ერაყის ტერიტორიულ წყლებში ორ ტანკერს თავს დაესხნენ. შესაბამის ინფორმაციას BBC ავრცელებს.
ერაყის საინფორმაციო სააგენტო სამხედრო ოფიციალურ პირზე დაყრდნობით იუწყება, რომ ეკიპაჟის 38 წევრი გადარჩა, ერთი ადამიანი კი, გარდაიცვალა.
ერაყის პორტების გენერალური კომპანიის (GCPI) გენერალური დირექტორი აცხადებს, რომ ნავთობტერმინალებში ოპერაციები შეჩერებულია, მაგრამ კომერციული პორტები კვლავ ფუნქციონირებს.
- ირანის სახელმწიფო ტელევიზიამ დაადასტურა, რომ „ტანკერები ირანის უპილოტო წყალქვეშა აპარატმა ააფეთქა.“
- რადიო თავისუფლების ცნობით, თავდასხმის სამიზნე ხომალდებიდან ერთს, მალტის დროშით მცურავ Zefyros-ს, ქართველი კაპიტანი ჰყავდა - ამ გემზე, ჯამში, 23 ქართველი მეზღვაური იყო. გადარჩენილები უკვე ხომალდზე არიან გადაყვანილნი და მათ საფრთხე აღარ ემუქრებათ
ამასთან, არაბთა გაერთიანებული საამიროების სანაპიროსთან კიდევ ერთი კონტეინერმზიდი გემი დაზიანდა.
ორგანიზაცია „გაერთიანებული სამეფოს საზღვაო სავაჭრო ოპერაციების“ (UKMTO) ცნობით, კონტეინერმზიდ გემს ჯებელ ალის კომერციულ პორტთა ახლოს ჭურვი მოხვდა.
დარტყმის შედეგად, გემზე ხანძარი გაჩნდა, თუმცა ბორტზე მყოფი ეკიპაჟის წევრები უსაფრთხოდ არიან.
სპარსეთის ყურეში გემებზე თავდასხმების ფონზე, დღეს მსოფლიო ბაზარზე ბარელი ნავთობის ფასმა 100 აშშ დოლარს მიაღწია.
ცნობისთვის, ბოლო ორი დღის განმავლობაში სპარსეთის ყურეში თავდასხმა ექვს კონტეინერმზიდ გემზე განხორციელდა.
