ეკონომიკა
ვარლამ გოლეთიანი მთავრობას: 100-წლიანი ხელშეკრულების 49-ად გადაკეთება პრობლემას ვერ გადაჭრის
"რიონის ხეობის მცველების" ლიდერი ვარლამ გოლეთიანი საქართველოს პრემიერ-მინისტრის ირაკლი ღარიბაშვილისა და ეკონომიკის მინისტრის ნათია თურნავას განცხადებებებს გამოეხმაურა. გოლეთიანის თქმით, მთავრობის წარმომადგენლები ურთიერთგამომრიცხავ განცხადებებს აკეთებენ, რაც ნიშნავს იმას, რომ გუნდში საკითხთან დაკავშირებით საერთო პოზიცია არ აქვთ. ვარლამ გოლეთიანის თქმით, პრემიერისთვის კრიტიკულად შეუსაბამოა გაფორმებული ხელშეკრულება, ხოლო ნათია თურნავა მას არ ეთანხმება. გარდა ამისა, რიონი ხეობის მცველი მიიჩნევს, რომ ინვესტორთან მოლაპარაკებების გასამართად მისვლამდე მთავრობის წევრები იმ ადამიანებთან უნდა მისულიყვნენ, ვინც ეს პრობლემა დააყენა. "საკითხს დაარქვეს პრობლემური, თუმცა მათ, ვინც ეს პრობლემა დავსვით და საკითხი პრობლემად წარმოვაჩინეთ, მათ არ გვესაუბრებიან. ახლა იმის იმედად თუ არიან, რომ პროექტში 100 წელს 49 წლად გადააკეთებენ და მხოლოდ ეს იქნება საკმარისი, არასწორი მიდგომაა. მთავრობა ჯერ ჩვენ უნდა შეგვხვედროდა", - განაცხადა გოლეთიანმა. დღეს ეკონომიკის მინისტრმა ნათია თურნავამ განაცხადა, რომ "ნამახვანჰესის" პროექტი მხოლოდ გაუმჯობესებული და უსაფრთხო სახით განხორციელდება. მისი თქმით, საზოგადოებისთვის ცნობილია, რომ „ნამახვანჰესის“ კაშხლის მშენებლობაზე 12-თვიანი მორატორიუმი გამოცხადდა და ამ დროის განმავლობაში ყველაფერი უნდა გაკეთდეს პროექტის გაუმჯობესებისთვის. "ამ მიზნით ექსპერტები უკვე მუშაობენ - 15-მდე სხვადასხვა ექსპერტულმა ორგანიზაციამ გაიწვია ის კვლევები, რაც გვქონდა ერთი თვის წინ გამოქვეყნებული. ველოდებით მათ უკუკავშირს, თუ რა აღმოაჩინეს კვლევებში, რაც დამატებით სამუშაოებს საჭიროებს. ყოველ შემთხვევაში, კაშხლის მშენებლობა არ დაიწყება მანამ, ვიდრე ყველა არ დარწმუნდება, რომ ეს ნაგებობა არის განსაკუთრებით უსაფრთხო", - აღნიშნა თურნავამ. მინისტრის თქმით, ასევე მიდის მუშაობა ინვესტორთან, რათა მოხდეს პირობების გაუმჯობესება და პირველ რიგში, ეს უკავშირდება ხელშეკრულების იმ ნაწილს, რომელიც მიწის იჯარის ვადას - 99 წლით გადაცემას ეხება. "მართალია, 99 წლით იჯარით გადაცემა შეესაბამება კანონმდებლობას, მაგრამ დავინახეთ, რომ ამასთან დაკავშირებით არის აზრთა სხვადასხვაობა საზოგადოებაში და ვფიქრობთ, რომ ამ ნაწილშიც უნდა მივაღწიოთ პროგრესს. როცა გვექნება საბოლოო გადაწყვეტილება, ამას გავახმოვანებთ. სხვა დანარჩენში, რასაკვირველია, ეს პროექტი მნიშვნელოვანია, ის ენერგეტიკულად აძლიერებს სახელმწიფოს, მაგრამ გაუმჯობესებული და უსაფრთხო სახით განხორციელდება", - განაცხადა თურნავამ. ამასთანავე, საქართველოს პრემიერ-მინიტრმა, ირაკლი ღარიბაშვილმა აღნიშნა, რომ "ნამახვანჰესის" პროექტი, არსებული პირობებით აღარ გაგრძელდება.
ნათია თურნავა: იმ ავიაკომპანიების რაოდენობა, რომლებიც პანდემიამდე ასრულებდნენ რეისებს ქუთაისის საერთაშორისო აეროპორტში, თითქმის აღდგენილია
"ქუთაისის საერთაშორისო აეროპორტი, ბოლო წლებში მთავრობის მიერ გატარებული პოლიტიკის შედეგად, განსაკუთრებით ტურისტული ნაკადების ზრდის შედეგად, 2018-19 წლებში მიჩნეული იყო ევროპაში ერთ-ერთ ყველაზე სწრაფად მზარდ აეროპორტად, რამაც, რა თქმა უნდა, დღის წესრიგში დააყენა მისი სწრაფად განახლების განხორციელება და პანდემიის მიუხედავად, ერთი დღითაც არ შეფერხებულა ეს პროექტი", - ამის შესახებ ნათია თურნავამ ქუთაისის განახლებული საერთაშორისო აეროპორტის პრეზენტაციაზე სიტყვით გამოსვლისას განაცხადა. მისი ინფორმაციით, იმ ავიაკომპანიების რაოდენობა, რომლებიც პანდემიამდე ოპერირებდნენ ქუთაისის საერთაშორისო აეროპორტში, თითქმის აღდგენილია. "პანდემიამდე ქუთაისის აეროპორტში ოთხი ავიაკომპანია დაფრინავდა 33 მიმართულებით, ხოლო წელს, მაისის მდგომარეობით, უკვე სამი ავიაკომპანია დაფრინავს 25 მიმართულებით და ეს პროცესი გრძელდება ბაზრის გახსნისა და პანდემიის დაძლევის კვალობაზე", - აღნიშნა ნათია თურნავამ. ქუთაისის განახლებული საერთაშორისო აეროპორტი დღეს ოფიციალურად გაიხსნა. აეროპორტის გახსნის ცერემონიაში მონაწილეობა მიიღეს პრემიერ-მინისტრმა ირაკლი ღარიბაშვილმა, რეგიონული განვითარებისა და ინფრასტრუქტურის მინისტრმა ირაკლი ქარსელაძემ და ადგილობრივი ხელისუფლების წარმომადგენლებმა. დასრულდა ქუთაისის განახლებული საერთაშორისო აეროპორტის შიდა ინტერიერის მოწყობა, გაერთიანდა ძველი და ახალი ტერმინალები.
საქართველოში პირდაპირი უცხოური ინვესტიციების მოცულობა 28%-ით შემცირდა
საქართველოში განხორციელებული პირდაპირი უცხოური ინვესტიციების მოცულობამ 2021 წლის პირველ კვარტალში შეადგინა 125.4 მლნ. აშშ დოლარი, რაც 2020 წლის პირველი კვარტლის მონაცემებზე 28.3%-ით ნაკლებია. წინასწარი მონაცემები საქართველოს სტატისტიკის ეროვნულმა სამსახურმა გამოაქვეყნა. ამის მიზეზად დასახელებულია რეინვესტიციის მოცულობის შემცირება და რამდენიმე საწარმოს გადასვლა საქართველოს რეზიდენტის საკუთრებაში. მიმდინარე წლის პირველ კვარტალში სულ 125.4 მლნ აშშ დოლარის ინვესტიცია განხორციელდა. 2021 წლის პირველ კვარტალში უმსხვილესი ინვესტორი ქვეყნები იყვნენ გაერთიანებული სამეფო(მთლიანი პირდაპირი უცხოური ინვესტიციების 70.5%);რუსეთი (25.4%);თურქეთი (19.5%).2021 წლის პირველ კვარტალში ყველაზე მეტი პირდაპირი უცხოური ინვესტიცია საფინანსო სექტორში განხორციელდა და მთლიანი მოცულობის 74.9% შეადგინა. მეორე ადგილზეა ენერგეტიკის სექტორი (28.3%) და მესამეზე დამამუშავებელი მრეწველობის სექტორი (22.2%).
საქართველოს ეკონომიკური ზრდის პროგნოზი მსოფლიო ბანკმა 6%-მდე გაზარდა
საქართველოს ეკონომიკური ზრდის პროგნოზი 2021 წლისთვის მსოფლიო ბანკმა 6%-მდე გაზარდა. აპრილში საქართველოს ეკონომიკა 44.8%-ით გაიზარდა მსოფლიო ბანკმა ასევე განაახლა რეგიონის ქვეყნების ეკონომიკური ზრდის პროგნოზიც - 2021 წელს სომხეთში 3.4%-იანი ზრდა, აზერბაიჯანში - 2.8%-იანი ზრდა, თურქეთში - 5%-იანი ზრდა, რუსეთში - 3.2%-იანი ზრდა, უკრაინაში კი 3.8%-იანი ზრდა არის მოსალოდნელი.
გლობალური ეკონომიკის ზრდა 2021 წელს სავარაუდოდ 5.6 %-ს მიაღწევს - მსოფლიო ბანკი
გლობალური ეკონომიკის ზრდა 2021 წელს სავარაუდოდ 5.6 %-ს მიაღწევს, რაც ბოლო 80 წლის განმავლობაში ზრდის ყველაზე სწრაფი მაჩვენებელია, ძირითადად რამდენიმე წამყვან ქვეყანაში მდგრადი ეკონომიკური ზრდის გამო. თუმცა, მსოფლიო ბანკის მიერ გამოქვეყნებული გლობალური ეკონომიკური პერსპექტივების 2021 წლის ივნისის გამოცემის თანახმად, ბევრი განვითარებადი ქვეყანა კვლავ ებრძვის COVID-19 -ის პანდემიას და მის შედეგებს. ინფორმაციას მსოფლიო ბანკი ავრცელებს. აღდგენის მიუხედავად, წარმოების გლობალური მოცულობის მაჩვენებელი წლის ბოლოსთვის პანდემიამდელ საპროგნოზო მაჩვენებლებზე 2% -ით ნაკლები იქნება. შემოსავლის დანაკარგები ერთ სულ მოსახლეზე ძველ ნიშნულს 2022 წლამდე არ დაუბრუნდება ფორმირებადი ბაზრის მქონე და განვითარებადი ქვეყნების ორი მესამედისთვის. დაბალშემოსავლიან ქვეყნებში, სადაც ვაქცინაციის პროცესი შეფერხებულია, პანდემიის ზემოქმედებამ სიღარიბის დაძლევის მიმართულებით განხორციელებული ღონისძიებებით მანამდე მიღწეულ შედეგებზე უარყოფითი გავლენა იქონია, დაამძიმა სოციალურად დაუცველთა მდგომარეობა და სხვა გრძელვადიანი გამოწვევები წარმოქმნა. „გლობალური აღდგენის მიმართულებით არსებული ნიშნების მიუხედავად, პანდემია განაგრძობს სიღარიბის და უთანასწორობის გაღრმავებას მსოფლიოს განვითარებად ქვეყნებში“, - აღნიშნა მსოფლიო ბანკის პრეზიდენტმა დევიდ მალპასმა. მისივე თქმით, აუცილებელია გლობალურად კოორდინირებული ძალისხმევა ვაქცინის განაწილების დასაჩქარებლად და ვალის შესამცირებლად, განსაკუთრებით დაბალშემოსავლიანი ქვეყნებისთვის. ჯანდაცვის მიმართულებით არსებული კრიზისის შემსუბუქებასთან ერთად, პოლიტიკის შემმუშავებლებმა რეაგირება უნდა მოახდინონ პანდემიის გახანგრძლივებულ ზემოქმედებაზე მწვანე, მდგრადი და ინკლუზიური ეკონომიკური ზრდის სტიმულირებისთვის მაკროეკონომიკური სტაბილურობის შენარჩუნებასთან ერთად.“ განვითარებული ქვეყნებიდან აშშ -ს ეკონომიკური ზრდის მაჩვენებელი წელს სავარაუდოდ 6.8%-ს მიაღწევს, რაც ასახავს ფართომასშტაბიან ფისკალურ მხარდაჭერას და პანდემიის გამო დაწესებული შეზღუდვების შემსუბუქებას. სხვა მოწინავე ქვეყნებში ზრდის მაჩვენებელი ასევე, თუმცა უფრო ნაკლებად მტკიცეა. ფორმირებადი ბაზრის მქონე და განვითარებად ქვეყნებს შორის მოსალოდნელია, რომ ჩინეთის ეკონომიკური ზრდის მაჩვენებელი 8.5 %-ს მიაღწევს, რაც ასახავს დაგროვილი მოთხოვნის უზრუნველყოფას. მთლიანობაში ფორმირებადი ბაზრების მქონე და განვითარებად ქვეყნებში ზრდის მაჩვენებელი წელს 6%-ს მიაღწევს, რაც გამყარებული იქნება მაღალი მოთხოვნით და გაზრდილი სასაქონლო ფასებით. თუმცა, აღდგენა ბევრ ქვეყანაში COVID-19 -ის შემთხვევების ზრდით და ვაქცინაციის პროცესის პროგრესის ჩამორჩენით, ისევე როგორც ზოგიერთ გარემოებებში მხარდაჭერის შეწყვეტით ფერხდება. ჩინეთის გარდა ქვეყნების ამ ჯგუფში მოსალოდნელია შედარებით მოკრძალებული ზრდა (4.4%). აღდგენის პროცესის მაჩვენებელი ფორმირებადი ბაზრების მქონე და განვითარებად ქვეყნებში 2022 წელს სავარაუდოდ 4.7% იქნება. და მაინც, სარგებელი ამ ქვეყნების ჯგუფში არ არის საკმარისი 2020 წლის რეცესიის დროს განცდილი ზარალის დასაძლევად. წარმოების გამოსავალი 2022 წელს სავარაუდოდ 4.1% -ს მიაღწევს, რაც დაბალია პანდემიამდე არსებულ საპროგნოზო მაჩვენებლებზე. შემოსავალი ერთ სულზე ბევრ განვითარებად ქვეყანაში სავარაუდოდ, ასევე პანდემიამდელ დონეზე ქვემოთ ჩამოვა და დანაკარგები გააუარესებს ჯანდაცვასთან, განათლებასთან და ცხოვრების სტანდარტებთან დაკავშირებულ პრობლემებს. ჯერ კიდევ COVID-19 -ის კრიზისამდე იყო მოსალოდნელი, რომ ეკონომიკური ზრდის მამოძრავებელი ფაქტორები იმპულსს დაკარგავდა, და ეს ტენდენცია პანდემიის დამაზიანებელი ზემოქმედებით სავარაუდოდ გაძლიერდება. პროგნოზის მიხედვით, ზრდა დაბალშემოსავლიან ქვეყნებში წელს, 2020 წლის გარდა, ბოლო 20 წლის განმავლობაში ყველაზე დაბალი იქნება, რაც ნაწილობრივ ვაქცინაციის მეტად დაბალ ტემპს ასახავს. აღნიშნულ ქვეყნებში ზრდა სავარაუდოდ 2.9%- ით მოიმატებს 2021 წელს ვიდრე 2022 წელს 4.7%-მდე გაიზრდება. ამ ჯგუფის გამოსავლის დონე 2022 წელს პროგნოზის მიხედვით 4.9%-ს მიაღწევს, რაც პანდემიამდელ საპროგნოზო მაჩვენებლებზე დაბალია. გლობალური ეკონომიკური პერსპექტივების ანგარიშის ანალიტიკური თავი იკვლევს, თუ როგორ შეუძლია სავაჭრო ხარჯების შემცირებას (მაგალითად, ლოგისტიკასთან და სასაზღვრო პროცედურებთან დაკავშირებით), ეკონომიკის აღდგენის ხელშეწყობა განვითარებად ბაზრებზე ვაჭრობის სტიმულირებით. გასული 15 წლის განმავლობაში კლების მიუხედავად, სავაჭრო ხარჯები ამ ქვეყნებში თითქმის ორჯერ მაღალი რჩება ვიდრე მოწინავე ქვეყნებში, უმეტესწილად ლოგისტიკური და ტრანსპორტირების მაღალი ხარჯების გამო. სავაჭრო პროცესის და განბაჟების მოთხოვნების გამარტივების ძალისხმევა სატრანსპორტო ინფრასტრუქტურის და მართვის გასაუმჯობესებლად ხელს შეუწყობს ინფორმაციის გაზიარებას და გააძლიერებს კონკურენციას ადგილობრივ ლოგისტიკაში, საცალო და საბითუმო ვაჭრობაში, რასაც ხარჯების მნიშვნელოვანი დაზოგვა შეუძლია. „კავშირები სავაჭრო და გლობალური ღირებულების ჯაჭვების მეშვეობით ეკონომიკური წინსვლის მნიშვნელოვანი მამოძრავებელი ძალაა განვითარებადი ქვეყნებისთვის, რამაც ბევრი ადამიანისთვის შესაძლებელი გახადა სიღარიბის დაძლევა. თუმცა, არსებული ტენდენციის მიხედვით, გლობალური ვაჭრობა შენელებული იქნება მომდევნო ათწლეულის განმავლობაში. განვითარებადი ქვეყნების მიერ COVID-19 -ის პანდემიის დამარცხების პარალელურად, სავაჭრო ხარჯების შემცირებას შეუძლია ისეთი გარემოს შექმნა, რომელიც ხელს შეუწყობს მიწოდების გლობალურ ჯაჭვებში ჩართულობის და ვაჭრობის ზრდის აღდგენას“, - განაცხადა მსოფლიო ბანკის ჯგუფის თანასწორი ეკონომიკური ზრდის და ფინანსური ინსტიტუტების მიმართულების ვიცე-პრეზიდენტმა ინდერმით ჯილმა. ანგარიშის მომდევნო თავი წარმოგვიდგენს ანალიზს გლობალური ინფლაციის ზრდის შესახებ, რომელიც თან ახლავს ეკონომიკური საქმიანობის აღდგენას. უკანასკნელი ხუთი გლობალური რეცესიიდან 2020 წლის გლობალურმა ეკონომიკურმა ვარდნამ, ინფლაციის უმნიშვნელო კლება და შემდგომი უსწრაფესი მატება გამოიწვია. მიუხედავად იმისა, რომ გლობალური ინფლაცია სავარაუდოდ წლის დარჩენილი პერიოდის განმავლობაში ზრდას გააგრძელებს, ინფლაციის ტარგეტირების განმახორციელებელი ქვეყნების უმეტესობაში მოსალოდნელია ინფლაციის მაჩვენებლის სამიზნე დიაპაზონში დარჩენა. ფორმირებადი ბაზრების მქონე და განვითარებად ქვეყნებში, სადაც ინფლაცია სამიზნე მაჩვენებელს აჭარბებს, რეაგირება ფულად-საკრედიტო პოლიტიკის გადმოსახედიდან შეიძლება გამართლებული არ იყოს, თუ აღნიშნული მოვლენა დროებითია და ინფლაციის მოლოდინის მდგრადობის შენარჩუნება ხდება. „მაღალმა გლობალურმა ინფლაციამ მომდევნო თვეებში შესაძლოა დარგობრივ პოლიტიკასთან დაკავშირებით განვითარებადი ქვეყნების არჩევანი გაართულოს, რამდენადაც ზოგიერთი აღნიშნული ქვეყანა მდგრადი აღდგენის უზრუნველსაყოფად კვლავ მხარდაჭერის ღონისძიებებზეა დამოკიდებული. თუ ვალის რეკორდულად მაღალ დონესთან დაკავშირებული რისკები არ აღმოიფხვრა, ეს ქვეყნები ფინანსური ბაზრის სტრესის მიმართ მოწყვლადი დარჩება, განვითარებულ ქვეყნებში ინფლაციური წნეხის შედეგად ინვესტორთა განწყობის გაუარესების შემთხვევაში“, - აღნიშნა მსოფლიო ბანკის პერსპექტივების ჯგუფის დირექტორმა აიჰან კოსემ. სურსათზე ფასების ზრდას და აგრეგატული ინფლაციის დაჩქარებას ასევე შეუძლია დაბალშემოსავლიან ქვეყნებში სურსათის ნაკლებობასთან დაკავშირებული გამოწვევების შექმნა. ამ ქვეყნებში პოლიტიკის შემმუშავებლებმა უნდა უზრუნველყონ, რომ ინფლაციის მზარდ მაჩვენებლებს არ მოჰყვეს ინფლაციის მოლოდინების შესუსტება და შეეწინააღმდეგონ სუბსიდიებს ან ფასების კონტროლს, რომ თავიდან იყოს აცილებული გლობალური სასურსათო ფასების ზრდა. გაცილებით ეფექტური იქნება სოციალური დაცვის პროგრამების გაფართოებაზე ფოკუსირებული პოლიტიკა, ლოგისტიკის გაუმჯობესება და ადგილობრივი სურსათის მიწოდების კლიმატის ცვლილების მიმართ მდგრადობის ამაღლება. მსოფლიო ბანკის ჯგუფის საპასუხო ღონისძიებები COVID-19 -ის პანდემიის მიმართ COVID-19 -ის პანდემიის დაწყებიდან მსოფლიო ბანკის ჯგუფმა დაახლოებით 125 მლრდ. აშშ დოლარზე მეტი გამოყო თავისი ისტორიის მანძილზე უსწრაფესი და უდიდესი კრიზისით - პანდემიით გამოწვეული ზემოქმედების მიმართ საპასუხო ღონისძიებების განსახორციელებლად ჯანდაცვის, ეკონომიკის და სოციალური მიმართულებით. დაფინანსება 100 -ზე მეტ ქვეყანას პანდემიის მიმართ მზადყოფნის ამაღლებაში, ღარიბი მოსახლეობის და სამუშაო ადგილების დაცვაში და კლიმატზე ფოკუსირებული აღდგენის დაწყებაში ეხმარება. ასევე, დაბალი და საშუალო შემოსავლის მქონე ქვეყნებს ბანკი 12 მლრდ. აშშ დოლარს გამოუყოფს COVID-19 -ის ვაქცინების, ტესტების და სამკურნალო საშუალებების შეძენისა და განაწილებისთვის.
კახა კუჭავამ და აშშ-ის სავაჭრო პალატის ხელმძღვანელებმა ბიზნეს სექტორს შორის თანამშრომლობის გაღრმავების საკითხი განიხილეს
პარლამენტის თავმჯდომარე საქართველოში მოქმედ ბიზნეს ასოციაციებთან შეხვედრებს აგრძელებს. კახა კუჭავა ამერიკის სავაჭრო პალატის ვიცე-პრეზიდენტებს და პალატის წარმომადგენლებს შეხვდა. ინფორმაციას პარლამენტის პრესსამსახურის ავრცელებს. როგორც ცნობილია, შეხვედრაზე, პარლამენტსა და ბიზნეს სექტორს შორის თანამშრომლობის გაღრმავებაზე ისაუბრეს და ამ მიმართულებით, სხვადასხვა ფორმატებზე იმსჯელეს. კახა კუჭავამ პალატის წარმომადგენლებს საკუთარი ხედვები გააცნო. ყურადღება გამახვილდა სექტორის წინაშე არსებულ გამოწვევებზე. მხარეები მჭიდრო თანამშრომლობასა და ახლო მომავალში, მომდევნო შეხვედრის გამართვაზე შეთანხმდნენ.
რუსეთმა 9 კანადელ მაღალჩინოსანს სანქციები დაუწესა
რუსეთმა 9 კანადელ მაღალჩინოსანს სანქციები დაუწესა. ამის შესახებ ინფორმაციას რუსეთის საგარეო საქმეთა სამინისტრო ავრცლეებს. უწყების ცნობით, კანადელ მაღალჩინოსნებს განუსაზღვრელი ვადით აეკრძალათ რუსეთის ტერიტორიაზე შესვლა. რუსეთის მიერ სანქცირებულთა სიაში მოხვდნენ: 1 . კანადის იუსტიციის მინისტრი და გენერალური პროკურორი დავიდ ლამეტი. 2. პენიტენციური დაწესებულებების ხელმძღვანელი ენ კელი 3. კანადის სადაზვერვო ძალების მეთაური სკოტ ბიშოპი 4. თავდაცვის მინისტრის მოადგილე ჯოდი ტომასი 5.კანადის ცხენოსანთა სამეფო პოლიციის მეთაური ბრენდა ლუკი 6.კანადის ცხენოსანთა სამეფო პოლიციის მეთაურის მოადილე ბარიან ბრენანი 7. შტაბის უფროსის მოადგილე ეროვნული თავდაცვის საკითხებში, მაიკ რულო 8. სამთავრობათაშორისო საქმეთა მინისტრი დომინიკ ლებლანკი 9. პრემიერ-მინისტრის ოფისის წევრი მარსი სურკი. როგორც რუსეთის საგარეო საქმეთა სამინისტროს მიერ გამოქვეყნებულ განცხადებაშია აღნიშნული, სანქციები რუსი მაღალჩინოსნებისთვის კანადის მიერ დაწესებულ სანქციებზე "საპასუხო მოქმედებაა". ცნობისთვის, 2021 წლის 24 მარტს, კანადამ 9 რუს მაღალჩინოსანსა და ძალოვანი სტრუქტურების წარმომადგენელს "რუსეთში ადამიანის უფლებების უხეში და სისტემატური დარღვევისთვის" სანქციები დაუწესა. სანქციების მიზანია, წნეხის ქვეშ მოაქციოს რუსი მაღალჩინოსნები, რომლებიც ალექსეი ნავალნის მკვლელობის მცდელობას და შემდეგომ სასამართლო დევნასთან და ნავალნის მხარდამჭერ აქციებზე მოქალაქეების დაკავებასთან არიან დაკავშირებულები.
სებატიან მოლინეუსი: მსოფლიო ბანკის მიერ გამოყოფილი დამატებითი ფინანსური მხარდაჭერა საქართველოს მოსახლეობის 60%-ის ვაქცინაციას შეუწყობს ხელს
სამხრეთ კავკასიაში „მსოფლიო ბანკის“ რეგიონული დირექტორის, სებასტიან მოლინეუსის განცხადებით, მათ მიერ გამოყოფილი 34.5 მლნ. აშშ დოლარის მოცულობის დამატებითი ფინანსური მხარდაჭერა საქართველოს მოსახლეობის 60%-ის ვაქცინაციას შეუწყობს ხელს. მისი თქმით, ეს პროექტი წარმოადგენს საქართველოს სახელმწიფოსთვის მსოფლიო ბანკის დახმარების ფართო ძალისხმევის ნაწილს. ის ხელს შეუწყობს მეტად საჭირო ვაქცინების შეძენას და ვაქცინაციის პროცესისთვის საჭირო რესურსების მობილიზებას. "მოხარული ვარ ვისაუბრო მსოფლიო ბანკის მიერ გამოყოფილი 34.5 მლნ. აშშ დოლარის მოცულობის დამატებითი ფინანსური მხარდაჭერის შესახებ, რომელიც მიზნად ისახავს ხელი შევუწყოთ საქართველოს მთავრობის ძალისხმევას ქვეყნის მოსახლეობის 60%-ის ვაქცინაციასთან დაკავშირებით. განსაკუთრებულ აღნიშვნას იმსახურებს ის გარემოება, რომ პროექტი სამ ძირითად ფუნქციას შეასრულებს: პირველი - ის ხელს შეუწყობს მეტად საჭირო ვაქცინების შეძენას და დაეხმარება მთავრობას უშუალოდ COVAX პლატფორმასთან ურთიერთობაში, ისევე როგორც ზოგიერთ მწარმოებელთან პირდაპირ მოლაპარაკებებში. მეორე - დავეხმარებით მთავრობას საჭირო მარაგების, მათ შორის, შპრიცების და სხვა სამედიცინო ტექნიკის შეძენაში. და მესამე - ჩართული ვიქნებით ლოგისტიკის, ვაქცინაციის საინფორმაციო კამპანიის, და სხვა ღონისძიებების დაგეგმვაში, რომლებიც აუცილებელია იმის უზრუნველსაყოფად, რომ საქართველოს თითოეულ მოქალაქეს ჰქონდეს დროული ვაქცინაციის შესაძლებლობა. ეს პროექტი წარმოადგენს საქართველოს სახელმწიფოსთვის მსოფლიო ბანკის დახმარების ფართო ძალისხმევის ნაწილს. ჩვენ ვიყავით ერთ-ერთი პირველი საერთაშორისო საფინანსო ინსტიტუტი, რომელიც გვერდით დაუდგა მთავრობას პანდემიით დაზარალებული მოქალაქეების დაცვაში მიზნობრივი სოციალური დახმარების პროგრამებით და ასევე, პარალელურად დავეხმარეთ COVID-19-თან ბრძოლისათვის მეტად მნიშვნელოვანი სამედიცინო აღჭურვილობის შეძენაში. ჩვენ ხელი შევუწყვეთ მილიონობით PCR ტესტის, ჟანგბადის აპარატის და სხვა მნიშვნელოვანი აღჭურვილობის შეძენას ადამიანთა სიცოცხლის გადასარჩენად, რაც, ჩემი აზრით, წარამატებით განვახორციელეთ გასული წლის განმავლობაში. გარდა ამისა, ჩვენ ასევე ძალზე საჭირო ფინანსური მხარდაჭერის პაკეტი გამოვყავით მიკრო, მცირე და საშუალო საწარმოების დასახმარებლად, რომლებიც ყველაზე მეტად დაზარალდნენ პანდემიის შედეგად. დაბოლოს, ჩვენ უშუალო დახმარება გავუწიეთ მთავრობას მაკროეკონომიკური სტაბილურობის შენარჩუნებაში, სოციალური დაცვის და სხვა ღონისძიებების განხორციელებაში მოქალაქეთა მხარდაჭერის მიზნით", - განაცხადა სებასტიან მოლინეუსმა. მსოფლიო ბანკმა საქართველოს, ვაქცინაციის პროგრამის გაძლიერების მიზნით, 34.5 მლნ. დოლარის მოცულობის დამატებითი დაფინანსება გამოუყო სებასტიან მოლინეუსი: მოვუწოდებ საქართველოს მოქალაქეებს, გაიკეთონ აცრა - ვაქცინები არის უსაფრთხო და აუცილებელი შეგახსენებთ, რომ 17 მაისს ხელი მოეწერა მსოფლიო ბანკთან შეთანხმებას, რომლის ფარგლებში საქართველო €85 მილიონიან დახმარებას მიიღებს.
მსოფლიო ბანკმა საქართველოს, ვაქცინაციის პროგრამის გაძლიერების მიზნით, 34.5 მლნ. დოლარის მოცულობის დამატებითი დაფინანსება გამოუყო
მსოფლიო ბანკმა საქართველოს ვაქცინაციის პროგრამის გაძლიერების მიზნით, 34.5 მლნ. აშშ დოლარის მოცულობის დამატებითი დაფინანსება გამოუყო. დაფინანსება მსოფლიო ბანკის აღმასრულებელ დირექტორთა საბჭომ დღეს დაამტკიცა. მსოფლიო ბანკის ცნობით, აღნიშნული თანხა დაემატება 2020 წლის მარტში მსოფლიო ბანკის მიერ საქართველოს COVID-19-ის წინააღმდეგ სწრაფი რეაგირების პროექტისათვის გამოყოფილ 80 მლნ. აშშ დოლარს, რომლის მიზანია საქართველოს დახმარება პანდემიის მიმართ საპასუხო ღონისძიებების განხორციელების და მისი ზემოქმედების შერბილების მიმართულებით. დღეს დამტკიცებული დამატებითი დაფინანსების ძირითადი ამოცანებია COVID-19-ის ვაქცინების თანასწორი ხელმისაწვდომობის უზრუნველყოფა, საქართველოს ვაქცინაციის სისტემის გაძლიერება ვაქცინის ეფექტური გამოყენების ხელშესაწყობად, და ასევე, COVID-19-ზე საპასუხო ღონისძიებების განმტკიცება. ამ მხარდაჭერის მეშვეობით, მსოფლიო ბანკს წვლილი შეაქვს საქართველოს მთავრობის გეგმის განხორციელებაში, რაც 2021 წელს მოსახლეობის 60 პროცენტის ვაქცინაციას გულისხმობს. „მსოფლიო ბანკი ერთ-ერთი პირველი საერთაშორისო საფინანსო ინსტიტუტი იყო, რომელმაც საქართველოს კრიზისის დაწყებისთანავე აღმოუჩინა მხარდაჭერა COVID-19 -ის წინააღმდეგ სწრაფი რეაგირების პროექტის საშუალებით, და ახლა, ამ დამატებითი დაფინანსებით ჩვენ მთავრობას ვაქცინაციის გეგმის რეალიზაციაში დავეხმარებით. პანდემია, უპირველეს ყოვლისა, დიდ ტვირთად დააწვა ქვეყნის ეკონომიკას, მის ხალხს და საწარმოებს, ამდენად, ვაქცინაციის ძლიერი გეგმა გადამწყვეტ მნიშვნელობას იძენს საქართველოს სწრაფი და მდგრადი აღდგენისთვის და, რაც ყველაზე მნიშვნელოვანია, ადამიანების სიცოცხლის გადარჩენისთვის.“ - აღნიშნა მსოფლიო ბანკის რეგიონულმა დირექტორმა სამხრეთ კავკასიაში სებასტიან მოლინეუსმა. დამატებითი დაფინანსება, COVID-19-ზე რეაგირების ძირითადი პროექტის ფარგლებში, ხელს შეუწყობს პანდემიის საპასუხო ღონისძიებების გაფართოებისათვის საჭირო ხარჯების დაფარვას. მისი საშუალებით მოხდება COVID-19-ის ვაქცინების, მათ შორის, შპრიცების და სხვა მარაგების შეძენის და გამოყენების მხარდაჭერა, ვაქცინის ლოგისტიკის და განაწილების, დაგეგმვისა და მართვის, ვაქცინასთან დაკავშირებული კომუნიკაციისა და საინფორმაციო კამპანიის, ტრენინგისა და ზოგადად ჯანდაცვის სისტემის გაძლიერების ჩათვლით. „მსოფლიო ბანკის მიერ საქართველოსთვის 34.5 მლნ. აშშ დოლარის ოდენობის დამატებით დაფინანსების გამოყოფა კიდევ უფრო დიდ მნიშვნელობას იძენს გლობალური პანდემიის კონტექსტში, როდესაც ჯანდაცვის სისტემების გაუმჯობესებას, იმუნიზაციას და მიზნობრივ სოციალურ დახმარებას სულ უფრო მეტი ყურადღება ექცევა. საქართველო ერთ-ერთი პირველი ქვეყანა იყო, რომელმაც მსოფლიო ბანკისგან პანდემიის დაწყებისთანავე სწრაფი ფინანსური მხარდაჭერა მიიღო 80 მლნ. აშშ დოლარის ოდენობით, რამაც გადამწყვეტი როლი შეასრულა ქვეყნის მოქალაქეების დახმარებაში. კიდევ ერთხელ მსურს გამოვხატო მადლიერება ჩვენი პარტნიორების მიმართ ყოველი ძალისხმევისთვის, რომელიც მათ ჩვენთან ერთად განახორცილეს COVID-19-ის წინააღმდეგ ბრძოლაში,“ - განაცხადა საქართველოს ფინანსთა მინისტრმა ლაშა ხუციშვილმა. გასული წლის განმავლობაში COVID-19-ის წინააღმდეგ სწრაფი რეაგირების ძირითადი პროექტის მეშვეობით, მსოფლიო ბანკი საქართველოს დახმარებას უწევდა პანდემიით გამოწვეული საფრთხეების პრევენციასა და საპასუხო ღონისძიებების განხორციელებაში. პროექტი ჯანდაცვის სამინისტროს დაეხმარა სასიცოცხლო მნიშვნელობის სამედიცინო აღჭურვილობის - 4 მილიონზე მეტი პისიარ, ასევე ანტიგენზე დაფუძნებული სწრაფი ტესტის და დნმ -ის ექსტრაქციის ნაკრების, 1000-ზე მეტი ჟანგბადით თერაპიის აპარატურის, ასევე სარეანიმაციო და გადაუდებელი დახმარებისთვის განკუთვნილი საწოლებისა და ხელოვნური სუნთქვის აპარატების, და სხვა აუცილებელი საგნების, მათ შორის 11 მლნ. პერსონალური დაცვის საშუალების შეძენაში. ამასთან ერთად, პროექტმა მნიშვნელოვანი როლი შეასრულა ჯანდაცვის დაწესებულებების სადიაგნოსტიკო და სამკურნალო შესაძლებლობების განვითარებაში, მათი თანამედროვე ტექნოლოგიებით აღჭურვით. უფრო მეტიც, პროექტმა ასევე მნიშვნელოვანი წვლილი შეიტანა მთავრობის სოციალური დახმარების პაკეტის განხორციელებაში, რითაც ყოველთვიური დროებითი დახმარება მიიღო 80,000-მა ოჯახმა; დამატებითი ფინანსური დახმარება კი დაახლოებით 25,000 -მა ისეთმა ოჯახმა, რომელსაც 3-ზე მეტი შვილი ჰყავს; ასევე, ერთჯერადი დახმარება მიიღო 370,000 -მა თვითდასაქმებულმა ფიზიკურმა პირმა, ხოლო დროებითი უმუშევრობის დახმარება 160,000 -ზე მეტმა ადამიანმა. „მსოფლიო ბანკის დახმარება არსებითი იყო კორონავირუსის წინააღმდეგ ბრძოლაში. ბანკის დახმარებით ჩვენ გაცილებით სწრაფად და ეფექტიანად შევძელით ადაპტაცია და რეაგირება პანდემიის ზემოქმედების მიმართ. დღეს ჩვენ ხელთ გვაქვს მთავარი ინსტრუმენტი პანდემიის დასასრულებლად - ესაა ვაქცინა. მსოფლიო ბანკის მხარდაჭერით ჩვენ შევძლებთ ვაქცინაციის პროცესის უკეთ ადმინისტრირებას. მსურს მსოფლიო ბანკს, ჩვენს უმნიშვნელოვანეს პარტნიორს კიდევ ერთხელ გადავუხადო მადლობა პანდემიასთან ბრძოლაში ჩვენი ქვეყნის დახმარებისთვის,“ - აღნიშნა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ეკატერინე ტიკარაძემ. დამატებითი დაფინანსება, ისევე როგორც ძირითადი პროექტი, მსოფლიო ბანკის მიერ საქართველოსათვის გაწეული ფინანსური დახმარების პაკეტის ნაწილია, რომელიც ასევე მოიცავს ახლახან ხელმოწერილ ხელშეკრულებას 85 მლნ. ევროს გამოყოფასთან დაკავშირებით, რომლის მიზანია პანდემიით დაზარალებული მიკრო, მცირე და საშუალო საწარმოების დახმარება. ხოლო მანამდე ბანკმა საქართველოს გამოუყო 45 მლნ. ევროს დაფინანსება „ეკონომიკური მართვის და კონკურენტუნარიანობის ამაღლების განვითარების პოლიტიკის ღონისძიებებისთვის“, რითაც მთავრობას საბიუჯეტო დახმარება აღმოუჩინა საგადასახადო შემოსავლების მკვეთრი ვარდნისა და ანტიკრიზისული ღონისძიებებისთვის ხარჯების ზრდის პირობებში, რათა შენარჩუნდეს რეფორმების პროგრესი ქვეყნის გრძელვადიანი ეკონომიკური ზრდის უზრუნველსაყოფად. შეგახსენებთ, რომ 17 მაისს ხელი მოეწერა მსოფლიო ბანკთან შეთანხმებას, რომლის ფარგლებში საქართველო €85 მილიონიან დახმარებას მიიღებს.
სებასტიან მოლინეუსი: მოვუწოდებ საქართველოს მოქალაქეებს, გაიკეთონ აცრა - ვაქცინები არის უსაფრთხო და აუცილებელი
სამხრეთ კავკასიაში „მსოფლიო ბანკის“ რეგიონული დირექტორის, სებასტიან მოლინეუსის განცხადებით, მათ მიერ გამოყოფილი 34.5 მლნ. აშშ დოლარის მოცულობის დამატებითი ფინანსური მხარდაჭერა საქართველოს მოსახლეობის 60%-ის ვაქცინაციას შეუწყობს ხელს. მისი თქმით, ეს პროექტი წარმოადგენს საქართველოს სახელმწიფოსთვის მსოფლიო ბანკის დახმარების ფართო ძალისხმევის ნაწილს. ის ხელს შეუწყობს მეტად საჭირო ვაქცინების შეძენას და ვაქცინაციის პროცესისთვის საჭირო რესურსების მობილიზებას. "მოხარული ვარ ვისაუბრო მსოფლიო ბანკის მიერ გამოყოფილი 34.5 მლნ. აშშ დოლარის მოცულობის დამატებითი ფინანსური მხარდაჭერის შესახებ, რომელიც მიზნად ისახავს ხელი შევუწყოთ საქართველოს მთავრობის ძალისხმევას ქვეყნის მოსახლეობის 60%-ის ვაქცინაციასთან დაკავშირებით. განსაკუთრებულ აღნიშვნას იმსახურებს ის გარემოება, რომ პროექტი სამ ძირითად ფუნქციას შეასრულებს: პირველი - ის ხელს შეუწყობს მეტად საჭირო ვაქცინების შეძენას და დაეხმარება მთავრობას უშუალოდ COVAX პლატფორმასთან ურთიერთობაში, ისევე როგორც ზოგიერთ მწარმოებელთან პირდაპირ მოლაპარაკებებში. მეორე - დავეხმარებით მთავრობას საჭირო მარაგების, მათ შორის, შპრიცების და სხვა სამედიცინო ტექნიკის შეძენაში. და მესამე - ჩართული ვიქნებით ლოგისტიკის, ვაქცინაციის საინფორმაციო კამპანიის, და სხვა ღონისძიებების დაგეგმვაში, რომლებიც აუცილებელია იმის უზრუნველსაყოფად, რომ საქართველოს თითოეულ მოქალაქეს ჰქონდეს დროული ვაქცინაციის შესაძლებლობა. ეს პროექტი წარმოადგენს საქართველოს სახელმწიფოსთვის მსოფლიო ბანკის დახმარების ფართო ძალისხმევის ნაწილს. ჩვენ ვიყავით ერთ-ერთი პირველი საერთაშორისო საფინანსო ინსტიტუტი, რომელიც გვერდით დაუდგა მთავრობას პანდემიით დაზარალებული მოქალაქეების დაცვაში მიზნობრივი სოციალური დახმარების პროგრამებით და ასევე, პარალელურად დავეხმარეთ COVID-19-თან ბრძოლისათვის მეტად მნიშვნელოვანი სამედიცინო აღჭურვილობის შეძენაში. ჩვენ ხელი შევუწყვეთ მილიონობით PCR ტესტის, ჟანგბადის აპარატის და სხვა მნიშვნელოვანი აღჭურვილობის შეძენას ადამიანთა სიცოცხლის გადასარჩენად, რაც, ჩემი აზრით, წარამატებით განვახორციელეთ გასული წლის განმავლობაში. გარდა ამისა, ჩვენ ასევე ძალზე საჭირო ფინანსური მხარდაჭერის პაკეტი გამოვყავით მიკრო, მცირე და საშუალო საწარმოების დასახმარებლად, რომლებიც ყველაზე მეტად დაზარალდნენ პანდემიის შედეგად. დაბოლოს, ჩვენ უშუალო დახმარება გავუწიეთ მთავრობას მაკროეკონომიკური სტაბილურობის შენარჩუნებაში, სოციალური დაცვის და სხვა ღონისძიებების განხორციელებაში მოქალაქეთა მხარდაჭერის მიზნით", - განაცხადა სებასტიან მოლინეუსმა. სამხრეთ კავკასიაში „მსოფლიო ბანკის“ რეგიონული დირექტორი საქართველოს მოქალაქეებს მოუწოდებს, რომ მათ თავიანთი როლი შეასრულონ და გაიკეთონ აცრა. "დასასრულს მსურს, მოვუწოდო საქართველოს მოქალაქეებს, რომ მათ თავისი როლი შეასრულონ და გაიკეთონ აცრა. დიახ, ვიცი, რომ არსებობს წუხილები, ვიცი, რომ ვრცელდება არასწორი ინფორმაცია, მაგრამ ყველაფერი რაც წამიკითხავს და შემისწავლია მიუთითებს, რომ ვაქცინები არის უსაფრთხო, უვნებელი და რაც ყველაზე მნიშვნელოვანია, ფუნდამენტურად აუცილებელი იმისათვის, რომ საქართველო ცხოვრების ნორმალურ რიტმს დაუბრუნდეს, აღადგინოს ეკონომიკა და დაეხმაროს თავის მოქალაქეებს სიღარიბის დაძლევაში", - განაცხადა მოლინეუსმა. მსოფლიო ბანკმა საქართველოს, ვაქცინაციის პროგრამის გაძლიერების მიზნით, 34.5 მლნ. დოლარის მოცულობის დამატებითი დაფინანსება გამოუყო შეგახსენებთ, რომ 17 მაისს ხელი მოეწერა მსოფლიო ბანკთან შეთანხმებას, რომლის ფარგლებში საქართველო €85 მილიონიან დახმარებას მიიღებს.
ნათია თურნავა აცხადებს, რომ „ნამახვანესთან“ დაკავშირებით ევროკავშირის თაოსნობით მედიაციის პროცესი უახლოეს დღეებში დაიწყება
უახლოეს დღეებში ევროკავშირის შუამავლობით, „ნამახვანესთან“ დაკავშირებით მედიაცია გაიმართება. ეკონომიკის მინისტრის ნათია თურნავას განცხადებით, ხელისუფლებას მუდმივი კონტაქტი აქვს კომპანია „ენკასთან“, რომელიც მზად არის, მაქსიმალურად შეუწყოს ხელი კომპრომისული გადაწყვეტილების მოძებნას. ამის შესახებ მინისტრმა მთავრობის სხდომის დასრულების შემდეგ გამართულ ბრიფინგზე განაცხადა. „ჩვენ, რა თქმა უნდა, პერმანენტული კონტაქტი გვაქვს ასეთ მსხვილ ინვესტორთან, აქაც იყო ჩამოსული, მერეც ვეკონტაქტეთ, პირადად მაქვს ძალიან ხშირი კონტაქტი. შეხვედრის ერთ-ერთი მთავარი თემა არის, მათ შორის მედიაციის პროცესი, ევროკავშირის თაოსნობით, რომელიც უკვე უახლოეს დღეებში დაიწყება. ისინი მზად არიან, მაქსიმალურად შეუწყონ ხელი კომპრომისული გადაწყვეტილების გამონახვას, მით უფრო, უკვე წავიდნენ საკმაოდ მნიშვნელოვან კომპრომისებზე. მაგალითად. კაშხლის მშენებლობის სრული გადაწევა, დამატებით ხეობის განვითარების ფონდის შექმნა, ყველა დამატებითი დასკვნის და კვლევის გახსნა, რაც როგორც წესი, არ არის ხოლმე მოთხოვნილი საზოგადოების მხრიდან, მაგრამ რადგან ასეთი მაღალი ინტერესია, ესეც არის გახსნილი. ასევე, იცით, რომ ჩავატარეთ ექსპერტებთან შეხვედრა, ჩვენ ველოდებით, როდის დაგვიბრუნდება დასკვნა, რომელსაც შემდეგ ინვესტორს მოვთხოვთ, რომ გაითვალისწინოს ან კონტრარგუმენტები მოამზადოს. საკმაოდ კარგი პროცესი მიმდინარეობს“, - განაცხადა ნათი თურნავამ. „ნამახვანჰესის“ მშენებლობას „რიონის ხეობის მცველები“ 5 თვეზე მეტია, აპროტესტებენ.
ნათია თურნავა: 15 ივნისს ერევანი-ბათუმის მიმართულებით თბილისის გავლით პირველი მატარებელი დაიძრება
ეკონომიკის მინისტრის განცხადებით, სახმელეთო საზღვრების გახსნას უკვე მოჰყვა შედეგი, რაც ტურისტების ზრდაში გამოიხატება. ნათია თურნავამ დღეს, მთავრობის სხდომის შემდეგ განაცხადა, რომ ბათუმი-ერევნის მიმართულებით მატარებლის მოძრაობის აღდგენა იგეგმება, რაც შავი ზღვის კურორტებისთვის მნიშვნელოვანია. „ერთი კვირა გავიდა მას შემდეგ, რაც გადაწყვეტილება მივიღეთ და სახმელეთო საზღვრები გავხსენით. ამან პირველი შედეგები მოგვცა მომატებული ტურისტული ნაკადების სახით მეზობელი ქვეყნებიდან. აღდგა სარკინიგზო მიმოსვლა სომხეთსა და საქართველოს შორის და უკვე 15 ივნისს პირველი მატარებელი ერევანი-ბათუმი დაიძრება. ეს ნიშნავს, რომ ჩვენი მოკავშირე სახელმწიფოდან ტურისტები ჩამოვლენ და ესტუმრებიან საქართველოს, ჩვენს შავი ზღვისპირა კურორტებს, ჩვენს დედაქალაქსა და სხვა ტურისტულ ადგილებს“, - განაცხადა ნათია თურნავამ. მისივე თქმით, თურქეთთან არსებული სახმელეთო საზღვრიდანაც მოქალაქეების შეუფერხებლად შემოსვლა მიმდინარეობს. რაც შეეხება აზერბაიჯანს, რომელიც ასევე დიდი კონტრიბუტორი იყო საქართველოს ტურიზმის სექტორისთვის, ჯერ კიდევ მუშაობენ საკუთარი მოქალაქეების ქვეყნიდან გასვლისა და მათი დაბრუნების წესებზე. მინისტრმა იმედი გამოთქვა, რომ აზერბაიჯანი მალე მიიღებს ამ გადაწყვეტილებას. პირველი ივნისიდან სახმელეთო საზღვრები გაიხსნა. საზღვრის კვეთა შესაძლებელი იქნება სრული ვაქცინაციის დამადასტურებელი დოკუმენტით და PCR ტესტის უარყოფითი პასუხით ან მხოლოდ ბოლო 72 საათში ჩატარებული PCR ტესტის უარყოფითი პასუხით. ამ შემთხვევაში პირები, რომლებიც საქართველოში შემოვლენ, ვალდებულნი იქნებიან, მომდევნო 72 საათის განმავლობაში განმეორებით ჩაიტარონ PCR ტესტი. თბილისი-ერევანი-თბილისის რეისი, პანდემიის გამო, დროებით შეჩერებული იყო. ბილეთების გაყიდვა უახლოეს დღეებში დაიწყება. „სომხეთის გარდა, მოლაპარაკებები მიმდინარეობს აზერბაიჯანის რკინიგზასთანაც. მეზობელი ქვეყნის სახმელეთო საზღვრის გახსნისთანავე თბილისი-ბაქო-თბილისის მიმართულებაც განახლდება“, - აღნიშნულია საქართველოს რკინიგზის განცხადებაში.
"დიდი შვიდეულის" ქვეყნები საერთაშორისო კომპანიებისთვის გადასახადის დაწესებაზე შეთანხმდნენ
"დიდი შვიდეულის" ქვეყნებმა "ისტორიულ" შეთანხმებას მიაღწიეს საერთაშორისო კომპანიებისთვის გადასახადის დაწესებასთან დაკავშირებით. ამის შესახებ ინფორმაციას BBC-ი ავრცელებს. როგორც გამოცემა წერს, ჯგუფის ფინანსთა მინისტრები ლონდონში გამართულ შეხვედრაზე შეთანხმდნენ, რომ გლობალური კორპორატიული გადასახადის განაკვეთი მინიმუმ 15%-ი იყოს და კომპანიებმა გადასახადი იმ ქვეყნებში გადაიხადონ, რომლებშიც ოპერირებენ და არა მხოლოდ იქ, სადაც მათი სათაო ოფისებია განთავსებული. დიდი ბრიტანეთის ფინანსთა მინისტრმა რიში სუნაკმა განაცხადა, რომ ხელშეკრულება მიზნად ისახავდა გლობალური კომპანიებისთვის თანაბარი პირობების შექმნას. "მრავალი წლის დისკუსიის შემდეგ, G7- ის ფინანსთა მინისტრებმა მიაღწიეს ისტორიულ შეთანხმებას გლობალური საგადასახადო სისტემის რეფორმირებისთვის, რათა ის გლობალური ციფრული ეპოქისთვის შესაფერისი იყოს", - თქვა სუნაკმა. მოცემული შეთანხმება მოიცავს ორ მთავარ პუნქტს: 1. საერთაშორისო კომპანიებს, სულ მცირე, 10% მოგების ზღვარით მოუწევთ გადასახადების გადახდა იმ ქვეყნებში, სადაც ოპერირებენ. 2. გლობალური მინიმალური კორპორაციული გადასახადის დაწესება, რომელიც შეადგენს 15%-ს. როგორც BBC წერს, დაზარალებულ კომპანიებს შორის შეიძლება იყოს ისეთი ტექნიკური გიგანტები, როგორიცაა Amazon და Google.
რუსეთმა წიწიბურას ექსპორტი დროებით აკრძალა
დღეიდან, რუსეთმა წიწიბურას ექსპორტი დროებით აკრძალა. ეს გადაწყვეტილება ძალაშია 2021 წლის 31 აგვისტომდე. შესაბამის განკარგულებას ხელი რუსეთის პრემიერ მინისტრმა მიხეილ მიშუსტინმა 2021 წლის 30 აპრილს მოაწერა. ინფორმაციას ადგილობრივი მედია ავრცელებს. დოკუმენტის თანახმად, დროებითი აკრძალვა არ ვრცელდება რუსეთიდან ექსპორტირებულ საქონელზე, საერთაშორისო ჰუმანიტარული დახმარების მისაღებად და მომარაგების მიზნით, აგრეთვე საზღვარგარეთ რუსული სამხედრო ბაზებისთვის და რუსული ორგანიზაციებისათვის მიწოდებაზე. რუსეთის ფედერაციაში წიწიბურას მთლიანმა მოსავალმა 2020 წელს 893 ათასი ტონა შეადგინა, რაც 13,6%-ით მეტია, 2019 წელთან შედარებით.
ერდოღანი: შავ ზღვაში 135 მილიარდი კუბური მეტრი ბუნებრივი აირის მარაგი აღმოვაჩინეთ
თურქეთმა შავ ზღვაში აღმოაჩინა 135 მილიარდი კუბური მეტრი დამატებით ბუნებრივი აირი აღმოაჩინა. ამის შესახებ თურქეტის პრეზიდენტმა რეჯეფ თაიფ ერდოღან განაცხადა. როგორც ცნობილია, ბუნებრი აირი ზონგულდაქის პროვინციაში თურქულმა საბურღმა გემმა Fatih-მა საქარიას საბადოს Amasra-1-ის ჭაბურღილში აღმოაჩინა. გასულ წელს კი საბურღმა გემმა Fatih-მა 405 მილიარდი კუბური მეტრი ბუნებრივი აირი დასავლეთ შავიზღვისპირეთის საქარიას საბადოში აღმოაჩინა. ეს ქვეყნის უდიდეს აღმოჩენად ითვლება. ერდოღანის თქმით, შავ ზღვაში თურქეთის მიერ აღმოჩენილი ბუნებრივი აირის მარაგმა 540 მილიარდი კუბური მეტრი შეადგინა. საქარიას საბადოზე ბუნებრივი აირის მოსაპოვებელი სამუშაოების დაწყება 2023 წლიდან იგეგმება.
საქართველოს ავიაბაზარზე ოპერირებას ავიაკომპანია OMAN AIR-ი იწყებს
მიმდინარე წლის 16 ივნისიდან, ომანის სახელმწიფო ავიაკომპანია OMAN AIR-ი მასკატი - თბილისი - მასკატის მიმართულებით რეგულარულ ოპერირებას იწყებს. ამის შესახებ ინფორმაციას სამოქალაქო ავიაციის სააგენტო ავრცელებს. ფრენები ორი ქვეყნის დედაქალაქებს შორის კვირაში 2 სიხშირით, შემდეგი განრიგით შესრულდება: მასკატი - თბილისი - მასკატი, 16 ივნისიდან 15 სექტემბრამდე, ყოველ ხუთშაბათს და კვირას. "საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს მიერ, ავიაკომპანიას რეგულარული საჰაერო მიმოსვლის განხორციელებისათვის აუცილებელი ნებართვა მიმდინარე წლის 2 ივნისს მიენიჭა. რეისები ხელს შეუწყობს ორ ქვეყანას შორის სავაჭრო-ეკონომიკური თანამშრომლობის გაღრმავებას, ტურიზმის სფეროსა და ახალი ბიზნეს ურთიერთობების განვითარებას. გთხოვთ გაითვალისწინოთ, რომ ეპიდემიოლოგიური მდგომარეობის შესაბამისად, სახელმწიფოების მიერ პერიოდულად იცვლება სასაზღვრო შეზღუდვები და სანიტარული მოთხოვნები, რაც ასახვას ჰპოვებს ავიაკომპანიების გადაწყვეტილებებზე ამა თუ იმ მიმართულებით საჰაერო მიმოსვლის დაწყების, გაგრძელების ან განახლების კუთხით. მოქალაქეებს მოვუწოდებთ, გამოიჩინონ სიფრთხილე მგზავრობის დაგეგმვის დროს, ყურადღებით გაეცნონ დანიშნულების ქვეყნის მიერ დაწესებულ სასაზღვრო და სანიტარულ რეგულაციებს, ავიაკომპანიების შეტყობინებებს, ოფიციალურ წყაროებზე განთავსებულ განცხადებებს და განრიგებს", - აღნიშნულია სააგენტოს განცხადებაში. ცნობისთვის, საქართველოს მიმართულებით რეგულარულ ოპერირებას გერმანული დაბალბიუჯეტიანი ავიაკომპანია Eurowings-იც იწყებს.
ნათია თურნავა: საწვავის ფასი კი გაიზარდა, მაგრამ ეს ქუჩაში მოძრაობაზე არ ასახულა, დიდია ტრაფიკი
ეკონომიკის მინისტრის ნათია თურნავას განცხადებით საწვავის ფასების გაზრდაზე ორმა ფაქტორმა იქონია გავლენა - იმპორტირებული ნავთობპროდუქტების გაზრდილმა ფასმა და ლარის კურსმა. ამის შესახებ მან "რუსთავი 2"-ის ეთერში ისაუბრა. მისი თქმით, მიუხედავად იმისა, რომ ინფლაცია ჯერ კიდევ მაღალია, ეკონომიკური აქტივობაც მატულობს. მისი თქმით, ინფლაცია აუცილებლად დასტაბილურდება. თურნავა ვარაუდობს, რომ საწვავის ფასი ლარის კურსის დასტაბილურებასთან ერთად შემცირდება. "ჩვენ არ ვართ ნავთობის მწარმოებელი ქვეყანა, მსოფლიო ბაზარზე ნავთობის და ნავთობპროდუქტების ფასი იზრდება, შესაბამისად, ეს არის სრულიად იმპორტული პროდუქტი ფასი ამაზეცაა დამოკიდებული, ეს ფაქტორი არსებობს და მნიშვნელოვანია. მეორე ფაქტორი, რომელიც ეხებოდა იმას, რომ ეს იმპორტული საქონელია და რა თქმა უნდა ლარის კურსი ამაზე აისახებოდა, თანდათან შესუსტდება, აქაც ველოდებით, რომ დასტაბილურდება. მიუხედავად იმისა, რომ ინფლაცია ჯერ კიდევ მაღალია, ეკონომიკური აქტივობაც მატულობს. კი, საწვავის ფასი ნამდვილად გაიზარდა და ჩვენ მის სტაბილიზაციას სხვადასხვა ბერკეტით უნდა ვეცადოთ, მაგრამ თქვენ ვერ ნახავთ, რომ ეს ასახულიყო ქუჩებში მოძრაობაზე, ძალიან დიდია ტრაფიკი, ძალიან დიდია აქტივობა და ესაა სწორედ ის 45%-იანი ეკონომიკური ზრდა, ადამიანები მუშაობენ და მცირე ბიზნესი მუშაობს", - განაცხადა მინისტრმა.
საქართველოს ავიაბაზარზე გერმანული დაბალბიუჯეტიანი ავიაკომპანია Eurowings-ი შემოდის
გერმანული დაბალბიუჯეტიანი ავიაკომპანია Eurowings-ი საქართველოს მიმართულებით რეგულარულ ოპერირებას იწყებს. ამის შესახებ ინფორმაციას სამოქალაქო ავიაციის სააგენტო ავრცელებს. GmbH Lufthansa Group-ში შემავალი ავიაგადამზიდველი ფრენებს დიუსელდორფი - თბილისი - დიუსელდორფის საჰაერო ხაზზე განახორციელებს. რეგულარული რეისები მიმდინარე წლის 4 ივლისიდან, შემდეგი განრიგით განხორციელდება: • დიუსელდორფი - თბილისი - დიუსელდორფი, 4 ივლისიდან ყოველ კვირას, ხოლო 21 ივლისიდან ზაფხულის სანავიგაციო სეზონის ბოლომდე (29 ოქტომბერი) - ყოველ ოთხშაბათს და კვირას. "საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს მიერ, ავიაკომპანიას რეგულარული საჰაერო მიმოსვლის განხორციელების ნებართვა დღეს, მიმდინარე წლის 4 ივნისს მიენიჭა. გთხოვთ გაითვალისწინოთ, რომ ეპიდემიოლოგიური მდგომარეობის შესაბამისად, სახელმწიფოების მიერ პერიოდულად იცვლება სასაზღვრო შეზღუდვები და სანიტარული მოთხოვნები, რაც ასახვას ჰპოვებს ავიაკომპანიების გადაწყვეტილებებზე ამა თუ იმ მიმართულებით საჰაერო მიმოსვლის დაწყების, გაგრძელების ან განახლების კუთხით. მოქალაქეებს მოვუწოდებთ, გამოიჩინონ სიფრთხილე მგზავრობის დაგეგმვის დროს, ყურადღებით გაეცნონ დანიშნულების ქვეყნის მიერ დაწესებულ სასაზღვრო და სანიტარულ რეგულაციებს, ავიაკომპანიების შეტყობინებებს, ოფიციალურ წყაროებზე განთავსებულ განცხადებებს და განრიგებს", - ნათქვამია სამოქალაქო ავიაციის სააგენტოს განცხადებაში.
ლარი გამყარებას განაგრძობს
ლარი გამყარების დოლართან და ევროსთანაც გამყარდა. კურსის ცვლილებამ 7.33 თეთრი შეადგინა და დოლარის ოფიციალური ღირებულება 3.0791 ლარია. ეროვნული ვალუტა ევროსთან მიმართებით 11.5 თეთრით გამყარდა, მისი ფასი ხვალ 3.7276 ლარი იქნება. კობა გვენეტაძემ განმარტა, რატომ მყარდება ლარი ეკონომისტი: ლარის გამყარების მიზეზი შეიძლება იყოს პოზიტიური მოლოდინები, რომ ზაფხულში ტურიზმის გარკვეული ნაწილი აღდგეს
Reuters-ი: ბელარუსულ ავიაკომპანიებს ევროკავშირის სივრცეში ფრენა აეკრძალათ
ევროკავშირის ელჩებმა მიიღეს გეგმა, რომელიც ბელარუსის თვითმფრინავებს ევროკავშირის ტერიტორიის საჰაერო სივრცეში ფრენას და ევროკავშირის აეროპორტებში დაჯდომას უკრძალავს, - ამის შესახებ ინფორმაციას სამ დიპლომატზე დაყრდნობით Reuters-ი ავრცელებს. როგორც გამოცემა წერს, ევროკავშირის გადაწყვეტილება ბელარუსის წინააღმდეგ დაგეგმილი სადამსჯელო ღონისძიებების ნაწილია, რომელიც დაკავშირებულია 23 მაისს Ryanair- ის თვითმფრინავის იძულებით დაჯდომასთან. Reuters-ის ინფორმაციით, აღნიშნული გადაწყვეტილება ძალაში ცენტრალური ევროპული დროით 00:00-დან შევა. ამასთან, ევროკავშირმა ევროპულ ავიაკომპანიებს ბელარუსის თავზე ფრენების განხორციელებისგან თავის შეკავება ურჩია, მაგრამ ეს არ წარმოადგენს იურიდიულად სავალდებულო აკრძალვას. ბელარუსული გადამზიდავი Belavia ახორციელებს ფრენებს, რომლებიც ბელარუსს ევროპის 20 აეროპორტთან, მათ შორის ჰელსინკის, ამსტერდამის, მილანის, ვარშავის, ფრანკფურტის, ბერლინის, მიუნხენის, პარიზის, რომისა და ვენის აეროპორტებთან აკავშირებს. შეგახსენებთ, რომ 23 მაისს, ირლანდიური ავიაკომპანია Ryanair-ის თვითმფრინავი, რომელიც ათენი-ვილნიუსის რეისს ასრულებდა, ავიაგამანადგურებლის თანხლებით მინსკში იძულებით დაეშვა. თვითმფრინავის დაშვების შემდეგ ავიალაინერში მყოფი ოპოზიციონერი ჟურნალისტი, რომან პროტასევიჩი და მისი მეგობარი სოფია საპეგა დააკავეს. ბელარუსის მთავრობის განცხადებით, ბორტზე ასაფეთქებელი მოწყობილობის არსებობის შესახებ შეტყობინება მიიღეს, რაც ავიაკომპანიას აცნობეს. Ryanair - ის აღმასრულებელმა დირექტორმა ბელარუსში იძულებით დასმას „სახელმწიფოს მიერ გატაცება“ და ბელარუსის ხელისუფლების მხრიდან საჰაერო მეკობრეობა უწოდა. ევროპული ქვეყნები შეშფოთებას გამოთქვამენ და ბელარუსს სახელმწიფო ტერორიზმში ადანაშაულებენ. ევროპის მასშტაბით პოლიტიკურმა ფიგურებმა მოუწოდეს ევროკავშირსა და NATO-ს ჩარევისკენ. დიდი ბრიტანეთის საგარეო საქმეთა მინისტრმა დომინიკ რააბმა ბელარუსი გააფრთხილა, რომ ეს „უცნაური მოქმედება" „სერიოზულ შედეგებს" გამოიწვევს. 24 მაისს, სახელმწიფო ტელევიზიამ მინსკში დაკავებული რომან პროტასევიჩის ვიდეომიმართვა გაავრცელა, რომელშიც აცხადებს, რომ „უსაფრთხოების ოფიცრები მას კარგად ექცევიან, თავს კარგად გრძნობს და აღიარებს, რომ საპროტესტო მიტინგების უკან დგას“. ჟურნალისტის მამა ამბობს, რომ მის შვილს ჩანაწერი ზეწოლის შედეგად ჩააწერინეს. 24 მაისს, ევროპული საბჭო ბელარუსისთვის ახალი სანქციების დაწესებაზე შეთანხმდა. Reuters-ი: ევროკავშირი ბელარუსის ეროვნულ ავიაკომპანიასა და ავიაციის სამსახურის მაღალჩინოსნებს სანქციებს დაუწესებს ICAO Ryanair-ის თვითმფრინავის იძულებით დაშვების ინციდენტს გამოიძიებს ექსკლუზივი: რა შემთხვევაში უჭერს მხარს ICAO საჰაერო სივრცის დაბლოკვას და გამოძიების დაწყებას - ბელარუსის მაგალითი რომელმა ქვეყნებმა და ავიაკომპანიებმა შეწყვიტეს ბელარუსთან საჰაერო მიმოსვლა ევროკავშირის სამიტმა ბელარუსის წინააღმდეგ სანქციების გაფართოების გადაწყვეტილება მიიღო
