პოლიტიკა
სომხეთს ევროკავშირის სრულუფლებიანი წევრობა ცალსახად და აუცილებლად სურს - ფაშინიანი
სომხეთის მთავრობას ცალსახად სურს, რომ სომხეთი გახდეს ევროკავშირის სრულუფლებიანი წევრი. ამის შესახებ სომხეთის პრემიერ-მინისტრმა ნიკოლ ფაშინიანმა 14 იანვარს, ერევანში, უსაფრთხოების ფორუმის ფარგლებში, „საერთაშორისო და უსაფრთხოების კვლევების სომხური ინსტიტუტის“ კონფერენციაზე პანელური დისკუსიისას განაცხადა. „გვინდა თუ არა, ევროკავშირის სრულუფლებიანი წევრები ვიყოთ? დიახ, ცალსახად. როგორ წარმოგვიდგენია ეს? ჩვენ საკუთარი თავის წინაშე ვართ პასუხისმგებელნი და წინა პერიოდის გამოცდილებამ აჩვენა, რომ არცერთი ქვეყანა არ მიიღება ევროკავშირის წევრად გეოპოლიტიკური ან სხვა მიზანშეწონილობის გამო. ამისათვის არსებობს ძალიან დიდი და მნიშვნელოვანი წინაპირობა: ქვეყანამ ობიექტურად უნდა დაიცვას ევროკავშირის სტანდარტები, სულ მცირე 97, 98, 99 პროცენტით. ჩვენი სტრატეგია ასეთია: ჩვენ ძალიან მტკიცედ და ნათლად უნდა მივყვეთ სომხეთის ევროკავშირის სტანდარტების შესაბამის ქვეყნად გადაქცევის გზას,“ - განაცხადა ფაშინიანმა. სომხეთის პრემიერის თქმით, როდესაც ეს მოხდება, დადგება პოლიტიკური გადაწყვეტილების მომენტი. „როდესაც სტანდარტებს დავაკმაყოფილებთ, ორი ვარიანტი გვაქვს: ან მიგვიღებენ ევროკავშირის წევრად, ან არ მიგვიღებენ,“ – თქვა პრემიერ-მინისტრმა. ფაშინიანის თქმით, სომხეთი ორივე შემთხვევაში იმარჯვებს: ერთ შემთხვევაში ის ევროკავშირის სრულუფლებიანი წევრი ხდება, მეორე შემთხვევაში კი, არა, სამაგიეროდ, ის იქნება თანამედროვე სახელმწიფო, რომელიც ევროპულ სტანდარტებს აკმაყოფილებს. „შემდეგი ნიუანსი ის არის, რომ ჩვენ ვაცნობიერებთ, რომ ერთდროულად არ შეგვიძლია, ვიყოთ ევროკავშირის წევრიც და ევრაზიული კავშირის წევრიც. თუმცა ახლა სხვა რეალობა იკვეთება, რომ მიუხედავად ამისა, არსებობს სივრცე როგორც ამ გზით წასასვლელად, ასევე, ევრაზიული ეკონომიკური კავშირის წევრობისთვის. ჩვენ დღეს ამ სივრცეში ვართ. ჩვენ ნათლად ვაცხადებთ, რომ ამ გზით მივდივართ. ჩვენ ევრაზიული ეკონომიკური კავშირის წევრი ვართ, რაც ნიშნავს, რომ ამ ეტაპზე შეუთავსებლობა არ არსებობს. „ამიტომ, ვიდრე თავსებადობა შესაძლებელია, ჩვენ გავაგრძელებთ ევრაზიული ეკონომიკური კავშირის წევრად დარჩენას. როდესაც თავსებადობა შეუძლებელი გახდება, ჩვენ გადაწყვეტილებას სომხეთის მოქალაქეებთან ერთად მივიღებთ, რაც გამომდინარეობს სომხეთის რესპუბლიკის ხალხის ნების თავისუფალი გამოხატვისგან,“ – აღნიშნა პრემიერ-მინისტრმა. შეგახსენებთ, სომხეთსა და ევროკავშირს შორის უვიზო მიმოსვლის შესახებ დაწყებული მოლაპარაკებებიდან ერთი წლის შემდეგ, 2025 წლის ნოემბერში ბრიუსელმა ერევანს ოფიციალურად გადასცა სავიზო რეჟიმის ლიბერალიზაციის სამოქმედო გეგმა (VLAP), - ჩამონათვალი იმ ვალდებულებების, რომლებიც უვიზო მიმოსვლის ამოქმედებამდე სომხეთმა უნდა დააკმაყოფილოს. 2025 წლის მარტში სომხეთის პარლამენტმა მიიღო კანონი, რომლითაც მთავრობას მოუწოდა, შეიტანოს განაცხადი ევროკავშირის წევრობაზე. ფაშინიანი: სომხეთის ევროკავშირში ინტეგრაცია საქართველოს ევროპულ პერსპექტივასთან არის დაკავშირებული ევროკომისარი მარტა კოსი სომხეთი-აზერბაიჯანი-თურქეთი-ევროკავშირის ფორმატის შექმნის წინადადებით გამოვიდა
ამერიკამ საქართველოს $234 150-ის აღჭურვილობა გადასცა
აშშ-ის სამხედრო ჯგუფის (U.S. Military Group) წარმომადგენლებმა შინაგან საქმეთა სამინისტროს საგანგებო სიტუაციების მართვის სამსახურს 234 150 აშშ დოლარის ღირებულების სახანძრო და საკომუნიკაციო აღჭურვილობა გადასცეს. ინფორმაციას შსს ავრცელებს. „საქართველოს საგანგებო სიტუაციების მართვის სამსახურს სახანძრო და კავშირგაბმულობისთვის საჭირო აღჭურვილობა გადავეცით, რომელიც ქართველ მაშველებს, გადაუდებელ სიტუაციებში, სწრაფ და ეფექტიან რეაგირებაში დაეხმარება. აღნიშნული დახმარება აშშ-ის ევროპული სარდლობის ჰუმანიტარული დახმარების პროგრამის ნაწილია, რომელიც მრავალი წელია, მიმდინარეობს და მიზნად ისახავს საქართველოს საგანგებო სამსახურების შესაძლებლობების გაძლიერებას როგორც საჭირო აღჭურვილობის გადაცემით, ასევე, პრაქტიკული სწავლებით და გამოცდილების გაზიარებით,“ - ნათქვამია თავის მხრივ, ამერიკის საელჩოს მიერ გავრცელებულ ინფორმაციაში. შინაგან საქმეთა მინისტროს ცნობით, მინისტრის მოადგილე ალექსანდრე დარახველიძემ და საგანგებო სიტუაციების მართვის სამსახურის უფროსმა თემურ მღებრიშვილმა აშშ-ის სამხედრო ჯგუფის დელეგაციას და აშშ-ის ელჩის მოვალეობის შემსრულებელს ალან პერსელს საგანგებო სიტუაციების მართვის სამსახურში უმასპინძლეს. შეხვედრას ასევე ესწრებოდნენ აშშ-ის სამხედრო ჯგუფის ხელმძღვანელი, ვიცე-პოლკოვნიკი ენდრიუ ანდერვუდი, სამხედრო ატაშე პოლკოვნიკი ჯონათან ადამსი და ორმხრივი თანამშრომლობის ოფიცერი - მაიორი ალეკ ჰარისონი. „ქართულმა მხარემ მადლობა გადაუხადა ამერიკულ მხარეს გაწეული მხარდაჭერისთვის, მინისტრის მოადგილემ აღნიშნა, რომ გადმოცემული სპეციალური ტექნიკა და აღჭურვილობა მნიშვნელოვნად გააძლიერებს მეხანძრე-მაშველების ოპერატიულ შესაძლებლობებს და ხელს შეუწყობს ქვეყნის მასშტაბით საგანგებო სიტუაციებზე ეფექტიან რეაგირებას. დელეგაციის წევრებმა საგანგებო სიტუაციების მართვის სამსახურის ოპერატიული მართვის ცენტრის შენობაც დაათვალიერეს და ადგილზე გაეცნენ ცენტრის საქმიანობის ძირითად მიმართულებებსა და საგანგებო სიტუაციებზე რეაგირების პროცესის სპეციფიკას,“ - იუწყება შსს. ალან პერსელის თქმით, ჰუმანიტარული დახმარება სამ ათწლეულზე მეტია, აშშ-სა და საქართველოს თანამშრომლობის მნიშვნელოვან ნაწილს წარმოადგენს. „ეს ასახავს ჩვენს ერთობლივ ძალისხმევას საჭიროებების დროს სიცოცხლის გადარჩენისა და ადგილობრივი მოსახლეობის დახმარების მიმართულებით,“ - განაცხადა აშშ-ის ელჩის მოვალეობის შემსრულებელმა. მან ხაზი გაუსვა, რომ დახმარება ხელს შეუწყობს საგანგებო სიტუაციებზე რეაგირების ეროვნული მექანიზმის გაძლიერებას და დეცენტრალიზებას.
აშშ საიმიგრაციო ვიზების გაცემას საქართველოს მოქალაქეებისთვისაც აჩერებს
საქართველოში ამერიკის საელჩო ინფორმაციას ავრცელებს „საიმიგრაციო ვიზების შესახებ იმ ქვეყნის მოქალაქეებისთვის, რომლებიც საზოგადოებრივი სარგებლის გამოყენების მაღალ რისკს წარმოადგენენ.“ საელჩო სახელმწიფო დეპარტამენტის ვებგვერდზე განთავსებულ ცნობას ციტირებს. „პრეზიდენტმა ტრამპმა მკაფიოდ განაცხადა, რომ იმიგრანტები უნდა იყვნენ ფინანსურად თვითკმარნი და არ უნდა წარმოადგენდნენ ფინანსურ ტვირთს ამერიკელი გადასახადის გადამხდელებისთვის. სახელმწიფო დეპარტამენტი ახორციელებს ყველა პოლიტიკის, რეგულაციისა და სახელმძღვანელო დოკუმენტის სრულ გადახედვას, რათა უზრუნველყოს, რომ მაღალი რისკის მქონე ქვეყნებიდან ჩამოსული იმიგრანტები არ გამოიყენებენ სოციალურ დახმარებას შეერთებულ შტატებში და არ გახდებიან საჯარო ტვირთი. გავრცელებული ინფორმაციით, 2026 წლის 21 იანვრიდან სახელმწიფო დეპარტამენტი დროებით აჩერებს ყველა საიმიგრაციო ვიზის გაცემას შემდეგი ქვეყნების მოქალაქეებისთვის: ავღანეთი, ალბანეთი, ალჟირი, ანტიგუა და ბარბუდა, სომხეთი, აზერბაიჯანი, ბაჰამის თანამეგობრობა, ბანგლადეში, ბარბადოსი, ბელორუსი, ბელიზი, ბუტანი, ბოსნია და ჰერცეგოვინა, ბრაზილია, მიანმარი, კამბოჯა, კამერუნი, კაბო ვერდე, კოლუმბია, კოტ დივუარი, კუბა, კონგოს რესპუბლიკა, დომინიკის თანამეგობრობა, ეგვიპტე, ერიტრეა, ეთიოპია, ფიჯი, გამბია, საქართველო, განა, გრენადა, გვატემალა, გვინეა, ჰაიტი, ირანი, ერაყი, იამაიკა, იორდანია, ყაზახეთი, კოსოვო, ქუვეითი, ყირგიზეთი, ლაოსი, ლიბანი, ლიბერია, ლიბია, მოლდოვა, მონღოლეთი, მონტენეგრო, მაროკო, ნეპალი, ნიკარაგუა, ნიგერია, ჩრდილოეთ მაკედონია, პაკისტანი, კონგოს დემოკრატიული რესპუბლიკა, რუსეთი, რუანდა, სენტ-კიტსი და ნევისი, სენტ-ლუსია, სენტ ვინსენტი და გრენადინები, სენეგალი, სიერა ლეონე, სომალი, სამხრეთ სუდანი, სუდანი, სირია, ტანზანია, ტაილანდი, ტოგო, ტუნისი, უგანდა, ურუგვაი, უზბეკეთი და იემენი. საელჩო ხშირად დასმულ შეკითხვებზე პასუხებსაც აქვეყნებს. კერძოდ: რა ბედი ეწევა ჩემს საიმიგრაციო ვიზის გასაუბრების თარიღს? საიმიგრაციო ვიზა აპლიკანტებს, რომლებიც ზემოთ აღნიშნული ქვეყნების მოქალაქეები არიან, შეუძლიათ განაცხადის წარდგენა და გასაუბრებაზე დასწრება. დეპარტამენტი გააგრძელებს გასაუბრების თარიღების ჩანიშვნას, თუმცა პაუზის პერიოდში ამ მოქალაქეებზე საიმიგრაციო ვიზები არ გაიცემა. არსებობს თუ არა გამონაკლისები? ორმაგი მოქალაქეობის მქონე პირებზე, რომლებიც განაცხადს წარადგენენ იმ ქვეყნის მოქმედი პასპორტით, რომელიც ზემოთ ჩამოთვლილ სიაში არ შედის, ეს პაუზა არ გავრცელდება. ექნება თუ არა გავლენა ამ პაუზას ჩემს ამჟამად მოქმედ ვიზაზე? არა. ამ მითითების ფარგლებში არც ერთი საიმიგრაციო ვიზა არ გაუქმებულა. შეერთებულ შტატებში შესვლასთან დაკავშირებული შეკითხვებით, გთხოვთ, მიმართოთ შიდა უსაფრთხოების დეპარტამენტს (DHS). ეს პაუზა ვრცელდება თუ არა ტურისტულ ვიზებზე? არა. ეს პაუზა ვრცელდება მხოლოდ საიმიგრაციო ვიზა აპლიკანტებზე. ტურისტული ვიზები არასაიმიგრაციო ვიზებია. აშშ 75 ქვეყნისთვის, მათ შორის, რუსეთისთვის და ირანისთვის, საიმიგრაციო ვიზების გაცემას აჩერებს - Fox News
ამერიკამ და სომხეთმა „ტრამპის მარშრუტის“ ახალი დეტალები გაასაჯაროვეს
აშშ-ის სახელმწიფო მდივანი მარკო რუბიო 13 იანვარს სომხეთის საგარეო საქმეთა მინისტრს არარატ მირზოიანს შეხვდა. სახელმწიფო დეპარტამენტში გამართული მოლაპარაკებების შემდეგ, მარკო რუბიომ და სომხეთის საგარეო საქმეთა მინისტრმა არარატ მირზოიანმა პროექტის - „ტრამპის მარშრუტი საერთაშორისო მშვიდობისა და კეთილდღეობისთვის“ (TRIPP) განხორციელების ჩარჩო დოკუმენტი წარადგინეს. ჩარჩო დოკუმენტის თანახმად, სომხეთი „ტრამპის მარშრუტის“ მშენებლობის გრძელვადიან ექსკლუზიურ უფლებებს აშშ-ის მიერ კონტროლირებად კომპანიას 49 წლის ვადით გადასცემს, რომელიც შეიძლება, დამატებით 50 წლით გაგრძელდეს. კერძოდ, კომპანიაში აშშ 74%-იან წილს მიიღებს, ხოლო სომხეთი 26%-იან წილს. ასევე, კომპანია სატრანზიტო დერეფნის გასწვრივ სარკინიგზო ხაზს, გზას, ენერგომომარაგების ქსელებს და სხვა სახის ინფრასტრუქტურას ააშენებს. ასევე, დოკუმენტში აღნიშნულია, რომ სომხეთს „TRIPP-ის გავლით ვაჭრობისა და ტრანზიტის დროს საზღვრის კონტროლსა და საბაჟო ოპერაციებზე სრული უფლებამოსილება ექნება.“ 6-გვერდიანი დოკუმენტი გაგრძელებაა 2025 წლის 8 აგვისტოს დონალდ ტრამპს, ნიკოლ ფაშინიანსა და ილჰამ ალიევს შორის გაფორმებული ხელშეკრულების, რომლის თანახმადაც, სომხეთი და აზერბაიჯანი საბოლოო ორმხრივი სამშვიდობო შეთანხმებისკენ ისწრაფვიან. დოკუმენტის თანახმად, პროექტი „დააკავშირებს აზერბაიჯანის ძირითად ნაწილსა და ნახიჩევანის ავტონომიურ რესპუბლიკას ერთმანეთთან და შექმნის სასიცოცხლოდ მნიშვნელოვან კავშირს „ტრანსკასპიურ სავაჭრო გზაზე“ - რასაც სხვაგვარად, „შუა დერეფანს“ უწოდებენ [რედ]. რა ვალდებულებებს (თუმცა არა სამართლებრივს) იღებს ერევანი, რათა პროექტი, „ტრამპის მარშრუტი საერთაშორისო მშვიდობისა და კეთილდღეობისთვის“ (TRIPP), განხორციელდეს. შეიქმნება „TRIPP-ის განვითარების კომპანია“ - მოკლედ TDC, - რომლის 74%-საც სომხეთი აშშ-ს გადასცემს, ხოლო 26%-ს თავისთვის დაიტოვებს. ეს კომპანია იქნება პასუხისმგებელი TRIPP-ის განვითარებაზე; როგორც დოკუმენტში წერია, „არსებობს მოლოდინი“, რომ პროექტის ადმინისტრირების უფლება, „საწყის ეტაპზე“, 49 წლით ექნება. „არსებობს მოლოდინი, რომ შეთანხმება გახანგრძლივდება დამატებით 50 წლით, სომხეთის მთავრობის მიერ დამატებითი კაპიტალის შეტანით, რის შედეგადაც მისი წილი 49%-მდე გაიზრდება,“ - წერია დოკუმენტში. ამასთან, აშშ იტოვებს უფლებას, თქვას საბოლოო სიტყვა კომპანიის მეწილეებისა და საბოლოო ბენეფიციარების რაიმე ფორმით ცვლილების შესახებ - მათ შორის წილის გაყიდვაზე, დონაციაზე, რეორგანიზაციასა თუ სხვა სამართლებრივ პროცესზე. ხაზგასმულია, რომ პროექტის წარმატება დამოკიდებულია სომხეთ-აზერბაიჯანს შორის „მშვიდობის ინსტიტუციონალიზაციაზე“, სომხეთ-თურქეთის ურთიერთობების „სრულ ნორმალიზაციაზე“, აშშ-ის ჩართულობაზე, რეგიონული თანამშრომლობასა და სტაბილურობაზე და სომხეთის ინსტუტიტების ეფექტურობაზე. „TRIPP-ი წარმოადგენს სომხეთსა და შეერთებულ შტატებს შორის სტრატეგიული პარტნიორობის გაღრმავებას. სომხეთი ამ პროექტს მიიჩნევს ინფრასტრუქტურის, ეკონომიკური განვითარებისა და რეგიონული ინტეგრაციის სფეროში გრძელვადიანი თანამშრომლობის საფუძვლად,“ - წერია დოკუმენტში. „TRIPP-ის შემუშავება იგეგმება სომხეთის ტერიტორიაზე განსაზღვრული სატრანზიტო მარშრუტების ფარგლებში, - რომლის კონკრეტული ადგილებიც მომავალში დაზუსტდება“; ხაზგასმულია, რომ ეს მოხდება „სომხეთის სუვერენული ტერიტორიის ფარგლებში პროექტის ყველა არეალზე სომხეთის სრული სუვერენიტეტის შენარჩუნებით“. „ჩარჩო დოკუმენტი ასახავს კონკრეტულ გზას TRIPP-ის ამოქმედებისთვის, რომლის მიზანი სომხეთის ტერიტორიაზე შეუფერხებელი, მრავალმოდალური სატრანზიტო კავშირის დამყარებაა. აზერბაიჯანის ძირითადი ნაწილისა და მისი ნახიჩევანის ავტონომიური რესპუბლიკის დაკავშირებისა და ტრანსკასპიური სავაჭრო მარშრუტის დამაკავშირებელი გზის შექმნის პარალელურად, TRIPP-ი ორმხრივ სარგებელს მოუტანს სომხეთის რესპუბლიკას საერთაშორისო და სახელმწიფოთაშორისი კავშირების თვალსაზრისით. TRIPP-ი პრეზიდენტ ტრამპის მიერ 8 აგვისტოს გამართულ ისტორიულ მშვიდობის სამიტის პრინციპებს ეფუძნება და სუვერენიტეტის, ტერიტორიული მთლიანობისა და ორმხრივი ურთიერთობის მნიშვნელობას ხაზს უსვამს,“ - ნათქვამია თავის მხრივ, აშშ-ის სახელმწიფო დეპარტამენტის განცხადებაში. „ვფიქრობთ, TRIPP-ის შეთანხმება ნამდვილად გახდება მსოფლიოსთვის მოდელი იმისა, თუ როგორ შეგიძლიათ, გახსნათ საკუთარი თავი ეკონომიკური აქტივობისა და კეთილდღეობისთვის.“ მანაც გაუსვა ხაზი, რომ ეს ხდება „სუვერენიტეტის ყოველგვარი კითხვის ნიშნის ქვეშ დაყენებისა და ტერიტორიული მთლიანობის შელახვის გარეშე.“ ამერიკელი დიპლომატის შეფასებით, TRIPP-ის პროექტი ვაჭრობის, ტრანზიტისა და ენერგეტიკული ნაკადების კუთხით, სამხრეთ კავკასიის პოტენციალს გახსნის, რაც ხელს შეუწყობს კეთილდღეობისა და უსაფრთხოების გაზრდას მთელ რეგიონში.“ „ჩვენ ვფიქრობთ, რომ ეს შესანიშნავი იქნება სომხეთისთვის, შესანიშნავია შეერთებული შტატებისთვის, შესანიშნავია ყველა ჩართული მხარისთვის, მაგრამ საბოლოო ჯამში, მოდელი იქნება მსოფლიოსთვის.“ რა საკითხებს განიხილავენ მირზოიანი და რუბიო ვაშინგტონში შეგახსენებთ, 2025 წლის 8 აგვისტოს აშშ-ის პრეზიდენტ დონალდ ტრამპის ინიციატივით ვაშინგტონში შედგა სამშვიდობო სამიტი აზერბაიჯანისა და სომხეთის ლიდერების მონაწილეობით, რომელზეც ხელი მოეწერა როგორც სამმხრივ, ასევე, ორმხრივ შეთანხმებებს. ამავე სამიტზე გამოცხადდა სატრანსპორტო დერეფნის პროექტი სახელწოდებით „ტრამპის მარშრუტი საერთაშორისო მშვიდობისა და კეთილდღეობისთვის“ (TRIPP).
რა საკითხებს განიხილავენ მირზოიანი და რუბიო ვაშინგტონში
აშშ-ის სახელმწიფო დეპარტამენტის ცნობით, აშშ-ის სახელმწიფო მდივანი მარკო რუბიო სამშაბათს, სახელმწიფო დეპარტამენტში მიიღებს სომხეთის საგარეო საქმეთა მინისტრ არარატ მირზოიანს. შეხვედრა ადგილობრივი დროით საღამოს 9 საათზეა დაგეგმილი. მოგვიანებით მათ შეუერთდება აშშ-ის სახელმწიფო მდივნის მოადგილე ალისონ ჰუკერი, შემდეგ კი, სახელმწიფო დეპარტამენტის ევროპისა და ევრაზიის საკითხებში ბიუროს უფროსი წევრი ბრენდან ჰანრაჰანი. „მხარეები გეგმავენ ერთობლივი განცხადების მიღებას [ტრამპის მარშრუტი საერთაშორისო მშვიდობისა და კეთილდღეობისთვის] TRIPP-ის განხორციელების ჩარჩოს შესახებ,“ - ნათქვამია სომხეთის საგარეო საქმეთა სამინისტროს პრესსამსახურის ინფორმაციაში, რომლის თანახმად, მირზოიანის სამუშაო ვიზიტი ორდღიანია. ამასთან, აშშ-ის სავაჭრო და განვითარების სააგენტოს (USTDA) ახლო აღმოსავლეთის, ჩრდილოეთ აფრიკის, ევროპისა და ევრაზიის რეგიონული დირექტორის კარლ კრესის ხელმძღვანელობით, ამერიკული დელეგაცია აზერბაიჯანის შემდეგ, სომხეთს ეწვევა. დელეგაცია ორშაბათს, აზერბაიჯანის დედაქალაქ ბაქოში, აზერბაიჯანის საგარეო საქმეთა მინისტრის მოადგილემ, ელნურ მამედოვმა მიიღო. მათ განიხილეს პროექტის „ტრამპის გზა საერთაშორისო მშვიდობისა და კეთილდღეობისთვის“ (TRIPP) განხორციელების პერსპექტივები. აშშ „ტრამპის მარშრუტისთვის“ პირველი დაფინანსების გამოყოფას გეგმავს სააგენტოს წარმომადგენლების სამუშაო ვიზიტი მოიცავს საქართველოში, აგრეთვე ბოსნია - ჰერცეგოვინაში არსებული შესაძლებლობების შესწავლას, რომლებიც მიმართული იქნება სატრანსპორტო დერეფნების განვითარებაზე. რაც შეეხება თბილისს, ეკონომიკისა და მდგრადი განვითარების მინისტრის მოადგილეები გენადი არველაძე და ინგა ფხალაძე კარლ კრესს უკვე შეხვდნენ. ეკონომიკის სამინისტროს ინფორმაციით, შეხვედრაზე ყურადღება გამახვილდა შუა დერეფანზე, მისი განვითარების მიზნით საქართველოს მთავრობის მიმდინარე და დაგეგმილ პროექტებზე, აგრეთვე, ამ პროცესში ამერიკული სააგენტოს მიერ ტექნიკური მხარდაჭერის აღმოჩენის შესაძლებლობებზე. "ხაზი გაესვა ისეთი რეგიონული ინიციატივების განვითარების მნიშვნელობას, როგორიცაა CAREC (ცენტრალური აზიის რეგიონული ეკონომიკური თანამშრომლობის პროგრამა), TRACECA (ევროპა - კავკასია - აზიის სატრანსპორტო დერეფანი), ტრანს-ევროპული სატრანსპორტო ქსელი და სხვ. ქართულმა მხარემ ყურადღება გაამახვილა რეგიონული მნიშვნელობის პროექტებზე, რომელთა სრულად ამოქმედება გაზრდის ჩვენი ქვეყნის, როგორც სატრანსპორტო ჰაბის განვითარებას. ასეთ პროექტებს შორის დასახელდა ანაკლიის ღრმაწყლოვანი ნავსადგური, საქართველოს რკინიგზის მოდერნიზება, ბაქო - თბილისი - ყარსის რკინიგზის დასრულება, აღმოსავლეთ - დასავლეთის მაგისტრალის სრულად ამოქმედება, თბილისის ახალი საერთაშორისო აეროპორტის მშენებლობა და სხვ. შეხვედრაზე ასევე აქცენტი გაკეთდა ისეთ პროექტებზე, რომლებიც ზრდიან საქართველოს, როგორც სატრანზიტო ჰაბის ფუნქციას სხვადასხვა სექტორებში, მათ შორის, აქცენტი გაკეთდა შავი ზღვის წყალქვეშა კაბელის პროექტზე, რომელიც საქართველოს ევროკავშირის ენერგეტიკულ ბაზარს დააკავშირებს. აშშ - ის ვაჭრობისა და განვითარების სააგენტოს მხრიდან გამოითქვა დაინტერესება იმ პროექტების მიმართ, რომლებიც მიმართულია შუა დერეფნის შემდგომ განვითარებაზე," - წერია სამინისტროს მიერ გავრცელებულ ინფორმაციაში.
რომელ ქვეყნებს აქვთ ბიზნესურთიერთობები ირანთან და რას ნიშნავს აშშ-ის ტარიფები
წყარო - BBC ირანთან ვაჭრობის მქონე 100-ზე მეტი ქვეყნიდან, ჩინეთი მისი უმსხვილესი საექსპორტო პარტნიორია. Trade Data Monitor-ის მონაცემებით, რომლებიც ირანის ისლამური რესპუბლიკის საბაჟო ადმინისტრაციის სტატისტიკას ეფუძნება, 2025 წლის ოქტომბრამდე პერიოდში, მან ირანიდან 14 მილიარდ დოლარზე მეტი (10.4 მილიარდი ფუნტი სტერლინგი) პროდუქტი შეიძინა. ჩინეთს მოსდევს ერაყი, რომელმაც მეზობლისგან 10.5 მილიარდი დოლარის ღირებულების საქონელი მიიღო. ირანი ასევე თავის უმსხვილეს მომხმარებლებს შორის არაბთა გაერთიანებულ საამიროებს და თურქეთს ითვლის. ირანიდან თურქეთში ექსპორტი მნიშვნელოვნად გაიზარდა 2024 წლის 4.7 მილიარდი დოლარიდან 7.3 მილიარდ დოლარამდე. ექსპორტის თითქმის ყველა პროდუქტი, საწვავთან არის დაკავშირებული - ის მსოფლიოში ნავთობის ერთ-ერთი უდიდესი მწარმოებელია. ასევე სხვა ქვეყნებში აგზავნის საკვებს, მათ შორის, ფსტას და პომიდორს. ირანის იმპორტის დაახლოებით მესამედს საკვები პროდუქტები შეადგენს. კერძოდ, სიმინდი, ბრინჯი, მზესუმზირის თესლი და ზეთები, ასევე, სოიო. თუმცა ირანის ყველაზე დიდი იმპორტი ოქროა. ოქტომბრამდე 12 თვეში მან 6.7 მილიარდი დოლარის ღირებულების ოქრო შეიტანა, წინა წლის 4.8 მილიარდ დოლართან შედარებით. ამერიკა ირანის ბიზნესპარტნიორებს 25%-იან ტარიფებს უწესებს თეთრი სახლიდან ჯერ არ გავრცელებულა დეტალები იმის შესახებ, თუ როგორ იმუშავებს ახალი ტარიფები პრაქტიკაში, ან კონკრეტულად რომელ ქვეყნებზე გავრცელდება. ასევე გაურკვეველია, დაემატება თუ არა 25%-იანი გადასახადი ტრამპის ადმინისტრაციის მიერ უკვე დაწესებულ არსებულ ტარიფებს. ცნობისთვის, ირანს ნავთობის უზარმაზარი მარაგი აქვს და ის მსოფლიოში ნავთობის 10 უმსხვილეს მწარმოებელს შორის არის. ეს დიდი სიმდიდრის წყარო უნდა იყოს. თუმცა მისი ეკონომიკა წლების განმავლობაში სახელმწიფო ფინანსების არასწორი მართვის, ნავთობის გაყიდვების შემცირებისა და მკაცრი საერთაშორისო სანქციების გამო დაზარალდა. ქვეყნის 92 მილიონი მოსახლიდან ბევრს უჭირს ისეთი ძირითადი პროდუქტებით სარგებლობა, როგორიცაა, საკვები და კომუნალური მომსახურება, ხოლო ცხოვრების ღირებულება ბოლო კვირების განმავლობაში მიმდინარე პროტესტების ცენტრშია. BBC-ის ანალიზის თანახმად, ოჯახების ხარჯები 2008 წლის პიკთან შედარებით შემცირდა, ხოლო ქალების შრომისუნარიანობაზე მთავრობის მიერ დაწესებულმა შეზღუდვებმა დასაქმების მაჩვენებელი ორი ათწლეულის წინანდელი 42.4%-დან დაახლოებით 37%-მდე შეამცირა. ამავდროულად, მაღალი ინფლაციის გამო, რომელმაც ოქტომბერში 48.4%-ს მიაღწია, მთავრობის პოლიტიკის ცვლილებების ფონზე, რამაც რიალის ღირებულების აშშ დოლართან მიმართებაში ვარდნა გამოიწვია. „დეკემბერში საწვავის სუბსიდიების შემცირება და ამ უახლესი ტარიფების გამო, საგარეო ვაჭრობის კიდევ უფრო შემცირება ნიშნავს, რომ ინფლაცია შესაძლოა, კიდევ უფრო გაიზარდოს და ეკონომიკას კიდევ უფრო მეტად კოლაფსისკენ უბიძგოს,“ - წერს BBC.
რა სტრატეგიული მნიშვნელობა აქვს რეგიონულ სატრანსპორტო პროექტებს - NATO-ს ხედვა
NATO-ს შეფასებით, რა სტრატეგიული მნიშვნელობა აქვს „შუა დერეფანს“, ე.წ. „ტრამპის მარშრუტს“ და სხვა რეგიონულ სატრანსპორტო პროექტებს? „რეგიონული უსაფრთხოების, მშვიდობის დღის წესრიგისა და სტრატეგიული კავშირების აქტუალური საკითხები“ განიხილა NATO-ს სამეკავშირეო ოფისის ხელმძღვანელმა ალექსანდრე ვინიკოვმა აზერბაიჯანულ მედიასთან ინტერვიუში. NATO-ს მაღალჩინოსნის თქმით, სამხრეთ კავკასიას, უდავოდ, აქვს პოტენციალი, გახდეს ადამიანების, საქონლისა და მომსახურების გადაადგილების მთავარი სატრანსპორტო ცენტრი, თუმცა, ამ პოტენციალის რეალიზება მოითხოვს თანამედროვე ინფრასტრუქტურის განვითარებას და ნამდვილ ინტერმოდალობას, რაც უზრუნველყოფს ეფექტიან გადაზიდვებს მრავალ ეტაპზე, ქვეყანაში და მრავალფეროვან გეოგრაფიულ პირობებში. „ვაშინგტონში 8 აგვისტოს შეთანხმება და მისი შემდგომი მოვლენები, მათ შორის, რეგიონული კავშირის ქსელის შექმნა, რომელიც ძირითადად აზერბაიჯანს, სომხეთსა და თურქეთს აკავშირებს და უფრო ფართოდ აკავშირებს ცენტრალურ აზიას ევროპასთან, აშკარად ქმნის ასეთ შესაძლებლობებს. მიუხედავად ამისა, აუცილებელია, რომ ეს ინიციატივები, მათი დანიშნულების მიუხედავად, ნამდვილად ემსახურებოდეს რეგიონის ქვეყნების ინტერესებს. მათ უნდა მისცენ ყველა რეგიონულ მოთამაშეს საშუალება, სრულად გააცნობიერონ თავიანთი ეკონომიკური და სატრანზიტო პოტენციალი, ამავდროულად, ხელი შეუწყონ მშვიდობის დამყარებას და გრძელვადიან სტაბილურობას. ეს პრინციპები TRIPP-ის ბირთვს წარმოადგენს, რომელსაც აქვს პოტენციალი, გახსნას მნიშვნელოვანი ეკონომიკური შესაძლებლობები მთელი სამხრეთ კავკასიის რეგიონის სასარგებლოდ. ჩვენ მტკიცედ გვჯერა, რომ სამხრეთ კავკასიაში ჩვენს პარტნიორებთან თანამშრომლობა მნიშვნელოვან წვლილს შეიტანს უსაფრთხოებასა და სტაბილურობაში ჩვენს საერთო სამეზობლოში და, უფრო ფართოდ, მთელ ტრანსატლანტიკურ რეგიონში,“ - აღნიშნავს ვინიკოვი. იმის გათვალისწინებით, რომ რუსეთიც და ირანიც სამხრეთ კავკასიას თავიანთი სტრატეგიული გავლენის სფეროს ნაწილად მიიჩნევენ, როგორ აბალანსებს NATO თანამშრომლობას აზერბაიჯანთან ამ რეგიონული დაძაბულობის ფონზე? ამ შეკითხვის საპასუხოდ, NATO-ს მაღალჩინოსანი ამბობს, რომ ალიანსის თანამშრომლობა რეგიონის სამივე ქვეყანასთან ეფუძნება მოთხოვნაზე ორიენტირებულ პრინციპს: „ჩვენ ვთანამშრომლობთ მხოლოდ იმ ფარგლებში, რასაც ჩვენი პარტნიორები მოითხოვენ (და როგორც ამას ჩვენი მოკავშირეები გადაწყვეტენ). ჩვენ არ ვახვევთ თავს საკუთარ დღის წესრიგს და არც ვაიძულებთ თანამშრომლობას რაიმე საშუალებით. ამის ნაცვლად, ჩვენ ყურადღებით ვუსმენთ ჩვენი პარტნიორების მხარდაჭერის თხოვნებს და ვცდილობთ, რაც შეიძლება ეფექტიანად ვუპასუხოთ იმ სფეროებში, რომლებიც ემსახურება ჩვენი პარტნიორების საჭიროებებს და სადაც NATO-ს შეუძლია დამატებითი ღირებულების უზრუნველყოფა.“ ამავე ინტერვიუში ვინიკოვმა ხაზი გაუსვა, რომ NATO მიესალმა ნორმალიზაციის პროცესში ბოლო დროს განვითარებულ მოვლენებს და მხარს უჭერს აზერბაიჯანისა და სომხეთის ყველა კონსტრუქციულ ძალისხმევას მდგრადი სამშვიდობო შეთანხმების მისაღწევად. „ეს შავი ზღვის რეგიონში სტაბილურობის გასაღებია. ჩვენ არ ვართ ამ პროცესის ნაწილი, მაგრამ ყოველთვის ვაფასებდით და ვუჭერდით მხარს ჩვენი მოკავშირეების ძალისხმევას კონფლიქტის მოგვარების ხელშეწყობის მიზნით. ჩვენ ვაშინგტონში 8 აგვისტოს სამშვიდობო ხელშეკრულების პარაფირებას მნიშვნელოვან ეტაპად მივიჩნევთ მდგრადი მშვიდობის მიღწევისა და რეგიონში კავშირის განბლოკვის გზაზე. ეს, თავის მხრივ, გააძლიერებს რეგიონულ სტაბილურობასა და უსაფრთხოებას და კიდევ უფრო გააძლიერებს პარტნიორობას რეგიონის ცალკეულ ქვეყნებსა და NATO-ს შორის,“ - განაცხადა ვინიკოვმა.
აშშ საქართველოს თავდაცვის სამინისტროს, გრანტის სახით $10 მილიონზე მეტის საქონელს გადასცემს
ამერიკის შეერთებული შტატების მთავრობა საქართველოს თავდაცვის სამინისტროს გრანტის სახით 10 მილიონ აშშ დოლარზე მეტი ღირებულების საქონელს გადასცემს. ამერიკის შეერთებული შტატების მთავრობის მიერ საქართველოს თავდაცვის სამინისტროსათვის გამოყოფილი გრანტების მოწონების შესახებ განკარგულებას საქართველოს პრემიერ-მინისტრი,ირაკლი კობახიძე აწერს ხელს. განკარგულების თანახმად, ამერიკის შეერთებული შტატების მთავრობისგან საქართველოს თავდაცვის სამინისტრო გრანტით განსაზღვრული 10,431,459.90 აშშ დოლარის ღირებულების კავშირგაბმულობის საშუალებებისა და სხვა სახის საქონელს მიიღებს. „საქართველოში საგარეო დახმარების კოორდინაციისა და საქართველოს სამინისტროების მიერ გრანტის გაცემის წესის დამტკიცების შესახებ“ საქართველოს მთავრობის 2015 წლის 1 ივნისის №o238 დადგენილების შესაბამისად, მოწონებულ იქნეს ამერიკის შეერთებული შტატების მთავრობის გადაწყვეტილება საქართველოს თავდაცვის სამინისტროსათვის გრანტების (PB-B-WFK, DT-B-WAZ, PB-B-WFJ, DT-BWBC და DT-B-WBA) ფარგლებში საქონლის (საერთო ღირებულებით – 10,431,459.90 აშშ დოლარი) გადმოცემის შესახებ. „გრანტების შესახებ“ საქართველოს კანონის მე-4 მუხლის „გ“ ქვეპუნქტის შესაბამისად, მიენიჭოს უფლებამოსილება საქართველოს თავდაცვის სამინისტროს, განახორციელოს ამ განკარგულების პირველი პუნქტით გათვალისწინებული ამერიკის შეერთებული შტატების მთავრობის მიერ საქართველოს თავდაცვის სამინისტროსათვის გამოყოფილი გრანტებით განსაზღვრული კავშირგაბმულობის საშუალებებისა და სხვა სახის საქონლის მიღება,” - წერია განკარგულებაში.
NATO-ს სამხედრო კონტინგენტის უსაფრთხოების მიმართულების დირექტორი, გენერალ-მაიორი ერაი უნგუდერი საქართველოს ეწვია
8-11 დეკემბერს NATO-ს საერთაშორისო სამხედრო კონტინგენტის (International Military Staff) უსაფრთხოების საკითხებში თანამშრომლობის მიმართულების დირექტორი, გენერალ-მაიორი ერაი უნგუდერი ოფიციალური ვიზიტით საქართველოს ეწვია. NATO-ს საკემავშირე ოფისის ცნობით, ვიზიტის ფარგლებში NATO-ს სამეკავშირეო ოფისში გამართულ შეხვედრაზე გენერალ მაიორ უნგუდერს, რომელიც მოცემულ თანამდებობაზე მიმდინარე წლის აგვისტოში დაინიშნა, ახლოს გააცნეს NATO-ს სამეკავშირეო ოფისის მიმდინარე თუ სამომავლო საქმიანობა. განსახილველი თემები მოიცავდა თანამშრომლობის ყველა ინსტრუმენტს. „გენერალ მაიორი უნგუდერი ასევე ეწვია NATO-საქართველოს არსებითი პაკეტის (SNGP) ოფისს. NATO-ს ძირითად გუნდთან გამართულ შეხვედრაზე განიხილეს SNGP-ს მიმდინარე ინიციატივები.პროგრამის ფარგლებში გენერალ მაიორმა უნგუდერმა გაცნობითი ხასიათის შეხვედრები გამართა საქართველოს თავდაცვის მინისტრის მოადგილე პაატა პატიაშვილთან და საქართველოს თავდაცვის ძალების უმაღლეს სამხედრო ხელმძღვანელობასთან. მან ასევე მოინახულა NATO-საქართველოს წვრთნებისა და შეფასების ერთობლივი ცენტრი (JTEC) და თავდაცვის ინსტიტუციური აღმშენებლობის სკოლა (DIBS). დასასრულს, გენერალ-მაიორმა უნგუდერმა ოფიციალურად გახსნა NATO-საქართველოს სამხედრო შტაბთა მოლაპარაკებები, რომელიც 2025 წელს უკვე მეოთხედ გაიმართა.
თურქეთი: სამხრეთ კავკასია თანამშრომლობაზე ორიენტირებული ახალი გეოპოლიტიკური ცენტრი ხდება
აზერბაიჯანსა და სომხეთს შორის კონფლიქტი წარსულს ჩაბარდა და რეგიონში არასტაბილურობა თანამშრომლობასა და განვითარებას უთმობს ადგილს, განაცხადა თურქეთის ვიცე-პრეზიდენტმა ჯევდეთ ილმაზმა Report-თან ინტერვიუში. მანვე აღნიშნა, რომ თურქეთი დიდად აფასებს ბაქოსა და ერევნის ერთობლივ ძალისხმევას ამ მიმართულებით: „მზარდი გლობალური კონფლიქტებისა და გაურკვევლობის ეპოქაში, სამხრეთ კავკასიაში მდგრადი სტაბილურობისა და განვითარებისკენ გადადგმული ნაბიჯები აჩვენებს, რომ რეგიონი თანამშრომლობაზე ორიენტირებულ ახალ გეოპოლიტიკურ ცენტრად იქცევა.“ ვიცე-პრეზიდენტმა ასევე განაცხადა, რომ რეგიონი გამოირჩევა თავისი უნიკალური გეოგრაფიული მდებარეობით, რომელიც აღმოსავლეთსა და დასავლეთს შორის სტრატეგიულ კავშირებს, ენერგეტიკულ და სავაჭრო დერეფნებს და განვითარებად ეკონომიკურ ქსელებს უზრუნველყოფს. „დღევანდელ გარემოში, სადაც ენერგეტიკული უსაფრთხოება სულ უფრო მნიშვნელოვანი ხდება, მიწოდების ჯაჭვები დივერსიფიკაციას განიცდის და ახალი სატრანსპორტო მარშრუტები ვითარდება, სამხრეთ კავკასია აგრძელებს თავისი რეგიონული მნიშვნელობის გაზრდას გლობალური ეკონომიკისა და დიპლომატიისთვის,“ - აღნიშნა ილმაზმა.
რას წერს ევროკომისია საქართველოზე უვიზო რეჟიმის შეჩერების მექანიზმის ანგარიშში
პირველ ეტაპზე უვიზო მიმოსვლის შეჩერება შესაძლოა საქართველოს მთავრობის მიერ გაცემული დიპლომატიური, სამსახურებრივი და ოფიციალური პასპორტების მქონეებს შეეხოს. ამის შესახებ ევროკომისიის უვიზო მიმოსვლის შეჩერების მექანიზმის მერვე ანგარიშში წერია. მისივე თანახმად, მეორე ეტაპზე, უვიზო მიმოსვლის შეჩერება შესაძლოა, მთელ მოსახლეობაზე გაფართოვდეს, თუ პრობლემები მოგვარებულ არ იქნება საქართველოს მთავრობის მიერ, საბოლოო ჯამში კი, საქართველომ შესაძლოა, მთლიანად დაკარგოს უვიზო სტატუსი. ევროკომისია ასკვნის, რომ „საქართველომ მნიშვნელოვანი რეგრესი განიცადა მმართველობისა და კანონის უზენაესობის საკვანძო მოთხოვნებზე, რაც უვიზო მიმოსვლის მინიჭების ბაზისს ქმნის.“ „მსგავსად, საქართველომ ასევე რეგრესი განიცადა სავიზო თანხვედრისა და კორუფციის წინააღმდეგ ბრძოლის სფეროებში. ეს ვითარება ვიზალიბერალიზაციის პროცესის დროს აღებული ვალდებულებებისგან უკან დახევის ნათელი მაგალითია და ძირს უთხრის ორმხრივ ნდობას, რაზეც არის უვიზო რეჟიმი დაფუძნებული. ამ უკუსვლის სისტემური და მიზანმიმართული ბუნების გათვალისწინებით, ევროკომისია უვიზო მიმოსვლის შეჩერების განახლებული მექანიზმის ფარგლებში შესაბამის ზომებს განიხილავს. ახალი წესების შესაბამისად, პირველ ეტაპზე უვიზო მიმოსვლის შეჩერება შესაძლოა, საქართველოს მთავრობის მიერ გაცემული დიპლომატიური, სამსახურებრივი და ოფიციალური პასპორტების მქონეებს შეეხოს, ვინც ძირითადად პასუხისმგებლები არიან ევროკომისიის რეკომენდაციების შესასრულებლად უმოქმედობისთვის… მეორე ეტაპზე, [უვიზო მიმოსვლის] შეჩერება შესაძლოა, მთელ მოსახლეობაზე გაფართოვდეს, თუ პრობლემები მოგვარებულ არ იქნება საქართველოს მთავრობის მიერ. საბოლოო ჯამში, საქართველომ შესაძლოა მთლიანად დაკარგოს უვიზო სტატუსი და სავიზო რეგულაციის I დანართში გადაინაცვლოს (სავალდებულო ვიზების მესამე ქვეყნების სია),” - ნათქვამია ანგარიშში. ანგარიშში აღნიშნულია, რომ 2025 წლის 14 ივლისს ევროკომისიამ ფორმალური წერილი გაუგზავნა საქართველოს მთავრობას, რომელშიც აღნიშნული იყო ვიზალიბერალიზაციის მოთხოვნების შესრულების გაგრძელება და უვიზო მიმოსვლის შეჩერების მექანიზმის მე-7 ანგარიშში აღნიშნული რეკომენდაციების შესრულებაზე დეტალური ინფორმაცია მოითხოვა. თუმცა ევროკომისიამ საქართველოსგან მისი რეკომენდაციების შესრულებაზე რაიმე არსებითი პროგრესის შესახებ ვერ შეიტყო. უმეტეს შემთხვევებში კორექტირების შემტანი ზომები არ იყო მიღებული, ხოლო რამდენიმე სხვაში ვითარება კიდევ უფრო გაუარესდა. ანგარიშში აღნიშნულია, რომ ევროკომისიის შეშფოთება საქართველოში მიღებულ რამდენიმე საკანონმდებლო აქტს უკავშირდება, კერძოდ: უცხოური გავლენის გამჭვირვალობის კანონს, ოჯახური ღირებულებებისა და არასრულწლოვნების დაცვის კანონს, უცხოური აგენტების რეგისტრაციის აქტსა და შესწორებებს, რომლებიც შეტანილ იქნა გრანტების შესახებ კანონში, მოქალაქეთა პოლიტიკური შეკრების კანონში, ადმნისტრაციული დარღვევების კოდექსში, მაუწყებლობის კანონში და სისხლის სამართლის კოდექსში. ევროკომისიის თქმით, აღნიშნული კანონები და შესწორებები ზღუდავენ ფუნდამენტურ უფლებებსა და თავისუფლებებს და ეწინააღმდეგებიან საქართველოს ევროპულ და სხვა საერთაშორისო ვალდებულებებს. ხოლო საქართველოს მთავრობამ, შესწორებების ნაცვლად, ამ ზომების ღიად დაცვა დაიწყო ეროვნული სუვერენიტეტის წამოწევით და უგულვებელყო ვიზალიბერალიზაციის დიალოგის დროს აღებული ვალდებულებები. ელჩი ჰერჩინსკი: ნამდვილად გული მწყდება იმის დანახვით, რომ საქართველოს ევროკავშირში ინტეგრაციის პროცესი პრაქტიკულად შეჩერებულია
„როგორ შეძლებს საქართველო, მხარი დაუჭიროს „ტრამპის მარშრუტს“ - სახელმწიფო დეპარტამენტის უფროსი მრჩევლის ვიზიტი
საქართველოს აშშ-ის სახელმწიფო დეპარტამენტის წარმომადგენელი ჯონათან ასკონასი ეწვია. ინფორმაციას აშშ-ის საელჩო სოციალურ ქსელში ავრცელებს. საელჩოს ცნობით, სახელმწიფო დეპარტამენტის წარმომადგენლის ვიზიტის მიზანია, განიხილოს, როგორ შეძლებს საქართველო მხარი დაუჭიროს „ტრამპის მარშრუტს საერთაშორისო მშვიდობისა და კეთილდღეობისათვის.“ საელჩოს ცნობით, ჯონათან ასკონასი საქართველოს საგარეო საქმეთა სამინისტროსა და მთავრობის ადმინისტრაციის, ასევე, საერთაშორისო საფინანსო ინსტიტუტების წარმომადგენლებს შეხვდა. „მოხარულები ვართ, ვუმასპინძლოთ აშშ-ის სახელმწიფო დეპარტამენტის წარმომადგენელს (უფროს მრჩეველს) ჯონათან ასკონასს საქართველოში! მისი ვიზიტის მიზანია, განიხილოს, როგორ შეძლებს საქართველო მხარი დაუჭიროს „ტრამპის მარშრუტს საერთაშორისო მშვიდობისა და კეთილდღეობისათვის“ (TRIPP). ეს სატრანსპორტო მარშრუტი სომხეთსა და აზერბაიჯანს შორის შეერთებული შტატების შუამავლობით 8 აგვისტოს გამართული სამშვიდობო სამიტის შედეგია. დღეს დილით დოქტორი ასკონასი ესტუმრა საბაჟო გამშვებ პუნქტს - "სადახლო საავტომობილო", რომლის მშენებლობა და აღჭურვა დიდწილად აშშ-ის მხარდაჭერით გახდა შესაძლებელი. ვიზიტის ფარგლებში ის ასევე შეხვდება საქართველოს საგარეო საქმეთა სამინისტროსა და მთავრობის ადმინისტრაციის, ასევე საერთაშორისო საფინანსო ინსტიტუტების წარმომადგენლებს,“ - ნათქვამია განცხადებაში. თავის მხრივ, საქართველოს მთავრობის ადმინისტრაციის ცნობით, ადმინისტრციის უფროსი ლევან ჟორჟოლიანი აშშ-ის სახელმწიფო დეპარტამენტის უფროსი მრჩევლის, ჯონათან ასკონასის ხელმძღვანელობით, აშშ-ის სახელმწიფო დეპარტამენტის დელეგაციას შეხვდა. მთავრობის ადმინისტრაციის ინფორმაციით, შეხვედრისას ყურადღება დაეთმო საქართველოს ხელისუფლების მიერ ქვეყნის სატრანზიტო და ე.წ. დაკავშირებადობის ფუნქციის გაძლიერების კუთხით გადადგმულ ნაბიჯებს. „ლევან ჟორჟოლიანმა აშშ-ის მხარეს ინფორმაცია მიაწოდა იმ მნიშვნელოვანი ინვესტიციების შესახებ, რომელსაც საქართველოს მთავრობა, აღნიშნული ფუნქციის განვითარების მიზნით, სარკინიგზო, საგზაო და საპორტო ინფრასტრუქტურაში ახორციელებს. მთავრობის ადმინისტრაციის უფროსმა აღნიშნა, რომ საქართველოს მთავრობა აშშ-თან ურთიერთობების დღეს არსებული დონით კმაყოფილი არ არის და კიდევ ერთხელ ადასტურებს მზაობას სტრატეგიული პარტნიორობის სუფთა ფურცლიდან, კონკრეტული გზამკვლევით განახლებისთვის. შეხვედრაზე განიხილეს საქართველოს პოზიცია ე.წ. „ტრამპის მარშრუტთან“ დაკავშირებით. აღინიშნა „საერთაშორისო მშვიდობისა და კეთილდღეობისათვის ტრამპის მარშრუტის“ (TRIPP) შესაძლო პოზიტიური ეფექტი რეგიონზე აშშ-ის მხარის მიერ ტვირთების მოძრაობის უსაფრთხოების გარანტიების შექმნის თვალსაზრისით. შეხვედრისას, ყურადღება დაეთმო ტრამპის ადმინისტრაციის ძალისხმევის მნიშვნელობას რეგიონში მშვიდობის დამყარების კუთხით. აგრეთვე, დადებითად შეფასდა საქართველოს როლი სომხეთსა და აზერბაიჯანს შორის ურთიერთობების ნორმალიზების თვალსაზრისით. მთავრობის ადმინისტრაციაში გამართულ შეხვედრას საგარეო საქმეთა მინისტრის მოადგილე ალექსანდრე ხვთისიაშვილი და აშშ-ის ელჩის მოვალეობის შემსრულებელი საქართველოში ალან პერსელი დაესწრნენ“, - ნათქვამია ინფორმაციაში. რას მოიცავს 8 აგვისტოს თეთრ სახლში გაფორმებული დეკლარაცია
უკრაინისთვის საჩივრების საერთაშორისო კომისია დაფუძნდა, კონვენციას ხელი საქართველომაც მოაწერა
34 ქვეყანამ და ევროკავშირმა უკრაინისთვის საჩივრების საერთაშორისო კომისია დააფუძნეს. ამის შესახებ ინფორმაციას ევროპის საბჭოს ავრცელებს. მას საქართველოც შეუერთდა, კონვენციას ხელი მოაწერა საქართველოს საგარეო საქმეთა მინისტრმა მაკა ბოჭორიშვილმა. „საერთაშორისო ნორმების უხეში დარღვევა არ უნდა დარჩეს უპასუხოდ. დღეს ჩვენ აქ შევიკრიბეთ იმისათვის, რომ საერთაშორისო საზოგადოების მხრიდან კიდევ ერთი ნაბიჯი გადაიდგას საჭირო სამართლებრივი მექანიზმების შესაქმნელად... საქართველოს ყველაზე კარგად ესმის, თუ რამდენად მნიშვნელოვანია საერთაშორისო ნორმების დაცვა. ჩვენ საკუთარი გამოცდილებით ვიცით უსამართლობის ფასი - მშვიდობიანი მოსახლეობის იძულებითი გადაადგილება, სახლების ნგრევა და დამნაშავეთა დაუსჯელობის შედეგად საზოგადოებაში დარჩენილი მოუშუშებელი იარები,“ - განაცხადა მაკა ბოჭორიშვილმა სიტყვით გამოსვლის დროს. „მსურს, შეგახსენოთ, რომ საქართველო მრავალი წელია, ევროპის საბჭოს წევრია და დღეს დილით მონაწილეობდა კონვენციის ხელმოწერაში. ეს ძალიან დადებითი ელემენტია, ამავდროულად, საჭიროა პროგრესი ჩვენს ერთობლივ მუშაობაში, როგორც ევროპის საბჭოს წევრ სახელმწიფოსთან,“ - განაცხადა ევროპის საბჭოს გენერალურმა მდივანმა ალან ბერსემ. დიპლომატიურ კონფერენციას 50 ქვეყნის ლიდერი და მაღალი დონის წარმომადგენელი დაესწრო, მათ შორის, უკრაინის პრეზიდენტი, ვოლოდიმირ ზელენსკი, მოლდოვის პრეზიდენტი, მაია სანდუ, და ნიდერლანდების პრემიერ-მინისტრი, დიკ სჰოფი. “მოველით, რომ ზიანისა და სარჩლების რეესტრიდან კომპენსაციისთვის ყოველი მექანიზმიდან რეალურ გადასახადებამდე - დაიწყებს მუშაობას და ძლიერ და საკმარის საერთაშორისო მხარდაჭერას მიიღებს, რათა ხალხმა ნამდვილად შეძლოს შეგრძნება, რომ ომით გამოწვეული ნებისმიერი ზიანი შეიძლება ანაზღაურებულ იქნას. ეს ომი, და მისთვის რუსეთის პასუხისმგებლობა, ცხადი მაგალითი უნდა გახდეს - რათა სხვებმა ისწავლონ აგრესიის არარჩევა,” - განაცხადა ზელენსკიმ სიტყვით გამოსვლისას.
ევროკავშირი საქართველოში Alumni ქსელს აფუძნებს
საქართველოში ევროკავშირის წარმომადგენლობის 30-წლისთავთან დაკავშირებით, გაიმართა ღონისძიება, რომელზეც წარმომადგენლობამ ევროკავშირის Alumni (კურსდამთავრებული) ქსელის შექმნის შესახებ გამოაცხადა. ევროკავშირის წარმომადგენლობის ცნობით, შეხვედრას სხვადასხვა ევროპული საგანმანათლებლო პროგრამის მონაწილეები ესწრებოდნენ, რამაც კიდევ ერთხელ წარმოაჩინა მზარდი საგანმანათლებლო და კულტურულ კავშირები საქართველოსა და ევროკავშირს შორის. ამასთანავე, აღინიშნა, რომ ბოლო სამი ათწლეულის განმავლობაში, ევროკავშირსა და საქართველოს შორის ღრმა და განვითარებაზე ორიენტირებული ურთიერთობა, ევროკავშირის მხრიდან საქართველოს განვითარების, სტაბილურობისა და ევროპული მისწრაფებების მიმართ მხარდაჭერის შედეგია. საქართველოში ევროკავშირის ელჩმა, პაველ ჰერჩინსკიმ, დამსწრეებს მიმართა და 30-წლიანი გზის შესახებ ისაუბრა - 1990-იანი წლების ჰუმანიტარული დახმარებიდან დღევანდელ მრავალმხრივ თანამშრომლობამდე, რომელიც მოიცავს ეკონომიკურ ინტეგრაციას, ინსტიტუციურ რეფორმებს, მშვიდობის მშენებლობასა და ხალხთა შორის ურთიერთობებს. ევროკავშირის ელჩმა განსაკუთრებული ყურადღება დაუთმო საგანმანათლებლო მობილობის გავლენასა და ევროკავშირის Alumni ქსელის შექმნის მნიშვნელობას: “ოცდაათი წლის განმავლობაში, ევროკავშირი საქართველოს გვერდით დგას – როგორც კარგ, ისე რთულ დროს. ჩვენ ჩვენი არჩევანი გავაკეთეთ: საქართველო ევროკავშირის ნაწილი უნდა გახდეს. მოვუწოდებ თითოეულ ქართველს, შეინარჩუნოს იმედი, რადგან თქვენი მომავალი ევროპაშია – და ჩვენ ამ გზას ერთად გავაგრძელებთ.” „ევროკავშირის Alumni ქსელის შექმნა მნიშვნელოვანი ნაბიჯია საქართველო–ევროკავშირს შორის ურთიერთობის გაძლიერებისკენ. ქსელი გააერთიანებს გაცვლითი პროგრამების ყოფილ მონაწილეებს, სტუდენტებს, მკვლევრებსა და პროფესიონალებს და მიზნად ისახავს დინამიკური პლატფორმის შექმნას ცოდნის გაზიარებისთვის, თანამშრომლობის ხელშეწყობისა და იმ საერთო ღირებულებების განმტკიცებისთვის, რომლებიც საქართველოსა და ევროკავშირს აერთიანებს,“ - ნათქვამია ევროკავშირის წარმომადგენლობის მიერ გავრცელებულ ინფორმაციაში.
ევროკომისარი მარტა კოსი სომხეთი-აზერბაიჯანი-თურქეთი-ევროკავშირის ფორმატის შექმნის წინადადებით გამოვიდა
ევროკავშირის გაფართოების საკითხების კომისარი მარტა კოსი გამოვიდა წინადადებით, რომ შეიქმნას ოთხმხრივი ფორმატი – სომხეთი-აზერბაიჯანი-თურქეთი-ევროკავშირი, რომელიც სატრანსპორტო კავშირების საკითხებზე იმუშავებს. ამის შესახებ კოსმა სომხეთის საგარეო საქმეთა მინისტრ არარატ მირზოიანთან და ევროკავშირის საგარეო პოლიტიკისა და უსაფრთხოების საკითხების უმაღლეს წარმომადგენელ კაია კალასთან ერთობლივ პრესკონფერენციაზე განაცხადა, როდესაც უპასუხა აზერბაიჯანული მედიის შეკითხვას იმის შესახებ, თუ რას გააკეთებს ევროკავშირი შუა დერეფნის განვითარებისთვის. მან განაცხადა, რომ „ტრამპის მარშრუტი“ (TRIPP დერეფანი) სატრანსპორტო კავშირის ერთ-ერთი კომპონენტია, მაგრამ ის უნდა იყოს დაკავშირებული როგორც დასავლეთთან, ასევე, აღმოსავლეთთან. „ოქტომბერში დავიწყეთ ამ თემის განხილვა. დღეს მინისტრს ვთხოვე, წარმოგვედგინა სომხეთის პრიორიტეტები ტრანსპორტის დაკავშირებადობის დღის წესრიგში და შემდეგ, ერთად განვიხილავთ მათ,“ – აღნიშნა კოსმა. მისი თქმით, შესაძლებელია, გადაიდგას მრავალი ნაბიჯი დაკავშირებადობის მიმართულებით, თუმცა ეს შესაძლებელი იქნება მხოლოდ მშვიდობიან გარემოში. ბრიუსელში გაიმართა სომხეთ-ევროკავშირის პარტნიორობის საბჭოს მეექვსე შეხვედრა. შეხვედრის შედეგებით სომხეთმა და ევროკავშირმა ხელი მოაწერეს სტრატეგიული პარტნიორობის ახალ დღის წესრიგს. დოკუმენტს ხელი მოაწერეს სომხეთის საგარეო საქმეთა მინისტრმა არარატ მირზოიანმა და ევროკავშირის საგარეო და უსაფრთხოების პოლიტიკის საკითხების უმაღლესმა წარმომადგენელმა კაია კალასმა. დოკუმენტი ცვლის 2017 წლის პარტნიორობის პრიორიტეტებს და ადგენს უფრო ამბიციურ გზამკვლევს, რომელიც ეფუძნება ყოვლისმომცველი და გაფართოებული პარტნიორობის შეთანხმებას (CEPA). ევროკავშირი სომხეთს ენერგეტიკული დივერსიფიკაციისა და არჩევნებზე უცხოური ჩარევის საწინააღმდეგოდ, ფინანსურ დახმარებას გამოუყოფს
სენატის უმრავლესობის ლიდერმა, თავდაცვის ავტორიზაციის აქტში „MEGOBARI აქტის“ დამატებაზე, სპიკერ ჯონსონის თხოვნა დაბლოკა - The Hill
The Hill-ი წყაროებზე დაყრდნობით ავრცელებს ინფორმაციას, რომ აშშ-ის სენატის უმრავლესობის ლიდერმა ეროვნული თავდაცვის ავტორიზაციის აქტში „MEGOBARI აქტის“ დამატების შესახებ წარმომადგენელთა პალატის სპიკერის თხოვნა დაბლოკა. გამოცემის ინფორმაციით, აშშ-ის წარმომადგენელთა პალატის სპიკერმა მაიკ ჯონსონმა („რესპუბლიკური პარტია“) აშშ-ის სენატის უმრავლესობის ლიდერს, ჯონ ტუნის („რესპუბლიკური პარტია“) პირადი თხოვნით გასულ თვეში მიმართა. ამავე წყაროს ცნობით, ბოლო სამი თვის განმავლობაში ტუნიმ „MEGOBARI აქტის“ ეროვნული თავდაცვის ავტორიზაციის აქტში (NDAA) დამატების თხოვნა უკვე მეორედ დაბლოკა. The Hill-ი წერს, რომ „MEGOBARI აქტის“ მხარდასაჭერად ჯონსონის ჩარევა მოულოდნელი იყო. „სპიკერი ჯონსონის ლობირება მისასალმებელი იყო, თუმცა არსაიდან გაჩნდა. ვფიქრობდით, რომ კანონპროექტი მკვდარი იყო, მას შემდეგ რაც ტუნიმ იგი სექტემბერში დაბლოკა. ვცადეთ, რომ კანონპროექტი სპიკერის თხოვნით ბოლო წამს NDAA-ში შეგვეტანა, თუმცა ტუნის წინააღმდეგობა ვერ გადავლახეთ“, - განუცხადა გამოცემას ერთ-ერთი კონგრესმენის თანაშემწემ. წყაროების თქმით, ჯონსონი 21 ნოემბრის შემდეგ ცდილობდა, რომ თანაშემწეები მხარდაჭერისთვის „რესპუბლიკელებსა“ და „დემოკრატებს“ დაკავშირებოდნენ, რათა „MEGOBARI აქტის“ NDAA-ში დამატება მომხდარიყო. „ტუნიმ კატეგორიული უარი განაცხადა,“ - აღნიშნა ერთ-ერთმა თანაშემწემ. ცნობისთვის, The Hill-მა ჯერ კიდევ სექტემბერში გაავრცელა ინფორმაცია, რომ სენატის უმრავლესობის ლიდერმა ჯონ ტუნიმ „MEGOBARI აქტის“ აშშ-ის ეროვნული თავდაცვის ავტორიზაციის აქტში დამატება სენატორი მარკუეინ მალინის („რესპუბლიკური პარტია“) თხოვნით დაბლოკა. ჯონსონისა და ტუნის ოფისებმა უარი თქვეს კომენტარის გაკეთებაზე.
აზერბაიჯანმა, თურქეთმა და საქართველომ ანკარაში ერთობლივი წვრთნები ჩაატარეს
დამტკიცებული ყოველწლიური თანამშრომლობის გეგმის შესაბამისად, ანკარაში, აზერბაიჯანის, თურქეთის და საქართველოს სპეციალური დანიშნულების რაზმების მონაწილეობით, ერთობლივი ტაქტიკურ-სპეციალური წვრთნა „კავკასიური არწივი – 2025“ ჩატარდა. აზერბაიჯანის თავდაცვის სამინისტროს ცნობით, წვრთნა, რომელიც რეგიონში უსაფრთხოებისა და თავდაცვის სფეროებში სამ მოძმე ქვეყანას შორის თანამშრომლობის შემდგომ გაძლიერებაზე იყო ორიენტირებული, განსაკუთრებული მნიშვნელობისაა მონაწილე დანაყოფების ურთიერთქმედების, სწრაფი რეაგირების, კოორდინაციისა და საბრძოლო მომზადების შესაძლებლობების გაფართოების თვალსაზრისით. „წვრთნის დროს, სპეციალური დანიშნულების რაზმებმა, სარაკეტო-არტილერიის და საავიაციო დანაყოფებთან კოორდინაციით, წარმატებით შეასრულეს თავიანთი ამოცანები სხვადასხვა ეპიზოდში, აჩვენეს მაღალი მზადყოფნა და ტაქტიკური მოქნილობა. სამხედრო მოსამსახურეთა ჯგუფს, რომლებმაც წვრთნების დროს თავი გამოიჩინეს, სამსახურებრივი მოვალეობის შესრულებისას გამოვლენილი სამაგალითო დისციპლინისა და პროფესიონალიზმისთვის შესაბამისი ჯილდოები გადაეცათ,“ წერს მედია აზერბაიჯანის თავდაცვის უწყებაზე დაყრდნობით.
ევროკავშირმა სომხეთს ვიზალიბერალიზაციის სამოქმედო გეგმა გადასცა
ოთხშაბათს, 5 ნოემბერს, სომხეთში ვიზიტის დროს, ევროკომისიის (EU) მიგრაციისა და შინაგან საქმეთა გენერალური დირექტორის მოადგილემ იოჰანეს ლუხნერმა, ვიზალიბერალიზაციის დიალოგის საკითხებში სომხური მხარის წარმომადგენელს, სომხეთის შინაგან საქმეთა მინისტრ არპინე სარგსიანს სომხეთ-ევროკავშირის ვიზალიბერალიზაციის სამოქმედო გეგმა გადასცა. დოკუმენტის მიღებისთანავე, სარგსიანმა აღნიშნა, რომ ეს სომხეთსა და ევროკავშირს შორის პარტნიორობის მნიშვნელოვან ეტაპს აღნიშნავს. ორივე მხარემ კმაყოფილება გამოთქვა მიღწეული პროგრესის გამო და განაცხადა, რომ ევროკავშირის ვიზების ლიბერალიზაციის სამოქმედო გეგმის ოფიციალური გადაცემა ნამდვილი ერთობლივი ძალისხმევის დასტურია. სომხურმა მხარემ კიდევ ერთხელ დაადასტურა თავისი ერთგულება სამოქმედო გეგმაში ასახული ზომების განხორციელების მიმართ, რომლის საბოლოო მიზანია სომხეთის მოქალაქეებისთვის ევროკავშირში ღირსეული, უსაფრთხო და მარტივი მოგზაურობის უზრუნველყოფა. სამოქმედო გეგმის წარდგენა მოჰყვა სომხეთსა და ევროკავშირს შორის სავიზო რეჟიმის ლიბერალიზაციის შესახებ ოფიციალური მოლაპარაკებების დაწყებას 2024 წლის სექტემბერში. ევროკავშირის წარმომადგენლებმა ხაზგასმით აღნიშნეს, რომ სანამ ევროკავშირის საბჭო და ევროპარლამენტი საბოლოო გადაწყვეტილებას მიიღებენ, სომხეთმა ყველა კრიტერიუმი სრულად უნდა დააკმაყოფილოს. მარტში სომხეთის პარლამენტმა მიიღო კანონპროექტი, რომელიც მთავრობას მოუწოდებდა ევროკავშირში წევრობაზე განაცხადის შეტანის პროცესის დაწყებისკენ. კანონპროექტი, რომელიც ცნობილია როგორც „ევროკავშირში ინტეგრაციის აქტი“, მომდევნო თვეში ქვეყნის პრეზიდენტმა მოაწერა ხელი, რამაც ის ოფიციალურად სომხეთის კანონმდებლობის ნაწილად აქცია. ფაშინიანი: სომხეთის ევროკავშირში ინტეგრაცია საქართველოს ევროპულ პერსპექტივასთან არის დაკავშირებული
ევროკომისიამ გაფართოების ყოველწლიურ ანგარიშში, საქართველოს შესახებ კრიტიკული დასკვნა გამოაქვეყნა
ევროკავშირის ელჩმა საქართველოში პაველ ჰერჩინსკიმ საქართველოს ხელისუფლებას გადასცა ანგარიში 2025 წლის გაფართოების შესახებ. ევროკავშირის წარმომადგენლობის ცნობით, ანგარიშში ასახულია სერიოზული შეშფოთება საქართველოში სიტუაციის მკვეთრი გაუარესების გამო, აღნიშნულია უპრეცედენტო უკუსვლა გაწევრიანებისთვის საჭირო ფუნდამენტური პრინციპებისა და 9 ნაბიჯის მიმართებაში. მასში ასევე მკაფიოდ აღწერილია ის ქმედებები, რომლებიც საჭიროა საქართველოსთვის ევროკავშირის გზაზე დასაბრუნებლად. ევროკავშირის კარი საქართველოსთვის ღია რჩება, თუ ხელისუფლება ევროკავშირის ღირებულებებსა და პრინციპებს დაუბრუნდება. ევროკომისია აცხადებს, რომ საქართველოს „კანდიდატი ქვეყნის მხოლოდ სახელი აქვს“ და რომ ქვეყანამ „სერიოზული დემოკრატიული უკუსვლა“ განიცადა, მათ შორის კანდიდატ ქვეყნებს შორის „უპრეცედენტო“ შემზღუდავი კანონების გამო. ევროკავშირის გაფართოების პოლიტიკის შესახებ კომუნიკაციაში, 60-გვერდიან დოკუმენტში, რომელიც 4 ნოემბერს გამოქვეყნდა, კომისიამ განაცხადა, რომ სიტუაცია „მნიშვნელოვნად გაუარესდა“ მას შემდეგ, რაც ევროპულმა საბჭომ 2024 წლის დეკემბერში სინანული გამოთქვა თბილისის მიერ გაწევრიანების პროცესის 2028 წლამდე შეჩერების გადაწყვეტილებასთან დაკავშირებით. რაც შეეხება საგარეო და უსაფრთხოების პოლიტიკასთან შესაბამისობას, კომისია აცხადებს, რომ საქართველოს შესაბამისობა „დაბალი რჩება“. ანგარიშში ასევე გაკრიტიკებულია არჩევნები, დოკუმენტის თანახმად, 2024 წლის ოქტომბრის საპარლამენტო და 2025 წლის ოქტომბრის ადგილობრივი არჩევნები მაღალი პოლარიზაციით გამოირჩეოდა, სადაც ადგილი ჰქონდა „ამომრჩეველთა დაშინებას, იძულებას და ზეწოლას“, რაც ძირს უთხრის თავისუფალ არჩევანს. ანგარიში კიდევ ერთხელ იმეორებს ეუთო/ოდირისა და ვენეციის კომისიის რეკომენდაციებს. კომისია აღნიშნავს, რომ სამართლებრივმა ცვლილებებმა „მნიშვნელოვნად შეარყია სასამართლო სისტემის დამოუკიდებლობა და მთლიანობა“, რაც ამძაფრებს „სასამართლო ხელისუფლების მიტაცების“ რისკებს. ევროკავშირის ელჩი, პაველ ჰერჩინსკი ამბობს, რომ იმ შანსის დაკარვა, რომელიც ახლა საქართველოს ევროკავშირში გაწევრიანების სახით აქვს, ისტორიული შეცდომა იქნება. ასე უპასუხა მან რადიო თავისუფლების ჟურნალისტის კითხვას, რამდენ ხანს იქნება ევროკავშირის კარი ღია საქართველოსთვის“ და რამდენად ახლოს არის საქართველო იმ წერტილთან, როცა შეიძლება, ითქვას, რომ ქვეყანა ვეღარ მიიღებს მონაწილეობას ევროკავშირის გაფართოებაში? „[ევროკომისარმა კოსმა] ახსენა ოთხი ქვეყანა კონკრეტული თარიღების მითითებით ევროკავშირის შემდგომი გაფართოების კონტექსტში. მას, სამწუხაროდ, არ უხსენებია საქართველო გაფართოების შემდეგი ეტაპის ფარგლებში. თქვენი კითხვა იყო, არის თუ არა ძალიან გვიან. ჩემი პასუხია, არასდროს არის ძალიან გვიან. მას შემდეგ, რაც ვიცხოვრე და გავიცანი ქართველები, მე დარწმუნებული ვარ, რომ თუ იქნება სურვილი, იქნება ამის მიღწევის საშუალება. რა გვაკლია ახლა?! - მზადყოფნა, სურვილი. მე იმედი მაქვს, რომ კვლავაც არსებობს შანსი საქართველო გახდეს ევროკავშირის ნაწილი შემდეგი გაფართოებით. იმ შემთხვევაშიც, თუკი ასე არ მოხდება იმ ტრაექტორიიდან გამომდინარე, რომელიც საქართველოს ხელისუფლებამ ამჟამად აიღო, შემდეგი გაფართოება არ იქნება უკანასკნელი გაფართოება. ასე რომ, კვლავაც იქნება იმედი მომავალში. მაგრამ ჩვენ ყველამ ვიცით, რა რთულად იბრძოლეს საქართველოს თაობებმა, რომ ამ მომენტისთვის მიეღწიათ. როგორ იბრძოდა საქართველოს მოსახლეობა, რომ გამხდარიყო ევროკავშირის სრულუფლებიანი წევრი. ამ შესაძლებლობის დაკარგვა იქნება შეცდომა,“ - განაცხადა ელჩმა. ევროკავშირის საგარეო საქმეთა და უსაფრთხოების პოლიტიკის უმაღლესი წარმომადგენლის, კაია კალასის განცხადებით, საქართველო ერთადერთია ევროკავშირის წევრობის კანდიდატებს შორის, რომელსაც რეგრესი - და მნიშვნელოვანი რეგრესი - აქვს ევროკავშირის წევრობის გზაზე. საქართველოს საგარეო საქმეთა სამინისტრო ევროკავშირის გაფართოებაზე საქართველოს შესახებ მომზადებულ კრიტიკულ დასკვნაზე ამბობს, რომ „მოულოდნელი არ ყოფილა“. უწყების განმარტებით, დოკუმენტი „უსაფუძვლო ნეგატიური შეფასებების გასაჟღერებლად და მორიგი პოლიტიკური სპეკულაციებისთვის არის გამოყენებული“. საქართველო ევროკავშირის წევრობის კანდიდატია
ირანმა სომხეთსა და საქართველოში ახალი ელჩები დანიშნა
ირანმა თბილისსა და ერევანში ახალი ელჩები დანიშნა. ამის შესახებ საგარეო საქმეთა მინისტრმა აბას არაღჩიმ განაცხადა. ალი მოჯანი საქართველოში ირანის ელჩის თანამდებობას დაიკავებს, ხოლო ხალილ შირღოლამი დიპლომატიურ მისიას სომხეთში უხელმძღვანელებს. ალი მოჯანი ადრე ირანის საგარეო საქმეთა სამინისტროს არქივებისა და დიპლომატიური ისტორიის დეპარტამენტს ხელმძღვანელობდა და გერმანიაში ისლამური რესპუბლიკის კულტურის სფეროს მრჩევლად მუშაობდა. შირღოლამი მუშაობდა თეირანში მდებარე წამყვან ირანულ საგარეო პოლიტიკის კვლევით ცენტრში — პოლიტიკურ და საერთაშორისო კვლევათა ინსტიტუტში — კვლევების საკითხებში ვიცე-პრეზიდენტის პოზიციაზე.
