პოლიტიკა
მინსკში ანტისამთავრობო აქციები გრძელდება
2 ნოემბერს ბელარუსის დედაქალაქ მინსკში 1000-ზე მეტი მომიტინგე კვლავ გამოვიდა ალექსანდერ ლუკაშენკოს გადადგომის მოთხოვნით. მომიტინგეებს შორის ბევრი პენსიონერი იყო. მათ ხელში ეკავათ ბელარუსის ისტორიული, თეთრი-წითელი-თეთრი დროშები, რაც ბელარუსის ოპოზიციის სიმბოლო გახდა. "ლუკაშენკო! სასამართლო!"; "გამარჯვებამდე, ბოლომდე!" - გაიძახოდნენ მსვლელობის მონაწილეები. პირველი ნოემბრისგან განსხვავებით, როდესაც მინსკში აქციაზე ასობით ადამიანი დააკავეს, 2 ნოემბრის აქციაზე დაკავების შესახებ ინფორმაცია არ გავრცელებულა. პირველ ნოემბერს სამართალდამცავებმა ათასობით მომიტინგის დასაშლელად გამოიყენეს ასაფეთქებელი საშუალებები, რეზინის ტყვიები. დააკავეს, დაახლოებით, 300 ადამიანი. ბელარუსის ჟურნალისტთა ასოციაციის წარმომადგენლის თქმით, დაკავებულებს შორის 4 ჟურნალისტია, მათგან 2 სასტიკად სცემეს. საპროტესტო აქციები ბელარუსში ორი თვეა, გრძელდება. დემონსტრაციები 9 აგვისტოს ჩატარებული საპრეზიდენტო არჩევნების შემდეგ დაიწყო, მოსახლეობა არჩევნების შედეგებს აპროტესტებს. არჩევნების შედეგების თანახმად ალექსანდრ ლუკაშენკო ბელარუსის პრეზიდენტი მეექვსე ვადით გახდა. მან ხმების 80%-ზე მეტი მოაგროვა. ბელარუსის ცეესკოს მონაცემების თანახმად სვეტლანა ტიხანოვსკაიამ ხმების 10% დააგროვა. ოპოზიცია არჩევნების შედეგებს არ ცნობს და ხელახალი არჩევნების ჩატარებას მოითხოვს. აქციების დაწყების შემდეგ ქვეყანაში 12 000-ზე მეტი ადამიანი დააკავეს. 26 ოქტომბერს ბელარუსში საყოველთაო გაფიცვა დაიწყო. საყოველთაო გაფიცვის დაწყება ბელარუსის ოპოზიციონერმა ლიდერმა სვეტლანა ტიხანოვსკაიამ მას შემდეგ გამოაცხადა, რაც ხელისუფლებამ "სახალხო ულტიმატუმი" არ შეასრულა.
პროკურატურა 100 000-ლარიანი გირაოს შეფარდებას და საზღვრის გადაკვეთაზე შეზღუდვის დაწესებას ითხოვს
გენერალური პროკურატურა სასამართლოს „ნაციონალური მოძრაობის“ ერთ-ერთი ლიდერის, ნიკა მელიასთვის 100 000 ლარის ოდენობის გირაოს შეფარდებას ითხოვს. როგორც „ინტერპრესნიუსს“ პროკურატურაში განუცხადეს, უწყება ასევე მოითხოვს, მელიას საზღვრის გადაკვეთის შეზღუდვა დაუწესდეს. „საქართველოს გენერალურმა პროკურატურამ ნიკა მელიას მიერ აღკვეთის ღონისძიების პირობების დარღვევის გამო სასამართლოს მისთვის უფრო მკაცრი აღკვეთის ღონისძიების შეფარდების შუამდგომლობით მიმართა. პროკურატურა ნიკა მელიასთვის აღკვეთის ღონისძიების სახით გირაოს 100 000 ლარის ოდენობით შეფარდებას და სახელმწიფო საზღვრის გადაკვეთის შეზღუდვის დაწესებას ითხოვს“, -
საია 117 უბნის შემაჯამებელი ოქმის ბათილობას ითხოვს
საქართველოს ახალგაზრდა იურისტთა ასოციაცია ითხოვს, გაუქმდეს 117 უბნის შემაჯამებელი ოქმები და ხელახლა გადაითვალოს მონაცემები. „გასაჩივრებული ოქმების უმრავლესობაში ფიქსირდება დისბალანსი ან/და ოქმების გადასწორების ფაქტები“, - აცხადებს საია. კენჭისყრის დღეს და შემდგომ პერიოდში საიამ 304 საჩივარი წარადგინა. მათგან 131 საჩივარი კენჭისყრის ან/და ხმის დათვლის პროცედურის დარღვევას შეეხება, ხოლო 173 უბანთან მიმართებით საია შემაჯამებელ ოქმებში დაფიქსირებულ დარღვევებზე დავობს. საოლქო საარჩევნო კომისიებმა წარდგენილი საჩივრები 2 დღის ვადაში უნდა განიხილონ. 31 ოქტომბერს, საპარლამენტო არჩევნების დღეს, საქართველოს მასშტაბით 3800-მდე საარჩევნო უბანი მუშაობდა. დამკვირვებელი არასამთავრობო ორგანიზაციები და ოპოზიცია კენჭისყრის პროცესში მნიშვნელოვან დარღვევებზე მიუთითებენ, რასაც ხელისუფლება დიდწილად უარყოფს.
პარტიებმა არჩევნების გაუქმების მოთხოვნას ხელი მოაწერეს
10-ზე მეტი პოლიტიკური პარტია, მათ შორის ისინი, ვინც არსებული მონაცემებით ხვდება პარლამენტში და ისინი, ვინც ზღვარს ვერ ლახავენ თანხმდებიან, რომ არჩევნები განმეორებით უნდა ჩატარდეს. მათ ერთობლივ განცხადებას, რომლითაც არალეგიტიმურად აცხადებენ არჩევნების შედეგებს, ხელი მოაწერეს. დოკუმენტს ხელს აწერენ: ნაციონალური მოძრაობა, ევროპული საქართველო, "სტრატეგია აღმაშენებელი", ლელო, გირჩი, მოქალაქეები, ლეიბორისტული პარტია, რესპუბლიკური პარტია, სახელმწიფო ხალხისთვის, ევროპული დემოკრატები, კანონი და სამართალი, ერთიანი საქართველო. როგორც ითქვა, დოკუმენტს ხელს აწერს "პატრიოტთა ალიანსიც"."2020 წლის საპარლამენტო არჩევნები ჩატარდა ამომრჩეველზე ძალდობისა და დაშინების სუს-ის და კრიმინალური სამყაროს კოორდინირებული, მასშტაბური მოსყიდვის, ადმინისტრაციული რესურსის გამოყენების და ამომრჩევლის ნებაზე ძალადობით გავლენის მოხდენის პირობებში. ამას თან დაერთო ოქმებით მანიპულაცია და კარუსელი, რამაც მნიშვნელოვნად დაამახინჯა არჩევნების შედეგები. ცესკოს გამოქვეყნებულმა მონაცემებმა არ ასახა ამომრჩევლის ნება. ჩვენთვის, ოპოზიციური პარტიებისთვის სრულიად ნათელია, რომ ჩვენმა თანამოქალაქეებმა უარი უთხრეს ივანიშვილის მმართველობას და არ მისცეს მას მესამე ვადით ქვეყნის მანდატი. შესაბამისად, ეს არჩევნები არ ასახავს ამომრჩევლის ნებას. ამიტომ, ჩვენ, ოპოზიციური პარტიები, რომლებსაც გაგვიყალბეს არჩევნები, უარს ვამბობთ საპარლამენტო მანდატებზე და გადავდგამთ ყველა ნაბიჯს, რომ არ შევიდეთ პარლამენტში. არ მივიჩნევთ ამ პარლამენტს ლეგიტიმურად, რადგან არის ის უკანონოდ არჩეული", - წაიკითხა "ლეიბორისტული პარტიის" ლიდერმა, შალვა ნათელაშვილმა და არჩევნების შედეგების გაუქმება მოითხოვა.
რას ფიქრობს თამარ ჟვანია საკუთარ გადადგომაზე
ცესკოს თავმჯდომარე თამარ ჟვანია ამბობს, რომ თუ რომელიმე შედეგი სწორად არ იქნება დათვლილი და ამას არ მოჰყვება შესაბამისი რეაგირება, ის გადადგება. ასე პასუხობს რუსთავი 2-ის ეთერში თამარ ჟვანია კითხვას, თუ რა შემთხვევაში დატოვებს ის თანამდებობას. "თამარ ჟვანია იმ შემთხვევაში მიიღებს ისეთ გადაწყვეტილებას [გადადგება], რომელზეც საუბრობთ, თუ რომელიმე შედეგი არ იქნება სწორად დათვლილი და თუ რომელიმე შედეგზე არ მოხდება ისეთი რეაგირება, როგორიც საჭიროა, მე ამას სრული პასუხისმგებლობით გეუბნებით. ამას ვამბობ იმიტომ, რომ დღეს ჩვენ ვაკეთებთ ყველაფერს იმისთვის, რომ ხალხის ნება იყოს ზუსტად, აკურატულად გადმოცემული, რაც წლების განმავლობაში ასე ხდებოდა, რაც აღიარებულია საერთაშორისო დამკვირვებლების მიერ, აღიარებულია პარალელური დათვლის შედეგებით. ამიტომ, როდესაც პოლიტიკური მიზნებისთვის ვინმე შედეგების ნამდვილობის საკითხს აყენებს, ეს არასწორია. აიღონ ყველამ ოქმები, ყველასთვის ხელმისაწვდომია და თითოეულ მოქალაქეს შეუძლია, დათვალოს ის. თუ რომელიმე არასწორი იქნება, შემდეგ ვისაუბროთ დანარჩენზე". – ამბობს ცესკოს თავჯდომარე. ცნობისთვის, ოპოზიციური პარტიები არჩევნების შედეგებს ლეგიტიმურად არ ცნობენ და ახალი საარჩევნო ადმინისტრაციის პირობებში მის ხელახლა ჩატარებას ითხოვენ.
აშშ ვენაში მომხდარ ტერორისტულ თავდასხმას მკაცრად გმობს
ამერიკის შეერთებული შტატები მკაცრად გმობს ვენაში მომხდარ ტერორისტულ თავდასხმას და სოლიდარობას უცხადებს ავსტრიელ ხალხს, - ამის შესახებ აშშ-ის სახელმწიფო მდივანი მაიკ პომპეო სოციალურ ქსელ „ტვიტერში“ წერს. „თანავუგრძნობთ დაღუპულთა და დაშავებულთა ოჯახის წევრებს. კიდევ ერთხელ ვადასტურებთ მხარდაჭერას პოლიციის მიმართ და სოლიდარობას ვუცხადებთ ავსტრიელ ხალხს“, – აცხადებს მაიკ პომპეო. შეგახსენებთ, 2 ნოემბერს ვენაში, სინაგოგასთან ახლოს, 6 სხვადასხვა ლოკაციაზე თავდასხმები მოხდა, რის შედეგადაც, დაღუპულია სულ მცირე 2 და დაშავებულია 15 ადამიანი. ავსტრიის კანცლერმა სებასტიან კუცმა ფაქტს „ტერორისტული თავდასხმა“ უწოდა და განაცხადა, რომ ერთი თავდამსხმელი ლიკვიდირებულია. ავსტრიის შინაგან საქმეთა მინისტრის ინფორმაციით, სამართალდამცავები კიდევ ერთ თავდამსხმელს ეძებენ.
აშშ-ში დღეს საპრეზიდენტო არჩევნები გაიმართება
დღეს აშშ-ში რიგით 59-ე საპრეზიდენტო არჩევნები გაიმართება და ამერიკელი ხალხი მომავალ პრეზიდენტად მოქმედ პრეზიდენტ დონალდ ტრამპს ან ყოფილ ვიცე-პრეზიდენტს „დემოკრატიული პარტიის“ კანდიდატს, ჯო ბაიდენს აირჩევს. BBC-ის ინფორმაციით, 97-მა მილიონმა ამომრჩეველმა ხმის მიცემის წინასწარი პროცედურით ისარგებლა და არჩევანი უკვე გააკეთა. გამარჯვებულად ჩაითვლება ის კანდიდატი, რომელიც 538-წევრიანი საარჩევნო კოლეგიიდან სულ მცირე 270 ხმას მოიპოვებს. საარჩევნო კოლეგიის წევრებს თითოეული შტატი, მოსახლეობის რაოდენობის პროპორციულად ირჩევს. არჩევნების საბოლოო შედეგების დადგენასა და გამარჯვებულის გამოვლენას, შესაძლოა, რამდენიმე დღე ან კვირაც კი დასჭირდეს, ვინაიდან, კორონავირუსის პანდემიის გამო, წლევანდელ არჩევნებზე ფოსტის საშუალებით ხმა უპრეცედენტოდ ბევრმა ადამიანმა მისცა და სხვადასხვა შტატს ამ ხმების დათვლის განსხვავებული წესი აქვს. აღსანიშნავია, რომ Reuters/Ipsos-ის მიერ 27-29 ოქტომბერს ჩატარებული გამოკითხვის თანახმად, ჯო ბაიდენს მხარს ამომრჩევლების 51%, დონალდ ტრამპს კი - 43% უჭერს. სხვადასხვა შტატში საარჩევნო უბნები სხვადასხვა დროს დაიხურება. მაგალითად, ჯორჯიაში არჩევნები ადგილობრივი დროით 19:00 საათზე დასრულდება (თბილისის დროით 4 ნოემბრის დილის 04:00 საათზე), ჩრდილოეთ კაროლინასა და ოჰაიოში - ადგილობრივი დროით 19:30 საათზე, ფლორიდასა და პენსილვანიაში - 20:00 საათზე, არიზონაში, ვისკონსინსა და მიჩიგანში კი 21:00 საათზე.
ანდერს ფოგ რასმუსენი - იმედი მაქვს, ქართული პოლიტიკური პარტიები გააგრძელებენ დემოკრატიის დაცვას ფრონტის წინა ხაზებიდან
იმედი მაქვს, ქართული პოლიტიკური პარტიები გააგრძელებენ დემოკრატიის დაცვას ფრონტის წინა ხაზებიდან, - ამის შესახებ ნატო-ს ყოფილმა გენერალურმა მდივანმა ანდერს ფოგ რასმუსენმა სოციალურ ქსელში დაწერა. როგორც რასმუსენი წერს, არჩევნების შედეგებისადმი ნდობის განსამტკიცებლად, საჭიროა დარღვევების სათანადოდ გადაწყვეტა. "მიხარია, რომ შაბათს ჩატარებულმა არჩევნებმა კიდევ ერთხელ გამოავლინა ქართველების ერთგულება ევრო-ატლანტიკური ინტეგრაციისადმი. მაღალი იყო ამომრჩეველთა აქტივობა პანდემიის მიუხედავად. საერთაშორისო დამკვირვებლების პირველადი შეფასებით, საპარლამენტო არჩევნები კონკურენტული და თავისუფალი იყო. თუმცა, არჩევნების შედეგებისადმი ნდობის განსამტკიცებლად, საჭიროა დარღვევების სათანადოდ გადაწყვეტა. 31 ოქტომბერს, გარე ძალების ჩარევის საგულისხმო შემთხვევები არ გამოვლენილა. დემოკრატიების ალიანსის ფონდმა იმუშავა ყველა ძირითად პოლიტიკურ პარტიასთან რომ დაენერგა ღირსეული, ეთიკური ციფრული კამპანიის პრინციპები, რაც არ მისცემდა მავნე ძალებს ნოყიერ ნიადაგს ჩარევისათვის. თუმცა, ეს სიმშვიდისთვის არ კმარა. იმედი მაქვს, ქართული პოლიტიკური პარტიები გააგრძელებენ დემოკრატიის დაცვას ფრონტის წინა ხაზებიდან. მე კი, განვაგრძობ ხმა ავიმაღლო საქართველოს ევრო-ატლანტიკური გზის მხარდასაჭერად!"- წერს რასმუსენი.
"ქართული ოცნება" არჩევნების მეორე ტურისთვის მზადებას იწყებს
"ქართული ოცნება" არჩევნების მეორე ტურისთვის მზადებას იწყებს. ამის შესახებ პარტიის აღმასრულებელმა მდივანმა, ირაკლი კობახიძემ განაცხადა. “კიდევ ერთხელ გვინდა გამოვეხმაუროთ საერთაშორისო დამკვირვებლებისა და სხვა საერთაშორისო პარტნიორების შეფასებებს არჩევნებთან დაკავშირებით. მოხარული ვართ, რომ არჩევნები მათ მიერ შეფასდა, როგორც კონკურენტული და აღინიშნა, რომ საარჩევნო პროცესში რეალიზებული იყო ადამიანის ფუნდამენტური უფლებები, რომელთა ერთ-ერთი უმნიშვნელოვანესი გამოვლინება საარჩევნო უფლებაა. ამგვარი შეფასებების ფონზე, ოპოზიციის დესტრუქციული ქმედებები, თვისებრად აცდენილია რეალობის ობიექტურ აღქმას. აშკარაა, რომ ძალაუფლების დაბრუნებისკენ ლტოლვა, რომლითაც ისინი თავის დროზე ბოროტად სარგებლობდნენ, არ აძლევს მათ ქართველი ხალხის მკაფიო არჩევანის ღირსეულად მიღების შესაძლებლობას. სრულიად ლოგიკურია, რომ ქართველმა ამომრჩეველმა უარი უთხრა იმ პოლიტიკურ ძალას, რომელიც გამოირჩეოდა ზღვარგადასული თვითნებობით, კორუფციით, ადამიანების მკვლელობითა და წამებით, ბიზნესის რეკეტით, რომელმაც რუსეთის ფედერაციას დანაშაულებრივად ჩააბარა ქვეყნის ტერიტორიების 20 პროცენტი და ჩაიდინა უამრავი სხვა დანაშაული საკუთარი ქვეყნისა და ხალხის წინაშე. ამგვარი პოლიტიკური ძალის მიერ რამდენიმე ასეული ათასი ხმის მიღება თავისთავად სერიოზული შეშფოთების საგანია და ცნობიერების ამაღლების კუთხით, სამომავლოდ, სერიოზულ მუშაობას მოითხოვს. არჩევნების არალეგიტიმურად გამოცხადების ერთ-ერთ მთავარ არგუმენტად ოპოზიცია იყენებს დაუბალანსებელ ოქმებს. ამასთან დაკავშირებით განვმარტავთ, რომ დაუბალანსებელი ოქმები საქართველოში ჩატარებულ ყველა არჩევნებზე ფიქსირდებოდა, რის მიზეზიც ადამიანური შეცდომაა. ყურადღებას გავამახვილებთ იმ გარემოებაზეც, რომ ამგვარი ხარვეზები ხშირ შემთხვევაში ჩვენი პარტიისა და კანდიდატების საზიანოდ ფიქსირდება. ამასთან, ყველა ტექნიკური ხარვეზი, რომელიც ოქმებში ფიქსირდებოდა, ამჟამად ზუსტდება საარჩევნო ადმინისტრაციაში, რაც საარჩევნო პროცესში ფართოდ დამკვიდრებული პრაქტიკაა”, – განაცხადა კობახიძემ. მისივე თქმით, ამ არჩევნებზე ერთი ფუნდამენტური არალეგიტიმური მოვლენა დაფიქსირდა და ეს საარჩევნო აგიტაციაში მიხეილ სააკაშვილის მონაწილეობაა, რომელიც მისი თქმით, ერთდროულად ორ კონსტიტუციურ საარჩევნო ცენზს არ აკმაყოფილებს. “მეორე ადგილზე გასული პარტიის ლიდერად იმ პირის წარმოჩენა, რომელიც არ არის ქვეყნის მოქალაქე და რომელსაც შეფარდებული აქვს თავისუფლების აღკვეთა, საარჩევნო პრინციპების უხეში დარღვევაა. ჩვენ წინასწარ ვაცხადებდით, რომ არჩევნების შემდეგ რადიკალური ოპოზიცია უსათუოდ ეცდებოდა დესტრუქციას. აშკარაა, რომ ხალხის მხარდაჭერის არქონის ფონზე, ისინი არჩევნებში საკუთარ შანსს ვერ ხედავენ. სწორედ ამიტომ, დესტრუქცია არის მათთვის ერთგვარი ხავსი, რომელსაც ისინი 2012 წლიდან ეჭიდებიან. იგივე მიზეზით თქვეს მათ რამდენიმე თვის წინ უარი იმ საარჩევნო სისტემის მხარდაჭერაზე, რომელიც პარტიებს შორის საერთაშორისო პარტნიორების ძალისხმევით შეთანხმდა. ჩვენი პარტნიორების თვალთახედვით, ახალი, არსებითად პროპორციული სისტემა ნულოვანი საარჩევნო ბარიერით უნდა გახდეს მყარი საფუძველი საქართველოში მრავალპარტიული დემოკრატიის განვითარებისათვის. ჩვენ განსაკუთრებულ მადლობას ვუხდით ჩვენ მეგობარ 4 ელჩს, რომელთა ძალისხმევით დაძლეულ იქნა ჭარბი უმრავლესობის მრავალწლიანი პრობლემა და ახალ პარლამენტში შესვლის შესაძლებლობა 9 პოლიტიკურ პარტიას მიეცა. როგორც ხედავთ, ოპოზიცია საერთაშორისო პარტნიორების ამ ძალისხმევას როგორც მაშინ, საკონსტიტუციო ცვლილებებზე ხმის არმიცემით, ისე ახლაც უპასუხისმგებლოდ და უდიერად ეპყრობა. გარდა ამისა, ოპოზიციის დღევანდელი განცხადებები ნიშნავს კაპიტულაციის გამოცხადებას მეორე ტურამდე. მათ კარგად იციან, რომ მეორე ტურში აგებენ ყველა არჩევნებს და მეორე მარცხის გაფორმებას ერიდებიან იმთავითვე. ჩვენი პარტია და საარჩევნო შტაბი ხვალიდან იწყებს მზადებას არჩევნების მეორე ტურისთვის. ჩვენ დარწმუნებული ვართ ყველა საარჩევნო ოლქში დამაჯერებელ გამარჯვებაში”, – აღნიშნა მან. არსანიშნავია, რომ ოპოზიციური პარტიები, პარლამენტი შესვლასა და მეორე ტურში მონაწილეობაზე, უარს აცხადებენ.
NDI-მ საპარლამენტო არჩევნებთან დაკავშირებით ანგარიში გამოაქვეყნა
„ეროვნულ დემოკრატიული ინსტიტუტის“ (NDI, ინსტიტუტი) მიერ დღეს გამოქვეყნებული ანგარიშის მიხედვით საარჩევნო ოქმებში არსებულმა სავარაუდო უზუსტობებმა, ფართოდ გავრცელებულმა ცნობებმა საარჩევნო უბნებზე ან მის გარეთ დამაშინებელი ქცევის შესახებ, შედეგების დაგვიანებულმა გამოქვეყნებამ და წინასაარჩევნო პერიოდში ძალაუფლების ბოროტად გამოყენების განცდამ 31 ოქტომბრის საპარლამენტო არჩევნების წინ კანონმდებლობისა და ადმინისტრაციული პროცედურების გაუმჯობესების კუთხით მიღწეული წინსვლა გადაფარა. ამის შესახებ ორგანიზაციის მიერ გავრცელებულ ტექსტში წერია. „არჩევნების დღეს სანდო სადამკვირვებლო ჯგუფები, სხვა საკითხებთან ერთად, საარჩევნო ოქმებში არსებულ უზუსტობებსა და ხმის მიცემის ფარულობის დარღვევებზე საუბრობდნენ. მათ ყურადღება გაამახვილეს საარჩევნო უბნების გარეთ ფიზიკური დაპირისპირების, ჟურნალისტებისა და დამკვირველებისთვის საქმიანობაში ხელის შეშლის, მოსყიდვის და გაყალბების სავარაუდო შემთხვევებზე, ასევე საარჩევნო უბნების გარეთ პარტიების კოორდინატორებისა და აქტვისტების ყოფნაზე, რაც მათი შეფასებით დამაშინებელ გარემოს ქმნიდა. კენჭისყრის დღის შემდეგ ოპოციზიის აქტივისტებმა მასშტაბური საპროტესტო აქციები წამოიწყეს, სადაც ხმის ხელახალ დათვლას, შედეგების გაუქმებასა და ვადამდელი არჩევნების ჩატარებას მოითხოვდნენ. საკანონმდებლო ჩარჩომ არჩევნების ჩატარებისთვის მყარი საფუძველი შექმნა. 2020 წლის ივნისში გატარებულმა საკონსტიტუციო და სამართლებრივმა რეფორმებმა მონაწილეთა უფრო მეტ მრავალფეროვანებას შეუწყო ხელი. თუმცა ოპოზიციურმა პარტიებმა და არასამთავრობო ორგანიზაციებმა უკმაყოფილება გამოთქვეს საარჩევნო კომისიის წევრების მიკერძოებულობის შესახებ და გასაჩივრების პროცესის მიმართ უნდობლობა გამოხატეს. კამპანიის დაფინანსების წესების შესახებ არსებული შენიშვნები კვლავ რელევანტურია. საარჩევნო კამპანია ღია და პლურალისტური იყო. თუმცა, ამავე პერიოდში, ძალადობისა და დაშინების არაერთი შემთხვევა დაფიქსირდა. ხშირად ისმოდა ბრალდებები სახელმწიფო რესურსების ბოროტად გამოყენების შესახებ. ასევე მნიშვნელოვნად მაღალი იყო ამომრჩევლთა მოსყიდვის შესახებ გავრცელებული ცნობები. მედიის პოლარიზაციის გამო პარტიებს ტელევიზიებზე არათანაბარი წვდომა ჰქონდათ. მათი საარჩევნო მესიჯები ძირითადად ოპონენტების კრიტიკაზე იყო ორიენტირებული, ვიდრე პრობლემების გადაჭრის გზებზე. საქართველომ პოლიტიკაში მეტი ინკლუზიურობისა და მრავალფეროვნების უზრუნველსაყოფად მნიშვნელოვანი ნაბიჯები გადადგა. განსაკუთრებით აღსანიშნავია სავალდებულო გენდერული კვოტის მიღება. თუმცა, ამ პროგრესის მიუხედავად, ქალები, ეთნიკური და რელიგიური უმცირესობები, შშმ პირები და ლგბტ+ თემის წევრები კვლავაც არ იქნებიან სათანადოდ წარმოდგენილნი ახალ პარლამენტში. არჩევნების პოლარიზებულმა გაშუქებამ ამომრჩეველს ინფორმირებული გადაწყვეტილების მიღებაში შეუშალა ხელი“, - აღნიშნავენ ანგარიშის ავტორები. NDI-ის ანგარიში საქართველოს საარჩევნო სისტემის გასაუმჯობესებლად რეკომენდაციებს გასცემს. „მეორე ტურების წინ, კრიტიკულად მნიშვნელოვანია, რომ არჩევნებში მონაწილე მხარეებმა ყურადღება გაამახვილონ შემდეგზე: პასუხისმგებელმა მხარეებმა მეტი ძალისხმევა უნდა გამოიჩინონ, რათა საჩივრები სწრაფად და სათანადოდ იყოს განხილული, ხოლო საჭიროების შემთხვევაში ცალკეულ უბნებზე ხმების ხელახალი გადათვლა ან განმეორებითი კენჭისყრის დანიშვნა მოხდეს. მათ, ასევე უნდა გამოიძიონ ძალადობისა თუ დაშინების ბრალდებები და თუ საჭირო გახდა, კანონის ფარგლებში პასუხისგებაში მისცენ შესაბამისი პირები. გადაწყვეტილების მიმღებმა მხარეებმა ყველა ზომას უნდა მიმართონ, რათა მომავალში მსგავსი პრაქტიკა არ განმეორდეს. პარტიებმა და კანდიდატებმა საარჩევნო დარღვევების, ძალაუფლების ბოროტად გამოყენების, ზეწოლისა და დაშინების შესახებ ბრალდებების გასამყარებლად სათანადო მტკიცებულებები უნდა წარმოადგინონ და ამ უზუსტობების აღმოსაფხვრელად არსებული ბერკეტები გამოიყენონ. მონაწილე მხარეებმა პატივი უნდა სცენ და დაიცვან მიუკერძოებელი დამოუკიდებელი დამკვირვებლების უფლებები, რათა მათ საქმიანობა ზეწოლისა და დაშინების გარეშე გააგრძელონ. ცენტრალურმა საარჩევნო კომისიამ უნდა განამტკიცოს საუბნო საარჩევნო კომისიების მიერ პროცედურების ზედმიწევნით ზუსტად და თანმიმდევრულად აღსრულება, მათ შორის ისეთ საკითხებთან დაკავშირებით, როგორიცაა: კომისიის წევრების პასუხისმგებლობების გადანაწილება, ხმის მიცემის ფარულობის უზრუნველყოფა, მარკირების პროცედურების აღსრულება და ოქმების შევსება. მონაწილე მხარეებმა ძალისხმევა უნდა გამოიჩინონ, რათა განმუხტონ დაძაბულობა და ხელი შუწყონ მშვიდობიან გარემოს. პოლიტიკურმა ლიდერებმა და კანდიდატებმა საკუთარი საქმიანობა კვლავაც ქცევის კოდექსის მიხედვით უნდა წარმართონ. ამომრჩეველებისთვის დაბალანსებული და სანდო ინფორმაციის მისაწოდებლად, პოლიტიკურმა პარტიებმა და კანდიდატებმა სხვადასხვა დებატებსა და პოლიტიკურ გადაცემებში უნდა მიიღონ მონაწილეობა და საზოგადოებას საკუთარი პროგრამები და გეგმები წარუდგინონ. უმნიშვნელოვანესია, რომ არჩევნების მეორე ტურის წინ პარტიებმა და კანდიდატებმა ამომრჩეველთან კომუნიკაციის დროს საზოგადოებრივი ჯანდაცვის ნორმები დაიცვან. აღნიშნული საარჩევნო ანალიზი ეფუძნება ჩართულ მხარეებთან 22-31 ოქტომბერს ჩატარებულ ინტერვიუებს, დისტანციურად მყოფი გრძელვადიანი ანალიტიკოსების შეფასებებს, ინსტიტუტის მიერ საქართველოში საქმიანობის 25 წლის განმავლობაში დაგროვებულ გამოცდილებასა და ურთიერთობებს და სანდო, მიუკერძოებელი სადამკვირვებლო ორგანიზაციების მიგნებებს, რომლებიც 31 ოქტომბრის არჩევნებს მთელი ქვეყნის მასშტაბით აკვირდებოდნენ“, - აღნიშნულია NDI-ის ანგარიშში, რომელსაც თან ერთვის კომენტარები. ჟურნალისტების მიმართ ძალადობისა და მუქარის შემცველი არაერთი შემთხვევა დაფიქსირდა. კანდიდატებს შორის სატელევიზიო დებატები შეზღუდულად ტარდებოდა, რის გამოც ეს შესაძლებლობა ამომრჩევლების ინფორმირებისთვის სათანადოდ ვერ იქნა გამოყენებული. საინფორმაციო მანიპულაციები ფართოდ იყო გავრცელებული, განსაკუთრებით „ფეისბუქზე“, - აღნიშნულია ანგარიშში. „შემდგომი რეფორმების გარეშე საკვანძო დემოკრატიული ინსტიტუტების მიმართ მოსახლეობის ნდობის შემცირების ტენდენცია კვლავ გაგრძელდება“, - განაცხადა NDI-ის პრეზიდენტმა ელჩმა დერეკ მიტჩელმა. მისივე თქმით, „მონაწილე მხარეებმა პოლიტიკური ნება უნდა გამოიჩინონ და საარჩევნო პროცესის სამართლიანობა პარტიულ ინტერესებზე მაღლა დააყენონ.” „მისასალმებელია, რომ გლობალური პანდემიით გამოწვეული სირთულეების მიუხედავად, საქართველოს მოქალაქეები საარჩევნო უბნებზე ხმის მისაცემად მაინც მივიდნენ“, - განაცხადა ნიუ ჯერსის ყოფილმა გუბერნატორმა და აშშ-ის გარემოსდაცვითი სააგენტოს ხელმძღვანელმა, კრისტინ ტოდ უიტმანმა, რომელიც NDI-ის დამკვირვებელთა ჯგუფის წევრი იყო. მის კომენტარს და ანგარიშს ეროვნულ დემოკრატიული ინსტიტუტი ავრცელებს. „პირველი ტურის შედეგების შეჯამებისა და 21 ნოემბერს დაგეგმილი მეორე ტურისთვის მზადების ფონზე, არჩევნების პროცესში გაჩენილი ეჭვების საპასუხოდ, ასევე საარჩევნო პროცესისა და საბოლოო შედეგების მიმართ საზოგადოების ნდობის გასაზრდელად, მთავრობის ლიდერებსა და საარჩევნო ადმინისტრაციას საგანგებო ნაბიჯების გადადგმა დასჭირდებათ“, - აღნიშნავს კრისტინ ტოდ უიტმანი. წინამდებარე ანალიზი ასევე ეყრდნობა NDI საქართველოს საარჩევნო მონიტორინგის (GEORGIA ELECTION WATCH) ანგარიშებს, რომელიც 19 აგვისტოს, 9 ოქტომბერს და 20 ოქტომბერს გამოქვეყნდა. საარჩევნო უბნებზე ხმების 100% დათვლილია. შედეგები ასეთია: „ქართული ოცნება“ - 48,15 %; „ნაციონალური მოძრაობა - გაერთიანებული ოპოზიცია“ - 27,14%; „ევროპული საქართველო“ - 3.78%; „ლელო“ – 3,15%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ - 1%. ოპოზიციის ნაწილი აქციებს აანონსებს, რადგან მიიჩნევენ, რომ არჩევნები გაყალბებულია.
ენმ და სტრატეგია აღმაშენებელი პარლამენტის ბოიკოტს შეუერთდა
ენმ და სტრატეგია აღმაშენებელი პარლამენტის ბოიკოტს შეუერთდა. ინფორმაცია, პარტიების ლიდერებმა, ბრიფინგებზე გაახმოვანეს. პარლამენტში შესვლაზე უკვე თქვეს უარი სხვა ოპოზიციურმა პარტიებმაც, მმართველი პარტია კი არჩევნების მეორე ტურისთვის ემზადება. საპროტესტო ტალღა მას შემდეგ დაიწყო, რაც ცენტრალურმა საარჩევნო კომისიამ 2020 წლის საპარლამენტო არჩევნების პირველადი შედეგები გამოაქვეყნა. ამ დროისთვის ქვეყნის მასშტაბით ხმების 100%-ვე დათვლილია და მონაცემები შემდეგნაირად გამოიყურება: ქართული ოცნება – 48.15%ენმ-ძალა ერთობაშია – 27.14ევროპული საქართველო – 3.78%ლელო – 3.15%სტრატეგია აღმაშენებელი – 3.15%პატრიოტთა ალიანსი – 3.14%გირჩი – 2.86%მოქალაქეები – 1.33%ლეიბორისტული პარტია – 1%30-დან 16 მაჟორიტარულ ოლქში მეორე ტურები გაიმართება.
"ლელო" ახალი მოწვევის პარლამენტში შესვლასა და მანდატებზე უარს ამბობს
პოლიტიკური გაერთიანება „ლელო საქართველოსთვის“ მე-10 მოწვევის პარალამენტში შესვლაზე უარს ამბობს. ამის შესახებ პარტიის ოფისში გამართულ ბრიფინგზე პარტიის ერთ-ერთმა ლიდერმა ბადრი ჯაფარიძემ განაცხადა. "არჩევნები არის გაყალბებული, არ ასახავს ქართველი ხალხის ნებას. დღეს იმსჯელა პოლიტსაბჭომ და გადაწყვიტა, რომ არ შევა პარლამენტში", - განაცხადა ბადრი ჯაფარიძემ. ცნობისთვის, ცენტრალური საარჩევნო კომისიის წინასწარი მონაცემებით, არჩევნებში „ლელომ“ ხმების 3.15%-ი მიიღო და მე-10 მოწვევის პარლამენტში 4 მანდატის შეყვანას შეძლებს.
საპარლამენტო მანდატებზე გირჩიც უარს ამბობს
ევროპული საქართველოს, ლელოს, ლეიბორისტული პარტიისა და პატრიოტთა ალიანსის მსგავსად, საპარლამენტო მანდატებზე გირჩიც უარს ამბობს. პარტია არც დიდუბე-ჩუღურეთის ოლქში დაგეგმილ მეორე ტურში მიიღებს მონაწილეობას, სადაც მათი კანდიდატი ზურაბ ჯაფარიძე ქართული ოცნების დეპუტატ გია ვოლსკის უნდა დაპირისპირებოდა. საპროტესტო ტალღა მას შემდეგ დაიწყო, რაც ცენტრალურმა საარჩევნო კომისიამ 2020 წლის საპარლამენტო არჩევნების პირველადი შედეგები გამოაქვეყნა. ამ დროისთვის ქვეყნის მასშტაბით ხმების 100%-ვე დათვლილია და მონაცემები შემდეგნაირად გამოიყურება: ქართული ოცნება – 48.15%ენმ-ძალა ერთობაშია – 27.14ევროპული საქართველო – 3.78%ლელო – 3.15%სტრატეგია აღმაშენებელი – 3.15%პატრიოტთა ალიანსი – 3.14%გირჩი – 2.86%მოქალაქეები – 1.33%ლეიბორისტული პარტია – 1%30-დან 16 მაჟორიტარულ ოლქში მეორე ტურები გაიმართება. ოპოზიციური პარტიების დიდი ნაწილი ცესკოს მიერ გამოქვეყნებულ შედეგებს არალეგიტიმურად ცნობს და პერმანენტულ აქციებს გეგმავენ. თუმცა, შევლენ თუ არა პარლამენტში, ამაზე შიდაპარტიული დისკუსიები ამ დრომდე გრძელდება. საერთაშორისო სადამკვირვებლო ორგანიზაციები არჩევნების პროცესში მოსყიდვაზე, დაშინებასა და ძალადობრივ ინციდენტებზე საუბრობენ, თუმცა, მიუხედავად ამისა, მიიჩნევენ, რომ არჩევნების შედეგები ლეგიტიმურია, არჩევნები კონკურენტუნარიანი იყო და მეტნაკლებად დაცული იყო ძირითადი თავისუფლებები. ადგილობრივი დამკვირვებლები კი არაერთ ხარვეზსა და დარღვევაზე მიუთითებენ. გამოქვეყნდა ISFED-ის (სამართლიანი არჩევნები) ხმების პარალელური დათვლის შედეგებიც, რომლის მიხედვითაც, ქართულმა ოცნებამ ხმების 45.8% მიიღო, ენმ-ძალა ერთობაშიამ – 26.4%, ევროპულმა საქართველომ – 3.7%. ცდომილების ხარისხი 0.7%-ია. ამასთან, სამართლიანი არჩევნების შემაჯამებელი ანგარიშის მიხედვით დაფიქსირდა საარჩევნო უბნების 8%-ზე შემაჯამებელი ოქმების დისბალანსის შემთხვევები, რაც გულისხმობს ბიულეტენების ამომრჩეველთა ხელმოწერების რაოდენობაზე მეტობას.
"ნაციონალური მოძრაობა" აჭარის უმაღლესი საბჭოს მანდატებზე უარს ამბობს
"ნაციონალური მოძრაობა", ერთადერთი ოპოზიციური პარტია, რომელმაც 31 ოქტომბერს აჭარის საკანონმდებლო ორგანოში შესვლის უფლება მოიპოვა, უარს ამბობს უმაღლესი საბჭოს მანდატებზე. "31 ოქტომბრის არჩევნები ხელისუფლებამ გააყალბა, ეს არ იყო არჩევნები, ეს იყო სპეცოპერაცია... ჩვენს მხარდამჭერებთან და პარტნიორებთან ერთად მიღებულია გადაწყვეტილება - უარს ვაცხადებთ აჭარის უმაღლესი საბჭოს იმ მანდატებზე, რაც გადმოგვცა ხელისუფლებამ", - განაცხადა პარტიის წევრმა ელგუჯა ბაგრატიონმა დღეს, ბათუმის საარჩევნო შტაბში. აჭარის უმაღლეს საბჭოში ოპოზიციიდან მხოლოდ "ნაციონალურმა მოძრაობამ" გადალახა 5%-იანი ბარიერი და, წინასწარი მონაცემებით, 21-დან 6 მანდატი მოიპოვა. არჩევნების გაყალბების მიზეზით გამოწვეულ პროტესტს უერთდება უმაღლესი საბჭოს არჩევნებში მონაწილე პოლიტიკური პარტიების უმრავლესობა. ხვალ, 3 ნოემბერს, "ხმების დასაცავად" ოპოზიციის წარმომადგენლები გეგმავენ საპროტესტო აქციას ბათუმში, აჭარის მთავრობის შენობასთან. ოპოზიციის პროტესტს ბათუმში უერთდებიან : "ევროპული საქართველო", "ლელო", "ალეკო ელისაშვილი - მოქალაქეები", "ჩვენი საქართველო - სოლიდარობის ალიანსი", "ნინო ბურჯანაძე - ერთიანი საქართველო". წინასწარი მონაცემებით, აჭარის უმაღლესი საბჭოს არჩევნებში პროპორციული სისტემით, "ქართულმა ოცნებამ" მიიღო ხმების 48.12%, ნაციონალურმა მოძრაობამ -26.94%. სხვა პარტიებმა 5% - იანი ბარიერი ვერ გადალახეს. 31 ოქტომბერს, საქართველოს პარლამენტის გარდა, აჭარაში ავტონომიური რესპუბლიკის უმაღლესი საბჭო აირჩიეს. 21 დეპუტატიდან, 18 პროპორციული და 3 მაჟორიტარული სისტემით. არჩევნებში 22 პარტია და ბლოკი მონაწილეობდა.
საუკეთესო იქნება, თუ ყველა, ვინც 1%-იანი ბარიერი გადალახა, პარლამენტში შევა - მეთიუ ბრაიზა
ვფიქრობ, საუკეთესო იქნება, თუ ყველა ოპოზიციური პარტია, ვინც 1%-იანი ბარიერი გადალახა, პარლამენტში შევა, - ამის შესახებ ამერიკის შეერთებული შტატების სახელმწიფო მდივნის ყოფილმა მოადგილემ, მეთიუ ბრაიზამ „ინტერპრესნიუსთან“ განაცხადა. მისი თქმით, სხვადასხვა შეფასებით არჩევნები კონკურენტული და თავისუფალი იყო; ასევე, კარგია, რომ საარჩევნო ცვლილებები დაინერგა. „არჩევნების შესახებ სხვადასხვა - ეუთო-ს, ამერიკის შეერთებული შტატების საელჩოს, სხვადასხვა ევროპელი დამკვირვებლის შეფასება წავიკითხე. დასკვნა იყო ის, რომ არჩევნები კონკურენტული და ზოგადად, თავისუფალი იყო, თუმცა ასევე, შეშფოთება შეეხებოდა კანონდარღვევებს, როგორიცაა დაშინება, ხმების მოსყიდვა, ადმინისტრაციული რესურსების არასწორი გამოყენება და ის უსამართლობა, რომ ერთ პარტიას აქვს დიდძალი რაოდენობის თანხა. ასე რომ, ნათელია, სისტემას კვლავ სჭირდება გაუმჯობესება. სხვათა შორის, მათგან, რაც ვახსენე, ზოგიერთი მათგანი, ასე ვთქვათ, ბევრი წლის განმავლობაში, საარჩევნო პროცესში უკვე საქართველოს ტრადიციების ნაწილია და დრო სჭირდება, რომ ისინი შეიცვალოს - რა თქმა უნდა, ისინი უნდა შეიცვალოს და პროცესისგან გამორიცხული იყოს. კარგი სიახლე ის არის, რომ საარჩევნო ცვლილებები მოხდა და დაინერგა, ახლა უფრო მეტი რეფორმაა საჭირო. ჩემი აზრით, მეორე ტურისთვის ყველა ძალიან ყურადღებით დააკვირდება პროცესებს, რომ უფრო მეტი სერიოზული დარღვევა არ იყოს, რომელიც შედეგების ვალიდურობას ეჭვქვეშ დააყენებს“, - აღნიშნა ბრაიზამ. მანვე უპასუხა „ინტერპრესნიუსის“ შეკითხვას ოპოზიციური პარტიების პროტესტის შესახებ და აღნიშნა, რომ მათი ლიდერების ადგილას პარლამენტში შესვლაზე უარს არ იტყოდა. „როგორც ვნახე, ოპოზიციური პარტიების წარმომადგენლები აპროტესტებენ და ამბობენ, რომ კანონდარღვევები იმდენად სერიოზული იყო, რომ არჩევნები თაღლითურად ჩატარდა. ბევრი კითხვა არსებობს, მაგრამ ზოგადად, როგორც საერთაშორისო დამკვირვებლებმა თქვეს, არჩევნები კონკურენტული და საერთო ჯამში, თავისუფალი იყო. ვფიქრობ, საუკეთესო იქნება, თუ ყველა ოპოზიციური პარტია, ვინც 1%-იანი ბარიერი გადალახა, პარლამენტში შევა. ეს ქართულ პოლიტიკასა და დემოკრატიას უფრო კონკურენტულს გახდის, შესაბამისად, „ქართული ოცნება“ უფრო პასუხისმგებლიანი უნდა იყოს მთლიანი ქვეყნის წინაშე, თუ პარლამენტში ასეთი ცვლილება მოხდება. ასევე, ვგულისხმობ, მე რომ პარლამენტში შესვლის შესაძლებლობა მქონდეს, რა თქმა უნდა, ამას გამოვიყენებდი, რადგან სწორედ ესაა დემოკრატია. მესმის პროტესტი და იმის თქმა, რომ არჩევნები სამართლიანად არ ჩატარდა, მაგრამ მაინც ვფიქრობ, რომ დემოკრატიაში როდესაც პარტიაზეა საუბარი, პასუხისმგებლობაა ამომრჩევლის წინაშე, რომ მათთვის პარლამენტში იბრძოლო. ასე რომ, მე ვიგრძნობდი პარლამენტში შესვლისა და ჩემი ამომრჩევლების ინტერესების გატარების პასუხისმგებლობას. თუმცა მესმის, საქართველო განვითარებადი დემოკრატიული სისტემაა და ყველა ლიდერს შეუძლია, გადაწყვიტოს, როგორ უნდა გააჟღეროს თავისი პროტესტი“, - განაცხადა მეთიუ ბრაიზამ.
The Wall Street Journal-ი: პენტაგონმა აშშ-ის სამხედრო ატაშეების გამოცვლა დაიწყო
აშშ-ის თავდაცვის სამინისტრომ აშშ-ის დიპლომატიურ მისიებში სამხედრო ატაშეების გახმობა და უფრო დაბალი რანგის ოფიცრებით მათი შეცვლა დაიწყო. ამის შესახებ The Wall Street Journal-ი წერს წყაროებზე დაყრდნობით. გამოცემის წყაროების თანახმად, გადაწყვეტილება მიღებულია 2017 წლის კანონის მიხედვით, რომლის თანახმად, პენტაგონმა 2022 წლის დეკემბრისთვის 110 გენერალი და ადმირალი უნდა შეამციროს. თავდაცვის მინისტრის 24 აგვისტოს ბრძანების მიხედვით, ვაშინგტონმა თანამდებობაში ჩამოაქვეითა სამხედრო ატაშეები რვა საკვანძო მნიშვნელობის მოკავშირე ქვეყანაში - მათ შორის, დიდ ბრიტანეთში, საუდის არაბეთსა და თურქეთში. დასავლეთ აფრიკის ზოგიერთი იმ ქვეყნის საელჩოებიდან, სადაც სერიოზულ პრობლემებს ქმნიან ჯიჰადისტური დაჯგუფებები, სამხედრო დიპლომატები მთლიანად გაიწვიეს. რესურსების გადანაწილების კიდევ ერთი მიზეზია რუსეთისა და ჩინეთის შეკავება. დეტალებს არ იტყობინებიან. The Wall Street Journal-ის თანახმად, თავდაცვის სამინისტროს გადაწყვეტილებამ როგორც რესპუბლიკელების, ისე დემოკრატების მხრიდან კრიტიკა გამოიწვია. კრიტიკოსთა თქმით, ამ მოქმედებების შედეგად მოსკოვი და პეკინი გააფართოებენ გავლენას აფრიკასა და ახლო აღმოსავლეთში.
ედვარდ სნოუდენი რუსეთის მოქალაქეობის მიღებას აპირებს
აშშ-ის ეროვნული უსაფრთხოების სააგენტოს ყოფილმა თანამშრომელმა, ედვარდ სნოუდენმა განაცხადა, რომ რუსეთის ფედერაციის მოქალაქეობის მიღებას აპირებს. ამის შესახებ მან ტვიტერში დაწერა. „მშობლებთან მრავალწლიანი განშორების შემდეგ მე და ჩემს ცოლს არ გვსურს ჩვენს ვაჟთან განშორება. ამიტომ პანდემიისა და ჩაკეტილი საზღვრების ეპოქაში შეგვაქვს განცხადება რუსეთ-ამერიკის ორმაგ მოქალაქეობაზე“, - დაწერა სნოუდენმა. მისი თქმით, ის და მისი მეუღლე ლინდსი მილსი „ამერიკელებად რჩებიან“ და ვაჟს აღზრდიან „ამერიკული ღირებულებების მიხედვით, რომლებიც ჩვენ გვიყვარს, მათ შორისაა საკუთარი აზრის გამოხატვის თავისუფლება“. სნოუდენმა 2013 წელს მიიღო რუსეთში თავშესაფარი მას შემდეგ, რაც გაასაჯაროვა საიდუმლო მონაცემები სპეცსამსახურების მხრიდან მასობრივი ელექტრონული თვალთვალის პროგრამის შესახებ. სნოუდენი აცხადებს, რომ რუსეთში უნებლიეთ აღმოჩნდა - ის ჰონგ-კონგში მიფრინავდა მოსკოვში გადაჯდომით და გზაში შეიტყო, რომ მისი ამერიკული პასპორტი გაუქმებული იყო, სამშობლოში კი დევნა ელოდა. 2014 წელს სნოუდენმა რუსეთში დროებით ცხოვრების უფლება მიიღო. სხვადასხვა ინტერვიუში ის ამტკიცებდა, რომ რუსეთში თავისუფლად შეუძლია გადაადგილება. სნოუდენი, რომელიც ინფორმაციის თავისუფლების მომხრეა, რუსეთის ხელისუფლებას აკრიტიკებდა ამის შემზღუდავი ზომებისთვის. ადრე ცნობილი გახდა, რომ სნოუდენმა აშშ-ის ხელისუფლებას დაუთმო 5 მილიონ დოლარზე მეტი, რაც მან მიიღო თავისი წიგნის გაყიდვისა და ამასთან დაკავშირებული გამოსვლების გზით. აშშ-ში სნოუდენს წაყენებული აქვს ჯაშუშობის ბრალდება და მას ხანგრძლივი პატიმრობა ელის.
ახალი ზელანდიის პრემიერმა მინისტრთა ახალი კაბინეტი წარადგინა
ახალი ზელანდიის პრემიერ-მინისტრმა ჯესინდა არდერნმა არჩევნებში გამარჯვების შემდეგ მინისტრთა ახალი კაბინეტი წარადგინა. მედიის ინფორმაციით, ჯესინდა არდერნმა განაცხადა, რომ ქვეყანას „წარმოუდგენლად მრავალფეროვანი“ მთავრობა ეყოლება. პრემიერ-მინისტრმა თავის მოადგილედ ფინანსთა ყოფილი მინისტრი გრანტ რობერტსონი დაასახელა, რომელიც ფინანსთა მინისტრის პოსტსაც შეინარჩუნებს. ქვეყნის საგარეო მინისტრის თანამდებობას ნანაია მაჰუტა დაიკავებს, რომელიც „მაორის“ საზოგადოების წარმომადგენელია. აღსანიშნავია, რომ მას ნიკაპზე „მაორის“ ტრადიცული სვირინგი აქვს. ჯესინდა არდერნმა პარლამენტარი, „მწვანეთა პარტიის“ წევრი ჯეიმს შოუ კლიმატის ცვლილების მინისტრად დანიშნა, აღნიშნული პარტიის კიდევ ერთი კანონმდებელი მარამა დავიდსონი კი ოჯახური და სექსუალური ძალადობის აღკვეთასთან დაკავშირებულ საკითხებზე იმუშავებს. ახალი მთავრობის ფიცის დადების ცერემონია მიმდინარე კვირის პარასკევს გაიმართება. შეგახსენებთ, ახალ ზელანდიაში არჩევნები 17 ოქტომბერს გაიმართა, რომელშიც ჯესინდა არდერნის „ლეიბორისტულმა პარტიამ“ არჩევნებში მონაწილეთა ხმების 49 % მიიღო.
ევროპული საქართველო პარლამენტში შესვლაზე უარს ამბობს
ევროპული საქართველო უარს ამბობს, შევიდეს პარლამენტში და უარს ამბობს მიიღოს მონაწილეობა მეორე ტურებში, სადაც მათი ორი კანდიდატი, შალვა შავგულიძე და ელენე ხოშტარია გადავიდა. პარტიის ლიდერების თქმით, არჩევნების შედეგები არალეგიტიმურია. "არჩევნები, სადაც სრული სიმძლავრით მუშაობდა ორკესტრირებული გაყალბებული სისტემის მანქანა, არჩევნები, რომლის გაყალბებაშიც ჩართული იყო ერთად პარტიული სახელმწიფო და კრიმინალური სტრუქტურები. არჩევნები, სადაც ადამიანებს აშინებენ კრიმინალები, სუსი და ადგილობრივი ხელისუფლება პოლიციის სრული უმოქმედობის ფონზე, ვერ ჩაითვლება თავისუფალ არჩევნებად. არჩევნები, სადაც არის ამომრჩევლის მოსყიდვა და ასეულობით ხელით გადაკეთებული ოქმი, ვერ ჩაითვლება სამართლიან არჩევნებად. ამიტომ, ჩვენი შეფასება არის აბსოლუტურად მკაფიო, ეს არჩევნები არ იყო არც თავისუფალი, არც სამართლიანი და ეს არჩევნები არ ასახავს ქართველი ხალხის ნებას. შესაბამისად, ჩვენ ყველამ ვიმსჯელეთ და მივიღეთ ერთსულოვანი გადაწყვეტილება". – თქვა დავით ბაქრაძემ. ევროპული ასქართველოს ლიდერის ხაზგასმით აღნიშნავს, რომ ეს არ არის რიგითი პროტესტი და რიგითი ბოიკოტი, ვინაიდან მათი პარტია ყოველთვის მხარს უჭერდა არჩევნებში მონაწილეობასა და პარლამენტში აქტიურობას, მაგრამ მისივე განმარტებით, დღეს საქმე აქვთ სახელმწიფო გაყალბების მანქანასთან და ხალხის ნების ფუნდამენტურად დამახინჯებასთან. პარტიამ სხვა ოპოზიციურ პარტიებს მიმართა და იმედი დაიტოვა, რომ მათგანაც მალე მოისმენენ სამოქმედო გეგმას.
მთავრობის ადმინისტრაციის თანამშრომლები იზოლაციაში გადადიან
კოვიდინფიცირებულთან კონტაქტის გამო საქართველოს მთავრობის ადმინისტრაციის უფროსი ნათია მეზვრიშვილი თვითიზოლაციაში გადავიდა. ამის შესახებ მან ფეისბუკის გვერდზე დაწერა. თვითიზოლაციაში უკვე გადასულია საქართველოს პრემიერ-მინისტრი გიორგი გახარია და ეკონომიკის მინისტრი ნათია თურნავა. კორონავირუსი პრემიერის დაცვის თანამშრომლებს დაუდასტურდა.
