კალინინგრადის გუბერნატორის თქმით, იმანუელ კანტს "პირდაპირი კავშირი" აქვს უკრაინის ომთან

კალინინგრადის რეგიონის გუბერნატორმა ანტონ ალიხანოვმა, სვეტლოგორსკში პოლიტოლოგთა კონგრესზე გამოსვლისას განაცხადა, რომ გერმანელ ფილოსოფოსს იმანუელ კანტს „პირდაპირი კავშირი აქვს“ უკრაინის ომთან. მის სიტყვებზე ყურადღება ფედერალურმა პრესამ გაამახვილა. კალინინგრადის გამოცემა „რუგრადმა“ ალიხანოვის გამოსვლის სრული ჩანაწერი გამოაქვეყნა. „იმანუელ კანტს, რომელიც აქ დაიბადა თითქმის 300 წლის წინ, თითქმის პირდაპირი კავშირი აქვს გლობალურ ქაოსთან, გლობალურ პერიოდულ სამყაროსთან, რომლის წინაშეც ახლა ვდგავართ. უფრო მეტიც, ეს პირდაპირ კავშირშია უკრაინის სამხედრო კონფლიქტთან,“ - განაცხადა ალიხანოვმა. რეგიონის ხელმძღვანელს მიაჩნია, რომ გერმანულმა ფილოსოფიამ საფუძველი ჩაუყარა „სოციოკულტურულ ვითარებას“, რომელმაც, სხვა საკითხებთან ერთად, პირველ მსოფლიო ომამდე მიგვიყვანა. გერმანელი ფილოსოფოსი იმანუელ კანტი 1724 წელს კენიგსბერგში (დღევანდელი კალინინგრადი) დაიბადა.  კალინინგრადი ლიეტვუასა და პოლონეთს შორისაა მოქცეული და დაახლოებით 500 000 მოსახლე ჰყავს. მეორე მსოფლიო ომის შემდეგ რუსეთის შემადგენლობაში მოხვედრილი ამჟამინდელი კალინინგრადის ოლქის, უწინდელი აღმოსავლეთ პრუსიის ისტორია მეცამეტე საუკუნეში დაიწყო, როცა აქ გერმანელთა ორდენი დაფუძნდა. შუა საუკუნეებიდან მოყოლებული, კიონიგსბერგად წოდებული ქალაქი გერმანული კულტურისა და სულიერების, ასევე, პრუსიული სახელმწიფოებრიობის ერთ- ერთი ცენტრი იყო. შეგახსენებთ, რომ იქ არსებული, ომის შემდგომ გაუქმებული, უნივერსიტეტი, განსაკუთრებით არის ცნობილი გერმანელი ფილოსოფოსის ემანუილ კანტის გამო. ქალაქი კენიგსბერგი 1945 წლის 9 აპრილს დანებდა საბჭოთა არმიას ბელორუსის მესამე ფრონტის შეტევის დროს.