პოლონეთმა უკრაინაში ტანკები გაგზავნა, განაცხადა ორშაბათს პოლონეთის პრემიერ-მინისტრმა მატეუშ მორავეცკიმ, თუმცა დამატებით დეტალებზე არ უსაუბრია. უკრაინამ არაერთხელ მოუწოდა დასავლეთს, სასწრაფოდ მიაწოდოს მეტი იარაღი, განსაკუთრებით მძიმე ტექნიკა, რადგან რუსული ძალები შეტევას აგრძელებენ.
„არ არსებობს ასეთი აუცილებლობა, არ არსებობს ასეთი მოთხოვნები“, - უპასუხა მორავეცკიმ კითხვას, განიხილება თუ არა უკრაინაში საბრძოლო თვითმფრინავების გაგზავნა.
2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. რუსული ჯარები ბომბავენ და ანგრევენ ძირითად ინფრასტრუქტურულ ობიექტებს, ახორციელებენ სარაკეტო და საჰაერო დარტყმებს უკრაინის ქალაქებსა და სოფლებზე. რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა.
12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა. 14 აპრილს უკრაინის უმაღლესმა რადამ რუსეთის შეიარაღებული ძალების მოქმედებები უკრაინელი ხალხის წინააღმდეგ გენოციდად აღიარა. 21 აპრილს, ლატვიისა და ესტონეთის პარლამენტებმა უკრაინაში რუსეთის ქმედებები გენოციდად აღიარეს. გაეროს ცნობით, ომის დაწყების შემდეგ უკრაინა 5 მილიონზე მეტმა ადამიანმა დატოვა.
