ესპანეთის საბაჟო პოლიციამ იბიცას აეროპორტში კაცს, 450 000 ევროზე მეტი ღირებულების პაბლო პიკასოს ესკიზი ჩამოართვა, რადგან გადამზიდველმა ვერ დაადასტურა, რომ ეს ნახატი მისი საკუთრებაა.
შემთხვევა 5 ივლისს მოხდა, თუმცა ესპანელმა მებაჟეებმა ამის შესახებ, მხოლოდ 18 ივლისს განაცხადეს. შვეიცარიელმა სამართალდამცავებმა ესპანეთის საბაჟოს აცნობეს მგზავრის შესახებ, რომელსაც ნახატი „საეჭვო პირობებში“ გადაჰქონდა.
ციურიხიდან იბიცაში დასასვენებლად ჩასულ კაცს პიკასოს ესკიზი სახელად Trois personnages („სამი პერსონაჟი“) აღმოაჩნდა. მან განაცხადა, რომ ეს იყო ნამუშევრის ასლი და მისი სიტყვების დასადასტურებლად 1500 ევროს ღირებულების ქვითარი წარმოადგინა. მაგრამ მგზავრის ჩემოდანში ციურიხის სამხატვრო გალერეიდან კიდევ ერთი 454000 ევროს ქვითარი აღმოაჩინეს. წინასწარმა გამოძიებამ აჩვენა, რომ ესკიზი არის ორიგინალი, ხოლო დამალულ ქვითარზე მითითებული ღირებულება საბაზრო ღირებულებას ემთხვევა.
ახლა ესკიზი უფრო საფუძვლიანი ანალიზისთვის ხელოვნების ისტორიკოსებს გადაეცემათ. მგზავრს კი, სავარაუდოდ, ბრალად ხელოვნების ნიმუშების კონტრაბანდასა და საზღვრის გადაკვეთისას ღირებული ნივთის შესახებ ინფორმაციას დამალვას წაუყენებენ.
