პოლიტიკა
"რუსეთი კვლავ ცდილობს ხელი შეუშალოს საქართველოს დემოკრატიულ განვითარებას"
საქართველოს მომავალი უნდა გადაწყვიტოს საქართველოს მოსახლეობამ და არა კრემლმა, ევროპამ ან ამერიკამ. დამოუკიდებლობის მოპოვების შემდეგ, საქართველომ დაამტკიცა თავისი ერთგულება დემოკრატიული განვითარებისადმი და ის გახდა დემოკრატიული ქვეყნების გლობალური ოჯახის ღირებული წევრი, - ამის შესახებ ნატო-ს ყოფილმა გენერალურმა მდივანმა ანდერს ფოგ რასმუსენმა ვირტუალურ პრესკონფერენციაზე განაცხადა, სადაც არჩევნებში კეთილსინდისიერი მონაწილეობის შესახებ დათქმის პრეზენტაცია გაიმართა. მისივე განცხადებით, უკანასკნელ პერიოდში გამოქვეყნებული ბევრი ანგარიში ცხადყოფს, რომ რუსეთი კვლავ ცდილობს ხელი შეუშალოს საქართველოს დემოკრატიულ განვითარებას. რასმუსენის განმარტებით, რუსეთმა შექმნა სქემა, რომელიც არის დეზინფორმაციული და უკანონო ფინანსური ქმედებების, ასევე კიბერთავდასხმების კომბინაცია, ამის მიზანი კი დემოკრატიული პროცესების დელეგიტიმაციაა. „უკანასკნელი სამი წლის განმავლობაში გამოქვეყნებული რამდენიმე ანგარიშის თანახმად, ევროპაში დეზინფორმაციული აქტივობის დიდი ნაწილი რუსეთიდან მომდინარეობს. ფეისბუქმა მიზანმიმართულად წაშალა რუსეთის სამხედრო ძალებთან დაკავშირებული ქსელი, რომელიც ჩართული იყო კოორდინირებულ არავთენტურ ქმედებაში, რომელიც იყო მიმართული საქართველოს წინააღმდეგ. რუსეთმა შექმნა სქემა, რომელიც არის დეზინფორმაციული და უკანონო ფინანსური ქმედებების, კიბერთავდასხმების კომბინაცია. ამის მიზანი დემოკრატიული პროცესების დელეგიტიმაციაა. ჩვენ ვნახეთ, რომ რუსეთმა ეს სქემა გამოიყენა დემოკრატიულ სამყაროში მიმდინარე არჩევნებისა და რეფერენდუმების პროცესში, მათ შორის, ამერიკის შეერთებულ შტატებში, საფრანგეთში, ნიდერლანდებში, ავსტრალიაში, ჩრდილოეთ მაკედონიაში, ბრტანეთსა და სხვა ქვეყნებში. საქართველოს დემოკრატიული პროგრესი და მისი ევროატლანტიკური მისწრაფებები რუსეთს ხელს არ აძლევს, სწორედ ამიტომ, მოსკოვის სამიზნე ამჯერად საქართველოს მომავალი არჩევნებია“,- განაცხადა რასმუსენმა. მისი თქმით, არსებული გარემოებების გათვალისწინებით, ტრანსატლანტიკურმა კომისიამ წარმოადგინა დათქმა არჩევნებში კეთილსინდისიერი მონაწილეობის შესახებ. რასმუსენის განმარტებით, ეს არის გამჭვირვალე და ჯანსაღი საარჩევნო პროცესის გლობალური სტანდარი. მან საქართველოში არსებულ პოლიტიკურ პარტიებსა და კანდიდატებს დათქმაზე ხელისმოწერისკენ მოუწოდა. „იმის გათვალისწინებით, რომ პოლიტიკური ლიდერები და კანდიდატები არიან საერთაშორისო ჩარევის წინა ხაზზე, ჩვენმა კომისიამ მოიწვია ისინი, რათა ხელი მოაწერონ დათქმას. არჩევნებში კეთილსინდისიერი მონაწილეობის შესახებ დათქმის მიზანი არის საერთაშორისო ჩარევის რისკის შემცირება და საქართველოს დემოკრატიულობის მდგრადობის ზრდა საერთაშორისო გავლენების წინააღმდეგ. ამ დათქმით, ჩვენ ვთხოვთ კანდიდატებს, რომ ჩარევით დაინტერესებულ პირებს მტკიცედ განუცხადონ, რომ უარს ამბობენ პირდაპირ თუ არაპირდაპირ დახმარებაზე უცხო ქვეყნის მხრიდან. ეს არის დათქმა ნებისმიერი კანდიდატისთვის, რომელსაც სურს ღირსეული საარჩევნო კამპანიის წარმოება. ციფრულ დროს ეს ნიშნავს იმას, რომ კანდიდატებმა არ უნდა გამოიყენონ მონაცემები, რომლებიც შეიძლება იყოს მოპარული, ასევე არ უნდა გაავრცელონ გაყალბებული აუდიო ან ვიდეომესიჯები, როგორიც არის „ფეიკ ვიდეოები“ და უნდა იყო გულწრფელი თუ საიდან მოდის მათი კამპანიის დაფინანსება. საქართველოს ხუთმა პარტიამ უკვე მოაწერა ხელი დათქმას და ესენი არიან: „ქართული ოცნება“, „ევროპული საქართველო“, „სტრატეგია აღმაშენებელი“ და „ერთიანი საქართველო“ და „ლელო საქართველოსთვის“. რა თქმა უნდა, ვიმედოვნებთ, რომ უფრო მეტი პარტია შეუერთდება ჩვენს ინიციატივას, ამითი ისინი გააცხადებენ თავის პოზიციას, რომ მათი პრიორიტეტი საქართველოს დემოკრატიულობის დაცვაა“, - განაცხადა მან.
"საქართველო მზადაა უმასპინძლოს სომხეთ-აზერბაიჯანს შორის კონფლიქტის მონაწილეთა შეხვედრას თბილისში"
საქართველოს პრემიერ-მინისტრი გიორგი გახარია აზერბაიჯანსა და სომხეთს შორის მიმდინარე სამხედრო კონფლიქტთან დაკავშირებით განცხადებას ავრცელებს. გახარია განმარტავს, რომ საქართველო მზად არის, ნებისმიერი ფორმით შეუწყოს ხელი პროცესს, მათ შორის, დიალოგის გამართვის მიზნით, უმასპინძლოს კონფლიქტის მხარეების წარმომადგენელთა შეხვედრას თბილისში. „აზერბაიჯანსა და სომხეთს შორის მორიგი სამხედრო დაპირისპირების შედეგად შექმნილია მძიმე ვითარება, არის დიდი მსხვერპლი და სამწუხაროდ, საომარი მოქმედებების შეწყვეტა და დიალოგის განახლება ამ დრომდე ვერ ხერხდება. ყველას კარგად გვესმის, რომ ვითარების შემდგომი ესკალაცია უაღრესად ნეგატიურ გავლენას იქონიებს მთელი რეგიონის უსაფრთხოებაზე. კვლავ მოვუწოდებთ ეუთოს მინსკის ჯგუფის თანათავმჯდომარეებს და საერთაშორისო აქტორებს მაქსიმალურად გამოიყენონ თავისი შესაძლებლობები ესკალაციის შეწყვეტისა და დიალოგის განახლებისათვის. მოგეხსენებათ, ჩვენს ქვეყანას კეთილმეზობლური ურთიერთობები აკავშირებს ორივე ქვეყანასთან - აზერბაიჯანთან და სომხეთთან. ისტორიულად, საქართველოში მცხოვრები აზერბაიჯანელი და სომეხი ჩვენი მოქალაქეები, ყოველთვის დიდ როლს თამაშობდნენ როგორც ჩვენი ქვეყნის, ასევე, მთლიანად რეგიონის განვითარებასა და გაძლიერებაში. ამასთან, მათი მშვიდობიანი თანაცხოვრება კარგი მაგალითია, რომ ქართველებს, სომხებს და აზერბაიჯანელებს გვაქვს პოტენციალი მთლიანად სამხრეთ კავკასია ვაქციოთ მშვიდობისა და განვითარების სივრცედ. ჩვენი საერთო ინტერესია, რაც შეიძლება სწრაფად დამყარდეს მშვიდობა რეგიონში. საქართველო მზად არის, ნებისმიერი ფორმით შეუწყოს ხელი ამ პროცესს, მათ შორის, დიალოგის გამართვის მიზნით, უმასპინძლოს კონფლიქტის მხარეების წარმომადგენელთა შეხვედრას თბილისში“, - ნათქვამია გიორგი გახარიას განცხადებაში.
გაერო-ს უშიშროების საბჭო მთიანი ყარაბაღის კონფლიქტის მხარეებს დეესკალაციისა და მოლაპარაკებების განახლებისკენ მოუწოდებს
გაერო-ს უშიშროების საბჭოს წევრები მთიან ყარაბაღში, კონფლიქტის ხაზის გასწვრივ ფართომასშტაბიანი საბრძოლო მოქმედებების შესახებ ცნობების გამო შეშფოთებას გამოთქვამენ და გმობენ ძალის გამოყენებას მკაცრად გმობენ, - ამის შესახებ აღნიშნულია განცხადებაში, რომელიც გაერო-ს უშიშროების საბჭოს წევრების საგანგებო სხდომის შემდეგ გამოქვეყნდა. „საბჭოს წევრები მკაცრად გმობენ ძალის გამოყენებას და წუხილს გამოთქვამენ მშვიდობიან მოსახლეობაში მსხვერპლის გამო. უშიშროების საბჭოს წევრები მხარს უჭერენ გენერალური მდივნის მხარეებისადმი მოწოდებას, დაუყოვნებლივ შეწყდეს ბრძოლა, განიმუხტოს დაძაბულობა და დაუბრუნდნენ არსებით მოლაპარაკებებს,“- აღნიშნულია განცხადებაში. საბჭოს წევრები მხარეებს ეუთო-ს მინსკის ჯგუფის თანათავმჯდომარეებთან მჭიდრო თანამშრომლობისკენ მოუწოდებენ. „უშიშროების საბჭოს წევრები სრულ მხარდაჭერას გამოთქვამენ ეუთო-ს მინსკის ჯგუფის თანათავმჯდომარეთა ცენტრალური როლის მიმართ და მოუწოდებენ მხარეებს, მჭიდროდ ითანამშრომლონ მათთან წინაპირობების გარეშე დიალოგის დაუყოვნებლივ განახლებისთვის“, – ნათქვამია განცხადებაში.
ყარაბაღში შეიარაღებული დაპირისპირება გრძელდება
მეოთხე დღეა გრძელდება ბრძოლა მთიანი ყარაბაღისთვის. აზერბაიჯანის თავდაცვის სამინისტროს მიერ დილით გავრცელებული ინფორმაციით, სომხეთის შეიარაღებულმა ძალებმა ისევ მიიტანეს საარტილერიო იერიში ქალაქ ტერტერზე. სააგენტო „ტრენდი“ აზერბაიჯანის თავდაცვის სამინისტროზე დაყრდნობით წერს, რომ დაჭრილია 7 ადამიანი და დაზიანებულია ინფრასტრუქტურა. აზერბაიჯანული მხარის განცხადებით, 27 სექტემბრიდან განადგურებული და დაჭრილია სომხეთის შეიარაღებული ძალების 2300-მდე სამხედრო, განადგურებული, ან დაზიანებულია დაახლოებით 130 ტანკი და სხვა ჯავშანტექნიკა, 200-ზე მეტი საარტილერიო და სარაკეტო დანადგარი, 6 სამეთაურო პუნქტი და საბრძოლო მასალების 5 საწყობი. აზერბაიჯანი არაფერს იუწყება თავის სამხედრო ძალებში არსებული დანაკარგების შესახებ და მხოლოდ იმას აღნიშნავს, რომ 27 სექტემბრის შემდეგ 10 მშვიდობიანი მოქალაქე დაიღუპა და 30-მდე დაიჭრა. სომხეთის თავდაცვის სამინისტროს ინფორმაციით, ყარაბაღში, ფრონტის მთელ ხაზზე მიმდინარეობს ორმხრივი საარტილერიო იერიში. სამინისტროს პრესმდივნის, შუშან სტეპანიანის ინფორმაციით, სტეპანაკერტის თავზე ჩამოგდებულია აზერბაიჯანის არმიის კიდევ ორი უპილოტო საფრენი აპარატი. თავდაცვის სამინისტრო მუდმივად ავრცელებს ვიდეოჩანაწერებს, რომლებიც სომხური მხარის ინფორმაციით, მოწინააღმდეგეზე წარმატებულ შეტევებს ასახავს. მთიან ყარაბაღში საბრძოლო მოქმედებები 27 სექტემბერს განახლდა, რაშიც აზერბაიჯანი და სომხეთი ერთმანეთს ადანაშაულებენ. ორივე ქვეყანაში საომარი მდგომარეობაა გამოცხადებული. ფორმალურად სომხეთი კონფლიქტის მხარე არ არის, თუმცა, ღიად უჭერს მხარს მთიანი ყარაბაღის თვითგამოცხადებული რესპუბლიკის ხელისუფლებას. აზერბაიჯანმა ძირითადად სომხებით დასახლებულ მთიან ყარაბაღსა და მიმდებარე რაიონებზე კონტროლი 1990-იანი წლების დასაწყისში დაკარგა. 1994 წლის შემდეგ კონფლიქტი ფაქტობრივად, გაყინული იყო. ბოლო ხანს ცეცხლის შეწყვეტის რეჟიმი სულ უფრო ხშირად ირღვეოდ
თეა წულუკიანი თანამდებობას ტოვებს და საარჩევნო კამპანიაში ერთვება
საარჩევნო კამპანიაში ჩართვის გამო, თეა წულუკიანი საქართველოს იუსტიციის მინისტრის თანამდებობას ტოვებს. ამის შესახებ წულუკიანმა სამინისტროს საქმიანობის რვაწლიანი ანგარიშის წარდგენაზე განაცხადა. თეა წულუკიანი "ქართული ოცნების" საარჩევო სიის მეოთხე ნომერია. შესაბამისად, საარჩევნო კანონმდებლობის თანახმად, თეა წულუკიანი თანამდებობიდან უნდა გადადგეს, რათა საარჩევნო კამპანიაში ჩაერთოს.
სატელევიზიო დებატების დროს ჯო ბაიდენმა დონალდ ტრამპს "რასისტი და პუტინის ლეკვი" უწოდა
სატელევიზიო დებატების დროს ჯო ბაიდენმა დონალდ ტრამპს "რასისტი და პუტინის ლეკვი" უწოდა. დებატების დროს დონალდ ტრამპმა განაცხადა, რომ რასობრივ საკითხებთან დაკავშირებული ტრენინგები შეაჩერა, რადგან ტრენინგების დროს ადამიანებს არწმუნებდნენ, რომ ამერიკა საშინელი, რასისტული ქვეყანაა. რესპუბლიკელი ოპონენტის ამ განცხადების საპასუხოდ, ჯო ბაიდენმა მას რასისტი უწოდა. „ამას სხვა არავინ გააკეთებდა, ის უბრალოდ რასისტია. ეს პრობლემები ქვეყანაში არსებობს და ხალხმა უნდა იცოდეს, რა არის შეურაცხმყოფელი სხვებისთვის. დონალდ ტრამპი განსხვავებული კანის ფერის ადამიანებს ზემოდან უყურებს“, -განაცხადა მან. ამასთან, დებატების დროს ბაიდენმა ტრამპი რუსეთის გაკრიტიკებაზე უარის თქმაში დაადანაშაულა. „ტრამპის პრეზიდენტობისას ჩვენ უფრო სუსტი, ღარიბები და დაყოფილები გავხდით. ფაქტია, რომ პირისპირ ვხვდებოდი ვლადიმერ პუტინს და მკაფიოდ ვეუბნებოდი მას, რომ მისგან არაფერს მოვითმენთ. ტრამპი პუტინის ლეკვია. უარს ამბობს რამე უთხრას პუტინს იმაზე, რომ ავღანეთში ჩვენი ჯარისკაცების ლიკვიდირებაზე ჯილდო დააწესეს“, - განაცხადა ჯო ბაიდენმა.
მე-9 მოწვევის პარლამენტი ხვალ ბოლო პლენარულ სხდომას გამართავს, რითაც მუშაობას დაასრულებს
საქართველოს მე-9 მოწვევის პარლამენტი მუშაობას ასრულებს. საკანონმდებლო ორგანოს მოქმედი შემადგენლობით ბოლო პლენარული სხდომა ხვალ, 30 სექტემბერს გაიმართება. რეგლამენტის თანახმად, პარლამენტმა პლენარული სხდომების გამართვა არჩევნებამდე ერთი თვით ადრე უნდა შეწყვიტოს. მე-9 მოწვევის პარლამენტი მუშაობას 2016 წლის 18 ნოემბერს შეუდგა. საკანონმდებლო ორგანომ 4 წლის განმავლობაში ორი თავმჯდომარე გამოიცვალა. თავდაპირველად პარლამენტს „ქართული ოცნების“ ერთ-ერთი ლიდერი ირაკლი კობახიძე ხელმძღვანელობდა, თუმცა 2019 წლის ივნისის მოვლენებისა და ე.წ. გავრილოვის ღამის შემდეგ მან თანამდებობა დატოვა და პარლამენტის თავმჯდომარის პოსტი მმართველი გუნდიდან არჩილ თალაკვაძემ გადაიბარა. მე-9 მოწვევის პარლამენტმა მიიღო არაერთი კანონპროექტი, რომელთა შორისაა „საარჩევნო კოდექსში“ ცვლილებები, რითაც ქვეყანა დიდწილად პროპორციულ საარჩევნო სისტემაზე გადავიდა.
საქართველოში, სოციალურ-ეკონომიკური მდგომარების გაუმჯობესების მიზნით, 129 მილიონი ევროს შეთანხმება გაფორმდა
საქართველოს პრემიერ-მინისტრი გიორგი გახარია, ბრიუსელში, ევროპული სამეზობლო პოლიტიკისა და გაფართოების საკითხებში ევროკომისარ ოლივერ ვარჰეის შეხვდა. პრემიერის პრესსამსახურის ინფორმაციით, შეხვედრაზე საუბარი შეეხო COVID 19-ის გლობალური პანდემიის გამო შექმნილ გამოწვევებს და ხაზი გაესვა საქართველოსთვის ევროკავშირის მიერ გაწეული დახმარების მნიშვნელობას. საქართველოს მთავრობის მეთაურმა და ევროკომისარმა ვარჰეიმ ხელი მოაწერეს 2 საფინანსო შეთანხმებას რომელთა საერთო ბიუჯეტი 129 მილიონ ევროს შეადგენს და რომლის მიზანია კორონავირუსის გავრცელების შედეგად, საქართველოში არსებული სოციალურ-ეკონომიკური მდგომარების გაუმჯობესება. გიორგი გახარიამ განაცხადა, რომ ვიზიტის ფარგლებში „მდგრადობის კონტრაქტისა“ და „ინტეგრირებული ტერიტორიული განვითარების“ დოკუმენტების ხელმოწერა თბილისისა და ბრიუსელის განსაკუთრებული პარტნიორობის კიდევ ერთი დადასტურებაა. ევროკომისარმა ხაზი გაუსვა სატრანსპორტო და საკომუნიკაციო კავშირების, ეკონომიკის აღდგენისა და განვითარების გაძლიერებას. პრემიერ-მინისტრმა განსაკუთრებული ყურადღება გაამახვილა ევროკავშირთან ფიზიკური სატრანსპორტო და საკომუნიკაციო კავშირების განვითარების მნიშვნელობაზე არა მხოლოდ პოლიტიკური და ეკონომიკური, არამედ უსაფრთხოების მიმართულებით და აღნიშნა, რომ საქართველოს მოსახლეობის უმრავლესობა მხარს უჭერს საქართველოს ევროპულ და ევროატლანტიკურ ინტეგრაციას. ხაზგასმით აღინიშნა საქართველოს მნიშვნელოვანი როლი შავი ზღვის ფართო რეგიონში. შეხვედრისას პრემიერმა ისაუბრა ევროპული სტანდარტების შესაბამისად საქართველოს დემოკრატიულ განვითარებასა და რეფორმებზე, რომლითაც ქვეყანა რეგიონული ლიდერია. გიორგი გახარიამ ხაზი გაუსვა ახლახან განხორციელებულ საარჩევნო რეფორმას, რომლის შედეგად, ქვეყანა დემოკრატიული განვითარების ახალ საფეხურზე გადავიდა. მხარეებმა ისაუბრეს საქართველოს ოკუპირებულ ტერიტორიებზე არსებულ რთულ მდგომარეობასა და ადამიანის უფლებების დარღვევის ფაქტებზე. პრემიერ-მინისტრმა ოკუპაციაზე საუბრისას აღნიშნა, რომ არამხოლოდ ჩვენი ქვეყნის ტერიტორიების, არამედ მისი განვითარებისა და შესაძლებლობების 20%-ია ოკუპირებული. გიორგი გახარიამ ევროკავშირს ქვეყნის ტერიტორიული მთლიანობისა და სუვერენიტეტის მტკიცე მხარდაჭერისთვის მადლობა გადაუხადა. შეხვედრისას საუბარი ასევე შეეხო აღმოსავლეთ პარტნიორობის ფარგლებში ახალი ინიციატივების განხორციელებისა და ასოცირებულ პარტნიორებთან მიმართებაში ორმხრივ ურთიერთობებზე მეტი კონცენტრაციის მნიშვნელობას. აღინიშნა, რომ საქართველო აღმოსავლეთ პარტნიორობის ლიდერი ქვეყანაა. პრემიერმა საუბრისას ასევე ხაზი გაუსვა საჯარო სამსახურის რეფორმის მიმართულებით სახელმწიფოს მიერ მიღწეულ პროგრესს და განაცხადა, რომ ქვეყანაში ჩამოყალიბდა პოლიტიკურად ნეიტრალური საჯარო სამსახური და შესაბამისი ნაბიჯები გადაიდგა საკანონმდებლო დონეზეც, რაც კარგი მმართველობის ერთ-ერთი უმთავრესი შემადგენელი ნაწილია. ევროკომისიაში გამართულ შეხვედრას საქართველოს საგარეო საქმეთა მინისტრი დავით ზალკალიანი, ევროკავშირში საქართველოს მისიის ხელმძღვანელი, საქართველოს ელჩი ბელგიის სამეფოსა და ლუქსემბურგში ნატა საბანაძე და მთავრობის ადმინისტრაციის უფროსი ნათია მეზვრიშვილი დაესწრნენ.
„აქაური ქართველებისთვის, საქართველოს ხელისუფლების მხარდაჭერა უფრო თვალშესახები უნდა იყოს“ - ექსკლუზივი
საქართველოში, კორონავირუსის პირველი შემთხვევის გამოვლენისთანავე, დე ფაქტო მთავრობამ, ენგურის ხიდი ჩაკეტა. მას შემდეგ, გალში მცხოვრები ქართველი მოსახლეობა, საქართველოს მიერ კონტროლირებად ტერიტორიას სრულად მოწყვეტილია. ვირუსი, კონფლიქტის ზონაშიც ისევე გააქტიურდა, როგორც საქართველოს სხვა ტერიტორიაზე. გალის რაიონში, ამ ეტაპზე ორი სოფელი - საბერიო და ჩეღალია ჩაკეტილი. როგორ მიმდინარეობს ტესტირების პროცესი, როგორია საზოგადოებაში განწყობები, რა პრობლემები აწუხებს ამ ეტაპზე ადგილობრივ მოსახლეობას და რას სთხოვენ მთავრობას, „ევროპათაიმი“ გალის რაიონის სოფელ საბერიოს მკვიდრს, რ.ს.-ს ესაუბრა. „მოგეხსენებთად, კორონავირუსი ენგურჰესის რამდენიმე თანამშრომელს დაუდგინდა. ამ ეტაპზე ჰესში მხოლოდ ის ხალხი მუშაობს, რომელთა ადგილზე ყოფნაც ძალიან აუცილებელია. სხვა თანამშრომლები დისტანციურად მუშაობენ. ნაწილი კი სამკურნალოდაა გადაყვანილი. მას შემდეგ რაც საბერიო და ჩეღალი დაიკეტა, ჩეღალის საავადმყოფოში მოსახლეობის მასიური ტესტირება დაიწყო. ხალხი მოტივირებულია თავი დაიზღვიოს და ტესტირებაზე ზოგჯერ რიგიც კი დგას. საავადმყოფო როგორც ჩანს ქართული მხრის მიერ კარგადაა შესაბამისი ინვენტარით აღჭურვილი. რადგან ადგილობრივ „მთავრობას“ რესურსი საკუთარი თავისთვისაც არ აქვს. მეტიც, ვხედავთ, რომ საქართველოს მიერ კონტროლირებად ტერიტორიაზე სამკურნალოდ არა მარტო ქართველები, არამედ აფხაზებიც გადაჰყავთ“. რ.ს.-ს თქმით, სასწავლო პროცესი, საბერიოში მდებარე ორი სკოლიდან, ერთში, კერძოდ, ნომერ პირველ სკოლაში განახლდა, მეორე სკოლის მოსწავლეები კი დისტანციურ სწავლებაზე არიან გადასული. „ნომერ პირველ სკლაში გაკვეთილების და შესვენების ხანგრძლივობა შემცირებულია. სწავლის დაწყებამდე ყველა მოსწავლეს და პედაგოგს უტარდება თერმოსკრინინგი, სკოლას აქვს სადეზიფექციო საშუალებები“. რ.ს. როგორც სხვა დანარჩენი, ადგილობრივი მაცხოვრებელია და კონფლიქტის ზონაში ჩაკეტილი მოსახლეობის ყველაზე დიდ პრობლემად, „ჩაკეტილ საზღვარს“ ასახელებს. „ყველაზე დიდი პრობლემა ენგურის ე.წ. გამშვები პუნქტია, რომელიც უკვე რამდენიმე თვეა ჩაკეტილია და მოსახლეობას უამრავ პრობლემას უქმნის. აქაურ ხალხს, არავის დახმარება არ სჭირდება, იმდენად ბრძოლისუნარიანები არიან, ისინი თავის თავს ძალიან კარგად მიხედავენ და არც არავის სთხოვენ დახმარებას, მთავარია გზა გაიხსნას. მხოლოდ ამას ითხოვს ადგილობრივი მოსახლეობა. მოგეხსენებათ, აქაურები საკვებ პროდუქტებსა და სხვა საჭირო/აუცილებელ ინვენტარს, ძირითადად ზუგდიდის ბაზარში ყიდულობდნენ. ახლა მთელი მასა გალის ბაზარს მიაწყდა, რადგა სხვა გზა არ არსებობს. მაშინ, როცა გალის ბაზარიც კი ზუგდიდიდან მარაგდებოდა, ბევრი პროდუქტის დეფიციტი შეიქმნა. ამას ემატება კატასტროფული სიძვირე. მოგეხსენებათ აქ რუსული რუბლია ბრუნვაში. შედარებისთვის მაგ:. კარტოფილი სამ-ოთხ ლარი ღირს, ყველი 20-25 ლარი. არანაკლები პრობლემაა მედიკამენტები. ერთადერთი ავტომანქანა, რომელიც კვეთს ენგურის ხიდს, ამ ჩაკეტილობის პერიოდში, ენგურჰესის მომსახურე ავტობუსია, რომელსაც ცვლა გაყავს და გამოყავს. უნდა ნახოთ, რამდენი ადამიანის ნუგეში არის ეს ავტობუსი, რომელსაც აქაურებისთვის საკვები პროდუქტები, აუცილებელი მედიკამენტები თუ სხვა პირველადი მოხმარების საგნები შემოაქვს. ამ ეტაპზე, კოვიდ ინფიცირებულთა რიცხვის მატების გამო, ეს ავტობუსები არ მოძრაობენ. აქვე მინდა გამოვიყენო ეს პლათფორმა და დიდი მადლობა ვუთხრა ,ენგურჰესის დირექტორთა საბჭოს თავმჯდომარეს ბატონ ლევან მებონიას, იმ დიდი თანადგომისთვის, რასაც გრძნობს საბერიოს მოსახლეობა მისგან. აგრეთვე მადლობა აქ მომუშავე ექიმებს, სამედიცინო დებს, სასწრაფო სამედიცინო სამსახურს, ენგურჰესის კუთვნილი ავტობუსების მძღოლებს“. მოსახლეობის პრობლემების ჩამონათვალშია სოციალური დახმარებების საკითხი, რაც მათი ძირითადი საარსებო წყაროა. „მოგეხსენებათ აქაური მოსახლეობის უმეტესობა ხანდაზმულია, ამიტომ ძირითადი შემოსავლის წყარო სოციალური შემწეობებია. გალის მოსახლეობისთვის ძალიან რთული თემაა კუთვნილი პენსიის მიღება. როგორც ამბობენ, გალში მათ ბანკში შეუძლიათ პენსიის აღება, მაგრამ პროცენტი არის მაღალი. ბევრი ამასაც ვერ ახერხებს, ამიტომ უწევთ მინდობილობით, დანარჩენ საქართველოში მცხოვრები ნათესავებს ააღებინონ კუთვნილი პენსიები და რაღაც მანქანებით მოაწოდონ გალში, რომელიც უდიდეს სირთულეებთან არის დაკავშირებული“.სეზონური პრობლემების ჩამონათვალში მოხვდა თხილის მოსავლის აღებისა და გაყიდვის საკითხი. „თუ ზუგდიდში მუშახელი 35 ლარი ღირს, აქ 45 ლარზე ნაკლებ ვერ იშოვი თხილის მოსაგროვებლად დამხმარეს. თუ ზუგდიდში 8 ლარი ღირს თხილი, აქ 2,5 ლარით ნაკლებია. გადატანის შანსი დღეს საერთოდ არ არის, ადრე კი ალბათ ემახსოვრება ხალხს, გარკვეული თანხის გადახდა უწევდათ, ზოგს კი საერთოდ არ უღირდა გადატანა. ახლა ადგილზე თხილის ძირითადი ბაზარი რუსეთია. ხალხი იძლებულია იმ ფასში გაყიდოს, რა ფასიც ადგილობრივ ბაზარზე დაწესდება, რადგან სხვა შემოსავალი აქაურებს არ აქვთ“. რ.ს. თვლის რომ ადგილობრივ მოსახლეობას, მმართველი მთავრობისგან მეტი ხმამაღალი მხარდაჭერა სჭირდება. „ცნობილია რომ აფხაზურმა მხარემ ამ ჩაკეტილობის პერიოდში, რამდენჯერმე გახსნა ცალმხრივად ენგურის ხიდი და დანარჩენ საქართველოში მყოფ, აფხაზეთში მცხოვრებ ადამიანებს მიეცათ საშუალება, უკან სახლებში დაბრუნებულიყვნენ. ბევრი მხოლოდ სასოფლო-სამეურნეო სამუშაოებისთვის შემოვიდა. ახლა როცა უკან, ოჯახებში უნდათ, დაბრუნება სახიფათო გზებით უწევთ, რომელიც ხშირად სამწუხაროდ, ფატალურად სრულდება. გვესმის სიტუაციის სირთულე, მაგრამ აქაურმა ქართველმა, თავი მიტოვებულად არ უნდა იგრძნოს! უფრო ხმამაღალი და თვალშესახები უნდა იყოს საქართველოს ცენტრალური ხელისუფლების მხარდაჭერა აქაური ქართველობისთვის! ვფიქრობ, დროა დიალოგი განახლდეს, რომელიც ფაქტიურად 2008 წლის შემდეგ შეწყვეტილია. საჭიროა დიალოგი, მითუმეტეს, როდესაც დღეს აფხაზეთის მმართველი ელიტაც, გამოტქვამს ამის სურვილს. არის ბევრი თემა, რომელზეც საჭიროა დიალოგი. მაგალითად, ეკონომიკური და განათლების თემები. გალის მოსახლეობის უფლებებზე დეკლარირების დონეზე გვესმის აქაური მმართველებებისგან. მაგალითად, რომ გალის რაიონის მოსახლეობა, არ უნდა იხდიდეს უფრო მეტ მიწის გადასახადს, ვიდრე დანარჩენი აფხაზეთის მოსახლეობა, რომ ვერ დაუშლიან ქართველ ბავშვებს სასწავლებლად დანარჩენ საქართველოში წასვლას, რომ გალში აპირებენ გახსნან აფხაზეთის ე.წ.პრეზიდენტის საზოგადოებრივი მისაღები და.ა.შ. ზემოთ ჩამოთვლილიდან გამომდინარე, ვფიქრობ დროა განახლდეს დიალოგი. დამერწმუნეთ ეს დროის მოთხოვნაა“. ცნობისთვის, დღეს გალის რაიონის ქართველი მოსახლეობისთვის ორი სახის საბუთი მოქმედებს. ესაა ე.წ. ბინადრობის მოწმობა და ე.წ. ფორმა 9, რომელიც ყოველთვიურად უნდა ცვალო. „ძირითადად ეს ორი საბუთია. არის კიდევ ენგურჰესის სპეც საშვი, თუმცა ეს მხოლოდ თანამშრომლებისთვისაა. ბინადრობის უფლებით სარგებლობისთვის, აუცილებელია საქართველოს პირადი მოწმობის წარდგენა. საუბარია შეცვლაზეც, მაგრამ რითი შეიცვლება, ჯერ არავინ იცის. აქ მუდმივად მიდის საუბარი საბუთების ცვლილებებზე და პროგნოზირება, როდის რითი შეიცვლება, არავინ იცის. საუბარი იყო აფხაზური პასპორტების გაცემაზე, მაგრამ ორმაგი მოქალაქეობა არ აქვთ, შესაბამისად, საკუთარ თავთან მოდიან წინააღმდეგობაში, ამიტომ არ ვიცი ეს რა ფომით მოხერხდება. ფორმა 9 ყოველ თვეში უნდა შეცვალო. სხვათაშორის, როცა ჰუმანიტარული კორიდორი გაიხსნა, ვადაგასული საბუთით შემოუშვეს ხალხი, იმის გათვალისწინებით, რომ ფიზიკურად შეცვლას ვერ მოახერხებდნენ. ასეთი შეღავათებიც კეთდება, ამიტომ არაფერი არ უნდა დავკარგოთ და მაქიმალურად გამოვიყენოთ. ვიმეორებ, მთავარია აქაურმა ქართველმა თავი მიტოვებულად არ იგრძნოს, თორემ სხვა მხრივ აქაური ქართველობა ძალიან შრომისმოყვარე, ამტანი და გამტანია!“ სპეციალურად "ევროპეთაიმისთვის"
თურქეთი: "სომხეთმა აზერბაიჯანის მიწები უნდა დატოვოს - აზერბაიჯანის გვერდით ვდგავართ"
თურქეთის საგარეო საქმეთა მინისტრი მევლუთ ჩავუშოღლუ აცხადებს, რომ მთიანი ყარაბაღის კონფლიქტის გადაჭრის ერთადერთო გზა სომხეთის მიერ აზერბაიჯანის ტერიტორიის დატოვებაა. „არსებობს ამ პრობლემიდან ერთადერთი გამოსავალი - სომხეთმა აზერბაიჯანის მიწები უნდა დატოვოს. სანამ ეს არ მოხდება, პრობლემა არ გადაიჭრება,“- აღნიშნა თურქეთის საგარეო უწყების ხელმძღვანელმა. მისივე თქმით, თურქეთს მთიანი ყარაბაღის კონფლიქტის გადაჭრა სურს და ის აზერბაიჯანის გვერდით დგას. „ჩვენ ამ კონფლიქტის გადაჭრა გვსურს. აზერბაიჯანის გვერდით ვდგავართ როგორც ბრძოლის ველზე, ასევე მოლაპარაკებების მაგიდასთან,“- აღნიშნა მევლუთ ჩავუშოღლუმ.
"ვიმედოვნებთ, 31 ოქტომბრისთვის დაგეგმილი საპარლამენტო არჩევნები დემოკრატიის უმაღლესი სტანდარტების შესაბამისად ჩატარდება"
ნატო–ს გენერალური მდივანი იენს სტოლტენბერგი იმედს გამოთქვამს, რომ საქართველოში 31 ოქტომბრისთვის დაგეგმილი საპარლამენტო არჩევნები დემოკრატიის უმაღლესი სტანდარტების შესაბამისად ჩატარდება. "ჩვენ მივესალმებით იმ პროგრესს, რომელსაც საქართველომ რეფორმების მიმართულებით მიაღწია. თქვენმა ქვეყანამ უკვე მიაღწია კარგ პროგრესს დემოკრატიის გაძლიერების კუთხით. მოგიწოდებთ გამოიყენოთ ყველა შესაძლებლობა, რათა კიდევ უფრო დაუახლოვდეთ ნატო–ს და მოემზადოთ წევრობისთვის. ვიმედოვნებთ, საქართველო ჩაატარებს საერთაშორისო სტანდარტების შესაბამის არჩევნებს,. ეს მნიშვნელოვანია საქართველოსთვის და ნატოს–თვის", – განაცხადა სტოლტენებრმა.
"მოვუწოდებთ რუსეთს, აფხაზეთისა და „სამხრეთ ოსეთის“ რეგიონების აღიარება შეწყვიტოს და ჯარი გაიყვანოს"
"მოვუწოდებთ რუსეთს, აფხაზეთისა და „სამხრეთ ოსეთის“ რეგიონების აღიარება შეწყვიტოს და ჯარი გაიყვანოს", - ამის შესახებ ნატოს გენერალურმა მდივანმა იენს სტოლტენბერგმა საქართველოს პრემიერ-მინისტრ გიორგი გახარიასთან შეხვედრის შემდეგ გამართულ ერთობლივ პრესკონფერენციაზე განაცხადა. იენს სტოლტენბერგმა ხაზი გაუსვა, რომ ნატო მხარს უჭერს საქართველოს ტერიტორიულ მთლიანობას. „ნატო მხარს უჭერს საქართველოს ტერიტორიულ მთლიანობასა და სუვერენიტეტს მის საყოველთაოდ აღიარებულ საზღვრებში. მოვუწოდებთ რუსეთს, შეწყვიტოს აფხაზეთისა და „სამხრეთ ოსეთის“ რეგიონების აღიარება და გაიყვანოს საკუთარი ჯარი. “ - აღნიშნა ნატო-ს გენერალურმა მდივანმა. მისივე თქმით, ნატო მიესალმება საქართველოს მიერ მიღწეულ პროგრესს. „მივესალმებით პროგრესს, რასაც საქართველო რეფორმების განხორციელების კუთხით აღწევს. თქვენმა ქვეყანამ შეიარაღებული ძალების მოდერნიზებისა და დემოკრატიის გაძლიერების კუთხით მნიშვნელოვან პროგრესს მიაღწია და მოგიწოდებთ, გააგრძელოთ თქვენი ყველა შესაძლებლობის გამოყენება იმისთვის, რომ ნატოს კიდევ უფრო დაუახლოვდეთ და მისი წევრობისთვის მოემზადოთ. საქართველო ნატოს ერთ-ერთი ყველაზე მნიშვნელოვანი პარტნიორია, ჩვენ შეგვიძლია ყველამ ვიამაყოთ იმით, რასაც ერთად ვაკეთებთ და თქვენ შეგიძლიათ იამაყოთ იმით, რასაც ჩვენი ერთობლივი უსაფრთხოებისთვის აკეთებთ“,- აღნიშნა სტოლტენბერგმა.
გაერთიანებული სამეფოსა და კანადის საგარეო საქმეთა მინისტრები სომხეთსა და აზერბაიჯანს საომარი მოქმედებების შეწყვეტისკენ მოუწოდებენ
გაერთიანებული სამეფოსა და კანადის საგარეო საქმეთა მინისტრებმა, დომინიკ რააბმა და ფრანსუა-ფილიპ შამპანმა, ერთობლივი განცხადება გაავრცელეს, სადაც მთიან ყარაბაღში შექმნილი ვითარების გამო შეშფოთება გამოხატეს და მხარეებს ცეცხლის დაუყოვნებლივ შეწყვეტისკენ მოუწოდეს. „კანადა და გაერთიანებული სამეფო შეშფოთებულები არიან მთიანი ყარაბაღის კონფლიქტის ზონის ურთიერთშეხების ხაზზე მიმდინარე ფართომასშტაბიანი სამხედრო მოქმედებების გამო. ასევე ძალიან შემაშფოთებელია ინფორმაცია იმის შესახებ, რომ მშვიდობიანი მოქალაქეები იღუპებიან. მოვუწოდებთ მხარეებს საომარი მოქმედებების დაუყოვნებლივ შეწყვეტისკენ, ცეცხლის შეწყვეტის შესახებ შეთანხმების პატივისცემისა და მშვიდობიანი მოქალაქეების დაცვისკენ. კონფლიქტის გადაჭრა შესაძლებელია მხოლოდ მშვიდობიანი მოლაპარაკების გზით მინსკის ეუთოს ჯგუფის ფორმატში. ჩვენ მხარს ვუჭერთ ეუთოს მინსკის ჯგუფის მუშაობას“, - ნათქვამია დომინიკ რააბისა და ფრანსუა-ფილიპ შამპანის ერთობლივ განცხადებაში. შეგახსენებთ, მთიან ყარაბაღში სომეხ და აზერბაიჯანელ სამხედროებს შორის შეიარაღებული დაპირისპირება 27 სექტემბერს დაიწყო, რის შედეგადაც ათობით ადამიანი დაიღუპა და 200-ზე მეტი დაშავდა. დაღუპულებსა და დაშავებულებს შორის მშვიდობიანი მოქალაქეებიც არიან. მხარეები ცეცხლის გახსნასა და სიტუაციის ესკალაციაში ერთმანეთს ადანაშაულებენ.
გერმანიის მთავრობა სომხეთსა და აზერბაიჯანს ცეცხლის შეწყვეტისკენ მოუწოდებს
გერმანიის ფედერალური მთავრობა სომხეთსა და აზერბაიჯანს ცეცხლის შეწყვეტისა და დიალოგის დაწყებისკენ მოუწოდებს. მედიის ინფორმაციით, მთავრობის პრესსპიკერმა შტეფან ზიბერტმა მთიან ყარაბაღში მიმდინარე მოვლენები „უკიდურესად სახიფათო სიტუაციად“ შეაფასა და ხაზი გაუსვა მოლაპარაკებების დაუყოვნებლივ დაწყების აუცილებლობას. შეგახსენებთ, მთიან ყარაბაღში სომეხ და აზერბაიჯანელ სამხედროებს შორის შეიარაღებული დაპირისპირება 27 სექტემბერს დაიწყო, რის შედეგადაც დღემდე ათობით ადამიანი დაიღუპა და 200-ზე მეტი დაშავდა. დაღუპულებსა და დაშავებულებს შორის მშვიდობიანი მოქალაქეებიც არიან. მხარეები ცეცხლის გახსნასა და სიტუაციის ესკალაციაში ერთმანეთს ადანაშაულებენ.
"ჩვენი მეზობლების საშინაო საქმეებში არასდროს ვერევით"
რუსეთი არასდროს ერევა საკუთარი მეზობლების, და საერთოდ სხვა ქვეყნების, საშინაო საქმეებში, - რუსული მედიის ინფორმაციით, ამის შესახებ რუსეთის პრეზიდენტმა ვლადიმერ პუტინმა ყირგიზეთის პრეზიდენტ სოორონბაი ჟეენბეკოვთან შეხვედრაზე განაცხადა. შეხვედრაზე ყირგიზეთის პრეზიდენტმა აღნიშნა, რომ ქვეყანაში საპარლამენტო არჩევნების წინ „სხვადასხვა ძალები გააქტიურდნენ", რომლებიც ეწინააღმდეგებიან სტაბილურობას და განვითარებას და საფრთხეს უქმნიან რესპუბლიკის სუვერენიტეტს. „იცით, რომ ზოგადად, ჩვენ არასდროს ვერევით ჩვენი მეზობლების და საერთოდ სხვა ქვეყნების შიდა საქმეებში, მაგრამ ყოველთვის მხარს ვუჭერთ მოქმედი ხელისუფლების მცდელობას, დაასტაბილუროს სიტუაცია “, - აღნიშნა პუტინმა. ყირგიზეთში საპარლამენტო არჩევნები 4 ოქტომბერს ტარდება.
აზერბაიჯანში სპეციალური საკარანტინო რეჟიმი 2 ნოემბრამდე გახანგრძლივდა
აზერბაიჯანში კორონავირუსთან დაკავშირებული სპეციალური საკარანტინო რეჟიმი 2 ნოემბრის 06:00 საათამდე გახანგრძლივდა, - აზერბაიჯანული მედიის ინფორმაციით, შესაბამისი გადაწყვეტილება დღეს ქვეყნის მთავრობამ მიიღო. გადაწყვეტილების თანახმად, აღნიშნულ პერიოდში, შაბათ-კვირას არ იმოძრავებს საზოგადოებრივი ტრანსპორტი და დედაქალაქის მეტრო. ცნობისთვის, ბოლო 24 საათში აზერბაიჯანში კორონავირუსის 38 ახალი შემთხვევა დადასტურდა და ინფიცირებულთა რაოდენობა 40 061-მდე გაიზარდა, გარდა ამისა კოვიდ 19-ს კიდევ 2 ადამიანის სიცოცხლე ემსხვერპლა და დაღუპულთა რიცხვმა 588-ს მიაღწია.
"სომხეთმა მის მიერ ოკუპირებული აზერბაიჯანის მიწები უნდა დატოვოს"
სომხეთმა მის მიერ ოკუპირებული აზერბაიჯანის მიწები უნდა დატოვოს, - ამის შესახებ თურქეთის პრეზიდენტმა რეჯეფ თაიფ ერდოღანმა განაცხადა. მისივე თქმით, აუცილებელია, დამთავრდეს კრიზისი, რომელიც სომხეთის მიერ მთიანი ყარაბაღის ოკუპაციის გამო დაიწყო. „აზერბაიჯანის მიწების სომხებისგან გათავისუფლება რეგიონში მშვიდობისა და სტაბილურობის დამყარებას გაუხსნის გზას“-, აღნიშნა თურქეთის პრეზიდენტმა. შეგახსენებთ, მეორე დღეა მთიან ყარაბაღში სომეხ და აზერბაიჯანელ სამხედროებს შორის შეიარაღებული დაპირისპირება მიმდინარეობს. მხარეები მძიმე არტილერიის გამოყენებაში ერთმანეთს ადანაშაულებენ. დაპირისპირების შედეგად დაღუპულებსა და დაშავებულებს შორის მშვიდობიანი მოქალაქეებიც არიან.
სომხეთი მთიანი ყარაბაღის დამოუკიდებლობის საკითხს არ გამორიცხავს
სომხეთი მთიანი ყარაბაღის დამოუკიდებლობის საკითხს არ გამორიცხავს. ამის შესახებ ქვეყნის პრემიერ-მინისტრმა ნიკოლ ფაშინიანმა პარლამენტში რიგგარეშე სხდომაზე სიტყვით გამოსვლისას განაცხადა. „ჩვენ ძალიან სერიოზულად უნდა განვიხილოთ ეს საკითხი. შეიძლება დაიწყოს ფართო საზოგადოებრივი დისკუსიებიც. ჩვენ მოვლენათა ყველა შესაძლო სცენარით განვითარებას განვიხილავთ. ეს საკითხი მოლაპარაკებების მაგიდაზე გადაინაცვლებს“, - აღნიშნა ფაშინიანმა პარტია "გაბრწყინებული სომხეთის“ ლიდერის, დეპუტატ ედმონ მარუკიანის კითხვაზე პასუხისას. ამასთან დაკავშირებით, ფაშინიანმა „ტვიტერზეც“ დაწერა, რომ სომხეთი მთიანი ყარაბაღის ტერიტორიაზე არცახის „უსაფრთხოებისა და დამოუკიდებლობის გარანტორია“. „დღეს სომხეთი არცახის გვერდით დგას მისი სრული სახელმწიფო პოტენციალითა და მოსახლეობით. ჩვენ ძალისხმევას არ დავიშურებთ, რათა უზრუნველვყოთ სამშობლოს საზღვრების უსაფრთხოება, დავიცვათ ჩვენი თავისუფლება და დამოუკიდებლობა“, - აღნიშნა ფაშინიანმა.
გაერო-ს გენერალური მდივანი მთიანი ყარაბაღის კონფლიქტის მხარეებს მოუწოდებს, დაუყოვნებლივ შეწყვიტონ ბრძოლა
გაერო-ს გენერალური მდივანი ანტონიო გუტერეში მთიანი ყარაბაღის კონფლიქტის ზონაში სიტუაციის გამწვავებას ეხმიანება. როგორც გაერო-ს ოფიციალურ გვერდზე გამოქვეყნებულ განცხადებაშია ნათქვამი, გენერალური მდივანი „უკიდურესად არის შეშფოთებული მთიანი ყარაბაღის კონფლიქტის ზონაში საკონტაქტო ხაზთან საომარი მოქმედებების განახლების გამო“. გუტერეში გმობს ძალის გამოყენებას და წუხილს გამოთქვამს მშვიდობიანი მოსახლეობის დაღუპვასთან დაკავშირებით. გაერო-ს გენერალური მდივანი მტკიცედ მოუწოდებს მხარეებს, დაუყოვნებლივ შეწყვიტონ ბრძოლა, განმუხტონ დაძაბულობა და დაუბრუნდნენ მოლაპარაკებებს. ანტონიო გუტერეში სრულ მხარდაჭერას გამოხატავს ეუთო-ს მინსკის ჯგუფის თანათავჯდომარეების მიერ შესრულებული როლის მიმართ და მხარეებს მათთან მჭიდრო თანამშრომლობისკენ მოუწოდებს, რათა სასწრაფოდ აღდგეს დიალოგი ყოველგვარი წინაპირობის გარეშე.
აზერბაიჯანში საომარი მდგომარეობა ამოქმედდა
აზერბაიჯანის მთელ ტერიტორიაზე 28 სექტემბრიდან საომარი მდგომარეობა ამოქმედდა. შესაბამის ბრძანებას ხელი აზერბაიჯანის პრეზიდენტმა ილჰამ ალიევმა მოაწერა. აზერბაიჯანის პრეზიდენტის თანაშემწემ ჰიქმეთ გაჯიევმა აღნიშნა, რომ 28 სექტემბრიდან აზერბაიჯანის ტერიტორიის ნაწილზე კომენდანტის საათი დაწესდება ადგილობრივი დროით საღამო 9:00 საათიდან დილის 6:00 საათამდე. რეჟიმი იმოქმედებს ბაქოში, განჯაში, სუმგაითში, ევლახში, მინგეჩაურში, ნაფთალანში და კიდევ 16-მდე რაიონის ტერიტორიაზე. კომენდანტის საათის პერიოდში მოქალაქეებს ეკრძალებათ ქუჩაში და სხვა საზოგადოებრივი თავშეყრის ადგილებში ყოფნა სპეციალური ნებართვის და პირადობის დამადასტურებელი დოკუმენტების გარეშე.
