თეგი: ქერი
საქართველოს მთავრობა ხორბლისა და ქერის ექსპორტს 1 წლით აკრძალავს
აქართველოს მთავრობა ხორბლისა და ქერის ექსპორტს მიმდინარე წლის 4 ივლისიდან 2023 წლის 4 ივლისამდე კრძალავს. ამის შესახებ გარემოს დაცვისა და სოფლის მეურნეობის მინისტრმა, ოთარ შამუგიამ განაცხადა. რატომ ვერ ამბობს უარს საქართველო, რუსეთიდან ხორბლისა და ფქვილის იმპორტზე მინისტრის განმარტებით, მიუხედავად იმისა, რომ საქართველო სრულად დამოკიდებულია ხორბლის იმპორტზე (ყოველწლიურად 500 ათასი ტონა) და მცირე წარმოების გამო ექსპორტს ვერ ახორციელებს, შექმნილი ვითარება აჩენს რისკს, ქვეყნიდან გარკვეული რაოდენობის ხორბალი ექსპორტზე გავიდეს. რაც შეეხება ქერს, საქართველოში წარმოებული ქერის ექსპორტი ერაყსა და ირანში ხორციელდება. მეცხოველეობის, მეფრინველეობისა და მეღორეობის დარგში საკვები რესურსი ქერი, მნიშვნელოვანია, რომ ამ ეტაპზე, მხოლოდ ადგილობრივ ბაზარზე იქნას რეალიზებული. მიმდინარე წელს, ქერის საპროგნოზო მოსავალი 60 ათასი ტონის ფარგლებში მერყეობს. დღეის მდგომარეობით, 2,5 ათას ტონაზე მეტი უკვე ექსპორტირებულია. „ყოველივე ზემოაღნიშნულის გათვალისწინებით, მთავრობამ მიიღო გადაწყვეტილება, მიმდინარე წლის 4 ივლისიდან 2023 წლის 4 ივლისამდე, საქართველოდან ხორბლის და ქერის ექსპორტი აკრძალოს. ამ ეტაპზე, შეზღუდვები არ ვრცელდება სიმინდის ექსპორტზე. გარემოს დაცვისა და სოფლის მეურნეობის სამინისტრომ ხორბლისა და ქერის მწარმოებლებთან არაერთი შეხვედრა გამართა და მათი პოზიციები მოისმინა. მწარმოებლების განცხადებით, ადგილობრივი ბაზარი, არსებული მოთხოვნიდან გამომდინარე, ქვეყანაში წარმოებულ მოსავალს სრულად აითვისებს“, - განაცხადა ოთარ შამუგიამ.
მთავრობის გადაწყვეტილებით, ფქვილის იმპორტზე საფასური გაიზრდება, დამატებითი საიმპორტო გადასახადი დაწესდება ქერსა და ქატოზეც
საქართველოს მთავრობის გადაწყვეტილებით, ფქვილის იმპორტზე დაწესებული დამატებითი გადასახადი 200 ლარიდან 250 ლარამდე გაიზრდება. მთავრობის დღევანდელი სხდომის დასრულების შემდეგ სოფლის მეურნეობის მინისტრის მოადგილემ, თენგიზ ნასარიძემ განაცხადა, რომ რამდენიმე თვის წინ დაწესებულმა დროებითმა საიმპორტო გადასახადმა ვითარება სამართლიანად დააბალანსა, თუმცა ბოლო პერიოდში ფქვილის იმპორტი კვლავ მზარდი ტენდენციით ხასიათდება, რის გამოც მთავრობამ დამატებითი საიმპორტო გადასახადის 50 ლარით გაზრდის გადაწყვეტილება მიიღო. „მოგეხსენებათ, გლობალურად, მსოფლიო ბაზარზე მიმდინარე პროცესების გათვალისწინებით, ძალიან არასტანდარტული ვითარებაა შექმნილი ხორბლის ფასის ფორმირების, ზოგადად, ლოგისტიკის კუთხით და ამ მიმართულებით რამდენიმე თვის წინ მიღებულ იქნა გადაწყვეტილება, რომლითაც ფქვილის იმპორტის ზრდასთან დაკავშირებული ანომალიური ვითარება დაბალანსდა სამართლიანად, კერძოდ, ფქვილის იმპორტზე დაწესდა 200-ლარიანი დამატებითი საფასური. თუმცა, ამ თვეების განმავლობაში გამოიკვეთა, რომ ბოლო პერიოდში კვლავ მზარდი ტენდენციით ხასიათდება ფქვილის იმპორტი. ეს ისევ და ისევ განპირობებულია ფასის არასტაბილური ფორმირებით, იმ ჭარბი მოსავლით, რაც არსებობს მსოფლიოში. აღნიშნულის გათვალისწინებით, ჩვენ მივიღეთ გადაწყვეტილება, ტონაზე დამატებით 50 ლარი, ანუ, ჯამში, 250 ლარი დაწესდეს ფქვილის იმპორტის შემთხვევაში,“ – აღნიშნა თენგიზ ნასარიძემ. მთავრობის დღევანდელი გადაწყვეტილებით, დამატებითი საიმპორტო გადასახადი ასევე დაწესდება ქერსა და ქატოზე, ტონაზე 100 ლარის ოდენობით. „სამწუხაროდ, წლევანდელმა წელმა, სტიქიისა და კლიმატური პირობების გათვალისწინებით, განაპირობა ის, რომ შედარებით მეტია ხარისხობრივად ისეთი ხორბალი, რომელიც უფრო მეტად გამოიყენება საფურაჟე დანიშნულებით. შესაბამისად, ამ კუთხითაც საჭიროა გარკვეული მექანიზმების შემუშავება. მთავრობამ დღეს მიიღო გადაწყვეტილება, რომ ქერზე ასევე დაწესდეს დამატებითი საფასური, 100 ლარი იმპორტის შემთხვევაში. ასევე, ქატოზე, რომელიც, ფაქტობრივად, ხორბლის გადამუშავების შედეგად, იმავენაირად მიღებული პროდუქტია, როგორც ფქვილი და ამ დრომდე მასზე არ ვრცელდებოდა არანაირი განსაკუთრებული რეგულირება. ქატოს შემთხვევაშიც 100 ლარი განისაზღვრება დამატებითი საიმპორტო საფასური, რომელიც, ვფიქრობთ, ძალიან დაეხმარება ხორბლის ადგილობრივ მწარმოებლებს მათ მიერ მოყვანილი ხორბლის რეალიზებაში იმ ფასად, რომ მოახერხონ საქმიანობის გაგრძელება და ქვეყნის ეკონომიკაში იმ წვლილის შემდგომშიც შეტანა, რაც აქამდე მზარდი ტენდენციებით ხასიათდებოდა,“ – განაცხადა თენგიზ ნასარიძემ. მინისტრის მოადგილის განმარტებით, როგორც წინა შემთხვევაში, ასევე ამ შემთხვევაშიც ფქვილის იმპორტის საფასურის ზრდასთან დაკავშირებული გადაწყვეტილება არ იმოქმედებს პურის ფასზე. „პურის გაძვირების არანაირი რისკი არ არსებობს. შესაბამისად, ეს კომპლექსური გადაწყვეტილება ხელს შეუწყობს ადგილობრივი ხორბლის რეალიზებას“, – დასძინა თენგიზ ნასარიძემ. მისივე თქმით, ასევე გახანგრძლივდება დამატებითი გადასახადის მოქმედების ვადა. კერძოდ, ამ ეტაპზე რეგულაციის მოქმედების ვადა მომავალი წლის პირველ მარტამდე განისაზღვრა.
