პოლიტიკა
ევროკავშირის საგარეო საქმეთა მინისტრები ისრაელ-პალესტინის საკითხზე იმსჯელებენ
ევროკავშირის საგარეო საქმეთა მინისტრები 18 მაისს ვიდეოკონფერენციის ფორმატში ისრაელსა და პალესტინელებს შორის გამწვავებულ ვითარებაზე იმსჯელებენ. ამის შესახებ ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში, ჟოზეპ ბორელმა განაცხადა. „ისრაელსა და პალესტინას შორის ესკალაციასა და სამოქალაქო მსხვერპლის მიუღებელ რიცხვთან დაკავშირებით, მე ვიწვევ ევროკავშირის საგარეო საქმეთა მინისტრების საგანგებო ვიდეოკონფერენციას სამშაბათს. განვიხილავთ თუ როგორ შეუძლია ევროკავშირს წვლილი შეიტანოს მიმდინარე ძალადობის დასრულებაში“, – წერს ბორელი.
ისრაელმა ღაზის სექტორში „ჰამასის“ მეთაურის სახლი დაბომბა
Reuters-ის ინფორმაციით, ისრაელის სამხედრო ძალებმა ღაზის სექტორში დაჯგუფება „ჰამასის“ მეთაურის სახლი დაბომბეს. პალესტინის ჯანდაცვის სამინისტროს წარმომადგენლები აცხადებენ, რომ იერიშის შედეგად სულ მცირე 4 ადამიანი დაიღუპა. კონფლიქტის მეშვიდე დღეს „ჰამასმა“ თელ-ავივის მიმართულებით გაუშვა რაკეტები. ისრაელში აცხადებენ, 10-მდე ადამიანი დაშავდა მაშინ, როდესაც თავშესაფრებისკენ გაქცევას ცდილობენ. როგორც ისრაელის პრემიერ-მინისტრმა, ბენიამინ ნეთანიაჰუმ განაცხადა, ისრაელი სამხედრო ოპერაციას გაგრძელდება ვიდრე, ეს საჭირო იქნება. მოგვიანებით კონფლიქტის შესახებ გაეროს უშიშროების საბჭოს სხდომაზე იმსჯელებენ.
ჯო ბაიდენსა და მაჰმუდ აბასს შორის სატელეფონო საუბარი შედგა
თეთრი სახლი აშშ-ის პრეზიდენტის, ჯო ბაიდენისა და პალესტინის ავტონომიის ლიდერის, მაჰმუდ აბასის სატელეფონო საუბრის შესახებ ინფორმაციას ავრცელებს. თეთრი სახლის ცნობით, ჯო ბაიდენმა ხაზგასმით აღნიშნა ჰამასის მიერ ისრაელის მიმართულებით რაკეტების გაშვების შეწყვეტის საჭიროება. „მათ განიხილეს ამჟამინდელი დაძაბულობა იერუსალიმში და დასავლეთ სანაპიროზე და გამოთქვეს საერთო სურვილი, რომ იერუსალიმი იყოს ყველა აღმსარებლობისა და წარმომავლობის ხალხის მშვიდობიანი თანაცხოვრების ადგილი. პრეზიდენტმა ბაიდენმა აცნობა პრეზიდენტ აბასს მიმდინარე კონფლიქტში აშშ-ის დიპლომატიური ჩართულობის შესახებ და ხაზი გაუსვა „ჰამასის“ მიერ ისრაელის მიმართულებით რაკეტების გაშვების შეწყვეტის საჭიროებას. მათ გამოხატეს საერთო შეშფოთება იმასთან დაკავშირებით, რომ მიმდინარე ძალადობის შედეგად დაიღუპნენ უდანაშაულო მოქალაქეები, მათ შორის ბავშვები. პრეზიდენტმა მხარდაჭერა გამოუცხადა ნაბიჯებს, რომლებიც პალესტინელ ხალხს აძლევს საშუალებას გამოიყენონ ღირსება, უსაფრთხოება, თავისუფლება და ეკონომიკური შესაძლებლობა, რომელსაც ისინი იმსახურებენ. ამ მხრივ, მან ხაზი გაუსვა აშშ-ის ბოლოდროინდელ გადაწყვეტილება, განაახლოს პალესტინელი ხალხის დახმარება, მათ შორის ეკონომიკური და ჰუმანიტარული დახმარება დასავლეთ სანაპიროსა და ღაზაში პალესტინელთა სასარგებლოდ“, – ნათქვამია თეთრი სახლის განცხადებაში. თეთრი სახლის ცნობით, აშშ-ის პრეზიდენტმა ბაიდენმა მხარდაჭერა გამოუცხადა ორი სახელმწიფოს პრინციპზე დაფუძნებულ გამოსავალს, როგორც ისრაელსა და პალესტინელებს შორის კონფლიქტის სამართლიანი და გრძელვადიანი დარეგულირების საუკეთესო გზას. ამასთან, ჯო ბაიდენმა მაჰმუდ აბასს ამერიკულ-პალესტინური პარტნიორობის გაძლიერებისადმი მხარდაჭერა დაუდასტურდა.
ვოლოდიმირ ზელენსკი: უკრაინა აუცილებლად იქნება ევროკავშირში
უკრაინის პრეზიდენტი ვოლოდიმირ ზელენსკი აცხადებს, რომ უკრაინა აუცილებლად იქნება ევროკავშირში. ამის შესახებ უკრაინის პრეზიდენტმა Tweeter-ზე ევროპის დღესთან დაკავშირებით დაწერა. „უკრაინა ევროპაა, ჩვენ კი ევროპელები. ჩვენ ევროპის ცენტრი და გული ვართ, გეოგრაფიით, სულისკვეთებით, ღირებულებებითა და მისწრაფებებით. ეს დავამტკიცეთ მაიდანზე და ყოველდღიურად ვაკეთებთ ამას ჩვენი სახელმწიფოს შეცვლით, დამოუკიდებლობისა და მომავლის შენებით, ევროპის აღმოსავლეთ საზღვრის დაცვით. უკრაინა აუცილებლად იქნება ევროკავშირში“, – წერს ზელენსკი.
ისრაელის პრემიერი ქვეყნებს მხარდაჭერისთვის მადლობას უხდის, მათ შორის საქართველოსაც
ისრაელის პრემიერ-მინისტრმა ბენიამინ ნეთანიაჰუმ მადლობა გადაუხა ქვეყნებს, რომლებმაც ისრაელს მხარდაჭერა გამოუცხადა, მათ შორის საქართველოსაც. „მადლობას გიხდით იმისთვის, რომ ისრაელის გვერდით მტკიცედ დგახართ და მხარს უჭერთ ჩვენს უფლებას თავი დავიცვათ ტერორისტული თავდასხმებისგან“, - დაწერა ისრაელის პრემიერმა Twitter-ზე.
დავით ზალკალიანი ოფიციალური ვიზიტით უკრაინას ეწვევა
საქართველოს ვიცე-პრემიერი, საგარეო საქმეთა მინისტრი დავით ზალკალიანი 16-17 მაისს ოფიციალური ვიზიტით მიემგზავრება კიევში, სადაც გაიმართება ორმხრივი შეხვედრები უკრაინის საკანონმდებლო და აღმასრულებელი ხელისუფლების წარმომადგენლებთან. უკრაინაში ოფიციალური ვიზიტის ფარგლებში, საუბარი შეეხება საქართველო-უკრაინის სტრატეგიულ პარტნიორობას, თანამშრომლობის სხვადასხვა მიმართულებებს და ურთიერთობების შემდგომი გაღრმავების პერსპექტივებს. ვიზიტის ფარგლებში, საქართველოს საგარეო უწყების ხელმძღვანელი მონაწილეობას მიიღებს სამი ასოცირებული ქვეყნის – მოლდოვას, საქართველოსა და უკრაინის საგარეო საქმეთა მინისტრების შეხვედრაში. მინისტრები განიხილავენ სამი ქვეყნის შემდგომი მჭიდრო თანამშრომლობის საკითხებს ევროკავშირთან პოლიტიკური დიალოგის, ეკონომიკური და სექტორული ინტეგრაციის გასაძლიერებლად, „აღმოსავლეთ პარტნიორობის“ მომავალი სამიტისთვის სამზადისს, ასევე იმსჯელებენ რეგიონში არსებული უსაფრთხოების გარემოსა და გამოწვევებზე.
ევროკავშირი სომხეთსა და აზერბაიჯანს თავშეკავებისა და დაძაბულობის განმუხტვისკენ მოუწოდებს
"ევროკავშირი ყურადღებით აკვირდება სომხეთ-აზერბაიჯანის საზღვრის მონაკვეთზე შექმნილ „საგანგაშო“ ვითარებას და მოუწოდებს ორივე მხარეს მაქსიმალური თავშეკავებისა და დაძაბულობის განმუხტვისკენ, - ამის შესახებ ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში, ჟოზეპ ბორელმა განაცხადა . რადიო თავისუფლების სომხური სამსახურის ცნობით, ბორელის დავალებით ევროკავშირის საგარეო უწყების გენერალურმა მდივანმა, სტეფანო სანინომ, სომხეთისა და აზერბაიჯანის საგარეო საქმეთა მინისტრებთან მოლაპარაკება გამართა. სომხეთის ხელისუფლების განცხადებით, 12 მაისს დაახლოებით 250-მა აზერბაიჯანელი სამხედრო სომხეთის კონტროლირებად ტერიტორიაზე გადავიდა და 3,5 კილომეტრით შეიჭრა სიუნიქის რაიონის სიღრმეში, სევ ლიჩის (სევის ტბის) მახლობლად. სომხეთის ხელისუფლებამ 14 მაისს ოფიციალურად მიმართა რუსეთის ლიდერობით მოქმედ კოლექტიური უსაფრთხოების ხელშეკრულების ორგანიზაციას (ОДКБ), რომ დაიწყოს კონსულტაციები აზერბაიჯანთან შექმნილი სასაზღვრო დაძაბულობის განმუხტვის მიზნით, რაც ორ ქვეყანას შორის პირველი სერიოზული დაპირისპირებაა შარშანდელი შემოდგომის 44-დღიანი მასშტაბური ბრძოლების შემდეგ. ერევანმა სასაზღვრო დაპირისპირების თავიდან არიდების მიზნით აზერბაიჯანელ სამხედროებთან მოსალაპარაკებლად გაგზავნა მთავრობის ვიცე-პრემიერი და პარალელურად აამოქმედა დიპლომატიური კავშირები.
ისრაელის ცნობით, დაბომბილია შენობა, რომელსაც "ჰამასი" "ცოცხალ ფარად იყენებდა"
"ისრაელის საავიაციო იერიშის შედეგად ღაზის სექტორში განადგურდა მრავალსართულიანი შენობა, რომელშიც განთავსებული საერთაშორისო მედიის ოფისებს დაჯგუფება „ჰამასი“ „ცოცხალ ფარად“ იყენებდა , -ამის შესახებ განცხადებას ისრაელის თავდაცვის არმია ავრცელებს. სანამ საჰაერო დარტყმას მიიტანდნენ, ისრაელის ძალებმა კორპუსში მყოფები გააფრთხილეს, შენობა დაეტოვებინათ. აფეთქების შედეგად კორპუსი მთლიანად დაინგრა. უკვე რამდენიმე დღეა პალესტინა ისრაელის ქალაქებს განუწყვეტლივ ბომბავს. "ჰამასის" და პალესტინელთა სხვა დაჯგუფებებს სარაკეტო იერიშების საპასუხოდ, ისრაელმა ღაზას სექტორზე საჰაერო იერიში მიიტანა.
ბათუმის აეროპორტიდან ვარშავის მიმართულებით ავიარეისები დაინიშნება
7 ივნისიდან, პოლონური ავიაკომპანია LOT Polish Airlines, ვარშავა - ბათუმის მიმართულებით, რეგულარულ ავიარესიებს ნიშნავს. სამოქალაქო ავიაციის სააგენტოს ცნობით, ავიარეისი ვარშავა - ბათუმი - ვარშავა, 7 ივნისიდან 27 სექტემბრამდე, ყოველ ორშაბათს შესრულდება. საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს მიერ, ავიაკომპანიას საჰაერო მიმოსვლის განხორციელებისათვის აუცილებელი ნებართვა მიმდინარე წლის 13 მაისს მიენიჭა. „გთხოვთ გაითვალისწინოთ, რომ ეპიდემიოლოგიური მდგომარეობის შესაბამისად, სახელმწიფოების მიერ პერიოდულად იცვლება სასაზღვრო შეზღუდვები და სანიტარული მოთხოვნები, რაც ასახვას ჰპოვებს ავიაკომპანიების გადაწყვეტილებებზე ამა თუ იმ მიმართულებით საჰაერო მიმოსვლის დაწყების, გაგრძელების ან განახლების კუთხით. მოქალაქეებს მოვუწოდებთ, გამოიჩინონ სიფრთხილე მგზავრობის დაგეგმვის დროს, ყურადღებით გაეცნონ დანიშნულების ქვეყნის მიერ დაწესებულ სასაზღვრო და სანიტარულ რეგულაციებს, ავიაკომპანიების შეტყობინებებს, ოფიციალურ წყაროებზე განთავსებულ განცხადებებს და განრიგებს”, – ნათქვამია სამოქალაქო ავიაციის სააგენტოს მიერ გავრცელებულ ინფორმაციაში.
ბელარუსში Deutsche Welle-ს ჟურნალისტს პატიმრობა მიუსაჯეს
ბელარუსში „დოიჩე ველეს“ ჟურნალისტს, ალექსანდრ ბურაკოვს 20 დღიანი პატიმრობა მიუსაჯეს. ბურაკოვს ბრალად წაუყენეს, ქალაქ მოგილიოვში „მასობრივი ღონისძიების ჩატარების წესის ხელმეორედ დარღვევა". ამის შესახებ ინფორმაციას Mayday ავრცელებს, უფლებათდამცველი ტელეგრამის არხი. Mayday-ის ცნობით ჟურნალისტის წინააღმდეგ პროკურატურის მოწმედ სასამართლოში შინაგან საქმეთა სამინისტროს ადგილობრივი ქვედანაყოფის თანამშრომელი გამოიყვანეს. დაცვის მხარე ამტკიცებდა, რომ არავითარ არასანქცირებულ ღონისძიებას სასამართლოსთან ადგილი არ ჰქონია. სასამართლო პროცესზე ბურაკოვი მოჰყვა წამებასა და არაადამიანურ მოპყრობაზე, რასაც იზილატორის თანამშრომელთა მხრიდან მის მიმართ ჰქონდა ადგილი. "დოიჩე ველეს“ ჟურნალისტი 12 მაისს, 6tv.by-ის კორესპონდენტთან, ულაძიმირ ლაპცევიჩთან ერთად დააკავეს. პროტესტის ნიშნად ორივე დაკავებულმა შიმშილობა გამოაცხადა.
მოსკოვში, რადიო თავისუფლების საბანკო ანგარიშები დააყადაღეს
მოსკოვში, რადიო თავისუფალი ევროპა/რადიო თავისუფლების საბანკო ანგარიშები დააყადაღეს. ამის შესახებ ინფორმაციას რადიო თავისუფლების რუსული ბიურო ავრცელებს. მათივე ცნობით, აღსრულების გადაწყვეტილება სასამართლოს 10 ვერდიქტის თაობაზე აღიძრა, მას შემდეგ, რაც სასამართლოს მიერ დაკისრებული ჯარიმების გადახდის ორთვიანი ვადა ამოიწურა. ჯარიმების საერთო თანხა 5 მილიონ რუბლს შეადგენს. მედიაკორპორაციამ არაერთგზის აღნიშნა, რომ არ მიიჩნევს თავს რომელიმე უცხო ქვეყნის „აგენტად“, ვინაიდან მისი სარედაქციო პოლიტიკა სრულიად დამოუკიდებელია და, ამასთანავე, სრულად იცავს რუსეთის კანონმდებლობის ყველა მოთხოვნას. წლის დამდეგიდან რუსეთის მედიის სამეთვალყურეო უწყებამ, „როსკომნადზორმა“ სასამართლოს გაუგზავნა 520-მდე ოქმი რთე/რთ-ის მიერ „უცხოეთის აგენტის“ შესახებ კანონის დარღვევის თაობაზე. რთე/რთ უარს ამბობს თავისი მასალის აღნიშვნაზე „უცხოეთის აგენტის“ იარლიყით. რთე/რთ-მ გაასაჩივრა „როსკომნადზორის“ ოქმები, მაგრამ რუსეთის სასამართლოებმა ჯერჯერობით 250-ზე მეტი საჩივარი უკუაგდეს. საერთო ჯამში, მაუწყებლის მიმართ დღემდე გამოწერილი ჯარიმები 70 მილიონ რუბლს (950 000 აშშ დოლარი) შეადგენს. მედიაკორპორაციამ ადამიანის უფლებების ევროპულ სასამართლოს სთხოვა, რუსეთს ხელი შეუშალოს ამ ჯარიმების შესახებ გადაწყვეტილებების აღსრულებაში. მათი თქმით, ჯარიმების მიზანი დამოუკიდებელი მედიის ჩაჩუმებაა. რუსეთში 2017 წლის შემოდგომაზე მიიღეს კანონი, რომლის მიხედვითაც რუსეთში მომუშავე უცხო ქვეყნის მედიას უცხო ქვეყნის აგენტის სტატუსი ენიჭებოდა. ეს მოხდა მას შემდეგ, რაც Russia Today-ს აშშ-ში მოსთხოვეს უცხო ქვეყნის აგენტად დარეგისტრირებულიყო. რუსეთის ხელისუფლებამ მსგავსი მოთხოვნა არხზე ზეწოლად მიიჩნია. რუსეთის კანონის ქვეშ ხვდება როგორც საზღვარგარეთ რეგისტრირებული მედია, ისე რუსეთში რეგისტრირებული, რომელიც დაფინანსებას უცხოეთიდან იღებს. დეკემბერში რუსეთის იუსტიციის სამინისტრომ უცხო ქვეყნის აგენტების სიაში შეიყვანა: ამერიკის ხმა, რადიო თავისუფლება, ტელეარხი Настоящее время და რადიო თავისუფლების რამდენიმე ბიურო. მედიაზე ისეთივე შეზღუდვები ვრცელდება, როგორც უცხო ქვეყნის აგენტ არასამთავრობო ორგანიზაციებზე. პუბლიკაციებში მათ უნდა მიუთითონ, რომ უცხო ქვეყნის აგენტები არიან. კვარტალურად კი დაფინანსების შესახებ დოკუმენტაცია უნდა წარადგინონ. აქამდე უცხო ქვეყნის აგენტის სტატუსის დარღვევისთვის არასამთავრობო ორგანიზაციები არაერთხელ დაუჯარიმებიათ.
შარლ მიშელი: აშშ-ს და ჩეხეთის არამეგობრული ქვეყნების სიაში დასახელება, რუსეთის მიერ ესკალაციისკენ გადადგმული მორიგი ნაბიჯია
აშშ-ისა და ჩეხეთის „არამეგობრულ სახელმწიფოთა“ სიაში შეყვანის შესახებ, რუსეთის ხელისუფლების გადაწყვეტილებას, ევროპული საბჭოს პრეზიდენტი, შარლ მიშელი აკრიტიკებს და „ესკალაციისკენ გადადგმულ მორიგი ნაბიჯს“ უწოდებს. როგორც შარლ მიშელი twitter-ზე წერს, რუსეთის ასეთი გადაწყვეტილება დიპლომატიურ ურთიერთობებს ძირს უთხრის. ცნობისთვის, რუსეთის მთავრობამ რუსეთისადმი არამეგობრულად განწყობილი სახელმწიფოების სია დაამტკიცა. ინფორმაციას usnews ავრცელებს. 24 აპრილს, რუსეთის პრეზიდენტმა, ვლადიმერ პუტინმა ხელი მოაწერა კანონს, რომლის მიხედვითაც, რუსეთი არამეგობრული ქვეყნების დიპლომატიურ მისიებსა და სხვა სააგენტოებში ადგილობრივი თანამშრომლების რაოდენობას შეზღუდავს. დოკუმენტის მიხედვით, ჩეხეთს ახლა ნება ეძლევა, თავის დიპლომატიურ წარმომადგენლობაში 19 ადამიანი აიყვანოს, აშშ-ს - არცერთი. ეს შეზღუდვა არ ეხება აკრედიტებულ დიპლომატებს. შეგახსნებეთ, რომ ჩეხეთის პრემიერ-მინისტრმა, ანდრეი ბაბიშმა რამდენიმე კვირის წინ ევროკავშირის ქვეყნებს მოუწოდა,ჩეხეთის მიმართ სოლიდარობის ნიშნად თითო რუსი დიპლომატი გააძეონ. აღნიშნულ განცხადებას წინ უძღოდა ჩეხეთში იარაღის საწყობის აფეთქებასთან დაკავშირებული დიპლომატიური სკანდალი. ჩეხეთის პროკურატურის ცნობით, აფეთქებაში ბრალი რუსეთის სპეცსამსახურებს ედებათ. აფეთქება 2014 წელს მოხდა. ინციდენტს ორი ადამიანი ემსხვერპლა. პრემიერმა ანდრეი ბაბიშმა განაცხადა, რომ რუსი დიპლომატების გაძევება დასაბუთებულია „არაორაზროვანი მტკიცებულებით“, რომელიც წარმოადგინეს ჩეხმა გამომძიებლებმა.19 აპრილს 18 რუსი დიპლომატი, რომლებიც ჩეხეთმა მიიჩნია რუსეთის დაზვერვის თანამშრომლებად, ქვეყნიდან გააძევეს. კრემლმა საპასუხოდ მოსკოვის დატოვება მოსთხოვა 20 ჩეხ დიპლომატს.
რან გიდორი: ისრაელი საომარი მოქმედებების სრულად შეწყვეტისკენ ისწრაფვის
„ისრაელი საომარი მოქმედებების სრულად შეწყვეტისკენ ისწრაფვის და ეფექტური შეკავების აუცილებელი მექანიზმის შექმნაზე ზრუნავს“. „ისრაელსა და საქართველოს ყოველთვის შესანიშნავი ურთიერთობები ჰქონდათ და ამას ამტკიცებს ის აშკარა უზარმაზარი მხარდაჭერაც, რომელსაც დღევანდელი კონფლიქტის დაწყებიდან ვგრძნობთ ქართული საზოგადოებისგან“. ამ საკითხებზე Europetime-თან ინტერვიუში საქართველოში ისრაელის საგანგებო და სრულუფლებიანი ელჩი, რან გიდორი საუბრობს. დიპლომატმა ასევე უპასუხა Europetime-ის შეკითხვებს საქართველოსთან ეკონომიკურ ურთიერთობებსა და პანდემიასთან ბრძოლის მიმართულებით მხარდაჭერაზე. მისი თქმით, მთავარი პრიორიტეტია ისრაელის გამოცდილების გამოყენება, რომ ხელი შევუწყოთ ორმხრივ სავაჭრო ურთიერთობებს და ინვესტიციებს“. ელჩის განცხადებით, პანდემიის დასაწყისიდან ისრაელის საელჩომ და MASHAV-მა დიდი დახმარება გაუწიეს ყველა შესაბამის ორგანოს, რომელიც საქართველოში COVID19-ის გავრცელებას ებრძვის“. _გაერო ახლო აღმოსავლეთში „სრულმასშტაბიანი ომის“ საშიშროებაზე მიუთითებს. თქვენ ერთ-ერთ ინტერვიუში საერთაშორისო საზოგადოების მხრიდან „ჰამასზე“ ზეწოლის აუცილებლობაზე მიუთითეთ, კონკრეტულად რაში უნდა გამოიხატოს ეს აქტიურობა? „ჰამასმა“ უნდა გააცნობიეროს, რომ საერთაშორისო საზოგადოებაში „ნულოვანი ტოლერანტობა“ არსებობს ტერორიზმის, მშვიდობიანი მოსახლეობის ხელაღებით დაბომბვისა და ძალადობის მიმართ. უფრო მეტიც, ზოგიერთი მოძალადე ქვეყნის (მაგალითად, ირანი), რომელიც განაგრძობს „ჰამასის“ მხარდაჭერას (რომელიც აშშ - ში, ევროკავშირში, კანადაში, ავსტრალიაში ოფიციალურად მოიხსენიება როგორც „ტერორისტული ორგანიზაცია“), ამ არჩევანს მათთვის მძიმე შედეგები უნდა მოჰყვეს. _საერთაშორისო ლიდერები დეესკალაციის აუცილებლობაზე საუბრობენ და შესაბამისი მოწოდებებით გამოდიან, როგორ ხედავთ გზებს და ნაბიჯებს დეესკალაციისკენ? ბუნებრივია, ისრაელი საომარი მოქმედებების სრულად შეწყვეტისკენ ისწრაფვის. ორივე მხარეს, მშვიდობიან მოსახლეობას მშვიდობა სურს. ამასთან, ისრაელის მთავრობა ეფექტური შეკავების აუცილებელი მექანიზმის შექმნაზე ზრუნავს. ეს კონფლიქტი ისრაელს არ დაუწყია. პირიქით, გაკვირვებულია მის ტერიტორიაზე რაკეტების მოულოდნელი და არაპროვოცირებული გაშვებით. ამიტომ, უნდა ვეცადოთ და დავრწმუნდეთ, რომ „ჰამასს“ აღარასდროს ექნება ასეთი კატასტროფული თავდასხმების ცდუნება. სხვაგვარად, ძალადობის დაუსრულებელი ციკლის შემთხვევაში, განწირულები ვართ. _რაც შეეხება საქართველოსთან ურთიერთობებს, თანამშრომლობის სფეროები მოიცავს რეგულარულ ორმხრივ და მრავალმხრივ პოლიტიკურ დიალოგს, საკანონმდებლო ორგანოებს შორის თანამშრომლობას, შექმნილია საპარლამენტთაშორისო მეგობრობის ჯგუფები, როგორ შეაფასებთ ამ ურთიერთობებს და რას მიიჩნევთ მთავარ პრიორიტეტად საქართველოსთან ამ ურთიერთობებში? ისრაელსა და საქართველოს ყოველთვის შესანიშნავი ურთიერთობები ჰქონდათ და ამას ამტკიცებს ის აშკარა უზარმაზარი მხარდაჭერაც, რომელსაც დღევანდელი კონფლიქტის დაწყებიდან ვგრძნობთ ქართული საზოგადოებისგან. ამასთან, ჩემი აზრით, ძირითადი ყურადღება ეთმობა ჩვენს ბრწყინვალე 26 საუკუნოვან წარსულ, თანაარსებობის ისტორიას და კარგი იქნება, უფრო მეტი ძალისხმევა იქნას მიმართული, რომ ახალი ბიძგი მიეცეს ჩვენს ორმხრივ ურთიერთობებს. დიალოგები, მეგობრობის ჯგუფები და ორმხრივი ვიზიტები თავისთავად მნიშვნელოვანია, მაგრამ საბოლოო ჯამში, მათ პრაქტიკულ შედეგებამდე მიყვანა სჭირდებათ. ამჟამად, საქართველოსა და ისრაელს შორის სავაჭრო ბრუნვა (42 მილიონი აშშ დოლარი 2019 წელს) შემცირებულია და ინვესტიციების დონე საკმაოდ დაბალია. ამიტომ, ჩემთვის მთავარი პრიორიტეტია ისრაელის გამოცდილების გამოყენება, რათა ხელი შევუწყოთ საქართველოს მაღალტექნოლოგიურ ეკოსისტემას, ჩამოვაყალიბოთ შეთანხმებები, რომლებიც ხელს შეუწყობს ორმხრივ სავაჭრო ურთიერთობებს და ინვესტიციებს, სოფლის მეურნეობის, სამეცნიერო და სამრეწველო ერთობლივი საწარმოების შექმნას. გასულ თვეში (2021 წლის აპრილი) ისრაელიდან საქართველოში (თურქეთის შემდეგ) ყველაზე მეტი ვიზიტორი შემოვიდა. 2019 წელს ამ ქვეყანას 200,000-ზე მეტი ჩემი თანამემამულე ეწვია - ეს შემოსავლისა და სამუშაო ადგილების უზარმაზარი წყაროა საქართველოს ეკონომიკისთვის და ჩვენ უნდა გავაგებინოთ ისრაელელებს, რომ საქართველოს გაცილებით მეტი პოტენციალი აქვს, ვიდრე მხოლოდ ხაჭაპური, ხინკალი და კარგი ღვინო. _ისრაელი ვაქცინაციის კუთხით წამყვანი ქვეყანაა, გამოცდილების გაზიარების კუთხით ხომ არ იგეგმება დამატებით რაიმე პროგრამის/პროექტის განხორციელება. ვიცით, რომ ისრაელის საელჩომ და საერთაშორისო განვითარების სააგენტომ (MASHAV) დიდი ძალისხმევა გასწიეს, რათა დაეხმარონ საქართველოს COVID19-თან ბრძოლის პროცესში. პანდემიის დასაწყისიდან ისრაელის საელჩომ და MASHAV-მა დიდი დახმარება გაუწიეს ყველა შესაბამის ორგანოს, რომელიც საქართველოში COVID19-ის გავრცელებას ებრძვის. ჩვენ მხარი დავუჭირეთ NCDC (დაავადებათა კონტროლის ეროვნულ ცენტრს), საქართველოს წითელი ჯვრის საზოგადოებას და WHO (ჯანდაცვის მსოფლიო ორგანიზაციის) საქართველოს ოფისს. ჩვენ ასევე მოვიწვიეთ საზოგადოების ჯანდაცვის წამყვანი ქართველი ექსპერტები, რათ მონაწილეობა მიეღოთ MASHAV– ის მიერ ჩატარებულ საერთაშორისო ფორუმში, რაც ყოველკვირეულად, საუკეთესო გამოცდილების გაზიარებას ემსახურება. დამატებით, MASHAV– მა (რომელიც საქართველოში 1992 წლიდან საქმიანობს) ამ დროისთვის, 1500 - ზე მეტი ქართველის პროფესიულად გადამზადება უზრუნველყო, მათ შორის სოფლის მეურნეობის, ინოვაციების, მეწარმეობის, საზოგადოებრივი ჯანდაცვის სფეროების მიმართულებით. ჩვენ გავაგრძელებთ ჩვენი ქართველი მეგობრებისა და პარტნიორების მხარდაჭერას ამ რთულ პერიოდში.
ვოლოდიმირ ზელენსკი: უკრაინა აუცილებლად იქნება ევროკავშირში
"უკრაინა ევროპაა... უკრაინა აუცილებლად იქნება ევროკავშირში", - ამის შესახებ უკრაინის პრეზიდენტი ვოლოდიმირ ზელენსკი Twitter-ში წერს. "უკრაინა ევროპაა. ჩვენ ვართ ევროპელები, ევროპის ცენტრი და გული გეოგრაფიით, სულისკვეთებით, ღირებულებებითა და მისწრაფებებით. ჩვენ ეს დავამტკიცეთ მეიდანზე და ამას ვამტკიცებთ ყოველდღე, როდესაც ჩვენ ვცვლით ჩვენს სახელმწიფოს, ვქმნით დამოუკიდებლობას და ჩვენს მომავალს, ვიცავთ ევროპის აღმოსავლეთ საზღვარს. უკრაინა აუცილებლად იქნება ევროკავშირში", - წერს ზელენსკი.
კახა კუჭავა პირველი ოფიციალური ვიზიტით ბრიუსელში გაემგზავრება
საქართველოს პარლამენტის თავმჯდომარე კახა კუჭავა პირველი ოფიციალური ვიზიტით ბრიუსელში გაემგზავრება. კახა კუჭავას თქმით, ვიზიტის ფარგლებში დაგეგმილია ევროპარლამენტის პრეზიდენტთან შეხვედრაც. „ჩემთვის ძალიან მნიშვნელოვანია, რომ პირველი ოფიციალური ვიზიტი თავმჯდომარის რანგში ბრიუსელში გაიმართება. პირველ რიგში, მნიშვნელოვანია, რომ დელეგაციას გვექნება შეხვედრა ევროპარლამენტის პრეზიდენტთან, ბატონ სასონისთან. დარწმუნებული ვარ, იმ საინტერესო საუბრის შედეგებს, რომელსაც გამოვიტანთ, თქვენთვისაც და მოსახლეობისთვისაც იქნება საინტერესო. ასევე ვხვდებით სხვადასხვა პოლიტიკური ჯგუფის წარმომადგენლებს, აღმასრულებელი ხელისუფლების წარმომადგენლებს. დეტალებს ვიზიტიდან დაბრუნების შემდეგ მოგახსენებთ“, – განაცხადა კახა კუჭავამ.
ჯო ბაიდენმა ტრამპის მიერ გამოცემული რამდენიმე აღმასრულებელი ბრძანება გააუქმა
აშშ-ის პრეზიდენტმა, ჯო ბაიდენმა დონალდ ტრამპის პრეზიდენტობის პერიოდში გამოცემული რამდენიმე აღმასრულებელი ბრძანება გააუქმა. ამის შესახებ განცხადება თეთრი სახლის ვებ-გვერდზე გამოქვეყნდა. ბაიდენის გადაწყვეტილებით, გაუქმებულ გადაწყვეტილებებს შორის მოხვდა საიმიგრაციო საკითხები, ძეგლთა დაცვისა და ინტერნეტ-პლატფორმებისთვის დაწესებული შეზღუდვები. გაუქმდა ბრძანებულება, რომლის თანახმადაც ყველა პოტენციურ ემიგრანტს ევალებოდა მტკიცებულების წარმოდგენა, რომ მათ ამერიკის სამედიცინო დაზღვევის მისაღებად საჭირო პირობები აქვთ. როგორც თეთრი სახლის მიერ გამოქვეყნებულ განცხადებაშია მითითებული, რომ ტრამპის გადაწყვეტილება ამ საკითხთან დაკავშირებით "არ აკმაყოფილებდა შეერთებული შტატების ინტერესებს". ტრამპის მიერ 2019 წლის ოქტომბერი გამოცემული ბრძანების თანახმად, შეერთებულ შტატებში საიმიგრაციო ვიზით ჩასულ პირებს უწევდათ დაედასტურებინათ, რომ მათ სამედიცინო ხარჯებისთვის საკმარისი სახსრები ჰქონდათ. ასევე გაუქმდა დადგენილება "ინტერნეტში ცენზურის აღკვეთის შესახებ". გაუქმდა "ძეგლებისა და ქანდაკებების დაცვის შესახებ" ბრძანებაც, რომელსაც დონალდ ტრამპმა ხელი 2020 წლის 26 ივნისს მოაწერა და რომლის მიხედვითაც ვანდალური ქმედება სამართლებრივი დევნის საკითხი იყო. ბაიდენმა ასევე უარი თქვა ამერიკელი გმირების ეროვნული ბაღის შექმნის იდეაზეც.
ნათია თურნავა: მაისი-ივნისში ბათუმში ფრენებს ყაზახური, პოლონური, უკრაინული და არაბული ავიაკომპანიები განაახლებენ
ბათუმის განახლებულ საერთაშორისო აეროპორტში დღეს პირველი რეისი შეასრულა ყაზახურმა ავიაკომპანიამ „ეარ ასტანა“, რომელმაც რეგულარული რეისების შესრულება განაახლა ალმათი-ბათუმი-ალმათის მიმართულებით. ეკონომიკის სამინისტროს ინფორმაციით, პირველ რეისს 115 მგზავრი ჩამოყვა. ფრენები კვირაში სამი სიხშირით ყოველ ორშაბათს, ოთხშაბათსა და შაბათს შესრულდება. „ყაზახეთი საქართველოს ტურიზმისთვის ერთ-ერთი ყველაზე მზარდი მიმართულებაა. 2019 წელს ამ ქვეყნიდან 103,611 ვიზიტორს უმასპინძლა და ზრდამ წინა წელთან შედარებით 75.7 პროცენტი შეადგინა. ჩვენ იმედი გვაქვს, რომ ჩვენი სტუმრები ყაზახეთიდან უსაფრთხოდ შეძლებენ საქართველოში, მათ შორის, აჭარაში დასვენებას. საქართველოს ტურისტული სექტორი მზადაა, კოვიდ-რეგულაციების მკაცრი დაცვით მოემსახუროს ვიზიტორებს,“ – განაცხადა ეკონომიკისა და მდგრადი განვითარების მინისტრმა ნათია თურნავამ. მისი თქმით, ტურიზმი საქართველოს ეკონომიკის ერთ-ერთი ყველაზე მსხვილი სექტორია და მისი აღორძინება უმნიშვნელოვანესია ეკონომიკური ზრდის უზრუნველყოფისთვის. „პანდემიამ ეს დარგი ყველაზე მეტად დააზარალა. დღეს ჩვენ გვაქვს შესაძლებლობა, სწორი მარკეტინგით, მიზნობრივი პროგრამებითა და მასობრივი ვაქცინაციით, ხელი შევუწყოთ დარგის აღორძინებას,“ – აღნიშნა მინისტრმა. ბათუმის საერთაშორისო აეროპორტი უკვე 17 მაისიდან მიიღებს პირველ რეისს საუდის არაბეთიდან. ავიაკომპანია Flynas-ი საქართველოს მიმართულებით რეგულარულ ოპერირებას განაახლებს და თბილისთან ერთად, საქართველოში საუდის არაბეთიდან ტურისტებს ბათუმშიც ჩამოიყვანს. ივნისიდან ბათუმში რეგულარულ ფრენებს შეასრულებენ ავიაკომპანია LOT Polish Airlines-ი ვარშავა – ბათუმი – ვარშავის და ავიაკომპანია Ukraine International Airlines კიევი – ბათუმი – კიევის მიმართულებით.
კონოლის განცხადებით, NATO-მ უნდა განაგრძოს რუსული ოკუპაციის დაგმობა და მხარი დაუჭიროს საქართველოს დამოუკიდებლობას და ტერიტორიულ მთლიანობას
14 – 17 მაისს შვედეთის ორგანიზებით, NATO-ს საპარლამენტო ასამბლეის საგაზაფხულო სესია ონლაინ ფორმატში იმართება. სესიაში საქართველოს პარლამენტის დელეგაცია, ირაკლი ბერაიას ხელმძღვანელობით მონაწილეობს. ამის შესახებ ინფორმაციას საქართველოს პარლამენტი ავრცელებს. როგორც განცხადებაშია აღნიშნული, პირველ დღეს, სესიას სიტყვით მიმართა ასამბლეის პრეზიდენტმა, ამერიკელმა კონგრესმენმა ჯერალდ კონოლიმ, სადაც საქართველოსა და უკრაინის წინააღმდეგ რუსეთის აგრესიულ ქმედებებზე ისაუბრა. "კონგრესმენის განცხადებით, NATO-მ უნდა განაგრძოს რუსული ოკუპაციის დაგმობა, მხარი დაუჭიროს ქართველ მეგობრებს, საქართველოს დამოუკიდებლობას და ტერიტორიულ მთლიანობას. საქართველოში მიმდინარე პოლიტიკურ პროცესებთან დაკავშირებით, მან აღნიშნა, რომ მიესალმება მნიშვნელოვან პროგრესს, რომელიც ასრულებს პოლიტიკურ კრიზისს საქართველოში და კიდევ ერთხელ მოუწოდა მხარეებს სრულად შეასრულონ მიღწეული შეთანხმება. მან ასევე ისაუბრა ალიანსის „ღია კარის“ პოლიტიკაზე და ხაზგასმით აღნიშნა, რომ NATO-ს სამიტისგან საქართველოს და უკრაინას აქვთ დიდი მოლოდინი. გამოთქვა იმედი, რომ NATO-ს მოკავშირეების ლიდერები აღიარებენ საქართველოსა და უკრაინის პროგრესს, მიღწევებს და საბოლოოდ, ორივე ქვეყანა გახდება ალიანსის სრულუფლებიანი წევრი. დისკუსიის ფარგლებში, საპარლამენტო დელეგაციის წევრმა გიორგი ხელაშვილმა, ასამბლეის პრეზიდენტ დაუსვა კითხვა შავი ზღვის რეგიონის ქვეყნების - საქართველოსა და უკრაინის ალიანსის მოკავშირეებთან თანამშრომლობის გაძლიერების მიზნით პრაქტიკული ნაბიჯების შემუშავების შესახებ. ქართველი პარლამენტარის კითხვაზე პასუხად, კონგრესმენმა კონოლიმ განაცხადა, რომ იგი საქართველოს, უკრაინასა და ალიანსს შორის ინსტიტუციონალური ინტეგრაციის მომხრეა, რომ საქართველო აქტიურად მონაწილეობს NATO-ს ოპერაციებში და წვრთნებში და შესაბამისად, მოელის მეტ ინტეგრაციას NATO-სთან. მისი თქმით, NATO-ს საპარლამენტო ასამბლეა შეძლებს საქართველოსთან ერთად იმუშაოს იდეებზე, რომლებიც ხელს შეუწყობს შავი ზღვის რეგიონში NATO-ს წევრ და პარტნიორ სახელმწიფოებს შორის თანამშრომლობის გაღრმავებას. საპარლამენტო ასამბლეის სესიაზე სიტყვით გამოვიდა შვედეთის თავდაცვის მინისტრი პეტერ ჰულტკვისტი, რომელმაც ასევე მხარდამჭერი განცხადება გააკეთა საქართველოს მიმართ", - ნათქვამია განცხადებაში.
უკრაინა 2008 წლის ბუქარესტის სამიტზე NATO-ში უკრაინისა და საქართველოს გაწევრიანების შესახებ მიღებული დაპირების შესრულებას ითხოვს
უკრაინა დაჟინებით მოითხოვს დაპირების შესრულებას, რომელიც 2008 წელს, ბუქარესტში, NATO-ს სამიტის დროს, ალიანსში გაწევრიანებასთან დაკავშირებით მიიღო და ელოდება, რომ ივნისის სამიტზე MAP-სთვის გზა ხსნილი ექნება. ამის შესახებ ევროპული და ევროატლანტიკური ინტეგრაციის საკითხებში უკრაინის ვიცე-პრემიერმა, ოლგა სტეფანიშინამ უსაფრთხოების თემაზე ონლაინ-ფორუმზე სიტყვით გამოსვლისას განაცხადა. ინფორმაციას უკრაინული მედია ავრცელებს. "13 წელი გავიდა ბუქარესტის სამიტიდან, რომელზეც გადაწყდა, რომ უკრაინასა და საქართველოს მომავალში წევრობას მიანიჭებენ. ახლა, ასეთ ვითარებაში, ჩვენ დაჟინებით ვითხოვთ ამ დაპირების შესრულებას", - განაცხადა უკრაინის ვიცე-პრემიერმა. სტეფანიშინამ ხაზი გაუსვა, რომ NATO-მ უნდა მოახდინოს იმის დემონსტრირება, რომ რუსეთს ვეტოს უფლება არ აქვს ალიანსში. ოლგა სტეფანიშინა იმედს გამოთქვამს, რომ NATO-ს მომავალ სამიტზე დაპირება დადასტურებული იქნება და სამიტის განცხადება წევრობის სამოქმედო გეგმის, იგივე MAP-ის მინიჭების გზას დასახავს.
ISFED: ცესკოში სტრუქტურული რეორგანიზაცია ნაჩქარევად და დაუსაბუთებლად მიმდინარეობს
"ცესკოში 2021 წელს განხორციელებული სტრუქტურული რეორგანიზაციის პროცესი სათანადოდ დასაბუთებული არ არის და აჩენს განცდას, რომ რეორგანიზაცია ნაჩქარევად მიმდინარეობს, რასაც მოწმობს 5-მარტიდან - 14 მაისის პერიოდში, რეგლამენტში ორჯერ განხორციელებული ცვლილება და ახლად შექმნილი დეპარტამენტების მოკლე ვადაში კვლავ რეფორმირება", - ''სამართლიანი არჩევნები'' (ISFED) ცესკოში მიმდინარე რეორგანიზაციის პროცესს ეხმიანება და განცხადებას ავრცელებს. 2021 წლის 4 მარტს, საქართველოს ცენტრალურ საარჩევნო კომისიაში, თავმჯდომარის ბრძანების საფუძველზე, საარჩევნო კომისიის აპარატის რეორგანიზაციის პროცესი დაიწყო. 2021 წლის 5 მარტს, რეორგანიზაციის მიზნით, ცესკოს რეგლამენტში განხორციელებული ცვლილებებით, ჯამში, განისაზღვრა 11 დეპარტამენტი. ISFED-მა ცენტრალური საარჩევნო კომისიიდან გამოითხოვა ინფორმაცია იმის შესახებ, თუ რა სამართლებრივი საფუძვლებით დაიწყო მიმდინარე რეორგანიზაცია, თუმცა ცესკომ დასაბუთებული არგუმენტები ამ შემთხვევაშიც ვერ წარმოადგინა. "სამართლიანი არჩევნები" იმთავითვე დაინტერესდა ცესკოს აპარატში მიმდინარე რეორგანიზაციით. შესაბამისად, მიმართა ცესკოს და გამოითხოვა ინფორმაცია რეორგანიზაციის საჭიროებისა და სამართლებრივი საფუძვლების გამოკვლევის მიზნით. ასევე, დაინტერესდა საკადრო ცვლილებების საკითხით. საარჩევნო ადმინისტრაციისგან მიღებული პასუხი არ შეიცავდა სრულ ინფორმაციას დასმულ საკითხებთან დაკავშრებით და ზოგადი ფორმულირებით შემოიფარგლებოდა", - ნათქვამია ორგანიზაციის განცხადებაში. ISFED-ი გავრცელებულ განცხადებაში ეხმიანება "ქართულ ოცნებასა" და ოპოზიციური პარტიების ნაწილს შორის გაფორმებულ შეთანხმებასაც, რომელიც ცენტრალური საარჩევნო კომისიის რეფორმირებასაც მოიცავს. ორგანიზაციაში ფიქრობენ, რომ მიმდინარე პოლიტიკური პროცესების ფონზე, შესაძლოა, ცესკოში კიდევ ერთხელ დადგეს უფრო ფართო რეორგანიზაციის საჭიროება. " საქართველოს პარლამენტში ინიცირებულია კანონპროექტი, რომელიც ცესკოს ახლებურ დაკომპლექტებასა და გარკვეული საკითხების სხვაგვარად მოწესრიგებას ისახავს მიზნად, მათ შორის ისეთ მნიშვნელოვან თემებზე, როგორიც არის საარჩევნო პროცესში ელექტრონული ტექნოლოგიების დანერგვა და პილოტირება, საარჩევნო დავებთან დაკავშირებული საკითხების მოწესრიგება და სხვა. ამ ფონზე, მოსალოდნელია, რომ საარჩევნო რეფორმის კვალდაკვალ, საარჩევნო ადმინისტრაციაში უფრო ფართო სტრუქტურული ცვლილებების განხორციელების საჭიროება გაჩნდეს. გარდა ამისა, რეფორმის დასრულებამდე, ცესკოს არასრული შემადგენლობის მიერ მიღებული ნებისმიერი გადაწყვეტილება მოკლებული იქნება მაღალ ლეგიტიმაციას და, შესაბამისად, საზოგადოების ნდობას, მით უფრო, ოპოზიცური პარტიების მიერ დანიშნული წევრების არარსებობის პირობებში", - აღნიშნულია განცხადებაში. როგორც განცხადებაში ვკითხულობთ, "სამართლიანი არჩევნები“ მიიჩნევს, რომ მიზანშეუწონელია ცესკოს აპარატის სტრუქტურული ცვლილებები. "ნებისმიერი ინსტიტუციური გარდაქმნა უნდა განხორციელდეს ახალი საარჩევნო ადმინისტრაციის ფორმირების შემდეგ. შესაბამისად, ცენტრალურმა საარჩევნო კომისიამ, საარჩევნო რეფორმის დასრულებამდე უნდა შეაჩეროს მიმდინარე სტრუქტურული და საკადრო ცვლილებები, რადგან ეს, ერთი მხრივ, გაუგებარია მიმდინარე რეფორმის ფონზე, ხოლო მეორე მხრივ, მოკლებულია ლეგიტიმაციას ცესკოს სრულად დაკომპლექტებამდე",- ნათქვამია "სამართლიანი არჩევნების" განცხადებაში.
