Washington Post-ის ცნობით, პენტაგონი უკრაინისთვის 675 მილიონი დოლარის ღირებულების სამხედრო დახმარების შესახებ გამოაცხადებს.
მედია ანონიმურ წყაროზე დაყრდნობით წერს, დახმარებაში სხვადასხვა აღჭურვილობასთან ერთად შედის დამატებითი ჭურვები HIMARS-ის სისტემებისთვის.
პენტაგონის შეფასებით, უკრაინული ძალები „ნელ, მაგრამ მნიშვნელოვან პროგრესს“ აღწევენ ბრძოლის ველზე და ამჟამად სამხრეთში უკეთესად მოქმედებენ, ვიდრე რუსი სამხედროები. ამის შესახებ Reuters-ი წერს.
„მე ვფიქრობ, რომ უკრაინელები ნელ, მაგრამ მნიშვნელოვან პროგრესს აღწევენ. ჩვენ ვნახავთ, როგორ განვითარდება მოვლენები, მაგრამ, რა თქმა უნდა, ვფიქრობ, რომ უკრაინის მხარეს ახლა უკეთესად მიდის საქმეები სამხრეთში, ვიდრე რუსეთის მხარეს“, - განაცხადა თავდაცვის მდივნის მოადგილემ, კოლინ კალმა Defense News-ის მიერ გამართულ ღონისძიებაზე.
ცნობისათვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.
რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა.
ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა.
„რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა. 23 ივლისს, Human Rights Watch-მა რუსეთის მიერ ოკუპირებულ სამხრეთ უკრაინის ტერიტორიაზე ადამიანების გატაცებისა და წამების შესახებ ანგარიში გამოაქვეყნა.
Human Rights Watch-ის მიერ სექტემბრის დასაწყისში გამოქვეყნებული ანგარიშის მიხედვით, უკრაინელები იძულებით გადაჰყავთ რუსეთში ან რუსეთის მიერ უკრაინის ოკუპირებულ ტერიტორიებზე.
დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.
