უკრაინაში ხელისუფლების შეცვლა რუსეთის ამოცანად რჩება - ომის შემსწავლელი ინსტიტუტი

რუსეთის ომის მიზნები კვლავ უკრაინის ხელისუფლების შეცვლას უკავშრდება. ამის შესახებ ნათქვამია ომის შემსწავლელი ინსტიტუტის მოხსენებაშია  ნათქვამი.

„რუსეთის უშიშროების საბჭოს მდივანმა ნიკოლაი პატრუშევმა კიდევ ერთხელ გაიმეორა რუსეთის პრეზიდენტის ვლადიმერ პუტინის თავდაპირველი მიზნების შესახებ, ის ვარაუდობს, რომ კრემლი ინარჩუნებს მაქსიმალისტურ მიზნებს, მათ შორის რეჟიმის შეცვლას და ტერიტორიულ გაფართოებას დონბასის მიღმა“, - ნათქვამია ანგარიშში.

პატრუშევის განცხადებაზე დაყრდნობით, ანალიტიკოსები ვარაუდობენ, რომ რუსეთის სამხედრო ხელმძღვანელობა დონეცკისა და ლუგანსკის მიღმა წინსვლას განაგრძობს და რომ კრემლი გაჭიანურებული ომისთვის ემზადება, რათა უკრაინის გაცილებით დიდი ნაწილი დაიკავოს.

რაც შეეხება სიტუაციას ფრონტზე, ISW ამბობს, რომ რუსული ძალები ლისიჩანსკის ტერიტორიის დასავლეთით, სივერსკისკენ წინსვლას ცდილობენ. ისინი ასევე ცდილობენ ბახმუტის სამხრეთ-აღმოსავლეთით სოფლის გზებზე წვდომას, რათა სამხრეთიდან ქალაქში წაიწიონ წინ.

ცნობისთვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.

14 აპრილს უკრაინის უმაღლესმა რადამ რუსეთის შეიარაღებული ძალების მოქმედებები უკრაინელი ხალხის წინააღმდეგ გენოციდად აღიარა. 19 აპრილს, რუსეთმა აღმოსავლეთ უკრაინაში აქტიური იერიში დაიწყო.  21 აპრილს, ლატვიისა და ესტონეთის პარლამენტებმა უკრაინაში რუსეთის ქმედებები გენოციდად აღიარეს. 28 აპრილს, კანადის პარლამენტმა უკრაინაში რუსეთის ქმედებები გენოციდად აღიარა.

რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა. დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.

ომის დანაშაულში ბრალდებულ პირველ რუსი ჯარისკაცს 23 მაისს, უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა. „რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა.