პოლიტიკა
ნიკა მელია: თუკი რამეზე ნაკლებად მიფიქრია აქ, მიფიქრია მერობის კანდიდატობაზე
"თუკი აქ რამეზე ნაკლებად მიფიქრია, მიფიქრია მერობის კანდიდატობაზე", - ამის შესახებ ნიკა მელიამ საპატიმროს დატოვების შემდეგ ჟურნალისტებს განუცხადა. კითხვაზე აპირებს თუ არა იგი მისი კანდიდატურის მერად წარდგენას, ნიკა მელიამ განაცხადა, რომ ამ მომენტში ამ კითხვაზე ამომწურავი პასუხის გაცემა გაუჭირდება. მისივე თქმით, ის ყველა კითხვაზე ამომწურავ პასუხს მოგვიანებით გასცემს. "სანამ ვიქნებით ბოლომდე გულწრფელები, მართლები ვიქნებით და გავიმარჯვებთ. თუკი რამეზე ნაკლებად მიფიქრია აქ, მიფიქრია მერობის კანდიდატობაზე. ახლა არ მინდა ამ საკითხზე მოკლე კომენტარით შემოვიფარგლო, რადგან მინად-არ მინდა პოზიცია გამიმრუდდება. ჩემი აზრით, ამას სჭირდება კარგი ინტერვიუ თითოეულ თქვენგანთან და ყველა ამომწურავ კითხვაზე გაგცემთ პასუხს", - განაცხადა მელიამ.
როგორ აფასებენ ქართველი ექსპერტები ანდრიუს კუბილიუსის მოსაზრებას
2024 წელს საქართველო ევროკავშირში გაწევრიანების განაცხადის გაკეთებას გეგმავს. განაცხადის თარიღთან დაკავშირებით მთავრობის ამ გადაწყვეტილებას ზოგი, ეკონომიკური განვითარების დონის და კონფლიქტური რეგიონების ფაქტორების გამო სკეპტიციზმით ხვდება, თუმცა მათი ნაწილი ასევე იხსენებს კვიპროსის მაგალითს და აღნიშნავს, რომ კონფლიქტების მიუხედავად, საქართველოს ევროკავშირში გაწევრიანების რეალური შანსი არსებობს, თუმცა მთავარ გამოწვევად ქვეყნის ეკონომიკური განვითარება რჩება, რაც ევროკავშირისთვის დემოკრატიის განვითარებასთან ერთად ძალზედ მნიშვნელოვანია. ევროკავშირის წევრ ქვეყნებთან საქართველოს, მოლდოვის და უკრაინის სტრატეგიული კომუნიკაციის ერთიანი სამოქმედო გეგმის შემუშავებაზე ევროპარლამენტარ ანდრიუს კუბილიუსის მოსაზრებას ქართველი ექსპერტები Europetime-თან საუბარში აფასებენ. საგარეო ურთიერთობების საკითხებში პრეზიდენტის ყოფილი მრჩეველი თენგიზ ფხალაძე მიიჩნევს, რომ მსგავსი იდეის განხორციელება ქვეყნისთვის აუცილებელია. მისი თქმით, კუბილიუსის ასეთ კარგ მოსაზრებას მთავრობის მხრიდან სწორი შეფასება და სწორი ქმედებები სჭირდება. „კუბილიუსის განცხადება კიდევ ერთხელ აჩვენებს, რომ ევროკავშირი, ევროპარლამენტარები, ზოგადად ევროსტრუქტურები მზად არინ, სწორი ნაბიჯების გადადგმაში დაგვეხმარონ. ევროკავშირი დიდი ყურადღებას აქცევს, როგორ თანამშრომლობენ ასოცირებული ქვეყნები ერთმანეთთან; როგორ უზიარებენ ერთმანეთს გამოცდილებას; როგორ ეხმარებიან ერთმანეთს, გადალახონ ესა თუ ის სირთულეები. ამ დროს, თავად ევროკავშირისთვის გაცილებით ადვილი ხდება ახალი პროგრამების, ახალი დაფინანსების გახსნა. ვიტყოდი, რომ ასეთი ინიციატივის განხორციელება აუცილებელია, როგორც ჩვენი ქვეყნისთვის, ასევე პარტნიორებისთვის. ევროკავშირს აქვს პრინციპი, რომელიც აღმოსავლეთ პარტნიორობის დროს თავიდანვე იყო გაცხადებული, ეს არის მიდგომა „მეტი მეტისათვის“, მაგრამ თითოეულ ქვეყანასთან წინსვლა იმ წარმატებების მიხედვით, იმ კონკრეტული საშინაო დავალებების შესრულების მიხედვით განისაზღვრება, რაც მათ აქვთ. თუმცა, როდესაც ვსაუბრობთ პოლიტიკის შემუშავებაზე, რაღაც ახალი ინიციატივის შემუშავებაზე და ა.შ. აქ ძალიან დიდი მნიშვნელობა აქვს ურთიერთ თანადგომას. მნიშვნელოვანია, რომ ევროკავშირის მიმართულებით, დასავლური ინტეგრაცია, ერთობლივი ძალისხმევით განხორციელდეს. ეს მნიშვნელოვნად დაეხმარება ასოცირების ხელშეკრულების ხელმომწერ ქვეყნებს, საქართველოს, უკრაინას და მოლდოვას. ყველა ფაქტორი უნდა გავითვალისწინოთ. რა თქმა უნდა, ორმხრივი ურთიერთობის ფაქტორის ჩანაცვლება არაფერს შეუძლია. არც არის საჭირო, რომ რამემ ჩაანაცვლოს, ჩვენი ასოცირების დღის წესრიგი ჩვენი ასოცირების დღის წესრიგია, მგრამ ამასთან ერთად, მრავალმხრივი ფორმატის გააქტიურება მხოლოდ და მხოლოდ ხელს შეუწყობს ევროკავშირის მიმართულებით ქვეყნის წინსვლას. მთელი აქცენტის ანალიტიკურ ცენტრზე გადატანა არ იქნება მართებული იმიტომ, რომ ანალიტიკურ ცენტრს თავისი ფუნქცია აქვს და თითოეული ამ ქვეყნის წინაშე არსებული საშინაო დავალებები კიდევ ცალკე შესასრულებელია, თუმცა ასეთი ანალიტიკური ცენტრი ევროინტეგრაციის პროცესს სერიოზულად დაეხმარება. რაც მთავარია, დაეხმარება იმ სტრატეგიულ კომუნიკაციაში, რომელიც საჭიროა, არამხოლოდ ბრიუსელთან, არამედ ევროკავშირის წევრი სახელმწიფოების დედაქალაქებთანაც. ასე რომ, თუ კი ეს ინიციატივა განხორციელდება, მხოლოდ მისასალმებელია“, - აღნიშნავს თენგიზ ფხალაძე. საქართველოს სტრატეგიისა და საერთაშორისო ურთიერთობების კვლევის ფონდის უფროსი მეცნიერ-თანამშრომელი, ევროპული კვლევების ცენტრის დირექტორი, კახა გოგოლაშვილი კუბილიუსის განცხადებას მიესალმება და დასძენს, რომ იდეის განხორციელება ბრიუსელში, სხვადასხვა ფორმით, სამი ქვეყნის საელჩოების კოორდინაციით შეიძლება. „მაგალითად, აუცილებელი არ არის საქართველოს, მოლდოვას და უკრაინას ბრიუსელში საკოორდინაციოდ რაიმე ცენტრი ჰქონდეთ. სამივე ქვეყანას აქვს წარმომადგენლობა ევროკავშირში და მათ შეუძლიათ, სრული კოორდინაციისთვის, ურთიერთობის გარკვეული მექანიზმი ჩამოაყალიბონ. ისინი წარმოადგენენ თავის ქვეყნებს, თავის საგარეო საქმეთა სამინისტროებს და შეიძლებოდა მათი გაძლიერება დამატებითი, ერთი ან ორი შტატით, რომლებიც მხოლოდ ამ საკითხებზე იმუშავებდნენ, უკრაინის, მოლდოვის და საქართველოს ერთობლივ პროექტებზე, საერთო სტრატეგიაზე, ერთობლივ განცხადებებსა და ერთობლივ ლობირებაზე ევროკავშირის ინსტიტუტებში. ამისთვის ცალკე ცენტრის ჩამოყალიბება აუცილებელი არ არის. ეს შეიძლება საელჩოების კოორდინაციის დონეზე გაკეთდეს“, - აღნიშნავს კახა გოგოლაშვილი. მისივე თქმით, პანდემიამდე, აღმოსავლეთ პარტნიორობის ქვეყნების ფორუმის ფარგლებში, არასამთავრობო სექტორის დონეზე, უკრაინის და მოლდოვის დელეგაციასთან ერთად, ექვსთა პლატფორმამ თანამშრომლობასა და ერთობლივ კოორდინაციაზე მოაწერა ხელი. „მე ვიყავი ამის ინიციატორი. შეთანხმება ითვალისწინებდა, რომ თითოეული ქვეყნის არასამთავრობო სექტორი აქტიურად იმუშავებდა საკუთარი ქვეყნის მთავრობასთან, ამ ქვეყნებს შორის კოორდინაციის გაძლიერების საკითხზე ევროინტეგრაციის მიმართულებით. უკრაინის საგარეო საქმეთა მინისტრის ინიციატივით, საქართველომ, მოლდოვამ და უკრაინამ ერთობლივ დეკლარაციას მოაწერეს ხელი. სხვათა შორის, ეს დეკლარაცია უკრაინის სამოქალაქო საზოგადოების ხელშეწყობით გაფორმდა. სწორედ უკრაინის ვიცე-პრემიერის ინიციატივა იყო ერთობლივი დეკლარაცია. დაიწყეს კიდეც ერთობლივი საუბრები. უკრაინის მთავრობას მართლაც ჰქონდა ასეთი აქტივობები, ჩვენი მთავრობა, სამმხრივი ფორმატის განვითარების მიმართულებით ცოტა თავს იკავებდა. ახლა ალბათ უკვე აღარ შეიკავებს თავს. წლების განმავლობაში, აღმოსავლეთ პარტნიორობის ლიდერ ქვეყნად საქართველო მიიჩნეოდა, მაგრამ უკრაინა ნელ-ნელა უფრო და უფრო მნიშვნელოვანი ქვეყანა გახდება, ვიდრე საქართველო. რაც არ უნდა სირთულეები ჰქონდეთ უკრაინას და მოლდოვას, გეოგრაფიულად არიან „მიწეპებული“ ევროკავშირის ტერიტორიაზე და ახლა იქ უფრო მარტივია ევროკავშირთან ინტეგრირება. ამიტომ, ჩვენს ინტერესებშია, რომ ეს სამმხრივი თანამშრომლობის ფორმატი ავაწყოთ და ერთად ვიაროთ ევროკავშირის მიმართულებით. რაც არ უნდა მოვინდომოთ, ჩვენ მათ ვერანაირად ვერ გადავასწრებთ, რადგან 2000 კილომეტრით ვართ დაშორებული ევროკავშირის უახლოეს ქვეყანასთან“, - აღნიშნავს Europetime-თან ინტერვიუში კახა გოგოლაშვილი. განსხვავებული მოსაზრება აქვს საერთაშორისო ურთიერთობების საკითხების სპეციალისტს თორნიკე შარაშენიძეს. როგორც Europetime-ს შარაშენიძემ განუცხადა, ევროკავშირში გაწევრიანების პროცესში საქართველოს უკრაინასთან და მოლდოვასთან ერთად განხილვამ, შესაძლოა, საქართველო უფრო დააზარალოს. „მსგავს ინიციატივებს ერთი მხრივ კარგად ვუყურებ, თუ იქნება ერთიანი ძალისხმევა და გამოცდილების გაზიარება. მეორე მხრივ, ეს ჩვენთვის შეიძლება დამაბრკოლებელი აღმოჩნდეს, რაც ადრე უკვე მოხდა. ყველაფრის მიუხედავად, საბოლოო ჯამში საქართველო რეალურად უფრო შემდგარი სახელმწიფოა, ვიდრე უკრაინა და მოლდოვა. მოლდოვა არის ძალიან ღარიბი სახელმწიფო, ძალიან სუსტი სახელმწიფო ინსტიტუტებით. ეს ქვეყანა კიდევ უარეს დღეში იქნებოდა, რომ არა რუმინეთის ფაქტორი. უკრაინა კი ძალიან დიდი ქვეყანაა, კორუფციის მაღალი დონით. NATO-ს მაგალითზე ვიტყვი. როდესაც საქართველო უკრაინას „მიაბეს“ NATO-ში ინტეგრაციის პროცესის დროს, საბოლოო ჯამში ამან ჩვენ დაგვაზარალა. ბუქარესტის სამიტზე მარტო საქართველოს საკითხი რომ განხილულიყო, შეიძლება MAP-ი მიგვეღო, მაგრამ უკრაინაც რომ „მოგვაწეპეს“, ამან რუსეთი უფრო გააგიჟა. საბოლოოდ, ვერცერთმა ვერ მივიღეთ MAP-ი და ორივე უფრო ცუდ მდგომარეობაში ვართ, ვიდრე 2008 წლამდე ვიყავით. გასაგებია რომ NATO-ს სჭირდება უკრაინაც, მაგრამ რუსეთი უფრო მეტად გააგიჟა ამან. რაც შეეხება კუბილიუსის მოსაზრებას, სამწუხაროდ, ეს ასე მარტივი არ არის. ამას გააზრება სჭირდება. კარგი გავერთიანდით. მერე რას ვშვრებით? პასუხი შეიძლება არ იყოს ამაზე მარტივი”, - აცხადებს თორნიკე შარაშენიძე. „კარგი იქნება თუ სამივე ქვეყნის საგარეო საქმეთა მინისტრები, ბრიუსელში საკუთარ ელჩებს კუბილიუსთან შეხვედრას და ამ ინიციატივის განხილვას დაავალებენ“, - აცხადებს Europetime-თან საუბრისას უკრაინაში საქართველოს ყოფილი ელჩი ვალერი ჩეჩელაშვილი. მისი თქმით, მთავრობის აქტიურობის გარეშე, მხოლოდ არასამთავრობო სექტორი, საკუთარი ძალებით მსგავს ანალიტიკურ ცენტრს ვერ შექმნის, მიუხედავად ამ სექტორში არსებული დიდი ინტელექტუალური რესურისა. „საერთოდ ნებისმიერ წინადადებას, რომლითაც ბატონი კუბილიუსი გამოდის, ძალიან დიდი ყურადღებით ვუსმენ და პატივს ვცემ, რადგან ეს არის ნიჭიერი ადამიანი, რომელმაც თავისი ქვეყნისთვის ბევრი კარგი რამ გააკეთა და ახლა ევროპარლამენტში არის ძალიან აქტიური, ასევე ჩვენი ერთ-ერთი გულწრფელი მეგობარი. ეს არის ძალიან კარგი წინადადება. სამივე ქვეყნას საელჩოები გვყავს ბრიუსელში. იქ ჩვენმა წარმომადგენლებმა უნდა გაზარდონ ურთიერთქმედების ხარისხი და უფრო ეფექტურად იმუშაონ სამ ხმაში. ამ ინიციატივის საპასუხოდ, როგორც მინიმუმ, სამი ქვეყნის დედაქალაქმა საკუთარ ელჩებს ბატონ კუბილიუსთან სამმხრივ ფორმატში შეხვედრის ინსტრუქცია უნდა მისცენ, დაელაპარაკონ და გარკვეული მოქმედების გეგმა შეათანხმონ, სად უნდა მივიდნენ, რა უნდა გააკეთონ, რა თანმიმდევრობით გამართონ შეხვედრები, სადილებზე დაპატიჟონ ხალხი და ა.შ. ეს უკვე ექნებოდა საკმაოდ ეფექტური შედეგების მომტანი. წინადადება თავისთავად კარგია, მაგრამ უფრო ეფექტური იქნება, თუ ის დაემყარება სისტემურ მიდგომას და პოლიტიკას ამ სამმხრივ ფორმატში, რომელსაც მე სამწუხაროდ ვერ ვხედავ“, - აცხადებს სტრატეგიული ანალიზის ცენტრის დამფუძნებელი. მისივე თქმით, შესაძლებელია, ევროპარლამენტში, ან ევროპულ ფონდში იგივე ბატონი კუბილიუსის მხარდაჭერით, ერთი ოთახი მაინც რომ გამოიყოს ანალიტიკური ცენტრისთვის. „სამი ადამიანია საჭირო, რომ ერთ ხმაში სამი ქვეყნის წარმომადგენლებმა ევროპულ სტრუქტურებთან ისაუბრონ, ყოველდღე კარზე აკაკუნონ, ხალხი შეაწუხონ. ამას ექნება მართლაც სერიოზული ეფექტი, რომელიც სერიოზულ შედეგებს გამოიღებს. ამით ჩვენ უნდა დავამტკიცოთ ის, რითაც დიდი შთაბეჭდილება მოახდინეს ბალტიისპირეთის და ვიშეგრადის ჯგუფის ქვეყნებმა. მიუხედავად იმისა, რომ ჯერ არ ვართ ევროკავშირის წევრი ქვეყნები, ვინაიდან ვართ ასოცირების პროცესის მონაწილე ქვეყნები, უნდა ვაჩვენოთ, რომ ჩვენ ჩვენს ურთიერთობებს ვამყარებთ ევროპულ ტრადიციებზე, პრინციპებზე, კრიტერიუმებსა და პრაქტიკაზე. მაგრამ ეს მარტო საუბარი არ უნდა იყოს. ევროკავშირის წარმომადგენლები, აქ ბატონი ჰარცელი, უკრაინასა და მოლდოვაში ევროკავშირის ელჩები, აკვირდებიან თუნდაც ორმხრივ ურთიერთობებს, აგერ უკრაინა-საქართველოს ორმხრივი ურთიერთობები სახეზეა, სირთულეების გადალახვა მოგვიწია. ელჩი არ გვყავდა კიევში. საქართველო მოლდოვას აქტიურობა მაინცდამაინც არ ჩანს. ვიზიტები არ ხორციელდება, ნაკლები კომუნიკაციაა. მოლდოვაში არჩევნებია კარზე მომდგარი, თავისი პოლიტიკური სირთულეები აქვთ. საქართველო იმყოფება სერიოზულ პოლიტიკურ კრიზისში და ჯერ არ ვიცით, კრიზისიდან ბოლომდე გამოსვლა შესაძლებელია თუ არა. უკრაინა რუსეთის სამხედრო აგრესიის პირისპირ იმყოფება. ჯერ ვერ ვხედავ რომ ამისთვის ჩვენი მთავრობები მოიცლიან. არადა ფაქტია, რომ ანდრიუს კუბილიუსის წინადადება, ჩვენს სტრატეგიულ ინტერესებთან სრულ თანხვედრაშია“, - განუცხადა Europetime-ს ვალერი ჩეჩელაშვილმა. ცნობისათვის, Europetime-თან ინტერვიუში, ლიეტუვის ყოფილი პრემიერ-მინისტრი, ევრონესტის საპარლამენტო ასამბლეის თანათავმჯდომარე, ევროპარლამენტარი, ანდრიუს კუბილიუსი აცხადებს, რომ საქართველოს სჭირდება მეტად ეფექტური სტრატეგიული კომუნიკაცია, როგორც ევროკავშირის ინსტიტუციებში, ასევე ევროკავშირის წევრ ქვეყნებთან და ამისათვის კარგი იქნება, თუკი საქართველო (შესაძლოა მოლდოვასთან და უკრაინასთან ერთად), შექმნის ერთგვარ ანალიტიკური ცენტრის/პლატფორმას, რომელიც ინსტიტუციურ, პოლიტიკურ, სამოქალაქო და ა.შ. წრეებთან თანამშრომლობით, ამ სამი ქვეყნის საგარეო მიზნებს მხარს დაუჭერს. მისი თქმით, ასევე მისასალმებელი იქნება, თუკი საქართველო ინსტიტუციურად ჩაერთვება „ევროპის მომავლის“ კონფერენციაში და ევროგაერთიანების მომავლის შესახებ ხედვას დააფიქსირებს. როგორც აფასებენ ამ იდეას ექსპერტები და ევროდეპუტატები , ასევე იხილეთ ბმულზე - რას მოუტანს საქართველოს, უკრაინას და მოლდოვას სტრატეგიული კომუნიკაციის ერთიანი სამოქმედო გეგმა ევროკავშირის წევრ ქვეყნებთან. ამასთან, Europetime-თან ინტერვიუში ევროკავშირი - საქართველოს საპარლამენტო ასოცირების კომიტეტის ვიცე-პრეზიდენტი, ევროპარლამენტარი რასა იუკნევიჩიენე ამბობს, რომ საქართველომ და ევროკავშირმა ერთად უნდა იპოვონ რეალისტური გზები, რათა საქართველო ნაბიჯ-ნაბიჯ გახდეს ევროკავშირის ნაწილი, ან მისი უფრო ახლო პარტნიორი.
ვიოლა ფონ კრამონი: ნიკა მელიას გათავისუფლებით 19 აპრილის შეთანხმების მნიშვნელოვანი ეტაპი შესრულდა
„ნიკა მელიას გათავისუფლებით 19 აპრილის შეთანხმების კიდევ ერთი მნიშვნელოვანი ეტაპი შესრულდა“, ევროპარლამენტარი ვიოლა ფონ კრამონი Twitter გვერდზე წერს, რომ ახლა გადამწყვეტი მნიშვნელობა ენიჭება სხვა საკითხებზე ყურადღების გამახვილებას. „მელიას გათავისუფლებით 19 აპრილის შეთანხმების კიდევ ერთი მნიშვნელოვანი ეტაპი შესრულდა. ახლა გადამწყვეტი მნიშვნელობა ენიჭება სხვა საკითხებზე ყურადღების გამახვილებას, რომლებიც მოითხოვს მხარეებს შორის თანამშრომლობას, რამაც ხელი უნდა შეუწყოს უფრო სამართლიან და გამჭვირვალე პარლამენტს საქართველოში“, - წერს ევროპარლამენტარი. სასამართლომ ნიკა მელიას პატიმრობიდან გათავისუფლების გადაწყვეტილება მიიღო.
სალომე ზურაბიშვილი: 14 ივნისს, NATO-ს სამიტის გზავნილები უნდა იყოს მკაფიო, ეს იქნება მნიშვნელოვანი უკრაინისთვის და საქართველოსთვის
საქართველოს პრეზიდენტი, სალომე ზურაბიშვილი ჩრდილოეთ მაკედონიაში ვიზიტის ფარგლებში, ქვეყნის პრეზიდენტ სტევო პენდაროვსკის შეხვდა. პრეზიდენტის თქმით, კოლეგასთან შეხვედრისას ისაუბრა რეგიონში არსებულ გამოწვევებსა და რუსეთის მხრიდან ესკალაციაზე. „საქართველოს პირველი პრეზიდენტი ვარ, რომელიც ესტუმრა სკოპიეს და ეს ჩემთვის დიდი პატივია. ჩვენი ქვეყნების დიპლომატიური ურთიერთობები მხოლოდ 2 წელიწადს ითვლის, თუმცა ამ მოკლე დროში ვნახეთ, რომ არსებობს ურთიერთობის გაღრმავების და განმტკიცების საჭიროება. მსოფლიო დადგა უპრეცედენტო გამოწვევის წინაშე პანდემიის გამო. უკვე წელზე მეტია, რაც მსოფლიო უხილავ მტერს ებრძვის. პანდემიამ გააჩერა საერთაშორისო ურთიერთობები. ჩვენ ვიაზრებთ, რომ მხოლოდ სოლიდარობით და თანამშრომლობით არის შესაძლებელი, რომ გადაიჭრას გლობალური კრიზისი. სოლიდარობა ასევე უნდა აისახებოდეს ვაქცინებზე წვდობის კუთხით. საქართველოს და მაკედონიას უამრავი რამ აქვს საერთო. მათ შორის ევროკავშირსა და NATO-ში ინტეგრაცია საქართველოსა და ჩრდილოეთ მაკედონიის არჩეული გზაა. იმ მიზნით, რომ ამ მიმართულებით წარმატებას მივაღწიოთ, ჩვენ ვაფასებთ ჩრდილოეთ მაკედონიის მზადყოფნას, გაგვიზიაროს თავისი გამოცდილება. დასავლეთ ბალკანეთის ევროკავშირში ინტეგრაციის პროცესი ასევე სამაგალითოა საქართველოსთვის. ბატონ პრეზიდენტთან საუბარი გვქონდა საქართველოს ოკუპირებულ ტერიტორიებზე, ოკუპაციაზე, ბორდერიზაციის პროცესზე, გატაცებებზე, ზაზა გახელაძის უკანონო დაკავებაზე. ასევე ვისაუბრეთ ესკალაციასა და დაძაბულობაზე. ასევე განვიხილეთ რეგიონსა და უკრაინაში არსებული სიტუაცია, ასევე რუსეთის მიერ შავი ზღვისა და კავკასიის რეგიონში მილიტარიზაციის პროცესი. აღნიშნულ ესკალაციაზე რეაგირების ერთადერთი გზა არსებობს. 14 ივნისს NATO-ს სამიტის გზავნილები უნდა იყოს მკაფიო, ეს იქნება მნიშვნელოვანი უკრაინისთვისა და საქართველოსთვისაც. ესკალაციაზე ერთადერი პასუხი არაკონფრონტაციული ნაბიჯები უნდა იყოს. ჩემი ვიზიტის ერთ-ერთი მთავარი მიზანია, ჩვენს ქვეყნებს შორის ორმხრივი ურთიერთობის გაღრმავება. ხელი მოვაწერეთ შეთანმხებას, რომელიც ჩვენს მოქალაქეებს, საქართველოსა და ჩრდილოეთ მაკედონიაში შესვლისას ვიზის მიღების ვალდებულებისგან ათავისუფლებს. ეს შეთანხმება ხელს შეუწყობს ორი ქვეყნის მოქალაქეების ურთიერთმიმოსვლას, გავაძლიერებთ ურთიერთობას ტურიზმის, ეკონომიკისა და სხვა მნიშვნელოვანი სფეროების მიმართულებით. დღეს ასევე ოფიციალურად გაფორმდა მნიშნელოვანი მემორანდუმი კულტურის სფეროში, რომელსაც ხელი მოაწერეს საქართველოსა და ჩრდილოეთ მაკედონიის კულტურის მინისტრებმა. ეს არის ჩვენს ორ სახელმწიფოს შორის ურთიერთობების ახალი ეტაპის დაწყების სიმბოლო. შეხვედრისას ბატონ პრეზიდენტს შევთავაზე, გავაერთიანოთ ჩვენი პატარა სახელმწიფოები, რათა მოვახდიოთ ჩვენი ხედვების კონსოლიდაცია გლობალური გამოწვევების წინაშე, როგორიცაა კლიმატის ცვლილება, გარემოს დაცვა. პატარა სახელმწიფოებმა უნდა გააერთიანონ ძალისხმევა, რათა მსოფლიომ მათი ხმის გაგება შეძლოს. ვისაუბრეთ საკითხებზე, რომელიც ორივე სახელმწიფოსთვის მნიშვნელოვანია და გააღრმავებს ჩვენს ურთიერთობებს, როგორიცაა კიბერუსაფრთხოება, ყალბი ახალი ამბების პრობლემა. ვისურვებ, რომ ჩვენი ორმხრივი ურთიერთბები გაძლიერდეს ჩვენი პირველი ვიზიტის შემდეგ და იმედი მაქვს, ბატონო პრეზიდნენტო, უახლოეს მომავალში ჩვენს ქვეყანას ესტუმრებით“,- განაცხადა სალომე ზურაბიშვილმა. ოფიციალური ვიზიტის ფარგლებში, ხელი მოეწერა ორ დოკუმენტს - შეთანხმებას „საქართველოსა და ჩრდილოეთ მაკედონიის რესპუბლიკის მთავრობებს შორის ვიზის მიღების ვალდებულებისაგან გათავისუფლების შესახებ“ და მემორანდუმს „ჩრდილოეთ მაკედონიის რესპუბლიკასთან კულტურის სფეროში თანამშრომლობის შესახებ“. როგორც ზურაბშვილმა ჩრდილოეთ მაკედონიის პრეზიდენტთან შეხვედრის შემდეგ ერთობლივ პრესკონფერენციაზე განაცხადა, ეს შეთანხმება ხელს შეუწყობს ჩრდილოეთ მაკედონიასთან ტურისტული და ეკონომიკური ურთიერთობის გაღრმავებას.
ჰაიკო მაასი რუსეთს მოუწოდებს, ევროკავშირთან დიალოგს დაუბრუნდეს
გერმანიის საგარეო საქმეთა მინისტრმა ჰაიკო მაასმა რუსეთს მოუწოდა "დაუბრუნდნენ დიალოგს" ევროკავშირთან. ამის შესახებ მან ბრიუსელში კოლეგებთან გამართულ შეხვედრაზე განაცხადა. მაასმა ასევე განაცხადა, რომ ევროკავშირმა არ უნდა შეცვალოს თავისი კურსი, რომელიც რუსეთში სამოქალაქო უფლებების დაცვაზეა მიმართული. „მზად ვართ დიალოგისთვის და დროა მოსკოვიც დაუბრუნდეს დიალოგს“, - აღნიშნა გერმანიის საგარეო უწყების ხელმძღვანელმა. 30 აპრილს რუსეთმა ევროპარლამენტის პრეზიდენტს, დავიდ სასოლის ქვეყანაში შესვლა აუკრძალა. რუსეთის საგარეო უწყებაში აღნიშნავენ, რომ ევროკავშირი რუსეთის მოქალაქეებისა და ორგანიზაციების მიმართ არალეგიტიმური ცალმხრივი სანქციების პოლიტიკას განაგრძობს. ევროპარლამენტის პრეზიდენტის გარდა, რუსეთის ხელისუფლებამ სასანქციო სიაში კიდევ 7 პირი შეიყვანა, მათ შორის ბერლინის პროკურატურის ხელმძღვანელი, იორგ რაუპახი.
ჩრდილოეთ მაკედონიის პრეზიდენტი - მხარს ვუჭერთ საქართველოს უფლებას, დაამყაროს ყველაზე მჭიდრო ურთიერთობა NATO-სთან
გასული ათწლეულების განმავლობაში, ჩვენ პერიოდულად ვთანამშრომლობდით საერთაშორისო ორგანიზაციებში, დადგა დრო, გავზარდოთ ჩვენი ურთიერთობები საერთაშორისო ფორუმებიდან უმაღლეს დონემდე, – ამის შესახებ ჩრდილოეთ მაკედონიის რესპუბლიკის პრეზიდენტმა სტევო პენდაროვსკმა საქართველოს პრეზიდენტ სალომე ზურაბიშვილთან ერთად გამართულ პრესკონფერენციაზე განაცხადა. მისივე თქმით, სალომე ზურაბიშვილთან შეხვედრაზე ორმხრივი ურთიერთობის განვითარების საკითხები განიხილეს. „დღეს ჩვენ გვაქვს პატივი, მივესალმოთ საქართველოს პრეზიდენტ სალომე ზურაბიშვილს. ეს პირველი, ისტორიული ვიზიტია უმაღლეს დონეზე, 2019 წლის 16 თებერვალს, ორ ქვეყანას შორის დიპლომატიური ურთიერთობების დამყარების შემდეგ. სიმბოლურად ჩვენ დაკავშირებული ვართ ძალიან მნიშვნელოვანი იუბილით. წელს, ჩრდილოეთ მაკედონია და საქართველო დამოუკიდებლობის 30 წელს აღნიშნავს. ჩვენ დამოუკიდებლობის მიღებიდან, საქართველო კი, აღდგენიდან. ასევე გასული ათწლეულების განმავლობაში, ჩვენ პერიოდულად ვთანამშრომლობდით საერთაშორისო ორგანიზაციებში. დადგა დრო, გავზარდოთ ჩვენი ურთიერთობები საერთაშორისო ფორუმებიდან, უმაღლეს დონემდე. დღეს ქალბატონ ზურაბიშვილთან განვიხილეთ ჩვენი ორმხრივი ურთიერთობის წინსვლა უახლოეს მომავალში. ჩვენ უნდა გამოვიყენოთ ეს მომენტი და მტკიცე საფუძველი ჩავუყაროთ ორმხრივ ურთიერთობებს, ამ მიმართულებით პირველი ნაბიჯი სამართლებრივი ჩარჩოს რეგულირება და ხელშეწყობაა. ჩრდილოეთ მაკედონიასა და საქართველოს ძალიან მდიდარი ბუნებრივი და კულტურული ისტორიული მემკვიდრეობა გააჩნიათ. აქედან მნიშვენლოვანი დოკუმენტები, რომლებსაც ხელი მოვაწერეთ, ერთი – სავიზო რეჟიმის გაუქმებაა, რათა გამარტივდეს ჩრდილოეთ მაკედონიისა და საქართველოს მოქალაქეების მოგზაურობა. მეორე დოკუმენტი კულტურის სფეროში მემორანდუმია, ჩვენსა და საქართველოს კულტურის, სპორტისა და ახალგაზრდობის სამინისტროებს შორის. ეს ორი დოკუმენტი უნდა გახდეს სამართლებრივი საფუძველი ორ ქვეყანას შორის ტურიზმის განვითარებისა და საერთო კულტურული თანამშრომლობისთვის. ჩვენი შეთანხმებები პროცესშია“, – განაცხადა სტევო პენდაროვსკმა. მან მოუწოდა ბიზნესმენებს ჩრდილოეთ მაკედონიასა და საქართველოში, დაამყარონ კონტაქტები და იმუშავონ ბიზნესპარტნიორობაზე. „მინდა, მოვუწოდო ბიზნესმენებს ჩრდილოეთ მაკედონიასა და საქართველოში, დაამყარონ კონტაქტები და იმუშაონ ბიზნესპარტნიორობაზე ორმხრივი სარგებლისთვის. დღეს, პრეზიდენტმა ზურაბიშვილმა და მე გავცვალეთ შეხედულებები ჩვენს საგარეო პოლიტიკის პრიორიტეტულ საკითხებთან დაკავშირებით და ევროპის კონტინენტის სტაბილურობის, უსაფრთხოების კონტექსტში. მიუხედავად იმისა, რომ ჩვენ ტერიტორიულად პატარა ქვეყნები ვართ და სხვადასხვა რეგიონული მდებარეობა გვაქვს, გვაქვს საერთო სტრატეგიული, საგარეო პოლიტიკური პრიორიტეტები“, – განაცხადა ჩრდილოეთ მაკედონიის რესპუბლიკის პრეზიდენტმა სტევო პენდაროვსკმა. სტევო პენდაროვსკის განმარტებით, როგორც ნატო-ს წევრი, მხარს უჭერენ საქართველოს უფლებას, დაამყაროს ყველაზე მჭიდრო ურთიერთობა ალიანსთან. „ქართველი ხალხის სუვერენული არჩევანია და ამ თვალსაზრისით ჩვენ მზად ვართ, გავაღრმავოთ თანამშრომლობა პარტნიორულ მექანიზმებში. ამავდროულად, როგორც როგორც ევროკავშირის წევრობის კანდიდატი ქვეყანა, მტკიცედ ვუჭერთ მხარს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში. ამავდროულად, მხარს ვუჭერთ ჟენევის საერთაშორისო დისკუსიებს, რომელიც ერთადერთი მექანიზმია, სადაც ყველა მხარეა ჩართული გადაუჭრელი შიდა კონფლიქტის პროცესში წარმოქმნილი გამოწვევების აღმოსაფხვრელად“, – განაცხადა სტევო პენდაროვსკმა.
ჩრდილოეთ მაკედონიაში სალომე ზურაბიშვილის ოფიციალური ვიზიტისას ორ დოკუმენტს მოეწერა ხელი
ჩრდილოეთ მაკედონიის რესპუბლიკაში საქართველოს პრეზიდენტის, სალომე ზურაბიშვილის ოფიციალური ვიზიტის ფარგლებში, საქართველოსა და ჩრდილოეთ მაკედონიის რესპუბლიკის პრეზიდენტებმა ხელი მოაწერეს შეთანხმებას „საქართველოსა და ჩრდილოეთ მაკედონიის რესპუბლიკის მთავრობებს შორის ვიზის მიღების ვალდებულებისაგან გათავისუფლების შესახებ“. ამის შესახებ ინფორმაციას პრეზიდენტის ადმინისტრაცია ავრცელებს. მათივე ცნობით, „საქართველოს მთავრობასა და ჩრდილოეთ მაკედონიის რესპუბლიკის მთავრობას შორის ვიზის მიღების ვალდებულებისგან გათავისუფლების შესახებ“ შეთანხმება მიზნად ისახავს ორი ქვეყნის მოქალაქეებისთვის ურთიერთმიმოსვლის ხელსაყრელი პირობების შემოღებას. შეთანხმება ითვალისწინებს ბიომეტრიული პასპორტის მქონე პირთათვის ვიზის გარეშე ქვეყნის ტერიტორიაზე შესვლის, გაჩერებისა თუ ტრანზიტული გადაადგილების უფლების მინიჭებას. ხოლო საქართველოს კულტურის, სპორტისა და ახალგაზრდობის მინისტრმა თეა წულუკიანმა და ჩრდილოეთ მაკედონიის კულტურის მინისტრმა, ირენა სტეფოსკამ მემორანდუმი გააფორმეს კულტურის სფეროში ურთიერთთანამშრომლობის შესახებ. „საქართველოს კულტურის, სპორტისა და ახალგაზრდობის სამინისტროსა და ჩრდილოეთ მაკედონიის რესპუბლიკის კულტურის სამინისტროს შორის კულტურის სფეროში თანამშრომლობის შესახებ მემორანდუმი“ მიზნად ისახავს ორი ქვეყნის უწყებას შორის ურთიერთობების გაღრმავებას, ასევე, კულტურული კავშირების განვითარებას, რაც შესაბამის ინსტიტუციებსა და ორგანიზაციებს შორის თანამშრომლობის გაძლიერებას გულისხმობს, მათ შორის, კვლევითი საქმიანობის წახალისებას, ინფორმაციის ურთიერთგაცვლას, სემინარებში, კონფერენციებსა თუ სხვა კულტურულ ღონისძიებებში მონაწილეობის ხელშეწყობას. მემორანდუმი ასევე ითვალისწინებს პირდაპირი კონტაქტების დამყარების წახალისებას კულტურის სფეროს სხვადასხვა მიმართულებით, კერძოდ: ლიტერატურა და საგამომცემლო საქმიანობა, საბიბლიოთეკო საქმიანობა, ვიზუალური ხელოვნება, მუსიკა, კინო, თეატრი და კულტურული მემკვიდრეობის დაცვა.
სალომე ზურაბიშვილი: ევროკავშირსა და NATO-ში ინტეგრაცია საქართველოსა და ჩრდილოეთ მაკედონიის მიერ არჩეული გზაა
ევროკავშირსა და NATO-ში ინტეგრაცია საქართველოსა და ჩრდილოეთ მაკედონიის მიერ არჩეული გზაა, - ამის შესახებ საქართველოს პრეზიდენტმა, სალომე ზურაბიშვილმა ჩრდილოეთ მაკედონიის პრეზიდენტთან შეხვედრის შემდეგ ერთობლივ პრესკონფერენციაზე განაცხადა. როგორც ზურაბიშვილმა აღნიშნა, დღეს საქართველოსა და ჩრდილოეთ მაკედონიის ქვეყნებს შორის ურთიერთობებში ისტორიული დღეა, რადგან საქართველოს პრეზიდენტი სკოპიეს ოფიციალური ვიზიტით პირველად ეწვია. "საქართველოს და მაკედონიას უამრავი რამ აქვს საერთო. მათ შორის ევროკავშირსა და NATO-ში ინტეგრაცია საქართველოსა და ჩრდილოეთ მაკედონიის არჩეული გზაა. იმ მიზნით, რომ ამ მიმართულებით წარმატებას მივაღწიოთ, ჩვენ ვაფასებთ ჩრდილოეთ მაკედონიის მზადყოფნას, გაგვიზიაროს თავისი გამოცდილება. დასავლეთ ბალკანეთის ევროკავშირში ინტეგრაციის პროცესი ასევე სამაგალითოა საქართველოსთვის", - განაცხადა ზურაბიშვილმა.
ქალაქ სკოპიეში საქართველოს პრეზიდენტის დახვედრის ოფიციალური ცერემონია გაიმართა
ჩრდილოეთ მაკედონიის რესპუბლიკაში საქართველოს პრეზიდენტის ოფიციალური ვიზიტისას დახვედრის ოფიციალური ცერემონია ქალაქ სკოპიეში, „ვილა ვოდნოს“ საპრეზიდენტო სასახლეში გაიმართა. ამის შესახებ ინფორმაციას პრეზიდენტის ადმინისტრაცია ავრცელებს. ადმინისტრაციის ცნობით, ცერემონიაზე შესრულდა საქართველოსა და ჩრდილოეთ მაკედონიის სახელმწიფო ჰიმნები და პრეზიდენტებმა პატივი მიაგეს ჩრდილოეთ მაკედონიის სახელმწიფო დროშას, რის შემდეგაც სალომე ზურაბიშვილმა სტევო პენდაროვსკის საქართველოს ოფიციალური დელეგაცია წარუდგინა, რომლის შემადგენლობაშიც შედიან: პრეზიდენტის ადმინისტრაციის უფროსი ნათია სულავა, საქართველოს პარლამენტის წევრი, ჩრდილოეთ მაკედონიასთან მეგობრობის საპარლამენტო ჯგუფის ხელმძღვანელი გივი მიქანაძე, კულტურის, სპორტისა და ახალგაზრდობის მინისტრი თეა წულუკიანი, საგარეო საქმეთა მინისტრის მოადგილე ვახტანგ მახარობლიშვილი, საქართველოს ელჩი ჩრდილოეთ მაკედონიაში თამარ ლილუაშვილი, პრეზიდენტის მრჩეველი განათლების, კულტურისა და მეცნიერების საკითხებში კონსტანტინე ნაცვლიშვილი და საგარეო საქმეთა სამინისტროს ევროპის დეპარტამენტის დირექტორი ნინო ბარათაშვილი. საქართველოს პრეზიდენტმა ჩრდილოეთ მაკედონიაში ოფიციალური ვიზიტი დაიწყო ოფიციალური ვიზიტის ფარგლებში, დაგეგმილია შეხვედრები ჩრდილოეთ მაკედონიის რესპუბლიკის უმაღლესი თანამდებობის პირებთან: პრეზიდენტ სტევო პენდაროვსკისთან, ასამბლეის პრეზიდენტ ტალატ ჯაფერისთან და ვიცეპრემიერ არტან გრუბისთან. საქართველოს პრეზიდენტის დახვედრის ოფიციალური ცერემონიის შემდეგ, რომელიც „ვილა ვოდნოს“ პრეზიდენტის სასახლეში გაიმართება, დაგეგმილია ჩრდილოეთ მაკედონიის რესპუბლიკის პრეზიდენტთან პირისპირ და გაფართოებული შემადგენლობით შეხვედრები. ოფიციალური ვიზიტის ფარგლებში, ხელი მოეწერება ორ დოკუმენტს – შეთანხმებას „საქართველოსა და ჩრდილოეთ მაკედონიის რესპუბლიკის მთავრობებს შორის ვიზის მიღების ვალდებულებისაგან გათავისუფლების შესახებ“ და მემორანდუმს „ჩრდილოეთ მაკედონიის რესპუბლიკასთან კულტურის სფეროში თანამშრომლობის შესახებ“. დაგეგმილია ასევე, შეხვედრები ჩრდილოეთ მაკედონიაში მოღვაწე სპორტსმენებთან და კულტურის სფეროს წარმომადგენლებთან. პრეზიდენტის ოფიციალური ვიზიტი ჩრდილოეთ მაკედონიაში 11 მაისს დასრულდება.
საქართველოსა და ჩრდილოეთ მაკედონიის პრეზიდენტებმა ორ ქვეყანას შორის უვიზო მიმოსვლის შესახებ ხელშეკრულებას მოაწერეს ხელი
ჩრდილოეთ მაკედონიის რესპუბლიკაში საქართველოს პრეზიდენტის, სალომე ზურაბიშვილის ოფიციალური ვიზიტის ფარგლებში, საქართველოსა და ჩრდილოეთ მაკედონიის რესპუბლიკის პრეზიდენტებმა ხელი მოაწერეს შეთანხმებას „საქართველოსა და ჩრდილოეთ მაკედონიის რესპუბლიკის მთავრობებს შორის ვიზის მიღების ვალდებულებისაგან გათავისუფლების შესახებ“. „საქართველოს მთავრობასა და ჩრდილოეთ მაკედონიის რესპუბლიკის მთავრობას შორის ვიზის მიღების ვალდებულებისგან გათავისუფლების შესახებ“ შეთანხმება მიზნად ისახავს ორი ქვეყნის მოქალაქეებისთვის ურთიერთმიმოსვლის ხელსაყრელი პირობების შემოღებას. შეთანხმება ითვალისწინებს ბიომეტრიული პასპორტის მქონე პირთათვის ვიზის გარეშე ქვეყნის ტერიტორიაზე შესვლის, გაჩერებისა თუ ტრანზიტული გადაადგილების უფლების მინიჭებას. ხოლო საქართველოს კულტურის, სპორტისა და ახალგაზრდობის მინისტრმა თეა წულუკიანმა და ჩრდილოეთ მაკედონიის კულტურის მინისტრმა, ირენა სტეფოსკამ მემორანდუმი გააფორმეს კულტურის სფეროში ურთიერთთანამშრომლობის შესახებ. „საქართველოს კულტურის, სპორტისა და ახალგაზრდობის სამინისტროსა და ჩრდილოეთ მაკედონიის რესპუბლიკის კულტურის სამინისტროს შორის კულტურის სფეროში თანამშრომლობის შესახებ მემორანდუმი“ მიზნად ისახავს ორი ქვეყნის უწყებას შორის ურთიერთობების გაღრმავებას, ასევე, კულტურული კავშირების განვითარებას, რაც შესაბამის ინსტიტუციებსა და ორგანიზაციებს შორის თანამშრომლობის გაძლიერებას გულისხმობს, მათ შორის, კვლევითი საქმიანობის წახალისებას, ინფორმაციის ურთიერთგაცვლას, სემინარებში, კონფერენციებსა თუ სხვა კულტურულ ღონისძიებებში მონაწილეობის ხელშეწყობას. მემორანდუმი ასევე ითვალისწინებს პირდაპირი კონტაქტების დამყარების წახალისებას კულტურის სფეროს სხვადასხვა მიმართულებით, კერძოდ: ლიტერატურა და საგამომცემლო საქმიანობა, საბიბლიოთეკო საქმიანობა, ვიზუალური ხელოვნება, მუსიკა, კინო, თეატრი და კულტურული მემკვიდრეობის დაცვა.
ლიეტუვის საგარეო საქმეთა მინისტრი: უნდა ვაღიაროთ, რომ რუსეთი უფრო აგრესიული ხდება
„უნდა ვაღიაროთ ის ფაქტი, რომ რუსეთი უფრო აგრესიული ხდება“, - განაცხადა ლიეტუვის საგარეო საქმეთა მინისტრმა გაბრიელიუს ლანდსბერგისმა ბრიუსელში, საგარეო საქმეთა მინისტრების შეკრების დაწყებამდე. „დღევანდელი დისკუსია მოიცავს ისეთ საკითხებს, როგორიცაა, რუსეთი და ბელარუსი. რუსეთთან დაკავშირებული ძალიან შემაშფოთებელი მოვლენები ვითარდება, ჩვენ უნდა ვაღიაროთ ის ფაქტი, რომ რუსეთი აშკარად უფრო აგრესიული ხდება. ამის მაგალითია არამხოლოდ ის, რაც ხდება უკრაინასთან, საქართველოსთან, სომხეთთან და აზერბაიჯანთან დაკავშირებით, არამედ ევროკავშირის შიგნით. ჩეხეთში მომხდარი ფაქტი შესაბამისი პასუხის გარეშე არ უნდა დარჩეს. ჩვენ ასევე განვიხილავთ ტრანსატლანტიკურ ურთიერთობებს. მე ვფიქრობ, ახალი ფურცელი გადაიშალა ევროკავშირსა და აშშ-ს ურთიერთობებში. ეს მომენტი არის დიდი შესაძლებლობა ურთიერთობების გასაძლიერებლად, რომელიც ცოტა შერყეული იყო ბოლო 4 წლის განმავლობაში. არსებობს უამრავი შესაძლებლობა, რომ ვიმუშაოთ ერთად აღმოსავლეთის პარტნიორობის ქვეყნებთან, მეტი დემოკრატიისთვის, მეტი კანონის უზენაესობისთვის საბრძოლველად, ადამიანის უფლებების მეტი დაცვისთვის რეგიონში“, - განაცხადა ლიეტუველმა დიპლომატმა. საქართველოს დემოკრატიული გზა, მთავარი აქტივია აშშ-ისა და ევროპისთვის - ანალიტიკოსი
სალომე სამადაშვილი პარტნიორებად „ლელოს“ და „სტრატეგია აღმაშენებელს“ მოიაზრებს
„ჩემს პოლიტიკურ პარტნიორებად მოვიაზრებ როგორც „ლელოს“, ასევე „სტრატეგია აღმაშენებელს“ და იმ პროდასავლურ პოლიტიკურ აქტორებს, ვინც შეთანხმებას ხელი მოაწერეს. ვიზიარებ მოსაზრებას, რომ შევხედოთ ჩვენს რეალობას, საარჩევნო ფორმულას”, - განაცხადა სალომე სამადაშვილმა „პალიტრანიუსის“ ეთერში. მისივე თქმით, „ნაციონალური მოძრაობის“ მხრიდან დოკუმენტზე ხელის არმოწერა საერთაშორისო თვალსაზრისით „მაინცდამაინც პოპულარული ნაბიჯი“ არ იყო. „ჩემთვის არ უთქვამს, რომ ნაწყენია. ნიკამ იცის კარგად, რომ შეთანხმების მოტივაცია იყო, რომ ნიკას და გიორგის საპატიმრო დაეტოვებინათ“, - განაცხადა სალომე სამადაშვილმა.
The Wall Street Journal-ი: აშშ ავღანეთიდან გაყვანილი ჯარების ნაწილის უზბეკეთსა და ტაჯიკეთში განთავსებას განიხილავს
The Wall Street Journal-ის ინფორმაციით, აშშ ავღანეთიდან გაყვანილი ჯარების ნაწილის უზბეკეთსა და ტაჯიკეთში განთავსების შესაძლებლობას განიხილავს. როგორც გამოცემა წყაროზე დაყრდნობით წერს, აშშ-ის ხელმძღვანელობა, რომელიც ავღანეთიდან შეიარაღებული ძალების გაყვანას შეუდგა, ჯარების ნაწილის მეზობელ ქვეყნებში განთავსების შესაძლებლობას სწავლობს, რათა საჭიროების შემთხვევაში, ავღანეთის მთავრობას მხარდაჭერა გაუწიოს და რადიკალური მოძრაობა „თალიბანისა“ და სხვა ექსტრემისტების საქმიანობა გააკონტროლოს. The Wall Street Journal-ის წყაროები აღნიშნავენ, გეოგრაფიული თვალსაზრისით, ყველაზე შესაფერის ვარიანტად უზბეკეთი და ტაჯიკეთი განიხილება, თუმცა აღნიშნულ საკითხთან დაკავშირებით, აშშ-ის ხელმძღვანელობას ტაჯიკეთისა და უზბეკეთისთვის ჯერ არ მიუმართავს.
საქართველოს პრეზიდენტმა ჩრდილოეთ მაკედონიაში ოფიციალური ვიზიტი დაიწყო
საქართველოს პრეზიდენტი სალომე ზურაბიშვილი დღეს ოფიციალური ვიზიტით ჩრდილოეთ მაკედონიას ეწვია. საქართველოს პრეზიდენტის ოფიციალური დელეგაციის შემადგენლობაში არიან: პრეზიდენტის ადმინისტრაციის უფროსი ნათია სულავა, საქართველოს პარლამენტის წევრი, ჩრდილოეთ მაკედონიასთან მეგობრობის საპარლამენტო ჯგუფის ხელმძღვანელი გივი მიქანაძე, კულტურის, სპორტისა და ახალგაზრდობის მინისტრი თეა წულუკიანი, საგარეო საქმეთა მინისტრის მოადგილე ვახტანგ მახარობლიშვილი, საქართველოს ელჩი ჩრდილოეთ მაკედონიაში თამარ ლილუაშვილი, პრეზიდენტის მრჩეველი განათლების, კულტურისა და მეცნიერების საკითხებში კონსტანტინე ნაცვლიშვილი და საგარეო საქმეთა სამინისტროს ევროპის დეპარტამენტის დირექტორი ნინო ბარათაშვილი. ოფიციალური ვიზიტის ფარგლებში, დაგეგმილია შეხვედრები ჩრდილოეთ მაკედონიის რესპუბლიკის უმაღლესი თანამდებობის პირებთან: პრეზიდენტ სტევო პენდაროვსკისთან, ასამბლეის პრეზიდენტ ტალატ ჯაფერისთან და ვიცეპრემიერ არტან გრუბისთან. საქართველოს პრეზიდენტის დახვედრის ოფიციალური ცერემონიის შემდეგ, რომელიც „ვილა ვოდნოს“ პრეზიდენტის სასახლეში გაიმართება, დაგეგმილია ჩრდილოეთ მაკედონიის რესპუბლიკის პრეზიდენტთან პირისპირ და გაფართოებული შემადგენლობით შეხვედრები. ოფიციალური ვიზიტის ფარგლებში, ხელი მოეწერება ორ დოკუმენტს – შეთანხმებას „საქართველოსა და ჩრდილოეთ მაკედონიის რესპუბლიკის მთავრობებს შორის ვიზის მიღების ვალდებულებისაგან გათავისუფლების შესახებ“ და მემორანდუმს „ჩრდილოეთ მაკედონიის რესპუბლიკასთან კულტურის სფეროში თანამშრომლობის შესახებ“. დაგეგმილია ასევე, შეხვედრები ჩრდილოეთ მაკედონიაში მოღვაწე სპორტსმენებთან და კულტურის სფეროს წარმომადგენლებთან. პრეზიდენტის ოფიციალური ვიზიტი ჩრდილოეთ მაკედონიაში 11 მაისს დასრულდება.
დღეს ნიკა მელიას სასამართლო პროცესი გაიმართება
„ნაციონალური მოძრაობის“ თავმჯდომარის, ნიკა მელიას სასამართლო პროცესი 16:00 საათზე გაიმართება. სხდომაზე მოსამართლემ უნდა განიხილოს პროკურატურის შუამდგომლობა, რომლითაც საგამოძიებო უწყებამ მელიასთვის აღკვეთის ღონისძიების შეცვლაზე გუშინ მიმართა. შუამდგომლობას მოსამართლე ნინო ჩახნაშვილი განიხილავს, რომელიც საქმეს არსებითად იხილავს. ცნობისთვის, ნიკა მელიას პატიმრობა 17 თებერვალს შეეფარდა. ის ბრალდებულია 2019 წლის 20-21 ივნისს, პარლამენტთან გამართული ანტისაოკუპაციო საპროტესტო აქციისას პარლამენტის შენობაში შეჭრის მცდელობის საქმეზე, ჯგუფური ძალადობის ხელმძღვანელობის და მასში მონაწილეობის მუხლით. 2019 წლის 27 ივნისის განჩინებით, მელიას აღკვეთის ღონისძიების სახით შეეფარდა ელექტრონული მონიტორინგი და გირაო, 30 000 ლარი, რომელიც მან გადაიხადა. 2020 წლის 1 ნოემბერს, პარლამენტთან საპროტესტო აქციაზე ნიკა მელიამ ელექტრონული მონიტორინგის სამაჯური საჯაროდ მოიხსნა. ამის შემდეგ, პროკურატურამ სასამართლოს მიმართა გირაოს 100 000 ლარამდე გაზრდის შუამდგომლობით. თბილისის საქალაქო სასამართლოს 2020 წლის 3 ნოემბრის განჩინებით, გირაო გაიზარდა 40 000 ლარით და მელიას გადახდის ვადად 50 დღე განესაზღვრა. ნიკა მელიამ გირაოს გადახდაზე უარი განაცხადა. სასამართლომ მას გირაო წინასწარი პატიმრობით შეუცვალა. მელია 23 თებერვალს დილით, საპოლიციო ძალებმა "ნაციონალური მოძრაობის" მთავარ ოფისში ჩატარებული სპეცოპერაციის შედეგად დააპატიმრეს. "ნაციონალური მოძრაობის" თავმჯდომარის დაკავებამ საქართველოში პოლიტიკური კრიზისი გააღრმავა. რამდენიმეკვირიანი მოლაპარაკებების შემდეგ კი შედგა შეთანხმების დოკუმენტი, რომლის მიხედვითაც მელია პარლამენტმა "ამნისტიის კანონით" უნდა გაათავისუფლოს.
ჩეხეთი რუსეთისგან საბრძოლო მასალების საცავში აფეთქებების გამო, კომპენსაციის სახით, 39 მილიონ ევროს მოითხოვს
მედიის ინფორმაციით, ჩეხეთის ხელისუფლება გეგმას, რომ რუსეთისგან საბრძოლო მასალების საცავში აფეთქებების გამო, კომპენსაციის სახით, 39 მილიონ ევროს მოითხოვს. როგორც ჩეხეთის ფინანსთა მინისტრმა განაცხადა, ქვეყანა აპირებს, გამოიყენოს საერთაშორისო მექანიზმები და ნორმები, რათა მოსკოვისგან ზარალის ანაზღაურება მოითხოვოს. „თუ ჩვენ ზარალის კომპენსაციას მოვითხოვთ სისხლის სამართლებრივი წარმოებით, ეს პროცესი გაჭიანურდება“, – განაცხადა ჩეხეთის ვიცე-პრემიერმა და ფინანსთა მინისტრმა. შეგახსენებთ, ჩეხეთის ხელისუფლება რუსეთის სპეცსამსახურების წარმომადგენლებს 2014 წელს დასახლება ვრბეტიცეში მდებარე საბრძოლო მასალების საწყობში აფეთქების მოწყობაში ადანაშაულებს. ამასთან დაკავშირებით ჩეხეთმა 18 რუსი დიპლომატი გააძევა. თავის მხრივ, რუსეთი ბრალდებას უარყოფს. მოსკოვმა საპასუხოდ 20 რუსი დიპლომატი გააძევა.
ჯო ბაიდენი დღეს „ბუქარესტის ცხრიანის“ ვირტუალურ სამიტში მიიღებს მონაწილეობას
აშშ-ის პრეზიდენტი ჯო ბაიდენი დღეს „ბუქარესტის ცხრიანის“ ვირტუალურ სამიტში მიიღებს მონაწილეობას. როგორც ცნობილია, თავის გამოსვლაში ჯო ბაიდენი დააფიქსირებს ვაშინგტონის სწრაფვას, უფრო მჭიდრო ურთიერთობები დაამყაროს ცენტრალური ევროპის, ასევე ბალტიისა და შავი ზღვის რეგიონის მოკავშირეებთან. „ბუქარესტის ცხრიანის“ სამიტში მონაწილება მიიღებენ პოლონეთის, რუმინეთის, ესტონეთის, ლატვიის, ლიეტუვის, სლოვაკეთის, უნგრეთის, ბულგარეთისა და ჩეხეთის ლიდერები.
რეჯეფ თაიფ ერდოღანი: აშკარაა, რომ თურქეთის წვლილის გარეშე ევროკავშირს არ შეუძლია, მტკიცედ შეინარჩუნოს არსებობა
თურქეთის პრეზიდენტმა, რეჯეფ თაიფ ერდოღანმა ევროპის დღესთან დაკავშირებით განაცხადა, რომ ევროკავშირს არ შეუძლია, მტკიცედ შეინარჩუნოს არსებობა თურქეთის წვლილისა და მხარდაჭერის გარეშე. თურქეთის პრეზიდენტის თქმით, ევროკავშირისთვის, რომ გახდეს ძლიერი, გლობალური მოთამაშე, მთავარი დაბრკოლება არის სტრატეგიული მოთმინებისა და ხედვის არქონა. ერდოღანის განცხადებით, ევროკავშირს გადაწყვეტილების მიმღები მექანიზმების გადახედვა და ახალი ინსტიტუციური სტრუქტურა, ახალი ხედვა სჭირდება. თურქეთის პრეზიდენტმა ასევე აღნიშნა, რომ ევროკავშირი ბევრი გამოწვევის წინაშეა, როგორიცაა: ლტოლვილების კრიზისი, ისლამოფობია, ქსენოფობია, ფინანსური სიმყიფე და „კოვიდ-19“-ის პანდემია. „ამ პრობლემების გადაწყვეტა, რომელიც საფრთხეს უქმნის კავშირს და მის მომავალს, დამოკიდებულია სოლიდარობაზე და თანამშრომლობაზე. თურქეთი მზადაა, თავისი წვლილი შეიტანოს ევროკავშირის წინაშე არსებული პრობლემების გადაწყვეტაში. აშკარაა, რომ ევროკავშირს არ შეუძლია, მტკიცედ შეინარჩუნოს არსებობა თურქეთის წვლილისა და მხარდაჭერის გარეშე. თურქეთი, ორმაგი სტანდარტებისა და დაბრკოლებების მიუხედავად, ინარჩუნებს გადამწყვეტ დამოკიდებულებას და ძალისხმევას ევროკავშირის წევრობისკენ მიმავალ გზაზე“, – განაცხადა ერდოღანმა.
კახა კუჭავა: ნიკა მელიამ პარლამენტში თავისი ადგილი აუცილებლად უნდა დაიკავოს და გააგრძელოს საქმიანობა
ევროკავშირის მიერ ნიკა მელიასთვის გირაოს გადახდა მიუთითებს, თუ რამდენად დიდია ინტერესი საქართველოს მიმართ, რომ პოლარიზებამ, დაძაბულობამ დაიკლოს, ყველამ გადაინაცვლოს პარლამენტში სამუშაოდ და გააგრძელოს ის საქმიანობა, რომელიც მათ მანდატებს ეკადრება, – ამის შესახებ საქართველოს პარლამენტის თავმჯდომარემ, კახა კუჭავამ განაცხადა. კუჭავას განცხადებით, შარლ მიშელის მიერ წარდგენილი პუნქტების შესრულება არის ის აუცილებელი პირობა, რომელიც უნდა იყოს მთავარი ამოსავალი წერტილი ყველა პოლიტიკოსისთვის. „ეს უნდა იყოს ამოსავალი წერტილი მათ შორის მელიასთვის, რომელმაც, როდესაც გამოვა პატიმრობიდან, აუცილებლად უნდა დაიკავოს პარლამენტში ადგილი და გააგრძელოს საქმიანობა. ნიკა მელია რა თქმა უნდა არ არის პოლიტპატიმარი. ნიკა მელიას საქმესთან დაკავშირებით ჯერ სასამართლოს გადაწყეტილება არ მიუღია, ჯერ ვერავისზე ვერ ვიტყვით, ვინმე არის თუ არ არის დამნაშავე. საუბარი არის გირაოზე და გირაო დადგა იმ კონკრეტული ფაქტის შემდეგ, რაც განხორციელდა საჯაროდ, საზოგადოების წინაშე და ამან გამიწვია შესაბამისი სამართლებრივი რეაგირება. ძალიან დიდი და წინგადადგმული ნაბიჯია ევროკავშირის მხრიდან და უნდა მივიღოთ ეს ნიშნად იმისა, რომ მათ სურთ საქართველოში დასრულდეს პოლარიზება, დაწყნარდეს სიტუაცია, დაუბრუნდეს ყველა თავის ადგილს და პარლამენტში გააგრძელონ მუშაობა“, – განაცხადა კუჭავამ. ცნობისთვის, საქართველოში ევროკავშირის წარმომადგენლობის ინფორმაციით, ნიკა მელიას გირაოს თანხა, 40 ათასი ლარი გადახდილია. ამის შესახებ ევროკავშირის წარმომადგენლობის ვებგვერდზე 8 მაისს გამოქვეყნებულ განცხადებაშია ნათქვამი. „დღეს გადახდილი იყო 40 000 ლარის ოდენობის გირაო ბატონ მელიას წინასწარი პატიმრობიდან გასათავისუფლებლად, რაც 2021 წლის 19 აპრილს ევროკავშირის მედიაციით მიღებული შეთანხმების კონტექსტში პოლიტიკური პარტიების მიერ მიღწეულ ურთიერთგაგებას მოჰყვა. გულითად მადლობას ვუხდით ორ დამოუკიდებელ ორგანიზაციას, რომელიც დათანხმდა ამ პროცესში მნიშვნელოვანი მხარდაჭერის გაწევაზე: ევროპულ ფონდს დემოკრატიისთვის (European Endowment for Democracy), რომელმაც თანხა გამოყო და საქართველოს ახალგაზრდა იურისტთა ასოციაციას (საია), რომელმაც აღნიშნული თანხა ხელისუფლებას გადასცა. ეს კიდევ ერთი მნიშვნელოვანი ნაბიჯია, რომელიც საქართველოში პოლიტიკური კრიზისის დასრულებისა და 19 აპრილის შეთანხმების შესრულების მიზნით გადაიდგა. გვაქვს მოლოდინი, რომ ეს ნაბიჯი მეტად შეუწყობს ხელს პარლამენტის ყველა არჩეულ წევრს, რომ შეთანხმებას შეუერთდეს და მის განხორციელებაში წვლილი შეიტანოს, საქართველოს, მისი მოქალაქეების, ევროკავშირი-საქართველოს ურთიერთობებისა და საქართველოს ევროატლანტიკური მომავლის ინტერესებიდან გამომდინარე“, – აღნიშნულია განცხადებაში.
საქართველოს პრეზიდენტი 10 მაისს ოფიციალური ვიზიტით ჩრდილოეთ მაკედონიას ეწვევა
საქართველოს პრეზიდენტი ხვალ, 10 მაისს ოფიციალური ვიზიტით ჩრდილოეთ მაკედონიას ეწვევა. ამის შესახებ ინფორმაციას პრეზიდენტის ადმინისტრაცია ავრცელებს. როგორც ცნობილია, ოფიციალური ვიზიტის ფარგლებში, დაგეგმილია შეხვედრები ჩრდილოეთ მაკედონიის რესპუბლიკის უმაღლესი თანამდებობის პირებთან: პრეზიდენტ სტევო პენდაროვსკისთან, ეროვნული ასამბლეის პრეზიდენტ ტალატ ჯაფერისთან და პირველ ვიცეპრემიერ არტან გრუბისთან. საქართველოს პრეზიდენტის დახვედრის ოფიციალური ცერემონიის შემდეგ, რომელიც „ვილა ვოდნოს“ სასახლეში გაიმართება, დაგეგმილია ჩრდილოეთ მაკედონიის რესპუბლიკის პრეზიდენტთან პირისპირ და გაფართოებული შემადგენლობით შეხვედრები. ოფიციალური ვიზიტის ფარგლებში, ხელი მოეწერება ორ დოკუმენტს - შეთანხმებას „საქართველოსა და ჩრდილოეთ მაკედონიის რესპუბლიკის მთავრობებს შორის ვიზის მიღების ვალდებულებისაგან გათავისუფლების შესახებ“ და მემორანდუმს „ჩრდილოეთ მაკედონიის რესპუბლიკასთან კულტურის სფეროში თანამშრომლობის შესახებ“. დოკუმენტებზე ხელმოწერის შემდეგ, დაგეგმილია საქართველოს პრეზიდენტისა და ჩრდილოეთ მაკედონიის რესპუბლიკის პრეზიდენტის ერთობლივი განცხადებები პრესისთვის. დაგეგმილია პრეზიდენტის შეხევდრა ჩრდილოეთ მაკედონიაში მოღვაწე ქართველ სპორტსმენებთან და კულტურის სფეროს წარმომადგენლებთან. საქართველოს პრეზიდენტის ოფიციალური დელეგაციის შემადგენლობაში არიან: პრეზიდენტის ადმინისტრაციის უფროსი ნათია სულავა, საქართველოს პარლამენტის წევრი, ჩრდილოეთ მაკედონიასთან მეგობრობის საპარლამენტო ჯგუფის ხელმძღვანელი გივი მიქანაძე, კულტურის, სპორტისა და ახალგაზრდობის მინისტრი თეა წულუკიანი, საგარეო საქმეთა მინისტრის მოადგილე ვახტანგ მახარობლიშვილი, საქართველოს ელჩი ჩრდილოეთ მაკედონიაში თამარ ლილუაშვილი, პრეზიდენტის მრჩეველი განათლების, კულტურისა და მეცნიერების საკითხებში კონსტანტინე ნაცვლიშვილი და საგარეო საქმეთა სამინისტროს ევროპის დეპარტამენტის დირექტორი ნინო ბარათაშვილი. პრეზიდენტის ოფიციალური ვიზიტი ჩრდილოეთ მაკედონიაში 11 მაისს დასრულდება.
