ბრიტანეთის სამხედრო დაზვერვის მონაცემებით, უკრაინა შეტევითი ოპერაციების დროს, როგორც ჩრდილო-აღმოსავლეთის, ისე სამხრეთის ფრონტებზე წარმატებას აღწევს.
„ჩრდილო-აღმოსავლეთით ხარკოვის რეგიონში, უკრაინამ ახლა გააერთიანა მდინარე ოსკოლის აღმოსავლეთით ტერიტორიის მნიშვნელოვანი ნაწილი“,- ნათქვამია ბრიტანეთის თავდაცვის სამინისტროს მიერ გამოქვეყნებულ ყოველდღიურ რეზიუმეში.
„რუსეთის ხელმძღვანელობა, სავარაუდოდ, შეშფოთებულია იმით, რომ მოწინავე უკრაინული შენაერთები ახლა უფრო უახლოვდებიან ლუგანსკის რეგიონის საზღვრებს, რომელის ანექსიაც რუსეთმა, გასულ კვირას ოფიციალურად მოახდინა“, - ნათქვამია მოხსენებაში.
ბრიტანეთის სამხედრო დაზვერვის მონაცემებით, ლუგანსკის რეგიონში უკრაინული ფორმირებები 20 კმ სიღრმეზე მიიწევდნენ რუსეთის თავდაცვის ზონამდე ქალაქ სვატოვოსკენ, რომელიც მნიშვნელოვანი მომარაგების კერაა.
„დიდი ალბათობით, უკრაინას შეუძლია ახლა საარტილერიო სისტემებით დაარტყას სვატოვო-კრემენნაიას საკვანძო გზას, რაც კიდევ უფრო აღმოსავლეთ უკრაინაში დანაყოფების მომარაგების მიზნით რუსეთის შესაძლებლობებს“, - ნათქვამია ანგარიშში.
ცნობისთვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.
რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა.
ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა.
„რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა. 23 ივლისს, Human Rights Watch-მა რუსეთის მიერ ოკუპირებულ სამხრეთ უკრაინის ტერიტორიაზე ადამიანების გატაცებისა და წამების შესახებ ანგარიში გამოაქვეყნა.
Human Rights Watch-ის მიერ სექტემბრის დასაწყისში გამოქვეყნებული ანგარიშის მიხედვით, უკრაინელები იძულებით გადაჰყავთ რუსეთში ან რუსეთის მიერ უკრაინის ოკუპირებულ ტერიტორიებზე.
გაეროს ექსპერტთა ჯგუფმა, 23 სექტემბერს წარმოადგინა პირველადი შედეგები გამოძიების, რომელიც კიევში, ჩერნიგოვში, ხარკოვსა და სუმის ოლქებში ჩატარდა.
14 სექტემბრის მონაცემებით, უკრაინის ხელისუფლებამ განაცხადა, რომ უკრაინის შეიარაღებულმა ძალებმა კონტრშეტევის დროს, დაახლოებით 6000 კვ. კმ. დაიბრუნეს. რუსეთის კონტროლის ქვეშ მყოფი სამხრეთ რეგიონის გასათავისუფლებლად მთავარი კონტრშეტევის მოლოდინი ივლისის დასაწყისიდან გაჩნდა, როდესაც თავდაცვის მინისტრი, ოლექსი რეზნიკოვი ამბობდა, რომ პრეზიდენტმა ვოლოდიმირ ზელენსკიმ ოკუპირებული სამხრეთის გათავისუფლების ბრძანება გასცა.
უკრაინა აცხადებს, რომ დეოკუპაციის მიზნით, კონტრშეტევებს განაგრძობს.
დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.
