28 დღე ვიყავი გათიშული, აპარატი ფილტვებს 100%-ით ბერავდა, სატურაცია 80%-ზეც ვერ აჰყავდათ. მსოფლიოში საუკეთესო ინფექციონისტებმა, რომლებიც უშუალოდ მკურნალობდნენ პირდაპირ უთხრეს რაგბის კავშირის ხელმძღვანელობას, რომ ალბათ იმ ღამეს ვერ გავიტანდი, - განაცხადა საქართველოს მორაგბეთა ნაკრების მწვრთნელმა ლევან მაისაშვილმა, COVID19-ით ინფიცირებაზე საუბრისას.
ის იოჰანესბურგის კერძო კლინიკაში, Milpark Hostpitals-ში ერთ თვეზე მეტი ხნის განმავლობაში ხელოვნურ სუნთქვაზე იყო. ბევრჯერ დადგა საკითხი და ბევრჯერ უთხრეს, რაგბის კავშირის ხელმძღვანელობას იქაურმა ექიმებმა, რომ ამ ღამეს ვერ გაატანსო. ერთადერთი ვახტანგ რეხვიაშვილი იყო, რომელსაც ბოლომდე სჯეროდა, რომ გამოვძვრებოდი. აქვე უნდა ვთქვა, რომ ვარ ერთი დოზით აცრილი. ორი დოზით აცრა ვერ მოვასწარი, ვადებში ვერ ჩავეტიე, რადგან მომიწია გამგზავრება.
ფაქტია, ვინც აცრილი იყო, მათ ეს პრობლემა არ ჰქონიათ“, - აცხადებს ლევან მაისაშვილი.
ის ახლა რეაბილიტაციას გადის, რომ ფილტვების ფუნქციის სრულად აღდგენა მოხდეს. „არავინ არ ელოდა, უცბად გავახილე თვალი. მთელი მედპერსონალი შოკში იყო. ამის შემდეგ პროგნოზი იყო, რომ 3-დან 6 თვემდე დამჭირდებოდა რეაბილიტაცია. რეალურად 10 დღეში უკვე გამოვკეთდი.
საბოლოო ჯამში ერთი თვე დამჭირდა, რომ აქეთ წამოვსულიყავი. ზუსტად ვიცოდი, რომ ჩემი რეაბილიტაცია აქ უკეთ წავიდოდა. ჩამოსვლის დღიდან სატურაცია დალაგებული მაქვს, ჟანგბადი აღარ მჭირდება. წნევებიც დამირეგულირდა. ამჟამად ფილტვებს უნდა სერიოზული რეაბილიტაცია“, - აღნიშნა მაისაშვილმა „იმედის“ ეთერში.
