ევროპის მაუწყებელთა კავშირის აღმასრულებელმა საბჭომ სამ რუსულ სამაუწყებლო კომპანიას წევრობა განუსაზღვრელი ვადით შეუჩერა

ევროპის მაუწყებელთა კავშირის აღმასრულებელმა საბჭომ სამ რუსულ სამაუწყებლო კომპანიას: „ერტეერს“, „პერვი კანალსა“ და რადიო „დომ ოსტანკინოს“ განუსაზღვრელი ვადით წევრობა შეუჩერა. ამასთან, გადაწყვეტილება დაუყოვნებლივ შედის ძალაში და მისი ვადა გადახედვას დაექვემდებარება. გადაწყვეტილების მიღებისას აღმასრულებელმა საბჭომ გაითვალისწინა, რომ სამივე წევრს აქვს უფლება, საბჭოს გადაწყვეტილება გაასაჩივროს ევროპის მაუწყებელთა კავშირის წესდების შესაბამისად, თუმცა აპელაციის გადაწყვეტილებამდე წევრობის შეჩერება ძალაში იქნება. ცნობისთვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. რუსეთი ბომბავს საბავშვო ბაღებს, სკოლებს, საცხოვრებელ კორპუსებს, საავადმყოფოებს, სამშობიაროებს და სხვა სამოქალაქო დანიშნულების შენობა-ნაგებობებსა და ინფრასტრუქტურას. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა. 14 აპრილს უკრაინის უმაღლესმა რადამ რუსეთის შეიარაღებული ძალების მოქმედებები უკრაინელი ხალხის წინააღმდეგ გენოციდად აღიარა. 19 აპრილს, რუსეთმა აღმოსავლეთ უკრაინაში აქტიური იერიში დაიწყო.  21 აპრილს, ლატვიისა და ესტონეთის პარლამენტებმა უკრაინაში რუსეთის ქმედებები გენოციდად აღიარეს. 28 აპრილს, კანადის პარლამენტმა უკრაინაში რუსეთის ქმედებები გენოციდად აღიარა. რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა. დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.