ბლექ სი არენაზე შეკრებილ მსმენელთა ნაწილმა ტერიტორია პროტესტის ნიშნად დატოვა.
ინცინდენტი The Killers-ის კონცერტზე მოხდა. რადიო თავისუფლების ცნობით, აუდიტორიის პროტესტი გამოიწვია ჯგუფის სოლისტის, ბრენდან ფლაუერსის მიერ დარბაზიდან სცენაზე დრამერის აყვანამ, რომელიც რუსეთის მოქალაქე აღმოჩნდა.
The Killers-ის სოლისტმა აუდიტორიას ჰკითხა, მისაღები იყო თუ არა მათთვის ის, რომ შერჩეული დრამერი რუსი აღმოჩნდა. დარბაზში შეკრებილი მსმენელის ნაწილის მხრიდან მკვეთრად უარყოფითი დამოკიდებულების მოსმენის მიუხედავად, ჯგუფმა რუს დრამერთან ერთად კომპოზიცია შეასრულა. აუდიტორიიდან ისმოდა შეძახილები: „რუსეთი ოკუპანტია."
თავად მუსიკოსმა კი, განაცხადა, რომ მუსიკა აკავშირებს ადამიანებს და ამ აუდიტორიაში მყოფები ერთმანეთის „დები და ძმები" არიან, ადამიანის ეროვნებას მნიშვნელობა არ აქვს და ქვეყნებს შორის საზღვრები არ უნდა არსებობდეს.
მოქალაქეების გრაკვეულმა ჯგუფმა Facenook-ზე დაწერა, რომ დარბაზს ტოვებდნენ.
ქართული მუსიკალური ბენდი, რომელიც დღეს ბლექ სი არენაზე The Killers-ის შოუმდე უკრავდა, მომხდართან დაკავშირებით წერს: „ქილერსის warm up-ზე დაკვრა საამაყო გვეგონა, მაგრამ რუსის დრამზე აყვანით და მცდელობით, რომ რუსები და ქართველები ჩაეხუტებინათ, ძალიან იმედგაცრუებულები და გაბრაზებულები ვართ.
უნდა იცოდე სად ჩადიხარ! რუსეთი მტერი და ოკუპანტია!!!" - წერს ბენდი Facebook-ის ოფიციალურ გვერდზე.
ცნობისთვის, The Killers-ის კონცერტებზე ბილეთების ფასი 100-დან 500 ლარამდე იყო.
