უკრაინის თავდაცვის სადაზვერვო სააგენტოს ხელმძღვანელი კირილ ბუდანოვი წლის ბოლომდე კიევის „მნიშვნელოვან გამარჯვებებს" პროგნოზირებს და აცხადებს, რომ „რუსეთის მარცხი გარდაუვალია.
წლის ბოლომდე მნიშვნელოვან პროგრესს მივაღწევთ. ეს მნიშვნელოვანი გამარჯვებები იქნება. ამას მალე ნახავთ“, - ამბობს ბუდანოვი.
ის იმედოვნებს, რომ ქალაქ ხერსონს დაიბრუნებენ, სადაც უკრაინამ ბოლო კვირებში მნიშვნელოვან პროგრესს მიაღწია.
„გაზაფხულის ბოლოს ეს უნდა დასრულდეს. ზაფხულისთვის ყველაფერი უნდა დასრულდეს“, - აღნიშნავს ბუდანოვი CNN-ის ცნობით.
მისი თქმით, უკრაინა 1991 წლის პერიოდის საზღვრების პირობებში დაბრუნებას აპირებს, რაც ნიშნავს ყირიმის, დონეცკისა და ლუგანსკის რეგიონების ტერიტორიების დაბრუნებასაც.
ბუდანოვს არ სჯერა, რომ რუსეთი უკრაინაში ბირთვულ იარაღს გამოიყენებს.
„თეორიულად, შეუძლიათ, მაგრამ ეს მხოლოდ დააჩქარებს რუსეთის ფედერაციის დაშლას. მათ ეს კარგად იციან. არ არიან ისეთი სულელები, როგორიც ჩვენ გვინდა, რომ იყვნენ“, - განაცხადა ბუდანოვმა.
მისივე თქმით, კრემლში მყოფნი ახლა გაერთიანდნენ უკრაინასთან ომში მთავარი მიზნის გარშემო: „არ წააგონ“. ამასთან, კრემლში სხვადასხვა ბანაკში, სიტუაციიდან გამოსავლის განსხვავებულ გზას ხედავენ.
„ზოგს ნათლად ესმის, რომ უნდა შეწყდეს ომი და ეძიოს რაიმე სახის მშვიდობიანი გადაწყვეტა. ზოგს მიაჩნია, რომ რუსეთი შეწყვეტს არსებობას, თუ ისინი არ გააგრძელებენ, თუ დამარცხდებიან, - აღნიშნავს ბუდანოვი.
კირილ ბუდანოვის თქმით, „ძალიან სერიოზული პოლიტიკური პროცესი დაიწყება, რომელიც დაკავშირებულია ცვლილებებთან დღევანდელ რუსეთის ფედერაციაში“.
ცნობისთვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.
რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა.
ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა.
„რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა. 23 ივლისს, Human Rights Watch-მა რუსეთის მიერ ოკუპირებულ სამხრეთ უკრაინის ტერიტორიაზე ადამიანების გატაცებისა და წამების შესახებ ანგარიში გამოაქვეყნა.
Human Rights Watch-ის მიერ სექტემბრის დასაწყისში გამოქვეყნებული ანგარიშის მიხედვით, უკრაინელები იძულებით გადაჰყავთ რუსეთში ან რუსეთის მიერ უკრაინის ოკუპირებულ ტერიტორიებზე.
გაეროს ექსპერტთა ჯგუფმა, 23 სექტემბერს წარმოადგინა პირველადი შედეგები გამოძიების, რომელიც კიევში, ჩერნიგოვში, ხარკოვსა და სუმის ოლქებში ჩატარდა.
14 სექტემბრის მონაცემებით, უკრაინის ხელისუფლებამ განაცხადა, რომ უკრაინის შეიარაღებულმა ძალებმა კონტრშეტევის დროს, დაახლოებით 6000 კვ. კმ. დაიბრუნეს. რუსეთის კონტროლის ქვეშ მყოფი სამხრეთ რეგიონის გასათავისუფლებლად მთავარი კონტრშეტევის მოლოდინი ივლისის დასაწყისიდან გაჩნდა, როდესაც თავდაცვის მინისტრი, ოლექსი რეზნიკოვი ამბობდა, რომ პრეზიდენტმა ვოლოდიმირ ზელენსკიმ ოკუპირებული სამხრეთის გათავისუფლების ბრძანება გასცა.
უკრაინა აცხადებს, რომ დეოკუპაციის მიზნით, კონტრშეტევებს განაგრძობს.
დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.
