უცხოეთი
კორონავირუსის პანდემიამ გენდერულ თანასწორობას მნიშვნელობანი ზარალი მიაყენა - UN Women
გაეროს ქალთა ორგანიზაცია (UN Women) აცხადებს, რომ კორონავირუსის პანდემიამ გენდერულ თანასწორობას მნიშვნელობანი ზარალი მიაყენა და შესაძლოა, 25 წლის განმავლობაში მიღწეული პროგრესი უკან დააბრუნოს. გაეროს ქალთა ორგანიზაციის აღმასრულებელი დირექტორის მოადგილე ანიტა ბატია აცხადებს, რომ პანდემიამდე მსოფლიოში ქალების მიერ არაანაზღაურებადი სამუშაო 16 მილიარდ საათს შეადგენდა, რაც ვირუსის გავრელების შემდეგ მნიშვნელოვნად გაიზარდა. მისი თქმით, დღესდღეობით ქალების მიერ შესრულებული არაანაზღაურებადი სამუშაო მამაკაცებისას სულ მცირე 3-ჯერ აღემატება. გაეროს ქალთა ორგანიზაციის ინფორმაციით, მიმდინარე წელს მსოფლიოს მასშტაბით სამსახურის გარეშე გაცილებით უფრო მეტი ქალი დარჩა, ვიდრე მამაკაცი. კვლევაში ასევე აღნიშნულია, რომ ღარიბ ქვეყნებში 2020 წელს იმ გოგონათა რიცხვი, რომლებსაც განათლების მიღებაზე ხელი არ მიუწვდებათ, რამდენიმე მილიონით გაიზარდა, რაც ადრეულ ქორწინებათა რიცხვს მნიშვნელოვნად გაზრდის.
ქვეყანა ბრძოლისგან დაიღალა, მაგრამ გახსოვდეთ, ვეომებით ვირუსს და არა ერთმანეთს - ბაიდენი
აშშ-ის არჩეულმა პრეზიდენტმა ჯო ბაიდენმა ამერიკელებს მოუწოდა, კორონავირუსისგან თავის დასაცავად და უსაფრთხოების უზრუნველსაყოფად საჭირო ნაბიჯები გადადგან. „ყოველთვის იმსახურებთ სიმართლის მოსმენას თქვენი პრეზიდენტისგან. უნდა შევეცადოთ, რომ შევაჩეროთ ვირუსის ზრდა, რომელმაც მოგვიტანა ტკივილი, მსხვერპლი და იმედგაცრუება. მან დაგვყო, გაგვაბრაზა, ერთმანეთის წინააღმდეგ განგვაწყო. ვიცი, რომ ქვეყანა ბრძოლისგან დაიღალა. უნდა გვახსოვდეს - ჩვენ ვეომებით ვირუსს და არა ერთმანეთს,”- აღნიშნა ბაიდენმა და ამერიკელებს მოუწოდა, უარი თქვან მადლიერების დღესასწაულთან დაკავშირებულ დიდ ოჯახურ შეკრებებზე, ატარონ პირბადეები და შეინარჩუნონ სოციალური დისტანცია. ბაიდენის თქმით, შეერთებულ შტატებს ”გრძელი მძიმე ზამთარი” ელოდება, მაგრამ ბოლოდროინდელ პოზიტიურ სიახლეებს ვაქცინებთან დაკავშირებით იმედით უყურებს და აცხადებს, რომ ქვეყანაში ვაქცინაცია სავარაუდოდ, უახლოეს კვირებში დაიწყება.
რუსეთმა რაკეტსაწინააღმდეგო თავდაცვის სისტემის ახალი რაკეტა გამოსცადა
რუსეთის საჰაერო კოსმოსურმა ძალებმა რუსული რაკეტსაწინააღმდეგო თავდაცვის სისტემის ახალი რაკეტა გამოსცადა, - ამის შესახებ ინფორმაციას რუსული მედია ქვეყნის თავდაცვის სამინისტროზე დაყრდნობით ავრცელებს. მათივე ინფორმაციით, რაკეტა ყაზახეთში მდებარე სარი-შაგანის სამხედრო პოლიგონზე გამოცადეს. “რუსეთის კოსმოსური ძალების საჰაერო და სარაკეტო თავდაცვის ჯარების ოპერატიულმა ეკიპაჟმა რუსული სარაკეტო თავდაცვის სისტემის ახალი რაკეტა ყაზახეთში, სარი-შაგანის პოლიგონზე წარმატებით გამოცადა”, - აცხადებენ რუსეთის თავდაცვის სამინისტროში. ცნობისათვის, ახალი ბალისტიკური რაკეტის წინა საცდელი გაშვება ოქტომბრის ბოლოს ამავე პოლიგონზე განხორციელდა.
ჯო ბაიდენმა ახალი ადმინისტრაციის წევრობის კანდიდატები წარადგინა
აშშ-ის არჩეულმა პრეზიდენტმა ჯო ბაიდენმა ახალი ადმინისტრაციის წევრობის კანდიდატები წარადგინა. ღონისძიებაზე სიტყვით გამოსვლისას ბაიდენმა განაცხადა, რომ მისი გუნდი მზად არის, ამერიკას მსოფლიოში ლიდერის როლი დაუბრუნოს, მოწინააღმდეგეებს დაუპირისპირდეს და მოკავშირეებთან მჭიდროდ ითანამშრომლოს. სახელმწიფო დეპარტამენტს ხელმძღვანელის პოსტზე ენტონი ბლინკენია წარდგენილი. 58 წლის ბლინკენს ბარაქ ობამას პრეზიდენტობის დროს სახელმწიფო დეპარტამენტის ხელმძღვანელის მოადგილის თანამდებობა ეკავა. როგორც CNN აღნიშნავს, 2014 წელს ბლინკენი ცენტრალურ როლს ასრულებდა თეთრი სახლის საგარეო პოლიტიკაში, მათ შორის – რუსეთის მიერ ყირიმის ანექსიაზე რეაქციის კუთხით. ბლინკენი მონაწილეობდა ასევე “ალ-ქაედას” დამფუძნებელ უსამა ბინ-ლადენისა და ტერორისტული ორგანიზაცია “ისლამური სახელმწიფოს” წინააღმდეგ ოპერაციებში. გარდა ამისა, იგი მუშაობდა იმჟამინდელ ვიცე-პრეზიდენტ ჯო ბაიდენთან მრჩევლად ეროვნული უსაფრთხოების მიმართულებით. ჯო ბაიდენმა CIA-ს დირექტორის ყოფილი მოადგილე ავრილ ჰეინსი, ეროვნული დაზვერვის დირექტორის თანამდებობაზე დაასახელა. დამტკიცების შემთხვევაში, იგი იქნება პირველი ქალი, რომელიც აღნიშნულ თანამდებობას დაიკავებს. ამასთან, დამტკიცების შემთხვევაში, გაეროში აშშ-ის ელჩი ლინდა თომას-გრინფილდი იქნება. იგი ობამას პრეზიდენტობის პერიოდში სახელმწიფო მდივნის თანაშემწე გახლდათ. არჩეულმა პრეზიდენტმა საშინაო უსაფრთხოების მდივნის პოზიციაზე ალეხანდრო მაიორკასი წარადგინა. დამტკიცების შემთხვევაში იგი პირველი ლათინოამერიკელი იქნება, რომელიც ამ თანამდებობაზე დაინიშნება. მაიორკასი ბარაკ ობამას პრეზიდენტობის პერიოდში საშინაო უსაფრთხოების მდივნის მოადგილე იყო. გარდა ამისა, ბაიდენმა ეროვნული უსაფრთხოების საკითხებში თეთრი სახლის მრჩევლის თანამდებობაზე ჯეიკ სალვინი წარადგინა. იგი 2016 წელს პრეზიდენტობის დემოკრატი კანდიდატის – ჰილარი ქლინთონის მრჩევლად მუშაობდა. არჩეულმა პრეზიდენტმა კლიმატის საკითხებში პრეზიდენტის წარმომადგენლად ყოფილი სახელმწიფო მდივანი ჯონ კერი დაასახელა. ახალი ადმინისტრაციის წევრობის კანდიდატები სენატმა უნდა დაამტკიცოს. აშშ-ის პრეზიდენტის არჩევნების ძირითადი დღე 3 ნოემბერი იყო. ბაიდენმა წარმომადგენლების 306 ხმა მიიღო, მისმა მეტოქემ, რესპუბლიკელმა დონალდ ტრამპმა კი - 232. ტრამპის იურიდიულმა მრჩევლებმა სასამართლოებში 20-ზე მეტი საჩივარი წარადგინეს და კენჭისყრის შედეგების გაუქმება მოითხოვეს, თუმცა საჩივრებიდან თითქის ყველა უარყოფილ იქნა.
ნახიჩევანის ავტონომიურ რესპუბლიკაში მიმავალი რკინიგზის გახსნის დავალება უკვე გაცემულია - ალიევი
აზერბაიჯანის პრეზიდენტის, ილჰამ ალიევის თქმით, ნახიჩევანის ავტონომიურ რესპუბლიკაში მიმავალი რკინიგზის გახსნის დავალება უკვე გაცემულია. ამის შესახებ განცხადება ილჰამ ალიევმა სატელევიზო მიმართვის დროს გააკეთა, რომელიც ქელბაჯარის რაიონში აზერბაიჯანის არმიის შესვლას ეხებოდა. ამ რაიონზე კონტროლი, აზერბაიჯანის პრეზიდენტის, სომხეთის პრემიერ-მინისტრისა და რუსეთის პრეზიდენტის მიერ 9 ნოემბერს ხელმოწერილი შეთანხმების საფუძველზე, აზერბაიჯანს გადაეცა. „ჩვენ ისევ აღვადგენთ ყველა რაიონს და ქალაქს. დიდი გეგმები გვაქვს. უკვე დაიწყო ქალაქ შუშაში მიმავალი ახალი გზის მშენებლობა. ეს გზა ფიზულის რაიონიდან დაიწყება და ხოჯევანის რაიონის ნაწილზე გაივლის. მე უკვე გავეცი განკარგულება, რომ ეს გზა უახლოეს ხანში გაიყვანონ. ეს რთული პროცესია, მაგრამ ამას შევძლებთ. ჩვენ აღვადგენთ რკინიგზასაც. მათ შორის, წინასწარ გაცემულია დავალება, რომ დაიწყოს ნახიჩევანის ავტონომიური რესპუბლიკაში მიმავალი რკინიგზის აღდგენა“, – განაცხადა ილჰამ ალიევმა.
Bloomberg - რომელმა ქვეყნებმა შეძლეს ვირუსის ყველაზე უკეთ მართვა
მსოფლიოს რომელმა ქვეყანამ შეძლო COVID-19-ის მიერ გამოწვეული კრიზისის საუკეთესოდ მართვა? - ამ კითხვაზე პასუხის დასადგენად, Bloomberg-მა მოამზადა ინდექსი, რომელიც როგორც ეპიდემიური ვითარების მართვის, ასევე სოციალური და ეკონომიკური მიმართულებებით ქვეყნების შედეგებს აერთიანებს. ინდექსის მიხედვით, ყველა პარამეტრის გათვალისწინებით, 2020 წლის უმთავრეს გამოწვევას საუკეთესოდ ახალი ზელანდია გაუმკლავდა. საზღვრების ადრეული ჩაკეტვის, მკაცრი ლოქდაუნისა და კონტაქტების მოძიების სამუშაოების შედეგად, ახალ ზელანდიაში COVID-19-ის მხოლოდ 2,031 შემთხვევა გამოვლინდა. 0-დან 100-ბალიან სკალაზე ახალ ზელანდიას ამ პარამეტრების გათვალისწინებით, 85.4 ქულა აქვს მინიჭებული. სიაში მეორე ადგილზეა იაპონია, რომელმაც ახალ ზელანდიასთან შედარებით უფრო ნაკლები შეზღუდვებით შეძლო ვირუსის მართვა, რაც მოსახლეობის მხრიდან სოციალური დისტანცირების მკაცრი ნორმების დაცვასთან იყო დაკავშირებული. მესამე ადგილზე კი ტაივანია, რომელშიც ვირუსით ინფიცირების მხოლოდ 618 შემთხვევა არის გამოვლენილი. ინდექსის პირველ ათეულში ევროკავშირის ქვეყნებიდან ყველაზე წინ ფინეთია, რომელმაც მთელი EU-ს მასშტაბით ეპიდემიის გავრცელება ყველაზე უკეთ მართა. ფინეთში ინფიცირების მხოლოდ 22,289 შემთხვევა გამოვლინდა. თუმცა, ამ ქვეყანაშიც უკანასკნელი ორი კვირის განმავლობაში ვირუსის გავრცელების მზარდი ტრენდი ფიქსირდება. სხვა პარამეტრებთან ერთად, რეიტინგი სახელმწიფოების მხრიდან პანდემიის პერიოდში მოსახლეობის სოციალური დაცვისთვის გადადგმულ ნაბიჯებსაც აფასებს. თუმცა, მთავარ კრიტერიუმს სწორედ ვირუსის შეკავების პოლიტიკის წარმატებულობა წარმოადგენს. რეიტინგში საქართველო არ შედის, რადგან ის მხოლოდ იმ ქვეყნებს შეეხება, რომელთა ეკონომიკის ზომაც $200 მილიარდს აღემატება. ასეთი კი სულ 53 ქვეყანაა. Bloomberg-ის ინდექსი: 1 ახალი ზელანდია 85.4 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2 2 იაპონია - 85 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 29 3 ტაივანი - 82.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 4 სამხრეთ კორეა - 82.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 10 5 ფინეთი - 82 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 129 6 ნორვეგია - 81.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 281 7 ავსტრალია - 81.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1 8 ჩინეთი - 80.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 9 დანია - 77 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 550 10 ვიეტნამი - 74.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 11 სინგაპური - 74.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 4 12 ჰონგ კონგი - 73.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 5 13 კანადა - 73.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 316 14 გერმანია - 71.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 604 15 ტაილანდი - 70.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 16 შვედეთი - 68.7 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 967 17 არაბთა გაერთიანებული საამიროები - 67.5 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 371 18 შეერთებული შტატები - 66.5 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,129 19 ინდონეზია - 66.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 42 20 ირლანდია - 65.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 308 21 ისრაელი - 65 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 232 22 რუსეთი - 65 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 412 23 ნიდერლანდები - 64.4 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,247 24 ბანგლადეში - 64.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 31 25 ეგვიპტე - 63.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 7 26 შვეიცარია - 62.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2,160 27 პაკისტანი - 61.7 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 23 28 გაერთიანებული სამეფო - 61.5 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,004 29 მალაიზია - 61.4 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 93 30 თურქეთი - 60.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 106 31 საბერძნეთი - 59.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 600 32 საუდის არაბეთი - 59.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 32 33 პორტუგალია - 59.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,455 34 ინდოეთი - 58.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 93 35 სამხრეთ აფრიკა - 57.8 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 93 36 ავსტრია - 56.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,918 37 ბრაზილია - 56.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 338 38 ჩილე - 55.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 218 39 ერაყი - 54.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 222 40 იტალია - 54.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,528 41 ესპანეთი - 54.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,092 42 ნიგერია - 53.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2 43 რუმინეთი - 53.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,131 44 პოლონეთი - 52.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,673 45 საფრანგეთი - 51.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,695 46 ფილიპინები - 48.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 48 47 ირანი - 48.7 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 354 48 კოლუმბია - 48.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 490 49 ჩეხეთის რესპუბლიკა - 46.8 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2,371 50 ბელგია - 45.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2,339 51 პერუ - 41.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 207 52 არგენტინა - 41.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 666 53 მექსიკა - 37.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 113
ამერიკა დაბრუნდა და მზად არის უხელმძღვანელოს მსოფლიოს - ჯო ბაიდენი
ჯო ბაიდენი აცხადებს, რომ შეერთებული შტატები მზად იქნება, გლობალურ არენაზე კვლავ წამყვანი როლი შეასრულოს. არჩეულმა პრეზიდენტმა დელავერის შტატის ქალაქ უილმინგტონში საგარეო პოლიტიკისა და ეროვნული უსაფრთხოების გუნდის წარდგენისას განაცხადა, რომ ამერიკა დაბრუნდა. „ეს არის გუნდი, რომელიც გამოხატავს, რომ ამერიკა დაბრუნდა, მზად არის უხელმძღვანელოს მსოფლიოს, არ დაიხიოს უკან, კვლავ დაჯდეს მაგიდის თავში, მზად არის წინააღმდეგობა გაუწიოს მეტოქეებს და არ უარყოს ჩვენი მოკავშირეები, მზად არის მტკიცედ დაიცვას ჩვენი ღირებულებები“, – განაცხადა ჯო ბაიდენმა. აღსანიშნავია, რომ ჯო ბაიდენის ეს მიდგომა განსხვავდება დონალდ ტრამპის საგარეო პოლიტიკისგან, რომლის პრიორიტეტული ლოზუნგი იყო „ამერიკა უპირველეს ყოვლისა".
აშშ-მა სამ რუსულ კომპანიას სანქციები დაუწესა
აშშ-ის ხელისუფლებამ სამ რუსულ კომპანიას, მასობრივი იარაღის გაუვრცელებლობის შესახებ აშშ-ის კანონმდებლობის გვერდის ავლით ირანთან, სირიასთან და ჩრდილოეთ კორეასთან თანამშრომლობის გამო, სანქციები დაუწესა. აშშ-ის სახელმწიფო დეპარტამენტის თანახმად, სანქციები 6 ნოემბრიდან ამოქმედდა კომპანია „ავიანაწილების“, სააქციო საზოგადოება „ელეკონის“ და Nilco Group-ის მიმართ. ვაშინგტონის მტკიცებით, აღნიშნული კომპანიები, ირანს, სერიასა და ჩრდილოეთ კორეას,მასობრივი განადგურების იარაღის შექმნისათვის გამოსადეგ ტექნოლოგიებსა და მასალებს გადასცემდნენ. სანქციები ძალაში იქნება ორი წლის განმვალობაში. სახელმწიფო დეპარტამენტის მიერ სანქცირებულ კომპანიათა შორის ორი ჩინური კომპანიაცაა. ერთი თვის წინ ევროპის კავშირმა რუსეთის ექვსი ფიზიკური და ერთი იურიდიული პირის წინააღმდეგ სანქციები შემოიღო აგვისტოში რუსეთის ოპოზიციონერი პოლიტიკოსის, ალექსეი ნავალნის მოწამვლის გამო. გადაწყვეტილება და სანქციების სია 15 ოქტომბერს გამოქვეყნდა ევროკავშირის ოფიციალურ ბიულეტენში. სანქციებს მხარი დაუჭირა დიდმა ბრიტანეთმაც. ყველა პირს ევროკავშირში ტურისტული მიზნებით შესვლა ეკრძალება, გაიყინება ევროკავშირში მათი აქტივები, თუკი ისინი არსებობს. გარდა ამისა, ევროკავშირის ფიზიკურ და იურიდიულ პირებს ეკრძალებათ სანქციების სიაში შემავალ პირებთან ფინანსური ურთიერთობები.
პოლონეთში აშშ-ის საარმიო კორპუსის სარდლობა გაიხსნა, რომელიც ევროპაში ერთადერთი ასეთი სტრუქტურაა
პოლონეთში საზეიმოდ გაიხსნა აშშ-ის მე-5 საარმიო კორპუსის მოწინავე სარდლობა, რომელიც პოლონეთში, ამერიკელი სამხედროების დაახლოებით 5500 კაცამდე გაზრდას უზრუნველყოფს. ამის შესახებ Euractiv-ი და „ევროპეისკაია პრავდა“, ადგილობრივ პოლონურ მედიაზე დაყრდნობით იუწყებიან. „მოწინავე სარდლობის ყოფნა აქ, პოლონეთის მიწაზე, არის გარანტია პოტენციური აგრესორის შეკავებისა. პოზნანიდან მე-5 კორპუსი უხელმძღვანელებს აშშ-ის სახმელეთო ნაწილებს, რომლებიც ნატოს აღმოსავლეთ ფლანგზე მოქმედებს“, - განაცხადა პოლონეთის თავდაცვის მინისტრმა, მარიშ ბლაშჩაკმა. 200-ზე მეტი ამერიკელი სამხედრო იმსახურებს ქალაქ პოზნანაში, ხოლო აშშ-ის მეხუთე საარმიო კორპუსის სარდლობა ერთადერთი ამ დონის სტრუქტურა იქნება ევროპაში. დაწინაურებული სარდლობა, ევროპაში აშშ-ის სახმელეთო ჯარების ოპერატიულ საქმიანობას და დაგეგმარებას, აშშ-ის და ნატოს სხვადასხვა სამხედრო დანაყოფების თანამშრომლობასა და სინქრონულ მოქმედებას გაუწევს კოორდინაციასა და კონტროლს. ორი კვირის წინ პოლონეთის პრეზიდენტმა ანჯეი დუდამ აშშ-სა და პოლონეთს შორის სამხედრო სფეროში თანამშრომლობის გაღრმავების ხელშეკრულებას რატიფიკაცია მოახდინა.
ეს აშშ-ევროკავშირის გლობალური პარტნიორობის ახალი დასაწყისია - ევროკომისიის პრეზიდენტი
ევროკომისიის პრეზიდენტი ურსულა ფონ დერ ლეიენი აცხადებს, რომ ის აშშ-ის არჩეულ პრეზიდენტს, ჯო ბაიდენს, ტელეფონით ესაუბრა და არჩევნებში გამარჯვება მიულოცა. „შესანიშნავი იყო საუბარი აშშ-ის არჩეულ პრეზიდენტთან, ჯო ბაიდენთან. მე მას გამარჯვება მივულოცე. ეს აშშ-სა და ევროკავშირს შორის გლობალური პარტნიორობისთვის ახალი დასაწყისია. ძლიერი აშშ-სა და ძლიერი ევროკავშირის ერთობლივი მუშაობის შედეგად შეიძლება ჩამოყალიბდეს გლობალური დღის წესრიგი, რომელიც ემყარება თანამშრომლობას, მულტილატერალიზმს, სოლიდარობასა და საერთო ღირებულებებს,“ - წერს ურსულა ფონ დერ ლეიენი „ტვიტერში“. შეგახსენებთ, ჯო ბაიდენთან სატელეფონო საუბარი ევროსაბჭოს პრეზიდენტმა შარლ მიშელმაც გამართა. „ვესაუბრე არჩეულ პრეზიდენტს ჯო ბაიდენს და მომავალ წელს ბრიუსელში ევროკავშირის წევრი ქვეყნების ლიდერებთან სპეციალურ შეხვედრაზე მოვიწვიე. ახლა დროა ჩვენი ძალისხმევა გავაერთიანოთ და ისეთ საკითხებზე ვიმუშაოთ, როგორიც არის კორონავირუსის პანდემია, კლიმატი, უსაფრთხოება და მულტილატერალიზმი“, - წერს შარლ მიშელი „ტვიტერში“.
ილონ მასკმა უმდიდრესი ადამიანების რეიტინგში ბილ გეიტსს გადაუსწრო
SpaceX-ისა და Tesla-ს დამფუძნებელმა, ილონ მასკმა Bloomberg-ის უმდიდრესი ადამიანების რეიტინგში Microsoft-ის დამფუძნებელ ბილ გეიტსს გადაუსწრო. ამ დროისთვის ილონ მასკი პლანეტის მეორე უმდიდრესი ადამიანია. გამოცემა მასკის ქონებას 127.9 მილიარდი დოლარით აფასებს. მიმდინარე წელს მასკის ქონება, დახლოებით, 100 მილიარდი დოლარით არის გაზრდილი, რაც ყველაზე დიდი მაჩვენებელია. მასკმა გადაასწრო ბილ გეიტსს, რომლის ქონების ღირებულებაც, გამოცემის მონაცემებით, 127.7 მილიარდი დოლარია. რეიტინგში დიდი უპირატესობით, 182 მილიარდი დოლარი, კვლავ კორპორაცია Amazon-ის დამფუძნებელი და ხელმძღვანელი, ჯეფ ბეზოსი ლიდერობს. რაც შეეხება Forbes-ის მილიარდერთა რეიტინგს, ამ სიაში ილონ მასკი მეოთხე ადგილს იკავებს და მისი ქონება 110 მილიარდი დოლარით არის შეფასებული. ამავე რეიტინგის პირველი სამეული შემდეგნაირად გამოიყურება: ჯეფ ბეზოსი [Amazon] 181.3 მილიარდი დოლარი, ბერნარ არნო [LVMH] 140.4 მილიარდი დოლარი, ბილ გეიტსი [Microsoft] 118.5 მილიარდი დოლარი. გასულ კვირას Bloomberg-ის რეიტინგში მასკმა კიდევ ერთ მილიარდერს, Facebook-ის დამფუძნებელ მარკ ზაკერბერგს გადაუსწრო, რომლის ქონებაც 102 მილიარდი დოლარით არის შეფასებული. ილონ მასკის აქტივების ღირებულების შთამბეჭდავი ზრდის მიზეზი კომპანია Tesla-ს მაჩვენებლებია, რომელიც უკვე ზედიზედ 5 კვარტლის განმავლობაში მომგებიანია. გასულ კვირას, ასევე, ცნობილი გახდა, რომ კომპანიის აქციები დეკემბრიდან S&P 500-ის პლატფორმაზე გადაინაცვლებდა, სწორედ ამ პლატფორმაზე ვაჭრობენ 500 უმსხვილესი ამერიკული კომპანიის აქციებით. Tesla-ს აქციები მიმდინარე წელს, ჯამურად, 485%-ით არის გაძვირებული. გუშინ, 23 ნოემბერს კომპანიის მათი ფასი კიდევ 6.5%-ით გაიზარდა და ერთის ფასი 521 დოლარს გაუტოლდა.
ჩინეთის პრეზიდენტი ქვეყნებს საერთაშორისო მოგზაურობის აღსადგენად გლობალური მექანიზმის შექმნისკენ მოუწოდებს
ჩინეთის პრეზიდენტი სი ძინპინი ქვეყნებს საერთაშორისო მოგზაურობის აღსადგენად გლობალური მექანიზმის შექმნისკენ მოუწოდებს, - ამის შესახებ ინფორმაციას BBC-ი ავრცელებს. „ჩვენ გვჭირდება პოლიტიკის ჰარმონიზაცია და სწრაფი გზა, რომელიც ადამიანების წესების დაცვით გადაადგილებას შეუწყობს ხელს“ , – განაცხადა სი ძინპინმა „დიდი ოცეულის“ სამიტზე. ჩინეთის ლიდერის განცხადებით, მოგზაურების ჯანმრთელობის სტატუსი ე.წ. QR-კოდებით უნდა გადამოწმდეს. სი ძინპინმა განმარტა, რომ კოდების გამოყენებით შესაძლებელია ნუკლეინის მჟავის ტესტის შედეგებზე დაყრდნობით ჯანმრთელობის სერთიფიკატების ამოცნობა. „იმედი გვაქვს, ამ მექანიზმს ბევრი ქვეყანა შემოუერთდება“, - აღნიშნა ჩინეთის პრეზიდენტმა. უფლებადამცველები ამ შეთავაზებაში საფრთხეს ხედავენ. მათი განმარტებით, ეს კოდები შესაძლოა, მოქალაქეთა პოლიტიკური მონიტორინგის გასაძლიერებლად გამოიყენონ.
ოპოზიციის მხრიდან საქართველოს პარლამენტის ბოიკოტს დასავლეთის მხარდაჭერა არ აქვს - უილიამ კორტნი
საქართველოში აშშ-ის ყოფილი ელჩი უილიამ კორტნი აცხადებს, რომ ოპოზიციის მხრიდან პარლამენტის ბოიკოტს, დასავლეთის მხარდაჭერა არ აქვს. ამის შესახებ ყოფილი ელჩი „ტვიტერის“ გვერდზე წერს. „დასავლეთმა ბელარუსში 9 აგვისტოს გამართული არჩევნები იმდენად კანონთან შეუსაბამოდ ჩათვალა, განაცხადა, რომ ახალი არჩევნების გამართვაა საჭირო. თუმცა საქართველოში 31 ოქტომბრის საპარლამენტო არჩევნები არ იყო იმდენად გაყალბებული, რომ ხმები გაუქმებულად გამოაცხადო. ოპოზიციის მხრიდან პარლამენტის ბოიკოტს დასავლეთის მხარდაჭერა არ აქვს“, - წერს საქართველოში აშშ-ის ყოფილი ელჩი. შეგახსენებთ, რომ საქართველოში საპარლამენტო არჩევნები 2020 წლის 31 ოქტომბერს გაიმართა. შედეგები არ ცნო ოპოზიციამ და პარლამენტს ბოიკოტი გამოუცხადა. 21 ნოემბერს გამართულ არჩევნების მეორე ტურში კი, მონაწილეობა მხოლოდ მმართველმა პარტიამ მიიღო. The West saw August 9 presidential #election in #Belarus as so tainted that new vote is required, but October 31 parliamentary election in #Georgia as not so rigged as to invalidate vote. Opposition boycott of parliament lacks Western support. https://t.co/unDeARqPAC — William Courtney (@courtneywmh) November 22, 2020
2021 წლის დასაწყისში ევროპაში "კოვიდ-19"-ის მესამე ტალღას პროგნოზირებენ
ჯანდაცვის მსოფლიო ორგანიზაციის სპეციალური წარმომადგენლის დევიდ ნაბაროს განცხადებით, 2021 წლის დასაწყისში ევროპაში "კოვიდ-19"-ის მესამე ტალღაა მოსალოდნელი. ამის შესახებ მან შვეიცარიულ მედიაკომპანიების წარმომადგენლებს განუცხადა. ნაბაროს თქმით, ევროპულმა ქვეყნებმა ვერ შეძლეს მეორე ტალღის თავიდან აცილება მას შემდეგ, რაც მათ პირველი ტალღის გაკონტროლება შეძლეს. „ევროპული რეაქცია იყო არასრული. მათ ხელიდან გაუშვეს შანსი, აეშენებინათ საჭირო ინფრასტრუქტურა ზაფხულის განმავლობაში, მას შემდეგ, რაც შეძლეს, ინფექციის პირველი ტალღის გაკონტროლება. ახლა მეორე ტალღაა. თუკი ისინი არ ააშენებენ საჭირო ინფრასტრუქტურას ახლა, მათ ექნებათ მესამე ტალღა მომდევნო წლის დასაწყისში“ , - განაცხადა ნაბარომ. ჯანმოს წარმომადგენელმა განაცხადა, რომ ბევრი დასავლეთევროპული ქვეყნის წინაშე დგას ამოცანა, კვლავაც გააკონტროლონ ვირუსი ისე, რომ არ გამოიყენონ ისეთი უხეში ზომა, როგორიც არის „ლოქდაუნი“ - მკაცრი იზოლაციის რეჟიმი, რისთვისაც, მისი თქმით, უწევთ მაღალი ფასის გადახდა.
თურქეთში კოვიდ 19-ის საწინააღმდეგო ვაქცინა უფასო იქნება
თურქეთში კორონავირუსის საწინააღმდეგო ვაქცინა უფასო იქნება, - თურქული მედიის ინფორმაციით, ამის შესახებ ქვეყნის ჯანდაცვის მინისტრმა ფაჰრეთინ კოჯამ განაცხადა. ამასთან, ჯანდაცვის მინისტრმა რამდენიმე დღის წინ აღნიშნა, რომ თურქეთი ჩინური კომპანია Sinovac Biotech-ის მიერ შექმნილი კანდიდატი ვაქცინის 20 მილიონი დოზის შესაძენად უახლოეს დღეებში კონტრაქტის გაფორმებას გეგმავდა. „დეკემბერში მინიმუმ 10 მილიონი დოზა ჩინური ვაქცინის შეძენას შევძლებთ. ჩვენ გვინდა, რომ ეს რიცხვი გავზარდოთ. იანვარშიც იგივე რაოდენობა გვექნება,”- განაცხადა კოჯამ. მისივე თქმით, ქვეყანა მოლაპარკებებს Pfizer-ისა და BioNTech-ის ვაქცინების შეძენის მიზნითაც აწარმოებს. ცნობისათვის, ბოლო მონაცემებით, თურქეთში კორონავირუსის 440 000-ზე მეტი შემთხვევაა დადასტურებული, დაღუპულთა რაოდენობა კი 12 000-ს აჭარბებს.
CNN - აშშ „ღია ცის ხელშეკრულებიდან“ ოფიციალურად გავიდა
აშშ "ღია ცის ხელშეკრულებიდან" ოფიციალურად გავიდა. ამის შესახებ CNN-ი წერს. ტელეკომპანია სახელმწიფო დეპარტამენტზე დაყრდნობით ინფორმაციას ავრცელებს, რომ ეს პრეზიდენტ დონალდ ტრამპის მიერ გადაწყვეტილების გამოცხადებიდან ექვსი თვის შემდეგ მოხდა. შეერთებულმა შტატებმა ღია ცის ხელშეკრულების დატოვების შესახებ 21 მაისს განაცხადა და ამის მიზეზად, რუსეთის მხრიდან შეთანხმების პირობების თვითნებური ინტერპრეტაცია და პერიოდული დარღვევა დაასახელა. სახელმწიფო ვალდებულია, ღია ცის შეთანხმებიდან გასვლის შესახებ ხელშემკვრელი მხარეები 6 თვით ადრე გააფრთხილოს. აშშ მზადაა, ამ 6-თვიან ვადაში გადახედოს საკუთარ გადაწყვეტილებას, თუ რუსეთი ნაკისრი ვალდებულებების სრულად შესრულებას დაუბრუნდება. რუსეთის მიერ ხელშეკრულების დარღვევის მაგალითებად აშშ-მა დაასახელა: საქართველოს ოკუპირებული ტერიტორიების – აფხაზეთისა და ცხინვალის რეგიონების – გასწვრივ სადამკვირვებლო ფრენებისთვის 10-კილომეტრიანი შემზღუდავი ზოლის დაწესება; საწვავის შემვსები აეროდრომის ანექსირებულ ყირიმის ტერიტორიაზე განსაზღვრა, რაც აშშ-ის შეფასებით, წარმოადგენს რუსეთის მცდელობას, განამტკიცოს უკანონო განაცხადი ნახევარკუნძულის ანექსიის შესახებ; დისტანციის დაწესება ფრენებზე კალინინგრადის ოლქთან, სადაც, მედიის ცნობით, რუსეთმა ბირთვული რაკეტები განათავსა და სამხედრო ინფრასტრუქტურა განაახლა. აშშ-ისა და კანადისთვის რუსეთის სამხედრო წვრთნებზე ერთობლივი სადამკვირვებლო ფრენის შეზღუდვა 2019 წელს. რუსეთის მიერ შეთანხმების დარღვევის გარდა, ხელშეკრულებიდან გასვლის ერთ-ერთ ოფიციალურ მიზეზად აშშ-მა ასევე დაასახელა კორონავირუსის პანდემიით გამოწვეული ეკონომიკური კრიზისის ფონზე სადამკვირვებლო მისიის ტექნიკის განახლებისთვის საჭირო ფინანსური ხარჯების თავიდან აცილება. New York Times-ის ინფორმაციით, აშშ-ის პრეზიდენტი დონალდ ტრამპი, ასევე, აღაშფოთა რუსეთის მიერ მონიტორინგის განხორციელებამ მის კუთვნილ გოლფის კლუბზე 2017 წელს. ამერიკული მხარე მიიჩნევს, რომ სამოქალაქო ობიექტების დაზვრევით რუსეთი ღია ცის შეთანხმების სულისკვეთებას არღვევს. ამას გარდა, გამოცემის ცნობით, გასაიდუმლოებულ შეტყობინებებში ამერიკელი სამხედროები და სპეცსამსახურის წარმომადგენლები ირწმუნებიან, რომ რუსები ღია ცის შეთანხმების ფარგლებში ფრენებს იყენებენ აშშ-ის ისეთი კრიტიკული ინფრასტრუქტურის შესახებ რუკების შესაქმენლად, რომლებიც შეიძლება, ჩვეულებრივი შეიარაღებული ან კიბერთავდასხმის ობიექტები გახდნენ. რუსეთის საგარეო საქმეთა სამინისტრომ ღია ცის შესახებ ხელშეკრულების პირობების დარღვევა უარყო და აშშ-ის ნაბიჯს სამწუხარო და დესტრუქციული უწოდა. ამავდროულად, მოსკოვმა თქვა, რომ მზადაა ღია ცის შეთანხმების გათვალისწინებით სადამკვირვებლო მისია დაუშვას კავკასიის საზღვრის გასწვრივ 10 კილომეტრიან ზონებში, თუ საქართველო რუსეთს მის ტერიტორიაზე ფრენის ნებას მისცემს. რა არის ღია ცის შეთანხმება? ღია ცა არის საჰაერო სივრცესთან დაკავშირებული საერთაშორისო სამართლებრივი რეჟიმი, რომელიც შექმნილია განიარაღების შესახებ არსებული ხელშეკრულებების შესრულების კონტროლის მიზნით. ღია ცის შეთანხმება აწესებს შეუიარაღებელი სადამკვირვებლო ფრენების რეჟიმს წევრი სახელმწიფოების ტერიტორიაზე. მათ შორის, ზუსტად განსაზღვრავს სადამკვრივებლო ფრენების კვოტებს და შეტყობინებებს შესვლის წერტილების შესახებ. ღია ცის იდეა, თავდაპირველად როგორც აშშ-სა და საბჭოთა კავშირს შორის ორმხრივი შეთანხმება, აშშ-ის პრეზიდენტმა დუაიტ ეიზენჰაუერმა ჯერ კიდევ 1955 წელს გაახმოვანა. ინიციატივა ცივი ომით დაპირისპირებულ მხარეებს შორის ნდობის ჩამოყალიბებას ემსახურებოდა. თუმცა იდეის ხორცშესხმა მრავალმხრივ ფორმატში მხოლოდ 37 წლის შემდეგ გახდა შესაძლებელი. ხელშეკრულება ღია ცის შესახებ ჰელსინკიში 1992 წლის 24 მარტს გაფორმდა და 2002 წელს შევიდა ძალაში. ამ დროისთვის შეთანხმების მონაწილეა 35 ქვეყანა (ბელარუსი, ბელგია, ბოსნია და ჰერცოგოვინა, ბულგარეთი, კანადა, ხორვატია, ჩეხეთი, დანია, ესტონეთი, ფინეთი, საფრანგეთი, საქაღთველო, გერმანია, საბერძნეთი, უნგრეთი, ისლანდია, იტალია, ლატვია, ლიეტუვა, ყირგიზეთი, ლუქსემბურგი, ნიდერლანდები, ნორვეგია, პოლონეთი, პორტუგალია, რუმინეთი, რუსეთი, სლოვაკეთი, სლოვენია, ესპანეთი, შვედეთი, თურქეთი, უკრაინა, გაერთიანებული სამეფო და შეერთებული შტატები), თუმცა აქედან ერთს – ყირგიზეთს – საერთაშორისო ხელშეკრულება ჯერ რატიფიცირებული არ აქვს. ჩამოთვლილი სახელმწიფოები სამხედრო საქმიანობის კონტოლის მიზნით ერთმანეთს საჰაერო სივრცეს უხსნიან.
კორონავირუსის საწინააღმდეგო ვაქცინაცია აშშ-ში, სავარაუდოდ, 11 დეკემბერს დაიწყება
ამერიკელების კოვიდ 19-ის საწინააღმდეგო ვაქცინაცია, სავარაუდოდ, 11-12 დეკემბერს დაიწყება, - მედიის ინფორმაციით, ამის შესახებ აშშ-ის ვაქცინების პროგრამის ხელმძღვანელმა მონსეფ სლაუიმ განაცხადა. “ჩვენ ვგეგმავთ, რომ ვაქცინის იმუნიზაციის ადგილებზე გადატანა დამტკიცებიდან 24 საათის განმავლობაში შევძლოთ. ვფიქრობ, ამისთვის ერთი ან ორი დღე დაგვჭირდება, ასე რომ, ეს პროცესი 11 ან 12 დეკემბერს დაიწყება“, - აღნიშნა მონსეფ სლაუიმ CNN- სთან ინტერვიუში. ამერიკულმა ფარმაცევტულმა კომპანიამ Pfizer– მა და მისმა პარტნიორმა BioNTech–მა კოვიდ 19-ის ვაქცინის გადაუდებელი ავტორიზაციის მოთხოვნის შესახებ განაცხადი პარასკევს შეიტანეს. აშშ-ის სურსათისა და წამლების ადმინისტრაციის (FDA) ვაქცინების საკონსულტაციო კომიტეტი ვაქცინის ნებართვის საკითხის განსახილველად 10 დეკემბერს შეიკრიბება. შეგახსენებთ, ვაქცინამ, რომელიც ორ დოზას საჭიროებს, 95% ეფექტურობა აჩვენა. Pfizer იმედოვნებს, რომ წლის ბოლომდე 50 მილიონამდე დოზის წარმოება იქნება შესაძლებელი.
ბელარუსისთვის დაწესებულ სანქციებს კიდევ შვიდი ქვეყანა შეუერთდა
ევროკავშირის მიერ ბელარუსისთვის დაწესებულ სანქციებს კიდევ შვიდი ქვეყანა შეუერთდა. კერძოდ, სანქციებს შეურთდნენ ჩრდილოეთ მაკედონია, მონტენეგრო, ალბანეთი, ისლანდია, ლიხტენშტეინი, ნორვეგია და უკრაინა. ევროკავშირმა ბელარუსის წინააღმდეგ სანქციების პირველი პაკეტი 2 ოქტომბერს დაამტკიცა, 6 ნოემბერს კი სანქციები გააფართოვა. სანქციების ფარგლებში შედგენილი შავი სია 60-მდე პირს მოიცავს, მათ შორის ქვეყნის პრეზიდენტს – ალექსანდრ ლუკაშენკოს და მის დამხმარეს ვიქტორ ლუკაშენკოს, ასევე ლუკაშენკოს პრესმდივან ნატალია ეისმონტს.
აშშ-ის ერთ-ერთ სავაჭრო ცენტრში შეიარაღებულმა პირმა 8 ადამიანი დაჭრა
აშშ-ის უისკონსინის შტატის ქალაქ მილუოკიში მდებარე სავაჭრო ცენტრში შეიარაღებულმა პირმა სროლა ატეხა, რის შედეგადაც 8 ადამიანი დაიჭრა, - ამის შესახებ ინფორმაციას Reuters-ი ავრცელებს. სააგენტოს ცნობით, დაჭრილებს შორის ერთი მოზარდია. ადგილობრივი სამართალდამცავები აცხადებენ, რომ ეჭვმიტანილი, რომელიც, თვითმხილველების აღწერით თეთრკანიანი ახალგაზრდა მამაკაცია, გაიქცა. ინციდენტის ადგილზე 50-მდე სამართალდამცავი იყო მობილიზებული.
სერბეთის პატრიარქი კორონავირუსით გარდაიცვალა
სერბეთის პატრიარქი ირინეოსი კორონავირუსით გარდაიცვალა, - ამის შესახებ Reuters-ი წერს. შეგახსენებთ, გუშინ ცნობილი გახდა, რომ სერბეთის პატრიარქის ირინეოსის ჯანმრთელობის მდგომარეობა დამძიმდა. 90 წლის ირინეოსს კორონავირუსი 4 ნოემბერს დაუდასტურდა, მას ბელგრადის სამხედრო ჰოსპიტალში მკურნალობდნენ.
