საქართველოს საგარეო საქმეთა სამინისტროს პრესსამსახური ეხმაურება იტალიის პარლამენტის წევრის, მატეო დალ'ოსოს ინიციატივით დაგეგმილ ონლაინშეხვედრას, რომელშიც ოკუპირებული აფხაზეთის ე.წ. პრეზიდენტი ასლან ბჟანიაც მიიღებს მონაწილეობას.
„საგარეო საქმეთა სამინისტროს, საქართველოს საელჩოს იტალიის რესპუბლიკაში დიპლომატიური არხების მეშვეობით აქტიური კომუნიკაცია აქვს იტალიის მხარესთან ამ საკითხთან დაკავშირებით.
იტალია მტკიცედ უჭერს მხარს საქართველოს სუვერენიტეტს და ტერიტორიულ მთლიანობას მის საერთაშორისოდ აღიარებულ საზღვრებში. იტალიურ მხარეს არერთხელ გაუკეთებია იტალიის ტერიტორიაზე საოკუპაციო რეჟიმების უკანონო აქტივობების დამგმობი ოფიციალური განცხადება.
რაც შეეხება ამ პოლიტიკოსს, მატეო დალ'ოსო ცნობილია საოკუპაციო რეჟიმის წარმომადგენლებთან მჭიდრო კონტაქტებით. ის აქამდეც აქტიურად მონაწილეობდა რეჟიმის წარმომადგენელთა პროვოკაციულ ქმედებებში. პოლიტიკოსის ამ ნაბიჯს ამჯერადაც მოჰყვება შესაბამისი რეაგირება ოფიციალური რომის მხრიდან“, - აცხადებენ უწყების პრესსამსახურში.
