NATO-ს სამშვიდობო მისიას შეუძლია, უზრუნველყოს მშვიდობა უკრაინაში, კიევის პირობებით. ამის შესახებ პოლონეთის მმართველი პარტიის „კანონი და სამართლიანობა“ (PiS) ლიდერი იაროსლავ კაჩინსკი აცხადებს.
კაჩინსკიმ ხაზგასმით აღნიშნა, რომ სამხედრო თვალსაზრისით, კიევმა უნდა მიიღოს ძალიან სერიოზული დახმარება, მათ შორის, საარტილერიო აღჭურვილობისა და სადაზვერვო ტექნიკის სახით.
„უკრაინას სჭირდება იარაღი და ამ კუთხით გარკვეული პრობლემებია", - აღნიშნა PiS-ის ლიდერმა.
„თუ ჩვენ გვინდა, რომ მშვიდობა იყოს, მაშინ ეს არ მოხდება NATO-ს სამშვიდობო მისიის ჩართვის გარეშე“, - აღნიშნავს იაროსლავ კაჩინსკი.
მოხდება თუ არა ეს? ამ შეკითხვაზე საპასუხოდ, პოლონელი პოლიტიკოსი ამატებს, რომ გამორიცხული არაფერია, თუმცა NATO-ს სამშვიდობო მისიის განთავსება უკრაინაში ნაკლებად სავარაუდოა.
კაჩინსკიმ არ გამორიცხა, რომ რუსეთის ომი უკრაინის წინააღმდეგ დიდხანს გაჭიანურდეს ან კონფლიქტი გაიყინოს ცეცხლის შეწყვეტით ან მის გარეშე.
ცნობისთვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.
14 აპრილს უკრაინის უმაღლესმა რადამ რუსეთის შეიარაღებული ძალების მოქმედებები უკრაინელი ხალხის წინააღმდეგ გენოციდად აღიარა. 19 აპრილს, რუსეთმა აღმოსავლეთ უკრაინაში აქტიური იერიში დაიწყო. 21 აპრილს, ლატვიისა და ესტონეთის პარლამენტებმა უკრაინაში რუსეთის ქმედებები გენოციდად აღიარეს. 28 აპრილს, კანადის პარლამენტმა უკრაინაში რუსეთის ქმედებები გენოციდად აღიარა.
რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა. დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.
ომის დანაშაულში ბრალდებულ პირველ რუსი ჯარისკაცს 23 მაისს, უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა. „რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა.
