ნათია თურნავა: ვფიქრობთ, რომ ახლო პერიოდში გვექნება პირველი მიკრობანკი

ეროვნული ბანკის პრეზიდენტის მოვალეობის შემსრულებელმა განაცხადა, რომ უახლოეს პერიოდში პირველი მიკრობანკი დაიწყებს ფუნქციონირებას.  მისი თქმით, მიკრობანკების ახალი ლიცენზიის შემოღება ემსახურება იმას, რომ გაჩნდეს დამატებითი საინტერესო, ინვესტორებისთვის მიმზიდველი საფინანსო ინსტიტუტი, რომელიც, გარკვეულწილად, გარდამავალი ეტაპი იქნება მიკროსაფინანსო ორგანიზაციებსა და სრულყოფილ ბანკებს შორის. თურნავას განცხადებით, კერძო სექტორის მხრიდან ინტერესი არსებობს. „მქონდა შეხვედრა ინდუსტრიასთან, საფინანსო სექტორთან. ვესაუბრებოდი იმ ორგანიზაციებს, რომლებიც ფიქრობენ, შემოიტანონ განაცხადი. შეიძლება, გარკვეული დახვეწა დასჭირდეს რეგულაციებს, რადგან ეს არის ახალი პრაქტიკა და ჩვენ ყოველთვის მზად ვართ, ღია ვართ დიალოგისთვის. ვფიქრობთ, რომ ახლო პერიოდში გვეყოლება პირველი კანდიდატები“, – აღნიშნა თურნავამ საზოგადოებრივი მაუწყებლის ცნობით.