პოლიტიკა
ეუთოში საქართველოს მუდმივი წარმომადგენელი ქეთევან ციხელაშვილი ეუთოში საქართველოს მეგობართა არაფორმალური ჯგუფის წევრი ქვეყნების ელჩებს შეხვდა
2020 წლის 16 სექტემბერს, ეუთოში საქართველოს მუდმივი წარმომადგენელი ქეთევან ციხელაშვილი ეუთოში საქართველოს მეგობართა არაფორმალური ჯგუფის წევრი ქვეყნების ელჩებს შეხვდა. შეხვედრაზე ქეთევან ციხელაშვილმა კოლეგებს მადლობა გადაუხადა საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის საერთაშორისოდ აღიარებულ საზღვრებში. მან აღნიშნა, რომ ჯგუფის განცხადებები, მათ შორის ახლახან, განახლებული მუდმივი საბჭოს პირველივე სხდომაზე რუსეთ-საქართველოს ომის მე-12 წლისთავთან დაკავშირებული ერთობლივი განცხადება არის პარტნიორების მხრიდან საქართველოსადმი მტკიცე მხარდაჭერის დადასტურება და მოწმობს, რომ საერთაშორისო თანამეგობრობა ერთსულოვანია რუსეთის მიერ საქართველოს მიმართ განხორციელებული აგრესიისა და ტერიტორიების ოკუპაციის შეფასებისას. ქეთევან ციხელაშვილმა ჯგუფის წევრებს მიაწოდა ამომწურავი ინფორმაცია საქართველოს ოკუპირებულ რეგიონებში უსაფრთხოების, ადამიანის უფლებათა და ჰუმანიტარული კუთხით შექმნილ ურთულეს მდგომარეობასთან დაკავშირებით. მან აღნიშნა, ბოლო პერიოდში საოკუპაციო რეჟიმის მხრიდან განხორციელებული პროვოკაციები და ხაზი გაუსვა საქართველოს წინააღმდეგ ჰიბრიდული ომის ინსტრუმენტების, მათ შორის, კიბერ-თავდასხმების და დეზინფორმაციის გამოყენებას. ქართულმა მხარემ მეგობართა ჯგუფის წევრებს მიაწოდა ინფორმაცია საოკუპაციო ხაზის მავთულხლართებითა და სხვა ხელოვნური ბარიერებით გამაგრების პროცესთან დაკავშირებით, რასაც თან ერთვის ადგილობრივ მაცხოვრებელთა უკანონო დაკავებები. ამ კონტექსტში, ელჩმა ყურადღება გაამახვილა, საქართველოს მოქალაქის, ზაზა გახელაძის დაჭრისა და უკანონოდ დაკავების ფაქტზე და ხაზგასმით აღნიშნა, რომ აუცილებელია ზაზა გახელაძის და საოკუპაციო რეჟიმის ტყვეობაში ამჟამად მყოფი სხვა პირების, კერძოდ - გენადი ბესტაევისა და ხვიჩა მღებრიშვილის დაუყოვნებლივ გათავისუფლება. შეხვედრაზე საუბარი ასევე შეეხო სხვა აქტუალურ თემებს, მათ შორის, შემოდგომაზე საქართველოში დაგეგმილ საპარლამენტო არჩევნებს. საქართველოს ელჩმა კიდევ ერთხელ დაადასტურა მთავრობის მზაობა, მოახლოებული არჩევნების თავისუფალ და სამართლიან გარემოსა და დემოკრატიულ სტანდარტებთან შესაბამისობაში ჩატარებასთან დაკავშირებით და განმეორებით მოიწვია პარტნიორი ქვეყნების წარმომადგენლები არჩევნებზე დაკვირვების მიზნით. მან ხაზი გაუსვა, რომ ქართული მხარე აქტიურად მუშაობს შესაბამის საერთაშორისო ორგანიზაციებთან, მათ შორის ეუთო-ს დემოკრატიული ინსტიტუტებისა და ადამიანის უფლებათა ოფისთან, საერთაშორისოს დამკვირვებლებისათვის უსაფრთხო სამუშაო პირობების უზრუნველსაყოფად, გლობალური პანდემიის მიუხედავად. მეგობართა ჯგუფის წევრებმა შეხვედრაზე კიდევ ერთხელ დაადასტურეს საქართველოს მხარდაჭერა და გამოხატეს მზადყოფნა მჭიდრო თანამშრომლობისათვის. ეუთო-ში საქართველოს მეგობართა ჯგუფი 2014 წელს ჩამოყალიბდა. ჯგუფი აქტიურად უჭერს მხარს საქართველოს ძალისხმევას რუსეთ-საქართველოს კონფლიქტთან დაკავშირებული საკითხების საერთაშორისო დღის წესრიგში მაღალ დონეზე შენარჩუნებისა და საქართველოს ოკუპირებულ რეგიონებში არსებული ვითარების შესახებ ცნობადობის ამაღლების კუთხით. ჯგუფის წევრები არიან: ბულგარეთი, კანადა, ჩეხეთი, ესტონეთი, ფინეთი, ირლანდია, ლატვია, ლიეტუვა, ნორვეგია, პოლონეთი, რუმინეთი, შვედეთი, უკრაინა, გაერთანებული სამეფო და აშშ.
ოკუპანტები ატოცსა და ზემო ნიქოზთანაც გამოჩნდნენ
ქარელის მუნიციპალიტეტის სოფლების ატოცისა და ზემო ნიქოზის მიმდებარე ტერიტორიაზე საოკუპაციო ძალების მხრიდან კვლავ დაფიქსირდა უკანონო ე.წ. ბორდერიზაციის ფაქტი, – ამის შესახებ საქართვლოს სახელმწიფო უსაფრთხოების სამსახური იუწყება. გააქტიუტებულია „ცხელი ხაზი“ გააქტიურდა. „ქარელის მუნიციპალიტეტის სოფელ ატოცის და გორის მუნიციპალიტეტის სოფელ ზემო ნიქოზის მიმდებარე ტერიტორიაზე, საოკუპაციო ძალების მხრიდან კვლავ დაფიქსირდა უკანონო ე.წ. ბორდერიზაციის ფაქტი. აღნიშნული უკანონო აქტივობა წარმოადგენს საოკუპაციო ძალების მორიგ სახიფათო და უკიდურესად დესტრუქციულ ქმედებას, რომელიც ზიანს აყენებს უსაფრთხოების გარემოს და ხელყოფს ადამიანის ფუნდამენტურ უფლებებს, რაც კიდევ უფრო გაართულებს საოკუპაციო ხაზის ორივე მხარეს მცხოვრები ადგილობრივი მოსახლეობის ყოველდღიურ ცხოვრებას. საოკუპაციო ძალების მორიგ უკანონო ქმედებასთან დაკავშირებით, სახელმწიფო უსაფრთხოების სამსახურის მიერ გააქტიურდა „ცხელი ხაზი“. ინფორმირებულია ევროკავშირის სადამკვირვებლო მისია და ჟენევის საერთაშორისო მოლაპარაკებების თანათავმჯდომარეები. უსაფრთხოების გარემოს დაზიანების კუთხით, საოკუპაციო ძალების მიერ გადადგმული დესტრუქციული ნაბიჯები, კიდევ ერთხელ მწვავედ იქნება დასმული, როგორც ინციდენტების პრევენციისა და მათზე რეაგირების მექანიზმის (IPRM), ასევე, ჟენევის საერთაშორისო დისკუსიების მორიგ რაუნდებზე“, – ნათქვამია სუს-ის მიერ გავრცელებულ განცხადებაში. ცნობისთვის: ოკუპანტებმა ორიოდ დღის წინ გორის მუნიციპალიტეტის სოფელ ხურვალეთში უკანონო ე.წ. ბორდერიზაციის პროცესი განაახლეს. ადგილობრივები შიშობენ, რომ საოკუპაციო ხაზს მიღმა სასოფლო–სამეურნეო მიწები და საცხოვრებელი სახლებიც აღმოჩნდება.
ევროკავშირმა უკრაინის ტერიტორიული მთლიანობის დარღვევისთვის სანქციები გაახანგრძლივა
ევროპულმა საბჭომ სანქციების ვადა გაუხანგრძლივა იმ პირებს, რომლებიც განაგრძობენ უკრაინის სუვერენიტეტის, ტერიტორიული მთლიანობისა და დამოუკიდებლობის შელახვას. სანქციები 6 თვით, 2021 წლის 16 მარტამდე გახანგრძლივდა. დღეს, 10 სექტემბერს გადაწყვეტილება საბჭომ წერილობითი სახით მიიღო. სანქციები გულისხმობს მოგზაურობის აკრძალვასა და აქტივების გაყინვას. იგი მიმართული იქნება 175 პირისა და 44 ორგანიზაციის მიმართ. ამკრძალავი ზომები უკრაინის ტერიტორიული მთლიანობისა და სუვერენიტეტის შელახვისთვის, პირველად 2014 წლის 17 მარტს ამოქმედდა. გარდა ამისა, ევროკავშირმა აამოქმედა სხვა ეკონომიკური სანქციებიც, რომლებიც რუსული ეკონომიკის კონკრეტულ სექტორებს ეხება და ძალაშია 2021 წლის 31 იანვრამდე.
„ქართული ოცნების“ საარჩევნო სიის ოცეული ცნობილია
„ქართულმა ოცნებამ“ მთაწმინდის პარკში საარჩევნო პროპორციული სიის ოცეული წარადგინა. ღონისძიებას ესწრებოდა პარტიის თავმჯდომარე ბიძინა ივანიშვილი, სიის შემადგენლობა კი ირაკლი კობახიძემ დაასახელა. სიის პირველი ხუთეული ასე გამოიყურება: გიორგი გახარია არჩილ თალაკვაძე ირაკლი კობახიძე თეა წულუკიანი მამუკა მდინარაძე ამასთან, კობახიძემ განაცხადა, რომ პარტიის პრემიერ–მინისტრობის კანდიდატი გახარია იქნება. რაც შეეხება დანარჩენ 15 პირს, ესენი არიან: კახა კუჭავა გიორგი კახიანი მარიამ ქვრივიშვილი მიხეილ სარჯველაძე მაია ბითაძე მიხეილ დაოშვილი გიორგი ამილახვარი ვიქტორ სანიკიძე მაკა ბოჭორიძვილი შალვა პაპუაშვილი დავით კაჭარავა ნიკოლოზ სამხარაძე გიორგი ხელაშვილი მარიამ ლაშხი ბექა დავითულიანი 2020 წლის საპარლამენტო არჩევნები 31 ოქტომბერს გაიმართება.
“საქართველოში ბიზნეს პირობები მყარია, თუმცა არაერთი კომპანიის მხრიდან გამოთქმულია შეშფოთება ქვეყნის სასამართლო სისტემის მიმართ ნდობის ნაკლებობის თაობაზე"
“მთლიანობაში საქართველოში ბიზნეს და საინვესტიციო პირობები მყარია, თუმცა არაერთი კომპანიის მხრიდან გამოთქმულია შეშფოთება ქვეყნის სასამართლო სისტემის მიმართ ნდობის ნაკლებობის თაობაზე", – ამის შესახებ ამერიკის შეერთებული შტატების სახელმწიფო დეპარტამენტის მიერ საქართველოს საინვესტიციო კლიმატის შესახებ გამოქვეყნებულ ანგარიშშია ნათქვამი. დოკუმენტში ნათქვამია, რომ საქართველო ბიზნესის კეთების სიმარტივის მიმართულებით რეგიონის მასშტაბით მოწინავე ადგილზეა, ქვეყნის ეკონომიკა კი უცხოური ინვესტიციების მიმართ ღიაა. თუმცა, საქართველოში მოღვაწე ადგილობრივი და საერთაშორისო კომპანიები მიუთითებენ ქვეყნის სასამართლო სისტემის მიმართ ნდობის ნაკლოვანებაზე: “მთლიანობაში ბიზნეს და საინვესტიციო პირობები მყარია, თუმცა არაერთი კომპანიის მხრიდან გამოთქმულია შეშფოთება ქვეყნის სასამართლო სისტემის მიმართ ნდობის ნაკლებობის ზრდის თაობაზე. ამასთან, კომპანიები მიუთითებენ გადაწყვეტილებათა მიღების არაეფექტურ პროცესზე, განსაკუთრებით მუნიციპალურ დონეზე. ასევე სირთულეებზე ინტელექტურალური საკუთრების შესახებ კანონმდებლობის აღსრულების მიმართულებით. ბიზნესის მხრიდან გამოითქვა მოსაზრება, რომ ქვეყანაში ანტიმონოპოლიური პოლიტიკა დახევწას საჭიროებს, ბიზნესის შეფასებით ასევე სირთულეებია საკუთრების უფლებებთან მიმართებით წარმოშობილი დავების გადაწყვეტის პროცესშიც. საქართველოს მთავრობა აგრძელებს ამ საკითხების მოგვარების მიმართულებით მუშაობას. ამ სირთულეების მიუხედავად, საქართველოს ბიზნესგარემო რეგიონის ქვეყნებს შორის კვლავ ღიაობით გამოირჩევა", - ნათქვამია ანგარიშში. გარდა ამისა, დოკუმენტში საუბარია ანაკლიის ღრმაწყლოვანი პორტის შესახებ. სახელმწიფო დეპარტამენტი აღნიშნავს, რომ სახელმწიფომ პორტის გენერალურ კონტრაქტორ კომპანიასთან კონტრაქტი ცალმხრივად გაწყვიტა, თუმცა ანაკლიის პროექტი მთავრობის ერთ-ერთ გაცხადებულ პრიორიტეტად რჩება.
ვენდი მორტონი :"დიდი ბრიტანეთი საქართველოს ოკუპაციის დასრულებაში დაეხმარება"
დიდი ბრიტანეთის ევროპული სამეზობლოს და ამერიკის საკითხებში სახელმწიფო მინისტრის ვენდი მორტონის განცხადებით, საექსპორტო დეპარტამენტმა საქართველოს 3 მილიარდი ფუნტი სტერლინგით გაუზარდა დაფინანსება. ეს თანხა რუსეთის მხრიდან წლების განმავლობაში მომდინარე კონფლიქტის დასრულებას მოხმარდება. „ჩვენ მხარს ვუჭერთ საქართველოს ტერიტორიულ მთლიანობას. რუსეთის მიერ საქართველოს ტერიტორიების მიმდინარე ოკუპაცია მიუღებელია“ - წერს ვენდი მორტონი. ბრიტანელ მინისტრს ტვიტერზე გამოეხმაურა საქართველოს საგარეო საქმეთა მინისტრი დავით ზალკალიანი . მან მადლობა გადაუხადა ვენდი მორტონს რუსული ოკუპაციის დაგმობისთვის.
"Covid-19-ის საწინააღმდეგო ამერიკული ვაქცინა ძალიან მალე იქნება მზად"
ამერიკის შეერთებული შტატების პრეზიდენტ დონალდ ტრამპის განცხადებით, Covid-19-ის საწინააღმდეგო ამერიკული ვაქცინა ძალიან მალე იქნება მზად. შესაბამისი განცხადება ტრამპმა თეთრ სახლში გამართულ ბრიფინგზე გააკეთა. მან ყოფილი პრეზიდენტი ბარაკ ობამაც გააკრიტიკა და აღნიშნა, რომ მისი ადმინისტრაციის პირობებში ვაქცინას 3 წელიწადშიც ვერ მიიღებდნენ. "პრეზიდენტი ტრამპი ვაქცინას რეკორდულ ვადებში მიიღებს. სხვათა შორის, ეს ობამას ადმინისტრაცია, რომ ყოფილიყო, თქვენ ვაქცინას 3 წელიწადშიც კი ვერ მიიღებდით, ან შესაძლოა საერთოდ არ მიგეღოთ. ვაქცინას მივიღებთ ძალიან მალე. შესაძლოა, ეს იმ განსაკუთრებულ დღემდეც [არჩევნებამდე] მოხდეს ", - განაცხადა დონალდ ტრამპმა. ცნობისათვის: მსოფლიოში COVID-19–მა 896 000 –ზე მეტი ადამიანი იმსხვერპლა, ინფიცირებულთა რაოდენობამ 27 490 000–ს გადააჭარბა, 19 592 000–მდე დაავადებული კი გამოჯანმრთელდა. ამ დროისთვის COVID-19–ის საწინააღმდეგო არც ვაქცინა და არც კონკრეტული პრეპარატი არ არსებობს, თუმცა ვირუსისგან განკურნება სიმპტომური მკურნალობით არის შესაძლებელი. ბოლო ოფიციალური მონაცემებით, საქართველოში ახალი კორონავირუსის დადასტურებული შემთხვევების რაოდენობა 1684-ს შეადგენს. დაავადებისგან გამოჯანმრთელებულია 1315 ადამიანი, ხოლო 19 გარდაიცვალა.
„პატრიოტთა თამაშები“ (RUS)
ისტორიას ერთი უცნაური თვისება აქვს - გამეორება იცის. გამეორება კი ცოდნის დედა მხოლოდ ანდაზაშია. რეალურად ისტორიის გამეორებებიდან სწავლა თითქმის არავის შეუძლია. ასე რომ არ იყოს, ერთი ხელისუფალი მაინც ისწავლიდა, რომ პოლიტიკური ძალა, რომელსაც თვითონ ასაზრდოებს ფსევდოოპოზიციის სახელით, საბოლოო ჯამში რეალურად ხდება ხოლმე მისი დასამარების მიზეზი. ასე ხდება ყოველთვის - ასე გამოზარდა (ან უბრალოდ დაინდო და ჩათვალა, რომ რამეში გამოიყენებდა) ჯერ კიდევ იულიუს ცეზარმა - ბრუტუსი, ჰინდენბურგმა - ჰიტლერი, მჟავანაძემ - შევარდნაძე, შევარდნაძემ - სააკაშვილი და ა. შ. ყოველთვის, როცა გადატრიალება (ფორმალური თუ არაფორმალური სისხლიანი თუ უსისხლო) ხდება, ყველაზე დიდი წვლილი ამ საქმეში ყოველთვის ფსევდოოპოზიციას შეაქვს, რომელსაც ხელისუფლება ამა თუ იმ მიზეზით ელოლიავება და ფიქრობს, რომ მისი მხარდაჭერის ყიდვას შეძლებს. ასე იქნება ახლაც. წლებია, ვაკვირდებით, როგორ იზრდება და ძლიერდება „პატრიოტთა ალიანსად“ წოდებული, ერთ დროს ფსევდოოპოზიციური ძალა, რომლის ლიდერებიც ერთი- ერთში იმეორებენ და ფეხდაფეხ მიჰყვებიან რუსული პროპაგანდის ძირითად ხაზებს. კერძოდ: ანტილიბერალური და ანტიდასავლური პროპაგანდა, ჰომოფობია, ქსენოფობია - ყველა ერის წარმომადგენლების სიძულვილი, რუსების გარდა, დეზინფორმაცია, წაქეზება, რელიგიური დევნა, კულტურისა და ისტორიის გაყალბება - ეს არასრული ჩამონათვალია იმ ქმედებებისა, რასაც ეს პარტია პარლამენტში და მის გარეთ ახორციელებს და, როგორც წესი, რჩებოდა და რჩება ხელშეუხებელი. ამის მიზეზი კი ისაა, რითაც დავიწყეთ - ფსევდოოპოზიცია რჩება ხელშეუხებელი მანამ, სანამ ისტერიულად იბრძვის ხელისუფლების მთავარი ოპონენტის, ყოფილი სახელისუფლებო ძალისა და ქვეყანაში შექმნილი მტრის ხატის - „ნაციონალური მოძრაობისა“ და მისგან წარმოქმნილი ყველა პოლიტიკური ძალის წინააღმდეგ. ერთი შეხედვით, ყველაფერი იდეალურად მიდიოდა, სანამ სამი, ხელისუფლებისთვის გაუთვალისწინებელი რამე არ მოხდა: 1. რუსული სააგენტოს მეშვეობით გავრცელდა ჟურნალისტური გამოძიება,, რომლის თანახმადაც, „პატრიოტთა ალიანსი“ რუსული სპეცსამსახურებიდან მილიონობით დოლარით ფინანსდება და სპეციალურ დავალებებსაც ასრულებს. 2. ეს ამბავი რამდენიმე დღის გახმაურებული იყო, რომ ახალი, ამჯერად უკვე დადასტურებული ამბავი გასკდა - „პატრიოტთა ალიანსის“ ლიდერები ოკუპირებულ აფხაზეთში გადაიპარნენ და უკან დაბრუნდნენ. 3. „პატრიოტთა ალიანსმა“ აჭარაში გამოაკრა წინასაარჩევნო ბანერი, რომელზეც ოკუპირებულ ტერიტორიად, აფხაზეთთან და ცხინვალის რეგიონთან ერთად, გამოსახულია აჭარაც, ხოლო აჭარის ოკუპანტად მიჩნეულია თურქეთის რესპუბლიკა. ლოგიკურად, ამ სამი ინციდენტის მერე მაინც ერთხმად უნდა დაეგმო ხელისუფლებას მისი მთავარი მოკავშირის ქმედებები და, როგორც მინიმუმ, სუს-ს უნდა დაეწყო გამოძიება სამივე თუ არა, პირველი ორი ინციდენტის გამო მაინც. მაგრამ ამის მიუხედავად, ხელისუფლების ერთ-ერთმა თვალსაჩინო წარმომადგენელმა პარლამენტში, ადამიანის უფლებათა დაცვის კომიტეტის თავმჯდომარემ, სოფო კილაძემ, ჟურნალისტების შეკითხვაზე პირველ ინცედენტთან დაკავშირებით, უპასუხა: მასე ხანდახან ქართულ ოცნებაზეც ამბობენ, პრორუსულიაო. სოფო კილაძე ყოველთვის გამოირჩეოდა, მსუბუქად რომ ვთქვათ, არაადეკვატური შეფასებებით, მაგრამ პატრიოტთა ალიანსის მიმართ მისი თითქმის ღია მხარდაჭერა, სავარაუდოდ, მის რელიგიურ შეხედულებებს უკავშირდება, რომლის მთავარ დამცველობასაც სწორედ პატრიოტთა ალიანსი იბრალებს. რაც შეეხება აჭარას, აქ ჯერ კიდევ დიდი ხნის წინ უნდა შეემჩნია, ვისაც ეს ევალება, როგორ გულმოდგინედ ცდილობდა სრულიად გარკვეული ძალა დედა-რუსეთის დავალების შესრულებას - ხან ამერიკულ ინვესტიციას უპირისპირდებოდნენ ეკოლოგიის დაცვის ნიღბით (გაიხსენეთ კარბამიდის ტერმინალი, რომელზეც მე თავად ვწერდი), ხან ანტითურქული განწყობის გაღვივებას ცდილობდნენ - ეს მაშინ, როცა მათი დამკვეთი ქართველებს იტაცებდა, აპატიმრებდა და რეალურად აგრძელებდა „მცოცავი ოკუპაციის“ პოლიტიკას. და ამ ყველაფრის გვირგვინად გვევლინება ლუსტრაციის კანონის უქონლობა ქვეყანაში, რომელიც თავის ყველა უბედურებას ოკუპანტისა და ისტორიული მტრის სპეცსამსახურებს უნდა „უმადლოდეს“. მიუხედავად იმისა, რომ საზოგადოება პოლიტელიტაზე ბევრად განვითარებული და აზრზე მოსული გვყავს, მაინც ძალიან ბევრი ეხვევა ამ ფსევდოპატრიოტებისა და პოპულისტების პროპაგანდის ბადეში. რომ გვქონოდა ლუსტრაციის კანონი და გვცოდნოდა, ვინ ვინაა, ვინ თანამშრომლობდა და თანამშრომლობს, ვეღარავინ შეიყვანდა შეცდომაში საზოგადოებას. რომ გვქონოდა ლუსტრაციის კანონი, რომ არ გვქონოდა კონკორდატის ხელშეკრულება, რომ არ გვყოლოდა ამხელა მონსტრი მეზობლად და მტრად, რომ არ გვყოლოდა ამდენი მოღალატე შიგნით... ყველა გზა „რომ“-ისკენ მიდის. ერთადერთი იმედისმომცემი ამ შემთხვევაში ისევ სოციალური ქსელი და მისი მომხმარებლები არიან. როგორც ხშირად ვამბობთ ხოლმე - მაღალი საზოგადოებრივი ინტერესი საქმეზე განაპირობებს მის სწორ და ოპერატიულ შესრულებას ხელისუფლების მიერ, იმიტომ, რომ არ არსებობს თანამედროვე ხელისუფლებისთვის უფრო საშიში ძალა, ვიდრე საკუთარი დაბალი რეიტინგი სოციალურ ქსელებში. იმედს ვიტოვებ, რომ არჩევნებამდე რამე გამოძიების მსგავსი მაინც დაიდება და ვინმე მაინც დაისჯება ამ ინციდენტების გამო. საზოგადოების დაკვეთა დამნაშავეების დასჯაცაა, სხვათა შორის, თან კარგა ხანია უკვე. ავტორი: ლექსო ლეკიაშვილი პუბლიკაციაში გამოთქმული მოსაზრებები ავტორს ეკუთვნის და შესაძლოა, არ ემთხვეოდეს რედაქციის პოზიციას სტატიისთვის გამოყენებული ფოტო ეკუთვნის www.mythdetector.ge/-ს.
კელი დეგნანი კიბერთავდასხმაზე - ეს ფაქტი არის კიდევ ერთი შეხსენება, რომ მავნე, საზიანო აქტორები აგრძელებენ თავიანთ საზიანო მოქმედებებს
საქართველოში ამერიკის შეერთებული შტატების ელჩის, კელი დეგნანის განცხადებით, გამოძიებას დრო დასჭირდება, რომ დადგინდეს, ვინ იდგა ჯანდაცვის სამინისტროსა და ლუგარის ცენტრზე კიბერთავდასხმის უკან. თუმცა, ელჩის შეფასებით, ეს ფაქტი არის კიდევ ერთი შეხსენება, რომ მავნე აქტორები საზიანო მოქმედებებს აგრძელებენ საქართველოს წინააღმდეგ, საზოგადოების შეცდომაში შეყვანის მიზნით. „დარწმუნებული ვარ, შინაგან საქმეთა სამინისტრო აწარმოებს გამოძიებას ამ საკითხთან დაკავშირებით და რა თქმა უნდა, იქნება შედეგებიც. ვიცით, რომ კიბერთავდასხმა განხორციელდა ჯანდაცვის სამინისტროსა და ასევე, ლუგარის ცენტრზე. რა თქმა უნდა, დრო დასჭირდება გამოძიებას, რომ დადგინდეს, ვინ იდგა ამ კიბერთავდასხმის უკან, თუმცა ეს ფაქტი არის კიდევ ერთი შეხსენება, რომ მავნე, საზიანო აქტორები აგრძელებენ თავიანთ საზიანო მოქმედებებს. ისეთი აქტორები, როგორიც არის რუსეთი, აგრძელებენ ისეთი შესაძლებლობების მოძიებას და გამოყენებას, რათა საზოგადოებაში დესტაბილიზაცია და დაბნეულობა გამოიწვიონ. სწორედ ამიტომ საქართველომ უნდა გააგრძელოს ის კარგი სამუშაო, რასაც იგი უკვე ასრულებს კიბერუსაფრთხოების და სტანდარტების გაზრდისკენ. რა თქმა უნდა, ამერიკის შეერთებული შტატები გააგრძელებს საქართველოს დახმარებას ამ მიმართულებით“, განაცხადა კელი დეგნანმა.
აშშ-ის ელჩი ეუთოში - აშშ ეუთო-ს ქვეყნებს მოუწოდებს, მხარი დაუჭირონ საქართველოში ეუთო-ს მისიის განახლებას
2008 წლის აგვისტოს ომის 12 წლისთავი არის ბნელი მოგონება იმ ათასობით ადამიანზე, რომლებმაც ტანჯვა გადაიტანეს და ახლაც იტანჯებიან რუსეთის საქართველოში შეჭრის გამო, – ამის შესახებ ეუთო-ში აშშ-ის ელჩმა ჯეიმს გილმორმა ვენაში მუდმივმოქმედ საბჭოს სხდომაზე განაცხადა. „დღეს ჩვენ ვიხსენებთ მოქალაქეებს, რომლებსაც სახლების დატოვება აიძულეს და იძულებით გადაადგილებულ პირებად აქციეს. ვიხსენებთ უდანაშაულო მოქალაქეებს, რომლებიც დე ფაქტო მთავრობის მიერ ადმინისტრაციული სასაზღვრო ზოლების ჩაკეტვის გამო დაიღუპნენ, რადგან მათ აუკრძალეს სასწრაფო სამედიცინო დახმარების მიღება. ჩვენ ვიხსენებთ ოჯახებს, რომლებიც „ბორდერიზაციის“ საშუალებით დაყვეს და საარსებო წყარო წაართვეს,“- განაცხადა ჯეიმს გილმორმა. მისივე თქმით, რუსეთის ხელმძღვანელობით მოქმედი უსაფრთხოების ძალები განაგრძობენ საქართველოს ტერიტორიაზე კიდევ უფრო ღრმად შეჭრას. „რუსეთის ხელმძღვანელობით მოქმედი უსაფრთხოების ძალები კვლავ განაგრძობენ საქართველოს ტერიტორიაზე უფრო ღრმად შეჭრას, ცდილობენ ოკუპირებული ტერიტორიები მეტრი მეტრობით გააფართოონ, რაც აუცილებლად უნდა იყოს მუდმივმოქმედი საბჭოს შეშფოთების საგანი. შარშან ვიხილეთ რუსეთის ხელმძღვანელობით ჩორჩანა-წნელისთან საქართველოს ტერიტორიის ასეულობით მეტრის გაკონტროლების მცდელობა. რუსი ე.წ. მესაზღვრეები აკავებენ მოქალაქეებს და მიმართავენ ძალადობას ადმინისტრაციული სასაზღვრო ზოლის გასწვრივ, მათ შორისაა ბოლო შემთხვევა, როდესაც საქართველოს მოქალაქეს ესროლეს. 2008 წლის ცეცხლის შეწყვეტის ხელშეკრულებით გათვალისწინებული რუსეთის ვალდებულება ნათელია: რუსეთმა უნდა გაიყვანოს ძალები კონფლიქტამდელ პოზიციებზე. რუსეთმა ასევე აიღო ვალდებულება, რომ ჰუმანიტარული დახმარების დაუბრკოლებელი მიწოდება უზრუნველყოფილი იქნება“, – განაცხადა ჯეიმს გილმორმა. მისივე თქმით, აშშ რუსეთს მოუწოდებს, უარი თქვას აფხაზეთისა და სამხრეთ ოსეთის ე.წ. „დამოუკიდებლობის“ აღიარებაზე. „მოვუწოდებთ რუსეთს, უკან წაიღოს აღიარება ე.წ. აფხაზეთისა და სამხრეთ ოსეთის „დამოუკიდებლობის“ შესახებ. ეს აუცილებელია ასობით და ათასობით ლტოლვილისა და იძულებით გადაადგილებული პირის უსაფრთხოდ და ღორსეულად დასაბრუნებლად. აშშ-ის მხარდაჭერა საქართველოში ჩვენი მეგობრებისა და პარტნიორების მიმართ ურყევია. ჩვენ ქართველი ხალხის გვერდით ვდგავართ და ვუერთდებით მათ მოწოდებას რუსეთის აგრესიის შედეგად დაყოფილი მოსახლეობის გაერთიანების შესახებ. რუსეთის მიერ საქართველოს რეგიონების – აფხაზეთისა და სამხრეთ ოსეთის ოკუპაცია, ეუთო-ს რეგიონში უსაფრთხოების საკითხებზე მომუშავე, მუდმივმოქმედ საბჭოზე რეგულარული განსახილველი საკითხია. კონსტრუქციულ დიალოგში ჩართვის ნაცვლად, რუსეთი აგრძელებს დეზინფორმაციის გავრცელებას, აქ, ვენაში და სხვაგანაც. რუსეთი აგრძელებს იმ ქმედებების ხელშეწყობას და მხარდაჭერას, რომლებიც ზიანს აყენებს უსაფრთხოებას და საფრთხეს უქმნის ოკუპირებულ რეგიონებში მცხოვრები მოსახლეობის საარსებო საშუალებებსა და სიცოცხლეს. აშშ მოუწოდებს ეუთო-ს ყველა წევრ ქვეყანას, მხარი დაუჭიროს საქართველში ეუთო-ს მისიის განახლებას, რომელსაც ექნება საშუალება, მონიტორინგი გაუწიოს სიტუაციას ადმინისტრაციული სასაზღვრო ზოლის ორივე მხარეს“, - აღნიშნა ჯეიმს გილმორმა.
ევროკავშირის ელჩი – კიბერთავდასხმაზე: „განმეორების რისკი არსებობს“
საქართველოში ევროკავშირის ელჩი კარლ ჰარცელი შეშფოთებას გამოთქვამს ჯანდაცვის სამინისტროს კომპიუტერულ სისტემაზე განხორციელებული კიბერშეტევის გამო და აცხადებს, რომ ევროკავშირი დაინტერესებულია, გაირკვეს, თუ ვინ დგას თავდასხმის უკან. ელჩი ფიქრობს, რომ მსგავსი კრიმინალური აქტის განმეორების რისკები არსებობს, ამიტომ სიფრთხილეა საჭირო. "შემაშფოთებელი იყო გუშინ განხორციელებული, კიბერთავდასხმა. ეს არ არის პირველი შემთხვევა ბოლო თვეების განმავლობაში, როდესაც კიბერშეტევა მოხდა საქართველოს ტერიტორიაზე. ევროკავშირი დაინტერესებულია, გაირკვეს, თუ ვინ დგას ამ თავდასხმის უკან. სხვა განცხადების გაკეთებამდე დაველოდები, ვიდრე სიტუაცია კიდევ უფრო ნათელი არ გახდება. ეს კიბერთავდასხმა გვახსენებს ძალიან მნიშვნელოვან ასპექტს, განსაკუთრებით არჩევნებამდე რამდენიმე კვირით ადრე, რომ არსებობს რისკები მსგავსი თავდასხმების განმეორების. მნიშვნელოვანია ფხიზლად ვიყოთ", - განაცხადა კარლ ჰარცელმა. საქართველოს შინაგან საქმეთა სამინისტროს ინფორმაციით, უცხო ქვეყნის სპეცსამსახურების მიერ ჯანდაცვის სამინისტროზე კიბერშეტევა მიიტანეს, რომლის მიზანი ლუგარის ლაბორატორიის მონაცემთა ბაზებში დაცული სამედიცინო დოკუმენტაციისა და პანდემიის მართვასთან დაკავშირებული მნიშვნელოვანი ინფორმაციის მართლსაწინააღმდეგო დაუფლება და გამოყენება იყო. უწყების ცნობით, მოპოვებული მასალა, როგორც ავთენტიკური, ისე ფალსიფიცირებული, ერთ-ერთ უცხოურ ვებგვერდზე აიტვირთა. საგარეო საქმეთა მინისტრი ამბობს, რომ ეს იყო გამიზნული შეტევა მისი პარალიზებისთვის. ის ამ ქმედებას "დეზინფორმაციულ და უკანონო კამპანიის ნაწილად" აფასებს. ფართომასშტაბიანი კიბერშეტევა საქართველოზე 2019 წლის 28 ოქტომბერსაც განხორციელდა. ამ თავდასხმის უკან გამოძიებამ რუსეთის საგარეო დაზვერვის კვალი გამოკვეთა.
ტრამპმა კოსოვოსა და სერბეთის “ისტორული შეთანხმების” შესახებ განაცხადა
სერბეთმა და ნაწილობრივ აღიარებულმა (მაგრამ არა ბელგრადის მიერ) კოსოვოს რესპუბლიკამ ეკონომიკური ურთიერთობების ნორმალიზების შესახებ შეთანხმებას მიაღწიეს. ამის შესახებ აშშ-ის პრეზიდენტმა დონალდ ტრამპმა თეთრ სახლში სერბეთის პრეზიდენტ ალექსანდრე ვუჩიჩსა და კოსოვოს პრემიერ-მინისტრ ავდულა ჰოტისთან შეხვედრის შემდეგ განაცხადა. სერბეთის მიერ კოსოვოს დამოუკიდებლობის აღიარებაზე საუბარი არ მიდის, ისევე, როგორც ბელგრადსა და პრიშტინას შორის ყოვლისმომცველ პოლიტიკურ შეთანხმებაზე. გამოცხადდა ასევე, რომ კოსოვოს ისრაელი აღიარებს და მასთან დიპლომატიურ ურთიერთობებს დაამყარებს.
ზურაბიშვილი ლუგარის ლაბორატორიაზე კიბერთავდასხმას საქართველოს დაშინების მორიგ მცდელობად აფასებს
პრეზიდენტი სალომე ზურაბიშვილი ლუგარის ლაბორატორიაზე კიბერთავდასხმას "ანტიჰუმანურ აქტად" და საქართველოს დაშინების მორიგ მცდელობად აფასებს. "ლუგარის ცენტრის წინააღმდეგ განხორციელებული შეტევა, მით უფრო დღეს, პანდემიის პირობებში, როცა ლაბორატორიის როლი უმნიშვნელოვანესია ადამიანების სიცოცხლის გადარჩენის საქმეში, ანტიჰუმანურ აქტად უნდა შეფასდეს. ცხადია, შეტევის მიზანი მხოლოდ ლაბორატორიის პარალიზება არ ყოფილა. [...] ნიშანდობლივია და მთელ რიგ კითხვებს ბადებს თავდასხმისათვის შერჩეული დრო და ის უსუსური მინიშნებები და მცდელობები, რაც პასუხისმგებლობის თავიდან აცილების მიზნით გამოიყენა რუსულმა მხარემ ალექსეი ნავალნის მოწამვლისას გამოყენებული ნივთიერების წარმომავლობასთან დაკავშირებით. მოვუწოდებ ყველა შესაბამის სტრუქტურას უახლოეს დროში მოხდეს ლუგარის ცენტრზე განხორციელებული თავდასხმის გამოძიება", - აცხადებს სალომე ზურაბიშვილი. საქართველოს შინაგან საქმეთა სამინისტროს ინფორმაციით, უცხო ქვეყნის სპეცსამსახურების მიერ ჯანდაცვის სამინისტროზე კიბერშეტევა მიიტანეს, რომლის მიზანი ლუგარის ლაბორატორიის მონაცემთა ბაზებში დაცული სამედიცინო დოკუმენტაციისა და პანდემიის მართვასთან დაკავშირებული მნიშვნელოვანი ინფორმაციის მართლსაწინააღმდეგო დაუფლება და გამოყენება იყო. უწყების ცნობით, მოპოვებული მასალა, როგორც ავთენტიკური, ისე ფალსიფიცირებული, ერთ-ერთ უცხოურ ვებგვერდზე აიტვირთა. საგარეო საქმეთა მინისტრი ამბობს, რომ ეს იყო გამიზნული შეტევა მისი პარალიზებისთვის. ის ამ ქმედებას "დეზინფორმაციულ და უკანონო კამპანიის ნაწილად" აფასებს. ფართომასშტაბიანი კიბერშეტევა საქართველოზე 2019 წლის 28 ოქტომბერსაც განხორციელდა. ამ თავდასხმის უკან გამოძიებამ რუსეთის საგარეო დაზვერვის კვალი გამოკვეთა.
ბენ ჰოჯესი: "საქართველო ნატო–ს წევრი ახლა უნდა გახდეს!"
საქართველო ნატო–ს წევრი ახლა უნდა გახდეს, - ამის შესახებ Twitter-ზე ევროპაში ამერიკის შეიარაღებული ძალების ყოფილი მთავარსარდალი, გენერალი ბენ ჰოჯესი წერს. „საქართველო ნატო–ს წევრი ახლა უნდა გახდეს. შავი ზღვა ნატოსთვის რეგიონში მთავარ პრიორიტეტს უნდა წარმოადგენდეს. კრემლი შავ ზღვასა და ანექსირებულ ყირიმში განლაგებულ თავის ბაზებს სირიასა და ლიბიაში ბოროტი ზრახვების განსახორციელებლად იყენებს“, - წერს ბენ ჰოჯესი.
ნატო–მ რუსეთს "ნოვიჩოკის" წარმოების პროგრამის გახსნა მოსთხოვა
ნატო რუსი ოპოზიციონერის ალექსეი ნავალნის მოწამლვის საქმეზე საერთაშორისო გამოძიებას, ხოლო რუსეთისგან „ნოვიჩოკის“ წარმოების პროგრამის გახსნას მოითხოვს. განცხადება ჩრდილოატლანტიკური ალიანსის გენერალურმა მდივანმა იენს სტოლტენბერგმა დღეს, 4 სექტემბერს გამართული საგანგებო სხდომის დასრულების შემდეგ განაცხადა. შეხვედრაში ნატოს 30-ვე წევრი ქვეყნის ელჩი მონაწილეობდა. „რუსეთის მთავრობამ სრულად უნდა ითანამშრომლოს ქიმიური იარაღის აკრძალვის ორგანიზაციასთან, რათა მიუკერძოებელი გამოძიება ჩატარდეს. ამ თავდასხმაზე პასუხისმგებელი პირები სასამართლოს წინაშე უნდა წარდგნენ“, – განაცხადა სტოლტენბერგმა. მისვე თქმით, ეს არ არის პირველი მსგავსი შემთხვევა, როდესაც რუსეთის მთავრობის კრიტიკოსებს მსგავსი მეთოდით ესხმიან თავს: „ეს არის თავდასხმა დემოკრატიულ უფლებებზე! ეს ასევე არის საერთაშორისო კანონმდებლობის უხეში დარღვევა, რომელსაც საერთაშორისო პასუხი სჭირდება“, – განაცხადა სტოლტენბერგმა. 31 აგვისტოს გერმანიის მთავრობამ ბუნდესვერის სპეცლაბორატორიის კვლევის შედეგებზე დაყრდნობით გაავრცელა განცხადება იმის შესახებ, რომ რუსი ოპოზიციონერი ალექსეი ნავალნი “რუსეთში მოწამლეს ქიმიური ნივთიერებით, რომელიც თავისი შემადგენლობით ჯერ კიდევ საბჭოთა კავშირში შემუშავებული საბრძოლო აგენტის – “ნოვიჩოკის” მსგავსია და რომელიც 2018 წელს სკრიპალებზე თავდასხმისას იქნა გამოყენებული”. რუსეთის საგარეო საქმეთა სამინისტროში განაცხადეს, რომ გერმანიის მთავრობის განცხადება “ფაქტებით არაა გამყარებული”. ამასთან, ოფიციალურმა მოსკოვმა ბერლინს “რუსეთის წინააღმდეგ მორიგი ნაბიჯების გადასადგმელად საფუძვლების წინასწარ შექმნის მცდელობასა” და “ნავალნისთან დაკავშირებული ინფორმაციის გაზიარების არსურვილში” დასდო ბრალი. თავის მხრივ, პრეზიდენტის პრეს-მდივანმა დიმიტრი პერსკოვმა განაცხადა, რომ “ამ დროისთვის კრემლი ვერ მოახდენს კვალიფიციურ რეაგირებას” გერმანიის მთავრობის განცხადებაზე, რადგან “ადრე ბერლინში გაგზავნილი ოფიციალური განაცხადები უპასუხოდ დარჩა”. ამასთან, პესკოვმა აღნიშნა, რომ “მოსკოვი მზადაა და დაინტერესებულია გერმანიასთან ურთიერთქმედებითა და სრული მონაცემების გაცვლით”. აღსანიშნავია, რომ გერმანიის მთავრობის განცხადების ფონზე აქციათა რუსული ბაზარი ერთი თვის წინანდელ ზღვრამდე დაეცა, რუბლმა კი მკვეთრი ვარდნა განიცადა როგორც დოლართან, ისე ევროსთან მიმართებაში.
მსოფლიო სავაჭრო ორგანიზაციის ხელმძღვანელი დღეს თანამდებობას ოფიციალურად დატოვებს
სოფლიო სავაჭრო ორგანიზაციის გენერალური დირექტორი რობერტო აზევედო დღეს თანამდებობას ოფიციალურად დატოვებს. იგი თანამდებობიდან ვადის ამოწურვამდე ზუსტად ერთი წლით ადრე მიდის. აზავედო მსოფლიო სავაჭრო ორგანიზაციის ხელმძღვანელად პირველად ოთხ წლიანი ვადით 2013 წელს აირჩიეს. 2017 წელს კი თანამდებობაზე მეორე ვადით დაინიშნა, შესაბამისად პოზიციაზე ყოფნის პერიოდი მას 2021 წლის 31 აგვისტოს ეწურებოდა. მიმდინარე წლის 14 მაისს აზევედომ დააანონსა, რომ ორგანიზაციიდან აგვისტოს ბოლოს წავიდოდა. აზავდეოს განმარტებით, თანამდებობას „პირადი გადაწყვეტილების“ შედეგად ტოვებს. როგორც „როიტერი“ განმარტავს, ამჟამად მსოფლიო სავაჭრო ორგანიზაცია უპრეცედენტო გამოწვევების წინაშე დგას, რაც გამოწვეულია ცალმხრივი მიდგომებითა და პროტექციონიზმით. ორგანიზაციის ახალი ხელმძღვანელის შერჩევის პროცესი ოფიციალურად 8 ივნისს დაიწყო.
აშშ–მა ფატუ ბენსუდას სანქციები დაუწესა
ამერიკის შეერთებულმა შტატებმა სისხლის სამართლის საერთაშორისო სასამართლოს მთავარ პროკურორს ფატუ ბენსუდას და იურისდიქციების და თანამშრომლობის განყოფილების ხელმძღვანელს ფასიკო მოჩოჩოკოს სანქციები დაუწესა. როგორც აშშ-ის სახელმწიფო მდივანი მაიკ პომპეო აცხადებს, სასამართლო ცდილობს, ამერიკელები თავის იურისდიქციას არალეგიტიმურად დაუქვემდებაროს. ჰააგის საერთაშორისო სასამართლო ამჟამად აშშ-ის სამხედრო ძალების მიერ ავღანეთში ჩადენილ შესაძლო დანაშაულებს იძიებს. როგორც „ბიბისი“ წერს, შეერთებული შტატები საერთაშორისო სასამართლოს ჩამოყალიბების დღიდან აკრიტიკებს.
ბაქო: "შეტაკებების შემდეგ მოსკოვი ერევანს ინტენსიურად აწვდის იარაღს"
აზერბაიჯანმა რუსეთი სომხეთისთვის შეიარაღების მიწოდებაში დაადანაშაულა. აზერბაიჯანული მედიის ცნობით, შესაბამისი განცხადება აზერბაიჯანის პრეზიდენტის მრჩეველმა ჰიქმეთ ჰაჯიევმა გააკეთა. მისი თქმით, ივლისში აზერბაიჯანისა და სომხეთის საზღვარზე მომხდარი შეტაკებების შემდეგ, მოსკოვი ერევანს ინტენსიურად აწვდის იარაღს და 17 ივლისის შემდეგ რუსეთიდან სომხეთში რუსული სამხედრო სატრანსპორტო თვითმფრინავები „ილ-76“-ები ინტენსიურად დაფრინავენ. მრჩეველი ამბობს, რომ როგორც აზერბაიჯანის მთავრობას განუმარტეს, ამ თვითმფრინავებით სამშენებლო მასალები გადააქვთ, თუმცა ბაქოს ეს პასუხი არ აკმაყოფილებს. „სამშენებლო მასალები, როგორც წესი, თვითმფრინავებით არ გადააქვთ, ამისთვის სხვა ხელსაწყოები არსებობს. ჩვენი ინფორმაციით, ასევე რუსეთს იარაღი სომხეთის გავლით სირიაშიც გადააქვს“, – განაცხადა ჰაჯიევმა. აზერბაიჯანისა და სომხეთის საზღვარზე შეტალებებს მსხვერპლი მოჰყვა.
გერმანიის ხელისუფლება ბელარუსის ელჩის საგარეო უწყებაში დაბარებას გეგმავს
გერმანიის ხელისუფლება ბელარუსის ელჩის საგარეო საქმეთა სამინისტროში გამოძახებას აპირებს. ელჩის საგარეო უწყებაში დაბარება ბელარუსის ქალაქებში საპროტესტო აქციების გასაშუქებლად უცხოელი ჟურნალისტებისთვის აკრედიტაციის გაუქმებას უკავშირდება. 29 აგვისტოს ცნობილი გახდა, რომ ბელარუსის საგარეო საქმეთა სამინისტრომ გააუქმა 20-მდე უცხოელი ჟურნალისტის აკრედიტაცია, მათ შორის გერმანულ ტელეარხ „ეიარდის“, „დოიჩე ველეს“, ასევე – „ბიბისის“, „ესოშიეტიდ პრესის“, „როიტერის, „ფრანს პრესის“ , ასევე „რადიო თავისუფლების“ ჟურნალისტების აკრედიტაცია.
აშშ რუსეთის საჰაერო ძალებს შავ ზღვაზე სახიფათო მანევრირებაში ადანაშაულებს
ამერიკის შეერთებული შტატები რუსეთის საჰაერო ძალებს სახიფათო მანევრირებაში ადანაშაულებს. ევროპაში შეერთებული შტატების საჰაერო ძალების მეთაურობამ შავ ზღვაზე მომხდარ ინციდენტთან დაკავშირებით განცხადება გაავრცელა. მასში ნათქვამია, რომ რუსული გამანადგურებლები „სახიფათოდ და არაპროფესიონალურად“ მოქმედებდნენ, როცა სცადეს ხელი შეეშალათ ამერიკული ბომბდამშენის მანევრირებისთვის. ამერიკა რუსეთს მოუწოდებს, იმოქმედოს საერთაშორისო სტანდარტების დაცვით. შემთხვევა შავ ზღვაზე 28 აგვისტოს მოხდა. რუსული სამხედრო თვითმფრინავები 30 მეტრის მანძილზე მიუახლოვდნენ ამერიკულ ბომბდამშენს, რომელიც გეგმიურ საპატრულო ფრენას ახორციელებდა.
