პოლიტიკა
კლინიკებში მოთავსებულ კოვიდინფიცირებულ პაციენტებსა და იზოლაციაში მყოფ პირებს არჩევნებში ხმის მიცემა შეეძლებათ
სტაციონარულ სამკურნალო დაწესებულებებსა და იზოლაციაში (კარანტინი, თვითიზოლაცია) მყოფ ამომრჩევლებთან 2020 წლის 31 ოქტომბრის არჩევნებზე გადასატან ყუთს სპეციალურად შექმნილი კომისიის წევრები მიიტანენ. ამის შესახებ ცენტრალური საარჩევნო კომისიის სპიკერმა ანა მიქელაძემ ბრიფინგზე განაცხადა. როგორც მიქელაძემ აღნიშნა, ცესკო აღნიშნული მომსახურების უზრუნველსაყოფად მუნიციპალიტეტებში საოლქო საარჩევნო კომისიების მოქმედების საზღვრებში შექმნის არანაკლებ ერთ საარჩევნო უბანს და დააკომპლექტებს სპეციალურ ჯგუფებს. „საარჩევნო ადმინისტრაცია სტაციონარულ სამკურნალო დაწესებულებებსა და იზოლაციაში მყოფი ამომრჩევლების ყველა ჯგუფს შესაბამის მომსახურებას სთავაზობს 31 ოქტომბრის არჩევნებში მონაწილეობის უზრუნველყოფისა და მათი საყოველთაო საარჩევნო უფლების რეალიზების მიზნით. აღნიშნულ საკითხთან დაკავშირებით, ცესკოს ინიციტივით შექმნილმა სპეციალურმა სამუშაო ჯგუფმა, რომლის შემადგენლობაშიც შედიან როგორც საარჩევნო ადმინისტრაციის, ისე პოლიტიკური პარტიების, სამოქალაქო სექტორის და საერთაშორისო ორგანიზაციების წარმომადგენლები, გამართეს შეხვედრები და იმსჯელეს იმ რეკომენდაციებზე, რომელთა გათვალისწინებითაც აღნიშნულ პირებს, ვირუსის გავრცელების პრევენციული ღონისძიებების და სანიტარულ-ჰიგიენური წესების მაქსიმალური დაცვით ექნებათ შესაძლებლობა მიიღონ არჩევნებში მონაწილეობა. სამუშაო ჯგუფის წევრებთან კონსულტაციების შედეგად ცესკომ შეიმუშავა დოკუმენტი, რომელიც უკვე გადაგზავნილია დამატებითი მოსაზრებების გასაზიარებლად ჯგუფის წევრებთან და რომელზეც ცესკო უახლოეს სხდომაზე მიიღებს გადაწყვეტილებას. ამასთან, საარჩევნო ადმინისტრაცია მადლობას უხდის სამუშაო ჯგუფის წევრებს კონსტრუქციული მუშაობისა და მჭიდრო თანამშრომლობისთვის. საარჩევნო ადმინისტრაცია სტაციონარულ სამკურნალო დაწესებულებებსა და იზოლაციაში მყოფ ამომრჩევლებს სთავაზობს არჩევნებში მიიღონ მონაწილეობა საარჩევნო კომისიის ფუნქციების მქონე სპეციალური ჯგუფების მომსახურებით. კერძოდ, ცესკო მუნიციპალიტეტებში საოლქო საარჩევნო კომისიების მოქმედების საზღვრებში შექმნის არანაკლებ ერთ საარჩევნო უბანს და დააკომპლექტებს სპეციალურ ჯგუფებს. სპეციალური ჯგუფის წარმომადგენელები უზრუნველყოფენ სტაციონარულ სამკურნალო დაწესებულებებსა და კარანტინში მყოფ ამომრჩევლებთან საარჩევნო ყუთის მიტანას. ამასთან, თვითიზოლაციაში მყოფ ამომრჩევლებს, რომელთა მონაცემებიც ოფიციალურად ფიქსირდება შესაბამისი უწყების მონაცემთა ბაზაში, ექნებათ შესაძლებლობა საარჩევნო ადმინისტრაციას მიმართონ გადასატანი საარჩევნო ყუთით მომსახურების მოთხოვნით“, - განაცხადა მიქელაძემ. მისივე თქმით, აღსანიშნავია, რომ საარჩევნო ადმინისტრაციის შეთავაზება სტაციონარულ სამკურნალო დაწესებულებებსა და იზოლაციაში მყოფი ამომრჩევლებისთვის ცალკე საარჩევნო უბნების გახსნასა და სპეციალური ჯგუფების საშუალებით, მობილური ყუთებით მომსახურების შესახებ, უზრუნველყოფს ჯანმრთელობისათვის მაქსიმალურ უსაფრთხოებას. „სპეციალური ჯგუფის თითოეული წევრი, მათ შორის საარჩევნო პროცესის ყველა მონაწილე აღჭურვილი იქნება შესაბამისი ეკიპირებით, კერძოდ, ერთჯერადი ხალათით, ნიღბით, ხელთათმანით, დამცავი ფარითა და სანიტარულ-ჰიგიენური საშუალებებით. სრულად იქნება დაცული ეპიდემიოლოგების რეკომენდაციები, რაც ხელს შეუწყობს ვირუსის გავრცელების პრევენციას. სპეციალურ უბნებსა და მის წევრებს არ ექნებათ შეხება ჩვეულებრივ საარჩევნო უბნებთან და შესაბამის პროცესთან, რაც უზრუნველყოფს მეტ უსაფრთხოებას, პროცესის დაცულობას და ამასთან, ჩართული მხარეებისთვის მონაწილეობის შესაძლებლობას. ნიშანდობლივია, რომ ხმების დათვლა განხორციელდება არა საკარანტინო სივრცეებსა თუ სამედიცინო დაწესებულებებში, არამედ ცალკე, სპეციალურად შექმნილ საარჩევნო უბნებში, რაც ხელს შეუწყობს პროცესის მეტ გამჭვირვალობას. რა თქმა უნდა, კანონმდებლობის თანახმად, შესაბამისი წესების დაცვით დამკვირვებლებს, მედიას და საარჩევნო სუბიექტების წარმომადგენლებს ექნებათ შესაძლებლობა გაყვნენ გადასატან საარჩევნო ყუთს, დააკვირდნენ კენჭისყრის დღის მიმდინარეობას და ხმების დათვლის პროცესს. აღსანიშნავია, რომ საარჩევნო ადმინისტრაცია დადგენილი პროცედურების უზრუნველსაყოფად მოახდენს როგორს სტაციონარულ სამკურნალო დაწესებულებებსა და იზოლაციაში მყოფი ამომრჩევლების, ისე არჩევნებში ჩართული მხარეების დროულ ინფორმირებას, რაც ხელს შეუწყობს პროცესის ყველა მონაწილის კონსტიტუციური უფლების რეალიზებას“, - განაცხადა მიქელაძემ.
თურქეთის ელჩი - საქართველოს ყარაბაღის კონფლიქტში სწორი პოზიცია აქვს
საქართველოს ყარაბაღის კონფლიქტში სწორი პოზიცია აქვს, - ამის შესახებ საქართველოში თურქეთის ელჩი ფატმა ჯერენ იაზგანი „კვირის პალიტრასთან“ ექსკლუზიურ ინტერვიუში აცხადებს. მისივე თქმით, „საქართველოს სიტუაცია საკმაოდ რთულია, თუმცა თქვენი პოზიცია ძალზე მნიშვნელოვანია“. „მოახლოებული არჩევნებიდან გამომდინარე, შესაძლოა, საგარეო პოლიტიკა პრიორიტეტული არ ჩანს, მაგრამ ამ დროს საქართველოს ორ მეზობელს შეიარაღებული კონფლიქტი აქვთ. ამ მდგომარეობაში ძალიან მნიშვნელოვანია არ მოიმოქმედოთ ისეთი რამ, რასაც კონფლიქტში ჩართული მხარეები ერთმანეთის საწინააღმდეგოდ გამოიყენებენ. მე მჯერა, რომ საქართველოს საგარეო საქმეთა სამინისტრო და სხვა შესაბამისი უწყება ყველა საჭირო ზომას მიიღებენ და ფაქიზად მიუდგებიან ამ საკითხს. საქართველოს აქვს პრინციპული პოზიცია ტერიტორიულ მთლიანობასთან დაკავშირებით და საჭიროა მივდიოთ ამ პრინციპებს. ვფიქრობ, საქართველოს ამ საკითხში სწორი პოლიტიკა აქვს: 1. ის პრინციპულ პოზიციას ყოველთვის აფიქსირებს; 2. ცდილობს იმუშაოს საერთაშორისო პარტნიორებთან კონფლიქტის დასრულებისა და რეგიონში მუდმივი მშვიდობის დამყარებისთვის. 3. სამართლიანი პოზიციაა, რომ საქართველოს არ სურს გამოაყენებინოს საკუთარი ტერიტორია შეგროვებული ფულით იარაღის შეძენისა და გაგზავნისთვის. ჩვენ საქართველოსთან შესანიშნავი ურთიერთობა გვაქვს, რადგან თურქეთი ერთადერთი მეზობელი ქვეყანაა, ვისთანაც საქართველოს საზღვრები დემარკირებული აქვს. ჩვენ არა გვაქვს ამგვარი პრობლემა ერთმანეთთან. საქართველოში სომხები და აზერბაიჯანელები ერთად ცხოვრობენ, აქვთ საერთო დასახლებები, ერთად ცხოვრების კულტურა კი ჩვენთვის ძალიან მნიშვნელოვანია. სამწუხაროა, რომ თურქეთ-საქართველოს ურთიერთობის შესახებ მესამე მხარეების მიერ შემოგდებული მცდარი და მახინჯი პროპაგანდა მიმდინარეობს. მთავარია, ამ პროპაგანდის გავრცელებას არ შევუწყოთ ხელი. მაგალითად, სომხეთის პარლამენტის თავმჯდომარის მოადგილე ლენა ნაზარიანმა განაცხადა, რომ სომხეთი საქართველოსთვის გარანტია იმისა, რომ თურქეთმა არ მოახდინოს საქართველოს ოკუპაცია. აი, ასეთ ფაქტებთან გვიწევს გამკლავება. საქართველომ ასეთ პროპაგანდას წინააღმდეგობა უნდა გაუწიოს“, - განაცხადა ფატმა ჯერენ იაზგანიმ. ელჩი ამავე ინტერვიუში აღნიშნავს, რომ თურქეთს სამხრეთ კავკასიაში პერმანენტული მშვიდობა სურს და ყარაბაღის კონფლიქტში ჩართვას არ აპირებს. „სომხები და აზერბაიჯანელები საქართველოშიც ცხოვრობენ და ჩვენ აქაც დავინახეთ ერთმანეთზე წაქეზების ერთგვარი პოლიტიკა. თურქეთის შეფასებით, ეს ძალზე¬ სახიფათოა - ერთია ომის და ომის იურისპრუდენციის შესაბამისად მიმდინარე სამხედრო მოქმედებები, მეორე კი ომის გამოყენება საზოგადოების რადიკალიზაციის მიზნით, რათა აღიკვეთოს ომის მშვიდობიანად დასრულების პერსპექტივა. ჩვენ ყველა გავაფრთხილეთ. მინდა მივულოცო საქართველოს ხელისუფლებას ამ მიმართულებით გადადგმული ნაბიჯები. ჯერჯერობით კარგად იჭერს ვითარებას, მაგრამ მოხდა უსიამოვნო ფაქტებიც. სამწუხაროდ, სომხეთის პოლიტიკა გზას უხსნის მესამე მხარის მიერ შუღლის გაღვივების მცდელობას. ჩემი მესიჯი ასეთია: თურქეთი არის აზერბაიჯანის მოძმე ქვეყანა. ჩვენ საერთოენობრივი კავშირი გვაქვს, მაგრამ ჩვენი პოლიტიკა არის ობიექტური და მიუკერძოებელი. კიდევ ერთხელ ვიმეორებ - ჩვენ რეგიონში გვჭირდება პერმანენტული მშვიდობა. "ჩვენში" ვგულისხმობ არა მარტო თურქეთს, არამედ საქართველოს, აზერბაიჯანსა და სომხეთს“, - განაცხადა ინტერვიუში ფატმა ჯერენ იაზგანიმ.
პრემიერის თქმით, არჩევნების გადადების აუცილებლობა არ არსებობს
საქართველოს პრემიერმინისტრის გიორგი გახარიას თქმით, ქვეყანაში კორონავირუსის მომატებული შემთხვევების მიუხედავად, საპარლამენტო არჩევნები არ გადაიდება და ის 31 ოქტომბერს, წესების დაცვით ჩატარდება. ამის შესახებ გახარიამ საკოორდინაციო საბჭოს დასრულების შემდეგ ილაპარაკა. "არჩევნები საქართველოში ჩატარდება კონსტიტუციურ ვადებში, არჩევნები არ გადაიდება, რამდენიმე მიზეზის გამო. პირველი - საარჩევნო უბანი ისეთ დონეზე იქნება მომზადებული ეპიდემიოლოგიური უსაფრთხოების თვალსაზრისით, რომ ზოგიერთ სავაჭრო ცენტრში და მაღაზიაში შესვლა იქნება უფრო სახიფათო, ვიდრე საარჩევნო უბანზე მისვლა. არანაირი ეპიდემიოლოგიური რისკი აქ არ იარსებებს ეს ერთი და მეორე, ჩვენ, რა თქმა უნდა, ყველა ვხედავთ, რომ პოლიტიკური პროცესი და პოლიტიკური საარჩევნო კამპანია მიმდინარეობს აბსოლუტურად ღიად. ერთადერთი, მოქალაქეებთან ერთად, რასაც ვთხოვთ პოლიტიკოსებს, წესები დავიცვათ, ვატაროთ პირბადე და დავიცვათ დისტანცია. პოლიტიკურ პროცესს და არჩევნების დღეს არაფერი არ ემუქრება და ვერც დაემუქრება". – თქვა გახარიამ. საპარლამენტო არჩევნები საქართველოში 31 ოქტომბერს ჩატარდება. საქართველოში სულ კორონავირუსის 10 325 აქტიური შემთხვევაა. პანდემიის დაწყებიდან დღემდე საქართველოში ჯამში COVID-19-ით ინფიცირების 18 663 შემთხვევაა დადასტურებული, მათგან 8 338 პაციენტი გამოჯანმრთელდა, 143 კი გარდაიცვალა. ბოლო პერიოდში ქვეყანაში ახალი კორონავირუსის შემთხვევების რაოდენობა მკვეთრად გაიზარდა. უწყებათაშორისი საკოორდინაციო საბჭოს გადაწყვეტილებით, აკრძალულია 200 ადამიანზე მეტის შეკრება, როგორც დახურულ, ისე ღია სივრცეებში. აკრძალულია ქორწილებისა და ქელეხების გადახდაც. ასევე, აჭარაში, თბილისსა და იმერეთში რესტორნები და გასართობი დაწესებულებები მხოლოდ 22:00-მდე მუშაობენ.
ელენე ხოშტარიას ოჯახის წევრს კოვიდ-19 დაუდასტურდა
ევროპული საქართველოს ერთერთი ლიდერის და ვაკე-საბურთალოს მაჟორიტარის, ელენე ხოშტარიას დეიდაშვილს კორონავირუსი დაუდგინდა. ამის შესახებ პოლიტიკოსი Facebook-ზე წერს. როგორც ხოშტარიამ აღნიშნა, ვირუსის დადასტურების შემდეგ ოჯახმა ცხელ ხაზებზე დარეკვა დაიწყო, რათა მკურნალობის შესახებ ინფორმაცია მიეღო, თუმცა, პოლიტიკოსის თქმით, მათ სათანადო პასუხს არ სცემენ. “თავს ვიკავებდი პოსტის დაწერისგან, რადგან ჩემი ოჯახის წევრს ეხება, მაგრამ შეუძლებელია ამ პრობლემაზე ხმამაღლა არ ვილაპარაკოთ. ჩემ დეიდაშვილს დაუდასტურდა კოვიდი. დავიწყეთ წესების მიხედვით გარკვევა როგორ უნდა მოვიქცეთ. გავიგეთ 4 ნომერი სადაც უნდა დარეკო. დავიწყეთ რეკვა. გადის საათები შანსი არაა. არაუშავს ოკ რამდენიმე საათი მოითმენ. გიჩნდება კითხვა. აი სიცხეზე რა დალიო? სისხლის გამათხელებელი სჭირდება თუ არა? რაღაც რისკ ჯგუფშია როგორ მოიქცე? კაციშვილი პასუხის გამცემი არაა! 48 საათი გადის უკვე, მარტო წევს სახლში, აზრზე არ ვართ არაფრის. არც საავადმყოფოში დაწვენას ვითხოვთ, არც განსაკუთრებულ ყურადღებას, უბრალოდ ტელეფონით ვინმემ კონსულტაცია გაუწიოს. 0 რეაქცია, 0 ყურადღება. ამდენი თვე იმას ვერ მოება თავი რომ ტელეფონით მაინც გაუწიო ადამიანს კონსულტაცია? რამე რომ გაურთულდეს ვინ აგებს პასუხს? მოეშვით პოლიტიკურ თამაშებს და აზრზე მოდით”, – წერს ელენე ხოშტარია.
საფრანგეთში მოკლული მასწავლებლის ხსოვნის პატივსაცემად აქციები გაიმართა
პარიზში ათასობით ადამიანი შეიკრიბა რესპუბლიკის მოედანზე მოკლული მასწავლებლის, სამუელ პატის ხსოვნისთვის პატივის მისაგებად. აქციის მონაწილეებმა სამუელ პატის ხსოვნას პატივი მიაგეს წუთიერი დუმილით და საფრანგეთის ჰიმნით. აქციაზე ჩანდა პლაკატები სლოგანით "მე ვარ მასწავლებელი". აქციები გაიმართა ლიონში, ტულუზაში, სტრასბურგში, ნანტში, მარსელსა და ბორდოში. "თქვენ ვერ შეგვაშინებთ. ჩვენ არ გვეშინია. ჩვენ ვერ დაგვყოფთ. ჩვენ საფრანგეთი ვართ" - ასე გამოეხმაურა აქციებს საფრანგეთის პრემიერმინისტრი ჟან კასტექსი Twitter-ზე. 47 წლის ისტორიის მასწავლებელი გამოხატვის თავისუფლების გაკვეთილზე მოსწავლეებისთვის მუჰამედის კარიკატურის ჩვენებისთვის წარმოშობით ჩეჩენმა, 18 წლის პირმა 17 ოქტომბერს თავი მოჰკვეთა. თავდამსხმელი პოლიციამ თავდასხმის ადგილიდან პარიზში რამდენიმე ქუჩის მოშორებით მოკლა. პროკურორის განცხადებით, 18 წლის პირი პარიზში ცხოვრობდა და აქამდე სადაზვერვო სამსახურისთვის მისი ვინაობა ცნობილი არ იყო. დაკავებულია თავდამსხმელის ოთხი ახლო ნათესავი. დაკავებულია კიდევ ხუთი პირი, მათ შორის ერთ-ერთი მოსწავლის მამა და, ასევე, მოსწავლის მამის ნაცნობი, რომელიც სადაზვერვო სამსახურებისთვის ცნობილია. მასწავლებლის მიერ მუჰამედის კარიკატურის ჩვენებამ არაერთი მუსლიმი მშობლის რისხვა გამოიწვია. შეგახსენებთ, რომ 2015 წლის 7 იანვარს ძმები საიდ და შერიფ კუაშები შეიჭრნენ "შარლი ებდოს" რედაქციაში და ცეცხლი გახსნეს. მთლიანობაში თავდასხმას 12 ადამიანის, მათ შორის ჟურნალის მთავარი რედაქტორის, წამყვანი კარიკატურისტებისა და ორი პოლიციელის სიცოცხლე ემსხვერპლა. ტერაქტზე პასუხისმგებლობა აიღეს ალ-ქაიდამ და ე.წ ისლამურმა სახელმწიფომ. 2015 წლის თავდასხმის შემდეგ "შარლი ებდოს" ოფისი საიდუმლო ადგილას გადავიდა. მას შემდეგ, რაც "შარლი ებდომ" თქვა, რომ მოციქული მოჰამედის კარიკატურებს ხელმეორედ დაბეჭდავდა, ალ-ქაიდას მხრიდან გამოცემის მიმართ მუქარა განახლდა. აღსანიშნავია, რომ სექტემბრის დასაწყისში დაიწყო "შარლი ებდოზე" 2015 წლის ტერორისტულ თავდასხმაში მონაწილეობაში ბრალდებული 14 პირის სასამართლო პროცესი. სასამართლო პროცესის დაწყების წინა დღეს "შარლი ებდომ" ხელახლა დაბეჭდა მუჰამედის კარიკატურები, რომლებიც 2015 წლის თავდასხმის მიზეზი გახდა. 25 სექტემბერს პარიზის ცენტრალურ უბანში, "შარლი ებდოს" ყოფილი ოფისის წინ დანით შეიარაღებულმა თავდამსხმელმა ორი ადამიანი დაჭრა. შინაგან საქმეთა მინისტრის გერალდ დარმანინის ინფორმაციით, თავდამსხმელი პაკისტანიდანაა და საფრანგეთში სამ წლის წინ ჩამოვიდა. პარასკევს პარიზში მომხდარი დანით თავდასხმისთვის დაკავებული ეჭვმიტანილის თქმით, მისი სამიზნე იყო სატირული გამოცემა "შარლი ებდო".
აზერბაიჯანი: სომხეთი აღჯაბადის ტერიტორიას დილიდან ბომბავს
სომხეთის შეიარაღებული ძალები ღამის განმავლობაში გორანბოის, ტერტერისა და აღდაბის რაიონებში ნაღმტყორცნებისა და არტილერიის გამოყენებით შეტევას ახორციელებდნენ, დღეს დილიდან კი - აღჯაბადის ტერიტორიას ბომბავენ, - ამის შესახებ ინფორმაციას აზერბაიჯანული მედია ქვეყნის თავდაცვის სამინისტროზე დაყრდნობით ავრცელებს. მათივე ინფორმაციით, 18 ოქტომბერს დღისით და ღამის განმავლობაშიც ოპერაციები აღდარა-აღდამის, ფუზული-გადრუტი-ჯაბრაილისა და მდინარე არაზის გასწვრივ მიმდინარეობდა. „ამჟამად, ჩვენი ჯარისკაცები ოპერატიულ ვითარებას მთელს ფრონტზე აკონტროლებენ", - აცხადებენ აზერბაიჯანის თავდაცვის უწყებაში. 17 ოქტომბერს აზერბაიჯანმა და სომხეთმა მთიან ყარაბაღში ჰუმანიტარული მიზნით ცეცხლის შეწყვეტის ახალ შეთანხმებას მიაღწიეს. ქვეყნების საგარეო უწყებებში განაცხადეს, რომ ცეცხლი 18 ოქტომბრის 00:00 საათიდან შეწყდებოდა, თუმცა მხარეები ერთმანეთს ცეცხლის შეწყვეტის რეჟიმის დარღვევაში კვლავ ადანაშაულებენ. მთიან ყარაბაღში საბრძოლო მოქმედებები 27 სექტემბერს დაიწყო.
ანატოლი ბიბილოვს კორონავირუსი დაუდასტურდა
ცხინვალის ოკუპირებული რეგიონის ე.წ. „პრეზიდენტს“ ანატოლი ბიბილოვს კორონავირუსი დაუდასტურდა. ამის შესახებ ინფორმაციას ადგილობრივი მედია ბიბილოვის პრესმდივან დინა გასიევაზე დაყრდნობით ავრცელებს. მისი თქმით, ე.წ. „პრეზიდენტს“ ვირუსის იოლი ფორმა აქვს და საკუთარი „მოვალეობის“ შესრულებას დისტანციურ რეჟიმში განაგრძობს. ცნობისათვის, რამდენიმე დღის წინ კორონავირუსი დინა გასიევასაც დაუდასტურდა.
ახალი ზელანდიის საყოველთაო არჩევნებში არდერნის ლეიბორისტული პარტია იმარჯვებს
ახალი ზელანდიის პრემიერმინისტრის, ჯასინდა არდერნის, ცენტრისტული მემარცხენე ლეიბორისტული პარტია საყოველთაო არჩევნებს იგებს. ამ დროისთვის ხმათა 77% დათვლილია. საარჩევნო კომისიის ინფორმაციით, ლეიბორისტულ პარტიას 49% აქვს, ხოლო ნაციონალურს - 27%. იმ შემთხვევაში, თუ ლეიბორისტული პარტია პარლამენტში ადგილების ნახევარზე მეტ ადგილს დაიკავებს, არდერნი ამჟამინდელი სისტემით შეძლებს შექმნას პირველი ერთპარტიული მთავრობა. ოპოზიციური, ნაციონალური პარტიის ლიდერმა, ჯუდით კოლინსმა პრემიერმინისტრს უკვე დაურეკა და მიულოცა. არჩევნებს, მეტწილად, აღიქვამენ Covid-19-ზე არდერნის აგრესიული პოლიტიკის გატარების რეფერენდუმად. "ხალხი ძალიან მადლობელი და ბედნიერი იყო, თუ როგორ ვმართეთ Covid". - აღნიშნა ფინანსთა მინისტრმა, გრანტ რობერტსონმა. დემოკრატიული პროექტის ანალიტიკოსის, ჯოფრი მილერის, თქმით, გამარჯვება, მეტწილად, არის ჯასინდა არდერნის პოპულარობის და ბრენდის პირადი ტრიუმფი. არდერნის განცხადებით, მას მთავრობის წინამძღოლობის მანდატი აქვს. არდერნის ამჟამინდელ კოალიციურ პარტნიორებს, ნაციონალისტურ ახალი ზელანდიის პირველ პარტიას აქვს 2.6%, მწვანეთა პარტიას კი 7.6%. იმ შემთხვევაში, თუ პრემიერმინისტრი მთავრობის შექმნას მხოლოდ თავისი ლეიბორისტული პარტიით ვერ შეძლებს, ვარაუდობენ, რომ ის კოალიციაში შევა მწვანეებთან. 1970-იანი წლების შემდეგ იქნება ახალი ზელანდიის პირველი სრულიად მემარცხენეთა მთავრობა. ამ სცენარის დადგომის შემთხვევაში, კოლინსი მოსახლეობას აფრთხილებდა, რომ ეს მეტ გადასახადებს და ბიზნესისთვის მტრულ გარემოს მოიტანდა. არდერნმა პირობა დადო, რომ ყველაზე მაღალშემოსავლიანებს გადასახადებს გაუზრდის, ხოლო კოლინზი მოსახლეობას გადასახადებს მოკლევადიან შემცირებას დაჰპირდა. ახალ ზელანდიაში არჩევნები აგვისტოში ერთი თვით გადადეს კორონავირუსის ინფიცირებით ახალი შემთხვევების გაზრდის შემდეგ. ამის შემდეგ ქვეყნის ყველაზე დიდი ქალაქი მეორედ ჩაკეტეს. არდერნმა გადაწყვეტილება მას შემდეგ მიიღო, რაც სხვადასხვა პარტიების წარმომადგენლებმა დაიჩივლეს, რომ კორონავირუსის გამო წინასაარჩევნო კამპანიას ვერ ატარებდნენ. ახალ ზელანდიაში საზღვრები კვლავ ჩაკეტილია, ტურიზმი გაჩერებულია, ეკონომისტები ვარაუდობენ, რომ ჩაკეტვას ხანგრძლივი რეცესია მოჰყვება. 17 ოქტომბერს ასევე გაიმართა რეფერენდუმი რეკრეაციული მარიხუანის მოხმარების და ევთანაზიის ლეგალიზაციაზე. რეფერენდუმის შედეგები 30 ოქტომბერს გახდება ცნობილი. იმ შემთხვევაში, თუ ახალ ზელანდიაში მარიხუანას მოხმარებას და გაყიდვას საკმარისი რაოდენობა დაუჭერს მხარს, ურუგვაის და კანადის შემდეგ ეს იქნება მესამე ქვეყანა, სადაც მარიხუანას მოხმარება და გაყიდვა ზრდასრული ადამიანისთვის დასაშვები იქნება.
აზერბაიჯანის საელჩომ რუსეთის საგარეო უწყებას საპროტესტო ნოტა გაუგზავნა
აზერბაიჯანის საელჩომ რუსეთის საგარეო უწყებას საპროტესტო ნოტა გაუგზავნა, - ამის შესახებ ინფორმაციას აზერბაიჯანული მედია რუსეთში აზერბაიჯანის საელჩოზე დაყრდნობით ავრცელებს. მათივე ინფორმაციით, საელჩომ საპროტესტო ნოტის გაგზავნის გადაწყვეტილება რუსი დეპუტატის ვიტალი მილონოვის აზერბაიჯანის ოკუპირებულ ტერიტორიებზე ვიზიტს გამო მიიღო. საპროტესტო ნოტაში აღნიშნულია, რომ 16 ოქტომბერს ვიტალი მილონოვი სეპარატისტული რეჟიმის ლიდერს შეხვდა და მთიანი ყარაბაღის კონფლიქტის ესკალაციისკენ მიმართული პროვოკაციული განცხადებები გააკეთა. ამასთან, ნოტაში აღნიშნულია, რომ რუსეთის ფედერაციის სახელმწიფო სათათბიროს დეპუტატის ამგვარმა პროვოკაციულმა საქციელმა, რომლის მიზანი რუსეთ-აზერბაიჯანის ურთიერთობების გაუარესებაა, როგორც აზერბაიჯანის საზოგადოების, ისე რუსეთში მცხოვრები აზერბაიჯანელების სამართლიანი გულისწყრომა გამოიწვია.
საგარეო უწყება კვლავ ხაზს უსვამს, რომ საქართველოს თავისი საჰაერო სივრცე სამხედრო ტიპის ფრენებისთვის დაკეტილი აქვს
„ბოლო დღეების განმავლობაში, მედიაში, სამწუხაროდ კვლავ გრძელდება სპეკულაციები საქართველოს საჰაერო სივრცის გავლით შესაძლო სამხედრო გადაზიდვებთან დაკავშირებით“,-ამის შესახებ საგარეო საქმეთა სამინისტროს განცხადებაშია აღნიშნული. როგორს სამინისტროში აცხადებენ, საქართველოს დაკეტილი აქვს თავისი საჰაერო სივრცე სამხედრო ტიპის ფრენებისთვის. „მოგეხსენებათ, რომ საქართველოს დაკეტილი აქვს თავისი საჰაერო სივრცე სამხედრო ტიპის ფრენებისთვის და აღნიშნულის შესახებ საჯაროდაც განვაცხადეთ. რაც შეეხება სამოქალაქო და ჰუმანიტარულ ფრენებს, ამ მიმართულებით საქართველო პირნათლად ასრულებს თავის საერთაშირისო ვალდებულებებს. ამასთან, გვინდა განვმარტოთ, რომ ასეთი ტიპის ფრენები არ საჭიროებს სპეციალურ ნებართვებს და სამოქალაქო ტიპის ფრენები საჰაერო სივრცეში ხორციელდება შეტყობინების და შესაბამისი ინფორმაციის მიწოდების საფუძველზე. შესაბამისად, საქართველოს ხელთ არსებული დოკუმენტაციის და ინფორმაციის მიხედვით, საქართველოს საჰაერო სივრცეში განხორციელებული ფრენები სრულ შესაბამისობაშია საერთაშორისო ნორმებთან და ICAO-ს წესებთან. საერთაშორისო საჰაერო გადაზიდვების უსაფრთხოებისა და სამოქალაქო ფრენების სხვა დანიშნულებით გამოყენებისგან თავის არიდების მიზნით, მოვუწოდებთ ყველა მხარეს, როგორც ტვირთის მიმღებ ქვეყნებს, ასევე, გამგზავნებს, საჰაერო გზით სამოქალაქო და ჰუმანიტარული ტვირთის გადატანისას მკაცრად გააკონტროლონ აღნიშნული გადაზიდვები. პირველ რიგში, გადამზიდავი ქვეყნების პასუხისმგებლობაა სამოქალაქო ფრენები ხორციელდებოდეს ჩიკაგოს კონვენციის პრინციპებისა და სტანდარტების შესაბამისად, რაც კრძალავს სამოქალაქო ფრენების მიზანმიმართულად გამოყენებას სამხედრო მიზნებისთვის. დარღვევის აღმოჩენის და მყარი მტკიცებულებების არსებობის შემთხვევაში საქართველო მოახდენს მკაცრ რეაგირებას და დამრღვევებს მოეთხოვებათ პასუხი საერთაშორისო სამართლის შესაბამისად“,-ნათქვამია გავრცელებულ განცხადებაში.
ავსტრიის საგარეო საქმეთა მინისტრს კორონავირუსი დაუდასტურდა
ავსტრიის საგარეო საქმეთა მინისტრს, ალექსანდერ შალენბერგს, ევროპელ კოლეგებთან შეხვედრის შემდეგ კორონავირუსი დაუდასტურდა. როგორც ავსტრიის საგარეო საქმეთა სამინისტროს პრესსპიკერი აცხადებს, მინისტრი შესაძლოა ორშაბათს, ლუქსემბურგში ევროპელ კოლეგებთან შეხვედრისას დაინფიცირდა. „სიფრთხილის ზომებიდან გამომდინარე, მთავრობის ყველა წევს ტესტირება ჩაუტარდება. ვეჭვობთ, რომ შალენბერგი ორშაბათს, ლუქსემბურგში გამართული საგარეო ურთიერთობათა საბჭოს შეხვედრაზე დაინფიცირდა“, - განაცხადა პრესსპიკერმა.
ექიმი ფაუჩი: მადლიერების დღის აღნიშვნისგან, წელს, თავი უნდა შევიკავოთ
ამერიკის შეერთებული შტატების ალერგიისა და ინფექციური დაავადებების ცენტრის დირექტორი, ქვეყნის მთავარი ინფექციონისტი ენტონი ფაუჩი ამბობს, რომ წელს, კორონავირუსის პანდემიის გამო, სასურველია, ამერიკელებმა თავი შეიკავონ მადლიერების დღის ტრადიციული აღნიშვნისგან. ექიმი ფაუჩის თქმით, წელს, დიდი ოჯახური თავყრილობა, განსაკუთრებით მაშინ, როდესაც ოჯახის წევრებს სხვადასხვა, შორი ადგილებიდან მოუწევთ მგზავრობა, არაა რეკომენდებული. ექიმის თქმით, ეს ვირუსის გავრცელების რისკებს გაზრდის. ტელეკომპანია CBS-სთან საუბრის დროს, ფაუჩიმ თქვა: "ძალიან ფრთხილად უნდა ვიყოთ, როდესაც ვსაუბრობთ ნათესავებზე, რომლებიც თვითმფრინავით აპირებენ მგზავრობას, რისკის ქვეშ დგებიან აეროპორტში, თვითმფრინავში, შემდეგ კი კარს აღებენ და ამბობენ: "გილოცავთ მადლიერების დღეს". ფაუჩი ამბობს, რომ ასეთ დიდ თავყრილობებს, განსაკუთრებით, უნდა მოერიდონ ისეთი ოჯახები, სადაც მოხუცები, ან სხვა, რისკ ჯგუფში მყოფი ადამიანები არიან. თავად ფაუჩიმ, რომელიც 79 წლისაა, განაცხადა, რომ მადლიერების დღეს, შვილები მასთან არ ჩავლენ. ექიმის განმარტებით, ისინი სამ სხვადასხვა შტატში ცხოვრობენ და სახლში დასაბრუნებლად, თვითმფრინავით მოუწევთ გადაფრენა, რაც მისი აზრით, რისკის ფასად არ ღირს. ფაუჩის ინტერვიუმდე ერთი დღით ადრე, ამერიკის დაავადებათა კონტროლის ცენტრმა თქვა, რომ მცირე ტიპის შეკრებებიც კი, კორონავირუსის გავრცელების საფრთხეს ზრდის. ცენტრის რეკომენდაციები ემთხვევა ექიმი ფაუჩის რეკომენდაციებს მადლიერების დღის აღნიშვნასთან დაკავშირებითაც. ისინი მოუწოდებენ მოსახლეობას, ეს დღესასწაული მხოლოდ ვიწრო წრეში, იმ ადამიანებთან ერთად აღნიშნონ, ვისთან ერთადაც ცხოვრობენ. მადლიერების დღე, ამერიკაში 1621 წლიდან აღინიშნება. ნოემბერში, ამერიკელები იხსნებენ ევროპელი მოახალშენეების კონტიტენტზე ჩამოსვლას და პირველ უხვ მოსავალს. გადმოცემის თანახმად, მაშინ ახალმა მოსახლეებმა, ადგილობრივი მოსახლეობა, ინდიელი-ამერიკელები დაპატიჟეს, რათა მადლობა გადაეხედათ იმისთვის, რომ მოსავლის მოყვანა ასწავლეს. 1863 წელს, პრეზიდენტმა, აბრამ ლინკოლმა მადლიერების დღე სახელმწიფო დღესასწაულად გამოაცხადა. ამ დღეს ამერიკელები ისვენებენ და ოჯახთან და ნათესავებთან ერთად აღნიშნავენ. ტრადიციული სუფრის განუყოფელი კერძი კი შემწვარი ინდაურია. ინდაური მადლიერების დღის ერთ-ერთი მნიშვნელოვანი ნაწილია. ყოველ წელს, ამერიკის შეერთებული შტატების პრეზიდენტი, თეთრ სახლში, 2 ინდაურს იწყალებს და დაკვლისგან გადაარჩენს ხოლმე.
ნოემბერში ევროკავშირის სამიტი აღარ ჩატარდება
გერმანიის კანცლერის ანგელა მერკელის გადაწყვეტილებით, „კოვიდ-19“-ის შემთხვევების მატების ფონზე, ნოემბერში დაგეგმილი ევროკავშირის სამიტი აღარ ჩატარდება,– იუწყება BBC. გერმანიის კანცლერმა ჟურნალისტებს განუცხადა, რომ პანდემიის პირობებში სამიტი არ უნდა ჩატარდეს. სამიტის ინიციატორი გერმანია იყო, რომელიც ამჟამად, როტაციის პრინციპით, ევროკავშირის პრეზიდენტი ქვეყანაა. სამიტზე ევროკავშირისა და ჩინეთის ურთიერთობაზე მსჯელობა იგეგმებოდა. ცნობისთვის: გერმანიაში, იტალიაში, საფრანგეთსა და ესპანეთში Covid-19-ით ინფიცირების რეკორდული დღიური მაჩვენებელი დაფიქსირდა.
ნიკოლა სარკოზის კიდევ ერთი ბრალი წაუყენეს
საფრანგეთის ყოფილ პრეზიდენტს, ნიკოლა სარკოზის 2007 წლის საპრეზიდენტო კამპანიის დროს ჩადენილ ფინანსურ დარღვევებთან დაკავშირებით კიდევ ერთი ბრალი წარუდგინეს. ბრალდება კრიმინალური კავშირებზე ლიბიიდან მიღებულ დაფინანსებას უკავშირდება. ლაპარაკია ლიბიის ყოფილი დიქტატორის, მუამარ კადაფისგან საიდუმლოდ მიღებულ 50 მილიონ ევროზე. სარკოზი ბრალის წარდგენას საკუთარ Twitter-ზე გამოეხმაურა და დაწერა, რომ უდანაშაულოა და საბოლოოდ სიმართლე გაიმარჯვებს. სარკოზის 2018 წელს უკვე წარუდგინეს ბრალი კორუფციის, საჯარო ფინანსების დამალვის და გაფლანგვის და კამპანიის არალეგალური ფინანსების მუხლებით. იანვარში ქვეყნის ფინანსურ პროკურატურაში განაცხადეს, რომ გამოძიება გაფართოვდებოდა და საქმეში მონაწილე პირებს კიდევ ერთი მუხლით წაუყენებდნენ ბრალს. 2007 წლის წინასაარჩევნო კამპანიისათვის ლიბიის რეჟიმიდან დაფინანსების მიღების გამო ბრალი უკვე აქვს წარდგენილი საქმეში მონაწილე ერთ-ერთ პირს. მან წაყენებული ბრალი პარიზის სააპელაციო სასამართლოში გაასაჩივრა. ის ამტკიცებდა, რომ საქმეში არსებული დოკუმენტები ყალბია, თუმცა სასამრთლომ გასულ თვეს გადაწყვეტილება გამოაცხადა, სარკოზის საჩივარი არ დააკმაყოფილა და დაადგინა, რომ სამხილებად დოკუმენტების გამოყენება შესაძლებელია. სარკოზი ამ საქმეზე 2018 წელს დააკავეს, მოგვიანებით კი პოლიციის მეთვალყურეობის ქვეშ გადაიყვანეს.
აშშ-ს მიერ ტიბეტის საკითხებზე წარმომადგენლის დანიშვნამ პეკინი გააბრაზა
ტრამპის ადმინისტრაციამ ტიტების საკითხებზე, მაღალი რანგის ადამიანის უფლებათა საკითხების ოფიციალური წარმომადგენელი დანიშნა, როგორც სპეციალური კოორდინატორი. ამ ნაბიჯმა ჩინეთის აღშფოთება გამოიწვია. პეკინი აშშ-ს ადანაშაულებს ტიბეტში დესტაბილიზაციის მისწრაფებისთვის. აშშ-ს სახელმწიფო მდივანმა დააანონსა, რომ რობერტ დესტრო დემოკრატიისთვის, ადამიანთა უფლებების და მუშაობის სახელმწიფო მდივნის დამხმარე, დამატებით თანამდებობას დაიკავებს, რაც უკვე 2017 წლიდან ვაკანტურია. ჩინეთი უარს აცხადებდა და უარს აცხადებს აშშ-ს კოორდინატორთან მუშაობაზე. აშშ-ს ქმედებებს ჩინეთი შიდა საქმეებში ჩარევად განიხილავს. "ტიბეტის საქმეები არის ჩინეთის საშინაო საქმეები და საგარეო ჩარევა დაუშვებელია," - განაცხადა ჩინეთის საგარეო საქმეთა სამინისტროს სპიკერმა, ჭაო ლიძიენმა. პომპეოს განცხადებით, დესტრო "უწინამძღოლებს აშშ-ს საქმიანობას, რომ ჩინეთის სახალხო რესპუბლიკასთან და დალაი ლამას ან მის წარმომადგენელს შორის პოლიტიკური დიალოგი წაახალისოს; დაიცვას ტიბეტის უნიკალური რელიგიური, კულტურული და ლინგვისტური იდენტობა; ზეწოლა მოახდინოს, რათა ადამიანის უფლებებს პატივი სცენ". ჩინეთმა ტიბეტზე კონტროლი 1950 წელს დაამყარა, რასაც მოიხსენიებს "მშვიდობიან გათავისუფლებად", რითაც ტიბეტს "ფეოდალური" წარსულის გადაგდებაში დაეხმარა. პეკინს ტიბეტში კულტურული გენოციდის ჩადებაში ადანაშაულებენ. ივლისში პომპეოს განცხადებით, აშშ ზოგ ჩინელ მაღალჩინოსანს, რომელიც ჩართულია ტიბეტში დიპლომატიური წვდომის დაბლოკვაში და ადამიანის უფლებების დარღვევაში, ვიზებზე შეზღუდვები დაუწესეს. ვაშინგტონი ტიბეტის "არსებით ავტონომიას"მხარს უჭერს. აღსანიშნავია, რომ ბარაკ ობამასგან განსხვავებით, დონალდ ტრამპი აშშ-ს პრეზიდენტის თანამდებობაზე ყოფნის დროს დალაი ლამას არ შეხვედრია.
შეზღუდვების მიუხედავად ტაილანდში ათიათასობით ადამიანი საპროტესტო აქციაზე შეიკრიბა
ტაილანდში სამი თვეა საპროტესტო აქციები გრძელდება. ქვეყნის ხელისუფლებამ ხუთშაბათს, 15 ოქტომბერს, ხუთზე მეტი ადამიანის შეკრება აკრძალა. საპასუხოდ ბანკოკის ცენტრში სამ თვის განმავლობაში ყველაზე მასშტაბური მშვიდობიანი პროდემოკრატიული საპროტესტო აქცია გაიმართა. კომენდანტის საათის მიუხედევად, რომელიც 18:00-ზე იწყება, აქცია გვიანობამდე გაგრძელდა. აქციის მონაწილეებმა პირობა დადეს, რომ შემდეგ დღეს კვლავ შეიკრიბებოდნენ. დემონსტრანტები ტაილანდის პრემიერ მინისტრის პრაიუთ ჩან-ოჩას გადადგომას და მეფე მაჰა ვაჩირალონგკორნის ძალაუფლების შემცირებას ითხოვენ. პრემიერ მინისტრი პრაიუთ ჩან-ოჩა ხელისულებაში 2014 წელს სამხედრო გადატრიალების შემდეგ მოვიდა. პოლიციის თანახმად, ისინი დააპატიმრებდნენ ყველა დემონსტრანტს, თუმცა არ განუმარტავს, როგორ წარუდგენდნენ ბრალდებებს ათიათასობით ადამიანს. სამეფო სასახლეს დემონსტრანტებსა და მათ მოთხოვნებზე კომენტარი არ გაუკეთებია. ამ დრომდე ხელისფულება აქციების ჩატარებას დიდწილად ხელს არ უშლიდა, თუმცა მდგომარეობა მას შემდეგ შეიცვალა, რაც დემონსტრანტებმა ქვეყანაში დაბრუნებული დედოფალი სუთჰიდას კორტეჟს აქცია მოუწყვეს. მეფე და დედოფალი დროის უმეტეს ნაწილს ევროპაში ატარებენ. ამჯერად ისინი რამდენიმე კვირით გერმანიიდან დაბრუნდნენ. აქციის შემდეგ პოლიციამ ოცამდე დემონსტრანტი დააპატიმრება, დამაპიმრებულებს შორის იყო პროტესტის სამი ლიდერიც. ტაილანდში სამეფო ოჯახის კრიტიკა და შეურაცხყოფა კანონის დონეზე მკაცრად ისჯება. ბოლო სამი თვის განმავლობაში გამართულ საპროტესტო აქციებში მონაწილეთა უმეტესობა ახალგაზრდა ტაილანდელია. აქციებში ყველაზე აქტიურად სტუდენტები მონაწილეობენ. პროტესტს სკოლის მოსწავლეებიც გამოხატავენ. პროტესტები ტაილანდში მიმდინარე წლის თებერვალში დაიწყო, მას შემდეგ რაც პოპულარული ოპოზიციური პოლიტიკური პარტია მომავალი წინ იძულებული გახდა დაშლილიყო. 2019 წლის მარტში ტაილანდში 2014 წლის სამხედრო გადატრიალების შემდეგ პირველი არჩევნები ჩატარდა. არჩევნების შედეგად პრემიერ მინისტრის პოსტი პრაიუთ ჩან-ოჩამ შეინარჩუნა, თუმცა პარტია მომავალი წინ მესამე ადგილზე გავიდა და პარლამენტში შევიდა.თუმცა 2020 წლის თებერვალში სასამართლოს თანახმად პარტიამ პარტიის ლიდერისგან, თანათორნ ჯანგურნგრუანკიტისგან სესხი აიღო, რომელიც შემოწირულობად შეფასდა, რაც კანონით აკრძალულია. პარტია იძულებული გახდა დაშლილიყო, რასაც საპროტესტო ტალღა მოჰყვა. პროტესტი COVID-19-თან დაკავშირებულმა შეზღუდვებმა შეაფერხა. თუმცა საპროტესტო აქციები ივნისში განახლდა, მას შემდეგ რაც პროდემოკრატიული აქტივისტი გაუჩინარდა. ვანჩალეარმ სატსაკსიტი, რომელიც 2014 წლის შემდეგ კამბოჯაში გადასახლებაში ცხოვრობს, ქუჩიდან გაიტაცეს. დემონსტრანტები შემთხვევაში ტაილანდის ხელისუფლებას ადანაშაულებენ. მთავრობა ბრალდებას უარყოფს. ბოლო თვეების განმავლობაში ხალხი აქტიურად ეწინააღმდეგება მეფის გადაწყვეტილებას, რომლითც მან სამეფო გვრიგვინის ქონება თავის პირად ქონებად გამოაცხადა, რის შემდეგაც მეფე ტაილანდის ყველაზე მდიდარი ადამიანი გახდა. ამ დრომდე ის სახელმწიფოს ანგარიშზე იყო და მოსახლეობის სასარგებლოდ. გამოიყენებოდა. მჯელობის საგანი გახდა მეფის კიდევ ერთი გადაწყვეტილება, რომლის თანახმადაც მად ბანკოკში დაფუძნებული სამხედრო ძალების განკარგვის უფლება მიეცა. მეფის ხელში სამხედრო ძალის მობილიზება თანამედროვე ტაილანდისთვის უპრეცედენტო გადაწყვეტილებაა.
რა წესების დაცვა იქნება სავალდებულო საარჩევნო უბნებზე - ცესკო
კენჭისყრის კაბინა ერთი მხრიდან გახსნილი უნდა დარჩეს და გახსნილი მხარე კედლისკენ უნდა იყოს მიმართული ისე, რომ არ დაირღვეს კენჭისყრის ფარულობის პრინციპი, ამომრჩეველი კი უზრუნველყოფილი უნდა იყოს ინდივიდუალური მოხმარებისათვის განკუთვნილი კალმისტრით. ამასთანავე, კენჭისყრის შენობაში უნდა განთავსდეს კონტეინერი, რომელშიც ამომრჩეველმა ხმის მიცემის შემდეგ, მის მიერ გამოყენებული კალამი უნდა მოათავსოს, – ამის შესახებ ცენტრალური საარჩევნო კომისიის დადგენილებაშია ნათქვამი, რომელიც ახალი კორონავირუსით გამოწვეული ინფექციის (COVID-19) გავრცელების პრევენციის მიზნით, კენჭისყრის დღისთვის საარჩევნო ღონისძიებისა და სანიტარიულ-ჰიგიენური მოთხოვნების განსაზღვრას ემსახურება. დადგენილების თანახმად, კენჭისყრის შენობის შესასვლელთან უნდა განთავსდეს დეზობარიერი და ხელის დეზინფექციისთვის საჭირო, სულ მცირე, 70% ალკოჰოლის შემცველი ხელის დასამუშავებელი ხსნარი. ასევე, თვალსაჩინო ადგილას უნდა განთავსდეს ინფორმაცია ვირუსის გავრცელების პრევენციული ღონისძიებების შესახებ. ამასთანავე, ცესკო-ს გადაწყვეტილებით, კენჭისყრის შენობაში არ დაიშვება შენობაში ყოფნის უფლების მქონე პირი ტემპერატურის შემოწმების გარეშე, თუმცა უნდა აღინიშნოს, რომ ეს რეგულაცია ამომრჩეველზე არ ვრცელდება. გარდა ამისა, უზრუნველყოფილი უნდა იყოს კენჭისყრის შენობაში ხშირად შეხებადი ზედაპირების, მათ შორის, კარის სახელურებისა და სამუშაო მაგიდების სათანადო წესით ყოველ 3 საათში ერთხელ დამუშავება. საუბნო საარჩევნო კომისიის წევრები უზრუნველყოფილი უნდა იყვნენ პირბადით, დამცავი ფარითა და ერთჯერადი ხელთათმანებით; რაც შეეხება საარჩევნო ბიულეტინების დათვლის პროცესს, მთვლელები მაგიდებთან უნდა განთავსდნენ ისე, რომ არ აღმოჩნდნენ ერთმანეთის პირისპირ, კენჭისყრის შენობაში ყოფნის უფლების მქონე დანარჩენმა პირებმა კი მაგიდისგან 2 მეტრის დაშორებით ისე უნდა დაიკავონ ადგილი, რომ შეძლონ საარჩევნო ბიულეტენების დათვლისა და დახარისხების პროცესზე დაკვირვება. საარჩევნო უბნის გახსნამდე და კენჭისყრის შედეგების შეჯამების პროცესის დასრულების შემდგომ, უნდა მოხდეს კენჭისყრის შენობის დალაგება და დამუშავება სადეზინფექციო ხსნარით.
მაიკ პომპეომ თურქეთი მთიანი ყარაბაღის კონფლიქტში ჩართულობის გამო გააკრიტიკა
აშშ-ს სახელმწიფო მდივანმა მაიკ პომპეომ განაცხადა, რომ თურქეთის მონაწილეობამ აზერბაიჯანსა და სომხეთს შორის კონფლიქტში რეგიონში რისკი გაზარდა და კიდევ ერთხელ გაიმეორა მისი მოწოდება დიპლომატიური გზით საკითხის გადასაჭრელად. პომპეომ გააკრიტიკა თურქეთი მთიანი ყარაბაღის კონფლიქტში ჩართულობის გამო. "თურქეთი კონფლიქტში ჩაერია და აზერბაიჯანს რესურსები მიაწოდა, რითაც გაიზარდა რისკი, საბრძოლო ძალა, ამ ისტორიულ ბრძოლაში",- განაცხადა პომპეომ. მისივე თქმით, კონფლიქტის გადაჭრა უნდა მოხდეს მშვიდობიანი გზით. ”ამ კონფლიქტის მოგვარება უნდა მოხდეს მოლაპარაკებებისა და მშვიდობიანი დისკუსიით, არა შეიარაღებული კონფლიქტის გზით, არა რა თქმა უნდა, მესამე მხარის ქვეყნების ჩართულობით", - აღნიშნა პომპეომ.
ევროკავშირმა ნავალნის მოწამვლისთვის რუს მაღალჩინოსნებს სანქციები დაუწესა
ევროკავშირმა რუსი ოპოზიციონერის, ალექსეი ნავალნის მოწამვლისთვის, სანქციები დაუწესა რუსეთის ექვს მაღალჩინოსანს და ქიმიური კვლევის ცენტრს, ორგანული ქიმიის და ტექნოლოგიის რუსეთის სახელმწიფო კვლევით ინსტიტუტს. სანქცირებულებს შორის არიან: ალექსანდერ ბორტნიკოვი - ფედერალური უშიშროების სამსახურის დირექტორი, პაველ პოპოვი - თავდაცვის სამინისტროს მინისტრის მოსადგილე, ალექსეი კრივორუჩკო - თავდაცვის მინისტრი მოადგილე, ანდრეი იარინი - პრეზიდენტის აღმასრულებელ ადმინისტრაციაში პრეზიდენტის საშინაო პოლიტიკის დირექტორატის ხელმძღვანელი, სერგეი კირიენკო - პრეზიდენტის აღმასრულებელი ადმინისტრაციის შტაბის უფროსის პირველი მოადგილე, სერგეი მენიაილო - ვლადიმირ პუტინის სრულუფლებიანი წარმომადგენელი ციმბირის ფედერალურ რაიონში. რაც შეეხება, ორგანული ქიმიისა და ტექნოლოგიის სახელმწიფო სამეცნიერო კვლევით ინსტიტუტს (GosNIIOKhT), ეს არის სახელმწიფო კვლევითი ინსტიტუტი, რომელსაც ევალება საბჭოთა კავშირიდან მემკვიდრეობით მიღებული ქიმიური იარაღის მარაგების განადგურება. 1994 წლამდე ორგანიზაცია ქიმიურ იარარებს ავითარებდა, მათ შორის, ნოვიჩოკს. ევროკავშირის განცხადებაში ვკითხულობთ, რომ "იმის გათვალისწინებით, რომ ალექსეი ნავალნი მეთვალყურეობის ქვეშ იყო მისი მოწამვლის დროს, გონივრულია დავასკვნათ, რომ მოწამვლა მხოლოდ ფედერალური უშიშროების სამსახურის ჩართულობით იყო შესაძლებელი," - ვკითხულობთ ევროკავშირის განცხადებაში. ევროკავშირისვე განცხადებით, სანქციები არის ნაწილი იმ ქმედებებისა, რითაც უნდა შეეწინააღმდეგონ "ქიმიური იარაღების გამოყენებას და გავრცელებას". რუსეთი ნავალნის საქმეზე სანქციების დაწესებაზე ევროკავშირთან დიალოგის გაწყვეტით იმუქრება. ალექსეი ნავალნი ბერლინის კლინიკიდან 22 სექტემბერს 32-დღიანი მკურნალობის შემდეგ გაწერეს. ნავალნიმ ინტენსიური თერაპიის განყოფილებაში 24 დღე გაატარა. ის გერმანიაში რეაბილიტაციის კურსის ბოლომდე დარჩება. გერმანიის კანცლერის ანგელა მერკელის თქმით, ნავალნის მოწამვლის საქმე ბადებს "ძალიან სერიოზულ კითხვებს, რომლებზე პასუხის გაცემაც მხოლოდ რუსეთის მთავრობას შეუძლია და მათ ეს უნდა გააკეთონ". თავად ალექსეი ნავალნიმ თავის მოწამვლაში ვლადიმირ პუტინი დაადანაშაულა. "მე მჯერა, რომ პუტინი ამ დანაშაულის უკან დგას და მომხდარის შესახებ არ მაქვს სხვა ვერსია". - განაცხადა ნავალნიმ გერმანულ მედიასთან საუბრისას. ქიმიური იარაღის ნოვიჩოკის შესახებ ვრცლად წაიკიტხეთ ტაბულას სტატიაში - კრემლის პრობლემების საბჭოთა წამალი - რა არის "ნოვიჩოკი"? ალექსეი ნავალნიზე ვრცლად წაიკითხეთ ტაბულას სტატიაში - "უცხო თავისიანთა შორის და თავისიანი უცხოთა შორის - ვინ არის ალექსეი ნავალნი".
"ყველა მოქალაქეს, რომელიც სამშობლოში ბრუნდება და თან PCR ტესტი ექნება, საკანატინო სივრცე აღარ დასჭირდება"
საქართველოში დაბრუნებულ საქართველოს იმ მოქალაქეებს, რომელთაც თან PCR ტესტი ექნებათ, საკარატინოსივრცე აღარ დასჭირდებათ. პრემიერ-მინისტრის გიორგი გახარიას ინფორმაციით, მას შემდეგ, რაც დაემატება და გაიხსნება ახალი ფრენები, საქართველოს მოქალაქეების საკარანტინე სივრცეებში გადაყვანის სქემა შეიცვლება. “ჩვენს ყველა მოქალაქეს, რომელიც სამშობლოში ბრუნდება და თან PCR ტესტი ექნება, საკანატინე სივრცე აღარ დასჭირდება. ექნება შესაძლებლობა 12 დღის განმავლობაში თვითიზოლაციაში გადავიდეს. ეს ის მოთხოვნაა, რაც მან უნდა დააკმაყოფილოს. მოქალაქეებს, რომელთაც PCR ტესტი არ ექნებათ, შეეძლებათ, ზუსტად ისევ ისე გამოიყენონ საკარანტინე სივრცე“, - განაცხადა გიორგი გახარიამ მთავრობის სხდომის შემდეგ გამართულ ბრიფინგზე.
