანდელმა ერთობლივმა დეკლარაციამ ეს ნათელი ტერმინებით გამოაცხადა. ამასთან ერთად, პრეზიდენტ ზელენსკისთან და პრეზიდენტ მაკრონთან ერთად დღეს უფრო შორს წავედით. "განზრახვაზე დეკლარაციას" მოვაწერეთ ხელი, სამშვიდობო შეთანხმების შემთხვევაში უკრაინაში ძალების განლაგების თაობაზე. ეს გზას კაფავს სამართლებრივი ჩარჩოსთვის, რომლის ფარგლებშიც ბრიტანული, ფრანგული და პარტნიორი ძალები შეძლებენ უკრაინულ მიწაზე ოპერირებას, უკრაინული ცისა და ზღვების უსაფრთხოების უზრუნველყოფას და უკრაინის შეიარაღებული ძალების რეგენერირებას სამომავლოდ. დიდი ბრიტანეთი და საფრანგეთი უკრაინის მასშტაბით "სამხედრო ჰაბებს" შექმნიან და დაცულ ადგილებს ააშენებენ იარაღისა და სამხედრო აღჭურვილობისთვის," - განაცხადა სტარმერმა. უკრაინის პრეზიდენტი, ვოლოდიმირ ზელენსკი აცხადებს, რომ პარიზის დეკლარაცია „ძალიან კონკრეტული“ შეთანხმებაა. ზელენსკის თქმით, უკრაინას უკვე აქვს საკმარისი დეტალები და იცის, რომელი ქვეყნები ჩაერთვებიან შეთანხმებაში, მათ შორის, რა წვლილს შეიტანს თითოეული მათგანი ცალ-ცალკე. "საფრანგეთის, ბრიტანეთისა და უკრაინის სამხედროებმა დეტალურად იმუშავეს ძალების განლაგებაზე, რაოდენობაზე, იარაღის სპეციფიკურ ტიპებზე, შეიარაღებული ძალების კომპონენტებზე, რომლებიც საჭიროა და იმუშავებს. უკვე გვაქვს საჭირო დეტალები. გვესმის რომელი ქვეყანა რისთვის არის მზად - "მსურველთა კოალიციის" ყოველი ქვეყანა. მინდა მადლობა გადავუხადო ყოველ ლიდერს, ყოველ სახელმწიფოს, რომელსაც ნამდვილად სურს იყოს სამშვიდობო მოგვარების ნაწილი. ძალიან არსებითად ვისაუბრეთ ამერიკულ მხარესთან მონიტორინგზე, რათა მშვიდობის დარღვევები არ იყოს. ამერიკა მზად არის ამაზე იმუშაოს. და ერთ-ერთი ყველაზე მნიშვნელოვანი კომპონენტი შეკავებაა, ინსტრუმენტები, რომლებიც ახალ რუსულ აგრესიას აღკვეთენ. ამას ყველაფერს ვნახავთ," - წერს ზელენსკი.
დიდმა ბრიტანეთმა და ჩინეთმა სხვადასხვა სფეროში თანამშრომლობაზე ათი ხელშეკრულება გააფორმეს
დაუნინგ სტრიტის განცხადებით, ბრიტანეთის მოქალაქეებს ჩინეთში ვიზის გარეშე 30 დღემდე მოგზაურობის უფლება ექნება. განცხადება პრემიერ-მინისტრ კირ სტარმერისა და ჩინეთის პრეზიდენტ სი ძინპინს შორის შეხვედრის შემდეგ გაკეთდა. სტარმერი რვა წლის განმავლობაში პირველი ბრიტანელი ლიდერი გახდა, რომელიც ჩინეთს ეწვია. მთავრობა ეკონომიკური ზრდის ხელშეწყობის მიზნით პეკინთან უფრო მჭიდრო სავაჭრო კავშირების დამყარებას ცდილობს. თუმცა კრიტიკოსები ამტკიცებენ, რომ დიდ ბრიტანეთს ჩინეთთან უფრო ფრთხილი ურთიერთობა უნდა ჰქონდეს ეროვნული უსაფრთხოებისა და ქვეყნის ადამიანის უფლებების დარღვევის რისკის გამო. სავიზო შეთანხმების ძალაში შესვლის თარიღი უცნობია, თუმცა მთავრობა იმედოვნებს, რომ ეს რაც შეიძლება მალე მოხდება. დაუნინგ სტრიტმა ასევე განაცხადა, რომ ჩინეთი ბრიტანული ვისკის იმპორტზე გადასახადების 10%-დან 5%-მდე შემცირებას დათანხმდა. ამავდროულად, ფარმაცევტული კომპანია AstraZeneca 2030 წლამდე ჩინეთში 15 მილიარდ დოლარის (10.9 მილიარდი ფუნტი სტერლინგი) ინვესტიციას ჩადებს, შექმნის ახალ საწარმოო ობიექტებს და გააფართოებს თავის სამუშაო ძალას ქვეყანაში. პეკინში, სი ძინპინისთან შეხვედრის შემდეგ, რომელიც დაახლოებით საათსა და 20 წუთს გაგრძელდა, კირ სტარმერმა განაცხადა, რომ შეხვედრაზე განიხილეს, თუ როგორ შეიძლება, ჩინეთში არსებული „უზარმაზარი შესაძლებლობები“ დიდი ბრიტანეთის მოსახლეობისთვის სასარგებლოდ გამოიყენონ. გარდა ამისა, მიაღწიეს „კარგ პროგრესს“ არალეგალური მიგრაციის საკითხთან დაკავშირებით თანამშრომლობაში. ეს შეთანხმება ორ ქვეყანას შორის ხელმოწერილ 10 შეთანხმებას შორისაა, რომლებიც მოიცავს ისეთ სფეროებს, როგორიცაა ექსპორტი, განათლება და სურსათის უვნებლობა. დიდი ბრიტანეთის პრემიერ-მინისტრმა განაცხადა, რომ მან ასევე წამოჭრა საკამათო საკითხები, მათ შორის, დემოკრატიის მომხრე აქტივისტის ჯიმი ლაის დაპატიმრება და სინძიაგში უიღურული უმცირესობის მიმართ მოპყრობა. თავის მხრივ, პრეზიდენტმა სი ძინპინმა განაცხადა, რომ დიდი ბრიტანეთისა და ჩინეთის ურთიერთობებში „გარკვეული გადახვევები და შემობრუნებები შეინიშნება, რაც ქვეყნების ინტერესებს არ ემსახურებოდა.“ მან განაცხადა, რომ დიდ ბრიტანეთსა და ჩინეთს შორის დიალოგი „აუცილებელია“ „მღელვარე და ცვალებად“ სამყაროში. შეხვედრის შემდეგ, კირ სტარმერმა პრეზიდენტ სი ძინპინს საჩუქრად გადასცა ფეხბურთის ბურთი, რომელიც გასულ შაბათ-კვირას მანჩესტერ იუნაიტედსა და არსენალს შორის პრემიერ ლიგის მატჩში გამოიყენეს. დიდი ბრიტანეთის პრემიერ-მინისტრი არსენალის გულშემატკივარია, ჩინეთის პრეზიდენტი კი, „მანჩესტერ იუნაიტედს“ უჭერს მხარს. თავის მხრივ, სი ძინპინმა ბრიტანელ კოლეგას ცხენის სპილენძის ქანდაკება უსახსოვრა. ეს ვიზიტი სავაჭრო დაძაბულობის გამწვავების პერიოდში, მას შემდეგ შედგა, რაც აშშ-ის პრეზიდენტმა დონალდ ტრამპმა კანადას ჩინეთთან „სტრატეგიულ პარტნიორობაზე“ ხელმოწერის გამო 100%-იანი ტარიფებით დაემუქრა. სტარმერის ვიზიტი ოპოზიციურმა პარტიებმა გააკრიტიკეს.
