პროტესტის შემდეგ, „კულა“ აცხადებს, რომ მომავალ შეფუთვაზე რუსულ წარწერას მოხსნიან

„კულას" წვენის შეფუთვაზე დატანილი რუსული წარწერის გამო სოციალურ ქსელში გამოხატული პროტესტის შემდეგ, კომპანია რუსეთს ოკუპანტს უწოდებს და აღნიშნავს, რომ „კირილიცას“ რუსეთის გარდა რამდენიმე ქვეყანა იყენებს. „ჩვენ საერთაშორისო კომპანია ვართ და ქართული ენის გარდა, რაც უმთავრესია ჩვენთვის, სხვა ბევრ ენაზე გვიწერია ინფორმაცია ეტიკეტზე. მათ კი სურათები შეფუთვის მხოლოდ იმ ნაწილს გადაუღეს, რომელიც მეტ რეზონანს და სიძულვილს გამოიწვევდა და ეცადნენ ამით ქულები დაეწერათ. შეფუთვას დიდი ასოებით ვაშლი და APPLE აწერია. ეს ვერ დაინახეს და ახლა შეუძლიათ დანახვა. რაც შეეხება „კირილიცას“, ეს ალფავიტი ოკუპანტი ქვეყნის გარდა, ოფიციალურად გამოიყენება უკრაინაში, ბელორუსში, ყაზახეთში, ყირგიზეთში, ტაჯიკეთში, სერბეთში, ჩერნოგორიაში, მაკედონიაში, ბოსნია ჰერცოგოვინაში და მონღოლეთშიც კი. ამ ქვეყნების უმეტეს ნაწილში ჩვენ ვახორციელებთ ექსპორტს", - აცხადებს კომპანია „კულა". (განცხადების სტილი დაცულია) კომპანია განმარტავს, რომ აღნიშნული ვაშლის წვენი არასდროს გაუგზავნია რუსეთში და რუსეთი არ წარმოადგენს მის სტრატეგიულ მიმართულებას. განცხადებაში ასევე ნათქვამია, რომ მომავალში შეფუთვიდან „კირილიცას" აუცილებლად ამოიღებენ. „მათ ვინც მხარი დაგვიჭირა და გულითადი რჩვები მოგვცა, დიდ მადლობას ვუხდით და პირობას გაძლევთ, რომ შემდეგში აუცილებლად ამოვიღებთ „კირილიცას“ ჩვენი შეფუთვიდან," - წერია განცხადებაში. ცნობისთვის, იმ ენებზე, რომლებიც „კირილიცას" იყენებენ, ვაშლი მხოლოდ რუსულ ენაზეა - Яблоко; უკრაინულად - Яблуко, ბელარუსულ ენაზე - Яблык, სერბულად - Јабука.