ეკონომიკა
კონგრესმენი ალექს მუნი: ამერიკა-საქართველოს შორის თავისუფალი სავაჭრო ურთიერთობა კარგი პერსპექტივა და შესაძლებლობაა
Europetime-მა ამერიკელი კონგრესმენი ალექს ქსავიერ მუნი ექსკლუზიურად ჩაწერა. კონგრესმენმა აშშ-სთან თავისუფალი ვაჭრობის შეთანხმების განხორციელების პერსპექტივაზე ისაუბრა და აღნიშნა, რომ ამ საკითხზე მუშაობა მიმდინარეობს. „მე ვფიქრობ, ეს კარგი პერსპექტივაა, რადგან თავისუფალი ვაჭრობა არის ის, რაც უკვე ხდება მსოფლიოში. ვფიქრობ, ჩვენს ქვეყნებს შორის თავისუფალი ვაჭრობა კარგი შესაძლებლობაა“, - განუცხადა ალექს ქსავიერ მუნმა Europetime-ს. რაც შეეხება პირდაპირი ამერიკული ინვესტიციების საკითხს, განსაკუთრებით დიდ ინფრასტრუქტურულ პროექტებში, მაგალითად, პორტებში. ალექს ქსავიერ მუნი აცხადებს, რომ ეს ამერიკის ინტერესებშია. „მე ვფიქრობ, რომ ამერიკის ინტერესებშია, მსოფლიოს ინტერესებშია ასეთი ინვესტიცია“, - აღნიშნა ამერიკელმა კონგრესმენმა Europetime-თან. დღესვე ცნობილი გახდა, რომ ამერიკელი კონგრესმენები ამ თემებზე 7 სექტემბერს გამართულ შეხვედრაზე ელჩსაც ესაუბრნენ. „კმაყოფილი დავრჩი, როცა ვნახე, რომ დღეს, ამერიკის შეერთებული შტატების კონგრესმა, კერძოდ, ასიგნებების კომიტეტმა, მიიღო შესწორება, რომელშიც საუბარია საქართველოს მხარდაჭერაზე, მსგავსად „საქართველოს მხარდამჭერი აქტისა“, რომელსაც ჩვენც ვიზიარებთ, რათა საქართველოს მხარი დავუჭიროთ რუსეთის აგრესიის წინააღმდეგ და ასევე, მხარი დავუჭიროთ კარგ საერთაშორისო ურთიერთობებს. კერძოდ კი, გავაგრძელოთ საქართველოს NATO-ში გაწევრიანების ძალისხმევის და მეტი თავისუფალი ვაჭრობის მხარდაჭერა. ჩვენს ელჩთან ვისაუბრეთ ფინანსური კორპორაციის განვითარებისა და მისი ოფისის გახსნის შესაძლებლობის შესახებ, რათა აშშ-დან მეტი ინვესტიცია შემოვიდეს საქართველოში და ორ ქვეყანას შორის თავისუფალი ვაჭრობა და ეკონომიკური განვითარება წახალისდეს“, - განაცხადა ამერიკელმა კონგრესმენმა. საქართველოში მეტი პირდაპირი ამერიკული ინვესტიციის წახალისების აუცილებლობას გაუსვა ხაზი სენატორმა რობ პორტმანმა, როდესაც მისივე კოლეგა ჯინ შაჰინთან ერთად ივნისში სტუმრობდა საქართველოს და Europetime-ს ექსკლუზიურად ესაუბრა. „ჩვენ უნდა წავახალისოთ უფრო მეტი პირდაპირი ინვესტიცია საქართველოში, მაგრამ ასევე გავზარდოთ სავაჭრო ბრუნვა. საქართველოს ნომერ პირველი სავაჭრო პარტნიორი თურქეთია, მეორე - რუსეთი. შეერთებულ შტატებს ძალიან მცირე ნაწილი უჭირავს და ამიტომ უნდა ვიპოვოთ გზა, როგორ გავზარდოთ უფრო მეტი მიწოდების ჯაჭვი საქართველოდან ამერიკაში ან მეტი ექსპორტი ამერიკაში და პირიქით. ეს არის ის, რაზეც პირადად ვიმუშავებ, რადგან მე პირადად ვიყავი ჩართული ვაჭრობის საკითხებში, როგორც შეერთებული შტატების სავაჭრო წარმომადგენელი. იმედი მაქვს, რომ პირდაპირი ინვესტიციების გარდა, ვაჭრობის გაფართოებაც შეგვიძლია“, - აღნიშნა სენატორმა რობ პორტმანმა Europetime-თან ექსკლუზიურ ინტერვიუში. Europetime-მა აშშ-ის სახელმწიფო მდივნის მოადგილის მოვალეობის შემსრულებელი ფილიპ რიკერიც ექსკლუზიურად ჩაწერა, როდესაც ამერიკელი მაღალჩინოსანი საქართველოს ასევე ივნისში ეწვია რეგიონული ტურნეს ფარგლებში. ფილიპ რიკერის განცხადებით, რეფორმების გაგრძელება, კანონის უზენაესობის განმტკიცება არის ის ძალიან მნიშვნელოვანი ელემენტი, რომელიც ხელს შეუწყობს საქართველოს, გახდეს საერთაშორისო ვაჭრობისთვის მიმზიდველი. „ჩვენ ვაფასებთ საქართველოს სურვილს, გაააქტიუროს სავაჭრო ურთიერთობები აშშ-სთან. ამისათვის ძალიან მნიშვნელოვანია რეფორმების გზის გაგრძელება. მათ შორის, 19 აპრილის შეთანხმების შესრულება და შესაბამისად, უფრო ეფექტური გარემოს შექმნა საერთაშორისო ვაჭრობისთვის, რაშიც ძალიან დიდ როლს თამაშობს კანონის უზენაესობა. მოგეხსენებათ, რომ თავისუფალი ვაჭრობის საკითხი ეს არის ამერიკის სავაჭრო წარმომადგენლის პრეროგატივა. თუმცა, აღვნიშნავ, რომ ამ პროცესში ძალიან მნიშვნელოვანია გამჭვირვალე ბიზნესგარემოს შემუშავება და ეს პროცესი მიმდინარეობს მათ შორის, ჩვენი დახმარებითაც. მნიშვნელოვანია, რომ გაგრძელდეს რეფორმების გზა. კიდევ ერთხელ აღვნიშნავ, რომ სასამართლო რეფორმა ამ კუთხით არის უაღრესად მნიშვნელოვანი იმისთვის, რომ ბიზნესისთვის, უცხოელი ინვესტორებისთვის შეიქმნას ხელსაყრელი გარემო და იყოს იმის განცდა და გარანტია. რომ სამართლებრივი სისტემა არის სრულიად თავისუფალი პოლიტიკური თუ სხვა რაიმე გარე ჩარევებისგან. შესაბამისად, რეფორმების გაგრძელება, კანონის უზენაესობის განმტკიცება არის ის ძალიან მნიშვნელოვანი ელემენტი, რომელიც ხელს შეუწყობს, რომ საქართველო გახდეს მიმზიდველი საერთაშორისო ვაჭრობისთვის და ინვესტორებისთვის“, - განაცხადა ფილიპ რიკერმა Europetime-ის შეკითხვის საპასუხოდ. ცნობისთვის, საქართველოში ვიზიტით მყოფი ამერიკელი კონგრესმენების დელეგაციის შემადგენლობაში შედიან ალექს ქსავიერ მუნი (დასავლეთ ვირჯინია), ბრაიან ჯორჯ სტილი (ვისკონსინი), კელი მაიკლ არმსტრონგი (ჩრდ. დაკოტა), კეროლ დევინ მილერი (დასავლეთ ვირჯინია) და რონალდ ჯინ ესტესი (კანზასი). კონგრესმენები ასევე წარმოადგენენ სხვადასხვა კომიტეტს. ამავე თემაზე: საქართველოში ვიზიტით მყოფი კონგრესმენები თავისუფალ ვაჭრობის და პირდაპირი ამერიკული ინვესტიციების საკითხებით ინტერესდებიან
საერთაშორისო სავალუტო ფონდისგან საქართველომ $286 მლნ-ის სარეზერვო აქტივები მიიღო
საერთაშორისო სავალუტო ფონდისგან საქართველომ $286 მლნ-ის სარეზერვო აქტივები მიიღო. ინფორმაციას საქართველოს ეროვნული ბანკი ავრცელებს. „Covid-19 - ის პანდემიით გამოწვეულმა ვითარებამ მსოფლიოს მრავალი ქვეყანა ფინანსური გამოწვევების წინაშე დააყენა. წევრი ქვეყნების ფინანსური სტაბილურობის ხელშეწყობისა და კრიზისული მდგომარეობიდან გამოყვანის მიზნით, საერთაშორისო სავალუტო ფონდმა (სსფ) მიმდინარე წელს ნასესხობის სპეციალური უფლების (SDR - Special Drawing Rights) განაწილების ახალი წესი დაამტკიცა და ქვეყნებს შორის 650 მლრდ აშშ დოლარის (დაახლოებით 456 მლრდ SDR) ოდენობის გადანაწილება გააკეთა. SDR - ის აღნიშნული განაწილება მიმდინარე წლის 23 აგვისტოს შევიდა ძალაში. 650 მლრდ აშშ დოლარიდან დაახლოებით 275 მლრდ აშშ დოლარი (დაახლოებით 193 მლრდ SDR) განვითარებად ეკონომიკებში, მათ შორის დაბალშემოსავლიან ქვეყნებში განთავსდა. ამ განაწილებაში საქართველოს 202 მლნ SDR ერგო, რაც დაახლოებით 286 მლნ აშშ დოლარის ექვივალენტია და დღეს გამოქვეყნებულ საქართველოს ოფიციალურ საერთაშორისო რეზერვების სტატისტიკაშიც აისახა. ეს ოპერაცია ზრდის ქვეყნის მთლიან საერთაშორისო რეზერვებს და, შესაბამისად, კრიზისის წინააღმდეგ ფინანსურად უფრო მდგრადს ხდის. SDR - ის ფლობა ქვეყანას საშუალებას აძლევს საერთაშორისო რეზერვების შესავსებად უფრო ძვირადღირებული საშინაო ან საგარეო ვალის აღება შეამციროს. ამავე დროს, SDR ქვეყნის უპირობო ვალდებულებაა. ის საგადასახდელო ბალანსის აქტივებში აღირიცხება, ერთი მხრივ, როგორც სარეზერვო აქტივი, ხოლო, მეორე მხრივ, როგორც გრძელვადიანი ვალდებულება. SDR - ის აღნიშნული განაწილება საერთაშორისო სავალუტო ფონდის მიერ წევრი ქვეყნებისთვის, მიმდინარე პანდემიური ვითარების და გლობალური კრიზისის დაძლევის პროცესში, გამოხატული მნიშვნელოვანი მხარდაჭერის დასტურია. ასეთი განაწილებები მსოფლიოს ფინანსურ სტაბილურობაში მნიშვნელოვანი წვლილის შემტან მოვლენებად განიხილება. წინა მსგავსი განაწილება 2009 წელს მოხდა, როდესაც საერთაშორისო სავალუტო ფონდმა წევრი ქვეყნებისთვის 2008 წლის გლობალური ფინანსური კრიზისიდან გამოსაყვანად 250 მლრდ აშშ დოლარის ექვივალენტი SDR განათავსა. განაწილების ამ რაუნდის დროს, საქართველომ 144 მლნ SDR (225.5 მლნ აშშ დოლარის ექვივალენტი) მიიღო“, - აღნიშნულია ინფორმაციაში.
საქართველოში ვიზიტით მყოფი კონგრესმენები თავისუფალ ვაჭრობის და პირდაპირი ამერიკული ინვესტიციების საკითხებით ინტერესდებიან
საქართველოში ვიზიტით მყოფი კონგრესმენები შეხვედრებზე სხვა საკითხებთან ერთად, თავისუფალი ვაჭრობის, მზარდი სავაჭრო და ეკონომიკური ურთიერთობების საკითხებს განიხილავენ. ამავე თემაზე მათ დღეს საღამოს პრემიერ-მინისტრთან შეხვედრაზეც იმსჯელეს. „საუბრისას შევეხეთ შეერთებულ შტატებსა და საქართველოს შორის თავისუფალ ვაჭრობის, მზარდი სავაჭრო და ეკონომიკური ურთიერთობების საკითხს. ძალიან გვახარებს ის ფაქტი, რომ კარგი მეგობარი გვყავს ამ რეგიონში. საქართველოსთან მეგობრობა ამერიკის შეერთებულ შტატებს, ხოლო შეერთებულ შტატებთან მეგობრობა საქართველოს სურს. ეს სრულად გვაქვს გაცნობიერებული და აქ საქართველოსადმი მხარდაჭერის ნიშნად ვართ“, - აღნიშნა კონგრესმენმა ალექს მუნმა შეხვედრის შემდეგ. თავის მხრივ, მთავრობის ადმინისტრაციის მიერ ინფორმაციაში აღნიშნულია, რომ შეხვედრაზე განიხილეს აშშ-სა და საქართველოს შორის ეკონომიკურ ურთიერთობები. „აღინიშნა, რომ შეერთებულ შტატებთან სავაჭრო და ეკონომიკური ურთიერთობების კიდევ უფრო გაძლიერება, ასევე საქართველოსა და აშშ-ს შორის თავისუფალი ვაჭრობის შესახებ მოლაპარაკებების დაწყება საქართველოს მთავრობის ერთ-ერთ პრიორიტეტს წარმოადგენს“, - აცხადებენ მთავრობის ადმინისტრაციაში. „შეხვედრაზე განსაკუთრებით ხაზი გაესვა თავისუფალი ვაჭრობის მიმართულებით არსებულ პერსპექტივებს და მეტი პირდაპირი ამერიკული ინვესტიციის მოზიდვას საქართველოში“, - განაცხადა შეხვედრის შემდეგ საგარეო საქმეთა მინისტრმა დავით ზალკალკიანმა. მანამდე, კონგრესმენმა კეროლ მილერმა საქართველოში ჩამოსვლისას აღნიშნა, რომ საქართველოში ვიზიტი ფარგლებში დაგეგმილი შეხვედრებისას, ქვეყნებს შორის არსებულ ურთიერთობებზე და მათ შორის ვაჭრობის სფეროზე იქნება საუბარი. ,,ძალიან მიხარია, რომ ამ ულამაზეს ქვეყანაში ვიმყოფები. აშშ-სთვის ძალიან მნიშვნელოვანია, რომ გამოხატოს მხარდაჭერა მსოფლიოს ამ ნაწილში არსებული დემოკრატიული სახელმწიფოს მიმართ. მნიშვნელოვანია დაგიდასტუროთ ჩვენი მხარდაჭერა საქართველოს სუვერენიტეტის მიმართ, მოუთმენლად ველი, რომ საქართველოში შეხვედრებისას ვისაუბრო ორ ქვეყანას შორის არსებულ ურთიერთობებზე სხვადასხვა მიმართულებით, მათ შორის ვაჭრობის სფეროში“, - განაცხადა კეროლ მილერმა. თავის მხრივ, კონგრესმენ ბრაიან სტილის განცხადებით, საქართველოში დაგეგმილი შეხვედრებისას სავაჭრო და ეკონომიკურ მიმართულებებს განიხილავენ. „ძალიან მიხარია, რომ აქ, საქართველოში ვიმყოფები. საქართველოსა და აშშ-ს მნიშვნელოვანი ურთიერთობები აქვთ. შეხვედრებისას განვიხილავთ სავაჭრო და ეკონომიკის საკითხებს“, - აღნიშნა ბრაიან სტილმა. მისმა კოლეგამ რობ პორტმანმა საქართველოში მეტი პირდაპირი ამერიკული ინვესტიციის წახალისების აუცილებლობას გაუსვა ხაზი, როდესაც სენატორ ჯინ შაჰინთან ერთად სტუმრობდა საქართველოს და Europetime-ს ექსკლუზიურად ესაუბრა. „ჩვენ უნდა წავახალისოთ უფრო მეტი პირდაპირი ინვესტიცია საქართველოში, მაგრამ ასევე გავზარდოთ სავაჭრო ბრუნვა. საქართველოს ნომერ პირველი სავაჭრო პარტნიორი თურქეთია, მეორე - რუსეთი. შეერთებულ შტატებს ძალიან მცირე ნაწილი უჭირავს და ამიტომ უნდა ვიპოვოთ გზა, როგორ გავზარდოთ უფრო მეტი მიწოდების ჯაჭვი საქართველოდან ამერიკაში ან მეტი ექსპორტი ამერიკაში და პირიქით. ეს არის ის, რაზეც პირადად ვიმუშავებ, რადგან მე პირადად ვიყავი ჩართული ვაჭრობის საკითხებში, როგორც შეერთებული შტატების სავაჭრო წარმომადგენელი. იმედი მაქვს, რომ პირდაპირი ინვესტიციების გარდა, ვაჭრობის გაფართოებაც შეგვიძლია“, - აღნიშნა სენატორმა რობ პორტმანმა Europetime-თან ექსკლუზიურ ინტერვიუში. Europetime-მა აშშ-ის სახელმწიფო მდივნის მოადგილის მოვალეობის შემსრულებელი ფილიპ რიკერიც ექსკლუზიურად ჩაწერა, როდესაც ამერიკელი მაღალჩინოსანი საქართველოს ასევე ივნისში ეწვია რეგიონული ტურნეს ფარგლებში. ფილიპ რიკერის განცხადებით, რეფორმების გაგრძელება, კანონის უზენაესობის განმტკიცება არის ის ძალიან მნიშვნელოვანი ელემენტი, რომელიც ხელს შეუწყობს საქართველოს, გახდეს საერთაშორისო ვაჭრობისთვის მიმზიდველი. „ჩვენ ვაფასებთ საქართველოს სურვილს, გაააქტიუროს სავაჭრო ურთიერთობები აშშ-სთან. ამისათვის ძალიან მნიშვნელოვანია რეფორმების გზის გაგრძელება. მათ შორის, 19 აპრილის შეთანხმების შესრულება და შესაბამისად, უფრო ეფექტური გარემოს შექმნა საერთაშორისო ვაჭრობისთვის, რაშიც ძალიან დიდ როლს თამაშობს კანონის უზენაესობა. მოგეხსენებათ, რომ თავისუფალი ვაჭრობის საკითხი ეს არის ამერიკის სავაჭრო წარმომადგენლის პრეროგატივა. თუმცა, აღვნიშნავ, რომ ამ პროცესში ძალიან მნიშვნელოვანია გამჭვირვალე ბიზნესგარემოს შემუშავება და ეს პროცესი მიმდინარეობს მათ შორის, ჩვენი დახმარებითაც. მნიშვნელოვანია, რომ გაგრძელდეს რეფორმების გზა. კიდევ ერთხელ აღვნიშნავ, რომ სასამართლო რეფორმა ამ კუთხით არის უაღრესად მნიშვნელოვანი იმისთვის, რომ ბიზნესისთვის, უცხოელი ინვესტორებისთვის შეიქმნას ხელსაყრელი გარემო და იყოს იმის განცდა და გარანტია. რომ სამართლებრივი სისტემა არის სრულიად თავისუფალი პოლიტიკური თუ სხვა რაიმე გარე ჩარევებისგან. შესაბამისად, რეფორმების გაგრძელება, კანონის უზენაესობის განმტკიცება არის ის ძალიან მნიშვნელოვანი ელემენტი, რომელიც ხელს შეუწყობს, რომ საქართველო გახდეს მიმზიდველი საერთაშორისო ვაჭრობისთვის და ინვესტორებისთვის“, - განაცხადა ფილიპ რიკერმა Europetime-ის შეკითხვის საპასუხოდ. ცნობისთვის, საქართველოში ვიზიტით მყოფი კონგრესმენების დელეგაციის შემადგენლობაში შედიან ალექს ქსავიერ მუნი (დასავლეთ ვირჯინია), ბრაიან ჯორჯ სტილი (ვისკონსინი), კელი მაიკლ არმსტრონგი (ჩრდ. დაკოტა), კეროლ დევინ მილერი (დასავლეთ ვირჯინია) და რონალდ ჯინ ესტესი (კანზასი). კონგრესმენები ასევე წარმოადგენენ სხვადასხვა კომიტეტს.
აგვისტოს მონაცემებით, ქუთაისის საერთაშორისო აეროპორტში მგზავრთნაკადი 52%-ით, რეისები რაოდენობა კი 69 %-ით აღდგა
პანდემიის პირობებში, ქუთაისის განახლებულ საერთაშორისო აეროპორტში, საჰაერო მიმოსვლის დადებითი დინამიკა შეიმჩნევა. საქართველოს აეროპორტების გაერთიანების ინფორმაციით, აგვისტოს თვეში, 2019 წლის ანალოგიურ პერიოდთან შედარებით, დავით აღმაშენებლის სახელობის აეროპორტში მგზავრთნაკადის 52 % აღდგა. 2021 წლის აგვისტოში, ქუთაისის საერთაშორისო აეროპორტი 45,922 მგზავრს მოემსახურა. (2019 აგვისტო - 87,969 მგზავრი). მგზავრთნაკადის გარდა, ქუთაისის საერთაშორისო აეროპორტში დადებითი დინამიკაა ავიარეისების რაოდენობის აღდგენის კუთხითაც. აგვისტოს თვეში, აეროპორტში რეისების 69% აღდგა. ( 2021 აგვისტო - 188 რეისი, 2019 აგვისტო - 274 რეისი).საქართველოს აეროპორტების გაერთიანების ინფორმაციით, ამ ეტაპისთვის, ქუთაისის საერთაშორისო აეროპორტში 3 ავიაკომპანია 11 ქვეყნის 19 მიმართულებით ოპერირებს. ,,მოცემულ მომენტში ქუთაისის საერთაშორისო აეროპორტში სამი ავიაკომპანია ასრულებს პირდაპირ რეგულარულ რეისებს 19 მიმართულებით, მათ შორის ყაზახეთის 4 და ევროპის 15 მიმართულებით. აგვისტოში ქუთაისის საერთაშორისო აეროპორტში შესრულებული 188 რეისიდან 165 იყო რეგულარული ხოლო 23 ჩარტერული რეისი. 28 სექტემბრიდან ჩვენი სტრატეგიული პარტნიორი Wizz Air დაამატებს კრაკოვის მიმართულებას ქუთაისიდან. პარალელურად, აქტიურად მიმდინარეობს მოლაპარაკებები რამდენიმე კომპანიასთან ბაზარზე დაბრუნების/ახალი მიმართულების დამატების კუთხით. რის შესახებაც ცნობილი მოლაპარაკებების დასრულების შემდეგ გახდება,-‘’განაცხადა საქართველოს აეროპორტების გაერთიანების დირექტორმა თამარ არჩუაძემ. სექტემბრის თვეში ქუთაისის საერთაშორისო აეროპორტიდან ევროპის მიმართულებით 111 რეგულარული რეისი, აზიის მიმართულებით კი 52 რეგულარული რეისი შესრულდება.
მთავრობამ „ქართული ღვინის პოპულარიზაციის ხელშეწყობის სახელმწიფო პროგრამა“ დაამტკიცა
მთავრობამ, ქართული ღვინის საექსპორტო პოტენციალის გაზრდის მიზნით, „ქართული ღვინის პოპულარიზაციის ხელშეწყობის სახელმწიფო პროგრამა“ დაამტკიცა. ინფორმაციას მთავრობის ადმინისტრაცია ავრცელებს. როგორც ცნობილია, „ქართული ღვინის პოპულარიზაციის ხელშეწყობის სახელმწიფო პროგრამის“ მიზანია საერთაშორისო ბაზრებზე ქართული ღვინის საექსპორტო პოტენციალის, კონკურენტუნარიანობისა და ცნობადობის გაზრდა, სტრატეგიული და პრიორიტეტული საექსპორტო ბაზრების დივერსიფიცირება. პროგრამას განახორციელებს სსიპ ღვინის ეროვნული სააგენტო, საქართველოს გარემოს დაცვისა და სოფლის მეურნეობის სამინისტროს კოორდინაციით. ღვინის ეროვნული სააგენტო, მისთვის გამოყოფილ ასიგნებათა ფარგლებში, მარკეტინგული ხარჯების თანადაფინანსებას მხოლოდ იმ კომპანიებისთვის განახორციელებს, რომლებიც ექსპორტს პრიორიტეტულ ბაზრებსა და მსოფლიოს სხვადასხვა ქვეყნებში ახორციელებენ. პროგრამით განსაზღვრული მხარდაჭერა ქსელურ სავაჭრო ობიექტებში შესვლის მიზნით განხორციელებულ სხვადასხვა მარკეტინგულ ღონისძიებებს, სავაჭრო ქსელებსა და ღვინის სპეციალიზებულ მაღაზიებში გაყიდვების სტიმულირების ღონისძიებებს, დეგუსტაციებს, გაყიდვების ზრდისკენ მიმართულ მედია კამპანიებს, გაყიდვების ონლაინ პლატფორმებსა და სოციალურ ქსელებში რეკლამირებას მოიცავს.
ირაკლი ღარიბაშვილი: მიუღებელი და არასწორია, რომ ქვეყანა დამოკიდებული იყოს იმპორტირებულ პროდუქციაზე
მომდევნო სამი წლის განმავლობაში 2 მილიარდ 500 მილიონი ლარის ინვესტიციას განვახორციელებთ ადგილობრივი წარმოების განსავითარებლად და წასახალისებლად, - ამის შესახებ საქართველოს პრემიერ-მინისტრმა ირაკლი ღარიბაშვილმა „ქართული ოცნების“ ცაგერის მერობის კანდიდატის წარდგენისას განაცხადა. ღარიბაშვილის შეფასებით, მიუღებელი და არასწორია, რომ ქვეყანა იყოს დამოკიდებული იმპორტირებულ პროდუქციაზე. „კარგად მოგვეხსენება, რომ წლების განმავლობაში, მოყოლებული მას შემდეგ, რაც ჩვენ აღვიდგინეთ დამოუკიდებლობა და დაინგრა საბჭოთა კავშირი, ასევე დაინგრა და ხშირ შემთხვევაში ჩვენი უგუნური პოლიტიკით და ჩვენი ყოფილი მმართველების უგუნური პოლიტიკით, თავად დაანგრიეს და დაშალეს, ფაბრიკები, საწარმოები, ქარხნები. აუცილებელია ამ ყველაფრის აღდგენა, რომ მეტი დასაქმება მოვახდინოთ ჩვენი მოსახლეობის, მეტი დოვლათი შეიქმნას, რომ ეტაპობრივად ჩავანაცვლოთ იმპორტირებული საქონელი. არ შეიძლება და მიუღებელია, არასწორია, რომ ქვეყანა იყოს დამოკიდებული იმპორტირებულ პროდუქციაზე. რა თქმა უნდა, იმპორტიც უნდა იყოს, ყველაფერი, მაგრამ აუცილებელია ჯერ ჩვენს თავს მივხედოთ, ჩვენს მოსახლეობას მივხედოთ და თვითუზრუნველყოფილი, თვითკმარი ქვეყანა გავხდეთ, როგორც მინიმუმ სოფლის მეურნეობის პროდუქციით, რისი უდიდესი, უზარმაზარი პოტენციალიც გაგვაჩნია, მართლაც ამ უნიკალურ მხარეში, რომელიც ცნობილია, ცნობილი ვენახებით, ვაზის ჯიშებით, ღვინით. რა თქმა უნდა, განვავითარებთ ტურიზმს და სპეციალურ პროგრამებს წარმოგიდგენთ უახლოეს თვეებში ცაგერის მუნიციპალიტეტისთვის, ეს იქნება კონკრეტულად მორგებული თქვენს მუნიციპალიტეტზე, რომ მაქსიმალურად ხელი შევუწყოთ ტურიზმის განვითარებას ცაგერის მუნიციპალიტეტში. ამას გარდა, მე ვახსენე სოფლის მეურნეობის პროგრამები და ასევე ადგილობრივი წარმოების მიმართულებით ჩვენს მიერ გადასადგმელი, დამატებითი უფრო ძლიერი ნაბიჯები. იქნება მორგებული სპეციალური პროგრამები, რომელიც ხელს შეუწყობს მცირე და საშუალო ბიზნესის განვითარებას, პატარა საწარმოების განვითარებას”, - განაცხადა ღარიბაშვილმა.
აშშ-მ ირანის დაზვერვის ოთხ თანამშრომელს სანქციები დაუწესა
აშშ-მ ირანის დაზვერვის ოთხ თანამშრომელს სანქციები დაუწესა. იტყობინება Reuters-ი. სახაზინო დეპარტამენტის განცხადებით, ისინი ამერიკელი ჟურნალისტისა და უფლებადამცველის გატაცების გეგმის უკან დგანან. „ირანის მთავრობის მხრიდან შეთქმულება არის კიდევ ერთი მაგალითი იმისა, რომ ის ცდილობს, ჩაახშოს კრიტიკული ხმა“, - განაცხადა უწყებამ. სანქცირებულთა შორის არის ირანში დაზვერვის მაღალჩინოსანი ალირეზა შაჰვაროგი ფარაჰანი. აშშ-ის იუსტიციის სამინისტროს დეპარტამენტმა ივლისში აღძრა საქმე, რომლის თანახმად ოთხმა პირმა ნიუ-იორკში მცხოვრები ირანელ-ამერიკელი აქტივისტის და ჟურნალისტის მასიჰ ალინეჯადის გატაცება და შემდეგ მისი გადაყვანა ვენესუელაში, სავარაუდოდ, ირანში დასაბრუნებლად დაგეგმა.
ბაიდენის ადმინისტრაციამ 65,3 მილიარდი დოლარის გეგმა წარადგინა, რომელიც პანდემიებისთვის მზადყოფნას ითვალისწინებს
ბაიდენის ადმინისტრაციამ 65,3 მილიარდი დოლარის ოდენობის გეგმა წარადგინა, რომელიც მიზნად მომავალი პანდემიებისთვის აშშ-ის მზადყოფნის სტრატეგიის გაუმჯობესებას ისახავს, რადგან ქვეყანა მზად არის ნებისმიერი მომავალი ბიოლოგიური საფრთხისათვის. ამის შესახებ ინფორმაციას TheHill-ი ავრცელებს. როგორც გამოცემა წერს, თეთრი სახლი 7-10 წლის განმავლობაში 65.3 მილიარდი დოლარის დახარჯვას გეგმავს, რათა ქვეყანამ "სწრაფად და ეფექტურად" მოახდინოს რეაგირება მომავალ ეპიდემიებსა და პანდემიებზე. ერიკ ლენდერმა, თეთრი სახლის მეცნიერებისა და ტექნოლოგიის პოლიტიკის ოფისის (OSTP), განუცხადა ჟურნალისტებს, რომ "სასიცოცხლოდ მნიშვნელოვანია" 15 -დან 20 მილიარდი დოლარით დაიწყოს ეს პროგრამა, რათა ამ „ძალისხმევას ბიძგი მიეცეს“. მისი თქმით, იმის გონივრული ალბათობა არსებობს, რომ კიდევ ერთი სერიოზული პანდემია შეიძლება მოხდეს, შესაძლოა, მომდევნო ათწლეულის განმავლობაში. "ხუთი წლის შემდეგ ჩვენ უნდა ვიყოთ უფრო ძლიერები ინფექციური დაავადებების შესაჩერებლად, სანამ ისინი გახდებიან გლობალური პანდემიები, როგორიცაა COVID-19,"-თქვა მან და დასძინა: "არსებობს გონივრული ალბათობა იმისა, რომ კიდევ ერთი სერიოზული პანდემია, რომელიც შეიძლება იყოს COVID-19- ზე უარესი, მალე მოხდეს, შესაძლოა მომდევნო ათწლეულის განმავლობაში. მომავალი პანდემია, სავარაუდოდ, არსებითად განსხვავდება COVID-19-ისგან. ასე რომ, ჩვენ მზად უნდა ვიყოთ ვირუსული საფრთხეების გამკლავებისთვის".
ნათია თურნავა ევროკავშირის მაკროფინანსურ ტრანშზე: ეს არის არა დახმარება, არამედ საგარეო ვალის გაზრდა
ნათია თურნავა ევროკავშირის მაკროფინანსურ ტრანშზე საუბრისას აღნიშნავს, რომ ეს არის არა დახმარება, არამედ საგარეო ვალის გაზრდა. მისი თქმით, თუ ქვეყანას საკუთარი რესურსი აქვს, საგარეო ვალის გაზრდა არაა საჭირო. "ვწუხვარ, რომ უფრო მეტად ეკონომიკურმა საკითხმა პოლიტიკური დატვირთვა შეიძინა, საკითხი დგას მარტივად - დღეს ჩვენ ვსაუბრობდით, რამდენად მაღალია ჩვენი ეკონომიკური ზრდა და ეკონომიკის აღდგენის ზრდის ტემპი. ეს იმას ნიშნავს, რომ ჩვენმა ეკონომიკამ 1 მლრდ ლარი დამატებით გამოიმუშავა. ჩვენ გვაქვს შიდა რესურსი, რომელიც შეგვიძლია ბევრ პროგრამას და კარგ საქმეს მოვახმაროთ და საგარეო ვალი, რომელიც ისედაც საკმაოდ გაგვეზარდა პანდემიის გამო, აღარ უნდა გავზარდოთ. აქ ხომ საუბარია არა დახმარებაზე, არამედ საგარეო ვალის გაზრდაზე. ეს არის სესხი და შესაბამისად, თუკი საკუთარი რესურსი გაქვს, არაა საჭიროება, რომ გავზარდოთ სესხი. ეს არის მოცემულობა", - განაცხადა ნათია თურნავამ. როგორც ცნობილია, მაკროფინანსური დახმარებების მიმართულებით ევროპარლამენტარი მარკეტა გრეგოროვა მუშაობს. ჩეხი პოლიტიკოსი Europetime-მა ექსკლუზიურად მიმდინარე თვეს ჩაწერა. „არსებობს რამდენიმე შესაძლებლობა და მიკროსაფინანსო დახმარება აშკარად ერთ -ერთი მათგანია. თუმცა, რა თქმა უნდა, ეს არის ის, რაც ხორციელდება ევროკავშირის სტანდარტული საკანონმდებლო პროცედურის ფარგლებში. ასე რომ, ეს არ არის ის, რისი გაკეთებაც ჩვენ შეგვიძლია დაუყოვნებლივ, ახლა. ჩვენ შეგვიძლია ვთქვათ, რომ ეს მოხდება და როდესაც საკანონმდებლო პროცედურა იწყება, ჩვენ შეგვიძლია როგორღაც ის სისრულეში მოვიყვანოთ მიმდინარე მოვლენებიდან გამომდინარე. რა თქმა უნდა, ეს არის კომისიასა და საბჭოს შორის განსახილველი საკითხი. პრობლემა ის არის, რომ საბჭოს და კომისიის თანამშრომლების უმრავლესობა ახლა შვებულებაშია, რადგან აგვისტოს განმავლობაში ევროკავშირის ინსტიტუტები შვებულებაში არიან. ასე რომ, ეს ართულებს სწრაფ რეაქციას. ჩვენ აუცილებლად ვაპირებთ მათთან კონტაქტს და ვნახოთ, რა შეიძლება გაკეთდეს, მაგრამ რასაც მე ვხედავ, ევროკავშირის ინსტიტუტებში არსებული ატმოსფეროდან გამომდინარე, აუცილებლად იქნება ძლიერი რეაქცია ევროკავშირისგან. რა თქმა უნდა, თუ ისინი შეცვლიან თავიანთ გადაწყვეტილებას, ეს ძალიან სასარგებლო იქნება შექმნილ ვითარებისთვის, მაგრამ პირადად მე ვერ ვხედავ რაიმე ნიშანს, რომ ეს მოხდება, თუმცა ეს არ ნიშნავს, რომ ამას არ ვისურვებ“, - აღნიშნა ევროპარლამენტარმა. ამავე თემაზე: ირაკლი ღარიბაშვილი ევროკავშირის დახმარებაზე: გადაწყვეტილიც გვაქვს, რომ თავი შევიკავოთ ამ სესხის აღებაზე, თანხის მიღების აუცილებლობა აღარ იქნება ექსპერტები ევროკავშირის შუამავლობით მიღწეული შეთანხმებიდან მმართველი პარტიის გასვლას აფასებენ შარლ მიშელი: მაკრო ფინანსური დახმარების გაცემის თარიღი ახლოვდება და დროა, საქართველოს მთავრობამ აჩვენოს, რომ შეთანხმებების ერთგულია ირაკლი კობახიძე: ევროკავშირისგან მაკროფინანსური დახმარების მიღებას ფინანსური დატვირთვა აღარ აქვს
ირაკლი ღარიბაშვილი ევროკავშირის დახმარებაზე: გადაწყვეტილიც გვაქვს, რომ თავი შევიკავოთ ამ სესხის აღებაზე, თანხის მიღების აუცილებლობა აღარ იქნება
საქართველოს პრემიერ-მინისტრის ირაკლი ღარიბაშვილის განცხადებით, მთავრობას გადაწყვეტილი აქვს, უარი თქვას ევროკავშირისგან დახმარების მიღებაზე და სესხის აღებაზე. ამის მიზეზად ღარიბაშვილი საგარეო ვალის შემცირებას ასახელებს. როგორც პრემიერი აღნიშნავს, საგარე ვალის შემცირების ფონზე, ევროკავშირისგან თანხის მიღების აუცილებლობა აღარ იქნება. "რაც შეეხება მაკროფინანსურ დახმარებას, მე შევახსენებ მოსახლეობას, რომ ეს არის სესხი, რომლის ნაწილიც 2020 წელს ავიღეთ და 75 მილიონის მეორე ნაწილი იყო სესხი, ეს არ იყო გრანტი და დახმარება, რომლის თაობაზეც მოგვიანებით, დამატებით კომენტარს გააკეთებს ფინანსთა სამინისტრო. წელს, იქიდან გმომდინარე, რომ ჩვენ უკვე დავიწყეთ საგარეო ვალის შემცირება, მაღალი ალბათობით ჩვენ ამ თანხის მიღების აუცილებლობა აღარ იქნება. ჩვენ რა თქმა უნდაა, ძალიან მადლიერი ვართ ევროკავშირის ყველა იმ დახმარებისთვის, რაც მათ აღმოგვიჩინეს, მათ შორის კოვიდ პანდემიის მართვის დროს და ზოგადად, ყველაფრისთვის რაც მათ გააკეთეს ჩვენთვის. ჩვენ ამ მიმართულებით გავაგრძელებთ წინსვლას. მეორეს მხრივ, ამ საკითხმა შეიძინა ძალიან დიდი პოლიტიკური დატვირთვა. ამიტომ, ნებისმიერი ინსინუაციების თავიდან აცილების მიზნით, მთავრობა არ გამორიცხავს, ჩვენ გადაწყვეტილიც გვაქვს, რომ თავი შევიკავოთ მეორე ნაწილის სესხის სახით აღებაზე. მთავარი არგუმენტაცია, მთავარი მოტივი არის ის, რომ ჩვენ ეტაპობრივად დავიწყეთ საგარეო ვალის შემცირება. მოგეხსენებათ, რომ გვაქვს ძალიან კარგი, ორნიშნა ეკონომიკური ზრდა. წინასწარი ინფორმაციით გეტყვით, რომ ივლისის თვის ზრდა იქნება დაახლოებით 10%-მდე, რაც 7 თვის განმავლობაში ჯამში იქნება 12,2% ეკონომიკური ზრდა. ეს დამატებით შემოსავალს გააჩენს ბიუჯეტში და ამ ტემპის შენარჩუნებით, მაღალი ალბათობით, წლის ბოლოს გვექნება ორნიშნა ზრდა. ზედმეტი სპეკულაციები აქ არ არის საჭირო. ჩვენი ოპონენტები გადასულები არიან საბოტაჟი რეჟიმზე, რომ როგორაც შეზღუდონ და შეაფერხონ ჩვენი ქვეყნის წინსვლა დასავლეთის მიმართულებით. რა თქმა უნდა, ეს არის მიუღწეველი და ეს არის მტრული, მავნებლური დამოკიდებულება", - განაცხადა ირაკლი ღარიბაშვილმა. როგორც ცნობილია, მაკროფინანსური დახმარებების მიმართულებით ევროპარლამენტარი მარკეტა გრეგოროვა მუშაობს. ჩეხი პოლიტიკოსი Europetime-მა ექსკლუზიურად მიმდინარე თვეს ჩაწერა. „არსებობს რამდენიმე შესაძლებლობა და მიკროსაფინანსო დახმარება აშკარად ერთ -ერთი მათგანია. თუმცა, რა თქმა უნდა, ეს არის ის, რაც ხორციელდება ევროკავშირის სტანდარტული საკანონმდებლო პროცედურის ფარგლებში. ასე რომ, ეს არ არის ის, რისი გაკეთებაც ჩვენ შეგვიძლია დაუყოვნებლივ, ახლა. ჩვენ შეგვიძლია ვთქვათ, რომ ეს მოხდება და როდესაც საკანონმდებლო პროცედურა იწყება, ჩვენ შეგვიძლია როგორღაც ის სისრულეში მოვიყვანოთ მიმდინარე მოვლენებიდან გამომდინარე. რა თქმა უნდა, ეს არის კომისიასა და საბჭოს შორის განსახილველი საკითხი. პრობლემა ის არის, რომ საბჭოს და კომისიის თანამშრომლების უმრავლესობა ახლა შვებულებაშია, რადგან აგვისტოს განმავლობაში ევროკავშირის ინსტიტუტები შვებულებაში არიან. ასე რომ, ეს ართულებს სწრაფ რეაქციას. ჩვენ აუცილებლად ვაპირებთ მათთან კონტაქტს და ვნახოთ, რა შეიძლება გაკეთდეს, მაგრამ რასაც მე ვხედავ, ევროკავშირის ინსტიტუტებში არსებული ატმოსფეროდან გამომდინარე, აუცილებლად იქნება ძლიერი რეაქცია ევროკავშირისგან. რა თქმა უნდა, თუ ისინი შეცვლიან თავიანთ გადაწყვეტილებას, ეს ძალიან სასარგებლო იქნება შექმნილ ვითარებისთვის, მაგრამ პირადად მე ვერ ვხედავ რაიმე ნიშანს, რომ ეს მოხდება, თუმცა ეს არ ნიშნავს, რომ ამას არ ვისურვებ“, - აღნიშნა ევროპარლამენტარმა. ასევე წაიკითხეთ: ექსპერტები ევროკავშირის შუამავლობით მიღწეული შეთანხმებიდან მმართველი პარტიის გასვლას აფასებენ შარლ მიშელი: მაკრო ფინანსური დახმარების გაცემის თარიღი ახლოვდება და დროა, საქართველოს მთავრობამ აჩვენოს, რომ შეთანხმებების ერთგულია ირაკლი კობახიძე: ევროკავშირისგან მაკროფინანსური დახმარების მიღებას ფინანსური დატვირთვა აღარ აქვს
წინასწარი მონაცემებით, ივლისში ეკონომიკა 9.9 პროცენტით გაიზარდა
წინასწარი შეფასებით, 2021 წლის ივლისში, წინა წლის შესაბამის პერიოდთან შედარებით, რეალური მთლიანი შიდა პროდუქტის ზრდამ 9.9 პროცენტი შეადგინა. საქართველოს სტატისტიკის ეროვნული სამსახურის ცნობით, 2021 წლის პირველი შვიდი თვის ეკონომიკის ზრდის საშუალო მაჩვენებელი 12.2 პროცენტია. ივლისში, 2020 წლის შესაბამის პერიოდთან შედარებით ზრდა შეინიშნებოდა შემდეგ დარგებში; საფინანსო და სადაზღვევო საქმიანობა,დამამუშავებელი მრეწველობა, სასტუმროები და რესტორნები, ტრანსპორტი და დასაწყობება,ვაჭრობა.კლების ტენდენცია დაფიქსირდა მშენებლობასა და სამთომოპოვებითი მრეწველობის დარგებში. ცნობისთვის, საქსტატის წინასწარი მონაცემებით, საქართველოს ეკონომიკა 2020 წელს 6.2 პროცენტით შემცირდა.
მრავალშვილიანი ოჯახებისთვის იპოთეკური სესხების პროგრამის ამოქმედების თარიღი ცნობილია
პირველი სექტემბრიდან სააგენტოს „აწარმოე საქართველოში“ ფარგლებში დაანონსებული ახალი პროგრამები ძალაში შედის. ამის შესახებ მთავრობის დღევანდელი სხდომის შემდეგ ეკონომიკისა და მდგრადი განვითარების მინისტრმა ნათია თურნავამ ისაუბრა. მინისტრის თქმით, ამ პროგრამით მოსარგებლე მეწარმეებს შეუძლიათ, სააგენტოს ან ბანკს ორ დღეში მიაკითხონ. „ის საწარმოები, რომლებიც საექსპორტო წარმოებაში ჩართულები ან იმპორტის კონკურენტები არიან და იმპორტის ეტაპობრივ ჩანაცვლებას ემსახურებიან, თავიანთი ახალი პროგრამებისთვის მიიღებენ ერთდროულად როგორც სესხის პროცენტის თანადაფინანსებას, ასევე, დაახლოებით, 60%-ით თანაგარანტირებას გავუწევთ ბანკებთან. გარდა ამისა, ახალი კომპონენტია გრანტი, სესხის ოდენობის 15%-ის მოცულობით, რასაც ასევე მიიღებენ. ეს პროგრამა ემსახურება ქართული წარმოების გაძლიერებას, ექსპორტის გაფართოებას, იმპორტის ეტაპობრივ შემცირებას“, - განაცხადა ნათია თურნავამ. ამასთან, პირველი სექტემბრიდან კიდევ ერთი სამთავრობო პროგრამა ამოქმედდება, რომელიც ოჯახებისთვის იპოთეკური სესხის სუბსიდირებას გულისხმობს.
პირველი სექტემბრიდან იმპორტის ჩანაცვლებისთვის ახალი პროგრამები ამოქმედდება
საქართველოს ეკონომიკის მინისტრ ნათია თურნავას განცხადებით, პირველი სექტემბრიდან ძალაში შედის სახელმწიფო პროგრამის “აწარმოე საქართველოში” ახალი მიმართულებები, რომელთა მიზანიც ადგილობრივი წარმოების განვითარება და იმპორტის ეტაპობრივი ჩანაცვლება იქნება. “ის საწარმოები, რომლებიც ჩართულნი არიან საექსპორტო წარმოებაში, ან იმპორტის კონკურენტები არიან და მის ეტაპობრივ შემცირებასა და ჩანაცვლებას ემსახურებიან, თავისი ახალი პროგრამებისთვის მიიღებენ ერთდროულად, როგორც სესხის პროცენტის თანადაფინანსებას, ასევე დაახლოებით 60% - ით თანაგარანტირებას ბანკების წინაშე და ასევე, გრანტს, სესხის ოდენობის 15%- ის მოცულებით”, - განაცხადა ნათია თურნავამ.
რამდენ ადამიანს დაერიცხა უმუშევრობის 200-ლარიანი კომპენსაცია და როდის ამოიწურა თანხის გაცემის ვადა
მიზნობრივი, ანტიკრიზისული გეგმით გათვალისწინებული კომპენსაციის გაცემა მოქალაქეებისთვის, რომლებმაც პანდემიის მე-2 ტალღის შედეგად დაკარგეს სამსახური, დასრულდა. ინფორმაციას დასაქმების სააგენტო ავრცელებს. დაქირავებით დასაქმებულთათვის აგვისტოს თვის 200 ლარიანი კომპენსაცია გაიცა. ამ კომპენსაციის გაცემა ვრცელდებოდა მხოლოდ უმუშევრად დარჩენილი საქართველოს მოქალაქეებისთვის. დღეისათვის, აგვისტოს თვის 200 ლარიანი საკომპენსაციო თანხა დაერიცხა 6 979 პირს, 1 395 800 ლარის ოდენობით. ინფორმაციისთვის, მიმდინარე წლის განმავლობაში იანვრის თვის, საკომპენსაციო თანხა ჩაერიცხა 106 389 პირს, 21 277 800 ლარის ოდენობით; თებერვლის - 140 029 პირს, 28 005 800 ლარის ოდენობით; მარტის - 130 683 პირს, 26 136 600 ლარის ოდენობით. აპრილის თვეს, 200 ლარიანი დახმარება დაერიცხა 120 496 პირს, 24 099 200 ლარის ოდენობით. რაც შეეხება მაისის თვეს - 109 086 პირს, 21 817 200 ლარის ოდენობით, ხოლო ივნისის თვის 200 ლარიანი დახმარება ჩაერიცხა 102 665 პირს, 20 533 000 ლარის ოდენობით. ივლისში კომპენსაცია ჩაერიცხა 22 789 პირს, 4 557 800 ლარის ოდენობით.საქართველოს მთავრობის ანტიკრიზისული ეკონომიკური გეგმის ფარგლებში, 2021 წლის იანვრიდან, დაქირავებით დასაქმებული უმუშევრად დარჩენილი მოქალაქეები 6 თვის განმავლობაში ყოველთვიურად 200 ლარიან დახმარებას იღებდნენ“, - აღნიშნულია ინფორმციაში. ცნობისთვის დამსაქმებლები, რომლებიც დარეგისტრირდნენ იანვარ-თებერვალში, მათ კომპანიებში დასაქმებული უმუშევრად დარჩენილი მოქალაქეებისთვის კომპენსაციის გაცემის 6 თვიანი ვადა აგვისტოს თვეში სრულად ამოიწურა. ამავე თემაზე: პანდემიის გამო უხელფასოდ 162,905 მოქალაქე დარჩა - 200-ლარიანი კომპენსაციის სტატისტიკა
ირაკლი ღარიბაშვილი: სტიქიისას დაზიანებულ თეთრ ყურძენში 80 თეთრს, შავ ყურძენში კი 1 ლარს გადავიხდით
კახეთში სტიქიის შედეგად დაზიანებულ თეთრ ყურძენში სახელმწიფო 80 თეთრს გადაიხდის, შავ ყურძენში, საფერავში 1 ლარს. მათ, ვისაც სრულად გაუნადგურდათ ფართობები, ჰექტარში 3000 ლარს გადავუხდით, - ამის შესახებ საქართველოს პრემიერ-მინისტრმა, ირაკლი ღარიბაშვილმა, მთავრობის სხდომაზე განაცხადა. მისი თქმით, მისი დავალებით, ვიცე-პრემიერი და რეგიონებთან ურთიერთობის დეპარტამენტის უფროსი ჩავიდნენ ადგილზე, შეიქმნა ოპერატიული შტაბი და მოსახლეობას ადგილზე მოუგვარეს პრობლემა. „რამდენიმე დღის წინ იყო საკმაოდ მძიმე სტიქია კახეთში. 5000 ჰექტარი მიწის ფართობი დაისეტყვა. დაზიანდა ძლიან ბევრი ვენახი, ხეხილის ბაღები. ჩემი დავალებით, ადგილზე ჩავიდნენ ვიცე-პრემიერი ლევან დავითაშვილი და მთავრობის ადმინისტრაციის რეგიონებთან ურთიერთობის დეპარტამენტის უფროსი ლერი ბარნაბიშვილი, ადგილობრივ გუბერნატორთან ერთად. შეიქმნა ოპერატიული შტაბი და ადგილზე გადაუწყვიტეს და მოუგვარეს ჩვენს მოსახლეობას პრობლემა. კერძოდ, დაზიანებულ თეთრ ყურძენში 80 თეთრს გადაიხდის სახელმწიფო, შავ ყურძენში, საფერავში 1 ლარს. მათ, ვისაც სრულად გაუნადგურდათ ფართობები, ჰექტარში 3000 ლარს გადავუხდით. ასევე მინდა ვთქვა, რომ მათ, ვისაც აღდგენა დასჭირდება, იქნება ეს ვენახი თუ ხეხილის ბაღი, სახელმწიფო საკუთარ ხარჯზე, ჩვენ თვითონ აღვუდგენთ და დავეხმარებით ჩვენს მოსახლეობას, იმისთვის, რომ მაქსიმალურად იოლად გადავიტანოთ ეს პროცესი“, - განაცხადა პრემიერ-მინისტრმა. ამავე თემაზე: დასეტყვილ ყურძენს სახელმწიფო ჩაიბარებს კახეთში სეტყვამ ვენახები გაანადგურა
2020 წელს საქართველოში სასტუმროების რაოდენობა 37.3%-ით შემცირდა
სტატისტიკის ეროვნული სამსახურის დეკლარირებული მონაცემების მიხედვით, 2020 წელს საქართველოში ფუნქციონირებდა სასტუმროს მომსახურებით დაკავებული 1 010 ეკონომიკური სუბიექტი, რომლებიც ფლობდნენ 1 054 სასტუმროსა და სასტუმროს ტიპის დაწესებულებას. აღნიშნული მაჩვენებელი 37.3 პროცენტით შემცირდა 2019 წლის ანალოგიურ მონაცემთან შედარებით. სასტუმროს მომსახურებით დაკავებული ეკონომიკური სუბიექტებისთვის ყველაზე გავრცელებულ ორგანიზაციულ-სამართლებრივ ფორმას წარმოადგენდა შეზღუდული პასუხისმგებლობის საზოგადოება, რომელიც მოიცავდა 2020 წელს მოქმედი სასტუმროებისა და სასტუმროს ტიპის დაწესებულებების საერთო რაოდენობის 57.2 პროცენტს. საქსტატის ცნობით, სასტუმროების და სასტუმროს ტიპის დაწესებულებების 99.2 პროცენტი კერძო საკუთრებაში იყო, ხოლო 0.8 პროცენტი – სახელმწიფო საკუთრებაში. 2020 წელს საქართველოში მოქმედი სასტუმროებისა და სასტუმროს ტიპის დაწესებულებების საერთო ფართობი 1 826.5 ათას კვადრატულ მეტრს შეადგენდა, რაც 19.6 პროცენტით ნაკლებია 2019 წლის შესაბამის მაჩვენებელზე. აქედან იჯარით გაცემული იყო 53.4 ათასი კვადრატული მეტრი, ხოლო ყველა ნომრის საცხოვრებელი ფართობი 833.8 ათას კვადრატულ მეტრს შეადგენდა, რაც 19.5 პროცენტით არის შემცირებული წინა წლის შესაბამის მაჩვენებელთან შედარებით. 2020 წელს მოქმედ სასტუმროებსა და სასტუმროს ტიპის დაწესებულებებში ადგილების საერთო რაოდენობამ 57.9 ათასი შეადგინა, რაც 24.1 პროცენტით ნაკლებია 2019 წლის შესაბამის მაჩვენებელზე. ნომრების საერთო რაოდენობა შემცირდა 23.4 პროცენტით და 26.9 ათასი შეადგინა. ამასთან, საქსტატის მონაცემებით, 2020 წელს საქართველოს სასტუმროები და სასტუმროს ტიპის დაწესებულებები 1 344.7 ათას სტუმარს მოემსახურა, რაც 66.5 პროცენტით ნაკლებია წინა წლის შესაბამის მაჩვენებელზე. სტუმართა 30.6 პროცენტს უცხოელები წარმოადგენდნენ. მათგან 16.0 პროცენტი რუსეთის ფედერაციის მოქალაქეები იყვნენ, რაც 2019 წლის შესაბამის მაჩვენებელზე 87.6 პროცენტით ნაკლებია. ევროკავშირის ქვეყნებიდან შემოსულ სტუმართა უმეტესობას გერმანიის მოქალაქეები შეადგენდნენ, ხოლო სხვა ქვეყნებიდან შემოსულ სტუმართა უდიდესი წილი უკრაინისა და ისრაელის მოქალაქეებს ეკავათ. „2020 წელს საზღვარგარეთის ქვეყნებიდან საქართველოს სასტუმროებსა და სასტუმროს ტიპის დაწესებულებებს უმეტესად სტუმრობდნენ რეკრეაციისა და დასვენების მიზნით (66.2 პროცენტი). სასტუმროებსა და სასტუმროს ტიპის დაწესებულებებში რეკრეაციისა და დასვენების მიზნით განთავსებული უცხოელი სტუმრების უმეტესობა რუსეთის ფედერაციისა და ისრაელის მოქალაქეს წარმოადგენდა. 2020 წელს საქართველოს სასტუმროებსა და სასტუმროს ტიპის დაწესებულებებში დასაქმებული იყო 13 615 ადამიანი, რომელთა უმეტესობას (54.8 პროცენტი) ქალები წარმოადგენდნენ“, – ნათქვამია საქსტატის მიერ გამოქვეყნებულ ინფორმაციაში.
მედია: გერმანული კომპანიები რუსეთის საზღვაო ფლოტის ძრავებით უზრუნველყოფაზე უარს აცხადებენ
საავიაციო ინდუსტრიის შემდეგ, რუსეთის გაერთიანებული გემთმშენებლობის კორპორაცია, 100% -იანი სახელმწიფო ჰოლდინგი, რომელიც 40 წარმოებას აერთიანებს, მათ შორის გემთმშენებელ ქარხნებს და მანქანათმშენებელ კომპანიებს, ექსპორტის კონტროლის დარტყმის ქვეშაა. კერძოდ, სხვადასხვა წყაროს ცნობით, აიკრძალა ორმაგი დანიშნულების პროდუქტების მიწოდება რუსეთის ფედერაციაში. „უცხოური კომპანიები უფრო და უფრო უარს ამბობენ რუსული გემთმშენებლობის კომპანიების მომსახურებაზე“, - განაცხადა ბრიფინგზე რუსეთის გაერთიანებული გემთმშენებლობის კორპორაციის ხელმძღვანელმა ალექსეი რახმანოვმა. მისივე თქმით, პრობლემა ყოველდღიურად იმატებს. „იზრდება, როგორც უცხოეთიდან პროდუქციის მიწოდების შეფერხებები, ასევე უცხოელი კონტრაქტორების მიერ მომსახურების სრულ უარყოფა“, - ამბობს ალექსეი რახმანოვი. კერძოდ კი, სირთულეები ძრავებთან დაკავშირებით, გერმანიიდან წარმოიშვა. „მაგალითად, გვყავს ერთი გემი, რომლისთვისაც გერმანიის ძრავის მიმწოდებელმა გამოაცხადა უარი, შეგვატყობინეს ამის შესახებ და უკვე მეხუთე თვეა, ველოდებით. ისინი ამას ხსნიან იმით, რომ მიუხედავად იმისა, რომ ხელშეკრულება გაფორმდა და ძრავა გადაეცა ჩვენს ქარხანას, მათ ხელახლა უნდა მიმართონ BAFA- ს (გერმანიის ეკონომიკისა და ექსპორტის კონტროლის ფედერალურ ოფისს)“, - თქვა რახმანოვმა. ცნობისთვის, 2021 წლის მარტში, ნორვეგიის მთავრობამ უარი თქვა რუსული ჰოლდინგისთვის ბერგენის ძრავების მიყიდვაზე, რომელიც სპეციალიზირებულია საზღვაო ძრავების წარმოებაში. Transmashholding-ი, უმსხვილესი მანქანათმშენებლობის ჰოლდინგი რუსეთში, რომლის ქარხნები გაერთიანებული გემთმშენებლობის კორპორაციისთვის ენერგეტიკულ სისტემებს აშენებენ, ბრიტანული კორპორაცია Rolls-Royce-დან, 150 მილიონ ევროდ, ნორვეგიული წარმოების ძრავის შეძენას გეგმავდა, მაგრამ გარიგება, რომელიც რუსეთისთვის გახსნიდა წვდომას დასავლეთის საზღვაო ძრავის ტექნოლოგიაზე, ნორვეგიის ეროვნული უსაფრთხოების სამსახურმა დაბლოკა. Bergen Engines-ი 1946 წელს დაარსდა. ის არის ნორვეგიის საზღვაო ფლოტის მომმარაგებელი და ასევე ინარჩუნებს 5000 -ზე მეტ ენერგოსისტემას. „რუსულ კომპანიას არ შეიძლება, მიეცეს უფლება, მიიღოს წვდომა კრიტიკულად მნიშვნელოვან თავდაცვის ტექნიკაზე”, - ნათქვამია ნორვეგიის თავდაცვის სამინისტროსა და იუსტიციის სამინისტროში ერთობლივ განცხადებაში. ოფიციალური მონაცემებით, ყველა მოწინავე ტექნოლოგიის თითქმის მესამედი, რომელიც გამოიყენება რუსეთის ფედერაციაში, საზღვარგარეთ არის შეძენილი. ამავე დროს, 2011-18 წლებში, ტექნოლოგიური დამოუკიდებლობის დონე სტაბილურად შემცირდა. იმპორტის წილი 21.1% -დან 29.3% -მდე გაიზარდა.
საქართველოსა და ჩრდილოეთ მაკედონიას შორის უვიზო მიმოსვლაზე შეთანხმება პირველი სექტემბრიდან ამოქმედდება
საქართველოსა და ჩრდილოეთ მაკედონიას შორის უვიზო მიმოსვლაზე შეთანხმება პირველი სექტემბრიდან შედის ძალაში. შეთანხმება მიზნად ისახავს ორი ქვეყნის მოქალაქეებისთვის ურთიერთმიმოსვლის ხელსაყრელი პირობების შემოღებას. შეთანხმება ითვალისწინებს ბიომეტრიული პასპორტის მქონე პირთათვის ვიზის გარეშე ქვეყნის ტერიტორიაზე შესვლის, გაჩერებისა თუ ტრანზიტული გადაადგილების უფლების მინიჭებას. ცნობისთვის, საქართველოსა და ჩრდილოეთ მაკედონიის რესპუბლიკის პრეზიდენტებმა ქვეყნებს შორის უვიზო მიმოსვლაზე დოკუმენტს ხელი მაისში მოაწერეს.
საქართველოში ავიაკომპანია Israir Airlines-ი ბრუნდება
საქართველოს ავიაბაზარზე ისრაელის ავიაკომპანია Israir Airlines-ი ბრუნდება, რომელიც ერთთვიანი პაუზის შემდეგ, თელ-ავივი-ბათუმის მიმართულებით რეგულარულ ფრენებს განაახლებს. ამის შესახებ ეკონომიკისა და მდგრადი განვითარების მინისტრის მოადგილე მარიამ ქვრივიშვილმა განაცხადა. „მნიშვნელოვანია, რომ კოვიდის მიუხედავად, ტურიზმისა და ავიაციის სექტორის აღდგენა სწრაფი ტემპით მიმდინარეობს. ისრაელი ძალიან მნიშვნელოვანია ბაზარია ჩვენი ქვეყნისთვის და მისასალმებელია, რომ ერთთვიანი პაუზის შემდეგ, ავიაკომპანია Isr Air -ი ბათუმის საერთაშორისო აეროპორტში ბრუნდება, რაც დადებითად აისახება როგორც ტურიზმის, ასევე ადგილობრივი ბიზნესის გაძლიერებაზე და დასაქმებაზე“, - აღნიშნა მარიამ ქვრივიშვილმა. ისრაელური ავიაკომპანია ბათუმის მიმართულების რეისებს სექტემბერში შეასრულებს.
თურნავა: მიუხედავად იმისა, რომ პანდემიის ბოლო ჯერ არ ჩანს, მსოფლიოში უპრეცედენტო ორნიშნა ეკონომიკურ ზრდას მივაღწიეთ
„მიუხედავად იმისა, რომ პანდემიის ბოლო ჯერ არ ჩანს, მსოფლიოში უპრეცედენტო ორნიშნა ეკონომიკურ ზრდას მივაღწიეთ“, - ამის შესახებ ეკონომიკისა და მდგრადი განვითარების მინისტრმა ნათია თურნავამ „ქართული ოცნების“ მესტიის მერობის კანდიდატის, კაპიტონ ჟორჟოლიანის წარდგენაზე განაცხადა. მინისტრის თქმით, სვანეთს უდიდესი შენატანი აქვს ქვეყნის ეკონომიკაში. „მიუხედავად იმისა, რომ ვებრძვით ამ უხილავ მტერს პანდემიას და ჯერ არ ჩანს ბოლო, ჩვენ ვახერხებთ, რომ დაბალანსებული პოლიტიკით არა თუ არ დავხუროთ და შევზღუდოთ ეკონომიკა, არამედ ამ პირობებში მივაღწიოთ რეგიონში და მსოფლიოში უპრეცედენტო ორნიშნა ეკონომიკურ ზრდას. რას ნიშნავს ეს თქვენთვის - თქვენთვის ეს ნიშნავს, რომ თუნდაც პანდემიის პირობებში, როდესაც გლობალურად ტურიზმი არის შესუსტებული, ტარდება ზაფხულის სეზონი. რა თქმა უნდა, ეს არ არის 2019 წელი, როდესაც თქვენ უმასპინძლეთ სულ მცირე 150 ათას უცხოელ ვიზიტორს და სვანეთი იყო ერთ-ერთი ნომერი პირველი რეგიონი მასპინძლობის თვალსაზრისით, რომ აღარაფერი ვთქვათ ათასობით ქართველ სტუმარზე, ტურისტზე, ვინც დღესაც ჩამოდის სვანეთში“, - აღნიშნა ნათია თურნავამ სიტყვით გამოსვლისას. მინისტრის განცხადებით, მთავრობის მიერ გაწეული ძალისხმევით სვანეთის ტურისტული ინფრასტრუქტურა აქტიურად ვითარდება. „თქვენ იცით, რომ ჩვენი ხელისუფლების დროს ძალიან ბევრი რამ გაკეთდა იმისთვის, რომ სვანეთი ჩამოყალიბდეს 12-თვიან კურორტად . სწორედ ჩვენი ხელისუფლების დროს აშენდა თეთნულდის საბაგიროები, მესტია-ჰაწვალის საბაგირო, მცირე საბაგიროების ინფრასტრუქტურა სოფლებში - ბეჩოში, მაზერში, ეწერში და სხვაგან. მაგრამ რა თქმა უნდა, ეს არის არის საკმარისი განსაკუთრებით ახლა, როდესაც მძიმე დარტყმა მიადგა ზოგადად გლობალურ ტურიზმს. სწორედ ამიტომ მიუხედავად იმისა, რომ ჩვენი მთელი რესურსები არსებითად გადართულია პანდემიასთან ბრძოლისკენ, ჩვენ მივიღეთ გადაწყვეტილება პირველ რიგში, ბატონმა პრემიერმა, ჩვენმა გუნდმა, რომ ძალიან სწრაფი ტემპით ულტრათანამედროვე ჰაწვალის ახალი საბაგირო მოესწროს. ეს არის დაახლოებით 34 მილიონი ლარის ინვესტიცია, რომელიც ვიცით, რომ ერთ ათად დაგვიბრუნდება“, - განაცხადა ნათია თურნავამ. მინისტრის თქმით, ეს არ არის ყველაფერი, რაც დაგეგმილია. როგორც ნათია თურნავამ აღნიშნა, უახლოეს პერიოდში ასევე დაიწყება კონკრეტულად სვანეთისთვის განკუთვნილი ძალიან საინტერესო პროექტები. „მოგეხსენებათ, პრემიერის დავალებით, შევიმუშავეთ ქვეყნის ეკონომიკის განვითარების 10-წლიანი გეგმა, მათ შორის ტურიზმის განვითარების და უახლოეს პერიოდში სვანეთისთვის გვაქვს განკუთვნილი ძალიან საინტერესო პროექტები. მაგალითად, ჰაწვალის ახალი საბაგიროს დასრულების შემდეგ იმისთვის, რომ ჰაწვალის ტურისტული კომპლექსი შეიკრას, აუცილებელია განხორციელდეს დიდი ხნის წინ დაგეგმილი პროექტი - რეინჰოლდ მესნერის მუზეუმის მოწყობა, რომელიც შეკრავს ამ ობიექტს. რა თქმა უნდა, ეს არ არის ერთ დღეში განსახორციელებელი პროექტი, მაგრამ აუცილებლად განხორციელდება“, - აღნიშნა ნათია თურნავამ. რაც შეეხება თეთნულდის კომპლექსს, ეკონომიკის მინისტრის განცხადებით, მომავალში აუცილებლად განიხილება მულახი-თეთნულდის საბაგირო მშენებლობა. „ძალიან მალე დავასრულებთ დაზიანებული ინფრასტრუქტურის აღდგენას და ამაზეც მივიღეთ დავალება, თუმცა ამავდროულად მომავალში აუცილებლად ვიფიქრებთ მულახი-თეთნულდის საბაგიროს განხორციელებაზე. ეს არ არის მცირე პროექტი, საკმაოდ მასშტაბურია, მაგრამ ამასაც განვახორციელებთ, ვსწავლობთ ამის პერსპექტივებს“, - განაცხადა ნათია თურნავამ.
