შეერთებული შტატები რუსული თხევადი გაზის ექსპორტის შეზღუდვას ცდილობს.
ნოემბრის დასაწყისში სახელმწიფო დეპარტამენტმა სანქციები დააწესა რუსეთის პროექტზე (Arctic LNG 2), რომელსაც რუსული კომპანია Novatek-ი ხელმძღვანელობს.
Arctic LNG 2 არქტიკაში, გიდანის ნახევარკუნძულზე მდებარეობს, რომლის მიზანიც ბუნებრივი აირის მსოფლიო ბაზრებზე გატანაა.
Reuters-ს საფრანგეთის ფინანსთა მინისტრმა ბრუნო ლე მაირმა განუცხადა, რომ აშშ-ის სანქციები რუსული თხევადი ბუნებრივი აირის ძირითადი პროექტის წინააღმდეგ, რომელშიც ფრანგული მწარმოებელი TotalEnergies (TTEF.PA) აქციონერია, არ წარმოადგენს დიდ რისკს ევროპის გაზის მიწოდებისთვის.
TotalEnergies-ი 10%-იან წილს ფლობს Arctic LNG 2-ში. კითხვაზე, უნდა დარჩეს თუ არა ფრანგული ნავთობის ფირმა საწარმოში, ლე მაირმა უპასუხა, რომ ჯერ ადრეა ამის თქმა.
„ჩვენ ვაკვირდებით სიტუაციას და ვაფასებთ აშშ-ის გადაწყვეტილების შედეგებს. ამ საკითხზე ჩვენ მუდმივ კონტაქტში ვართ აშშ-ს ხელისუფლებასთან,“- განაცხადა საფრანგეთის ფინანსთა მინისტრმა.
FT-ის ცნობით, ეს პირველი შემთხვევაა, როდესაც LNG-ის რუსული პროექტი პირდაპირ სანქციების დაწესების შედეგად დაზარალდა.
ევროკავშირს რუსული LNG-ზე სანქციები არ დაუწესებია. მიუხედავად იმისა, რომ მილსადენებით ევროპაში გაზის იმპორტი მკვეთრად შემცირდა რუსეთის მიერ უკრაინაში წარმოებული ომის საპასუხოდ, ევროკავშირის ქვეყნებმა 2023 წელს რუსული LNG-ის რეკორდული რაოდენობა შეიძინეს. Bloomberg-ის თანახმად, ევროკავშირის წევრებმა რუსულ თხევად ბუნებრივ აირზე 2022 წლის იანვრიდან სექტემბრამდე, ხუთჯერ მეტი - 12,5 მილიარდი ევრო დახარჯეს, ვიდრე 2021 წლის იმავე პერიოდში. გაზისა და ნავთობის სფეროში მოგება რუსეთის ეკონომიკის მნიშვნელოვან წილს შეადგენს, რაც მოსკოვს უკრაინაში ომის დაფინანსების საშუალებას აძლევს.
