საზოგადოება
N67 და N204 მიკროავტობუსები დროებით ახალი სქემით იმოძრავებენ
N67 და N204 მარშრუტებში მიმდინარე წლის 21 სექტემბრიდან ცვლილებები განხორციელდება და აღნიშნული მიკროავტობუსები დროებით ახალი სქემით იმოძრავებენ. მარშრუტი N67 - კორექტირება განხორციელდა მის გზასავალზე და მარშრუტი ჩამოყალიბდა შემდეგი სქემით: მეტროსადგურ „სადგურის მოედანი 1“-ის მიმდებარე ტერიტორია (წრე) - თამარ მეფის გამზირი - გმირთა მოედანი - პ. მელიქიშვილის ქუჩა - ი. თარხნიშვილის ქუჩა - ვ. ბარნოვის ქუჩა - მრგვალი ბაღი - მცხეთის ქუჩა - ტ. ტაბიძის ქუჩა - დარიალის ქუჩა - ი. აბაშიძის ქუჩა - ი. აბაშიძის ქუჩა - დარიალის ქუჩა - ტ. ტაბიძის ქუჩა - მცხეთის ქუჩა - მრგვალი ბაღი - ვ. ბარნოვის ქუჩა - ვ. პეტრიაშვილის ქუჩა - პ. მელიქიშვილის ქუჩა - მ. კოსტავას ქუჩა - შოთა რუსთაველის გამზირი - მ. კოსტავას ქუჩა - გმირთა მოედანი - თამარ მეფის გამზირი - „სადგურის მოედანი 1“-ის მიმდებარე ტერიტორია. მარშრუტი N204 - თიანეთის ქუჩისკენ გადაადგილებისას გზასავალი გაუგრძელდა მუხრანის ქ. N47-მდე და იმოძრავებს შემდეგი მარშრუტით: მ. წინამძღვრიშვილის ქუჩა N137 (აბასთუმნის ქუჩის კვეთის მიმდებარედ), - მ. წინამძღვრიშვილის ქუჩა - ა. წერეთლის გამზირი - თ. ერისთავის ქუჩა - დ. გურამიშვილის გამზირი - გუდამაყრის ქუჩა - ჩარგლის ქუჩა - მუხრანის ქუჩა, საიდანაც მიკროავტობუსი მობრუნდება მუხრანის ქუჩის N47-თან - თიანეთის ქუჩის N65-ის მიმდებარედ. რაც შეეხება ახალ მარშრუტებს, ვაკის რაიონში, აგარაკის ქუჩის მოსახლეობის მომსახურება: აგარაკის ქუჩა - ა. ვარაზის ქუჩა, საიდანაც მიკროავტობუსი მობრუნდება თხინვალას ქუჩის კვეთასთან - ბ. ჟღენტის ქუჩა - შ. ნუცუბიძის ქუჩა - ზ. ანჯაფარიძის ქუჩა - მეტროსადგურ „სახელმწიფო უნივერსიტეტის“ მიმდებარე ტერიტორია. ჩუღურეთის რაიონში, ივერთუბნის მოსახლეობის მომსახურება: გადასასვლელი ხიდის მიმდებარე ტერიტორია - ც. დადიანის ქუჩა - რ. ურიდიას ქუჩა - ნ. ხუდადოვის ქუჩა - ნ. აგიაშვილის ქუჩა - ბარაკონის ქუჩა - ორჯონიკიძე-ტოროშელიძის ქუჩებისა და მერი შერვაშიძის ქუჩის კვეთა. საბურთალოს რაიონში, სოფელ დიღომში არსებული მოციქულთა სწორი ნინოს ქ. I შესახვევის მიმართულებით, ბაგა ბაღისკენ მოძრავი მიკროავტობუსი: დიდგორის ქუჩა N1-ის მოპირდაპირედ - დიდგორის ქუჩა - მოციქულთა სწორი ნინოს ქუჩა - მოციქულთა სწორი ნინოს ქ. I შესახვევი - გიორგი ბრწყინვალეს ქუჩა - დიდგორის ქუჩა - გ. ათონელის ქუჩა - დ. სარაჯიშვილის ქუჩა - დიდგორის ქუჩა - გიორგი ბრწყინვალეს ქუჩა - მოციქულთა სწორი ნინოს ქ. I შესახვევი - მოციქულთა სწორი ნინოს ქუჩა - დიდგორის ქუჩა N1-ის მოპირდაპირედ იმოძრავებს წრიულად. ისნის რაიონში, მელაანის მე-5 შესახვევის მომსახურება: მელაანის V შესახვევი N43-ის მიმდებარედ - ჯ. ბუშის ქუჩა - კახეთის გზატკეცილი - ვ. ჩაჩავას ქუჩა - აწყურის ქუჩა - კახეთის I შესახვევი - ქეთევან დედოფლის გამზირი - ნავთლუღის ქუჩა - ლობჟანიძის ქუჩა - ს. დოდაშვილის ქუჩა - ს. წულაძის ქუჩა - ციხისძირის ქუჩა - სამგორის ქუჩა - მეველეს ქუჩა (ქეთევან დედოფლის გამზირის გადაკვეთის მიმდებარე ტერიტორია). ისნის რაიონში, ე.წ. „დირსის“ დასახლების მომსახურება: შ. ნადირაშვილის ქუჩა - ბერი გაბრიელ სალოსის გამზირი - წულაძის ქუჩა - ციხისძირის ქუჩა - მეველეს ქუჩა (მეტროსადგურ „სამგორის“ მიმდებარე ტერიტორია).
"რაც შეიძლება სწრაფად უნდა გადავიდეთ ბინაზე მოვლის მეთოდზე"
"რაც შეიძლება სწრაფად უნდა გადავიდეთ ბინაზე მოვლის მეთოდზე" - ამის შესახებ ინფექციონისტმა მაია ბუწაშვილმა ჟურნალისტებთან კორონავირუსის ეპიდვითარებაზე საუბრისას განაცხადა. ბუწაშვილი მიიჩნევს, რომ თუ ყველა უსიმპტომო და მსუბუქი პაციენტი სტაციონარში განთავსდება, ამას ჯანდაცვის სისტემა ვერ გაუძლებს, ამიტომ სტაციონარში მხოლოდ გართულებული და კრიტიკული პაციენტები უნდა გადავიდნენ. „საბედნიეროდ, შემთხვევათა უმეტესობა უსიმპტომოა, ან მსუბუქი. დღეს სტაციონარში წვება ყველა, ვისაც არ აქვს სიმპტომები. აჭარაში, როგორც ვიცი, გარკვეული პრობლემებია, ჰოსპიტლები გადაჭედილია. რაც შეიძლება სწრაფად უნდა გადავიდეთ ბინაზე მოვლის მეთოდზე, როგორც არის ეს მსოფლიოს უმრავლეს ქვეყანაში. ამის პროტოკოლი არსებობს, რომელიც ჯანდაცვის სამინისტრომ დაამტკიცა. მთავარია, დროულად შევიდეს ძალაში. ყველა უსიმპტომო და მსუბუქი პაციენტი თუ ისევ მოთავსდება სტაციონარში, ამას ჩვენი ჯანდაცვის სისტემა ვერ გაუძლებს. ამის საჭიროებაც არ არის. სხვა რესპირაციული დაავადებების დროსაც შეიძლება ბინაზე დარჩეს პაციენტი, განსაკუთრებით ის, ვისაც აქვს საშუალება იზოლირებული იყოს. თუმცა, ეს არ ნიშნავს რომ ადამიანი უნდა მივატოვოთ ბინაზე, იმიტომ რომ კორონავირუსის თავისებურება არის ის, რომ თავიდან ,შესაძლოა, მსუბუქად ან უსიმპტომოდ იწყებოდეს, შემდეგ კი უცებ გართულდეს. ამის რისკი არსებობს. ოჯახის ექიმები გადამზადებულები არიან იმისთვის, რომ პერიოდულად დისტანციურად შეაფასონ მდგომარეობა, ხომ არ არის აუცილებელი დამატებითი გამოკვლევა. ამ მოდელზე უნდა გადავიდეთ, რაც შეიძლება, სწრაფად. მხოლოდ გართულებული და კრიტიკული პაციენტები უნდა მოხვდნენ სტაციონარებში. ასეთების პროცენტული წილი 20%-ს არ აღემატება“, - განაცხადა მაია ბუწაშვილმა. მიმდინარე სტატისტიკა: კორონავირუსის დადასტურებული შემთხვევა - 3119; გამოჯანმრთელებული - 1435; გარდაცვლილი - 19; კარანტინის რეჟიმში - 5014; სტაციონარში მეთვალყურეობის ქვეშ - 836; უცხოეთიდან სამკურნალოდ გადმოყვანილი საქართველოს მოქალაქეები - 41;
„ბავშვისთვის კითხვის სწავლება სკოლის საქმეა"
„ბავშვისთვის კითხვის სწავლება არის სკოლის საქმე, მშობლებმა ბავშვს ინფორმაცია და უნარები ძალით არ უნდა ჩატენონ", - ამის შესახებ ფსიქოლოგმა ცირა ბარქაიამ გადაცემაში „იმედის დღე“ ისაუბრა. „რას ვეძახით ზოგადად მზაობას? პირველ რიგში, იმას, რომ ბავშვი თავს კარგად გრძნობს სკოლაში, მას აქვს გარკვეული ინფორმაცია ამ დაწესებულების შესახებ, რაც ნიშნავს იმას, რომ თავის დროზე მას მშობლებმა ინფორმაციით შეუწყვეს ხელი, გააგებინეს, რა დახვდება სკოლაში. სასწავლო მზაობა წერა-კითხვის ცოდნას არ გულისხმობს. ხშირად, როდესაც სასკოლო უნარებზეა საუბარი, აღვიქვამთ, რომ კითხვა უნდა იცოდეს ბავშვმა, წერა უნდა იცოდეს, ასოების ცნობა უნდა შეეძლოს. რა თქმა უნდა, ეს ასე არ არის. ბავშვისთვის კითხვის სწავლება არის სკოლის საქმე. როდესაც ასაკის შესაბამის განვითარებაზე ვსაუბრობთ, ვგულისხმობთ, რომ ბავშვი როდესაც სკოლაში შევა, მაშინ უნდა ისწავლოს კითხვა. მაშინ არის ის მზად, რომ დაეუფლოს წერა-კითხვას". ცირა ბარქაია აღნიშნავს, რომ მშობელმა ბავშვს კითხვა მხოლოდ იმ შემთხვევაში უნდა ასწავლოს, თუ ამას ბავშვი თავად ითხოვს. „თუ ბავშვი გამოხატავს მზაობას და ინტერესს სწავლის მიმართ, ეს იმას ნიშნავს, რომ ის მზად არის კონკრეტული ინფორმაციის ასათვისებლად. თუ ბავშვი ამბობს, რომ კითხვა, ხატვა ან ხაზვა უნდა, ეს იმას ნიშნავს, რომ მას ამის გაკეთება შეუძლია. ეს იმას არ ნიშნავს, რომ მშობლებმა ბავშვს ძალით ჩატენონ ინფორმაცია და უნარები. „უნდა ისწავლო კითხვა, უნდა ისწავლო წერა,“ მსგავსი ფრაზები საჭირო არ არის.“ ფსიქოლოგის თქმით, მოსწავლეებს შორის ჯანსაღი ურთიერთობების ჩამოყალიბებაზე მასწავლებელმა უნდა იზრუნოს. „სკოლაში მოსწავლეები ბევრი რამით განსხვავდებიან, მაგ. ვის როგორი მობილური უჭირავს, ვის რა რესურსები აქვს, ვის წიგნი აქვს, ვის რვეული. ბავშვებს კომპლექსები რომ არ გაუჩნდეთ, ეს პროცესი აუცილებლად მასწავლებელმა უნდა დაარეგულიროს. ინკლუზიურობა მხოლოდ სპეციალური საგანმანათლებლო საჭიროების, შეზღუდული შესაძლებლობების მქონე ბავშვების ჩართულობას ხომ არ გულისხმობს, ინკლუზიურობა ნიშნავს, რომ ყველა ბავშვს ინდივიდუალური შესაძლებლობები აქვს და მასწავლებელმა ეს ყველაფერი უნდა დაარეგულიროს. როდესაც ვიღაცამ იცის კითხვა, ვიღაცამ არ იცის, თანატოლებმა ერთმანეთს არ უნდა დასცინონ. რა თქმა უნდა, პროცესში მშობლის ჩართულობა ძალიან მნიშვნელოვანია. ბავშვს სჭირდება მშობლის დახმარება რუტინის აწყობაში, როგორ იმეცადინოს, როგორი რუტინა უნდა ჰქონდეს, როგორ განეწყოს სამეცადინოდ. თავიდან, ცხადია, მას მშობელი უნდა დაეხმაროს. ეს არ უნდა მოხდეს იმის მერე, რაც ბავშვი სკოლაში სიარულს დაიწყებს. რუტინის აწყობა იწყება მანამდე. სკოლამდელი აღზრდის დაწესებულებაც ამ მხრივ ძალიან დიდ როლს ასრულებს. საჭიროა, რომ ბავშვი გარკვეულ დღის წესრიგს გადიოდეს. პანდემიის მოცემულობაში ვითარება სწრაფად იცვლება. ამ სპონტანურ გარემოს ზრდასრულები ვერ ვეწევით. ძალიან რთულია, რომ ბავშვი გამოყვეს ჩვენს დაბნეულობას. ამ ეტაპზე სიტუაციურად მშობელი უფრო მეტად უნდა იყოს ჩართული ბავშვთან მუშაობაში. მნიშვნელოვანია, რა მხარდაჭერას სთავაზობს სახელმწიფო სასწავლო დაწესებულებებს და შემდგომ დაწესებულებები რა მხარდაჭერას სთავაზობენ მშობლებს. დამატებითი მხარდაჭერის სერვისები, ცხადია, ამ შემთხვევაში მნიშვნელოვანია", - აცხადებს ცირა ბარქაია.
ოკუპირებული აფხაზეთი კორონავირუსთან დაკავშირებით ახალ შეზღუდვებს აწესებს
აფხაზეთის ოკუპირებული რეგიონის დე-ფაქტო ხელისუფლება კორონავირუსთან დაკავშირებით მიმდინარე წლის 5 ოქტომბირდან ახალ შეზღუდვებს აწესებს, - ამის შესახებ ინფორმაციას ადგილობრივი მედია ავრცელებს. მათივე ინფორმაციით, ე.წ. „პრეზიდენტმა“, ე.წ. „მოსახლეობის კორონავირუსისგან დაცვის საკოორდინაციო შტაბის“ გადაწყვეტილების საფუძველზე, ხელი მოაწერა ბრძანებას შეზღუდვების დაწესების შესახებ. შეზღუდვები ითავლისწინებს: მასობრივი სპორტული, გასართობი და საგამოფენო ღონისძიებების ჩატარების აკრძალვას დახურულ შენობებში. გამონაკლისი დაიშვება მხოლოდ კულტურული დაწესებულებებისათვის, რომლებიც ვალდებულები იქნებიან შეასრულონ შემდეგი მოთხოვნები: თანამშრომლებმა უნდა გამოიყენონ დაცვის ინდივიდუალური საშუალებები, ღონისძიებების სტუმრებმა ადგილები დარბაზებში ორი ადგილის გამოტოვებით უნდა დაიკავონ, შენობების ყოველდღიური დეზინფექცია კი ყოველდღიურად უნდა განხორციელდეს. იკრძალება საქორწილო და სხვა სახის საზეიმო ღონისძიებები. რეკომენდირებულია სამგლოვიარო და ხსოვნის ცერემონიალებში მონაწილე პირების რაოდენობის შეზღუდვა. კვების ობიექტებს დაავალეს, მომხმარებლებისთვის განკუთვნილი მაგიდები ერთმანეთისგან სულ მცირე 1.5- მეტრიანი დაშორებით განათავსონ. საკვების, სოფლის მეურნეობის პროდუქტებისა და ტანსაცმლის ბაზრობების ადმინისტრაციებს სოხუმსა და რეგიონებში დაავალეს, რომ სადეზინფექციო სამუშაოები ყოველ დღე განახორციელონ. ცნობისათვის, დე-ფაქტო ხელისუფლების მონაცემებით, ოკუპირებულ აფხაზეთში კორონავირუსის 782 შემთხვევაა დადასტურებული, აქედან დაღუპულია 7 ადამიანი.
„საზოგადოება ითხოვდა ჩვენგან გამარჯვებას და ჩვენ ეს შევძელით“ - ექსკლუზივი
„საზოგადოება ითხოვდა ჩვენგან გამარჯვებას და ჩვენ ეს შევძელით“, - ასე ეხმაურება თბილისის ლოკომოტივის მთავარი მწვრთნელი გია ჭიაბრიშვილი მოსკოვის დინამოსთან გუშინ გამართულ მატჩს, რომელიც თბილისის დინამოს გამარჯვებით დასრულდა. როგორც „ევროპათაიმს“ ჭიაბრიშვილი უყვება, გამარჯვება ყოველთვის აბედნიერებს ადამიანს, თუმცა ეს თამაში თამაშზე მეტი იყო. „საზოგადოება ითხოვდა ჩვენგან გამარჯვებას და ჩვენ ეს შევძელით. ჩვენთვის ეს ერთი რიგითი თამაში ვერ იქნებოდა, ამის გარდა ჩვენ მოვუგეთ ძლიერ,მაღალბიუჯეტიან გუნდს. ჩემთვის პოლიტიკა და სპორტი გამიჯნულია, თუმცა მესმის საზოგადოების და იმ ემოციების რაც ამ თამაშმა გამოიწვია. ჩვენ ჩვენი საქმე და ჩვენი ბრძოლა გვაქვს. ყოველთვის მაქსიმალურად უნდა დაიხარჯო შენს პროფესიაში და უნდა იბრძოლო შენი ქვეყნის წარმატებისთვის". რაც შეეხება იმას, იყო თუ არა რთული თამაში მაყურებლის გარეშე, ჭიაბრიშვილი ამბობს რომ „მაყურებლის გარეშე თამაშს თავისი სირთულეები აქვს, მაგრამ გუშინ, მიუხედავად იმისა, რომ თამაში მაყურებლის გარეშე გაიმართა სტადიონზე, ჩვენ სხვადასხვა არხებით ძალიან დიდ მხარდაჭერას ვგრძნობდით. მთელი დღე არ წყდებოდა ზარები მეგობრების, ახლობლების თუ უბრალოდ მხარდამჭერების მხრიდან“. გუნდს მორიგი თამაში ესპანურ გუნდთან აქვს და მწვრთნელი იმედოვნებს რომ მორიგი მატჩიც წარმატებით დასრულდება. „მორიგი თამაში ესპანეთში გვექნება. საკმაოდ ძლიერი გუნდია, ჩვენ ვეცდებით მაქსიმუმი გავაკეთოთ. ჩვენ არაფერი გვაქვს დასაკარგი და სანერვიულო. რაც შეეხება სამომავლო გეგმებს, ჭიაბრიშვილის თქმით, მისი მიზანი რაც შეიძლება კარგი გუნდის ჩამოყალიბებაა“. შეგახსენებთ, რომ ევროპალიგის მეორე საკვალიფიკაციო ეტაპზე თბილისის "ლოკომოტივმა" მოსკოვის "დინამო" 2:1 დაამარცხა და მომდევნო ეტაპზე გავიდა, სადაც მისი მეტოქე ესპანური "გრანადა" იქნება. მატჩს „მიხეილ მესხი 2“-მა უმასპინძლა. მატჩის პირველ ტაიმში უპირატესობას მოსკოველები ფლობდნენ, პირველი სახიფათო მომენტი სწორედ მათ შექმნეს, თუმცა შესვენებაზე ანგარიში 0:0 იყო.მეორე ნახევარში თბილისელებმა გოლი გაიტანეს, თორნიკე კირკიტაძის ჩაწოდებით, ირაკლი სიხარულიძემ 1:0 დააფიქსირა. 76-ე წუთზე კი გავაშელიშვილმა მეორე გოლი გაიტანა.მატჩის ბოლოს მოსკოვის „დინამოს“ ფეხბურთელებმა პენალტი მოიპოვეს, რომლითაც ანგარიში შემცირდა 2:1.
"უარს არ ამბობენ დიდ ქორწილებზე, კვლავ ტარდება, რაც ძალიან ცუდია, თავი შევიკავოთ"
ინფექციური საავადმყოფოს სამდიცინო დირექტორის მარინა ეზუგბაიას განცხადებით, საზოგადოება ისევ არ ამბობს უარს დიდ ქორწილებზე, კვლავ, ტარდება, რაც ძალიან ცუდია. ეზუგბაიას თქმით, დიდი თავყრილობები კორონავირუსის ინფექციის გავრცელებას უწყობს ხელს. „2-3 დღეა, თითქმის სტაბილური მონაცემებია, თუ გავითვალისწინებთ იმას, რომ PCR დიაგნოსტიკა მკვეთრად გაზრდილია. PCR ტესტირება 2 კვირაში ძალიან გაზრდილია, თითქმის გაორმაგებულია. გუშინდელი მონაცემებით, ჩატარებულია 13 226 ტესტი. ასეთი გაზრდილი ტესტირების ფონზე, მაჩვენებლების მნიშვნელოვანი ზრდა არ შეინიშნება. ჩვენ, მოქალაქეებს მაღალი პასუხისმგებლობა გვქონდა, შევინარჩუნოთ და გავაგრძელოთ, რეგულაციები შევასრულოთ. როგორც გუშინ გახდა ცნობილი, ისევ არ ამბობენ უარს დიდ ქორწილებზე, კვლავ, ტარდება, ეს ძალიან ცუდია. თავი შევიკავოთ, კარგია ეს ყველაფერი მაგრამ ვეცადოთ, დიდ თავყრილობებს თავი მოვარიდოთ, რათა დაავადება არ გავრცელდეს. თუ რეგულაციებს შევასრულებთ, თავყრილობების შემცირებით და ნორმების გათვალისწინებით ეს მიღებული მონაცემები ალბათ სტაბილური იქნება და ამას ალბათ, მოჰყვება ახალი შემთხვევების შემცირება და დაღმართი. მოგმართავთ თხოვნით, გავუფრთხილდეთ ოჯახებს, საკუთარ თავს, მეგობრებს. დავიცვათ ერთმანეთი“, - განაცხადა მარინა ეზუგბაიამ. რაც შეეხება თბილისის ინფექციურ საავადმყოფოს, მარინა ეზუგბაიას თქმით, ამ დროისთვის თბილისის ინფექციურ საავადმყოფოში 34 ინფიცირებული მკურნალობს, აქედან ერთი კრიტიკულად მძიმეა, 4 კი მძიმე პაციენტი.
თბილისის "ლოკომოტივმა" მოსკოვის "დინამო" დაამარცხა
ევროპალიგის მეორე საკვალიფიკაციო ეტაპზე თბილისის "ლოკომოტივმა" მოსკოვის "დინამო" 2:1 დაამარცხა და მომდევნო ეტაპზე გავიდა, სადაც მისი მეტოქე ესპანური "გრანადა" იქნება. მატჩს „მიხეილ მესხი 2“-მა უმასპინძლა. მატჩის პირველ ტაიმში უპირატესობას მოსკოველები ფლობდნენ, პირველი სახიფათო მომენტი სწორედ მათ შექმნეს, თუმცა შესვენებაზე ანგარიში 0:0 იყო. მეორე ნახევარში თბილისელებმა გოლი გაიტანეს, თორნიკე კირკიტაძის ჩაწოდებით, ირაკლი სიხარულიძემ 1:0 დააფიქსირა. 76-ე წუთზე კი გავაშელიშვილმა მეორე გოლი გაიტანა. მატჩის ბოლოს მოსკოვის „დინამოს“ ფეხბურთელებმა პენალტი მოიპოვეს, რომლითაც ანგარიში შემცირდა 2:1. თბილისის „ლოკომოტივმა“ მოსკოვის „დინამო“ დაამარცხა.
საქართველოში კორონავირუსის 182 ახალი შემთხვევა დაფიქსირდა
საქართველოში კორონავირუსის 182 ახალი შემთხვევა დაფიქსირდა, აქედან 129 აჭარაში. ინფექციური საავადმყოფოს სამედიცინო დირექტორის მარინა ეზუგბაიას განცხადებით, ბოლო 24 საათში თბილისში კორონავირუსის 34 ახალი შემთხვევა დაფიქსირდა. „დაგვემატა 182 ახალი შემთხვევა და ჯამში გვაქვს 3119 დადასტურებული შემთხვევა. ამ 182 დადასტურებული შემთხვევიდან, აჭარაში არის - 129 შემთხვევა, აქედან ბათუმი - 114, ქობულეთი - 11, 3 - ქედაში, 1 - შუახევში. თბილისში არის 34 დადასტურებული შემთხვევა, იმერეთში - 11, ქვემო ქართლი - რუსთავში - 4, გურიაში - 3, კახეთში - 1. გამოჯანმრთელებულების რიცხვის მოხლოდ 13-ით გაიზარდა და 1435 გახდა“, - განაცხადა მარინა ეზუგბაიამ. მიისვე ინფორმაციით, ქვეყანაში კორონავირუსით ინფიცირებული 11 კრიტიკულად მძიმე და 75-ზე მეტი მძიმე პაციენტია. მიმდინარე სტატისტიკა: კორონავირუსის დადასტურებული შემთხვევა - 3119; გამოჯანმრთელებული - 1435; გარდაცვლილი - 19; კარანტინის რეჟიმში - 5014; სტაციონარში მეთვალყურეობის ქვეშ - 836; უცხოეთიდან სამკურნალოდ გადმოყვანილი საქართველოს მოქალაქეები - 41;
სად, როგორ, რა ფასად შეგიძლია გაიკეთო PCR ტესტი?
COVID19-ით ინფიცირებულთა მატებასთან ერთად, იმატა PCR ტესტირების მსურველთა რაოდენობამაც. დაავადებათა კონტროლის ცენტრის ოფიციალური მონაცემებით, 17 სექტემბერს, საქართველოში, 12 000-მდე PCR ტესტი ჩატარდა. ტესტირებულ პირთა ნაწილი, სავალდებულო ტესტირების წესს დაექვემდებარა, მათ შორის, დადასტურებული შემთხვევების კონტაქტები, ე.წ. წითელ ზონაში მოგზაურობის ისტორიის მქონე პირები, „ცხელების ცენტრებში“, სამედიცინო დაწესებულებებში, ცხელებით მოხვედრილი პაციენტები, ექიმები, საკარანტინე სივრცეებში მყოფი პირები, მძღოლები და ა.შ. რაც შეეხება დანარჩენ მოქალაქეებს, რომლებიც სავალდებულო ტესტირების წესს არ ექვემდებარებიან, მათ საკუთარი სურვილით ჩაიტარეს ტესტი COVID19-ზე. როგორია სავალდებულო და საკუთარი გადაწყვეტილებით ტესტირებულთა თანაფარდობა, ეს მონაცემები დაავადებათა კონტროლის ცენტრის სტატისტიკურ მონაცემებში არ არის ასახული. კლინიკები და ლაბორატორიები - როგორ გაიკეთოთ PCR ტესტი? თუკი პირი სავალდებულო ტესტირების დადგენილ წესს არ ექვემდებარება, მაგრამ სურს გაიკეთოს ტესტი, ამ შემთხვევაში, მან თავად უნდა მიმართოს იმ ლაბორატორიებს, სადაც PCR ტესტირება ტარდება. როგორც ჯანდაცვის სამინისტროში გვეუბნებიან, ქვეყნის მასშტაბით, ასეთი 25 ლაბორატორიაა. ტესტის ღირებულება 110 ლარიდან 220 ლარამდე მერყეობს, გააჩნია პასუხის ვადებს;პასუხების მიღების ვადა 24-48 საათია. დაჩქარებული პასუხის მოთხოვნის შემთხვევაში, იზრდება თანხა, თუმცა, მცირდება დრო და ნაცხის აღებიდან რამდენიმე საათში, პასუხი მზადაა;ზოგიერთ ლაბორატორიაში, PCR ტესტის ასაღებად, წინასწარ უნდა ჩაეწეროთ. თუმცა, შეგიძლიათ ისარგებლოთ ე.წ. ცოცხალი რიგითაც.ზოგიერთი ლაბორატორია უზრუნველყოფს ბინაზე მომსახურებასაც.კლინიკა „ნიუ ჰოსპიტალში“, უკანასკნელი დღე-ღამის განმავლობაში, 600-მდე PCR ტესტი გამოიკვლიეს. კლინიკის ლაბორატორიაში მუშავდება როგორც თავად „ნიუ ჰოსპიტალში“ აღებული ტესტები, ისე სხვადასხვა კლინიკიდან შესული ნიმუშები. გიორგი კორძახია, „ნიუ ჰოსპიტალსის“ მთავარი ექიმი და კლინიკური დირექტორი, რადიო თავისუფლებას ეუბნება, რომ საკმაოდ მცირეა იმ ადამიანების რიცხვი, რომლებიც საკუთარი გადაწყვეტილებით იკეთებს PCR ტესტს: „ლაბორატორია ემსახურება როგორც სავალდებულო ტესტირების წესს დაქვემდებარებულ პირებს, ისე მათ, ვისაც ამის ეპიდემიოლოგიური საჭიროება არ აქვს და თავისი სურვილით იკეთებს ტესტს. ჩვენს კლინიკაში ტესტის ჩასატარებლად, წინასწარ ჩაწერა არ არის საჭირო. ტესტის ღირებულება შეადგენს 120 ლარს. პასუხი კი 24 საათშია მზად. რაც შეეხება ტესტირების მსურველთა რაოდენობას, შესაძლოა, შედარებით მეტი ადამიანი იყოს დღის პირველ ნახევარში, 3 საათამდე, თუმცა, ამას რიგებს ნამდვილად ვერ დავარქმევთ. თავად ტესტის აღების პროცედურა საკმაოდ მცირე-ხნიანია, თუმცა, უსაფრთხოების ზომებია დასაცავი და ამიტომ, ყველა წესის დაცვით უნდა ჩატარდეს პროცედურა. შესაძლოა, ამის გამო გაჩნდეს განცდა, რომ თითქოს რიგში უწევთ დგომა, მაგრამ რეალურად, შეგვიძლია ვთქვათ, რომ მოცდის პერიოდი, ნამდვილად არ არის ხანგრძლივი“. ბინაზე მომსახურების სერვისს სთავაზობს PCR ტესტირების მსურველებს ლაბორატორია „ციტო“. თუმცა, ამ შემთხვევაში, ტესტის ღირებულება 200 ლარს შეადგენს. პასუხის დამზადების მაქსიმალური დრო 24 საათია. ტესტის გაკეთების მსურველებს წინასწარ, მაგალითად, ერთი კვირით ადრეც უწევთ თადარიგის დაჭერა. თუმცა, როგორც ლაბორატორიის COVID-პროგრამის ხელმძღვანელი, მარიამ ჯამაგიძე ეუბნება რადიო თავისუფლებას, აუცილებლობის შემთხვევაში, ლაბორატორიული ჯგუფი, შესაძლოა, იმავე დღესაც მოემსახუროს პაციენტს: „რა თქმა უნდა, დილაობით არის ზარები, რომ დღეს ესაჭიროებათ ტესტის ჩატარება და ვცდილობთ, შეძლებისდაგვარად დავაკმაყოფილოთ მათი მოთხოვნა. თუმცა, არის შემთხვევები, როდესაც ასეთ დროს, ფიზიკურად ვერ ასწრებს ლაბორატორია მისამართზე მისვლას და მაქსიმუმ, მეორე დილისთვის ვნიშნავთ ტესტს“. გამოცდილება - ვინ როგორ გაიკეთა PCR ტესტი? ირაკლი გაფრინდაშვილმა და მისმა ცოლმა, PCR ტესტი რამდენიმე დღის წინ, „ნეოლაბში“ გაიკეთეს. ტესტის პასუხები იმავე საღამოს მიიღეს:“ „ჩემს ცოლს ჰქონდა სიცხე. შეგვეშინდა და ტესტის აღება გადავწყვიტეთ. „ნეოლაბში“ მივედით. პატარა რიგი იყო. დაახლოებით 10 წუთი ვიდექით. თვითონ პროცედურა საკმაოდ ხანმოკლეა. პასუხები იმავე საღამოს მივიღეთ. კოვიდი არ აღმოგვაჩნდა“. „ნეოლაბს“ მიმართა ტესტის გასაკეთებლად ანდრო დადიანმაც. თვითიზოლაციის ბოლო დღეს მას ე.წ. სავალდებულო ტესტის ჩატარება უწევდა, შესაბამისად, მას ტესტის საფასური არ გადაუხდია. თუმცა, მასთან ერთად მყოფ ოჯახის წევრებს, რომლებიც უკრაინის მოქალაქეები არიან, ტესტის ღირებულების გადახდა მოსთხოვეს: „რომ ჩამოვედით, პირველი ტესტი უფასოდ აუღეს. თუმცა, განმეორებით ტესტზე უკვე თანხა მოითხოვეს. 200 ლარი ღირდა ტესტი, ჯამში 800 ლარი უნდა გადამეხადა, ამიტომ მათ ტესტი აღარ ავუღე. მე ტესტი ორი დღის წინ გავიკეთე, თუმცა, პასუხი, ჯერჯერობით, არ ვიცი, აქამდე არავინ დამკავშირებია. ალბათ უარყოფითია და ამიტომ არ შემატყობინეს აქამდე“ „ევექსში“ გაიკეთა ტესტი ანა გრემელაშვილმა. იქ ოჯახის ექიმმა გადაამისამართა. მისი ტესტის ღირებულება სადაზღვევო კომპანიამ აანაზღაურა: „ფარინგიტი მაქვს. ყელი ხშირად მტკივა, თუმცა, ერთ საღამოს დაბალი ტემპერატურაც მქონდა და შემეშინდა. ოჯახის ექიმმა მითხრა, მაინც გადავამოწმოთო. კარგია, რომ რიგში დგომა არ მომიწია, მხოლოდ მე ვიყავი. პასუხი მეორე დღეს მივიღე, საბედნიეროდ, უარყოფითი“. სალომემ და მისმა შვილმა PCR ტესტი „მედკაპიტალში“ გაიკეთეს. როგორც კლინიკის წარმომადგენელმა აუხსნა რადიო თავისუფლებას, მათი ლაბორატორია მხოლოდ აჭარაში მოგზაურობის ისტორიის მქონე პირებსა და სახელმწიფო სტრუქტურებში, მათ შორის, შინაგან საქმეთა სამინისტროში, თავდაცვის სამინისტროში დასაქმებულ პირებს და ასევე, პედაგოგებს ემსახურება. ლუგარის ლაბორატორიაში გაიკეთა PCR ტესტი, სამი დღის წინ, რუსუდანმა: „ხალხი იყო, მაგრამ ბევრი არა. დაახლოებით 30 წუთი ველოდი ჩემს რიგს. პრობლემა არ შემქმნია. ცოტას კი ვნერვიულობდი, მაგრამ ყველაფერმა კარგად ჩაიარა“. სად შეგიძლიათ ჩაიტაროთ PCR ტესტი? თუკი თქვენ არ ექვემდებარებით სავალდებულო ტესტირების დადგენილ წესს, მაშინ PCR ტესტი, საქართველოს მასშტაბით, შეგიძლიათ ჩაიტაროთ შემდეგ კლინიკებში: „ულტრამედი“, „მედისონი“, „მედკაპიტალი“, „ნეოლაბი“, „ციტო“, „ევექსი“, „გორმედი“, „ჯეოჰოსპიტალსი“, „ინფექციური პათოლოგიისა და იმუნოლოგიის ცენტრი“, „ონის სამედიცინო დაწესებულება“, „ზუგდიდი ინფექციური საავადმყოფო“. წყარო
1 ოქტომბრიდან აფხაზეთში ელექტროენერგიის გათიშვა დაანონსდა
ოკუპირებულ აფხაზეთში 1 ოქტომბრიდან ელექტროენერგიის გათიშვები დაიწყება. ამის შესახებ დღეს კომპანია "ჩერნომორენერგოს" წარმომადგენლებმა "ენგურჰესის" ხელმძღვანელ ლევან მებონიასთან შეხვედრის დასრულების შემდეგ განაცხადეს. «მაღალი ალბათობით, 1 ოქტომბრიდან შემოღებული იქნება შეზღუდვები მომხმარებლებისთვის ელექტროენერგიის მიწოდებაზე – ე.წ. მარაოსებური გათიშვები. განრიგს მოსახლეობას წინასწარ შევატყობინებთ», – განაცხადა დღეს კომპანია “ჩერნომორენერგოს” ოპერატიულ-ტექნიკური სამმართველოს დირექტორმა რუსლან ქვარჩიამ. "ენგურჰესის" ხელმძღვანელ ლევან მებონიას განცხადებით, 2021 წლის 15 თებერვლისთვის აფხაზეთში ელექტროენერგიის დეფიციტმა შესაძლოა, 150 მლნ კვტ/სთ შეადგინოს.ამასთან, სარემონტო სამუშაოების გამო 15 თებერვალს ელექტროსადგურის მუშაობა რამდენიმე თვით შეჩერდება. ადრე გავრცელებული ინფორმაციის თანახმად, სოხუმი მოსკოვთან ელექტროენერგიის გადაქაჩვის საკითხს განიხილავდა. «ენგურჰესი» აფხაზეთისთვის ელექტროენერგიის ერთადერთ წყაროს წარმოადგენს. სადგურის დადგმული სიმძლავრე 1300 მვტ-ს შეადგენს. კაშხალი საქართველოს ცენტრალური ხელისუფლების მიერ კონტროლირებად ტერიტორიაზეა განთავსებული, მართვის პულტი – აფხაზურ მხარეს.
Wizz Air-ი განცხადებას ავრცელებს
ავიაკომპანია Wizz Air-ი ოფიციალურ განცხადებას ავრცელებს, რომელსაც უცვლელად გთავაზობთ "Wizz Air-ი მუდმივ კომუნიკაციასა და კოორდინაციაშია საქართველოს მთავრობასთან და მზად არის, განაახლოს ფრენები, როგორც კი მიღებული რეგულაციები მოგვცემს ამის საშუალებას. ქუთაისი-რიგის მიმართულებით ფრენები განახლდება 4 ოქტომბრიდან - ბილეთები უკვე შეგიძლიათ დაჯავშნოთ wizzair.com-ზე ან ავიაკომპანიის მობილური აპლიკაციის საშუალებით. Wizz Air დროულად აცნობებს მგზავრებს ნებისმიერი სხვა მიმართულებით ფრენების განახლების შესახებ”, - ნათქვამია განცხადებაში. ცნობისთვის: როგორც დღეს საქართველოს პრემიერმა თქვა, 1 ოქტომბრიდან Wizz Air-ი ქუთაისიდან რიგის მიმართულებით ფრენები გაიხსნება. გიორგი გახარიას განცხადებით, მთავრობა ფრთხილად გააგრძელებს საჰაერო სივრცის გახსნას ეპიდემიოლოგიური ვითარებიდან და ქვეყნის ეკონომიკური ინტერესებიდან გამომდინარე. „დღეს უნდა განვიხილოთ და ფაქტობრივად, წინასწარი განხილვებით შემდგარია შეთანხმება, რომ ჩვენ, კიდევ ერთი მიმართულებით, პირდაპირი ფრენები უნდა გავხსნათ. დღეის მდგომარეობით, პირდაპირი ფრენები ევროპის მიმართულებით თბილისიდან გახსნილია საერთაშორის ავიაკომპანიებისთვის, როგორიც არის Lufthansa, air france, Airbaltic, ასევე ჩვენი ეროვნული გადამზიდავისთვის. ჩვენ, დღეს უკვე გადავწყვიტეთ, რომ 1-ლი ოქტომბრიდან, გავხსნათ პირდაპირი რეისი ქუთაისიდან რიგის მიმართულებით. ეს იქნება Wizz Air-ი. ეს არ იქნება თამამი გადაწყვეტილება, ეს იქნება მხოლოდ და მხოლო კვირაში ერთი რეისი, მაგრამ ეს არის პირდაპირი ტენდენცია იმისთვის, რომ გონივრულად, მაგრამ ფრთხილად, ჩვენ ყველაფერი უნდა გავაკეთოთ იმისთვის, რომ ეკონომიკა ამოძრავდეს კიდევ უფრო სწრაფად. ეს, რა თქმა უნდა, პირველ რიგში, კეთდება ჩვენი მოქალაქეების ინტერესების და უპირობოდ, მათი ჯანმრთელობის და სიცოცხლის დაცვლის გათვალისწინებით. ჩვენ, ასევე ფრთხილად, მაგრამ თანმიმდევრულად გავაგრძელებთ საქართველოს საჰაერო სივრცის გახსნას, პირველ რიგში, ეპიდემიოლოგიური მდგომარეობიდან გამომდინარე და ასევე, რა თქმა უნდა, ეკონომიკური ინტერესებიდან გამომდინარე“, - აღნიშნა პრემიერ-მინისტრმა.
ჯანმო ევროპას სავალდებულო კარანტინის ხანგრძლივობასთან დაკავშირებით აფრთხილებს
ჯანდაცვის მსოფლიო ორგანიზაცია ევროპის ქვეყნებს სავალდებულო კარანტინის ხანგრძლივობასთან დაკავშირებით აფრთხილებს. "ბოლო პერიოდში ევროპაში Covid-19 გავრცელების საგანგაშო მაჩვენებლები ფიქსირდება. ჩვენი რეკომენდაცია უცვლელია – 14–დღიანი კარანტინი უნდა გაიაროს ყველა მოქალაქემ, რომლის მიმართაც კორონავირუსით ინფიცირების ეჭვი არსებობს. თუ გვექნება მეცნიერულად დასაბუთებული მტკიცებულება, მხოლოდ ამ შემთხვევაში გადავხედავთ კარანტინის ხანგრძლივობის საკითხს. საკარანტინო პერიოდის მცირედით შემცირებასაც კი შესაძლოა, უდიდესი უარყოფითი ზეგავლენა ჰქონდეს, ვურჩევ ევროპის ქვეყნებს, ადგილობრივ ექსპერტებთან ერთად შეისწავლონ კარანტინის ვადის შემცირების უსაფრთხო ვარიანტები", – განაცხადა ჯანდაცვის მსოფლიო ორგანიზაციის ევროპის რეგიონის ოფიციალურმა წარმომადგენელმა კეტრინ სმოლვუდმა . შეგახსენებთ, რომ საფრანგეთში კარანტინის ვადა 7 დღემდე შეამცირეს. ევროპის ქვეყნების უმეტესობაში, მათ შორის დიდ ბრიტანეთში, ირლანდიაში, პორტუგალიასა და ხორვატიაში 10–დღიანი საკარანტინო ვადა მოქმედებს. რაც შეეხება საქართველოს, 15 სექტემბრიდან სავალდებულო კარანტინის ვადა 8 დღემდე შემცირდა. პირს საკარანტინო სივრცის დატოვება 8 დღის შემდეგ პისიარ–ტესტის პასუხის შესაბამისად ექნება. თუ მას კორონავირუსი არ დაუდასტურდება, იგი დატოვებს საკარანტინო სივრცეს, თუმცა ექნება ვალდებულება, 12 დღის თავზე კიდევ ერთხელ ჩაიტაროს პისიარ–ტესტირება; 8-დღიანი კარანტინი მხოლოდ საქართველოში შემოსულ მოქალაქეებს შეეხებათ და არა იმ ადამიანებს, რომლებსაც ქვეყნის შიგნით ინფიცირებულთან ჰქონდათ კონტაქტი. ამ უკანასკნელებისთვის 12–დღიანი კარანტინის ვადა მოქმედებს. ცნობისთვის: აგვისტოს ბოლოსა და სექტემბრის დასაწყისში ევროპაში კოვიდ–ინფიცირებულების დღიური მაჩვენებელი მკვეთრად გაიზარდა. რეგიონში ინფიცირებულთა რაოდენობით პირველ ადგილს ესპანეთი იკავებს. მსოფლიოში კორონავირუსით დაღუპულთა რაოდენობამ 945 000-ს გადააჭარბა. ინფიცირებულთა რაოდენობამ 30 000 000–ზე მეტი ადამიანი, 21 809 000–მდე დაავადებული კი გამოჯანმრთელდა. ამ დროისთვის COVID-19–ის საწინააღმდეგო არც ვაქცინა და არც კონკრეტული პრეპარატი არ არსებობს, თუმცა ვირუსისგან განკურნება სიმპტომური მკურნალობით არის შესაძლებელი. გასული 24 საათის განმავლობაში საქართველოში კორონავირუსის 179 ახალი შემთხვევა გამოვლინდა. ინფიცირებულთა საერთო რაოდენობა 2937-მდე გაიზარდა. მათგან გამოჯანმრთელებულია 1422. COVID-19-ით გარდაცვლილია 19 ადამიანი.
Facebook-ი პარტნიორებთან ერთად საქართველოში ფაქტების გადამოწმების პროგრამას გაუშვებს
Facebook-ი საქართველოში ფაქტების გადამოწმების პროგრამას გაუშვებს. ამის შესახებ Facebook-ის წარმომადგენლებმა ქართველ ჟურნალისტებთან ვიდეოკონფერენციისას განაცხადეს. მათივე ცნობით, დეზინფორმაციასთან ბრძოლის კამპანიის ფარგლებში, Facebook-ი მსოფლიოს მასშტაბით ფაქტების გადამოწმების არაერთ პორტალთან თანამშრომლობს. ეს ორგანიზაციები კონტენტის სიზუსტეს განიხილავენ, შეფასებას აძლევენ და შემდეგ ამ ინფორმაციას Facebook-ს აწვდიან. ამიერიდან, Facebook-ი მსგავს პროგრამას, Fact Check Georgia-სა და მითების დეტექტორთან პარტნიორობის ფარგლებში, საქართველოშიც აამოქმედებს. Facebook-ის ინფორმაციით, მითების დეტექტორი, ისევე, როგორც Fact Check Georgia სერტიფიცირებულია ფაქტების გადამოწმების საერთაშორისო ქსელის მიერ. „აღნიშნული პროგრამის გაშვების შედეგად, ინფორმაციას, რომელსაც ფაქტების გადამოწმების პორტალი სიყალბედ შეაფასებს, Facebook-ი საინფორმაციო ველის (News feed) ქვედა ნაწილში განათავსებს. ეს ნიშანდობლივად შეამცირებს ცრუ ინფორმაციის გავრცელებას და ასევე, შემცირდება იმ მომხმარებელთა რიცხვი, რომელსაც, შესაძლოა, დეზინფორმაცია მიეწოდოს. გვერდებსა და ანგარიშებს, რომლებიც პერიოდულად ეცდებიან, გააზიარონ ცრუ ინფორმაცია, ავტომატურად შეეზღუდებათ მონეტიზაციისა და რეკლამის განთავსების შესაძლებლობები. დამატებით, ფაქტების გადამოწმების პორტალის მიერ, ცრუ ინფორმაციად შეფასებულ პოსტებს Facebook-ი თვალსაჩინოდ მონიშნავს. ამით, მომხმარებლებს ექნებათ შესაძლებლობა, გამოარჩიონ, სიმართლეა თუ არა პოსტი, რომელსაც ხედავენ, ან რომლის გაზიარებაც სურთ. გვიხარია, რომ Fact Check Georgia-სა და მითების დეტექტორთან თანამშრომლობის შედეგად, საქართველოში ფაქტების გადამოწმების პროგრამას გავუშვებთ. დეზინფორმაციის წინააღმდეგ ბრძოლას ჩვენ საკმაოდ სერიოზულად ვეკიდებით. ამიტომ, მუდმივად ვმუშაობთ და ვცდილობთ, გამოვნახოთ გზები, რომ ხელი შევუშალოთ ჩვენს პლატფორმაზე ცრუ ინფორმაციის გავრცელებას,“ - განაცხადა Facebook-ის სტრატეგიული პარტნიორობის განვითარების მენეჯერმა, სოფი აიარსიმ. სოციალური ქსელის წარმომადგენლების ინფორმაციით, აღნიშნული პროგრამა Facebook-ის დეზინფორმაციის წინააღმდეგ ბრძოლის სტრატეგიის ნაწილია. სტრატეგია ახალი ამბების ავთენტურობის დადგენასა და მათი ხარისხის გაუმჯობესებას ემსახურება. სტრატეგიის მიხედვით, Facebook-ი აუქმებს ანგარიშებს და შლის კონტენტს, რომელიც არღვევს კომპანიის მიერ დაწესებულ სტანდარტებს ან სარეკლამო პოლიტიკას. შედეგად, მცირდება ცრუ ინფორმაციისა და არაავთენტური კონტენტის გავრცელების შანსი. "დაარსების დღიდან, ანუ 2013 წლიდან, Fact Check Georgia ცდილობს, ხელი შეუწყოს დეზინფორმაციის გავრცელების შემცირებასა და საინფორმაციო სივრცეში სიმართლის გავრცელებას. Facebook-თან პარტნიორობა არის შესანიშნავი შესაძლებლობა, რომ ჩვენი მუშაობა იყოს ბევრად უფრო ეფექტური. ასევე, რაც ყველაზე მნიშვნელოვანია, ეს პარტნიორობა საშუალებას გვაძლევს, გვქონდეს წვდომა Facebook-ის ათასობით მომხმარებელზე, რომელიც, შესაძლოა, იყოს დეზინფორმაციის მსხვერპლი. აღსანიშნავია ისიც, რომ ჩვენი პარტნიორობა საქართველოში საპარლამენტო არჩევნებამდე რამდენიმე თვით ადრე შედგა. ეს კი დაგვეხმარება, რომ სოციალურ მედიაში დეზინფორმაციის ვირუსული გავრცელება მინიმუმამდე დავიყვანოთ და, შესაბამისად, არჩევნების დემოკრატიულ საფუძვლებსაც საფრთხე ნაკლებად დაემუქრება,“- განაცხადა Fact Check Georgia-ს დამფუძნებელმა პაატა გაფრინდაშვილმა. „მითების დეტექტორის“ დამფუძნებელისა და მთავარი რედაქტორის თამარ კინწურაშვილის განცხადებით, როდესაც პლურალისტური პლატფორმები და ისეთი დემოკრატიული ინსტიტუტები, როგორიცაა მედია, ბოროტად გამოიყენება, ფაქტების გადამოწმების პლატფორმის მოვალეობაა, ამის შესახებ საზოგადოებას შეატყობინოს. „მედიის განვითარების ფონდმა (MDF) ფაქტების გადამოწმებისა და მითების გამოვლენის პლატფორმა „მითების დეტექტორი“ 2014 წელს შექმნა. ეს პლატფორმა შეიქმნა სიმართლის დასადგენად და დეზინფორმაციის შესახებ საზოგადოებისა და ინსტიტუტების ინფორმირებისთვის. ჩვენ უნდა შევძლოთ და სანდო მედია პლატფორმების მიმართ საზოგადოების ნდობა შევინარჩუნოთ. დემოკრატიულ საზოგადოებას უნდა შეეძლოს, განასხვაოს დეზინფორმაცია სიმართლისგან, რათა გააკეთოს ინფორმირებული არჩევანი. საქართველოში Facebook-ის ფაქტების გადამოწმების პროგრამის გაფართოება ძალიან მნიშვნელოვანია, მითუმეტეს, საპარლამენტო არჩევნების წინ. ეს პროგრამა საარჩევნო პროცესის დეზინფორმაციისგან დასაცავად დაგვეხმარება,“ - აღნიშნავს „მითების დეტექტორის“ დამფუძნებელი და მთავარი რედაქტორი თამარ კინწურაშვილი. სოფი აიარსის ინფორმაციით, დღეისათვის, Facebook-ს მსოფლიოს მასშტაბით 70-ზე მეტი პარტნიორი ჰყავს, რომელიც 50 ენაზე ფაქტების გადამოწმებაზე მუშაობს. კომპანია განაგრძობს ინვესტიციების ჩადებას, რათა ცრუ ინფორმაციის გავრცელების წინააღმდეგ ბრძოლა კიდევ უფრო მასშტაბური გახადოს.
2020 წლის მეორე კვარტალში მივლინებებზე გაწეულმა ხარჯებმა თითქმის 11 მლნ ლარი შეადგინა
საერთაშორისო გამჭვირვალობა-საქართველოს ინფორმაციით, 2020 წლის მეორე კვარტალში მივლინებებზე გაწეულმა ხარჯებმა თითქმის 11 მლნ ლარი შეადგინა. ორგანიზაციის ცნობითვე, მოცემულ პერიოდში სამივლინებო ხარჯების თითქმის განახევრებისას გაუგებარია რატომ და როგორ დაიხარჯა 10.9 მლნ ლარი მივლინებებზე, როცა ქვეყანას აპრილ-ივნისის პერიოში საზღვრები ჩაკეტილი ჰქონდა. ამ კითხვით ნეტგაზეთმა ფინანსთა სამინისტროსაც მიმართა და უწყების პასუხს მიღებითანავე გავავრცელებთ. “მიმდინარე წლის მეორე კვარტალში მივლინებებზე გაწეული ხარჯები 10.6 მლნ ლარით (49%-ით) შემცირდა და 10.9 მლნ ლარი შეადგინა. შემცირების მიუხედავად, საინტერესოა, აპრილი-ივნისის განმავლობაში, როდესაც ქვეყნების საზღვრები ჩაკეტილი იყო, ხოლო ქვეყნის შიგნით გადაადგილება შეზღუდული იყო, რატომ და როგორ დაიხარჯა მივლინებებზე 11 მლნ ლარამდე. იანვარ-მარტში მივლინების ხარჯები 2.5 მლნ ლარით შემცირდა და 15.5 მლნ ლარი შეადგინა. ჯამში, მიმდინარე წლის 6 თვეში მივლინების ხარჯებმა 26.4 მლნ ლარი შეადგინა, რაც გასული წლის 6 თვის მაჩვენებელზე 13.1 მლნ ლარით (33%-ით) ნაკლებია”, – ნათქვამია TI-ის კვლევაში. ორგანიზაციის მიერ დღეს, 17 სექტემბერს, გამოქვეყნებული ბიუჯეტის ექვსი თვის შესრულების ანალიზის თანახმად, საქართველოს მთავრობამ ბიუჯეტის შემოსულობების 6 თვის გეგმა 761 მლნ ლარით გაიზარდა, შედეგად შემოსულობებმა ჯამში დაახლოებით 7.6 მილიარდი ლარი შეადგინა. შემოსულობების ზრდა დამატებითი ვალების აღებამ განაპირობა. 6 თვეში საქართველოს მთავრობამ დაახლოებით 2.5 მილიარდი ლარის ვალი აიღო. 30 ივნისის მდგომარეობით მთავრობის ვალმა 24.1 მილიარდი ლარი შეადგინა, რაც საქართველოს მთლიანი შიდა პროდუქტის დაახლოებით 49%-ია. რაც შეეხება ბიუროკრატიულ ხარჯებს, 6 თვეში შტატგარეშეთა ანაზღაურება 20.4 მლნ ლარით (19%-ით) არის გაზრდილი. TI-ის თანახმად, ეს მოხდა იმ პირობებში, როდესაც ადმინისტრაციულ ხარჯებში ეკონომიის გაკეთება მთავრობის პრიორიტეტი უნდა ყოფილიყო. “ჯანდაცვის ხარჯების 6 თვის გეგმა 595 მლნ ლარიდან 737 მლნ ლარამდე გაიზარდა, რაც მნიშვნელოვანწილად ვირუსის გავრცელებამ განაპირობა. გასული წლების მსგავსად, ისევ არასაკმარისი აღმოჩნდა საყოველთაო ჯანმრთელობის დაცვის პროგრამაზე გამოყოფილი თანხა. 6 თვის თავდაპირველი გეგმა 89 მლნ ლარით გაიზარდა და 523 მლნ ლარი შეადგინა. წლის ბოლომდე საყოველთაო ჯანდაცვის ხარჯი ერთ მილიარდ ლარს მიაღწევს, როცა წლიური გეგმით 802 მლნ ლარია გათვალისწინებული,”-წერია ანგარიშში. კორონავირუსის გამო 2020 წლის ბიუჯეტში მთავრობა ბიზნესის თუ მოქალაქეების დასახმარებლად სხვადასხვა დახმარება ჩადო. საერთაშორისო გამჭვირვალობა-საქართველოს ინფორმაციით, პროგრამები 3 მიმართულებით შეიქმნა: ჯანდაცვა, სოციალური დახმარება და ბიზნესის სუბსიდირება. 2020 წლის პირველ ნახევარში „კორონავირუსით” გამოწვეულ ახალ პროგრამებზე 460 მლნ ლარი გამოიყო, ფაქტობრივად კი 370 მლნ ლარი დაიხარჯა. პანდემიის გამო ბიუჯეტის გეგმა ყველაზე მეტად განათლებისა და ინფირასტრუქტურის სამინისტროებს შეუმცირდათ. ანგარიშის თანახმად, პანდემიის გამო ყველაზე მეტად ჯანდაცვის სამინისტროს (452 მლნ ლარით) და ეკონომიკის სამინისტროს (19.6 მლნ ლარით) 6 თვის გეგმა გაიზარდა, ყველაზე მეტად კი რეგიონული განვითარებისა და ინფრასტრუქტურის სამინისტროს (47.4 მლნ ლარით) და განათლების, მეცნიერების, კულტურისა და სპორტის სამინისტროს (37.6 მლნ ლარით) 6 თვის გეგმა შემცირდა. 2019 წლის პირველ ნახევართან შედარებით, 2020 წლის 6 თვეში ბიუჯეტის ხარჯები 869 მლნ ლარით გაიზარდა, საიდანაც 631 მლნ ლარი სოციალური ხარჯების ზრდაზე მოდის. 35 მლნ ლარით გაიზარდა შრომის ანაზღაურების ხარჯი. ორგანიზაცია მთავრობას რეომენდაციით მიმართავს წელს მოზიდული საგარეო დახმარების ნაწილი 2021 წელს დახარჯოს და მომავალ წლებში მთავრობის ვალის შემცირების სტრატეგია შეიმუშაოს, რადგან 2020 წელს ქვეყნის საგარეო ვალის მოცულობა კრიტიკულ ზღვარს, მშპ-ის 60%-ს უახლოვდება. ამას გარდა, TI საქართველოს მთავრობას შემდეგი რეკომენდაციებით მიმართავს: მიუხედავად განახლებული გეგმებისა, ძალიან მნიშვნელოვანია მთავრობამ არააუცილებელი ხარჯები ეკონომიურად გაწიოს და დაზოგილი თანხა სოციალურად მოწყვლადი ჯგუფების დახმარებას და ბიზნესის საგადასახადო შეღავათებს მოახმაროსპრობლემად რჩება საყოველთაო ჯანდაცვის პროგრამის ხარჯების სათანადოდ დაგეგმვა და შესრულება, რომლის გადაწყვეტა აღნიშნული პროგრამის ეფექტიანობის ზრდის მიზნით აუცილებელია;
"არანაირი მკაცრი ჩაკეტვა და შეზღუდვა აღარ იქნება"
პრემიერ-მინისტრ გიორგი გახარიას განცხადებით, მიუხედავად იმისა, რომ კორონავირუსით ინფიცირებულთა რიცხვი ყოველდღიურად იზრდება, ქვეყანაში მკაცრი შეზღუდვები და ჩაკეტვა აღარ იქნება. როგორც მან მთავრობის დღევანდელ სხდომაზე განმარტა, ამჟამად მთავარი პრიორიტეტი ქვეყნის ეკონომიკის სწრაფი აღდგენაა. „ბოლო პერიოდის განმავლობაში ინფიცირების ზრდის აშკარა ტენდენცია გვაქვს, თუმცა, მდგომარეობა სრულად ექვემდებარება კონტროლს და რაც მთავარია, მართვადია. ჩვენ ყოველთვის ვამბობდით, რომ შეზღუდვების, მათ შორის ეკონომიკურის, მოხსნასთან ერთად ინფიცირებულების რაოდენობა გაიზრდებოდა, როგორც სხვაგან, მთელ მსოფლიოში. ამიტომ, ყოველთვის ვამბობდით, რომ ძირითადი ამოცანა არის ვირუსთან ადაპტაცია და ვირუსთან თანაცხოვრების სწავლა. აქვე მინდა ხაზგასმით აღვნიშნო, რომ პირველ ეტაპზე მკაცრი ღონისძიებები, შეზღუდვები, საგანგებო მდგომარეობა სწორედ იმიტომ იყო, რომ ათეულობით ჩვენი მოქალაქის სიცოცხლე გადაგვერჩინა და ეკონომიკისთვის ნაკლები ზიანი მიგვეყენებინა, რადგან ვირუსთან დაკავშირებით მაშინ ცოდნა საერთოდ არ არსებობდა და ვირუსის დროში გავრცელების დრო უნდა მოგვეგო. ჩვენ ეს დრო მოვიგეთ. დღეს არა მხოლოდ საქარველოში, არამედ მსოფლიოშიც ვირუსთან დაკავშირებული ცოდნა ბევრად უფრო დიდი და მნიშვნელოვანია, რაც გვაძლევს შესაძლებლობას, მსგავსი ციფრების მიუხედავად, ცხოვრება ჩვეულებრივად გავაგრძელოთ“,-განაცხადა გახარიამ. პრემიერის თქმით, დღეს მთავრობის ძირითადი ამოცანაა ეკონომიკის მაქსიმალურად სწრაფად აღდგენა და მოქალაქეების ჯანმრთელობის უსაფრთხოების დაცვა. „დღეს პრიორიტეტუი უკვე ხდება ეკონომიკის სწრაფი აღდგენა და ეს გარკვეული წესების დაცვის გარეშე შეუძლებელია. ეს მარტივი წესებია: პირბადე, სოციალური დისტანცირება, ჰიგიენის წესების დაცვა და ასე შემდეგ. ეს ის წესებია, რომელსაც ყოველთვის ვამბობდით და დღესაც გავიმეორებთ, რომ ჩვენ ყველამ ერთად უნდა ვისწავლოთ ვირუსთან თანაცხოვრება. სამწუხაროდ, სანამ გლობალურად ვირუსის პრობლემა არ გადაწყდება ვაქცინით ან სხვა საშუალებებით, შეუძლებელი იქნება, ცალკე აღებულმა ქვეყანამ ვირუსი დაამარცხოს“,-განაცხადა გახარიამ. მისი თქმით, საქართველოში მკაცრი, სისტემური შეზღუდვები აღარ იგეგმება. „მინდა ხაზგასმით აღნიშნო, რომ არანაირი მკაცრი ჩაკეტვა და შეზღუდვა აღარ იქნება. ჩვენი ადაპტაციის პოლიტიკის ძირითადი კომპონენტი გახლავთ, რომ ამ ეტაპზე წერტილოვნად, მიზნობრივად უნდა ვებრძოლოთ ვირუსის გავრცელებას. ეს შეიძლება იყოს გარკვეული ლოკალური შეზღუდვები, მაგრამ მკაცრი, სისტემური შეზღუდვები, რომლითაც პირველ ეტაპზე მობილობა დავაგდეთ, მსგავსი შეზღუდვები ქვეყანაში აღარ განმეორდება“,-განაცხადა გახარიამ.
ბათუმის რესპუბლიკური საავადმყოფო ჩეხეთისგან 186 000 ევროს აპარატურას მიიღებს
ჩეხეთის განვითარების სააგენტო ახალი ინიციატივის – Tied Financial Donation-ის ფარგლებში ბათუმისა და რუხის რესპუბლიკურ საავადმყოფოებს ჩეხურ სამედიცინო აპარატურას გადასცემს. ახალი აღჭურვილობის მიწოდება ორ ეტაპად განხორციელდება 2020 წლის ბოლომდე. საერთო ღირებულება 371 000 ევროს შეადგენს, საიდანაც ბათუმის რესპუბლიკური საავადმყოფო 186 000 ევროს, ხოლო რუხის რესპუბლიკურ საავადმყოფო 185 000 ევროს მიიღებს. ხელშეკრულებას ხელი მოაწერეს ჩეხეთის განვითარების სააგენტოს სახელით ჩეხეთის რესპუბლიკის ელჩმა თბილისში, პეტრ მიკისკამ, რუხის რესპუბლიკური საავადმყოფოს დირექტორის მოვალეობის შემსრულებელმა, ირაკლი გვაზავამ და ბათუმის რესპუბლიკური საავადმყოფოს წარმომადგენელმა, ნუგზარ ჯანჯღავამ.
1 ოქტომბრიდან Wizz Air-ი ქუთაისიდან ფრენებს განაახლებს
"შემდგარია შეთანხმება, რომ 1 ოქტომბრიდან ქუთაისიდან რიგის მიმართულებით ფრენები გაიხსნება", - ამის შესახებ პრემიერ-მინისტრმა გიორგი გახარიამ მთავრობის სხდომის დაწყებისას განაცხადა. „ეს იქნება კვირაში ერთი რეისი, რომელსაც „Wizz Air“ შეასრულებს და აჩვენებს ტენდენციას, რომ ფრთხილად და გონივრულად ავამოძრაოთ ეკონომიკა“, - განაცხადა გიორგი გახარიამ.
თსუ-ს სტუდენტს, რომელიც ბაგების საერთო საცხოვრებელში ცხოვრობს, კორონავირუსი დაუდასტურდა
ივანე ჯავახიშვილის სახელობის თბილისის სახელმწიფო უნივერსიტეტის სტუდენტს, რომელიც ბაგების საერთო საცხოვრებელში ცხოვრობს, გუშინ კოვიდ-19 დაუდასტურდა. როგორც „ინტერპრესნიუსს“ თსუ-დან აცნობეს, სტუდენტი ცხელების ცენტრში გადაიყვანეს. მათივე ცნობით, სტუდენტის ჯანმრთელობის მდგომარეობა დამაკმაყოფილებელია და მისი დაინფიცირების წყაროს თსუ არ წარმოადგენს. „თსუ-ში ადმინისტრაციული და აკადემიური რეგისტრაცია და სწავლა დისტანციურად მიმდინარეობს, შესაბამისად, დაინფიცირებულ სტუდენტს ლექტორებთან და სხვა სტუდენტებთან კონტაქტი არ ჰქონია. თსუ-ს ბაგების საერთო საცხოვრებელში გუშინვე ჩატარდა დეზინფექცია. მასთან კონტაქტში მყოფი პირები გადაყვანილი არიან კარანტინში. საერთო საცხოვრებელში უსაფრთხოების ყველა ზომაა მიღებული. საერთო საცხოვრებლისა და უნივერსიტეტის ადმინისტრაცია დაავადებათა კონტროლის ცენტრის რეკომენდაციების შესაბამისად მოქმედებს“, - ნათქვამია ინფორმაციაში. წყარო
"ბავშვებს, რომლებსაც პანდემიამდე ნორმალური წონა ჰქონდათ, ახლა წონაში მოიმატეს" - ენდოკრინოლოგი
ბავშვთა ენდოკრინოლოგი, იაშვილის სახელობის ბავშვთა ცენტრალური საავადმყოფოს ენდოკრინოლოგიური სამსახურის ხელმძღვანელი ნინო ხელაძე აცხადებს, რომ კორონავირუსის პანდემიისას ბავშვებში სიმსუქნის პრობლემამ იმატა. როგორც ნინო ხელაძე აცხადებს, პანდემიის პერიოდში ბავშვებში მოიმატა ქცევის დარღვევამ და ძილის პრობლემებმაც. „კარანტინის და პანდემიის პერიოდში განსაკუთრებით აქტუალური გახდა ჯანმრთელობასთან დაკავშირებული არაერთი საგანგაშო საკითხი. განსაკუთრებით გამოვყოფდი ბავშვებში სიმსუქნის და ჭარბი წონის მატებას. ბავშვებს, რომლებსაც პანდემიამდე ნორმალური, ჯანმრთელი წონა ჰქონდათ, იმის გამო რომ ფიზიკურ აქტივობას, სპორტს დაანებეს თავი, წონაში მოიმატეს. განსაკუთრებით დამღუპველი ეფექტი იქონია თითქმის უმეტსობა იმ პაციენტზე, ვისაც საგანგაშოდ მაღალი წონა ჰქონდა, მათ კიდევ უფრო მოიმატეს. განსაკუთრებული საჭიროებების და ნევროლოგიური დაავადების მქონე ბავშვებიც საყურადღებო ჯგუფია. თუ ასეთი ტიპის ბავშვებს ისედაც ჰქონდათ გადაადგილება შეზღუდული, ახლა როდესაც სახლში მოუწიათ გამოკეტვა, მხოლოდ საკვებს იღებდნენ, უმეტესობა კომპიუტერის და მობილურის ეკრანს იყო მიჯაჭვული და სავალალო შედეგები მივიღეთ. მთელმა მსოფლიომ დათვალა, განსაკუთრებით იტალიას აქვს უამრავი სტატისტიკა, თუ რამდენად მოიმატა სიმსუქნის და მხედველობის პრობლემამ ბავშვებში, იმიტომ რომ ეკრანთან დიდ დროს ატარებებდნენ. მოიმატა ასევე ქცევის დარღვევამ და ძილის პრობლემებმაც. ყველა ბავშვი მიჩვეული იყო დილით ადრე ადგომას და სკოლაში წასვლას, ახლა უმეტესობას შეიძლება შუადღემდე ძინავს, ბევრ საათს ატარებს ტელეფონთან და ასე შემდეგ. ამან ძალიან ბევრი პრობლემა დაგვიგროვა ბავშვთა ენდოკრინოლოგებს და პედიატრებს“,-განცხადა ნინო ხელაძემ. იაშვილის სახელობის ბავშვთა ცენტრალური საავადმყოფოს ენდოკრინოლოგიური სამსახურის ხელმძღვანელი ნინო ხელაძე აცხადებს, რომ მოზარდებში ჭარბი წონა კორონავირუსის დროს რისკფაქტორია. „მუდმივად გვესმის საუბარი ტელევიზიით, თუ რა არის მოზრდილებში კორონავირუსის რისკ-ფაქტორები. ვინ არის განსაკუთრებული რისკის ქვეშ. გვესმის, რომ ეს ის პაციენტები არიან, ვისაც აქვს ჭარბი წონა, გულ-სისხლძარღვთა დაავადებები და ასე შემდეგ. აღმოჩნდა რომ ბავშვებში სიმსუქნე ერთ-ერთი წამყვანი რისკ-ფაქტორია გართულებების თვალსაზრისით“, - განაცხადა ხელაძემ. წყარო
ბათუმის სამშობიარო სახლში კორონავირუსით ინფიცირებული 12 ორსულია მოთავსებული
ბათუმის სამშობიარო სახლში კორონავირუსით ინფიცირებული ორსულების რაოდენობა გაიზარდა. როგორც კლინიკის ექიმმა ნუგზარ პაპავამ განაცხადა, დაწესებულებაში კორონავირუსით ინფიცირებულ 12 პაციენტს მკურნალობენ, აქედან ერთი 38 კვირის ორსულია. ექიმის ინფორმაციით, ინფიცირებული ორსულების ჯანმრთელობის მდგომარეობა სტაბილურია, მათ ჩივილები არ აქვთ. "დაგვემატა ოთხი ორსული და ამ ეტაპზე გვყავს 12 კოვიდინფიცირებული ორსული. მათ შორის ერთი 38 კვირის ორსულია. საბედნიეროდ, ყველა პაციენტის დაავადება უსიმპტომოდ მიმდინარეობს და მათი ჯამრთელობის მდგომარეობა დამაკმაყოფილებელია. ჩვენთან ყველა პირობაა შექმნილი პაციენტებისათვის. იმყოფებიან ექიმების მეთვალყურეობის ქვეშ. სულ 30 კოვიდინფიცირებული პაციენტის მიღება შეგვიძლია,"- აღნიშნა ნუგზარ პაპავამ. მიმდინარე სტატისტიკა: კორონავირუსის დადასტურებული შემთხვევა - 2937; გამოჯანმრთელებული - 1422; გარდაცვლილი - 19; კარანტინის რეჟიმში - 6633; სტაციონარში მეთვალყურეობის ქვეშ - 836; უცხოეთიდან სამკურნალოდ გადმოყვანილი საქართველოს მოქალაქეები - 41;
