ბრაზილიის ბაიას შტატში მასშტაბურ წყალდიდობას მსხვერპლი მოჰყვა. მედია ადგილობრივ სამსახურებზე დაყრდნობით წერს, რომ წყალდიდობის შედეგად დაიღუპა ერთი ადამიანი, ორი კი დაკარგულად ითვლება. ამასთან, 35 000-ზე მეტი ადამიანი სტიქიის ზონიდან გაიყვანეს.
გადაუღებელი წვიმით გამოწვეული წყალდიდობების შედეგად ნოემბრიდან მოყოლებული მსხვერპლის რაოდენობა 18-მდე გაიზარდა, 286 ადამიანი კი დაშავდა. სტიქიის შედეგად საერთო ჯამში 430 000-ზე მეტი ადამიანია დაზარალებული.
ბაიას შტატში ადიდებულმა მდინარეებმა ორი კაშხალი გადალახა. „მსგავსი მასშტაბის წყალდიდობა ბაიას შტატის უახლოეს ისტორიაში არ მახსოვს. წყლის ქვეშ მოქცეული ქუჩების, სახლებისა და ქალაქების ხილვა მართლაც შემზარავია“, – განაცხადა ბაიას შტატის გუბერნატორმა რუი კოშტამ.
