რუსი ოფიციალური პირები და მედიის პროპაგანდისტები, ხარკოვის ოლქში რუსეთის დამარცხების მიზეზებს განიხილავენ. ამის შესახებ ომის შემსწავლელი ინსტიტუტი თავის ანგარიშში წერს.
თავდაპირველად, რუსეთის თავდაცვის სამინისტრომ რუსეთის დამარცხება ანალოგიურად განმარტა, როგორც ეს გველების კუნძულიდან მისი ძალების გაყვანისას მოხდა.
მაშინ, კრემლი „კეთილ ჟესტზე“ საუბრობდა.
თუმცა, ISW წერს, რომ ამჯერად ამ ცრუ ნარატივს მნიშვნელოვანი ღია კრიტიკა მოჰყვა. ამერიკული ანალიტიკური ცენტრი წერს, თუ რაზე მუშაობენ ახლა „კრემლის წყაროები“. კერძოდ, მათი მიზანია, პუტინი გაათავისუფლონ დამარცხებაზე პასუხისმგებლობისგან“ და ცდილობენ, ეს პუტინის გარემოცვაში „არაინფორმირებულ სამხედრო მრჩევლებს“ დააბრალონ.
ცნობისათვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.
რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა.
ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა.
„რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა. 23 ივლისს, Human Rights Watch-მა რუსეთის მიერ ოკუპირებულ სამხრეთ უკრაინის ტერიტორიაზე ადამიანების გატაცებისა და წამების შესახებ ანგარიში გამოაქვეყნა.
Human Rights Watch-ის მიერ სექტემბრის დასაწყისში გამოქვეყნებული ანგარიშის მიხედვით, უკრაინელები იძულებით გადაჰყავთ რუსეთში ან რუსეთის მიერ უკრაინის ოკუპირებულ ტერიტორიებზე.
დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.
