9 სექტემბრის დილის მოხსენებაში, უკრაინის გენერალურმა შტაბმა ხარკოვის რეგიონში შეტევის შესახებ ღია ტექსტით პირველად დაწერა, სადაც ნათქვამია, რომ უკრაინული ქვედანაყოფები ორმოცდაათი კილომეტრით დაწინაურდნენ.
„თავდაცვითი ძალები ხარკოვის მიმართულებით წარმატებულ კონტრშეტევას ახორციელებენ. ოსტატური და კოორდინირებული მოქმედებების წყალობით უკრაინის შეიარაღებულმა ძალებმა ადგილობრივი მოსახლეობის მხარდაჭერით, სამ დღეში თითქმის 50 კილომეტრით დაწინაურდნენ. დაზვერვის მონაცემებით, მტრის ცალკეული ნაწილებმა მნიშვნელოვანი ზარალი განიცადეს. ოკუპანტები ცდილობენ დაჭრილი პერსონალისა და დაზიანებული ტექნიკის ევაკუაციას ოლხოვატკასა და ბოროდოიარსკოეს დასახლებების რაიონებში“, - ნათქვამია ანგარიშში.
ორი დასახლება მდებარეობს ქალაქ ბალაკლეასთან, რომელიც, უკრაინელი სამხედროების განცხადებებით, რუსი ოკუპანტებისგან გაათავისუფლეს.
ფრონტის სხვა სექტორებთან დაკავშირებით გენერალური შტაბი ანგარიშში წერს, რომ დონეცკის რეგიონში უკრაინული შენაერთები აგრძელებენ რუსეთის თავდასხმების მოგერიებას, ხოლო სხვა ადგილებში დაბომბვა და საჰაერო იერიშები გრძელდება.
ცნობისათვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.
რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა.
ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა.
„რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა. 23 ივლისს, Human Rights Watch-მა რუსეთის მიერ ოკუპირებულ სამხრეთ უკრაინის ტერიტორიაზე ადამიანების გატაცებისა და წამების შესახებ ანგარიში გამოაქვეყნა.
Human Rights Watch-ის მიერ სექტემბრის დასაწყისში გამოქვეყნებული ანგარიშის მიხედვით, უკრაინელები იძულებით გადაჰყავთ რუსეთში ან რუსეთის მიერ უკრაინის ოკუპირებულ ტერიტორიებზე.
დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.
