ახალი ამბები
შესაძლოა, იტალიაში კოვიდვაქცინაცია ყველასთვის სავალდებულო გახდეს
იტალიაში კორონავირუსის საწინააღმდეგო ვაქცინით აცრა შესაძლოა, ყველასთვის სავალდებულო გახდეს, ვისაც აცრის ჩატარება ასაკობრივად უწევს. ამის შესახებ ინფორმაციას Reuters ავრცელებს. Reuters-ის ცნობით, იტალიის პრემიერ-მინისტრის განცხადებით, თვის ბოლოდან იგეგმება ვაქცინის მესამე, ბუსტერ დოზების გაკეთება რისკჯგუფებში შემავალი მოაქალაქეებისთვის. ამასთანავე, მთავრობამ უკვე დააწესა სავალდებულო ვაქცინაცია სამედიცინო სფეროს წარმომადგელებისთვის, თუ მათ სურთ ანაზღაურება, თუმცა, პრემიერ-მინისტრის თქმით, მას შემდეგ, რაც ევროპის ჯანდაცვის მარეგულირებელი ორგანო ვაქცინებს სრულ ავტორიზაციას მიანიჭებს, ვაქცინაცია შესაძლოა, ყველასთვის სავალდებულო გახდეს. ამჟამად ევროპის წამლის სააგენტოს გადაუდებელი გამოყენებისთვის ავტორიზაცია ოთხი ვაქცინისთვის აქვს მინიჭებული. პრემიერმა ჟურნალისტებს განუცხადა, დარწმუნებულია, რომ თვის ბოლოსთვის, 12 წლის და მეტი ასაკის იტალიელები 80% სრულად ვაქცინირებული იქნება. ამჟამად ეს მონაცემი 70.5%-ს შეადგენს. მისი თქმით, მთავრობა გეგმავს, გააფართოოს ე.წ. მწვანე საშვის მოქმედება, რომელსაც ამჟამად სრულად აცრილი პირები შორ მანძილებზე მოგზაურობისა და გასართობ აქტივობებში ჩასართავად იყნებენ. დოკუმენტი ასევე სავალდებულოა სკოლების პერსონალისთვისაც. ოფიციალურმა პირებმა განაცხადეს, რომ გასულ კვირას ისინი განიხილავდნენ სქემის გაფართოებას ყველასთვის, ვინც მუშაობს საჯარო სამსახურში ან სუპერმარკეტში. ახალმა გადაწყვეტილებებმა იტალიელების ნაწილის პროტესტი გამოწვია, რადგან ისინი მიიჩნევენ, რომ მათი უფლებები ირღვევა.
გაერთიანებული სამეფოს ვაქცინაციისა და იმუნიზაციის კომიტეტი 12-15 წლის ჯანმრთელი ბავშვების ვაქცინაციაზე უარს ამბობს
გაერთიანებული სამეფოს ვაქცინაციისა და იმუნიზაციის კომიტეტი 12-15 წლის ჯანმრთელი ბავშვების ვაქცინაციაზე უარს ამბობს. ამის შესახებ ინფორმაციას BBC ავრცელებს. უწყების განცხადებით, ამ ასაკობრივ ჯგუფში ვაქცინაცია ყველაზე მაღალი რისკის მქონე ბავშვებს უნდა ჩაუტარდეთ, რომლებსაც თანხმლები დაავადებები აქვთ, მათ შორის გულის, ფილტვის, თირკმლისა და ღვიძლის ქრონიკული დაავადებები და ნევროლოგიური დაავადებები. ვინაიდან ბავშვები დაბალი რისკის ქვეშ არიან, ვაქცინაციისა და იმუნიზაციის ერთობლივმა კომიტეტმა გადაწყვიტა, რომ ვაქცინაცია მხოლოდ "უმნიშვნელო სარგებელს" მოიტანს და, შესაბამისად, "არასაკმარისი" მტკიცებულება არსებობს ამ ასაკობრივ ჯგუფში მასობრივი ვაქცინაციის შესთავაზებლად. როგორც BBC წერს, ჯანმრთელი ბავშვების ვაქცინაციაზე მიღებული ეს გადაწყვეტილება დაფუძნებული იყო Pfizer-ის ვაქცინის უკიდურესად იშვიათ გვერდით მოვლენაზე, რაც იწვევს გულის ანთებას. ამავე თემაზე: საქართველო 12 წელს გადაცილებული ბავშვების აცრაზე ჯანმოს რეკომენდაციას ელოდება 12 წელს გადაცილებული ბავშვების აცრაზე საქართველო სხვა ქვეყნის მაგალითებსაც განიხილავს
ქაბულში, ავღანელმა ქალებმა დასაქმებისა და განათლების უფლებების მოთხოვნით საპროტესტო აქცია გამართეს
ავღანელმა ქალებმა ქაბულში, პრეზიდენტის სასახლესთან, საპროტესტო აქცია გამართეს. აქციის მონაწილეები დასაქმებისა და განათლების უფლებებს მოითხოვდნენ. მას შემდეგ, რაც "თალიბანმა" აიღო კონტროლი ავღანეთზე, ქალებმა საკუთარი უფლებების დაცვისთვის აქცია რამდენჯერმა გამართეს. ცნობისთვის, 15 აგვისტოს "თალიბანმა" ქაბული დაიკავა. ადამიანის უფლებების დამცველები შიშობენ, რომ ხელისუფლებაში თალიბების მოსვლის შემდეგ ავღანელი ქალების უფლებები სერიოზულად შეიზღუდება. ამავე თემაზე: მედია: ავღანეთის ახალ მთავრობას აბდულ ღანი ბარადარი უხელმძღვანელებს ქაბულში, ავღანელმა ქალებმა საკუთარი უფლებების დაცვისთვის აქცია გამართეს
კვლევა: ჰაერის დაბინძურებას ბავშვებში სიმსუქნისა და ასთმის გამოწვევა შეუძლია
ჰაერის დაბინძურების მაღალი დონის ზემოქმედებამ, შეიძლება, ბავშვებში სიმსუქნე გამოიწვიოს და ისინი ასთმის უფრო დიდი რისკის ქვეშ დააყენოს, - ამის შესახებ ინფორმაციას ახალ კვლევაზე დაყრდნობით BBC ავრცელებს. კვლევის თანახმად, მსუქან ბავშვებში ასთმის გაჩენის რისკი 79% -ით იზრდება. მიუხედავად იმისა, რომ ბავშვებში სიმსუქნის მრავალი მიზეზი შეიძლება არსებობდეს, "ატმოსფერული ჰაერის დაბინძურება შეიძლება იყოს მნიშვნელოვანი ხელშემწყობი ფაქტორი", ნათქვამია განცხადებაში. "ფილტვების მოვლის ფონდისა" და Pulmocare Research and Education-ის მიერ ჩატარებული კვლევა პირველია ინდოეთში, რომელმაც დაამყარა კავშირი ჭარბი წონის ბავშვებს, ასთმასა და ჰაერის დაბინძურებას შორის. ექსპერტები დიდი ხანია ამბობენ, რომ ბინძური ჰაერის ხანგრძლივმა ზემოქმედებამ შეიძლება გამოიწვიოს რესპირატორული დაავადებები, განსაკუთრებით ბავშვებში. "ფილტვების მოვლის ფონდმა" შეისწავლა 3 157 მოსწავლე, 12 სკოლიდან. მათგან ნაწილი მსოფლიოს ერთ-ერთ ყველაზე დაბინძურებულ ქალაქში - დელიში ცხოვრობს, ნაწილი კი, შედარებით სუფთა ჰაერის მქონე კოტაიამსა და მაისურუში. აღმოჩნდა, რომ დელიში მცხოვრები ბავშვების 39.8%-ს ჭარბი წონა აწუხებდა, მაშინ, როცა დანარჩენ ორ ქალაქში ეს მაჩვენებელი 16.4% იყო. ამავე კვლევის თანახმად, დელიში მცხოვრებ მოსწავლეებში ბევრად მეტადაა გავრცელებული ასთმისა და ალერგიის სიმპტომები. კვლევამ ასევე დაადგინა, რომ დელის სკოლის მოსწავლეებს აქვთ ასთმისა და ალერგიის სიმპტომების "მნიშვნელოვნად მაღალი მაჩვენებელი". "როდესაც ადამიანი სუნთქავს დაბინძურებულ ჰაერს, ეს არღვევს ენდოკრინულ სისტემას და იწვევს სიმსუქნეს", - უთხრა დოქტორმა სალვიმ BBC-ს.
ვიოლა ფონ კრამონი: ოქტომბრის არჩევნების შედეგი და შემდგომი მოვლენები დიდწილად განსაზღვრავს ევროკავშირი-საქართველოს ურთიერთობების მიმართულებას
Europetime-მა ევროპარლამენტარ, საგარეო კომიტეტის წევრ, ვიოლა ფონ კრამონ-ტაუბადელთან ექსკლუზიური ინტერვიუ ჩაწერა. გერმანელი პოლიტიკოსი (ფრაქცია „კავშირი 90/მწვანეები) ვიოლა ფონ კრამონ-ტაუბადელი საქართველოს ვიზიტით ბოლოს ივლისში, მას შემდეგ ეწვია, რაც მმართველმა პარტიამ 19 აპრილის შეთანხმების ანულირების შესახებ გამოაცხადა. Europetime ევროპარლამენტარ, ვიოლა ფონ კრამონ-ტაუბადელთან ექსკლუზიურ ინტერვიუს გთავაზობთ. _ბოლო დროის განვითარებები რას ნიშნავს ევროკავშირი-საქართველოს ურთიერთობებში და საერთოდ, რაზე მიუთითებს? ვფიქრობ, საქართველო-ევროკავშირის ურთიერთობებში ნამდვილად ყოფილა უკეთესი პერიოდებიც. სამწუხაროდ, ახლა ვხედავთ ძლიერ დეზინფორმაციულ კამპანიას ევროკავშირის წინააღმდეგ, რომელიც ცდილობს, ევროკავშირისადმი საზოგადოების მხარდაჭერა შეაფერხოს. ევროპარლამენტში ჩვენ ამ საკითხს ძალიან სერიოზულად ვუდგებით. მსგავსი დეზინფორმაციის კამპანიები უკრაინასა და მოლდოვაშიც მიმდინარეობს და კვალს რუსეთამდე მივყავართ. გარდა ამისა, „ქართული ოცნების“ გადაწყვეტილებამ, უკან გაეწვია ევროკავშირისა და პირადად ევროპული საბჭოს პრეზიდენტის, შარლ მიშელის შუამავლობით მიღწეული შეთანხმება, რომელშიც ამდენი ენერგია ჩავდეთ, კიდევ უფრო დააზარალა ევროკავშირსა და საქართველოს შორის ურთიერთობები. ევროკავშირი ნდობას, როგორც სტაბილური პარტნიორობის საფუძველს განიხილავს და დაპირებების გატეხვა ამ ნდობას სერიოზულად არღვევს. _როგორ აფასებთ აშშ-ის პოლიტიკას რეგიონის და კონკრეტულად საქართველოს მიმართ? ევროკავშირი და აშშ ერთსა და იმავე ღირებულებებს და ინტერესებს იზიარებენ, ეს განსაკუთრებით იგრძნობა საქართველოში. ჩვენ ასევე გვაქვს საერთო მიზნები: მხარი დავუჭიროთ დემოკრატიული ინსტიტუტების მშენებლობას, გავაძლიეროთ დამოუკიდებელი და გამჭვირვალე სასამართლო სისტემა, დავრწმუნდეთ, რომ საქართველოში ადამიანის უფლებები და ფუნდამენტური თავისუფლებები დაცულია. ევროკავშირის და აშშ-ის ელჩებმა თავიანთი უდიდესი ძალისხმევით მოამზადეს საფუძველი 19 აპრილის შეთანხმებისთვის. შეთანხმება კვლავ ძალაშია „ქართული ოცნების“ ხელმოწერით თუ მის გარეშე. რაც შეეხება რეგიონს, მთიანი ყარაბაღის კონფლიქტს, უახლესი ფაზის განმავლობაში, ევროკავშირი და აშშ დიდწილად არ მონაწილეობდნენ პროცესებში. სამწუხაროდ, ამ ფაქტმა რუსეთს საშუალება მისცა, გაეძლიერებინა თავისი პოზიციები კავკასიაში. სამწუხაროდ, ასეთი განვითარება საქართველოს უსაფრთხოების გამოწვევებს კიდევ უფრო ართულებს. _რა შეგიძლიათ გვითხრათ ადგილობრივი არჩევნების მნიშვნელობაზე? მიუხედავად იმისა, რომ ადგილობრივი არჩევნებია, ეს არჩევნები უკიდურესად მნიშვნელოვანია. მას აქვს გავლენა ეროვნულ და საერთაშორისო დონეზე. შედეგი, ისევე როგორც არჩევნების შემდგომი მოვლენები, დიდწილად განსაზღვრავს ევროკავშირი-საქართველოს ურთიერთობების მიმართულებას. ამიტომაც ვამზადებთ ევროპარლამენტიდან სრულფასოვან სადამკვირვებლო მისიას. ვიცი, რომ ბევრი სხვა დამკვირვებელიც გეგმავს ჩამოსვლას. ეს არის ძლიერი სიგნალი ყველასთვის საქართველოში, ვისაც დემოკრატიულ ქვეყანაში ცხოვრება სურს. ამავე თემაზე: ვიოლა ფონ კრამონი მაკროფინანსურ დახმარებაზე: დაასწო მთავრობამ ევროკავშირს, ამით დააზიანა საქართველოს მოქალაქეები
სინგაპურში შექმნეს რობოტი, რომელიც მასაჟს აკეთებს
სინგაპურში, სტარტაპ AiTreat-მა ხელოვნური ინტელექტის მქონე რობოტი შექმა, რომელიც ხალხს ტრადიციულ ჩინური მასაჟს უკეთებს. ამის შესახებ ინფორმაციას CNN-ი ავრცელებს. როგორც ცნობილია, რობოტს EMMA (რაც ნიშნავს "Expert Manipulative Massage Automation") დაარქვეს. რობოტი სენსორებისა და 3D ხედვის საშუალებით ზომავს კუნთების დაჭიმულობას. EMMA განსაზღვრავს წნევის შემსუბუქების წერტილებს და პაციენტებს ტკივილის შესამსუბუქებელ მასაჟებს უკეთებს. "ტრადიციული ჩინური მედიცინის პრინციპი არის პერსონალიზებული მკურნალობა", - აცხადებს AiTreat-ის დამფუძნებელი და აღმასრულებელი დირექტორი და დასძენს, რომ EMMA არის "ძალიან მოქნილი და მორგებული". აღინიშნება, რომ რობოტის "ხელები" თბება 38-40 გრადუსამდე ტემპერატურაზე და ისინი იმდენად რბილია, რომ განსხვავება რეალურ მასაჟისტსა და რობოტს შორის, ძნელად შესამჩნევია.
ჟოზეფ ბორელი: ევროკავშირი "თალიბანთან" ითანამშრომლებს, თუმცა ეს "თალიბანის" ახალ მთავრობად აღიარებას არ ნიშნავს
ევროკავშირი მზად არის ითანამშრომლოს "თალიბანის" ახალ მთავრობასთან, მაგრამ ისლამისტურმა ჯგუფმა უნდა პატივი სცეს ადამიანის უფლებებს, მათ შორის ქალების უფლებებს და არ მისცეს ავღანეთს უფლება, გახდეს ტერორიზმის საფუძველი. საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჟოზეფ ბორელმა განაცხადა. ინფორმაციას Reuters-ი ავრცელებს. "ავღანეთის მოსახლეობის მხარდასაჭერად, ჩვენ მოგვიწევს ავღანეთის ახალ მთავრობასთან ურთიერთობა, რაც არ ნიშნავს "თალიბანის" მთავრობის აღიარებას. ეს ოპერატიული ჩართულობაა", - განაცხადა ბორელმა სლოვენიაში ევროკავშირის საგარეო საქმეთა მინისტრების შეხვედრისას. მისი თქმით, ეს ჩართულობა გაიზრდება ავღანეთის ახალი მთავრობის ქმედებების მიხედვით. ბორელმა აღნიშნა, რომ ახალმა მთავრობამ ხელი უნდა შეუშალოს ქვეყანას, რომ ისევ არ იქცეს შეიარაღებული დაჯგუფებები სანაშენე ადგილად, როგორც ეს იყო წინა ხელისუფლებაში ყოფნის დროს. ის პატივს უნდა სცემდეს ადამიანის უფლებებს, კანონის უზენაესობას და მედიის თავისუფლებას და სხვა პოლიტიკურ ძალებთან უნდა აწარმოოს მოლაპარაკებები გარდამავალ მთავრობასთან დაკავშირებით. ამავე თემაზე: მედია: ავღანეთის ახალ მთავრობას აბდულ ღანი ბარადარი უხელმძღვანელებს
კახა კალაძე დიდი ბრიტანეთის ელჩს შეხვდა
თბილისის მერი კახა კალაძე დიდი ბრიტანეთისა და ჩრდილოეთ ირლანდიის გაერთიანებული სამეფოს ელჩს საქართველოში მარკ კლეიტონს შეხვდა. ამის შესახებ ინფორმაციას თბილისის მერია ავრცელებს. უწყების ცნობით, სამუშაო შეხვედრაზე მხარეებმა დედაქალაქში განხორციელებულ და სამომავალოდ დაგეგმილ პროექტებზე, ასევე, წინასაარჩევნო გარემოზე ისაუბრეს. "საუბარი შეეხო დედაქალაქში მიმდინარე და დასრულებულ ინფრასტრუქტურულ სამუშაოებს, სატრანსპორტო რეფორმას, ეკოლოგიური მდგომარეობის გაუმჯობესების კუთხით გადადგმულ ნაბიჯებს, თბილისის მერიის სოციალურ და ჯანდაცვის პროგრამებს. შეხვედრის ერთ-ერთი თემა ასევე იყო წინასაარჩევნო გარემო და კახა კალაძის, როგორც თბილისის მერობის ერთ-ერთი კანდიდატის სამომავალო გეგმები. როგორც კახა კალაძემ აღნიშნა, მისი საარჩევნო კამპანია მხოლოდ პოზიტიური და საქმეზე ორიენტირებულია. მისივე თქმით, თბილისის მოსახლეობის მხარდაჭერა, რომელსაც მუდმივად გრძნობს, ასევე, ის მასშტაბური და ძალიან საჭირო პროექტები, რაც დედაქალაქში ბოლო ოთხი წლის განმავლობაში განხორციელდა, აძლევს პირველივე ტურში გამარჯვების მყარ იმედს. დიდი ბრიტანეთისა და ჩრდილოეთ ირლანდიის გაერთიანებული სამეფოს ელჩმა საქართველოში მარკ კლეიტონმა, ბრიტანეთის მთავრობის სახელით, კიდევ ერთხელ გამოხატა სრული მხარდაჭერა საქართველოს ევროპულ და ევროატლატიკურ სტრუქტურებში ინტეგრაციის გზაზე", - ნათქვამია მერიის განცხადებაში.
კახა გოგოლაშვილი: მომავალში, როდესაც ბევრი სხვა დახმარება დაგვჭირდება, ევროკავშირი ნებისმიერ შემთხვევაში მოგვთხოვს რეფორმების შესაბამისობაში მოყვანას
ევროპარლამენტმა და ევროკავშირის საბჭომ 2020 წლის 25 მაისს, მაკროფინანსური დახმარების გაცემა სხვა ქვეყნებთან ერთად, არამხოლოდ საქართველოსთვის არამედ, მოლდოვისა და უკრაინისთვისაც გადაწყვიტეს. დახმარება მიზნად ისახავდა ეკონომიკაზე კორონავირუსის პანდემიის გავლენის შემცირებას. არსებული საგრანტო შეთანხმებების ფარგლებში, ევროკომისიის მიერ, 2020 წლის 25 მაისს გავრცელებულ ინფორმაციაში ერთი დეტალიც არის საყურადღებო. კერძოდ, ტექსტში აღნიშნულია, რომ შემდგომი ტრანშის გაცემა განპირობებული იქნება ამ დოკუმენტით განსაზღვრული პოლიტიკის პირობების შესრულებით. ასევე წაიკითხეთ: რას ითვალისწინებს ევროკავშირის მაკროფინანსურ დახმარებაზე მემორანდუმი და რა წერია დოკუმენტში „ევროკავშირის მხრიდან შემდგომი დახმარებებიც კითხვის ნიშნის ქვეშ დგას“ - მიიჩნევს სტრატეგიისა და საერთაშორისო ურთიერთობების კვლევის ფონდის უფროსი მეცნიერ-თანამშრომელი, ევროპული კვლევების ცენტრის დირექტორი, კახა გოგოლაშვილი. Europetime-თან ინტერვიუში ის აცხადებს, რომ მომავალში, როდესაც ბევრი სხვა დახმარება დაგვჭირდება, ევროკავშირი ნებისმიერ შემთხვევაში მოგვთხოვს მოსამართლეების არჩევის წესის შეცვლას და რეფორმის შესაბამისობაში მოყვანას. „მხოლოდ ამ გრანტზე რომ არ არის საუბარი, ევროკავშირისგან აწი არაფერი არ დაგვჭირდება?! ჩვენზე ძლიერი ეკონომიკის ქვეყნები, რომლებიც ევროკავშირის ქვეყნებში წევრიანდებოდნენ და ახლაც გაწევრიანების პროცესში არიან, ევროკავშირს ყოველთვის სხთოვენ დამატებით სესხს ან დახმარებას. განა ევროკავშირის გრანტებით არ ხორციელდება ინფრასტრუქტურული პროექტები?! მათ შორის, ევროპა-აზიის დეფერანს რომ ვაშენებთ. სხვა დონორებიც არიან, მაგრამ ძირითადი გარანტორი არის ევროპის საინვესტიციო ბანკი. არ დაგავიწყდეთ, რა თქვა ამერიკის ელჩმა : თუ არ გჭირდებათ ფული, ჩვენც გადავხედავთო. სამხედრო შეიარაღების შესაძენად აშშ საქართველოსთვის 36 მილიონს რომ გამოყოფს, ახლა იტყვიან, არ გჭირდებათ და თქვენ იყიდეთ, გადაიხადეთო. ასე რომ, სტრატეგიულად ძალიან დამაზიანებელი ნაბიჯი გადაიდგა. არჩევნების წინ, ეს იყო ტაქტიკური სვლა, არ უნდოდათ სკანდალი, რომ აი, ევროკავშირმა ტრანში შეუჩერა საქართველოს და ასე შემდეგ. ევროკავშირიდან ტრანშის შეჩერება დამაზიანებელი იქნებოდა „ქართული ოცნებისთვის“ არჩევნების წინ და თვითონ მთავრობის განცხადება, უარი თქვას მაკროფინანსურ დახმარებაზე, დამაზიანებელია მთლიანად ქვეყნისთვის. უბრალოდ, „ქართულ ოცნებაში“ ფიქრობენ, რომ არაუშავს, ახლა ვაწყენინებთ ევროკავშირს და არჩევნების შემდეგ ისევ დავამყარებთ კარგ ურთიერთობებსო. თუმცა ეს სტრატეგიულად დამაზიანებელია იმიტომ, რომ ქვეყანამ შესაძლოა, დონორებისგან სხვა დახმარებები ვერ მიიღოს, ამერიკასაც და ევროკავშირსაც კრიზისი აქვთ კოვიდის გამო. ამდენი ხარჯი აქვთ, თავისი მოსახლეობისთვის სჭირდებათ მხარდაჭერა ხომ?!“, - აღნიშნავს კახა გოგოლაშვილი. აღსანიშნავია, რომ მაკროფინანსური დახმარების პაკეტი საქართველოს გარდა, უკრაინამ და მოლდოვამაც მიიღეს, რომელთანაც ქვეყანას ასოცირებული ტრიოს ფორმატი აერთიანებს. კახა გოგოლაშვილი მიიჩნევს, რომ საქართველოს გადაწყვეტილება მთლიანად ევროპული ინტეგრაციის პროცესს მიაყენებს ზიანს, მათ შორის, რაღაც გავლენა შესაძლოა, ასოცირებულ ტრიოზეც ჰქონდეს. „რა აზრი აქვს ასოცირებულ ტრიოს, თუ ევროკავშირთან აფუჭებ ურთიერთობებს?! ეს ხომ იმისთვის გვჭირდება, რომ სამმა ქვეყანამ ერთად მოახერხოს ევროკავშირთან დაახლოება და თუ შენ თავად აჩერებ, რად გინდა ასოცირებული ტრიო?!“, - აღნიშნავს ექსპერტი და მოლდოვის მაგალითს განიხილავს. „იყო პერიოდი, როცა დიდი დოზით მიითვისეს ევროკავშირის დახმარება რაღაც ბიზნეს სტრუქტურებმა. მაშინ, ევროკავშირმა მოლდოვას გარკვეული დროით შეუჩერა დახმარება. შემდეგ განაგრძო დახმარება მოსახლეობისთვის და მიაღწია იმას, რომ შეიცვალა ხელისუფლება. მაია სანდუ ვერ მოვიდოდა ხელისუფლებაში, ევროკავშირის სრული მხარდაჭერა და გარანტიები, რომ ხელისუფლებაში მოსვლის შემდეგ დახმარებას აღმოუჩენდნენ. ალბათ, აქაც ასე იქნება. თუ გაცივდება ურთიერთობები „ქართულ ოცნებასა“ და ევროკავშირს შორის, ევროკავშირიც და აშშ-ც შეეცდებიან, მოძებნონ ალტერნატიული ძალა/ძალები (ოპოზიციური) საქართველოში, რომ შეცვალონ ხელისუფლება, რომლის იმედიც არ აქვთ ბოლომდე. ევროკავშირს სურს, ხელისუფლება იყოს დემოკრატიული, დემოკრატიულად არჩეული და დემოკრატიული რეფორმების გამტარებელი. მარტო ასე არ გამოვა - მე შენი მეგობარი ვარ და შენთან მინდა. თურქეთიც ასე იყო და ხომ ნახეთ, შეუჩერა მოლაპარაკებები გაწევრიანებაზე და უთხრა - „თქვენ არ ატარებთ დემოკრატიულ რეფორმებს, თან ევროკავშირში გინდათ და თან გინდათ, რომ ქვეყანაში დემოკრატია არ განავითაროთ, ასე არ გამოვა“. თურქეთი დიდი ხნის განმავლობაში ითხოვდა განმარტებას, რატომ გააჩერა ევროკავშირმა გაწევრიანებაზე მოლაპარაკებები, ერდოღანი პრემიერ-მინისტრობისა დროსაც კი ამას ლაპარაკობდა. ჩვენთანაც ზუსტად ის ვარიანტია, რასაც თურქეთი აკეთებდა, უბრალოდ, უფრო მინიმალისტურ მასშტაბებში, ჩვენ განვსხვავდებით მათი მასშტაბებისგან, თუმცა საქართველოში ვითარდება მართლმადიდებლური ფუნდამენტალისტური ელექტორატი, რასაც მთავრობა უწყობს ხელს, რადგან რაც შეიძლება მეტი ამომრჩეველი სჭირდება. ხედავს, რომ მათია ეს ამომრჩეველი და ფიქრობენ, „რახან ჩვენია, მოდი, გავაძლიეროთ“. მაგრამ ეს ჩვენს სტრატეგიულ მიზნებს ეწინააღმდეგება და შეიძლება, აქაც ისე მოხდეს, როგორც თურქეთის შემთხვევაში, როდესაც ჩამოყალიბდა ისეთ სახელმწიფოდ, რომელმაც დემოკრატიული განვითარება შეაჩერა, რადგან მოსახლეობიდან არ არის მოთხოვნა დემოკრატიულ განვითარებაზე“, - განაცხადა კახა გოგოლაშვილმა. შეგახსენებთ, პრემიერ-მინისტრმა ირაკლი ღარიბაშვილმა 31 აგვისტოს განაცხადა, რომ მთავრობა თავს შეიკავებს ამ სესხის აღებაზე, თანხის მიღების აუცილებლობა აღარ იქნება და ამის მიზეზად საგარეო ვალის შემცირება დაასახელა. უფრო ადრე, „ქართული ოცნების“ თავმჯდომარემ განაცხადა, რომ ევროკავშირისგან მაკროფინანსური დახმარების მიღებას ფინანსური დატვირთვა აღარ აქვს. მთავრობის განცხადებას ევროკავშირის წარმომადგენლობაში საგანგებო ბრიფინგი მოჰყვა, სადაც აღნიშნეს, რომ საქართველომ საკმარისად ვერ შეძლო, შეესრულებინა მაკროფინანსური დახმარების პირობა. მანამდე, ევროპული საბჭოს პრეზიდენტმა შეახსენა საქართველოს მთავრობას, რომ მაკროფინანსური დახმარების გაცემის თარიღი ახლოვდებოდა და დროა, საქართველოს მთავრობამ აჩვენოს, რომ შეთანხმებების ერთგულია. ამავე თემაზე: რას ითვალისწინებს ევროკავშირის მაკროფინანსურ დახმარებაზე მემორანდუმი და რა წერია დოკუმენტში
პრემიერი: შევხვდი მეშახტეებს, ერთ-ერთი მთავარი საკითხი, რაც მათ წამოაყენეს არის ტურიზმის განვითარება
"ახლახან შევხვდი მეშახტეებს. განვიხილეთ რამდენიმე საკითხი, მათ ადგილზე გადავუწყვიტეთ საკითხები და ერთ-ერთი მთავარი საკითხი, რაც მათი მხრიდან იყო წამოყენებული, არის სწორედ ტურიზმის განვითარება", - ამის შესახებ საქართველოს პრემიერ-მინისტრმა ირაკლი ღარიბაშვილმა „ქართული ოცნების“ ტყიბულის მერობის კანდიდატის, დავით ჩერქეზიშვილის წარდგენისას განაცხადა. მთავრობის მეთაურის შეფასებით, ტყიბული გამორჩეული ქალაქია სილამაზით, ბუნებით და ტურისტული პოტენციალით. „ტყიბულში ვიმყოფებით და რა თქმა უნდა, უნდა აღინიშნოს ის, რომ ეს ისტორიული ქალაქი გამორჩეულია თავისი სილამაზით, არაჩვეულებრივი ბუნებით და უზარმაზარი პოტენციალით ტურიზმის განსავითარებლად. მე ახლახან შევხვდი მეშახტეებს, მინდა, მათ საჯაროდ მადლობა გადავუხადო, გამოვხატო მათ მიმართ სოლიდარობა და მადლიერება. განვიხილეთ რამდენიმე საკითხი, მათ ადგილზე გადავუწყვიტეთ საკითხები და ერთ-ერთი მთავარი საკითხი, რაც მათი მხრიდან იყო წამოყენებული, არის სწორედ ტურიზმის განვითარება. აქტიურად ვმუშაობთ ცხრაჯვარის პროექტზე და აუცილებლად გაკეთდება. სხვა ლოკაციებს შევისწავლით და აუცილებლად გავაკეთებთ ახალ ტურისტული მიზიდულობის ცენტრებს იმისთვის, რომ ტყიბულში რაც შეიძლება მეტი დამსვენებელი ჩამოვიდეს, მეტმა ნახოს, როგორც ადგილობრივმა, ისე უცხოელმა ტურისტმა“, - განაცხადა ირაკლი ღარიბაშვილმა.
15 სექტემბრიდან თბილისის ბაღებში პროდუქტების დარიგება დაიწყება
თბილისის მერიის ცნობით, თბილისის საბავშვო ბაგა-ბაღებში რეგისტრირებული აღსაზრდელებისთვის საკვები პროდუქტების დარიგება 15 სექტემბრიდან დაიწყება. სოციალური პროექტის განახლების გადაწყვეტილება დედაქალაქის მერმა სააღმზრდელო პროცესის 4 ოქტომბრამდე გადადების გამო მიიღო. „2021-2022 სააღმზრდელო წლის დაწყების გადადების გამო, თბილისის საბავშვო ბაგა-ბაღების მართვის სააგენტო 15 სექტემბრიდან განაახლებს აღსაზრდელებისთვის საკვები პროდუქტების გაცემას. ჩვენ მერის მიერ ინიცირებული სოციალური პროექტი შარშან, 19 სექტემბრიდან დავიწყეთ და ყოველთვის, როცა ჩერდებოდა სააღმზრდელო პროცესი, ბავშვებისთვის განკუთვნილი პროდუქტების ნობათი აღსაზრდელებს ურიგდებოდათ. იმედი გვაქვს, რომ ეს პროექტი ამჯერადაც, მნიშვნელოვანი შეღავათი იქნება ათიათასობით აღსაზრდელის ოჯახისთვის“, - განმარტა თბილისის საბავშვო ბაგა-ბაღების მართვის სააგენტოს ხელმძღვანელმა, კახაბერ გვანცელაძემ. "პროდუქტების გაცემისას საბავშვო ბაღებში დაცული იქნება კორონავირუსის გავრცელების პრევენციისთვის დადგენილი რეგულაციები. დარიგდება ათი დასახელების პროდუქტი: შაქარი - 1 კგ, ფქვილი - 1 კგ, შვრია - 1 კგ, მაკარონი - 1 კგ, ხილფაფა - 1 ქილა, ზეთი - 1 ლ, კვერცხი - 6ც, ჩაი - 1 კოლოფი, ყველი - 0,5 კგ, რძე - 2 ლ. თბილისში 188 საბავშვო ბაგა-ბაღია რეგისტრირებული, სადაც 61 000-მდე აღსაზრდელი ირიცხება", - ნათქვამია მერიის მიერ გავრცელებულ ინფორმაციაში.
ირაკლი ღარიბაშვილი: ქვეყნის დაკეტვაზე მარტივი არაფერია, 1 საათში შემიძლია გადავკეტო მთელი ქვეყანა
ქვეყნის დაკეტვაზე მარტივი არაფერია, 1 საათში შემიძლია, გადავკეტო მთელი ქვეყანა, მაგრამ ეს არ არის გამოსავალი. - ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტებს ტყიბულში, ეპიდვითარების მართვასთან დაკავშირებით დასმული კითხვის საპასუხოდ განუცხადა. მთავრობის მეთაურის თქმით, როდესაც ქვეყანაში ჩამოტანილია 3 მილიონზე მეტი ვაქცინა, ეკონომიკის ჩაკეტვა შეუძლებელია, მით უმეტეს ისეთი პატარა ქვეყნისთვის, როგორიც საქართველოა. „შეგახსენებთ, მაშინ საკოორდინაციო საბჭოს წევრი ვიყავი და მთელი მთავრობა ვმართავდით პროცესს, მაშინ არც ვაქცინა არსებობდა და მთელი ქვეყანა იყო დაკეტილი, ქვეყნის დაკეტვაზე მარტივი არაფერია, 1 საათში შემიძლია, გადავკეტო მთელი ქვეყანა, მაგრამ ეს არ არის გამოსავალი. ჩვენ არჩევანი მოვუტანეთ მოსახლეობას, ჩამოვიტანეთ 3 მილიონზე მეტი ვაქცინა - Sinopharm-ი, Sinovac-ი, Pfizer-ი, Astrazeneca და ეს არჩევანი თავად მოსახლეობამ უნდა გააკეთოს. აუცილებელია ვაქცინაცია, აუცილებელია აცრების ჩატარება, პირბადის ტარება და ჩვენი ახლობლების დაცვა. ქვეყნის ჩაკეტვა დღეს შეუძლებელია. ცალკეული ლოკალური შეზღუდვები შეიძლება დაწესდეს და დავაწესეთ კიდევაც, სიტუაცია მიდის სტაბილიზაციისკენ, მთელმა მსოფლიომ ანალოგიური გზა გაიარა. მე-4 და მე-5 ტალღები ყველგან მიმდინარეობს, ყველგან და ნუ აცდენთ მოსახლეობას, ნუ შეგყავთ მოსახლეობა შეცდომაში, წარმოდგენა არ აქვთ მათ, ვინც კითხვა გამოგიგზავნათ, რა ხდება ევროპაში და მსოფლიოში, ან აქვთ და უბრალოდ არ ამბობენ ამას. ყველა ქვეყანამ გაიარა იგივე, მათ, ვინც გახსნა ეკონომიკა. ეკონომიკის გახსნას ალტერნატივა არ აქვს, მით უმეტეს ჩვენნაირი პატარა ქვეყნისთვის. აშშ-მა, ნომერ პირველმა, ყველაზე ძლიერმა სახელმწიფომ, გამოვიდა ენტონი ფაუჩი, ამერიკის პრეზიდენტიც, მთელი მთავრობაც და თქვა, რომ ქვეყნის ჩაკეტვა აღარ მოხდება. იგივე განაცხადეს ევროპელებმა, ბრიტანეთის პრემიერმა, გერმანიამ, საფრანგეთმა, ყველამ. შედეგი არის ის, რომ დღეს გვაქვს ორნიშნა ეკონომიკური ზრდა. ამით მე ვამაყობ. ვამაყობ იმით, რომ ბიზნესი დამშვიდებულია, სტაბილურად ვითარდება ჩვენი ეკონომიკა და გვაქვს უპრეცედენტო ზრდა. ის, რომ ტურიზმის სეზონი არ ჩავარდა და ჩვენს მოსახლეობას დამატებითი შემოსავალი გაუჩნდა, სწორედ ამ გადაწყვეტილებების შედეგია. ამ პროცესში აუცილებელია ეკონომიკის ზრდის შენარჩუნება და მეორეს მხრივ პროცესის მართვა. რაც შეეხება მართვას, როგორ ვმართავთ, პრიმიტიული კითხვაა. მართვა ჩვენ გვესმის შემდეგნაირად - არც ერთი მოქალაქე არ დარჩეს ზრუნვის და მკურნალობის გარეშე და ამას ახერხებს დღევანდელი ჯანდაცვის სისტემა. ექიმების გმირობაზე დგას სწორედაც რომ ეს პროცესი", - განაცხადა პრემიერ-მინისტრმა.
კარლ ჰარცელი COVID19-ის წინააღმდეგ სრულად ვაქცინირებულია
ევროკავშირის ელჩი კარლ ჰარცელი COVID-19-ის წინააღმდეგ სრულად ვაქცინირებულია. ინფორმაციას ევროკავშირის წარმომადგენლობა საქართველოში ავრცელებს. ,,ვაქცინაცია საუკეთესო გზაა საკუთარი თავის და გარშემომყოფების დასაცავად პანდემიისას. ყველამ უნდა შევიტანოთ ჩვენი წვლილი COVID-19-ის შეჩერებაში", - აღნიშნულია წარმომადგენლობის მიერ გავრცელებულ ინფორმაციაში. ცნობისთვის, 3 სექტემბრის მონაცემებით, საქართველოში ჯამში 1 259 391 აცრა ჩატარდა. ამასთან, ერთი დოზით აცრილია 822 297 ადამიანი, რაც მოზრდილი მოსახლეობის 28.8 პროცენტია, ხოლო სრულად ვაქცინირებულია 437 094, რაც მოზრდილი მოსახლეობის 15.3 პროცენტია.
დავით ზალკალიანი: საქართველო ერთგულია თავისი მიზნის - გახდეს NATO-ს წევრი, ერთობლივი ძალისხმევით, ჩვენ მივაღწევთ შედეგებს
საქართველოს საგარეო საქმეთა მინისტრი, ვიცე-პრემიერი დავით ზალკალიანი ხავიერ კოლომინას სამხრეთ კავკასიასა და ცენტრალურ აზიაში NATO-ს გენერალური მდივნის სპეციალურ წარმომადგენელად დანიშვნას ულოცავს. "ვულოცავ ხავიერ კოლომინას პოლიტიკურ საკითხებსა და უსაფრთხოების პოლიტიკაში ნატოს გენერალური მდივნის თანაშემწის მოადგილისა და სამხრეთ კავკასიასა და ცენტრალურ აზიაში სპეციალური წარმომადგენელის პოზიციაზე დანიშვნას. საქართველო ერთგულია თავისი მიზნისა, გახდეს ალიანსის წევრი. მე დარწმუნებული ვარ, რომ ერთობლივი ძალისხმევით, ჩვენ მივაღწევთ ხელშესახებ შედეგებს," - წერს დავით ზალკალიანი Twitter-ზე. ამავე თემაზე: ცენტრალურ აზიასა და სამხრეთ კავკასიაში NATO-ს სპეცწარმომადგენლის პოზიციაზე ჯეიმს აპატურაი ესპანელმა დიპლომატმა შეცვალა
შსს-მ უკანონო ცეცხლსასროლი იარაღები და საბრძოლო მასალა ამოიღო - დაკავებულია 6 პირი
შინაგან საქმეთა სამინისტროს თანამშრომლებმა, ჩატარებული ოპერატიულ-სამძებრო და საგამოძიებო ღონისძიებების შედეგად, სხვადასხვა დროს, შიდა ქართლში, აჭარაში, სვანეთსა და თბილისში უკანონო ცეცხლსასროლი იარაღები ამოიღეს და 6 პირი დააკავეს. ამის შესახებ ინფორმაციას შინაგან საქმეთა სამინისტრო ავრცელებს. უწყების ცნობით, დაკავებულები არიან: 1981 წელს დაბადებული ა.ხ., 1981 წელს დაბადებული ჯ.ლ., 1989 წელს დაბადებული გ.დ., 1973 წელს დაბადებული თ. ც., 1988 წელს დაბადებული ნ.გ. და 1970 წელს დაბადებული გ.ჯ. მათ მიერ ჩადენილი დანაშაულები 3-დან 9 წლამდე ვადით თავისუფლების აღკვეთას ითვალისწინებს. „შიდა ქართლის პოლიციის დეპარტამენტის დეტექტივების სამმართველოს თანამშრომლებმა ჯ.ლ. გორის მუნიციპალიტეტის ტერიტორიაზე, მისივე მართვის ქვეშ არსებული ავტომობილით გადაადგილებისას შეაჩერეს. პოლიციამ, აღნიშნული ავტომობილის ჩხრეკის შედეგად, ნივთმტკიცების სახით ამოიღო „გლოკ 43“-ის მოდელის ცეცხლსასროლი პისტოლეტი, 11 საბრძოლო ვაზნა და 2 მჭიდი. გამოძიებით დადგინდა, რომ ბრალდებულმა ა.ხ.-მ „გლოკ 43“-ის მოდელის ცეცხლსასროლი პისტოლეტი და 11 საბრძოლო ვაზნა მართლსაწინააღმდეგოდ გაასაღა თავის ნაცნობ ჯ.ლ.-ზე, ამ უკანასკნელმა კი ცეცხლსასროლი იარაღი შემდგომი რეალიზაციის მიზნით შეიძინა. აჭარის პოლიციის დეპარტამენტის თანამშრომლებმა ხელვაჩაურის მუნიციპალიტეტში, ბრალდებული გ.დ.-ის საცხოვრებელ სახლში ჩატარებული ჩხრეკის შედეგად, კუსტარულად გადაჭრილი თოფი და 12 საბრძოლო ვაზნა ნივთმტკიცებად ამოიღეს. ასევე ნივთმტკიცების სახით ამოღებულია კალაშნიკოვის კონსტრუქციის ავტომატური ცეცხლსასროლი იარაღი, 2 მჭიდი და 75 საბრძოლო ვაზნა. მესტიის რაიონული პოლიციის თანამშრომლებმა, ბრალდებული თ.ც.-ის საცხოვრებელი სახლისა და დამხმარე სათავსოს ჩხრეკისას, ნივთმტკიცებად ამოიღეს "აკ-74"-ის მოდელის ავტომატური ცეცხლსასროლი იარაღი. თბილისის პოლიციის დეპარტამენტის ვაკე-საბურთალოს მთავარი სამმართველოს თანამშრომლებმა, მოსამართლის განჩინების საფუძველზე, ბრალდებული ნ.გ.-ის ბინის ჩხრეკისას, ნივთმტკიცებად ამოიღეს „ჩეზეს“ ფირმის პისტოლეტი, 1 მჭიდი და 8 ვაზნა. თბილისის პოლიციის დეპარტამენტის თანამშრომლებმა, გ.ჯ.-ის პირადი და საცხოვრებელი ბინის ჩხრეკისას, მაკაროვის სისტემის ცეცხლსასროლი პისტოლეტი, 15 ვაზნა და 1 მჭიდი ამოიღეს. ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვის, უკანონო გასაღებისა და ტარების ფაქტებზე გამოძიება საქართველოს სისხლის სამართლის კოდექსის 236-ე მუხლის მე-3, მე-4 და მე-5 ნაწილებით მიმდინარეობს." - ნათქვამია უწყების განცხადებაში.
ამირან გამყრელიძე: სრულად ვაქცინირებულებიდან სამი ადამიანი გარდაიცვალა
დაავადებათა კონტროლის ეროვნული ცენტრის ხელმძღვაბელის, ამირან გამყრელიძის განცხადებით, სრულად ვაქცინირებულებიდან სამი ადამიანი გარდაიცვალა. მისი თქმით, გლობალურად, მთელ მსოფლიოში კოვიდი, ბოლო თვე-ნახევრის განმავლობაში, სიკვდილიანობის ნომერ პირველი მიზეზი გახდა. "სამწუხაროდ, გვაქვს სამი გარდაცვალება ორჯერ აცრილებში...სამწუხაროდ, ბოლო სამ კვირაზე მეტია ჩვენთანაც. მან გადააჭარბა სიკვდილიანობის პირველ მიზეზს, გულსისხლძარღვთა დაავადებას, მეორე მიზეზს - სიმსივნებს. ამიტომ, ეს ძალიან სერიოზული საკითხია. ყოველი ათასი ინფიცირებულიდან, სამწუხაროდ, იღუპება, 10-15-20 ადამიანი, გააჩნია სიმძიმეს და თანმხლებ დაავადებებს", - განაცხადა ამირან გამყრელიძემ. ამასთანავე, გამყრელიძემ აღნიშნა, სრულად ვაქცინირებულ პირებში ინფიცირების შემთხვევა ძალიან მსუბუქი იყო და ჰოსპიტალიზაცია მათ მცირე ნაწილს დასჭირდა. ცნობისთვის, ბოლო 24 საათში, საქართველოში კორონავირუსი კიდევ 3 034 ადამიანს დაუდასტურდა, გარდაიცვალა 86.
ამირან გამყრელიძე: თუ სექტემბერში დღეში 50-60 ათას აცრას გავაკეთებთ, ოქტომბერში ბევრად მშვიდი სიტუაცია გვექნება
დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, თუ სექტემბერში დღეში 50-60 ათასი ადამიანი აიცრება, ოქტომბერში ბევრად მშვიდი სიტუაცია იქნება. მისი თქმით, ამის რესურსი ქვეყანას აქვს. როგორც ამირან გამყრელიძემ განაცხადა, ორჯერადად აცრილი ათასი ადამიანი არის ერთი გადარჩენილი სიცოცხლე. "ჩვენ რომ თვეში ავცრათ არა ერთი, არამედ ორი მილიონი ადამიანი - შესაძლებელია. ამისთვის საჭიროა, რომ ყოველდღიურად ჩავატაროთ დაახლოებთ 50-60 ათასი აცრა. ამას ქვეყანა შეძლებს, ვაქცინა არის. სექტემბერში რომ ჩვენ ეს გავაკეთოთ, მაშინ ოქტომბერში გვექნება ბევრად მშვიდი სიტუაცია. ამის გაკეთება შესძლებელია, თუ გავერთიანდებით, თუ ეს იქნება მთავარი მიზანი და უნდა იყოს კიდეც. ორჯერადად აცრილი ათასი ადამიანი არის ერთი გადარჩენილი სიცოცხლე", - განაცხადა ამირან გამყრელიძემ. ამავე თემაზე: საქართველოში სრულად ვაქცინირებულია 15%-ზე მეტი საქართველოში კორონავირუსი კიდევ 3 034 ადამიანს დაუდასტურდა, გარდაიცვალა 86 ეკატერინე ტიკარაძე: 60 წელს გადაცილებულებში განსაკუთრებით მაღალია ლეტალობა, კაცებში კრიტიკულ ასაკად 70-79 წელი გამოიკვეთა, ქალებში - 80-90 წელი
ამირან გამყრელიძე: აცრილიდან აცრილზე კორონავირუსის გადადების შანსი ბევრად მცირეა
დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის ამირან გამყრელიძის განცხადებით, ვაქცინირებულ პირებს შორის ვირუსის გადადების შანსი ბევრად მცირეა, ვიდრე პირიქით. მისივე ინფორმაციით, სრულად ვაქცინირებულებში ინფიცირების შემთხვევა ძალიან მსუბუქი იყო და ჰოსპიტალიზაცია მათ მცირე ნაწილს დასჭირდა. „აცრილიდან აცრილზე გადადების შანსი ბევრად უფრო მცირეა, ვიდრე აცრილიდან აუცრელზე, ან აუცრელიდან აცრილზე“, - განაცხადა ამირან გამყრელიძემ ,,მაესტროს" ეთერში. ცნობისთვის, ბოლო 24 საათის განმავლობაში საქართველოში კორონავირუსი კიდევ 3 034 ადამიანს დაუდასტურდა, გამოჯანმრთელდა 3 952 პაციენტი, 86 კოვიდინფიცირებული კი გარდაიცვალა. 3 სექტემბრის მონაცემებით, საქართველოში ჯამში 1 259 391 აცრა ჩატარდა. ამასთან, ერთი დოზით აცრილია 822 297 ადამიანი, რაც მოზრდილი მოსახლეობის 28.8 პროცენტია, ხოლო სრულად ვაქცინირებულია 437 094, რაც მოზრდილი მოსახლეობის 15.3 პროცენტია.
სინოპტიკოსები 4 სექტემბერიდან გამოდარებას პროგნოზირებენ
გარემოს ეროვნული სააგენტო მოსახლეობას მოსალოდნელი ამინდის შესახებ აფრთხილებს. კერძოდ, სინოპტიკოსების ცნობით, 3 სექტემბერს დასავლეთ საქართველოში შენარჩუნებული იქნება შედარებით ცივი და წვიმიანი ამინდი. ჰაერის ტემპერატურა +18, +23 გრადუსია მოსალოდნელი. ამავე წყაროს ცნობი, 4 სექტემბერს გამოიდარებს და 8 სექტემბრამდე მცირე წვიმა შესაძლოა, მხოლოდ ცალკეულ რაიონში აღინიშნოს. ჰაერის ტემპერატურა +22, +27 გრადუსამდე მოიმატებს. აღმოსავლეთ საქართველოში 4 სექტემბრის დილამდე იქროლებს დასავლეთის მიმართულების ძლიერი ქარი. ღამის საათებში ჰაერის ტემპერატურა დაიკლებს. 8 სექტემბრამდე ზოგან იწვიმებს, შესაძლებელია სეტყვაც. ჰაერის ტემპერატურა დღის საათებში +23, +28 გრადუსი იქნება. თბილისში 4 სექტემბრის დილამდე იქროლებს ჩრდილო-დასავლეთის მიმართულების ძლიერი ქარი, ღამის საათებში ჰაერის ტემპერატურა +13, +15 გრადუსამდე დაიკლებს. 8 სექტემრამდე, ძირითადად ღამისა და საღამოს საათებში, შესაძლოა მცირე ხანმოკლე წვიმა აღინიშნოს. ჰაერის ტემპერატურა 3-5 სექტემბერს +24, +26 გრადუსი დაფიქსირდება, ხოლო 6 სექტემბრიდან +29 გრადუსამდე მოიმატებს.
ეკატერინე ტიკარაძე: 60 წელს გადაცილებულებში განსაკუთრებით მაღალია ლეტალობა, კაცებში კრიტიკულ ასაკად 70-79 წელი გამოიკვეთა, ქალებში - 80-90 წელი
ჯანდაცვის მინისტრის, ეკატერინე ტიკარაძის განცხადებით, 60 წელს გადაცილებულებში განსაკუთრებით მაღალია ლეტალობა, კაცებში კრიტიკულ ასაკად 70-79 წელი გამოიკვეთა, ქალებში - 80-90 წელი. მისი თქმით, აცრების კომპონენტში ახალგაზრდები ლიდერობენ, დაბალია მაღალ ასაკობრივ ჯგუფში ვაქცინაციაზე მოთხოვნა, თუ ეს პირამიდა არ შეიცვლება, კვლავ დაგვრჩება მაღალი ლეტალობის მაჩვენებელი. "გამოიკვეთა, რომ 60 წლის ზევით განსაკუთრებით მაღალია ლეტალობა. ეს მონაცემი ჩვენ გვაძლევს იმის საფუძველს, რომ ჩვენს მოქალაქეებს, რომლებიც არიან 60 წლის ზევით ინტენსიურად მოვუწოდოთ ვაქცინაციისკენ. მამაკაცებში კრიტიკულ ასაკად 70-79 წელი გამოიკვეთა, ხოლო ქალებში - 80-90 წელი. აცრების კომპონენტში ლიდერობენ ახალგაზრდები. კვლავ დაბალი გვაქვს ასაკობრივ ჯგუფში ვაქცინაციაზე მოთხოვნა და აქტივობა. მიგვაჩნია, რომ თუ ეს პირამიდა არ შეიცვლება ადეკვატურად და არ მივყვებით გასულ წელს დადგენილ ვაქცინაციის კალენდარს, სამწუხაროდ, კვლავ დაგვრჩება გადატვირთული კლინიკები და მაღალი ლეტალობის მაჩვენებელი. ეს კალენდარი განსაზღვრული იყო საერთაშორისო პარტნიორებისა და ადგილობრივი ექსპერტების მიერ, რომ მნიშვნელოვანია ასაკობრივი ჯგუფის ვაქცინაცია. გავუფრთხილდეთ ჩვენს ასაკოვან მშობლებს, ბებიებს, ბაბუებს, ოჯახის წევრებს, სხვა შემთხვევაში, სამწუხაროდ, კვლავ დაგვრჩება გადატვირთული კლინიკები და მაღალი ლეტალობის მაჩვენებელი", - განაცხადა ჯანდაცვის მინისტრმა. ტიკარაძის თქმით, გაანალიზებული აქვთ, ასევე თუ რამდენად ამცირებს ჰოსპიტალიზაციას ვაქცინაცია. "ერთი დოზით ვაქცინირების შემთხვევაში ჰოსპიტალიზაციის რისკი არის 2.85%, ხოლო ორი დოზით ვაქცინირების შემთხვევაში 2.13%. არავაქცინირებულებში, 60 წლის ზევით რისკი არის, თითქმის 95%. ეს გვაძლევს იმის საფუძველს რომ მაქსიმალურად შევეცადოთ კვლავ მოვუწოდოთ ამ ასაკის მოქალაქეებს, რომ ვაქცინაციის პროცესში ინტენსიურად ჩაერთონ", - განაცხადა ტიკარაძემ. საქართველოში სრულად ვაქცინირებულია 15%-ზე მეტი საქართველოში კორონავირუსი კიდევ 3 034 ადამიანს დაუდასტურდა, გარდაიცვალა 86
