„დიდი შვიდეულის“ ქვეყნები ზაპოროჟიეს ატომურ ელექტროსადგურზე უსაფრთხოების უზრუნველყოფის საკითხებში, IAEA-ს ძალისხმევას მხარს უჭერენ და შესაბამის განცხადებას ავრცელებენ.
„რუსეთის ფედერაციამ დაუყოვნებლივ უნდა გაიყვანოს თავისი ჯარები უკრაინის საერთაშორისოდ აღიარებული საზღვრებიდან და პატივი სცეს უკრაინის ტერიტორიას და სუვერენიტეტს. ამ კონტექსტში, ჩვენ მოვითხოვთ, რომ რუსეთმა დაუყოვნებლივ დაუბრუნოს თავის კანონიერ სუვერენულ მფლობელს, უკრაინას, სრული კონტროლი ზაპოროჟიეს ატომურ ელექტროსადგურზე. ასევე დაუბრუნოს კონტროლი ყველა ბირთვულ ობიექტზე უკრაინის საერთაშორისოდ აღიარებულ საზღვრებში, რათა უზრუნველყოს მათი უსაფრთხო და საიმედო მუშაობა. ზაპოროჟიეს ატომურ ელექტროსადგურზე მომუშავე უკრაინელმა პერსონალმა უნდა შეძლოს მუქარისა და ზეწოლის გარეშე სამსახურებრივი მოვალეობის შესრულება. რადგან რუსეთის მიერ ქარხნის მუდმივი კონტროლი, რეგიონისთვის საფრთხეს წარმოადგენს“, - აღნიშნულია განცახდებაში.
9 აგვისტოს უკრაინის პრეზიდენტმა განაცხადა რომ, მსოფლიომ არ უნდა დაივიწყოს ჩერნობილის კატასტროფა. ზელენსკიმ აღნიშნა, რომ ზაპორიჟიეს ატომური ელექტროსადგური ყველაზე დიდია ევროპაში.
ბოლო დღეების განმავლობაში, რუსული ჯარები აქტიურად ხსნიდნენ ცეცხლს ზაპორიჟიეს ატომური ელექტროსადგურის და ქალაქ ენერჰოდარის მიმართულებით. უკრაინა თვლის, რომ რუსეთი საფრთხეს უქმნის ბირთვულ უსაფრთხოებას.
ევროპის უმსხვილეს ატომურ ელექტროსადგურზე სიტუაცია „სრულიად უკონტროლოა“ და დღითიდღე უფრო საშიში ხდება, ამის შესახებ ატომური ენერგიის საერთაშორისო სააგენტოს (IAEA) ხელმძღვანელმა განაცხადა. რაფაელ გროსიმ Associated Press-თან ინტერვიუში განაცხადა, რომ თხოვნით მიმართავს რუსეთს და უკრაინას, რომ ექსპერტები ადგილზე სწრაფად დაუშვან, რათა სიტუაციის სტაბილიზაცია და ბირთვული ავარიის თავიდან აცილება შეძლონ.
Associated Press-ი წერს, რომ რუსეთის მიერ ზაპოროჟიეს დაკავებამ განაახლა შიში, რომ უკრაინის 15 ბირთვული სადგურიდან უმსხვილესი შესაძლოა, დაზიანებულიყო, რასაც 1986 წლის ჩერნობილის ავარიის მსგავსი კატასტროფა მოჰყვებოდა.
