აშშ-ის პრეზიდენტ ჯო ბაიდენის განცხადებით, 14 აგვისტოდან მოყოლებული ავღანეთიდან 70 000-ზე მეტი ადამიანის ევაკუაცია განხორციელდა.
აღნიშნულის შესახებ აშშ-ის პრეზიდენტმა თეთრ სახლში გამართულ პრესკონფერენციაზე განაცხადა.
მისი თქმით, აშშ ევაკუაციის პროცესის დასრულებას 31 აგვისტომდე გეგმავს, თუმცა ეს დამოკიდებული იქნება „თალიბანის“ მხრიდან თანამშრომლობის გაგრძელებაზე, ქვეყნის დატოვების მსურველების აეროპორტში დაშვებაზე და პროცესის შეუფერხებლობაზე.
გარდა ამისა, ჯო ბაიდენის განცხადებით, მან პენტაგონისგან და სახელმწიფო დეპარტამენტისგან მოითხოვა სათადარიგო გეგმის შედგენა საჭიროების შემთხვევაში გამოყენებისთვის. მისი თქმით, ამჟამად ყველაზე დიდი საფრთხე ტერორისტული ორგანიზაცია ISIS-K-დან და ავღანეთში „ისლამური სახელმწიფოს“ ფილიალიდან მომდინარეობს, რომლებიც აეროპორტზე და მშვიდობიან მოსახლეობაზე თავდასხმის მოწყობას გეგმავენ.
აშშ-ის პრეზიდენტი „დიდი შვიდეულის“ სამიტზე განხილულ თემებსაც შეეხო და განაცხადა, რომ ლიდერებს შორის იყო ძლიერი შეთანხმება, როგორც ევაკუაციის პროცესთან, ისე ავღანეთთან სამომავლო მიდგომასთან დაკავშირებით. მისი თქმით, მოკავშირეები ერთმანეთის მხარდამხარ უნდა იდგნენ და ავღანეთიდან მომავალ გამოწვევებს ერთობით უნდა შეხვდნენ.
პრეზიდენტი ავღანეთიდან დევნილების საკითხსაც შეეხო. მისი თქმით, ავღანეთიდან დევნილებისთვის თავშესაფრის მიცემის საკითხში აშშ იქნება ლიდერი და საერთაშორისო პარტნიორებისგანაც იმავეს მოელის. ბაიდენის განცხადებით, ავღანეთის ყველა მოქალაქე, რომელიც აშშ-ში ჩავა, შემოწმებულ იქნება.
ცნობისთვის, ,,თალიბანმა" რამდენიმე დღის განმავლობაში ელვის სისწრაფით დაიკავა ქვეყნის მნიშვნელოვანი ქალაქები და საბოლოოდ ქაბულის შემოგარენსაც მიადგა. 15 აგვისტოს მათ ქვეყნის დედაქალი - ქაბულიც აიღეს. ავღანეთის პრეზიდენტმა, აშრაფ ღანიმ ქვეყანა დატოვა, მის სასახლეში კი თალიბები შევიდნენ. დაჯგუფებისთვის ძალაუფლების მშვიდობიანად გადასაცემად შეიქმნა ავღანეთის დროებითი მთავრობა.
„თალიბანის“ მიერ ქაბულის აღებამ და ავღანეთის სრულად კონტროლმა დედაქალაქში ქაოსი შექმნა. ქაბულის აეროპორტს, რომელიც „თალიბანის“ მიერ ავღანეთის დედაქალაქის დაკავების შემდეგ მოქალაქეების ევაკუაციის ადგილია, უამრავი ადამიანი მიაწყდა. გავრცელდა ბევრი ფოტო, რომელზეც ჩანს, როგორ ცდილობენ მოქალაქეები ბორტზე მოხვედრას. გავრცელდა ინფორმაცია მსხვერპლის შესახებაც.
ამავე თემაზე:
„დიდი შვიდეულის“ ლიდერები ავღანეთში შექმნილ ვითარებაზე ერთობლივ განცხადებას ავრცელებენ
