ახალი ამბები
ვაშინგტონში, აშშ-უზბეკეთის ბიზნესისა და ინვესტიციების საბჭო დაარსდა
უზბეკეთის პრეზიდენტის ადმინისტრაციის ხელმძღვანელი საიდა მირზიოევა [უზბეკეთის პრეზიდენტის შავქათ მირზიოევის შვილი] 7 აპრილს, აშშ-ის სახელმწიფო მდივანს მარკო რუბიოს, ვაშინგტონში სამუშაო საუზმის ფორმატში შეხვდა. უზბეკური მედიის ცნობით, შეხვედრის დროს მხარეებმა განიხილეს აშშ–უზბეკეთის ბიზნესისა და ინვესტიციების საბჭოს ბოლო შეხვედრის შედეგები და აღნიშნეს ერთობლივი ეკონომიკური პროექტების პორტფელის გაფართოება. საიდა მირზიოევამ ხაზი გაუსვა ორმხრივი თანამშრომლობის გაღრმავების მნიშვნელობას და მადლობა გადაუხადა რუბიოს ორ ქვეყანას შორის სტრატეგიული პარტნიორობის განვითარებაში შეტანილი წვლილისთვის. ვიზიტის ფარგლებში, ვაშინგტონში ოფიციალურად ამოქმედდა აშშ–უზბეკეთის ბიზნესისა და ინვესტიციების საბჭო, რომელიც სავაჭრო და საინვესტიციო კავშირების გაფართოებას ისახავს მიზნად. ხელი მოეწერა ურთიერთგაგების მემორანდუმს. „ეს სტრუქტურა [საბჭო] გახდება ეფექტიანი პლატფორმა უზბეკეთსა და შეერთებულ შტატებს შორის ბიზნეს კავშირების შემდგომი გაძლიერებისთვის. ამას ხელს უწყობს ჩვენი ქვეყნების პრეზიდენტების გადამწყვეტი პოლიტიკური ნება,“ - დაწერა მირზიოევამ Telegram-ზე. 6 აპრილს, საიდა მირზიოევა მარ-ა-ლაგოში შეხვდა საბჭოს თანათავმჯდომარეს, აშშ-ის პრეზიდენტის სპეციალურ წარმომადგენელს სამხრეთ და ცენტრალურ აზიაში, ელჩ სერჯიო გორს. მხარეებმა თანამშრომლობის ძირითადი მიმართულებები და ორმხრივი ეკონომიკური ურთიერთობების გაძლიერების პერსპექტივები განიხილეს. თავის მხრივ, სახელმწიფო დეპარტამენტის ცნობით, აშშ-ის სახელმწიფო მდივანი მარკო რუბიო და სამხრეთ და ცენტრალური აზიის საკითხებში სპეციალური წარმომადგენელი სერხიო გორი უზბეკეთის პრეზიდენტის ადმინისტრაციის ხელმძღვანელს საიდა მირზიოევას შეხვდნენ. აშშ-ის სახელმწიფო დეპარტამენტის პრესსპიკერის მოადგილის ტომი პიგოტის განცხადებით, შეხვედრის მიზანი აშშ–უზბეკეთის სტრატეგიული პარტნიორობის განვითარება იყო. მარკო რუბიომ და საიდა მირზიოევამ ნაყოფიერი დისკუსია გამართეს შეერთებულ შტატებსა და უზბეკეთს შორის საინვესტიციო თანამშრომლობის გაღრმავების კონკრეტულ გზებზე, რაც მოიცავს კრიტიკული მინერალების, ახალი ტექნოლოგიებისა და ინფრასტრუქტურის სფეროებს. „შეერთებული შტატები მიესალმება უზბეკეთთან ორმხრივი თანამშრომლობის გაფართოების, ორმხრივად სასარგებლო კომერციული და უსაფრთხოების პარტნიორობის გაძლიერების; უზბეკეთის სუვერენიტეტისა და რეგიონული ინტეგრაციის მხარდაჭერის შესაძლებლობას,“ - წერია სახელმწიფო დეპარტამენტის მიერ გავრცელებულ ინფორმაციაში. უზბეკური მედიის ცნობით, საიდა მირზიოევამ აშშ-ის სავაჭრო წარმომადგენელთან განიხილა უზბეკეთის მსოფლიო სავაჭრო ორგანიზაციაში გაწევრიანების საკითხი. საიდა მირზიიოევამ თავის Telegram არხზე დაწერა, რომ მან ამერიკულ მხარეს მადლობა გადაუხადა მსოფლიო სავაჭრო ორგანიზაციაში უზბეკეთის გაწევრიანების მისწრაფების მხარდაჭერისთვის. უფრო ადრე გავრცელდა ინფორმაცია, რომ საიდა მირზიოევა ასევე შეხვდა აშშ-ის განვითარების საფინანსო კორპორაციის (DFC) აღმასრულებელ დირექტორს ბენ ბლეკს. მხარეებმა პროექტების ფართო პორტფელი და ამერიკული ინვესტიციების მოზიდვის პერსპექტივები განიხილეს.
რა მოხდება, თუ აშშ ირანს დაარტყამს - შვიდი სცენარი
წყარო - BBC თუ თეირანთან ვერ მიაღწევენ შეთანხმებას და პრეზიდენტი დონალდ ტრამპი აშშ-ის ძალებს შეტევის ბრძანებას მისცემს, მაშინ რა შედეგები შეიძლება, მივიღოთ? პირველი სცენარი გულისხმობს აშშ-ის სამხედრო-საჰაერო და საზღვაო ძალების მიერ შეზღუდულ, ზუსტ დარტყმებს ირანის ისლამური რევოლუციის გუშაგთა კორპუსისა (IRGC) და მის დაქვემდებარებაში მყოფი ბასიჯის სამხედრო ბაზებზე, ბალისტიკური რაკეტების გაშვებისა და შენახვის ობიექტებზე, აგრეთვე, ბირთვულ პროგრამაზე. ამის შედეგად უკვე შესუსტებული რეჟიმი დაემხობა და ქვეყანა, საბოლოოდ, დემოკრატიულ მმართველობაზე გადადის, რაც ირანს საშუალებას მისცემს, მსოფლიო საზოგადოებას დაუბრუნდეს. თუმცა ეს უკიდურესად ოპტიმისტური სცენარია. დასავლეთის სამხედრო ჩარევამ ერაყსა და ლიბიაში დიქტატურები დაამხო, მაგრამ დემოკრატიისკენ მშვიდობიანი გარდაქმნა ვერ უზრუნველყო — ამას მოჰყვა ხანგრძლივი ქაოსი და ძალადობა. შედარებით უკეთესი შედეგი აჩვენა სირიამ, რომელმაც 2024 წელს, დასავლეთის სამხედრო მხარდაჭერის გარეშე, დაამხო ბაშარ ალ-ასადის რეჟიმი. მეორე სცენარი - რეჟიმი გადარჩა, თუმცა ის პოლიტიკას ცვლის. ეს არის „ვენესუელის მსგავსი მოდელი”: სწრაფი, ძლიერი აშშ-ის ჩარევა ცვლის რეჟიმს, მაგრამ ახდენს მისი პოლიტიკის მოდერნიზებას. ირანის შემთხვევაში ეს ნიშნავს, რომ ისლამური რესპუბლიკა რჩება, რაც ბევრ ირანელს არ დააკმაყოფილებს, მაგრამ აიძულებს მას, შეწყვიტოს ძალადობის მხარდაჭერა ახლო აღმოსავლეთში, შეამციროს ბირთვული და ბალისტიკური რაკეტების პროგრამები და შეამსუბუქოს საპროტესტო მოძრაობების წინააღმდეგობის პოლიტიკა. თუმცა ეს სცენარი ნაკლებ სავარაუდოა: რესპუბლიკის ხელმძღვანელობა უკვე 47 წელია, ცვლილებებს მტკიცედ ეწინააღმდეგება. მესამე სცენარი - რეჟიმი დანგრეულია, მის ადგილზე სამხედრო წესრიგი მყარდება. ბევრი ამას ყველაზე სავარაუდო სცენარად მიიჩნევს. მიუხედავად იმისა, რომ რეჟიმი ბევრისთვის მიუღებელია და საპროტესტო ტალღები ყოველ წელს მას კიდევ უფრო ასუსტებს, ქვეყანაში მაინც არსებობს უზარმაზარი და ყოვლისმომცველი უსაფრთხოების მოქმედი სისტემა, რომლის წარმომადგენლებს არსებული სტატუს-კვოს შენარჩუნება აწყობთ. საპროტესტო მოძრაობების მიერ რეჟიმის დამხობის წარუმატებელი მცდელობის მიზეზები იმაში მდგომარეობს, რომ საპროტესტო მოძრაობის მხარეს არ გადასულან რეჟიმის წარმომადგენლები და ხელისუფლებაში მყოფები მზად არიან, გამოიყენონ შეუზღუდავი ძალა და სისასტიკე, რათა დარჩნენ ხელისუფლებაში. აშშ-ის დარტყმების შედეგების ფონზე, ქაოსში, შეიძლება იმის წარმოდგენა, რომ ირანი გადავიდეს ძლიერ სამხედრო მმართველობაზე, რომელიც ძირითადად, IRGC-ს წევრებით იქნება დაკომპლექტებული. მეოთხე სცენარი - ირანი შურს იძიებს და აშშ-ის ძალებსა და მეზობლებს თავს დაესხმება. ირანმა პირობა დადო, რომ აშშ-ის ნებისმიერ თავდასხმას უპასუხებს და რომ „ჩახმახზე აქვს ხელი მიჭერილი.“ ცხადია, ის ვერ შეედრება აშშ-ის საზღვაო და საჰაერო ძალების ძალას, თუმცა მას მაინც შეუძლია, შეტევა განახორციელოს ბალისტიკური რაკეტებისა და დრონების არსენალით, რომელთა უმეტესობაც გამოქვაბულებში, მიწისქვეშეთში ან შორეულ მთის ფერდობებზეა გადამალული. აშშ-ის ბაზები და ობიექტები ყურის არაბულ მხარეს არის განლაგებული, ბაჰრეინსა და კატარში, მაგრამ ირანს აქვს არჩევანი - სარაკეტო თავდასხმები მიიტანოს ნებისმიერ მნიშვნელოვან ინფრასტრუქტურაზე ქვეყნებზე რომლებიც მისი აზრით, მონაწილეობდნენ აშშ-ის თავდასხმაში, მაგალითად - იორდანია. 2019 წელს Saudi Aramco-ს ნავთობქიმიურ ობიექტებზე გამანადგურებელი რაკეტებისა და დრონების თავდასხმამ, რომელიც ერაყში ირანის მიერ მხარდაჭერილ შეიარაღებულ ძალებს მიეწერებოდა, საუდის არაბეთის ხელისუფლებას აჩვენა, რამდენად დაუცველები იყვნენ ისინი ირანული რაკეტების წინაშე. ყურის არაბი მეზობლები, რომლებიც აშშ-ის მოკავშირეებად მიიჩნევიან, ამჟამად უკიდურესად შეშფოთებულნი არიან, რომ აშშ-ის ნებისმიერი სამხედრო მოქმედება საბოლოოდ, მათზე უარყოფით გავლენას მოახდენს. მეხუთე სცენარი - ირანი საპასუხოდ, სპარსეთის ყურეში ნაღმების დამონტაჟებას გეგმავს. ეს დიდი ხანია, განიხილებოდა, როგორც გლობალური გადაზიდვებისა და ნავთობის მომარაგების პოტენციური საფრთხე ირან-ერაყის 1980-88 წლების ომის შემდეგ, როდესაც ირანმა მართლაც დანაღმა საზღვაო მარშრუტები და სამეფო საზღვაო ძალების ნაღმმტყორცნებმა უზრუნველყვეს მათი გაწმენდა. ირანსა და ომანს შორის მდებარე ვიწრო ჰორმუზის სრუტე კრიტიკულ სასაზღვრო პუნქტს წარმოადგენს. ყოველწლიურად, ამ სრუტეში, მსოფლიოში თხევადი ბუნებრივი აირის (LNG) ექსპორტის დაახლოებით 20% და ნავთობისა და ნავთობის სუბპროდუქტების 20-25% გადის. ირანმა საზღვაო ნაღმების სწრაფი განლაგების წვრთნები ჩაატარა. თუ ის ამას გააკეთებს, ეს მსოფლიო ვაჭრობასა და ნავთობის ფასებზე გარდაუვლად იმოქმედებს. მეექვსე სცენარი - ირანმა საპასუხო რეაგირება მოახდინა და ამერიკული სამხედრო გემი ჩაძირა სპარსეთის ყურეში სამხედრო ხომალდზე მყოფმა აშშ-ის საზღვაო ძალების კაპიტანმა განგვიცხადა, რომ ირანიდან მომდინარე ერთ-ერთი საფრთხე, რომელიც მას ყველაზე მეტად აწუხებს, „ჯგუფური თავდასხმაა.“ მაგალითად, ირანი ერთ ან რამდენიმე სამიზნეზე უშვებს იმდენად ბევრ მაღალი დონის დენთიან დრონსა და სწრაფ „ტორპედოს“, რომ აშშ-ის საზღვაო ფლოტის ძლიერი ახლო დაცვის სისტემა ვერ ასწრებს მათ სრულ და დროულ განადგურებას. ირანის საზღვაო ეკიპაჟები თავისი მომზადების დროის დიდ ნაწილს უთმობენ არასტანდარტულ ან „ასიმეტრულ“ ომს; ეძებენ გზებს, როგორ დაძლიონ აშშ-ის ფლოტის ტექნიკური უპირატესობა, თუმცა ასეთი სცენარი ნაკლებად სავარაუდოა. მეშვიდეო სცენარი - რეჟიმის კოლაფსი და ქაოსი ეს რეალური საფრთხეა და ერთ-ერთი მთავარი შეშფოთების საგანია ისეთ მეზობელ ქვეყნებში, როგორიცაა, კატარი და საუდის არაბეთი. სამოქალაქო ომის შესაძლებლობასთან ერთად, როგორიც სირიას, იემენსა და ლიბიას ჰქონდათ, არსებობს რისკი, რომ ქაოსისა და დაბნეულობის პირობებში, ეთნიკური დაპირისპირებები შეიარაღებულ კონფლიქტში გადაიზარდოს, როცა ქურთები, ბალუჯები და სხვა უმცირესობები თავიანთი ხალხის დაცვის მიზნით იმოქმედებენ. ახლო აღმოსავლეთის ბევრ ქვეყანას სიხარულს მიანიჭებდა ისლამური რესპუბლიკის დასრულება, განსაკუთრებით, ისრაელს, რომელმაც რეგიონში ირანის მიერ მხარდაჭერილ ძალებს უკვე მძიმე დარტყმები მიაყენა და რომელსაც ირანის სავარაუდო ბირთვული პროგრამის გამო, ეგზისტენციალური საფრთხე ემუქრება. თუმცა არავის სურს, რომ მოსახლეობის რაოდენობით ყველაზე დიდი ქვეყანა ახლო აღმოსავლეთში [დაახლოებით 93 მილიონი ადამიანი] ქაოსში აღმოჩნდეს, რამაც შეიძლება, ჰუმანიტარული და ლტოლვილთა კრიზისი გამოიწვიოს.
რატომ შეიჭრა რუსეთი უკრაინაში
რატომ შეიჭრა რუსეთი უკრაინაში - წყარო BBC როდესაც რუსეთის პრეზიდენტმა ვლადიმერ პუტინმა, უკრაინაში 200 000-მდე ჯარისკაცის შეყვანის ბრძანება გასცა, მისი მიზანი იყო, რამდენიმე დღეში აეღო დედაქალაქი კიევი, მისი პროდასავლური მთავრობა დაემხო და უკრაინა რუსეთის გავლენის სფეროში დაებრუნებინა. პუტინმა ომს „სპეციალური სამხედრო ოპერაცია“ უწოდა. ოთხი წლის შემდეგ, უკრაინის ტერიტორიის მეხუთედი რუსეთის ხელშია. პუტინმა განაცხადა, რომ მისი მიზანი უკრაინის „დემილიტარიზაცია და დენაციფიკაცია“ იყო. რუსეთმა არაერთხელ წარმოაჩინა თანამედროვე უკრაინა ნაცისტურ სახელმწიფოდ, რაც ისტორიის უხეში დამახინჯებაა. პუტინმა უკრაინის ყირიმის ნახევარკუნძული, უკრაინაში შეჭრამდე რვა წლით ადრე დაიპყრო - რევოლუციის შემდეგ, რომლის შედეგადაც, უკრაინის პრორუსი პრეზიდენტი პროდასავლური მთავრობით ჩანაცვლდა. რუსეთის ლიდერი დიდი ხანია, ეჭვქვეშ აყენებს უკრაინის არსებობის უფლებას და აცხადებს, რომ „თანამედროვე უკრაინა მთლიანად რუსეთმა შექმნა“ 1917 წლის კომუნისტური რევოლუციის შემდეგ. 2021 წლის გრძელ ესეში მან თქვა, რომ მე-9 საუკუნის ბოლოდან მოყოლებული „რუსები და უკრაინელები ერთი ხალხია.“ 2024 წელს პუტინმა განაცხადა, რომ უკრაინა „ხელოვნური სახელმწიფო“ იყო. ამ კომენტარებმა ბევრი დაარწმუნა, რომ რუსეთის შეჭრის მიზანი ფაქტობრივად უკრაინის სახელმწიფოს განადგურება იყო. ზელენსკიმ მოგვიანებით განაცხადა, რომ პუტინმა თავდაპირველად სცადა მისი შეცვლა პრორუსული პარტიის მდიდარი ლიდერით, ვიქტორ მედვედჩუკით, რომელიც უკრაინაში ღალატში დაადანაშაულეს და ამჟამად რუსეთში იმყოფება. იყო თუ არა NATO-ს გაფართოება ომის მიზეზი? პუტინი წლების განმავლობაში უჩიოდა NATO-ს აღმოსავლეთისკენ გაფართოებას, როგორც უსაფრთხოების საფრთხეს და უკრაინის ალიანსში გაწევრიანების ნებისმიერ შესაძლებლობას მთავარ წითელ ხაზად მიიჩნევდა. 2022 წელს უკრაინაში შეჭრამდე მან მოითხოვა, რომ ალიანსს გაეყვანა მრავალეროვნული ძალები ცენტრალური და აღმოსავლეთ ევროპის იმ სახელმწიფოებიდან, რომლებიც დასავლეთის ალიანსს 1997 წლის შემდეგ შეუერთდნენ. მაგრამ სწორედ რუსეთმა დაიწყო სამხედრო მოქმედებები აღმოსავლეთ ევროპაში, როდესაც 2008 წელს შეიჭრა საქართველოში, შემდეგ კი, 2014 წელს - ყირიმში. ყირიმში შეჭრის შემდეგ, NATO-მ უწყვეტი ყოფნა უზრუნველყო თავის აღმოსავლეთ ფლანგზე - რუსეთთან ყველაზე ახლოს. NATO ყოველთვის ხაზს უსვამდა, რომ ალიანსის მთავარი მიზანი ტერიტორიების დაცვაა „აგრესიული განზრახვების გარეშე.“ შვედეთი და ფინეთი NATO-ში, ბოლო ორი წლის განმავლობაში სწორედ რუსული საფრთხის აღქმის გამო გაწევრიანდნენ. უკრაინის კონსტიტუციის ნაწილია ევროკავშირსა და NATO-ში გაწევრიანება, მაგრამ სრულმასშტაბიანი ომის დაწყებისას ამის რეალური პერსპექტივა არ არსებობდა. ვინ იგებს ომს? სამ წელზე მეტი ხნის განმავლობაში მიმდინარე შეტევებისა და კონტრშეტევების შემდეგ, რუსეთისა და უკრაინის ძალები 1000 კმ-ზე (629 მილი) მეტი მოცულობის აქტიურ ფრონტზე, „გამოფიტვის ომში“ არიან. არცერთ მხარეს არ აქვს ამ ომში გამარჯვების რეალური პერსპექტივა, თუმცა რუსეთი ზაფხულის შეტევის დროს, ტერიტორიულ მიღწევებს ცდილობს. რუსეთმა 2022 წელს ე.წ. რეფერენდუმების შემდეგ, აღმოსავლეთ და სამხრეთ უკრაინის ოთხი რეგიონის ანექსია მოახდინა, თუმცა რეალურად მხოლოდ ერთ-ერთ მათგანზე, ლუგანსკზე, სრული კონტროლის პრეტენზია აქვს. უკრაინულმა ძალებმა 2022 წელს ჩრდილოეთისა და სამხრეთის ნაწილის დიდი ტერიტორიების გათავისუფლება შეძლეს, მაგრამ ბოლოდროინდელმა კონტრშეტევებმა იგივე წარმატება ვერ მოიტანა. ისინი 2024 წლის აგვისტოში შეტევის დაწყების შემდეგაც აქტიურად რჩებიან რუსეთის კურსკის რეგიონის ძალიან მცირე ნაწილში, მაგრამ იქ არსებულ ყველა ძირითად დასახლებაზე კონტროლი დაკარგეს. უკრაინულმა ჯარებმა პოზიციები აღმოსავლეთშიც დაკარგეს. როგორ შეიძლება ომის დასრულება? ყველაზე სავარაუდო გზა პირდაპირი მოლაპარაკებებია, თუმცა ორ მხარეს შორის მოლაპარაკებების წინა რაუნდების შედეგად, ცეცხლის შეწყვეტის შესახებ მცირე პროგრესი დაფიქსირდა. რუსეთს პირდაპირი მოლაპარაკებები „კონფლიქტის ძირითადი მიზეზების“ მოსაგვარებლად სურს - ფრაზა, რომელიც პუტინის „მაქსიმალისტურ“ მოთხოვნებს მოგვაგონებს ჯერ კიდევ 2022 წლის მარტში, ომის დაწყებისას. პუტინის მოთხოვნები უკრაინის ნეიტრალურ სახელმწიფოდ გადაქცევა, სამხედრო ძალების მკვეთრად შემცირება და NATO-სკენ მისწრაფებების უარყოფას მოიცავს. რუსეთი ასევე ითხოვს, რომ უკრაინაში მისი ტერიტორიული მიღწევების საერთაშორისო აღიარება აისახოს ნებისმიერ მომავალ შეთანხმებაში, მათ შორის, ყირიმისა და აღმოსავლეთის ოთხი რეგიონის ანექსიაში. ის ასევე ითხოვს საპრეზიდენტო და საპარლამენტო არჩევნების დაუყოვნებლივ დანიშვნას. კიევი არასდროს აღიარებს თავის სუვერენულ ტერიტორიას რუსეთის ნაწილად, მაშინაც, თუკი შესაძლებელია, რომ აღიაროს ტერიტორიების დროებით დაკარგვა. კიევი ასევე ისწრაფვის დასავლეთის უსაფრთხოების გარანტიებისკენ, რათა უზრუნველყოს, რომ რუსეთი აღარასდროს შეიჭრება მის ტერიტორიაზე. რა ისტორიული კავშირებია უკრაინასა და რუსეთს შორის? როგორც ჩანს, პუტინი თვლის, რომ უკრაინა რუსეთის გავლენის სფეროში უნდა დარჩეს ორ ქვეყანას შორის არსებული ისტორიული კავშირების გამო. 1922 წლიდან 1991 წლამდე უკრაინა საბჭოთა კავშირის ნაწილი იყო და ბევრი უკრაინელი რუსულად საუბრობს, განსაკუთრებით, აღმოსავლეთში, მათ შორის არის ვოლოდიმირ ზელენსკიც. ბევრი რუსი ყირიმს საკუთრებად მიიჩნევს. ის ეკატერინე დიდმა 1783 წელს მიიერთა და საბჭოთა ლიდერმა ხრუშჩოვმა უკრაინას 1954 წელს გადასცა. ათი წლით ადრე, მისმა წინამორბედმა სტალინმა ყირიმის თათარი მოსახლეობის დეპორტაცია მოახდინა, ამიტომ, მოსახლეობის უმრავლესობა ეთნიკური რუსები იყვნენ. 1991 წლიდან უკრაინა დამოუკიდებელი სახელმწიფოა. მან ბირთვულ იარაღზე 1994 წელს თქვა უარი რუსეთის, დიდი ბრიტანეთის და აშშ-ის მიერ გარანტირებული უსაფრთხოების სანაცვლოდ. ომის შემდეგ, ბევრმა უკრაინელმა რუსულად საუბარზე უარი თქვა და თავად ზელენსკიც ამ ენის საჯაროდ გამოყენებას თავს არიდებს. განხილვის საგანია, „ვინ აფერხებს უკრაინის სამშვიდობო შეთანხმებას“
აშშ და ისრაელი „უსასრულო ომს“ გამორიცხავენ
აშშ-ის სახელმწიფო მდივნის მარკო რუბიოს განცხადებით, ტრამპის ადმინისტრაცია მიიჩნევს, რომ ირანის წინააღმდეგ ოპერაციის მიზნების მიღწევა „შესაძლებელია სახმელეთო ძალების გარეშე.“ რუბიოს თქმით, „ყველაზე მძიმე დარტყმები ჯერ კიდევ წინ არის.“ „ამჟამად ჩვენ არ ვართ მზად სახმელეთო ძალებისთვის, მაგრამ ცხადია, პრეზიდენტს ეს ვარიანტები აქვს,“ - განუცხადა მან ჟურნალისტებს და დასძინა: „ის არასდროს არაფერს გამორიცხავს.“ მისივე თქმით, ამჟამად, აშშ-ის ყურადღება ირანის ბალისტიკური რაკეტების გამშვები მოწყობილობების, ბალისტიკური რაკეტების მარაგებისა და ბალისტიკური რაკეტების წარმოების შესაძლებლობების, ასევე, მათი ცალმხრივი თავდასხმის დრონებისა და საზღვაო ფლოტის განადგურებაზეა ორიენტირებული. „მე არ ვაპირებ ჩვენი ტაქტიკური ძალისხმევის დეტალების გამხელას, მაგრამ ყველაზე მძიმე დარტყმები ჯერ კიდევ წინ არის. შემდეგი ფაზა ირანისთვის კიდევ უფრო სადამსჯელო იქნება, ვიდრე ახლაა,“ - განაცხადა რუბიომ. დონალდ ტრამპის თქმით, აშშ-ს იარაღის საკმარისი მარაგი აქვს სამუდამო ომისთვის და დიდი გამარჯვებისთვის მზად არის. „ჩვენ ამ იარაღის პრაქტიკულად შეუზღუდავი მარაგი გვაქვს. შეერთებული შტატები მომარაგებულია და დიდი გამარჯვებისთვის მზად არის,“ – წერს ტრამპი სოციალურ ქსელში. თავის მხრივ, ჯეი დი ვენსის თქმით, დონალდ ტრამპი არ დაუშვებს, აშშ მრავალწლიან კონფლიქტში ჩაერთოს: „არ ვაპირებთ, იმ პრობლემებში აღმოვჩნდეთ, რაც ერაყსა და ავღანეთში გვქონდა.“ ვენსის თქმით, პრეზიდენტს ერთი მკაფიო მიზანი აქვს, რათა დარწმუნდეს, რომ ირანს არასდროს ექნება ბირთვული იარაღი. აშშ-ის ვიცე-პრეზიდენტმა აღნიშნა, რომ ირანის ბირთვული ობიექტები არ შენდება მხოლოდ სამშვიდობო მიზნით გამოსაყენებლად, „როგორც რეჟიმი აცხადებს“, არამედ, ისინი აგებულია ბირთვული იარაღის შესაქმნელად. ისრაელის პრემიერ-მინისტრი ბენიამინ ნეთანიაჰუც არ იზიარებს მოსაზრებას, რომ ახლო აღმოსავლეთში მიმდინარე კონფლიქტი უსასრულო ომში გადაიზრდება. „ეს არ არის უსასრულო ომი. სინამდვილეში, ეს არის ის, რაც მშვიდობის ეპოქას დაამკვიდრებს, რომელზეც არც კი გვიოცნებია,“ - აღნიშნა ისრაელის პრემიერმა Fox News-თან ინტერვიუში. ნეთანიაჰუს განცხადებით, ირანზე თავდასხმა სასწრაფოდ აუცილებელი იყო, რადგან ის აშენებდა ახალ მიწისქვეშა ობიექტებს, რათა თავისი სარაკეტო და ბირთვული პროგრამები თავდასხმებისგან დაეცვა. ისრაელმა ირანზე „შეტევის ახალი ტალღა“ დაიწყო, აშშ ყველაზე მძიმე დარტყმებს აანონსებს
ტრამპი ირანზე დარტყმებზე: "ტერორისტულ რეჟიმს არასოდეს ექნება ბირთვული იარაღი”
აშშ-ის პრეზიდენტი, დონალდ ტრამპი სოციალურ ქსელ Truth-ში გამოქვეყნებულ ვიდეომიმართვაში აცხადებს, რომ “აშშ-მა ირანში მასშტაბური სამხედრო ოპერაცია დაიწყო“ და რომ მისი მესიჯი მარტივია „ამ ტერორისტულ რეჟიმს არასოდეს ექნება ბირთვული იარაღი“. ტრამპის თქმით, აშშ გაანადგურებს ირანის რეჟიმის სამხედრო შესაძლებლობებს. ირანის საგარეო საქმეთა მინისტრი აცხადებს, რომ აშშ-ისრაელის დარტყმები „სრულიად არაპროვოცირებული, უკანონო და არალეგიტიმურია." X-ზე გამოქვეყნებულ პოსტში ის ამბობს, ირანის ძლიერი შეიარაღებული ძალები „მზად არიან ამ დღისთვის და აგრესორებს იმ გაკვეთილს ასწავლიან, რასაც იმსახურებენ." ადგილობრივმა ოფიციალურმა პირმა სახელმწიფო საინფორმაციო სააგენტო IRNA-ს განუცხადა, რომ 28 თებერვალს, ირანის სამხრეთით, ჰორმოზგანის პროვინციაში, მინაბის ოლქში, გოგონების დაწყებით სკოლაზე ისრაელის მიერ განხორციელებული დარტყმის შედეგად, 40 ადამიანი დაიღუპა. გუბერნატორმა მოჰამედ რადმერმა განაცხადა, რომ კიდევ 48 ადამიანი დაიჭრა და სკოლაზე თავდასხმის შედეგად დაღუპულთა რიცხვი იზრდება. BBC წერს, რომ ამ ნათქვამის დამოუკიდებლად გადამოწმება არ შეუძლია - საერთაშორისო საინფორმაციო ორგანიზაციებს ხშირად უარს ეუბნებიან ირანში ვიზების გაცემაზე, რაც მნიშვნელოვნად ზღუდავს მათ შესაძლებლობას, შეაგროვონ ინფორმაცია ქვეყნის შიგნით მიმდინარე მოვლენების შესახებ. გარდა ამისა, ირანში „თითქმის სრულადაა" ინტერნეტი გათიშული. ახლო აღმოსავლეთში ირანის საპასუხო დარტყმების ამსახველი ვიდეოები ვრცელდება. რეგიონში აშშ-ის საჰაერო ბაზებია განლაგებული, რომლებიც სავარაუდო სამიზნეებია. ბაჰრეინი ყურის რამდენიმე ქვეყნიდან ერთ-ერთია, რომელიც დაბომბეს. ერთ-ერთ დადასტურებულ ვიდეოში, რომელიც მოძრავი მანქანიდან არის გადაღებული, ნაჩვენებია რაკეტის დარტყმის მომენტი. აფეთქების შედეგად, ფრაგმენტები და ნამსხვრევები ჰაერში იშლება. ბაჰრეინის ეროვნული საკომუნიკაციო ცენტრი აცხადებს, რომ აშშ-ის საზღვაო ძალების მეხუთე ფლოტის მომსახურების ცენტრი „სარაკეტო თავდასხმის მსხვერპლი გახდა." ის პასუხისმგებელია ყურეში, წითელ ზღვაში, არაბეთის ზღვასა და ინდოეთის ოკეანის ნაწილებში ოპერაციებზე. ბაჰრეინიდან გადაღებულ სხვა დადასტურებულ ვიდეოებში ჩანს კვამლის შედეგად გამოწვეული მუქი ღრუბლები, ქალაქში სირენების ხმა ისმის. "ისლამური რევოლუციის გუშაგთა კორპუსთან" აფილირებულმა საინფორმაციო სააგენტო „ტასნიმმა“ დაწერა, რომ „რეგიონში აშშ-ის ყველა ბაზა და ინტერესი ირანის რაკეტების სამიზნე გახდა." "კატარი, არაბთა გაერთიანებული საამიროები, ქუვეითი, ბაჰრეინი და იორდანია აცხადებენ, რომ ირანიდან მათ ტერიტორიაზე აშშ-ის სამხედრო ბაზების მიმართულებით გაშვებულ რაკეტებს აკავებენ. ზოგიერთმა მათგანმა განაცხადა, რომ იტოვებს უფლებას, უპასუხოს, მაგრამ თითქმის დანამდვილებით შეიძლება ითქვას, რომ ამ ნაბიჯს ძალიან ფრთხილად გათვლიან. სწორედ ეს არის შედეგი, რომლის თავიდან ასაცილებლადაც რეგიონის ლიდერები ბოლო კვირების განმავლობაში ძალიან ბევრს მუშაობდნენ და ირანსა და შეერთებულ შტატებს შორის შუამავლობას ცდილობდნენ. ახლა უკვე ნათელია, რომ ტრამპის ადმინისტრაციამ ისრაელის რჩევა მიიღო და არა მისი არაბი მოკავშირეების. არაბები შეშფოთებულნი არიან, რომ აშშ-სა და ისრაელის საჰაერო დარტყმები რეგიონის დესტაბილიზაციას გამოიწვევს და ომში ჩაითრევს მას. ისინი შიშობენ, რომ ირანს შეუძლია არამხოლოდ აშშ-ის სამიზნეებზე თავდასხმა მათ ტერიტორიაზე, არამედ, ინფრასტრუქტურაზეც, როგორიცაა გაზისა და ნავთობის ობიექტები, ან შესაძლოა, ჰორმუზის სრუტე დახუროს, რომლის გავლითაც ნავთობის ექსპორტი ხორციელდება. უარეს შემთხვევაში, ისინი წუხან, რომ ირანის სახელმწიფო შეიძლება, დაიშალოს, რაც გამოიწვევს ლტოლვილებისა და იარაღის ნაკადს მათ საზღვრებზე, განსაკუთრებით, იმის გათვალისწინებით, რომ ტრამპმა ნათლად განაცხადა, რომ ოპერაციის მიზანი რეჟიმის შეცვლაა," წერს BBC. არაბთა გაერთიანებულ საამიროებში აცხადებენ, რომ ირანული რაკეტის განეიტრალების შედეგად, ჩამოცვენილი ნამსხვრევებით ერთი ადამიანი დაიღუპა.
ვინ არის მოჯთაბა ხამენეი, ირანის ახალი უზენაესი ლიდერი
ირანის სახელმწიფო მედიის ცნობით, ირანის უზენაეს ლიდერად აითოლა ალი ხამენეის ვაჟი დასახელდა. აითოლა ალი ხამენეის ვაჟი მოჯთაბა ხამენეი, 56 წლის სასულიერო პირია, რომელსაც არასდროს ეკავა სამთავრობო თანამდებობა. მამისგან განსხვავებით, 56 წლის ხამენეის არც საჯარო გამოსვლები ჰქონია და არც ინტერვიუები მიუცია - მისი ფოტოებისა და ვიდეოების მხოლოდ შეზღუდული რაოდენობა გამოქვეყნდა. თუმცა წლების განმავლობაში ვრცელდებოდა სხვადასხვა ცნობა, რომ მას ირანის კულისებში მნიშვნელოვანი გავლენა ჰქონდა. „WikiLeaks-მა 2000-იანი წლების ბოლოს გამოაქვეყნა მასალა, სადაც მას მოიხსენიებდნენ, როგორც „მოსასხამის მიდგმა მდგომ ძალად“, რომელიც ფართოდ ითვლებოდა „რეჟიმის „უნარიან და ძლიერ“ ფიგურად,“ - წერს AP. მოჯთაბა ხამენეი, რომელიც 1969 წლის 8 სექტემბერს, ჩრდილო-აღმოსავლეთ ქალაქ მაშჰადში დაიბადა, ალი ხამენეის ექვსი შვილიდან მეორეა. მან საშუალო განათლება თეირანის რელიგიურ სკოლაში მიიღო. ირანული მედიის ცნობით, 17 წლის ასაკში მოჯთაბა ხამენეი ირან-ერაყის ომის დროს მოკლე პერიოდის განმავლობაში მსახურობდა ჯარში. 1999 წელს გაემგზავრა ყუმში, წმინდა ქალაქში, რომელიც შიიტური თეოლოგიის მნიშვნელოვან ცენტრად ითვლება. აღსანიშნავია, რომ მანამდე ის სასულიერო ტანსაცმელს არ ატარებდა და გაურკვეველია, თუ რატომ გადაწყვიტა 30 წლის ასაკში სემინარიაში სიარული, რადგან ეს უფრო ხშირად ახალგაზრდობაში ხდება. მოჯთაბა საშუალო რანგის სასულიერო პირად რჩება, რამაც შეიძლება, დაბრკოლება შეუქმნას მის ახლანდელ ლიდერობას. მოჯთაბა ხამენეი რამდენიმეჯერ დაადანაშაულეს პოლიტიკური ჩარევაში — 2005-ში არჩევნებში და 2009-ში, როდესაც მათი მხარდაჭერა აჰმადინეჟადის ხელახლა არჩევას დაემთხვა, რასაც მასობრივი პროტესტები (მწვანე მოძრაობა) მოჰყვა. სემინარიულ სისტემაში „აიათოლას“ წოდების ქონა ადამიანის სამეცნიერო დონის, ცოდნის მაჩვენებლებად ითვლება და მომავალი ლიდერისთვის ერთ-ერთ მოთხოვნად და წინაპირობად ითვლება. თუმცა ამის პრეცედენტი უკვე არსებობს. მისი მამა, ალი ხამენეი, 1989 წელს ირანის მეორე უზენაესი ლიდერი გახდა და სწრაფადაც დააწინაურეს. ცნობისთვის, ირანის უზენაეს ლიდერს სახელმწიფოს ყველა საკითხში საბოლოო სიტყვა ეკუთვნის. გადაწყვეტილებას დანიშვნის შესახებ საბჭოს 88 წევრი იღებს. ირანის უზენაესი ლიდერი, აიათოლა ალი ხამენეი შაბათს, 28 თებერვალს, ირანზე აშშ-ისრაელის პირველი დარტყმების დროს დაიღუპა. მისი სიკვდილის შემდეგ ირანს დროებით მართავს საბჭო, რომლის შემადგენლობაში პრეზიდენტ მასუდ ფეზეშქიანთან ერთად არიან სასამართლო ხელისუფლების მეთაური და „კონსტიტუციის გუშაგთა“ საბჭოს ერთ-ერთი წევრი. ალი ხამენეი ისლამური რესპუბლიკის უზენაესი ლიდერი იყო 1989 წლიდან. ისლამური რესპუბლიკა 1979 წელს მონარქიის დამხობის შემდეგ დაარსდა და მისი იდეოლოგიის მიხედვით, უზენაესი ლიდერი უნდა შეირჩეს მისი რელიგიური სტატუსისა და დადასტურებულად ლიდერული უნარების მიხედვით და არა - მემკვიდრეობით. თავისი მმართველობის დროს ალი ხამენეი ისლამური რესპუბლიკის მომავალ ლიდერობაზე მხოლოდ ზოგადად საუბრობდა. ექსპერტთა საბჭოს ერთ-ერთმა წევრმა ორი წლის წინ განაცხადა, რომ ალი ხამენეი ეწინააღმდეგებოდა მისი შვილის კანდიდატობას, თუმცა მას საჯაროდ არასდროს გამოუთქვამს აზრი ასეთ სპეკულაციებზე.
ამერიკული მხარე აცხადებს, რომ ცეცხლის შეწყვეტის შეთანხმება ლიბანს არ მოიცავს
აშშ-ის ვიცე-პრეზიდენტის ჯეი დი ვენსის განცხადებით, შეერთებულ შტატებს არასდროს უთქვამს, რომ ცეცხლის შეწყვეტის ნაწილი იყო ლიბანი. ვენსმა ჟურნალისტებს განუცხადა, რომ თუ ისრაელი ლიბანთან დაკავშირებით შენელდება, ეს მოხდება არა იმიტომ, რომ ეს ცეცხლის შეწყვეტის პირობაა, არამედ - ისრაელის კეთილსინდისიერებით შეერთებული შტატების მიმართ, ასევე, ირანთან მოლაპარაკებების „წარმატების“ სურვილით. „შეხედეთ, თუ ირანს სურს, რომ ეს მოლაპარაკებები ჩაიშალოს კონფლიქტში, ლიბანის გამო - რასაც მათთან არაფერი აქვს საერთო - შეერთებულ შტატებს არასდროს უთქვამს, რომ ცეცხლის შეწყვეტის ნაწილი იყო, ეს საბოლოო ჯამში, მათი არჩევანია,“ - აღნიშნა ვენსმა. მისი შეფასებით, ირანთან „ლეგიტიმური გაუგებრობა“ მოხდა, რომელმაც, შეცდომით გაიგო, რომ ლიბანი ცეცხლის შეწყვეტის შეთანხმებაში იქნებოდა. „ვფიქრობ, ირანელები ფიქრობდნენ, რომ ცეცხლის შეწყვეტა ლიბანსაც მოიცავდა და ეს ასე არ მოხდა. ჩვენ არასდროს მიგვიცია ეს დაპირება. ჩვენ არასდროს მიგვითითებია, რომ ასე მოხდებოდა,“ - აღნიშნა ვენსმა. "ჩვენ ვთქვით, რომ ცეცხლის შეწყვეტა ირანზე იქნებოდა ორიენტირებული, ის ამერიკის მოკავშირეებზე როგორც ისრაელზე, ასევე, სპარსეთის ყურის არაბულ სახელმწიფოებზე იქნებოდა ორიენტირებული,“ - განაცხადა აშშ-ის ვიცე-პრეზიდენტმა. მისივე განცხადებით, აშშ არ დაიცავს ცეცხლის შეწყვეტის შეთანხმებას, თუ ირანი არ გახსნის ჰორმუზის სრუტეს. ისრაელის პრემიერ-მინისტრ ბენიამინ ნეთანიაჰუს თქმით, დარჩენილ მიზნებს ისრაელი ან შეთანხმების მეშვეობით ან ომის განახლებით მიაღწევს. "ჰეზბოლას გამო. შეთანხმება მათ არ მოიცავს. ესეც მოგვარდება. ყველაფერი რიგზეა," - თქვა თავის მხრივ, ტრამპმა. "ეს შეთანხმების ნაწილია, ყველამ იცის ეს. ეს განცალკევებული დაპირისპირებაა." - განაცხადა აშშ-ის პრეზიდენტმა, როდესაც უპასუხა შეკითხვას, მიესალმება თუ არა ისრაელის იერიშებს.
რაზე ისაუბრეს ტრამპმა და ერდოღანმა
თურქეთის კომუნიკაციების დეპარტამენტის ცნობით, ოთხშაბათს, თურქეთის პრეზიდენტმა რეჯეფ თაიფ ერდოღანმა სატელეფონო საუბარი გამართა აშშ-ის პრეზიდენტ დონალდ ტრამპთან. მხარეებმა ირან-აშშ-ს შორის მიღწეული ცეცხლის შეწყვეტის შესახებ შეთანხმება და რეგიონში არსებული უფრო ფართო მოვლენები განიხილეს. თურქული სოციალური მედიის პლატფორმა NSosyal-ზე გავრცელებული განცხადებით, ორმა ლიდერმა განიხილა რეგიონში არსებული უახლესი ვითარება, განსაკუთრებული ყურადღება სამშაბათს ღამით გამოცხადებულ ცეცხლის შეწყვეტაზე გამახვილდა. ერდოღანმა კმაყოფილება გამოთქვა ზავით და აღნიშნა, რომ 40-დღიანი რთული პერიოდის შემდეგ, ორკვირიანი ფანჯარა მნიშვნელოვან შესაძლებლობას იძლევა მუდმივი სამშვიდობო შეთანხმებისკენ წინსვლისთვის. მან ხაზი გაუსვა ამ პერიოდის ეფექტიანად გამოყენების აუცილებლობას. თურქეთის პრეზიდენტმა ასევე ხაზგასმით აღნიშნა, რომ თურქეთი გააგრძელებს მხარდაჭერას მეგობარ და მოძმე ქვეყნებთან, განსაკუთრებით პაკისტანთან, დიპლომატიური ძალისხმევისთვის, რომელიც მიზნად ისახავს კონფლიქტის მოგვარებას. როგორც ცნობილია, თურქეთმა ირანს ჰუმანიტარული დახმარება გაუგზავნა, რომელიც მედიკამენტებსა და სამედიცინო აღჭურვილობას მოიცავდა. ამის შესახებ თურქეთის ჯანდაცვის მინისტრმა ქემალ მემისოღლუმ განაცხადა. მინისტრის თქმით, სამედიცინო მარაგებით, მათ შორის, ფარმაცევტული საშუალებებითა და სამედიცინო აღჭურვილობით დატვირთული სატვირთო მანქანები უკვე ირანისკენ გაემგზავრნენ.
ირანში კონფლიქტის დაწყების შემდეგ, ევროკავშირში ნავთობი და გაზი 60-70%-ით გაძვირდა
გლობალურ ენერგეტიკულ ბაზარზე ბოლო დროს განვითარებულმა მოვლენებმა, ნავთობისა და გაზის ფასები მნიშვნელოვნად გაზარდა მთელ ევროპაში, რაც ირანში მიმდინარე კონფლიქტმა კიდევ უფრო გაამწვავა. ენერგეტიკის საკითხებში ევროკომისარმა დან იორგენსენმა მიანიშნა, რომ ეს გაზრდილი ფასები უახლოეს მომავალში, თუნდაც დაუყოვნებლივი სამშვიდობო შეთანხმების მიღწევის შემთხვევაშიც კი, ნაკლებად სავარაუდოა, რომ დასტაბილურდეს. კომისარმა იორგენსენმა განაცხადა, რომ მიუხედავად იმისა, რომ 27 წევრისგან შემდგარი ბლოკი ამჟამად ნავთობისა და გაზის დაუყოვნებლივ დეფიციტს არ აწყდება, დიზელისა და საავიაციო საწვავის მიწოდებაზე მნიშვნელოვანი ზეწოლაა. გარდა ამისა, მან მიუთითა გლობალურ გაზის ბაზრებზე შეზღუდვების გამკაცრებაზე, რაც ხელს უწყობს ელექტროენერგიაზე ფასების ზრდას. იორგენსენის თქმით, იმპორტირებული წიაღისეული საწვავის ღირებულება ომის დაწყებიდან 14 მილიარდი ევროთი გაიზარდა. მისი თქმით, ევროკავშირის აღმასრულებელი შტო ამზადებს რიგ ზომებს, რათა დაეხმაროს ოჯახებსა და ბიზნესებს ნავთობის ფასების მკვეთრ ზრდასთან გამკლავებაში, როცა ევროპაში გაზის ფასები დაახლოებით 70%-ით და ნავთობის ფასების 60%-ით გაიზარდა. იორგენსენის თქმით, ომის დაწყებიდან მოყოლებული, ევროკავშირის მიერ იმპორტირებული წიაღისეული საწვავის ხარჯები 14 მილიარდი ევროთი გაიზარდა. ენერგობაზრებზე შექმნილი კრიზისის გამო, ევროკომისია ევროკავშირის წევრ სახელმწიფოებს მოუწოდებს, განიხილონ საერთაშორისო ენერგეტიკული სააგენტოს მიერ შემუშავებული ეკონომიის გეგმაც. ამ გეგმის ათ პუნქტს შორისაა დიდ ქალაქებში ავტომობილების როტაციით მოძრაობა, პირადი ავტომანქანის ნაცვლად საზოგადოებრივი ტრანსპორტით სარგებლობა, შეძლებისდაგვარად უარის თქმა თვითმფრინავით მგზავრობაზე, სახლიდან დისტანციურად მუშაობა და ა.შ. ცნობისთვის, ენერგობაზარზე შექმნილი კრიზისის გამო შეერთებულმა შტატებმა სანქციები დროებით მოუხსნა რუსული და ირანული ნავთობის ნაწილს. 28 თებერვალს შეერთებულმა შტატებმა და ისრაელმა ირანის წინააღმდეგ „მასშტაბური სამხედრო ოპერაცია“ დაიწყეს. საპასუხოდ, სპარსეთის ყურეში აშშ-ის პარტნიორი ქვეყნები ირანის მხრიდან დრონებით და რაკეტებით შეტევის სამიზნედ იქცნენ.
მინისტრის თქმით, ანაკლიის პორტის ტერიტორიაზე აქტიური სამშენებლო სამუშაო უახლოეს დღეებში დაიწყება
ანაკლიის ღრმაწყლოვანი პორტის სამშენებლო სამუშაოს ჯამური ღირებულება 52 მლნ დოლარით შემცირდა. ეკონომიკისა და მდგრადი განვითარების მინისტრის განცხადებით, ანაკლიის ღრმაწყლოვანი პორტის პროექტის ოპტიმიზაციის შედეგად, 52 მილიონი დოლარის დაზოგვა გახდა შესაძლებელი, ხოლო უახლოეს დღეებში პორტის ტერიტორიაზე აქტიური სამშენებლო სამუშაო დაიწყება. „ანაკლიის ღრმაწყლოვანი პორტის მშენებლობას ჩვენი ქვეყნისთვის სტრატეგიული მნიშვნელობა აქვს, განსაკუთრებით კი, შუა დერეფნის კონტექსტში. გასული თვეების განმავლობაში ჩვენ დეტალურად შევისწავლეთ არსებული გენგეგმა და აქტიურად ვიმუშავეთ კონტრაქტორ კომპანიებთან, რის შედეგადაც სამშენებლო სამუშაოს ჯამური ღირებულება 52 მილიონი დოლარით შემცირდა. დავასრულეთ სამშენებლო-სამობილიზაციო სამუშაოები და უახლოეს რამდენიმე დღის განმავლობაში უშუალოდ ანაკლიის ტერიტორიაზე დაიწყება აქტიური სამშენებლო სამუშაოები,“ – აცხადებს მარიამ ქვრივიშვილი. ანაკლიის ღრმაწყლოვანი ნავსადგურის საზღვაო ინფრასტრუქტურის პროექტირება/მშენებლობის ტენდერში ბელგიურმა Jan De Nul-მა გაიმარჯვა
გიგა ავალიანის საქმეზე ბრალდებულების განაჩენი ცნობილია
გიგა ავალიანის საქმეზე მსჯავრდებულ ორ არასრულწლოვანს - ალექსანდრე გაბაშვილსა და გიორგი რიკაძეს 14-14 წლით თავისუფლების აღკვეთა მიესაჯათ. დემეტრე ჩიქოვანს 9 წლით თავისუფლების აღკვეთა განესაზღვა. ხსენებული გადაწყვეტილება მოსამართლე რომეო ტყეშელაშვილმა გამოიტანა. „სინანული რომ ახალგაზრდა ადამიანი გიგა ავალიანი არასრუწლოვანი ბრალდებულების ქმედებით დაიღუპა, არ არის… ერთი სიტყვა მომხდართან დაკავშირებით არ მომისმენია, სინანული არის იმაზე, რომ ციხეში არიან და არა იმაზე, რაც მოხდა. მობილური ტელეფონით გადაიღეს, სასწრაფოში არ დაურეკავთ ამ ტელეფონით, მიზანი იყო ადამიანი რომელიც დააზიანეს, გადაეღოთ… ყოველივე ეს სისასტიკეზე მიუთითებს და არანაირი სინანული ქმედების დროს, სასამართლოს განმავლობაში და დასკვნით სიტყვაში არ მოგვისმენია… მოვისმინეთ ბევრი შეურაცხმყოფელი დაზარალებულის ოჯახის მიმართ…მოვისმინეთ, რომ ერთ-ერთი შესვენების დროს დაზარალებულის ოჯახის წევრებს თვალებს უქაჩავენ და ასეთ ქმედებებს ჰქონდა ადგილი... სასჯელი, რომელსაც გამოვაცხადებ, იქნება დამაფიქრებელი ყველა იმ მერყევი ელემენტისთვის, რომელსაც აგრესია ნორმად მიაჩნია. მოკვდინება მხოლოდ ფიზიკურად არ ხდება, სიტყვითაც ხდება და იმედია, ამას გაითვალისწინებენ სოციალურ ქსელში თუ სხვაგან,“ - განაცხადა რომეო ტყეშელაშვილმა სხდომაზე. არასრულწლოვანთა მართლმსაჯულების კოდექსის თანახმად, მსჯავრდებულებს სასჯელი 1/4-ით შეუმცირდათ, შესაბამისად, გაბაშვილი და რიკაძე პენიტენციურ დაწესებულებაში 10 წელსა 6 თვეს მოიხდიან, დემეტრე ჩიქოვანი კი, 6 წელსა და 9 თვეს. მოსამართლე რომეო ტყეშელაშვილმა ალექსანდრე გაბაშვილი და გიორგი რიკაძე ბრალად წარდგენილ ორივე მუხლში, დემეტრე ჩიქოვანი კი ერთი მუხლის ორ ნაწილში დამნაშავედ 4 აპრილს ცნო. კერძოდ კი, ჯანმრთელობის განზრახ მძიმე დაზიანებაში ჯგუფურად, რასაც გარდაცვალება მოჰყვა, ასევე, ჯგუფური ძალადობის ორგანიზებასა და მონაწილეობაში. სასჯელის განსაზღვრის სხდომას ალექსანდრე გაბაშვილი და დემეტრე ჩიქაოვანი ესწრებოდნენ, გიორგი რიკაძემ კი სხდომაზე გამოცხადებაზე უარი განაცხადა. მსჯავრდებულები დუმილის უფლებით სარგებლობენ. პროკურორი ქეთევან სონიძე აცხადებს, რომ გიგა ავალიანის გარდაცვალების საქმეში ბრალდებული არასრულწოვნების მიმართ სასამართლოს დღევანდელი გადაწყვეტილება „სამაგალითოდ იქცევა ქართული მართლმსაჯულების“ სისტემაში. ავალიანის დედა ამ განაჩენით კმაყოფილია. „მოსამართლე რომეო ტყეშელაშვილმა შემიმსუბუქა დღეს ჩემი მდგომარეობა თავის ბოლო ნაწილში... ველოდები სასჯელს, რადგან ესენი არიან პირსისხლიანები... ჩემთვის მნიშვნელოვანი იყო ის, სადაც მან ისაუბრა გიგა ავალიანის სისპეტაკეზე... გიგას წაართვეს სხეული, ნიკას [მეორე შვილს] წაართვეს სული და ჩააყოლეს სამარეში - მე ორ შვილს ვტიროდი. მე უნდა მებრძოლა ჩემი შვილის ღირსებისთვის. მადლობა რომეო ტყეშელაშვილს!“ - თქვა ეკა კუპატაძემ. ცნობისთვის, ალექსანდრე გაბაშვილსა და გიორგი რიკაძეს ბრალდება სისხლის სამართლის კოდექსის 117-ე მუხლის მეოთხე ნაწილით ჰქონდათ წარდგენილი, რაც ჯანმრთელობის განზრახ მძიმე დაზიანებას გულისხმობს ჯგუფურად, რასაც გარდაცვალება მოჰყვა. დემეტრე ჩიქოვანს, ალექსანდრე გაბაშვილსა და გიორგი რიკაძეს ასევე ბრალდება წარდგენილი ჰქონდათ "დიდი დიღმის" ეპიზოდზეც სისხლის სამართლის კოდექსის 225-ე მუხლის 1-ელი და მეორე ნაწილით, რაც ჯგუფური ძალადობის ორგანიზებას და მასში მონაწილეობას გულისხმობს.
ტრამპი: თანახმა ვარ, ორი კვირით შევაჩერო ირანის დაბომბვა, ეს იქნება ორმხრივი ცეცხლის შეწყვეტა
აშშ-სა და ირანს შორის მოლაპარაკებები გრძელვადიანი მშვიდობის მისაღწევად, 10 აპრილს უნდა დაიწყოს პაკისტანის დედაქალაქ ისლამაბადში. შეერთებული შტატები და ირანი საბრძოლო მოქმედებების ორი კვირით შეწყვეტას და ჰორმუზის სრუტის გახსნას 7 აპრილს დათანხმდნენ პაკისტანის შუამავლობით. აშშ-ის პრეზიდენტმა დონალდ ტრამპმა გამოაცხადა, რომ დათანხმდა, „ირანის დაბომბვა და თავდასხმა ორი კვირით შეაჩეროს“. დონალდ ტრამპის განცხადებით, ჰორმუზის სრუტის გახსნის პირობით, ირანთან ორკვირიან ცეცხლის შეწყვეტას დათანხმდა. „პაკისტანის პრემიერ-მინისტრ შეჰბაზ შარიფთან და ფელდმარშალ ასიმ მუნირთან საუბრების საფუძველზე, სადაც მათ მოითხოვეს, რომ ირანში გაგზავნილი დამანგრეველი ძალები შევაჩერო იმ პირობით, რომ ირანის ისლამური რესპუბლიკა დათანხმდება ჰორმუზის სრუტის სრულ, დაუყოვნებლივ და უსაფრთხო გახსნას, ვთანხმდები, ირანის დაბომბვა და თავდასხმა ორი კვირის განმავლობაში შევაჩერო. ეს იქნება ორმხრივი ცეცხლის შეწყვეტა!,“ - დაწერა ტრამპმა Truth Social-ზე. მისი თქმით, ირანისგან 10-პუნქტიანი წინადადება მიიღეს. „მივიღეთ ირანისგან 10-პუნქტიანი წინადადება და გვჯერა, რომ ეს არის სამუშაო საფუძველი მოლაპარაკებებისთვის. წარსულში არსებული დავის თითქმის ყველა პუნქტი შეთანხმებულია შეერთებულ შტატებსა და ირანს შორის, მაგრამ ორკვირიანი პერიოდი შეთანხმების საბოლოოდ დასრულების საშუალებას იძლევა,“ - აღნიშნა ტრამპმა. აშშ-ის პრეზიდენტის განცხადებით, ამერიკის შეერთებული შტატები ხელს შეუწყობს ჰორმუზის სრუტეში მოძრაობის მოწესრიგებას. „ბევრი დადებითი ქმედება იქნება! დიდი ფული გამომუშავდება. ირანს შეუძლია, რეკონსტრუქციის პროცესი დაიწყოს. ჩვენ ყველანაირი მარაგით შევავსებთ და უბრალოდ, „შორიახლოს ვიქნებით“, რათა დარწმუნდეთ, რომ ყველაფერი კარგად წავა. დარწმუნებული ვარ, რომ ასეც მოხდება. ისევე, როგორც ეს აშშ-ში ხდება, ეს შეიძლება, ახლო აღმოსავლეთის ოქროს ხანა იყოს!!!“- წერს ტრამპი სოციალურ ქსელში. აშშ-ის პრეზიდენტის განცხადებით, ირანის გამდიდრებულ ურანზე „იდეალურად იზრუნებენ.“ „სხვაგვარად არ დავთანხმდებოდი,“ - აღნიშნა ტრამპმა „ფრანს-პრესსთან“ სატელეფონო ინტერვიუში, თუმცა არ დაუკონკრეტებია, რისი გაკეთება იგეგმება გამდიდრებულ ურანთან დაკავშირებით. კითხვას, არის თუ არა ცეცხლის შეწყვეტის შესახებ შეთანხმების მიღწევა გამარჯვება, აშშ-ის პრეზიდენტმა უპასუხა: „ეს არის სრული და აბსოლუტური გამარჯვება. 100 პროცენტით. კითხვის ნიშნები არ არსებობს,“ - განაცხადა ტრამპმა. აშშ-ის პრეზიდენტის თქმით, არსებობს 15-პუნქტიანი შეთანხმება, რომლის უმეტეს ნაწილზეც შეთანხმება მიღწეულია. „ვნახოთ, რა მოხდება. ვნახოთ, მიაღწევს თუ არა წარმატებას,“ - განაცხადა ტრამპმა. ტრამპის თქმით, „მთელი ცივილიზაცია ამაღამ დაიღუპება“, თუ ირანი შეთანხმებას არ დადებს თავის მხრივ, ირანის საგარეო საქმეთა მინისტრმა აბას არაღჩიმ სოციალურ ქსელში გაავრცელა ირანის უმაღლესი უშიშროების საბჭოს განცხადება, რომელშიც ნათქვამია, რომ 2-კვირის განმავლობაში ჰორმუზის სრუტეში გემები უსაფრთხო გადაადგილებას "ტექნიკური სირთულეების გამო" ირანის შეიარაღებულ ძალებთან კოორდინაციაში შეძლებდნენ. ირანის სახელმწიფო ტელევიზიამ კი, თავის მაყურებელს აცნობა ტრამპის განცხადების შესახებ, რომელიც „ანტიირანული რიტორიკიდან დამამცირებელ უკან დახევად" შეაფასა. ისრაელის პრემიერ-მინისტრის ოფისმა 8 აპრილს განაცხადა, რომ მხარს უჭერენ პრეზიდენტ ტრამპის გადაწყვეტილებას, ირანზე დარტყმები ორი კვირით შეჩერდეს იმ პირობით, რომ ირანი დაუყოვნებლივ გახსნის ჰორმუზის სრუტეს და შეწყვეტს თავდასხმებს აშშ-ზე, ისრაელსა და რეგიონის ქვეყნებზე. პრემიერ-მინისტრ ნეთანიაჰუს ოფისის განცხადებით, ისრაელი მხარს უჭერს აშშ-ის ძალისხმევას, რათა ირანი ბირთვულ, სარაკეტო და ტერორისტულ საფრთხეს აღარ წარმოადგენდეს ამერიკის, ისრაელის, ირანის მეზობელი არაბული ქვეყნებისა და მთელი მსოფლიოსთვის და შეერთებულმა შტატებმა ისრაელს განუცხადა, რომ ეს მიზანი აქვს მომავალ მოლაპარაკებებსაც. ისრაელის პრემიერის ოფისის განცხადებით, ცეცხლის შეწყვეტა არ ვრცელდება ლიბანზე. Reuters-ის წყაროების ცნობით კი, აშშ-სა და ირანს შორის მიღწეული ორკვირიანი ცეცხლის შეწყვეტის შეთანხმების ფარგლებში, „ჰეზბოლამ“ ჩრდილოეთ ისრაელის მიმართულებით რაკეტების გაშვება და ლიბანში ისრაელის თავდაცვის ძალების წინააღმდეგ იერიშები შეაჩერა. ირანის მხრიდან დრონებითა და რაკეტებით იერიშები გაგრძელდა ისრაელსა და სხვა მეზობელ ქვეყნებში, თუმცა ამერიკელმა ოფიციალურმა პირებმა Axios-ს განუცხადეს, რომ უახლოეს საათებში აშშ მცირე ზომის იერიშებს მოელოდა, რადგან განადგურებული საკომუნიკაციო ხაზების ფონზე, ირანის ისლამური რევოლუციის გუშაგთა კორპუსის ქვედა დანაყოფებისთვის ცეცხლის შეწყვეტის ბრძანების გადაცემას დრო დასჭირდებოდა. მანამდე, პაკისტანის პრემიერ-მინისტრმა აშშ-ს პრეზიდენტს, დონალდ ტრამპს ირანთან დაკავშირებით ვადის ორი კვირით გახანგრძლივება სთხოვა. შეჰბაზ შარიფმა X-ზე გამოქვეყნებული პოსტით, მხარეებს ორკვირიანი ცეცხლის შეწყვეტის შესახებ შეთანხმების დაცვისკენ მოუწოდა, რათა „დიპლომატიამ ომის საბოლოო დასრულება შეძლოს,“ "გულწრფელად მოვუწოდებ პრეზიდენტ დონალდ ტრამპს, ორი კვირით გაახანგრძლივოს ვადა,“ - წერდა შარიფი. მან ირანსაც მოუწოდა, ამ ორკვირიან პერიოდში ჰორმუზის სრუტე გახსნას. „პაკისტანი, სრული გულწრფელობით, მიმართავს ირანელ ძმებს, გახსნან ჰორმუზის სრუტე შესაბამისი ორკვირიანი პერიოდის განმავლობაში კეთილი ნების ნიშნად,“ - წერდა X-ზე პაკისტანის შარიფი. აშშ-ის პრეზიდენტმა დონალდ ტრამპმა AFP-სთან სატელეფონო ინტერვიუს დროს ისიც თქვა, რომ მისი შეფასებით, ცეცხლის შეწყვეტის შეთანხმების დადებისკენ ირანს კულისებში ჩინეთმაც მოუწოდა. აღსანშნავია, რომ შესაბამისი ინფორმაცია 3 ირანელ წყაროზე დაყრდნობით ასევე გაავრცელა New York Times-მა. Associated Press-ი კი, ინფორმირებულ წყარზე დაყრდნობით წერს, რომ 2-კვირიანი ცეცხლის შეწყვეტის შეთანხმების ფაგლებში, ირანსა და ომანს ჰორმუზის სრუტეში გამავალ კომერციული გემებისგან გადასახადის აკრეფის უფლება ეძლევათ. წყაროს განცხადებით, ირანის მიერ მიღებული თანხები აშშ-ისრაელის იერიშების შემდეგ ქვეყნის აღდგენას მოხმარდება. ინფორმაცია ოფიციალურად ჯერჯერობით არ დადასტურებულა. გარდა ამისა, როგორც ისრაელის ოფიციალურმა პირმა ჟურნალისტებს აცნობა, ტრამპის ადმინისტრაციამ ისრაელს მიაწოდა ინფორმაცია, რომ პაკისტანში დაგეგმილი მომავალი მოლაპარაკებების დროს აშშ მტკიცედ დაიცავს პოზიციას და მოითხოვს, რომ ირანმა ქვეყნიდან სრულად გაიტანოს ყველა ბირთვული მასალა, შეწყვიტოს ურანის გამდიდრება, "აღმოფხვრას ბალისტიკური რაკეტების საფრთხე და სხვა." ცნობისთვის, Axios-ის ცნობით, ირანსა და აშშ-ს შორის ცეცხლის შეწყვეტის გამოცხადების შემდეგ ნავთობის ფასი დაეცა. ნავთობის ფასი ბარელზე 100 დოლარზე დაბალ ნიშნულამდე ჩამოვიდა, მას შემდეგ, რაც აშშ-ის პრეზიდენტმა, დონალდ ტრამპმა ირანთან ორკვირიანი ცეცხლის შეწყვეტის შეთანხმების შესახებ გამოაცხადა. ცეცხლის შეწყვეტის გამოცხადების შემდეგ ბრენტის ტიპის ნავთობის „ფიუჩერსები“ დაახლოებით 16%-ით დაეცა და ბარელზე ფასი 93 დოლარს შეადგენს. აშშ-ის WTI-ის ტიპის ნავთობის ფასი კი 14%-ით, დაახლოებით 96 დოლარამდე შემცირდა. გამოცემის ცნობით, 1991 წლის სპარსეთის ყურის ომის შემდეგ ეს ერთი დღის განმავლობაში ნავთობის ფასის ყველაზე დიდ ვარდნას წარმოადგენს, თუმცა ნავთობის ფასები კვლავ მაღალია იმასთან შედარებით, რაც კონფლიქტის დაწყებამდე, 28 თებერვალს იყო. იმ დროს, ბარელი დაახლოებით 70 აშშ დოლარი ღირდა.
ტრამპის თქმით, „მთელი ცივილიზაცია ამაღამ დაიღუპება“, თუ ირანი შეთანხმებას არ დადებს
აშშ-ის პრეზიდენტი დონალდ ტრამპი აცხადებს, რომ თუ ირანი შეთანხმებაზე არ წამოვა, „მთელი ცივილიზაცია დღეს ღამით დაიღუპება.“ ტრამპის თქმით, შესაძლოა, „რევოლუციურად საოცარი რამ“ მოხდეს. „დღეს ღამით, მთელი ცივილიზაცია დაიღუპება და აღარასდროს დაბრუნდება. არ მინდა, რომ ეს მოხდეს, მაგრამ ალბათ, მოხდება. თუმცა ახლა, როდესაც სრული და ტოტალური რეჟიმის ცვლილება გვაქვს, სადაც განსხვავებული, უფრო ჭკვიანი და ნაკლებად რადიკალიზებული გონება ჭარბობს, შესაძლოა, რევოლუციურად საოცარი რამ მოხდეს, ვინ იცის? ამას ამაღამ გავიგებთ, ეს მსოფლიოს ხანგრძლივი და რთული ისტორიის ერთ-ერთი უმნიშვნელოვანესი მომენტია. გამოძალვის, კორუფციისა და სიკვდილის 47 წელი საბოლოოდ დასრულდება. ღმერთმა დალოცოს დიდი ირანელი ხალხი!“- წერს ტრამპი სოციალურ ქსელში. აშშ-ის სამხედრო ძალებმა ირანის ხარgის კუნძულზე სამხედრო სამიზნეებზე მიიტანეს იერიში, იტყობინება 7 აპრილს საინფორმაციო სააგენტო Axios-ი, აშშ-ის მაღალი რანგის პირზე დაყრდნობით. ირანის წითელი ნახევარმთვარის ცნობით, დაიბომბა ირანის რკინიგზა ქარაჯის რეგიონში. ამავე რეგიონის ზოგიერთ ნაწილში ელექტროენერგიის მიწოდება შეფერხდა გადამცემ ხაზებზე დარტყმის შედეგად. იტყობინება NOURNEWS-ი. რკინიგზაზე თავდასხმის შესახებ იტყობინებიან ყაზვინიდანაც - ETEMADONLINE-ის ცნობას ავრცელებს Reuters-ი. ირანის სახელმწიფო საინფორმაციო სააგენტო IRNA-ს ცნობით, ქალაქ ქაშანთან საჰაერო დარტყმის შედეგად ორი ადამიანი დაიღუპა და სამი დაშავდა. ქაშანი პოპულარული ტურისტული ცენტრია.საჰაერო დარტყმის შედეგად თეირანში მნიშვნელოვნად დაზიანდა სინაგოგა. სახელმწიფო მედიის ცნობით, დაბომბვა ღამით მოხდა. თავდასხმაში ისრაელის საჰაერო ძალები დაადანაშაულეს. ვიდეოში ნაჩვენებია თითქმის მთლიანად დანგრეული შენობა ვიწრო ჩიხში, ასევე გაწმენდითი სამუშაო. ისრაელის სამხედროებმა 7 აპრილს ირანის მოსახლეობას მოუწოდეს, არ ისარგებლონ მატარებლით: ამ დროიდან ირანის დროით საღამოს 9 საათამდე, მატარებლებში და რკინიგზის ხაზებთან ახლოს ყოფნა სიცოცხლისთვის საფრთხეს წარმოადგენს, განაცხადა პრესსპიკერმა. თავის მხრივ, ირანს საპასუხო იერიშები მიაქვს აშშ-ის მოკავშირე ქვეყნების და ისრაელის ობიექტებზე. არაბთა გაერთიანებული საამიროების შარჯას ხელისუფლების ცნობით, თურაიას ტელეკომუნიკაციების ადმინისტრაციულ შენობას ირანის რაკეტა მოხვდა. შარჯას ხელისუფლების ცნობით, დაშავებულია ორი. დონალდ ტრამპმა თეირანი გააფრთხილა, რომ პირობებს 7 აპრილამდე უნდა დათანხმდეს - წინააღმდეგ შემთხვევაში, უფრო მასშტაბური დაბომბვა ელის. ტრამპი მოითხოვს, ირანმა უარი თქვას ბირთვული იარაღის განვითარებაზე და გახსნას ჰორმუზის სრუტე. ირანის ომის ფონზე რუსეთი აცხადებს, რომ ახლო აღმოსავლეთის კონფლიქტი ახალ შესაძლებლობებს ხსნის ამ ქვეყნისთვის. რუსეთის პრემიერ-მინისტრმა მიხაილ მიშუსტინმა სამშაბათს განაცხადა, რომ ახლო აღმოსავლეთში კონფლიქტმა რუსეთისთვის ახალი შესაძლებლობები გახსნა და რომ მოსკოვს აქვს პოტენციალი, სწრაფად გაზარდოს ენერგიის, რესურსებისა და საკვების გლობალური ექსპორტი. ამავდროულად, შიდა ბაზრის დაცვა რუსეთის მთავარ პრიორიტეტად რჩება, განაცხადა მიშუსტინმა და აღნიშნა, რომ რუსეთის ბიუჯეტის შემოსავლები იზრდება გლობალური ნავთობის ფასების ზრდისგამო. ისრაელის სამხედროები აცხადებენ, რომ ირანმა ისრაელის მიმართულებით კიდევ უფრო მეტი რაკეტა გაუშვა, მას შემდეგ, რაც სპარსეთის ყურის რამდენიმე ქვეყანამ ღამით დარტყმების შესახებ განაცხადა. გაეროს გენერალური მდივნის ანტონიო გუტერეშის წარმომადგენელმა განაცხადა, რომ ასეთი თავდასხმები საერთაშორისო სამართალს არღვევს, დროა, ეს კონფლიქტი დასრულდეს. 28 თებერვალს შეერთებულმა შტატებმა და ისრაელმა ირანის წინააღმდეგ „მასშტაბური სამხედრო ოპერაცია“ დაიწყეს. საპასუხოდ, სპარსეთის ყურეში აშშ-ის პარტნიორი ქვეყნები ირანის მხრიდან დრონებით და რაკეტებით შეტევის სამიზნედ იქცნენ. ირანში ხიდის აფეთქების შემდეგ, ტრამპმა სამიზნედ ელექტროსადგურები დაასახელა
შუა დერეფნის შესაძლებლობების შესასწავლად, გერმანია აზერბაიჯანსა და ყაზახეთში ბიზნეს მისიას გზავნის
გერმანიის საგარეო ვაჭრობის ხელშეწყობის სახელმწიფო სააგენტო, NRW.Global Business, 29 ივნისიდან 3 ივლისამდე აზერბაიჯანსა და ყაზახეთში ბიზნეს მისიას გაგზავნის. აზერბაიჯანული მედიის ცნობით, მისიის მიზანია შუა დერეფნის [ტრანსკასპიური საერთაშორისო სატრანსპორტო მარშრუტის] დინამიკური განვითარების კაპიტალიზაცია. NRW.Global Business აღნიშნავს, რომ დერეფანში ტვირთების გადაზიდვის მოცულობა ბოლო წლებში მკვეთრად გაიზარდა და მოსალოდნელია, რომ ეს მოცულობა 2030 წლამდე კიდევ უფრო გაიზრდება. „კომპანიებისთვის ეს მიმზიდველ ბიზნეს შესაძლებლობებს წარმოადგენს, განსაკუთრებით, იმის გათვალისწინებით, რომ 2030 წლისთვის დაახლოებით 20 მილიარდი ევროს პროგნოზირებული საინვესტიციო საჭიროებებია,“ - განაცხადა სააგენტომ. ყაზახეთის ტრანსპორტის სამინისტროს მონაცემები ამ მარშრუტზე ტვირთების გადაზიდვის სტაბილურ ზრდას აჩვენებს: 2019 წელს 759,000 ტონა, 2020 წელს 783,000 ტონა, 2021 წელს 586,000 ტონა, 2022 წელს 1,485 მილიონი ტონა, 2023 წელს 2,764 მილიონი ტონა და 2024 წელს 4,484 მილიონი ტონა. თურქული სახელმწიფოების ორგანიზაციის მონაცემებით, შუა დერეფნის გასწვრივ ტვირთების გადაზიდვის მოცულობამ 2025 წელს 4,7 მილიონ ტონას მიაღწია.
რუსეთმა და ჩინეთმა ჰორმუზის სრუტეზე გაეროს რეზოლუცია დაბლოკეს
ჩინეთმა და რუსეთმა ვეტო დაადეს გაეროს რეზოლუციას, რომელიც სახელმწიფოებს ჰორმუზის სრუტეში კომერციული გადაზიდვების დასაცავად, კოორდინირებული ძალისხმევისკენ მოუწოდებდა. აშშ-ის ელჩმა მსოფლიო ორგანიზაციაში, „პასუხისმგებელ ერებს“ მოუწოდა, შეუერთდნენ აშშ-ს, სასიცოცხლოდ მნიშვნელოვანი წყალსატევის უსაფრთხოების საკითხში. 15-წევრიან უშიშროების საბჭოში ბაჰრეინის მიერ წარდგენილ რეზოლუციას, რომელსაც აშშ-მაც დაუჭირა მხარი, 11-მა წევრი მიემხრო, ორი - ჩინეთი და რუსეთი - წინააღმდეგი იყო, ხოლო ორმა [პაკისტანმა და კოლუმბიამ] თავი შეიკავა. ტრამპის თქმით, „მთელი ცივილიზაცია ამაღამ დაიღუპება“, თუ ირანი შეთანხმებას არ დადებს „არავინ უნდა შეეგუოს ამას. ისინი გლობალურ ეკონომიკას იარაღის მუქარით აკავებენ. მაგრამ დღეს რუსეთი და ჩინეთი ამას ეგუებიან. მათ მხარი დაუჭირეს რეჟიმს, რომელიც ცდილობს სპარსეთის ყურის ქვეყნების დაშინებას და დამორჩილებას, მაშინაც კი, როდესაც ის საკუთარ ხალხს სასტიკად ეპყრობა,“ - განაცხადა აშშ-ის ელჩმა გაეროში მაიკ უოლცმა. ჩინეთმა და რუსეთმა ვეტო მაინც გამოიყენეს მიუხედავად იმისა, რომ ბაჰრეინმა თავისი რეზოლუციის პროექტი მნიშვნელოვნად შეასუსტა მას შემდეგ, რაც ჩინეთი წინააღმდეგი იყო ძალის გამოყენების ნებართვის გაცემაზე. კენჭისყრაზე წარდგენილი რეზოლუციის პროექტის მიხედვით, საზღვაო მარშრუტის დასაცავად, ძალის გამოყენების ნებისმიერი ნებართვა გაუქმდა. ასევე გამოტოვებული იყო სავალდებულო აღსრულების აშკარა მითითება, რომელიც ადრეულ პროექტში იყო შეტანილი. რეზოლუციის ტექსტი მკაცრად მოუწოდებდა სახელმწიფოებს, თავდაცვითი ძალისხმევის ირგვლივ გაერთიანებულიყვნენ, გარემოებების შესაბამისად, რათა ხელი შეეწყოთ ჰორმუზის სრუტეში ნავიგაციის უსაფრთხოების უზრუნველყოფისთვის. ტექსტში ასევე ნათქვამია, რომ ასეთი წვლილი შეიძლება, მოიცავდეს „სავაჭრო და კომერციული გემების ესკორტს“ და „ჰორმუზის სრუტეში საერთაშორისო ნავიგაციის უგულვებელყოფის, შეფერხების ან სხვაგვარად ჩარევის მცდელობების თავიდან აცილების მხარდაჭერას.“ ამერიკის შეერთებულმა შტატებმა და ისრაელმა 28 თებერვალს, ირანის წინააღმდეგ სამხედრო ოპერაციის დაწყების შესახებ განაცხადეს. თეირანმა გლობალურად მნიშვნელოვან საზღვაო სატრანსპორტო სრუტეზე ბლოკადა დააწესა.
უნგრეთის არჩევნებამდე ერთი კვირით ადრე, აშშ-ის ვიცე-პრეზიდენტი ბუდაპეშტს ეწვია
უნგრეთის არჩევნების წინ, ვენსი ბუდაპეშტში ვიზიტის დროს ორბანს მხარდაჭერას უცხადებს და ევროკავშირს აკრიტიკებს აშშ-ის ვიცე-პრეზიდენტი ჯეი დი ვენსი ბუდაპეშტში ჩავიდა, რათა კვირას დაგეგმილი საპარლამენტო არჩევნების წინ, უნგრეთის პრემიერ-მინისტრ ვიქტორ ორბანს მხარი დაუჭიროს. ჯეი დი ვენსს აეროპორტში უნგრეთის საგარეო საქმეთა მინისტრი პიტერ სიიარტო დახვდა. ორბანი იმედოვნებს, რომ ვენსის ვიზიტი საკმარის შთაბეჭდილებას მოახდენს გადაუწყვეტელ უნგრელ ამომრჩევლებზე. 12 აპრილის არჩევნები ორბანის თითქმის 40-წლიანი პოლიტიკური კარიერის ურთულეს გამოწვევად ითვლება. 2010 წლიდან მან ზედიზედ ოთხი არჩევნები მოიგო. დღევანდელი ვიზიტის შესახებ სიიარტომ განაცხადა, რომ "ეჭვგარეშეა, რომ ეს უნგრეთ-ამერიკის ურთიერთობების ოქროს ხანაა" და რომ 1991 წლის შემდეგ, ეს უნგრეთში აშშ-ს ვიცეპრეზიდენტის პირველი ვიზიტია და აშშ-ის უმაღლესი დონის ვიზიტი 2006 წელს ჯორჯ ბუშის პრეზიდენტობის შემდეგ. ორდღიანი ვიზიტის ფარგლებში აშშ-ის ვიცე-პრეზიდენტი უნგრეთის პრემიერ-მინისტრს ვიქტორ ორბანს შეხვდა. ასევე, ვენსი ორბანის წინასაარჩევნო დემონსტრაციაში მიიღებს მონაწილეობას და უნგრეთის პრემიერ-მინისტრს 12 აპრილს დაგეგმილი არჩევნების წინ მხარდაჭერას გამოუცხადებს. „როგორც ვიცი, ერთ კვირაში უნგრეთის შემდეგი პრემიერ-მინისტრის ასარჩევად არჩევნები გაიმართება. რა თქმა უნდა, არ მაქვს იმის მოლოდინი, რომ უნგრელი ხალხი აშშ-ის ვიცე-პრეზიდენტს მოუსმენს. ეს ჩემი აქ ყოფნის მთავარი მიზეზი არ არის. მაგრამ, მსურს სიგნალი გავუგზავნო ყველას, პირველ რიგში ბრიუსელში არსებულ ბიუროკრატებს, რომლებიც ცდილობენ უნგრელი ხალხი დაჩაგრონ, რადგან მათ არ მოსწონთ ლიდერი, რომელიც უნგრელ ხალხს იცავს,“ - განაცხადა ჯეი დი ვენსმა. მან რუსეთსა და უკრაინას შორის ომის დასრულების მიზნით ვიქტორ ორბანის მიერ გაწეული სამუშაო შეაქო. ვენსის თქმით, ორბანი და აშშ-ის პრეზიდენტი დონალდ ტრამპი „ის ლიდერები არიან, რომლებიც ამ დამანგრეველი კონფლიქტის დასასრულებლად ყველაზე მეტს აკეთებენ.“ „თქვენი ლიდერობა მშვიდობის მიღწევისთვის გაცილებით უფრო მნიშვნელოვანია და თქვენ გაცილებით კონსტრუქციული პარტნიორი ხართ, ვიდრე თითქმის ყველა სხვა ნებისმიერი მსოფლიოს სხვა წერტილში,“ - მიმართა ვენსმა ორბანს. კითხვას, ითანამშრომლებს თუ არა აშშ უნგრეთის სხვა მთავრობასთან, ვენსმა უპასუხა, რომ დიახ, თუმცა დარწმუნებულია, რომ არჩევნებში ვიქტორ ორბანი გაიმარჯვებს. ვენსის ვიზიტს გამოეხმაურა უნგრეთის მთავარი ოპოზიციური პარტიის, Tisza-ს ლიდერი პეტერ მადიარი. "არცერთ უცხო ქვეყანას არ აქვს უფლება, ჩაერიოს უნგრეთის არჩევნებში. ეს ჩვენი ქვეყანაა. უნგრეთის ისტორია არ იწერება ვაშინგტონში, მოსკოვში ან ბრიუსელში - ის იწერება უნგრეთის ქუჩებსა და მოედნებზე. ხუთი დღე დარჩა!" - წერს მადიარი სოციალურ ქსელში. წინასწარი გამოკითხვებით, ვიქტორ ორბანის პარტია Fidesz არჩევნებში ვერ იმარჯვებს. როგორც ცნობილია, ორბანის მთავრობა ევროკავშირის მიერ უკრაინისთვის სამხედრო და ფინანსური დახმარების გაწევისა და ევროკავშირში უკრაინის გაწევრების მოწინააღმდეგეა. ტრამპმა ორბანს უნგრეთის პრემიერად ხელახლა არჩევისთვის მხარდაჭერა გამოუცხადა
IRGC ამერიკის მოკავშირეებს ნავთობისა და გაზის შეწყვეტით ემუქრება, თუ „აშშ წითელ ხაზებს გადაკვეთს“
ირანის ისლამური რევოლუციის გუშაგთა კორპუსი (IRGC) აცხადებს, რომ ამერიკის რეგიონულმა პარტნიორებმა უნდა იცოდნენ, რომ თეირანმა „კეთილმეზობლობის“ გამო დღემდე მნიშვნელოვანი თავშეკავება“ და „სიფრთხილე გამოიჩინა საპასუხო დარტყმებისთვის სამიზნეების შერჩევისას.“ „ამ მომენტიდან ყველა ასეთი მოსაზრება გვერდზე გადაიდება,“ - ნათქვამია სახელმწიფო მედიით გავრცელებულ განცხადებაში. IRGC ასევე აცხადებს, რომ თუ აშშ-ის სამხედროები „წითელ ხაზებს გადაკვეთენ, თეირანის პასუხი რეგიონის ფარგლებს გასცდება და რომ თეირანი მიზანში ამოიღებს აშშ-სა და მისი პარტნიორების ინფრასტრუქტურას და წლების განმავლობაში შეაფერხებს რეგიონიდან ნავთობისა და გაზის მიწოდებას.“ ტრამპის თქმით, „მთელი ცივილიზაცია ამაღამ დაიღუპება“, თუ ირანი შეთანხმებას არ დადებს
სტამბოლში, ისრაელის საკონსულოსთან სროლა იყო
თურქეთის ხელისუფლებამ დაადგინა სამი თავდამსხმელის ვინაობა, რომლებმაც დღეს სტამბოლში, ისრაელის საკონსულოსთან ახლოს პოლიციას ცეცხლი გაუხსნეს. ამის შესახებ თურქეთის შინაგან საქმეთა მინისტრმა მუსტაფა ჩიფჩიმ სოციალურ ქსელში დაწერა. მისი ინფორმაციით, ერთ-ერთ თავდამსხმელს კავშირი ჰქონდა ორგანიზაციასთან, რომელიც რელიგიას საკუთარი მიზნებისთვის იყენებს. „ტერორისტების ვინაობა დადგენილია. დადგინდა, რომ იზმითიდან დაქირავებული ავტომობილით სტამბოლში ჩასულ ერთ-ერთ პირს კავშირი ჰქონდა ორგანიზაციასთან, რომელიც რელიგიას ექსპლუატაციას უწევს,“ - წერს თურქეთის შინაგან საქმეთა მინისტრი. თავდამსხმელებიდან ორი ძმები იყვნენ, რომელთაგან ერთი წარსულში ნარკოტიკებთან დაკავშირებულ საქმეზე იყო ნასამართლევი. ჯერ კიდევ გაურკვეველია, იყო თუ არა თავდამსხმელების სამიზნე ისრაელის საკონსულო. თურქეთის შინაგან საქმეთა მინისტრის თქმით, ორი პოლიციელი დაიჭრა და თავდამსხმელები იდენტიფიცირებულები არიან. ერთი თავდამსხმელი მოკლეს, ორი განეიტრალებულია. საქმეს სტამბოლის პროკურატურა იძიებს. სტამბოლში ისრაელის საკონსულო ორ წელზე მეტია დაკეტილია. თურქეთს და ისრაელს შორის ურთიერთობა უკიდურესად გამწვავდა მას შემდეგ, რაც ისრაელზე ჰამასის თავდასხმის პასუხად, 2023 წლის ოქტომბერში ისრაელმა ღაზის სექტორში სამხედრო ოპერაცია დაიწყო. ერდოღანმა ნეთანიაჰუს ომის დანაშაულში დასდო ბრალი.
სერბეთი „უნგრეთში გაზსადენზე დივერსიის მცდელობაში“ უკრაინულ კვალს ვერ ხედავს
5 აპრილს სერბეთმა უნგრეთისკენ მიმავალ გაზსადენზე საბოტაჟის მცდელობის შესახებ განაცხადა. მათი თქმით, მილსადენთან ახლოს აღმოაჩინეს ასაფეთქებელი ნივთიერებებითა და დეტონატორებით სავსე დიდი პაკეტები. სერბეთის პროკურატურის განცხადებით, საქმეს მიენიჭა უკანონო იარაღის და ასაფეთქებელი მასალების ტრეფიკინგის კვალიფიკაცია, სავარაუდო, საბოტაჟთან კავშირით. „ბალკანეთის ნაკადი“ არის მილსადენი, რომელიც ბულგარეთსა და სერბეთზე გადის და აკავშირებს უნგრეთს რუსულ გაზთან, რომელიც შავი ზღვის ფსკერით თურქეთამდე მიემართება. უნგრეთის საგარეო საქმეთა მინისტრმა პეტერ სიიარტომ მიანიშნა, რომ დივერსიის მცდელობაში, შესაძლოა, უკრაინა ყოფილიყო ჩართული. „ადრე უკრაინელებმა ააფეთქეს „ჩრდილოეთის ნაკადი“. აფეთქებების შემდეგ ისინი დიდი ხნის განმავლობაში ამტკიცებდნენ, რომ ეს რუსეთი იყო, რაც არალოგიკურია. რატომ უნდა ააფეთქოს რუსეთმა საკუთარი გაზსადენები? ბოლო კვირების განმავლობაში ათობით დრონი მუდმივად ესხმოდა თავს რუსეთის ტერიტორიაზე არსებულ „თურქული ნაკადის“ მილსადენს, რომელიც უნგრეთს გაზს აწვდის. ახლა სერბეთის მიერ აღკვეთილი ტერორისტული თავდასხმა, როგორც ჩანს, ამ თავდასხმების ნაწილია,“ – დაწერა სიიარტომ სოციალურ ქსელში. ორბანს უკრაინა პირდაპირ არ დაუსახელებია, თუმცა განაცხადა, რომ კიევი "წლებია ცდილობს, ევროპას ჩაუჭრას რუსეთის ენერგია". ორბანმა დამატა, რომ TurkStream-ის რუსეთის მონაკვეთზე თავდასხმა იყო "სასიკვდილო საფრთხე უნგრეთისთვის." კრემლის პრესმდივანმა დმიტრი პესკოვმა განაცხადა, რომ ამ ეტაპზე "სანდო მტკიცებულებები არ არსებობს", თუმცა მაინც გამოთქვა ვარაუდი, რომ შესაძლოა, ამაში უკრაინა იყოს ჩარეული. ამ ვერსიას მტკიცედ უარყოფს სერბეთის სამხედრო დაზვერვა. ამ უწყების წარმომადგენელმა დურო იოვანიჩმა განაცხადა, რომ „არ არის სიმართლე, რომ უკრაინელები ცდილობდნენ ამ საბოტაჟის მოწყობას". ოფიციალურმა კიევმა ბრალდებები უარყო. „უკრაინა ამასთან არანაირად არ არის დაკავშირებული. უფრო სავარაუდოა, რომ ეს არის რუსეთის „ცრუ დროშის ოპერაცია“, რომელიც უნგრეთის არჩევნებში მოსკოვის ფართომასშტაბიანი ჩარევის ნაწილია,“ - განაცხადა თავის მხრივ, უკრაინის საგარეო საქმეთა სამინისტროს პრესსპიკერმა გეორგი ტიხიმ. ცნობისთვის, უნგრეთის პრემიერ-მინისტრმა ვიქტორ ორბანმა უსაფრთხოების საბჭოს სხდომა მოიწვია. ამასთან, უნგრეთის საგარეო საქმეთა მინისტრმა, პიტერ სიიარტომ ფეისბუქგვერდზე გამოაქვეყნა პოსტი, სადაც აღნიშნავს, რომ უნგრეთში მილსადენ TurkStream-ს სამხედროები დაიცავენ. სიიარტომ ასევე აღნიშნა, რომ მოლაპარაკებები გამართა სერბეთის, თურქეთისა და რუსეთის ენერგეტიკის მინისტრებთან და ისინი „შეთანხმდნენ, რომ მილსადენი უფრო მკაცრად უნდა იყოს დაცული, ვიდრე ოდესმე.“ ორბანი 6 აპრილს ჩავიდა სერბეთის საზღვართან, სადაც გადის ხსენებული ინფრასტრუქტურა. ხსენებული ინციდენტის ფონია უკვე არსებული დაძაბულობა ენერგეტიკის ირგვლივ. ბუდაპეშტი კიევს ედავება მილსადენ "დრუჟბას" ნავთობის მიწოდების შეწყვეტის გამო, რაშიც უნგრეთი და სლოვაკეთი უკრაინას ადანაშაულებენ. კიევი აცხადებს, რომ მილსადენი რუსეთის დრონებით შეტევის შედეგად დაზიანდა. ექვს დღეში უნგრეთში საპარლამენტო არჩევნებია. წინასწარი კვლევების მიხედვით, ორბანის ძალამ შესაძლოა,არჩევნები წააგოს.
ალიევის ვიზიტის ძირითადი გზავნილები
აზერბაიჯანის პრეზიდენტმა ილჰამ ალიევმა თბილისში ვიზიტისას შეხვედრები გამართა პრეზიდენტ მიხეილ ყაველაშვილთან და პრემიერ-მინისტრ ირაკლი კობახიძესთან. დღის ბოლოს ალიევი ბიზნესცენტრში მიიღო „ქართული ოცნების“ საპატიო თავმჯდომარე ბიძინა ივანიშვილმა. „ახალი რეალობა სამხრეთ კავკასიაში“ ალიევის თქმით, საქართველოს პრემიერ-მინისტრთან შეხვედრისას ისაუბრეს „ახალ რეალობაზე, რომელიც შექმნილია სამხრეთ კავკასიაში,“ აზერბაიჯანის პრეზიდენტის თქმით, ამ რეგიონის ქვეყნები უნდა დარჩნენ ფოკუსირებულნი მშვიდობაზე, სტაბილურობასა და უსაფრთხოებაზე, როდესაც „მსოფლიოს სხვადასხვა კუთხეში ირღვევა ეს პრინციპები.“ „ჩვენთან ეს უნდა დარჩეს ურყევი. მსგავსი მოვლენები ჩვენს რეგიონს არ უნდა შეეხოს. სამხრეთ კავკასიაში ჩვენ ვართ მშვიდობის, სტაბილურობისა და თანამშრომლობის რეგიონი. განსაკუთრებით უნდა გავუსვა ხაზი საქართველოს უმნიშვნელოვანეს როლს. ის შეთანხმებები, რომლებსაც [სომხეთთან] ხელს ვაწერთ, არ არის საკმარისი, იმიტომ, რომ სამომავლოდ, ყველა ნაბიჯი ამ მშვიდობას უნდა აძლიერებდეს. ეს შეხვედრები, ეს ვიზიტები ზუსტად ამას ემსახურება. ჩვენ დავიწყეთ სომხეთთან ურთიერთობა საქართველოს გავლით და მადლობას ვუხდი საქართველოს მთავრობას ხელშეწყობისთვის,“ - განაცხადა ილჰამ ალიევმა. თავის მხრივ, ირაკლი კობახიძემ აღნიშნა, რომ „საქართველო მიესალმება. აზერბაიჯანსა და სომხეთს შორის მიმდინარე სამშვიდობო პროცესს. ქვეყანა მტკიცედ უჭერს მხარს რეგიონში მშვიდობიან თანაცხოვრებას, კონსტრუქციულ თანამშრომლობას და ახალ ინიციატივებს.“ „ჩვენ, საჭიროებისამებრ, ყოველთვის მზად ვართ, ჩვენი დადებითი წვლილი შევიტანოთ ამ ურთიერთობების განვითარებაში. მზად ვართ, ხელი შევუწყოთ დიალოგსა და სამშვიდობო პროცესს.“ აზერბაიჯანის პრეზიდენტის თქმით, საქართველო და აზერბაიჯანი ერთად არიან, ერთი სულისკვეთებით არიან გამსჭვალულები. „მეგობრული, მეზობლური და ძმური ურთიერთობების განვითარებაში ვვითარდებით, როგორც დამოუკიდებელი სუვერენული ქვეყნები და წარმატებით ვავითარებთ ჩვენს რეგიონს,“ - აღნიშნა ილჰამ ალიევმა. მანვე აღნიშნა, რომ „საქართველო დინამიკურად ვითარდება, ეკონომიკური ზრდა აქვს ძალიან თვალსაჩინო.“ ენერგეტიკა „ჩვენი, სამხრეთ კავკასიის ქვეყნების თანამშრომლობა ქმნის ახალ პერსპექტივებს მთლიანად ჩვენი რეგიონისთვის. ჩვენ ვაკვირდებით გლობალურ პოლიტიკურ ცვლილებებს და ეს ცვლილებები კიდევ უფრო ზრდის “შუა დერეფნის” მნიშვნელობას, მათ შორის შავი ზღვისა და სამხრეთ კავკასიის, როგორც სტრატეგიული სივრცის მნიშვნელობას. ჩვენი ქვეყნები, როგორც აზიისა და ევროპის დამაკავშირებელი ხიდები, საკვანძო როლს ასრულებენ დაკავშირებადობის თვალსაზრისით და ამ კონტექსტში, ჩვენ განსაკუთრებულ მნიშვნელობას ვანიჭებთ სატრანსპორტო და ლოგისტიკური ინფრასტრუქტურის განვითარებასა და მოდერნიზაციას. საქართველომ და აზერბაიჯანმა არაერთხელ დავამტკიცეთ, რომ ვართ სანდო და პასუხისმგებლიანი პარტნიორები, მათ შორის, საერთაშორისო ენერგეტიკულ და სატრანსპორტო პროექტებში,“ - განაცხადა ირაკლი კობახიძემ. „დღეს ჩვენი ბუნებრივი აირი გადის 16 ქვეყანაში ექსპორტზე, მაგრამ ექსპორტი იწყება საქართველოდან და საქართველოს გავლით. საქართველო არის პირველი ქვეყანა ამ მარშრუტზე, სადაც აზერბაიჯანი ახორციელებს ენერგეტიკის ექსპორტს საერთაშორისო ბაზრებზე, საქართველოს გავლით ხდება ეს ყველაფერი. ასევე ნავთობისა და ბუნებრივი აირის რესურსები კასპიის ზღვიდან, აზერბაიჯანიდან საქართველოში შემოდის. საუბარი გვქონდა არსებულ ინფრასტრუქტურაზე. ბოლო 2 ათწლეულის განმავლობაში წარმატებით მუშაობს ბაქო-თბილისი-ჯეიჰანის მილსადენი და სამხრეთის გაზის დერეფანი. ეს ინფრასტრუქტურა ძალიან მნიშვნელოვანია ბევრი ქვეყნისთვის. ჩვენ ასევე შევქმენით, განვავითარეთ და გავაფართოეთ სატრანსპორტო დერეფნები. შუა დერეფანი გაივლის აზერბაიჯანს და საქართველოს. ჩვენთვის ეს ერთ-ერთი ყველაზე მნიშვნელოვანი არტერიაა, რომლის გაძლიერებასა და განვითარებაზე დიდ იმედებს ვამყარებთ. საერთო ჯამში, ჩვენი დღის წესრიგი ძალიან ფართომასშტაბიანია, მას ემატება ახალი თემები და პროექტები. ჩვენ ერთობლივი ძალისხმევით ამ ყველაფერს განვახორციელებთ. ჩვენი ორმხრივი ურთიერთობები შეიძლება, გამოდგეს მაგალითად ყველა ჩვენი მეზობელი სახელმწიფოსთვის, რადგან ის ეფუძნება ურთიერთპატივისცემას და ურთიერთნდობას. ვუფრთხილდებით საერთო ინტერესებს და მეგობრობას, ეს არის კეთილმეზობლური და ძმური ურთიერთობა. დარწმუნებული ვარ, ამ წარმატებულ გზაზე ვივლით მუდამ. მინდა, ვუსურვო ქართველ ძმურ ერს მშვიდობა, სტაბილურობა, კეთილდღეობა,“ - განაცხადა თავის მხრივ, აზერბაიჯანის პრეზიდენტმა. ალიევთან ირაკლი კობახიძის პირისპირ შეხვედრის შემდეგ, მოლაპარაკებები გაფართოებულ ფორმატში გაგრძელდა, რომელშიც ორი ქვეყნის მთავრობის წევრები მონაწილეობდნენ. ქართული მხარის ცნობით, შეხვედრაზე ყურადღება გავამახვილეთ ორი ქვეყნის მზარდ სავაჭრო-ეკონომიკურ თანამშრომლობაზე და ამ კუთხით არსებული პოტენციალის სრულად ათვისების მნიშვნელობაზე. საუბარი ასევე შეეხო ენერგეტიკის სექტორში მჭიდრო პარტნიორობას და რეგიონული მნიშვნელობის სატრანსპორტო-ენერგეტიკულ პროექტებს, რომლებსაც საქართველო და აზერბაიჯანი ერთობლივად ახორციელებენ. მათ შორის, აღინიშნა ბაქო-თბილისი-ყარსის რკინიგზა, რომელიც საკვანძო როლს ასრულებს რეგიონული დაკავშირებადობის უზრუნველყოფაში. ალიევის პრესსამსახურის ცნობით, მიხეილ ყაველაშვილთან შეხვედრაზე ხაზი გაესვა აზერბაიჯანსა და სომხეთს შორის ნორმალიზაციის პროცესის როლს სამხრეთ კავკასიაში სტაბილურობისა და უსაფრთხოების უზრუნველყოფაში. ამასთან, ხაზი გაუსვეს აზერბაიჯანისა და საქართველოს მიერ განხორციელებული ერთობლივი სატრანსპორტო და ენერგეტიკული პროექტების მნიშვნელობას და აღნიშნეს მათი სტრატეგიული და ეკონომიკური მნიშვნელობა. ქართული მხარის ცნობით, შეხვედრაზე ორი ქვეყნის სტრატეგიული პარტნიორობის მაღალი დონისა და სხვადასხვა სფეროში წარმატებული თანამშრომლობის შესახებ ისაუბრეს. ასევე, პირისპირ საუბრისას „ხაზგასმით აღინიშნა, რომ მიმდინარე გეოპოლიტიკური პროცესების ფონზე, მაშინ, როდესაც საერთაშორისო წესრიგი ფუნდამენტურად იცვლება, რეგიონში სტაბილურობისა და მშვიდობის შენარჩუნება სულ უფრო დიდ მნიშვნელობას იძენს.“ ირაკლი კობახიძის თქმით, საქართველოს აქვს მოლოდინი, რომ აზერბაიჯანთან სავაჭრო-ეკონომიკური ურთიერთობები კიდევ უფრო გაღრმავდება, მათ შორის, გაღრმავდება თანამშრომლობა ინვესტიციების ზრდის მიმართულებით. აზერბაიჯანის პრეზიდენტი თბილისს დღეს ეწვია.
