Zipair-JAL-მა ავიაკომპანიის თვითმფრინავებზე გამოსახულ Z-ს ჩაანაცვლებს და დიზაინს შეცვლის

ტოკიოში დაფუძნებულმა Japan Airlines-ის შვილობილმა კომპანია Zipair-JAL-მა - გამოაცხადა, რომ 18 ივნისიდან, თვითმფრინავზე დატანილ „Z“-ს მოხსნის და მას სხვა გაფორმებით ჩაანაცვლებს. მიზანი კი რუსეთის უკრაინაში შეჭრის სიმბოლოსთან რაიმე კავშირის თავიდან აცილებაა. კომპანიამ განმარტა, რომ დიზაინის შეცვლა, უკრაინაში რუსეთის შეჭრამდეც დაგეგმილი იყო. თუმცა, Zipair-ის პრეზიდენტმა შინგო ნიშიდამ პრესკონფერენციაზე განაცხადა, რომ Zipair-ს მომხმარებლები დაუკავშირდნენ და არსებული ლოგოს გამო შეშფოთება გამოხატეს.  რუსეთმა „Z“ უკრაინაში შეჭრის შემდეგ, სავარაუდო გამარჯვების სიმბოლოდ გამოიყენა. Z ტანკებსა და სხვა აღჭურვილობაზე გამოსახა. კრემლის მომხრეები მას თავიანთი მხარდაჭერის გამოსახატად იყენებენ. ცნობისთვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. რუსეთი ბომბავს საბავშვო ბაღებს, სკოლებს, საცხოვრებელ კორპუსებს, საავადმყოფოებს, სამშობიაროებს და სხვა სამოქალაქო დანიშნულების შენობა-ნაგებობებსა და ინფრასტრუქტურას. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.  14 აპრილს უკრაინის უმაღლესმა რადამ რუსეთის შეიარაღებული ძალების მოქმედებები უკრაინელი ხალხის წინააღმდეგ გენოციდად აღიარა. 19 აპრილს, რუსეთმა აღმოსავლეთ უკრაინაში აქტიური იერიში დაიწყო.  21 აპრილს, ლატვიისა და ესტონეთის პარლამენტებმა უკრაინაში რუსეთის ქმედებები გენოციდად აღიარეს. 28 აპრილს, უკრაინაში რუსეთის ქმედებები გენოციდად ასევე აღიარა კანადის პარლამენტმა. 11 მაისს, უკრაინაში რუსეთის ქმედებები გენოციდად ჩეხეთის სენატმაც აღიარა. 6 მაისს, ირლანდიის სენატმა რუსეთის ქმედებები უკრაინაში გენოციდად მიიჩნია. რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა. დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს. ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა.