თეგი: ვოლოდიმიერ ზელენსკი
ზელენსკიმ ევროპის 4 ქვეყნიდან და ინდოეთიდან ელჩები გაიწვია
უკრაინის პრეზიდენტმა ვოლოდიმირ ზელენსკიმ, ჩეხეთიდან, უნგრეთიდან, გერმანიიდან, ნორვეგიიდან და ინდოეთიდან ელჩები გაიწვია. სახელმწიფოს მეთაურმა ხელი უკვე მოაწერა განკარგულებას გერმანიაში უკრაინის ელჩის ანდრეი მელნიკის, უნგრეთში ელჩის ლუდმილა ნეპოპისა და ჩეხეთის რესპუბლიკაში ელჩის ევგენი პერებინოსის თანამდებობიდან გათავისუფლების შესახებ. ამასთან ნორვეგიაში უკრაინის ელჩის თანამდებობას დატოვებს ვიაჩესლავ იაცუკი, ხოლო ინდოეთში იგორ პოლიხა, რომელიც ასევე შეთავსებით იყო ელჩი შრი-ლანკასა და ბანგლადეშში. ამ დროისთვის, ელჩების თანამდებობიდან გადაყენების მიზეზები არ დასახელებულა. თანამდებობიდან გაათავისუფლებული ელჩებიდან, ყველაზე ცნობილია უკრაინის ელჩი გერმანიაში, ანდრეი მელნიკი, რომელიც ადგილობრივ ხელისუფლებას, უკრაინისთვის იარაღის გადმოცემის შენელების გამო აკრიტიკებდა.
ვოლოდიმირ ზელენსკი: მიკოლაივის დაბომბვის შედეგად, რუსმა ოკუპანტებმა დაარტყეს საცხოვრებელ სახლებს, სკოლებს, სოციალურ ინფრასტრუქტურას
მიკოლაივის დაბომბვის შედეგად, რუსმა ოკუპანტებმა დაარტყეს საცხოვრებელ სახლებს, სკოლებს, სოციალურ ინფრასტრუქტურასა და სამრეწველო ობიექტებს, – ამის შესახებ უკრაინის პრეზიდენტმა, ვოლოდიმირ ზელენსკიმ ვიდეომიმართვაში განაცხადა. „რუსული ძალების ნაწილი აღმოსავლეთში მდებარე პოზიციებიდან გადაყვანილია სამხრეთით: ხერსონის რაიონში და ზაპოროჟიეში, მაგრამ ეს მათ იქ ვერ დაეხმარება. სტრატეგიულად, რუსეთს ამ ომის მოგების შანსი არ აქვს. აუცილებელია, შევინარჩუნოთ პოზიციები სამხრეთით, აღმოსავლეთით და ყველგან. შეინარჩუნეთ დაცვა, დიპლომატია და პოლიტიკა. შევინარჩუნოთ ჩვენი ერთობა – და არა მხოლოდ გამარჯვებამდე, არამედ მის შემდეგაც, რათა ხარისხობრივად აღვადგინოთ ყველაფერი, რაც ოკუპანტებმა გაანადგურეს“, – აღნიშნა ვოლოდიმირ ზელენსკიმ. რუსეთის ჯარებმა მიკოლაივზე იერიში 31 ივლისს მიიტანეს. დაბომბვისას უკრაინის ერთ-ერთი უმდიდრესი ადამიანი მეუღლესთან ერთად დაიღუპა. შეგახსენებთ, რომ 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა. 14 აპრილს უკრაინის უმაღლესმა რადამ რუსეთის შეიარაღებული ძალების მოქმედებები უკრაინელი ხალხის წინააღმდეგ გენოციდად აღიარა. 19 აპრილს, რუსეთმა აღმოსავლეთ უკრაინაში აქტიური იერიში დაიწყო. 21 აპრილს, ლატვიისა და ესტონეთის პარლამენტებმა უკრაინაში რუსეთის ქმედებები გენოციდად აღიარეს. 28 აპრილს, უკრაინაში რუსეთის ქმედებები გენოციდად ასევე აღიარა კანადის პარლამენტმა. 11 მაისს, უკრაინაში რუსეთის ქმედებები გენოციდად ჩეხეთის სენატმაც აღიარა. 6 მაისს, ირლანდიის სენატმა რუსეთის ქმედებები უკრაინაში გენოციდად მიიჩნია. რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა. ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა. „რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა. 23 ივლისს, Human Rights Watch-მა რუსეთის მიერ ოკუპირებულ სამხრეთ უკრაინის ტერიტორიაზე ადამიანების გატაცებისა და წამების შესახებ ანგარიში გამოაქვეყნა. დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.
ვეცდებით, რომ ევროკავშირში უკრაინის გაწევრიანებაზე მოლაპარაკების დაწყების თარიღი მოახლოვდეს - ზელენსკი
უკრაინის პრეზიდენტის, ვოლოდიმირ ზელენსკის თქმით, უკრაინა ეცდება, ევროკავშირში უკრაინის გაწევრიანებაზე მოლაპარაკების დაწყების თარიღი მოაახლოოს. „ვაკეთებთ ყველაფერს, რომ მოვამზადოთ ევროკავშირში მოლაპარაკებისთვის სტარტი. კერძოდ, ამის შესახებ ვისაუბრეთ შვედეთის პრემიერ-მინისტრის ვიზიტის დროს, რომელიც ამჟამად ევროკავშირის თავმჯდომარე ქვეყანაა. არსებობს აუცილებელი ლიდერობა და ნება იმისთვის, რომ უკვე წელს დავიწყოთ მოლაპარაკებები წევრობაზე. უკრაინა ამაში პარტნიორების მხარდაჭერას გრძნობს და მადლობელი ვარ ამისთვის“,- განაცხადა ზელენსკიმ. ცნობისთვის, 28 თებერვალს, ევროკავშირის წევრობაზე დაჩქარებული წესით განაცხადი უკრაინამ ომის ფონზე გააკეთა.
