ახალქალაქის, კუმურდოსა და კარის მიტროპოლიტმა ნიკოლოზმა განაცხადა, რომ ვაქცინაციის დემონიზაცია მიუღებელია და ანტივაქსერულ კამპანიაში მონაწილეობა გაუმართლებლად მიაჩნია.
როგორც მან ჟურნალისტებთან საუბრისას განაცხადა, კორონავირუსის საწინააღმდეგო ვაქცინის ჩატარება საღვთისმეტყველო საკითხი რომ ყოფილიყო, მაშინ აუცილებლად გაკეთდებოდა მოწოდება აღმსარებლობიდან გამომდინარე.
„წმინდა სინოდის სხდომაზე ვთქვით, რომ ამას ზიარებასთან კავშირი არ ექნება. ეს თითოეულმა მოქალაქემ პირადად უნდა გადაწყვიტოს ექიმებთან კონსულტაციის შედეგად. ეს სამედიცინო შინაარსის თემაა. არც აცრაა სავალდებულო, არ შეიძლება ძალდატანება. მეორე მხრივ, მიმაჩნია, რომ ვაქცინაციის დემონიზაცია არის სრულებით მიუღებელი და ყველა მცდელობა, რომ ვაქცინაში ეშმაკისეული რაღაც ჩავტენოთ, შინაარსიანი არ არის. პირადად მე, კონსულტაცია გავიარე ექიმთან და მან აცრა არ მირჩია. აცრისაკენ მოწოდებას სამედიცინო განათლება სჭირდება, რომელიც მე არ გამაჩნია. ამიტომ, ჩემს თავს უფლებას ვერ მივცემ, ვინმეს აცრისკენ ან თავშეკავებისკენ მოვუწოდო. ეკლესია ყოველთვის კომპეტენტური უნდა იყოს თავის სფეროში. ეს რომ საღვთისმეტყველო საკითხი ყოფილიყო, მაშინ მოწოდებას აუცილებლად გავაკეთებდით“, – განაცხადა მეუფე ნიკოლოზმა.
რაც შეეხება რეგულაციების დაცვის საკითხს, როგორც მეუფე ნიკოლოზმა აღნიშნა, საპატრიარქომ ამასთან დაკავშირებით მკაცრი განცხადება გააკეთა და თავადაც ყველას მოუწოდებს, რომ წესები სათანადოდ დაიცვან.
„საპატრიარქომ, უწმინდესმა რეგულაციებთან დაკავშირებით ძალიან მკაცრი განცხადება გააკეთა და მეც ყველას მოვუწოდებ, ძალიან მკაცრად დაიცვან რეგულაციები. პირველ რიგში, ეს ქრისტიანისთვის სათნოებაა, როდესაც ეკლესია მორჩილებისაკენ მიგითითებს. ჩვენ მოვუწოდებთ, დაიცვან დისტანცია, გაიკეთონ ხშირად ტესტები. PCR ტესტზე საპატრიარქომ ხელშეკრულება გააფორმა და ჩვენ ამას რეგულარულად ვიკეთებთ, პირადად მე, რეგულარულად ვიკეთებ, ვიდრე საკურთხეველში შევალ. ერთადერთი ჩვენი იარაღი და ძალა არის სიტყვა. ჩვენ სხვა შიდა რეგულაციები არ გაგვაჩნია, არ გვაქვს არანაირი პოლიციური სისტემა. ჩვენ მხოლოდ შეფასებებს ვაკეთებთ. ჩემი აზრით, ყოველგვარი დემონიზაცია, კამპანია აბსოლუტურად გაუმართლებელია. ანტივაქსერული კამპანია მთელი მსოფლიოს მასშტაბითაა და თუ ამაში ჩვენი სასულიერო პირებიც იღებენ მონაწილეობას, გამართლებულად არ მიმაჩნია. მოვისმინე პრეზიდენტის მიმართვა, ერთადერთი, რაც ჩვენ შეგვიძლია გავაკეთოთ, ესაა პირადი მაგალითი. ასეთი მღვდელმთავრებიც, მრევლიცაა, რომლებიც იცრებიან. პირადად მე, თანახმა ვარ, მზად ვარ, თუ ვინმეს გამხნევებისთვის საჭირო იქნება, ეს გავაკეთო. ჩემი ჯანმრთელობის მდგომარეობიდან გამომდინარე, არ არის ეს რეკომენდებული, უფრო სწორედ, არ არის აუცილებელი აცრა, ექიმმა ასე მითხრა“, – აღნიშნა მეუფე ნიკოლოზმა.
