აზერბაიჯანს სურს, შექმნას მწვანე დერეფანი შუა დერეფნის მარშრუტის გასწვრივ, რომელიც გადაჭიმულია ჩინეთიდან ევროპაში. ამის შესახებ ჟურნალისტებს ბაქოს საერთაშორისო საზღვაო სავაჭრო პორტის გენერალურმა დირექტორმა ტალეჰ ზიადოვმა განუცხადა. იუწყება აზერბაიჯანული მედია. ზიადოვმა განმარტა, რომ აზერბაიჯანის იდეა არის, შექმნას დერეფანი, რომელიც მთლიანად მწვანე იქნება, რაც უზრუნველყოფს იმას, რომ მომავალშიც კი, თუ სიტუაცია შეიცვლება, ყველა ამჯობინებს ამ დერეფნის გამოყენებას მისი ეკოლოგიურად სუფთა ბუნების გამო.
ამასთან, გამწვანების პროცესი მოიცავს ტრანსპორტის ყველა რეჟიმს, რომელიც ჩართულია შუა დერეფანში, მათ შორის, კონტეინერებს, პორტებს, გემებს, რკინიგზებს - აზერბაიჯანსა და საქართველოში. მისივე ინფორმაციით, ყაზახეთი სერიოზულად განიხილავს წყალბადის, როგორც მწვანე საწვავის გამოყენებას და რომ 5-10 წელიწადში ეს [წყალბადი] უფრო ხელმისაწვდომი გახდება ზოგადი გამოყენებისთვის.“
ზიადოვმა ხაზი გაუსვა, რომ აუცილებელია, შუა დერეფანში ჩართულმა ყველა მხარემ გააერთიანოს ძალისხმევა მის მწვანე მარშრუტად გადაქცევისთვის.
„ეს ეხება პორტს, რკინიგზას, აზერბაიჯანის კასპიის გადაზიდვის კომპანიას (ASCO), ასევე ყველა ჩართულ ქვეყანას. კოორდინაცია ახლა ხდება. ყველას ესმის, რომ მწვანე დერეფანი ყველასთვის მნიშვნელოვანია," - განაცხადა ზიადოვმა.
მან ასევე აღნიშნა, რომ მწვანე დერეფნის მოთხოვნები არ არის ვრცელი და ის ძირითადად მოიცავს პორტების სერტიფიცირებას და რკინიგზის გადასვლას სუფთა ენერგიის წყაროებზე, როგორიცაა, მზის და ქარის ენერგია.
