მსოფლიოში ყველაზე დიდმა საკრუიზო გემმა მაიამის პორტიდან შვიდდღიანი მოგზაურობა დაიწყო

მსოფლიოში ყველაზე დიდმა საკრუიზო გემმა, Icon of the Seas მაიამის პორტიდან შვიდდღიანი მოგზაურობა დაიწყო.

საკრუიზო გემი ეკიპაჟის 2 350 წევრთან ერთად, დაახლოებით 10 000 მგზავრს იტევს. ფინეთში, ტურკუში, გემთმშენებლობის ქარხანაში აშენებულ, ბაჰამის კუნძულებზე რეგისტრირებულ გემს აქვს შვიდი საცურაო აუზი და ექვსი ე.წ. წყლის სლაიდი, ყინულის მოედანი, თეატრი.

საკრუიზო გემის აშენება 2 მილიარდი დოლარი დაჯდა. ამასთან ერთად, საკრუიზო გემზე არის 40-ზე მეტი რესტორანი, ბარი და ლაუნჯი.

Icon of the Seas არის ყველაზე დიდი საკრუიზო გემი მსოფლიოში, იწონის 250,800 ტონას, სიგრძით თითქმის 365 მეტრია (1,198 ფუტი), რითაც დაახლოებით ხუთჯერ აღემატება ტიტანიკს.

ბილეთების ფასი (ერთ ადამიანზე) $1,723-დან $2,639-მდე მერყეობს.