მალე უკრაინა კანადიდან მოკლე რადიუსის რაკეტების პარტიას მიიღებს. ამის შესახებ კანადის თავდაცვის სამინისტრომ რამშტეინის ფორმატში უკრაინის თავდაცვის საკონტაქტო ჯგუფის მორიგი შეხვედრის შემდეგ განაცხადა.
კანადის შეიარაღებული ძალების ცნობით, კანადა უკრაინას უსასყიდლოდ გადასცემს 43 AIM-9 ტიპის რაკეტას თავისი არმიის მარაგიდან.
გარდა ამისა, კანადა გააფართოვებს უკრაინელი სამხედრო მედიკოსების მომზადებას პოლონეთში, ოპერაცია UNIFIER-ის ფარგლებში.
ოპერაცია UNIFIER-ის ფარგლებში, კანადელი სამხედროები უკრაინელ ჯარისკაცებს 2015 წლიდან ამზადებენ თანამედროვე საბრძოლო უნარებში. რუსეთის სრულმასშტაბიანი შეჭრის შემდეგ, კანადელმა ინსტრუქტორებმა დატოვეს უკრაინა, რამდენიმე თვეში განაახლეს უკრაინელი რეკრუტების მომზადება დიდ ბრიტანეთსა და პოლონეთში. ჯამში კურსი 36000-ზე მეტმა უკრაინელმა გაიარა.
